Dumadagundong ang protesta ng taumbayan laban sa malawakang korapsyon at katiwalian ng rehimeng Marcos simula Hulyo hanggang sa kasalukuyan. Ipinakita ng daang libong mamamayan na lumahok sa protesta noong Setyembre 21 sa Luneta, Edsa, Mendiola at sa iba’t ibang bahagi ng bansa ang hindi na mapipigilang galit ng taumbayan na nananawagan ng pagpapanagot sa lahat ng sangkot sa korapsyon at ng pagbabago ng sistema ng nabubulok na reaksyunaryong gubyerno. Kasama sa mga panawagan sa pagpapanagot ang tuta ng imperyalistang US na si Bongbong Marcos at ang anak ng kriminal na si Rodrigo Duterte at mandaramong ng confidential funds, si Sara Duterte.

Sa pagdaluyong ng protestang magbubukid ng Oktubre ay malaking bahagi ng kampanya ang paglaban sa korapsyon ng rehimeng US-Marcos dahil libu-libong pamilya ng mga magsasaka at mangingisda ang apektado at bagsak ang kabuhayan sa tuwing may malawakang pagbaha dulot ng mga ghost project at sub-standard na proyektong flood control. Maliban pa rito ay deka-dekada na rin ang mga farm-to-market roads (FMRs) at proyektong irigasyon ng punung-punong ng korapsyon. Mga FMRs na sa halip na makatulong sa magsasaka ay mga farm to subdivision, farm to sabungan at farm to malls ng mga malalaking negosyante at pulitiko sa bansa ang itinayo. O kaya, karaniwan ring ang budget ay para sa sementado, aspaltadong kalsada, ngunit ang ginagawa lamang ay paglalagay ng mga graba. Pinakamasaklap ay mga FMRs at irigasyon na iniulat na tapos na pero wala man lang nasilayan ang magsasaka at sa imbestigasyon sa reaksyunaryong senado at kongreso ay walang napanagot. Hindi na rin mabilang ang mga korapsyon sa mga proyektong ayuda at subsidyo tulad ng fertilizer scam at pamamahagi daw ng mga farm tools at binhi na wala ring napanagot.

Sa gitna ng trilyong pisong pondo ng bayan na kinukurakot ng gubyerno ay walang suporta sa pagsasaka at pangingisda ang mga baon sa utang at kahirapan na mga magsasaka at mangingisda.

Nagpapatuloy ang malawakang pangangamkam at pagpapalit-gamit ng lupa sa ilalim ng proyekto ni Marcos na Build-Better-More at pagpapalawak ng mga plantasyong pang-eksport tulad ng Oil Palm, pinya, saging at iba pang mga katulad ng proyekto. Kasabay nito ang pambabarat sa presyo ng palay na sumadsad na sa P7 kada kilo at mga gulay tulad ng patatas at carrots habang napakataas ng mga presyo nito sa palengke. Pinalalala ang ganitong kalagayan sa pagpapatupad ng mga neoliberal na batas at programa tulad ng Rice Liberalization Law, patakarang import-liberalization at Foreign Land Lease Act na nagpapalawig sa 99 taong dayuhang kontrol sa lupa at iba pa.

Magkakasabwat ang mga malalaking panginoong maylupa na kalakhan ay mga dinastiyang pulitikal o di kaya ay kaanak at kapartido ng mga korap at tiwalang upisyal ng gubyerno sa pagpapahirap sa mga magsasaka. Tumitindi pa ang pagsasamantalang pyudal at mala-pyudal sa anyo ng mataas na upa sa lupang sinasaka, mababang sahod ng mga manggagawang bukid, mataas interes sa pautang at upa sa gamit sa produksyon, pambabarat sa presyo ng mga produktong magsasaka habang napakataas ng gastos sa produksyon at hindi pantay na partehan sa aning produkto pabor sa mga panginoong maylupa.

Pasistang korap ang rehimeng US-Marcos. Naghahasik ito ng terorismo ng estado, at kabi-kabila ang pagsasampa ng mga gawa-gawang kaso, iligal na pag-aresto at pagkulong, paghuhulog ng bomba ng militar sa mga komunidad ng magsasaka, mga pagdukot at pagpatay sa mga magsasaka, mga kasapi at lider ng mga organisasyon sa kanayunan. Sa kabila nito ay pinalaki pa ang pondo ng Department of National Defense na punong-puno rin ng korapsyon ng mga upisyal ng AFP, PNP at NTF-ElCAC na naghahasik ng lagim at pekeng proyekto sa kanayunan sa bansa tulad ng P20-milyon kada barangay na Barangay Development Program na hindi ngayon malaman paano ipinatupad.

Katulad ng protesta ng taumbayan laban sa korapsyon sa gubyerno, matagal ng lumalaban ang mga magsasaka sa reaksyunaryong gubyernong inutil at nagpapahirap sa mga magsasaka, mangingisda at mamamayan sa kanayunan. Hindi sagot ang pinalutang na snap election ng mga oportunistang pulitiko at kudeta ng mga putsistang militar na ang nasa likod ay iluklok muli ang isa ring korap na pamilyang Duterte sa kapangyarihan. Hindi rin malulutas ng mga imbestigasyon ng gubyerno ang korapsyon sa bansa dahil nakaugat na ito sa burukrata kapitalistang sistema ng gubyerno na umiiral para magkamal na yaman ang mga halal at tiwaling upisyal ng gubyerno. Patunay rito na sa gitna ng mga imbestigasyon at protesta ay malapit ng ipasa ang 2026 National Budget na punong-puno pa rin na pork-barrel at un-programmed fund na isa sa pinagmumulan ng korapsyon.

Tama at nararapat lamang ang taktikal na panawagan ng taumbayan na papanagutin ang lahat ng mga mga sangkot sa korapsyon at baguhin na ang sistema ng reaksyunaryong gubyerno. Mahabang laban ito at kailangan ng mas malakas at mas malaki pang pwersa sa nakaraang protesta noong Setyembre 21 sa Luneta, Mendiola at Edsa. Mahalagang tungkulin na patuloy na imulat, organisahin at pakilusin ang mamamayan sa mas malalawak na protesta.

Dahil deka-dekada at paulit-ulit na lamang ang korapsyon at katiwalian sa gubyerno kung kaya’t dapat maunawaan ng malawak na mamamayan na ang ultimong solusyon para sa paggapi sa korapsyon at tunay na pagbabago ng sistema sa gubyerno ay sa pamamagitan ng Demokratikong Rebolusyon ng Bayan.

Kaisa ng taumbayan ang rebolusyonaryong Pambansang Katipunan ng mga Magbubukid (PKM) sa mga panawagang ito. Kailangan ng mas malawak at malakas na pagkakaisa ng rebolusyonaryong kilusang magsasaka sa kanayunan at ng mga kilusan ng mga manggagawa at panggitnang pwersa sa kalunsuran. Nanawagan ang PKM sa mga pwersa sa kalunsuran laluna sa mga libu-libong kabataan na lumahok sa protesta laban sa korapsyon na tumungo sa kanayunan at isanib ang lakas sa rebolusyonaryong kilusan ng magsasaka sa kanayunan at sa Bagong Hukbong Bayan upang buuin ang mas malawak at mas malakas na pagkakaisa para isulong ang tunay na pagbabago at itatag ang Demokratikong Gubyernong Bayan na siyang magpaparusa sa mga korap, pahirap at pasistang naghaharing uri.

Labanan ang korapsyon sa reaksyunaryong gubyerno! Ibagsak ang rehimeng US-Marcos!
Isulong ang Rebolusyong Agraryo! Ibagsak ang Burukrata Kapitalismo, Pyudalismo at Imperyalismo!
Mamamayan tumungo sa kanayunan at lumahok sa rebolusyonaryong kilusang magsasaka at Bagong Hukbong Bayan!