Read in: Pilipino

Gipusil patay sa mga kapulisan si Silvester “Cecel” Nunez, 54 anyos ug mag-uuma sa P2. Brgy. Trinidad, Surigao City niadtong Enero 20, 2021. Sa dihang naay nanuktok sa ilang pultahan sa may ala 1 sa kaadlawon, giablihan kini sa asawa ni Nunez. Dayon gitiunan sa mga pulis ang asawa, gipagawas ang pamilya sa balay samtang nabilin si Cecel sa sulod, nakita pa sa iyang asawa nga gitamakan ang likod sa iyang bana ug giposasan kini sa mga kapulisan. Gipalong ang suga sa balay ug nakadungog nalang ang pamilya sa gawas og buto. Taud-taod niabot ang SOCO ug gikuha ang patayng lawas sa biktima.

Ang pagpatay kang Nunez usa ka joint operation sa kapulisan sa Surigao del Norte nga gipangulohan nila Lt. Col. Infante sa Provincial Intelligence Unit, SDN PMFC ni Lt. Canete ug sa Surigao City Police ni Lt. Col. Rafols II.

Ika unom (6) na nga mag-uuma sa Surigao del Norte si Nunez nga biktima sa pagpusil patay sa mga berdugong kapulisan ug mga killer batalyon sa militar. Gikan sa pagpatay kay Jojie Udtohan, Tay Budoy Leyson Sr ug si Lalo Calang sa Sison, si Tukoy Arevalo sa Surigao City ug si Lezer Cerra sa Gigaquit wala pay bisan usa ka imbestigasyon ang milambo ug walay bisan kinsa ang nanubag sa linuog nga mga pagpatay sa mga sibilyan.

Hugot nga gikondena sa BHB-Surigao del Norte ang pagpatay kang Nunez ug sa uban pang biktima sa kamangtas sa berdugong kapulisan ug sa mga killer batalyon sa militar sa AFP. Makusganong gipanghimakak usab namo nga membro kuno kini sila sa Bagong Hukbong Bayan kay sa tinuod mga yanong mag-uuma ra kini sila ug mapatud-an kini sa ilang mga pamilya, silingan ug opisyal sa ilang mga baryo.

Gani, sum-ol na ang balik balik nga mga istorya sa mga berdugong kapulisan ug mga kasundaluhan sa AFP nga kuno ang mga biktima misukol human sa pagserve og warrant sa ila, nakuhaan og granada ug 38 revolver ug uban pang klarong giplanted sa mga berdugo. Kakunsabo pa sa mga berdugong kapulisan ang SOCO ug ang piskalya aron murag tinuod ang ilang akusasyon sa mga biktima pinaagi sa pagpasang-at og tinumo-tumong kaso ug ang paglegalisa sa ilang pagpamatay.

Sa tinuoray, wala nay laing kapahimungtan ang mga mangtas nga kapulisan ug militar ni Duterte. Tungod sa NTF-ELCAC ug sa balaod nga anti-terror, obligado sila nga mudakop, manghulga, mangsaywar ug mopatay bisan kinsang gusto nilang akusaran nga membro kuno sa NPA. Desperado ug hinungog kini nilang ginapatuman kay nagsalig sila nga duphan sila ni Duterte ug makaikyas sa pagpanubag sa ilang mga binuhatang kriminal.

Busa, ang BHB- Surigao del Norte uban sa rebolusyonaryong pwersa mapursigihong nanawagan sa katawhan nga dili magpakahilom, dili mahadlok ug kinahanglang maghiusa aron suklan ang kabangis ug pasismo sa PNP, AFP ug sa reaksyonaryong goberno ni Duterte. Ibutyag ang mga binuhatang kriminal sa estado ug ipabarog ang demokratikong katungod sa katawhan.

Laoman sa katawhan nga kab-uton nato ang hustisya alang sa mga biktima sa paglapas sa tawhanong katungod pinaagi sa pagpa-asdang sa demokratikong rebolusyon sa katawhan!

Hustisya alang kang Cecel Nunez!
Hustisya alang sa tanang biktima sa ekstrahudisyal nga pagpatay!
Papanubagon ang berdugo ug killer nga kapulisan Surigao del Norte!
Silotan ang tanang kriminal sa PNP ug AFP!