Sunod-sunod ang krimen nga ginhimo sang 15th IB sa Brgy. Camindangan, Sipalay City, Negros Occidental. Pagkatapos sa pagpatay sa nasambit nga militar kay Reggie Fundador sadtong Hulyo 30, ginpatay naman sang berdugo nga 15th IB ang isa pa ka hors de combat sadtong Agosto 1, sa Sityo Cambuguiot sa pareho man nga barangay.

Ang biktima ginkilala nga si Alvin Lumagsao Sinsano (Ka Zian). Ginpalibutan sang mga soldado ang balay nga iya ginpahuwayan sa nasambit nga sityo, alas 2:00 sang hapon sadtong Agosto 1. Wala sang presensya sang yunit sang NPA sa amo nga lugar. Indi matuod kag panghinabon lang nga may engkwentro nga natabo sa tunga sang yunit sang Armando Sumayang Jr Command- New People’s Army (ASJC-NPA) kag mga pwersa sang 15th IB. Pareho sa kay Ka Tata, isa ka hors de combat si Ka Zian kag wala sang ikasarang nga magbato.

Ginapakamalaut sang ASJC-NPA ang sunod-sunod nga krimen sa gyera kag paglapas sang internasyunal nga makitawhanon nga laye sang Armed Forces of the Philippines (AFP). Ang mga ido-ido kag kriminal nga AFP-Philippine National Police (PNP) kag paramilitar sini, sa idalum sa pagpamuno ni US-Marcos Jr, dapat manabat sila sa ila makasiligni nga mga ekstrahudisyal nga pagpamatay kag iban pa nga mga bayolasyon sa tawhanon nga kinamatarung. Nagapamatuod nga wala sang papel kag tubtub lang sa propaganda ang gintanyag nila nga amnestiya agud ipatalang ang pumuluyo nga indi sila mga mapintas nga sapat sa atubang sang publiko. Apang bisan ano nila ka tago, nagalapaw na ang ila mga bangkil sa kapintas sa kaumhan.

Ginapanawagan sa tanan nga yunit gerilya sa idalum sang ASJC-NPA nga maglunsar sang mga madinalag-on nga taktikal nga opensiba agud pabayron sang daku ang AFP-PNP, paramilitar, kag mga traidor sa rebolusyon sa ila mga krimen sa pumuluyo.

Ang kabuhi nga ginhalad ni Ka Zian para sa masa kag sa rebolusyon mangin tinubdan sang inspirasyon kag kadasig sang tanan nga mga rebolusyonaryo nga pwersa, Pulang Hangaway, kag Partido nga labi pa isulong ang armado nga paghimakas sa mas mataas nga halintang tubtub sa kadalag-an. Naarmasan sang rebolusyonaryo nga kapagsik kag optimismo, ginpamatud-an ni Ka Zian ang pagkamakatarunganon sang rebolusyon. Hugot ang iya panindugan nga alagaran ang pumuluyo, kabuhi man ang iya ihalad.###