Ginapakamalaut sang Apolinario Gatmaitan Command-New People’s Army Negros Island (AGC-NPA) ang patraidor nga pagpatay kay Noynoy Ponteras (Ka Jojo) kag Marisa Pobresa (Ka Kim) sang Marso 8, 2025. Indi makatawo kag supak sa internasyunal nga laye sa gyera nga pagpatay sang mga hors d’ combat ukon wala sang igabato nga mga hangaway ang ginhimo sang mga demonyo nga reaksyonaryong pwersa sang estado sa duha.

Sang Marso 7, alas 8 sang gab-i, pwersa nga gin-abdak sang mga katapo sang Crime Investigation and Detection Group sanday Ka Jojo kag Ka Kim sa isa ka lugar sa Bacolod City, gintortyur antes ginsalbeyds kag gindala ang ila bangkay sa Sityo Paraiso, Barangay Caduhaan, Cadiz City.

Indi matuod nga napatay sila Ka Jojo kag Ka Kim sa engkwentro sa tunga sang NPA kag mga soldado sang #DiMasaligan79IB, sang Marso 8 sang kaagahon. Binutig kag paniplang sa publiko ang pahambog nga pahayag sang 303rd Brigade kag #DiMasaligan79IB nga pagkapatay sang duha ka mataas nga opisyal sang NPA. Luyag man sini mahugakom ang patong nga padya nga ginpatong sang reaksyonaryong estado kay Ka Jojo.

Tuman ka kabalan kag wala huya ang paggamit sang #DiMasaligan79IB sa bangkay sang mga biktima sa ila makasiligni nga krimen kag pagsakay sa pagpangasubo sang mga himata agud magpahamot sa publiko. Sa likod sang mga piktyur kag turnover sang bangkay pakadto sa pamilya nga ginpost sa social media, yara ang kakugmat kag pagpangharas sang #DiMasaligan79IB kag iban pa nga reaksyonaryo nga pwersa sang estado sa mga himata kag kaingod.

Ang natabo kay Ka Jojo kag Ka Kim nagapakita lang sang paggamit sang pasismo sang rehimen US-Marcos Jr sa pagresolbar sa ugat nga kabangdanan sang armado nga konplikto sa pungsod. Indi sensiro ang ining rehimen nga solbaron ang problema paagi sang pagsabat sa ugat sang krisis sosyo ekonomiko kag pulitika nga nagtuga sang grabe nga pag-antus sa gutom kag kaimolon sa malapad nga pumuluyong Pilipino kag kagamo sa pulitika sa pungsod. Ang mga nagalanog nga reklamo kag demanda sang malapad nga pumuluyo sa mga kadalanan ginapahipos paagi sa pagpang-abdak, pagpamatay, pagpangsalbeyds, pagpangpriso kag pagpamahog nga wala sang kinalain sa modos kag iskema sang iya ginbuslan kag gin-aresto sang International Criminal Court (ICC) nga anay presidente nga si Rodrigo Duterte.

Ang natabo subong kay Duterte kag iya amay sadto nga si Marcos Sr pagpakita kag pahanumdum kay Marcos Jr nga ano man ka lawig sang panahon indi malikawan kag malab-ot sang malaba nga kamot sang hustisya sang pumuluyo ang nagahimo sang inhustisya sosyal sa malapad nga pumuluyong Pilipino.

Ang paggamit sang pasismo kag paglikaw sa pagsabat sa ugat sang problema sang pungsod sang rehimen US-Marcos amo ang mangin gatong sa padayon nga pagluntad, pagsagrab kag pagbaskog sang armadong rebolusyon sa pungsod ilabi na sa isla sang Negros. Mismo ang pumuluyo paagi sa ila hangaway nga NPA amo ang magapangita kag magapatuman sang hustisya sa mga biktima sang pagpamigos kag pagpanghimulos sang nagahari nga sahi.

Hustisya para kay Ka Jojo kag Ka Kim!
Padayon ang pagsulong sa demokratiko nga rebolusyon sang pumuluyo!