Mariing kinukundena ng NDF-Mindoro ang pambobomba at pamamaril ng 4th IBPA at 203rd IBde sa Sityo Lomboy, Barangay Panaytayan, Mansalay, Oriental Mindoro noong Marso 1. Marapat singilin at papanagutin ang 203rd IBde sa panibagong bugso ng paghahasik ng takot at teror sa mamamayang Mindoreño.

Unang nagpakana ng pekeng labanan ang 4th IBPA noong umaga ng Marso 1 sa Sityo Lomboy. Sumunod ang pagpapalipad ng mga berdugo ng dalawang Blackhawk helicopter at walang habas na pang-istraping sa lugar alas-10 ng umaga. Pagsapit ng 2:30 ng hapon, pinasabugan ang lugar ng apat na bomba. Sa bidyong kuha ng mga residente sa kalapit na baryo, nakita rin ang mga lumilipad na eroplanong pandigma bukod pa sa mga helicopter.

Hindi na lamang simpleng pekeng balita ang ginawa ng 203rd Bde, sa pagkakataong ito, peke o moro-morong labanan naman na diumano’y may kasagupa itong mga mandirigma ng NPA. Ang katotohanan, walang NPA sa lugar nang mangyari ang walang habas na pamumutok at pambobomba. Ito ang tunay na mukha ng terorismo ng 203rd IBde kung saan para likhain ang takot sa hanay ng mamamayan at katutubo ay walang patumanggang magpapasabog at/o magpapaputok kahit na walang armadong kalaban.

Apektado ng pambobomba ang buhay at kabuhayan ng mga residente ng mga sityo ng Lomboy, Abaka, Canumay, Amaga, Tangkulang, Proper at Buol ng Barangay Panaytayan; at mga sityo ng Badi, Sayt at Puyuhan ng Barangay Teresita, kapwa sa bayan ng Mansalay. Walang pakundangan itong isinagawa ng AFP nang walang pagsasaalang-alang sa buhay ng mga sibilyang maaaring tamaan ng bala o sabugan ng bomba. Tiyak na napinsala rin ang mga pananim na niyog, saging, kamote, balinghoy at anyamo (tambo). Ang mga ginawa ng 203rd IBde ay paglabag sa internasyunal na makataong batas ng Geneva Conventions Protocol II na nagsasaad na igalang ang mga karapatan ng mga sibilyan sa gitna ng gera sibil.

Ang panghahalihaw ng 203rd IBde sa Mansalay ay larawan ng tindi ng terorismo ng estado laban sa mamamayan. Ang Barangay Panaytayan ay isa sa mga baryong hindi inaagwatan ng mobile retooled community support program (MRCSP) ng 203rd IBde mula pa sa nagdaang mga taon. Tuluy-tuloy rin ang focused military operations sa barangay at karatig nito lalo matapos ang naganap na labanan sa kalapit nitong Barangay Teresita noong Pebrero 11.

Ang Barangay Panaytayan ay inilagay sa prayoridad na barangay ng NTF-ELCAC sa balangkas ng kontra-rebolusyonaryong gera ng JCP-Kapantagan at nagpapatuloy sa ilalim ng NSP 2023 ng rehimeng Marcos II. Noong rehimeng US-Duterte, sapilitang nagpasuko ng 200 Mangyan Hanunuo ang 203rd IBde mula sa Barangay Panaytayan para ibandila na “nagtatagumpay” ang kanilang kampanya laban sa NPA. Kasalukuyang may 11 kampo sa Barangay Panaytayan—4 na detatsment at 7 MRCSP. Ang sobra-sobrang bilang ng mga pwersang militar sa barangay ay nagdudulot ng dumaraming kaso ng paglabag sa karapatang pantao kagaya ng pambubugbog, panununog, iligal na imbestigasyon, panghaharas, intimidasyon at saywar sa mga residente. Bukod sa mga ito, ipinatutupad rin ng mga militar ang blokeyo sa pagkain at pagkontrol sa aktibidad ng mga sibilyan kabilang ang pagkakaingin na tanging kabuhayan ng mga residente. Kabaligtaran ng ipinamamarali ng AFP na naghahatid ito ng kapayapaan, lalong lumala ang antisosyal na aktibidad sa barangay kagaya ng dati nang inirereklamo na nakawan ng mga hayop at pananim.

Nananawagan ang NDF-Mindoro sa mga mapagkawanggawang institusyon, naliliwanagang lingkod bayan at iba pang grupong tagapagtanggol ng karapatang pantao na tulungan ang mga apektado ng pasistang pang-aatake ng 203rd IBde sa isla. Hinahamon namin ang mga makabayan at tunay na lingkod bayan at abogado na ipagtanggol ang karapatang pantao ng mamamayang Mindoreño. Makiisa sa panawagang itigil ang militarisasyon sa kanayunan.

Sa gitna ng pasistang teror, higit na kailangang magkaisa ang buong Mindoro upang labanan ang paninibasib ng berdugong estado. Pakilusin ang masang Mindoreño at katutubong Mangyan para paigtingin ang anti-pasistang paglaban at igiit ang pang-ekonomyang kagalingan.

Militar sa kanayunan, palayasin!
AFP-PNP, singilin at pagbayarin sa mga krimen sa bayan!