Nagmadinalag-on ang serye nga opensiba sang New People’s Army (NPA) sa Central Negros. Duha (2) ang napatay kag usa (1) man ang nasamdan sa mga katapo sang 62nd IB sa tatlo ka asud-asod nga opensiba sang NPA batok sa naga-operasyon nga tropa sang berdugong 62nd IB kahapon, Nobyembre 21, 2022, sa Barangay Trinidad, Guihulngan City, Negros Oriental. Isa (1) man ka intel asset sang militar ang ginsilotan kamatayon sang NPA.

Nobyembre 21, alas 4:10 sang hapon, ginharas sang Leonardo Panaligan Command-New People’s Army (LPC-NPA) ang isa (1) ka platun sang pasistang tropa sang 62nd IB sa Sityo Tuko, Barangay Trinidad, Guihulngan City. Duha (2) ang KIA sa nasambit nga tropa militar. Samtang alas 4:30 sang hapon gin-snipe naman sang isa pa ka yunit sang LPC-NPA ang isa (1) man ka platun sang lain pa nga yunit sang 62nd IB nga naga-operasyon sa Sityo Tuko, Barangay Trinidad sa gihapon. Nagresulta naman sang pagkasamad sang 1 pa ka katapo sang 62nd IB.

November 20 sang gab-i, madinalag-on man nga ginsilotan kamatayon sang NPA si Jovanie Omboy sa Sityo Haroy, Barangay Montilla, Moises Padilla, Negros Occidental. Ini nakabase sa desisyon sang rebolusyonaryong korte sang pumuluyo. Si Omboy pila na ka beses nga gin-istorya sang NPA. Ginsaway kag gin-edukar, kag ginpaandaman sa duha (2) ka beses apang nagpabilin nga nagpakatig-a kag pabilin nga masupog nga intel asset sang militar.

Si Jovanie Omboy ang regular nga nagareport sa Barangay Montilla Army Patrol Base. Tuig 2020 liwat naman ini nga nagpaniktik sa hulag sang NPA kag gilayon nagareport sa nasambit nga Army Patrol Base. Nagahupot man ini sang armas-luthang, abusador kag bahidor. Rason nga ginpamatbatan sang korte sang pumuluyo sang silot nga kamatayon sadtong tuig 2021.

Ang sunud-sunod nga opensiba sang LPC-NPA sa Central Negros ang padayon man nga sabat sang NPA sa padayon man nga mga bayolasyon sang 62nd IB sa tawhanon nga kinamatarung.

Samtang, lubos man ginakondenar sang Leonardo Panaligan Command ang brutal nga pagpatay sang nasambit nga berdugong militar kay Victor Baldonado sang Sityo Columbia, Barangay Trinidad, Guihulngan City sadtong November 21, 2022 alas 6:00 sang aga atubang sa iya asawa kag kabataan mismo sa ila puluy-an. Wala sang engkwentro nga natabo kag indi katapo sang NPA si Victor Baldonado. Si Baldonado ang biktima sang red-tagging sang militar halin pa tuig 2017. Isa siya ka sibilyan kag madugay na nga gapanguma sa lugar. Kabutigan kag taliwas ini ang pagpasibangud sang militar kay Victor Baldonado.

Dugang pa nga magtuki sang kahuyangan sang berdugong militar. Padayon nga maglunsar sang taktikal nga opensiba batok sa pasistang tropa militar! Silotan ang 62nd IB para sa tunay nga hustisya sa ila mga biktima!