Lubos gid nagapanginbulahan ang Leonardo Panaligan Command-New People’s Army (LPC-NPA) sa maisog bisan inferior nga yunit sang NPA sa pag-atubang agud depensahan ang kaugalingon batok sa superior nga kusog sang berdugong 62nd IB. Nagapahuway-huway ang yunit sang NPA sa balay halin sa malawig nga pagpanglakaton. Nagsugod ang engkwentro alas 5:30 tubtob 6:00 sang aga Nobyembre 28, 2022 sa Sityo Binataan, Quinten Remo, Moises Padilla.

Ginkasubo man sang tanan nga yunit sang LPC-NPA, mga pamilya kag mga rebolusyonaryong masa sa prenteng gerilya ang pagkamartir sang duha ka kaupod nga sanday Ka Jekoy (Mario Baldusa) sang sityo Yuring, Barangay Bulwang, Hinobaan, Negros Occidental kag Ka Jorge (Janhel Sarsa) sang Sityo Lower Moog, Barangay Planas, Guihulngan City, Negros Oriental. Nag-agum sang minor nga kapilasan kag buhi pa sila Ka Jekoy kag Ka Jorge matapos ang 30 minutos nga engkwentro. Wala na ikasarang magbato ang duha ka kaupod sa baylo nga hatagan sang nagakaigo nga pagtratar (first aid) sang militar, gintiro pa ini tubtob nga mapatay.

Mabaskog man ginakondenar sang LPC-NPA ang iligal nga pag-aresto sang mga katapo sang 62nd IB kag pagpriso sa mag-asawa nga sanday Wilben Callura kag Juliet Callura sang sityo Binataan, Brgy Quinten Remo, Moises Padilla sadtong Nobyembre 28. Tubtob karun nadetinar pa ang mag-asawa sa Magallon PNP station. Kadungan man sini nga adlaw (Nobyembre 28) ang pagpangawat sang 62nd IB sang mga manok, pag-ihaw sang baboy kag pag-strafing sa balay ni Virgie Perolino, Roberto Gario kag Jorenda Callura sang Sityo Binataan, Quinten Remo sang nasambit na nga banwa.

Ang kalakasan sang mga pasistang militar nagtuga sang pagbakwit sa indi magnubo sa 800 ka mangunguma halin Sa sityo Oway-uway, Binataan kag iban nga kasikbit nga sityo nga nagadislokar sang ila pagpuyo kag panginabuhian. Kadungan man sini nga ginakondenar ang padayon nga paglapas sang tawhanon nga kinamatarung sang pumuluyo antis pa natabo ang engkwentro sa Sityo Binataan sa tunga sang NPA kag militar sadtong Nobyembre 28; ang iligal nga pagpangransak sa mga kabalayan sa Sityo Ngalan, Barangay Quinten Remo, Moises Padilla:

Nobyembre 25, 2022 – wala sang ginpakita nga search warrant ang tropa sang 62nd IB kag 33rd DRC sang ginransak ang balay nanday Zaldy Jimenez, Richard Jimenez, Robert Jimenez, Cardo Juanites kag Sernel Juanites. Ginhimo nga kampo militar ang nasambit nga mga puluy-an halin Nobyembre 25 tubtob Nobyembre 28, 2022. Ang iban nga mga pumuluyo sa lugar ang wala na nagpalauli sa ila puluy-an bangud sang kahadlok.

Ginapanawagan sang LPC-NPA sa tanan nga sektor ilabe na ang taong-simbahan kag LGU Magallon nga maghimo sang separado nga imbestigasyon kaangot sa malala nga pagpanglapas sang tawhanon nga kinamatarung sang pumuluyo nga muklat ginakomiter sang pasistang militar sa kaumahan sa sakop sang Moises Padilla.

Ang kaisog nga ginpakita ni Ka Jekoy kag Ka Jorge batok sa kaaway sa patag-awayan ang matuod kag bulawanon nga kinaiya sang rebolusyonaryong Pulang hangaway sang banwa. Nagsakripisyo sang ila kinabuhi para depensahan ang mga masa kag rebolusyon. Wala nagsurender sang ila prinsipyo kag labaw sa tanan wala man nagbuhi sang ila nga armas atubang sa mga pasistang kaaway samtang nagapitik pa ang ila mga pulso. Buhi kamo nga handumon kag sulundon ang inyo mga rebolusyonaryong inagihan, kaisog kag pagsakripisyo.

Mapula kag rebolusyonaryong pagsaludo sa inyo Ka Jekoy kag Ka Jorge!
Mabuhay ang mga martir sa rebolusyon!
Kamo ang amon inspirasyon!