Kabaraan a kablaaw ken kangatuan a pammadayaw ti idandanun ti National Democratic Front (NDF)- Ilocos iti maika- 53 anibersaryo ti New People’s Army ita nga aldaw!

Makipagrambak ti NDF-Ilocos iti amin a kakadwa ken masa iti nasurok lima a dekada a balligi ti NPA iti panangiyabante iti rebolusyonaryo nga armado a dangadang tapno dupraken ti imperyalismo, burukrata kapitalismo ken pyudalismo ken ibangon ti sosyalismo. Ti balligi ti NPA iti 53 a tawen ket mangmangted inspirasyon iti umili a Pilipino tapno naturtured ken napingpinget da a labanan ti tiraniko a rehimen Duterte ken ti sumukat a mangimaton iti despotiko nga estado

Salsaluduan ti NDF-Ilocos amin a kakadwa a nagbuwis karaman dagiti natibker a mangitultuloy iti daytoy a naindaklan a dangadang. Pinili dagitoy a kakadwa nga agarmas, agsakripisyo ken agibuwis ti biag tapno salakniban ti soberanya, wayawaya ken karbengan ti umili a Pilipino, imbes a sumuko kadagiti agtuturay.

Ti pannakaibangon ti NPA idi Marso 29, 1969 ket signipikante la unay iti pakasaritaan ti pagilian ta intuloy daytoy ti istorikal nga armado a panaglaban ti umili a Pilipino para iti nailian a wayawaya. Babaen ti panangidaulo ti Partido Komunista ti Pilipinas ken pannarabay ti Marxismo-Leninismo-Maoismo, insayangkat na ti pinabaro a demokratiko a rebolusyon ti umili a Pilipino a narugian iti Umuna a Rebolusyon idi 1896 tapno dupraken ti malakolonyal ken malapyudal a gimong ken ibangon ti sosyalista a gimong.

Iti unos ti nasurok lima a dekada, pinaay ti NPA ken umili a Pilipino ti sapata dagiti nagsusukat a rehimen a rebbeken ti gubat ti umili. Amin a gandat da ket ad-adda a mangrubrubrob iti pakinakem ti umili a lumaban iti pasista a panangidadanes ken iti kumarkaro a panangparigat ti estado iti umili iti sidong ti umun-uneg a krisis ti malapyudal ken malakolonyal a gimong.

Iti mandar ti commander-in-chief da a ni Duterte, iwarwaragawag ti AFP ken NTF-ELCAC a narebbeken ti rebolusyonaryo a dangadang ti umili ken ti CPP-NPA-NDF ditoy Ilocos. Kalpasan daytoy iti tuloy-tuloy a panangriribuk ken kinaranggas da kadagiti komunidad. Minamauyong a paspasukuen da kas “NPA a rebelde” dagiti sibilyan a lider ken kamkameng dagiti demokratiko a timpuyog ti umili. Saan nga agsardeng ti red-tagging ken pammutbuteng kadagiti umili a mannalon, mangngalap, mangmangged ken dadduma a marigrigat nga agrekreklamo laeng iti patuloy a panagtayok ti gastos ken panagbagsak iti produksyon gapuanan ti tuloy-tuloy a panagngato ti presyo ti langis ken importartasyon iti nateng, bagas, ikan ken karne. Bayat a kamkamkamen da ti ansestral a daga para iti panagpalawa kadagiti negosyo kas ti windmill ken dam, liplipiten ti NTF-ELCAC ken dagiti intelligence asset ti AFP ken PNP dagiti nailian a minorya nga agkedkedked.

Tapno salakniban ti umili iti nadumaduma nga atake ken pananglipit ken kinaranggas ti kabusor kadakuada, napinget a nakirinrinnupak ti NPA ti Ilocos iti tuloy-tuloy ken nasedsed a Focused Miitary Operations ti AFP-PNP. Gapu ditoy ket nagsagrap da kadagiti kaswalti manipud 2020. Iti laksid daytoy, nangato latta ti moral da a mangak-aklon kadagiti taktikal a pannakapaay ken sipapakumbaba nga agad-adaw kadagiti napapateg nga adal. Gapu iti daytoy a rebolusyonaryo nga aktitud a pammaneknek iti kinapudno nga agserbi iti umili, nakabarbara latta ti suporta ti umili kadakuda ken maik-ikkan da ti inspirasyon a mangitultuloy iti rebolusyon.

Kadagiti erya a temporaryo nga inadaywan dagiti yunit ti NPA iti Ilocos, awan sarday ti panagtignay ti masa tapno ilaban dagiti pagimbagan da. Iti laksid ti panangliplipit ti kabusor kadakuada, saan a maikkat ti gagar da nga agrebolusyon ken ipinget ti armado a dangadang. Agtultuloy nga agpapaadu ken agkonkonsolida dagiti rebolusyonaryo a timpuyog ti masa a nakapauneg iti NDF. Itultuloy da nga ilaban ti kalikagum da a mawaswas dagiti nadumaduma a langa ti pannakagungundaway da.

Paguuray da ti panagsubli ti kakadwa a Hukbo tapno ad-adda da pay a tumured ken rumegta iti panagtignay da. Agur-uray dagiti agtutubo ken mannalon kadagiti yunit ti NPA tapno makitipon kadakuada. Agur-urnong dagiti masa ken alyado a makintengnga a puersa iti nadumaduma a suporta a materyal a maipatulod kadagiti kakadwa a Nalabbaga a mannakigubat.

Kadagiti met erya a pagpalpalawaan ti Hukbong Bayan, nabara ti panagpasangbay ti umili kadakuada. Dagiti damo a makakita ti kakadwa nga NPA ket saan nga agbuteng nu di ket maragsakan da a makaam-ammo kadakuada. Napalaus met ti panagyaman da iti panagsangbay ken panagsubli kakadwa kadagiti lugar da. Adu met dagiti masa a nga agbirbirok ti pamuspusan a makasilpo iti kakadwa.

Sadinno man nga erya, saan nga ib-ibbatan ti NPA iti Ilocos ti rebbengen a mangriing, mang-organisa, mangpatignay ken bumayabay iti masa. Tuloy-tuloy nga ad-adalan ken igigiya da ti masa nga amirisen dagiti agtutupatop nga isyu a pakaseknan da ken kasano a resolbaen dagitoy. Patuloy a lablabanan da dagiti panang-agaw ti ansestral a daga para kadagiti makakadadael a negosyo. Iti panawen ti pandemya, inkagumaan da nga agipaay kadagiti napapateg a serbisyo medikal ken pangsalun-at ken tumulong iti panangipangato ti produksyon ti mannalon tapno labanan ti krisis nga intunda ti pandemya.

Kasano man ti pannakaliplipit da, ikagkagumaan dagiti masa a saan a sumuko iti terorista nga estado. Ditoy Ilocos, awan uray maysa a sibilyan ti boluntaryo a simmuko iti NTF-ELCAC ken agpapaaramat kas intelligence asset ti military ken pulisya.. Dagiti iparparang da iti publiko a “CPP-NPA surrenderees” ket inosente a sibilyan a linipit da ken inpasidong iti mental torture. Daytoy ket pakakitaan nu sadinno ti ayan ti loyalty wenno pagtaklinan ti umili, nga awan sabali a nu di iti soldados da ken ti rebolusyon.

Saan a makigkigtot ti NDF ken umili iti Ilocos ti waragawag ti AFP a nadupraken ti rebolusyonaryo a tignay ken naburaken ti panagkaykaysa ti Nalabbaga a Hukbo ken iti umili. Bayat nga ipugpug-aw da ti agdadata nga inuulbod, ad-adda a tumibtibker ti panagkaykaysa da nga iyabante ti armado a rebolusyon. Iti nairut a panagkammayet ti umili ken NPA, sigurado nga agballigi ti rebolusyon.

Iti panagrambak iti maika-53 anibersaryo na, ipekpeksa ti NDF-Ilocos ti pangngeddeng na nga ad-adda pay a pairuten ti pannakikaykaysa iti NPA nga iyabante ti gubat ti umili. #