Sa paggunita ng unang anibersaryo ng pagpanaw ni Josephine “Ka Sandy” Mendoza, ay ating inaalala at pinagpupugayan ang kanyang buhay na inialay sa sambayanan. Si Ka Sandy ay isang huwarang Rebolusyonaryong walang-pagod sa paglilingkod, nagpamalas ng walang-katapusang malasakit, at hindi-matitinag na tapang sa harap ng anumang panganib. Siya ang nagbigay-kahulugan sa tunay na paglilingkod sa bayan, hindi lamang sa salita kundi sa bawat kilos at sakripisyo. Sa kanyang alaala, tinataas natin ang ating mga kamao at tinatanggap ang hamon na ipagpatuloy ang laban.

Isang taon matapos ang pagpanaw ni Ka Sandy ay tuluy-tuloy na humahagupit ang pasismo ng reaksyunaryong estado, hindi tumtigil ang mga berdugo at uhaw sa dugong mga elemento ng estado sa kanilang mga pang-aabuso at paghahasik ng lagim sa kanayunan at kalunsuran pero sa kabila nito, ang buhay at ang mga aral na kanyang iniwan ay siyang nagsisilbing inspirasyon sa aming mga mananananggol ng bayan. Patuloy naming pinapatupad at isinasapraktika ang kanyang mga tagubilin na mapagpasyang harapin ang bawat atake at pagsubok, paghugutan ng lakas ang masa, at maging mapamaraan sa lahat ng panahon habang aktibong dinedepensahan ang rebolusyonaryo at demokratikong kilusan. Patuloy kaming nagpupunyagi na ipagtanggol ang mamamayang ating pinaglilingkuran at kailanman ay hindi magpapatinag ang laksa-laksang mamamayang lumalaban.

Sa puso ng Timog Katagalugan, si Ka Sandy ay naging sagisag ng hindi matatawarang pagmamahal sa bayan. Sa kanyang bawat yapak ay nakiisa ang boses ng mga walang tinig, ang hinagpis ng mga naaapi, at ang pag-asa ng mga naghahangad ng pagbabago. Isang kasamang lubos na nauunawaan ang hirap, pangarap, at pag-asa ng kanyang mga pinaglilingkuran. Nagsilbing gabay siya sa kanyang mga kasama, nagtanim ng inspirasyon sa puso ng mga kapwa rebolusyonaryo, at nag-iwan ng mga aral na magsisilbing patnubay sa darating pang mga henerasyon.

Sa kabila ng mga panganib, si Ka Sandy ay tumindig para sa karapatang pantao ng bawat mamamayan. Buong lakas niyang ipinagtanggol ang Karapatang Pantao sa gitna ng mga banta at pang-aabuso, at itinaguyod niya ang dignidad ng bawat isa sa kabila ng lahat ng panganib. Ang kanyang mga laban ay naging ating lakas, at ang kanyang tapang ay nagpapaalala sa atin na ang paglilingkod sa bayan ay hindi natitinag ng takot o pang-aapi.

Ilan sa mga dakilang ambag ni Ka Sandy bilang tagapagtanggol ng karapatang pantao ay ang kanyang walang-takot na paglaban sa pananalasa ng bayarang sundalo ni Gloria Macapagal-Arroyo na si Jovito Palparan Jr. sa Mindoro at ang pagtatanggol sa mga magsasaka ng Southern Quezon Bondoc Peninsula (SQBP). Sa bawat yugto ng kanyang pamumuno, maingat at masigasig niyang ginabayan ang demokratikong kilusan upang salagin at pigilan ang marahas na pag-atake ng estadong papet at pasista na kontrolado ng malakolonyal at malapyudal na sistema. Si Ka Sandy ay nasa unahan ng paglaban sa lagim ng pang-aabuso, pinamunuan niya ang mahusay na pagharap sa mga pagtatangka ng estado na pahinain ang pambansang demokratikong kilusan sa mga eskwelahan, pagawaan, at komunidad sa buong rehiyon.

Hindi siya nagpatinag sa harap ng mga krimen at atake na ginawa ng estado at ng naghaharing uri laban sa mamamayan. Pangunahin niyang atas ang ilantad ang mga berdugong may sala at pag-oorganisa ng pinakamalawak na hanay ng mamamayan upang kundenahin at labanan ang pasismo. Matalino niyang ginamit ang lahat ng pamamaraan ng kilusang masa—mula sa ligal at iligal, lantad at lihim na mga aksyon, at ang pagbuo ng mga alyansa sa hanay ng mga panggitnang pwersa—upang magtagumpay sa paglaban. Sa kanyang mahusay na direksyon, naipagtanggol ang karapatan ng mga magsasaka, manggagawa, at iba pang inaaping sektor. Sa pangunguna ni Ka Sandy, nanindigan ang kilusan sa Timog Katagalugan para sa karapatan at kagalingan ng bawat mamamayan sa pamamagitan ng matipuno at lumalabang rebolusyonaryong kilusang masa na nag-ambag sa pagpapalakas ng Demokratikong Rebolusyong Bayan .

Ka Sandy, sa iyong alaala kami’y nabubuhay nang may tapang, na handang ipagpatuloy ang laban. Ang iyong sakripisyo ay hindi mawawalan ng saysay. Nasa bawat puso ng kasamang magpapatuloy sa iyong mga yapak ang iyong mga pangarap, at ang iyong alaala ay patuloy na magbibigay-liwanag sa ating landas. Ka Sandy, darating din ang lipunang iyong pinaglaban, kasama ka namin sa pagkamit ng tagumpay para sa isang lipunang may tunay na katarungan kung saan ang lahat ay tumatamasa ng mga karapatan, rebolusyonaryong hustisya at may ganap nang kalayaan at kapayapaan.

Pinakamataas na Pagpupugay Ka Sandy! Hindi ka namin malilimutan. Ang iyong pamana ang magiging lakas ng bawat isa sa amin. Patuloy mong bibigyang-buhay ang inspirasyon ng pakikibaka sa puso ng bawat manananggol ng bayan.