Ngayong World Children’s Day, ipinapanata ng Melito Glor Command (MGC)-NPA Southern Tagalog ang pagtatayo ng lipunang malaya, masagana at makatarungan para sa mga bata sa pamamagitan ng pagsusulong ng demokratikong rebolusyong bayan.

Sa ilalim ng bulok na sistemang malakolonyal at malapyudal na lipunang Pilipino, walang magandang kinabukasang naghihintay sa mga bata. Patuloy na naghihirap ang mayoryang Pilipino na nagmumula sa uring anakpawis. Sila ang mga magulang na nagsusumikap na maghanapbuhay para bigyan ng mas magandang bukas ang mga bata. Subalit nananatiling wala at kulang sa lupa ang mga magsasaka, hindi sapat ang sahod at walang kaseguruhan sa trabaho ang mga manggagawa, bumabagsak ang kabuhayan maging ang mga propesyunal at lumalaki ang bilang ng reserbang hukbo ng lakas-paggawa habang hinuhuthot ng mga naghaharing uri ang kalakhan ng yaman ng bansa.

Nililikha ng reaksyunaryong gubyerno ang kundisyon para mapawalay ang mga magulang sa kanilang anak. Napipilitan ang milyun-milyong Pilipino na mangibang-bansa upang maghanap ng trabaho at matustusan ang pangangailangan ng kanilang mga anak. Animo’y kalakal na inilalako ng estado ang mamamayan nito kaya’t lumulobo ang bilang ng mga migranteng Pilipinong binubusabos ng mga patakaran at kasunduan sa mga banyagang bansa na nangangailangan ng murang lakas-paggawa.

Labis ang kapabayaan ng estado sa kapakanan ng mga bata. Dahil sa hirap ng buhay, napipilitan ang mga batang magtrabaho upang makatulong sa pamilya. Hindi rin sila nakakatamasa ng sapat na serbisyong panlipunan. Habang kinakamal nina Marcos at Duterte ang pambansang badyet, napakaraming paaralang sira-sira, kulang sa mga guro, klasrum at kagamitan sa pag-aaral. Sa kanayunan, malalayo ang mga paaralan na nilalakad lamang ng mga bata araw-araw. Nagtitiis sila sa mahihirap na daan para lamang makapasok. Marami sa kanila ang hindi na nakakatuntong sa paaralan o maagap ng tumitigil sa pag-aaral dahil sa kawalan ng akses sa malapit na eskwelahan. Kapos ang serbisyong pangkalusugan na tinatamasa ng mga bata. Sa batbat ng korapsyon na pambansang badyet 2026, kinaltasan ng ₱130 bilyong pondo ang Philhealth. Maanomalya ang programang ito na inaasahan sana ng karaniwang Pilipino na makakatulong sa kanilang makabawas sa gastusin sa serbisyong pangkalusugan.

Mga bata rin ang pangunahing apektado sa pagragasa ng mga bagyo at iba pang kalamidad sa bansa. Ayon sa UNICEF, umabot sa 1.7 milyong bata ang naapektuhan ng hagupit ng bagyong Tino pa lamang, iba pa ang apektado ng bagyong Uwan. Kabilang sa mga ito ang mga batang natabunan ng putik at baha sa Visayas. Higit pang tumitindi ang pahirap dahil sa kakapusan ng ayuda sa tuwing may sakuna.

Wala ring patawad ang mga ahente ng estado sa pangunguna ng NTF-ELCAC at AFP-PNP sa paglabag sa karapatang tao ng mga bata. Militarisado ang mga komunidad na kanilang tinitirhan laluna sa kanayunan. Sa mga komunidad ng pambansang minorya sa Rizal, Quezon, Mindoro at Palawan, laging may banta ng pangmomolestya at panggagahasa sa mga bata. Maging ang mga paaralan ay pinapasok ng AFP-PNP sa ngalan ng inihahasik nitong kontra-rebolusyonaryong gera at sa buktot na katwirang “iligtas umano ang mga bata”. Inirereklamo sila ng mga magulang at guro ng mga kabataan dahil sa hinahasik nilang takot sa mga bata. Umaabot ng 2,273 bilang ng batang biktima ng estado sa mga paglabag sa karapatang tao mula Disyembre 2024-Hunyo 2025.

Malinaw na ang kasalukuyang sistema ng papet na reaksyunaryong gubyerno na pinananatili ng mga burukrata kapitalista sa pagkandili ng imperyalismong US ay hindi umaayon sa interes ng mamamayang Pilipino lalo ng mga bata.

Nakikiisa kami sa panawagang wakasan ang mapang-aping sistema sa bansa upang malikha ang mga paborableng kondisyon ng lipunan para sa paghuhubog ng pagkatao ng mga bata at mamamayan. Sa pagwasak ng MKMP na lipunan sa pamamagitan ng digmang bayan, itatayo ang gubyerno ng mamamayan na tunay na maglilingkod sa pambansa-demokratikong interes ng mamamayan, kabilang ang mga bata at hahawanin ang daan tungo sa sosyalismo.

Habang inilulunsad ang makatarungang digma sa pamamagitan ng demokratikong rebolusyong bayan, tinutupad ng NPA ang mga tuntunin sa digma at kinikilala ang karapatan ng mga sibilyan lalo ng mga bata sa gitna ng digmang sibil sa Pilipinas. Malaking kaiba sa AFP-PNP na isinasangkot maging ang mga anak ng mga Pulang mandirigma sa kanilang reaksyunaryong gera. Tampok dito ang kaso ni Baby Marx na hostage ng AFP hanggang ngayon at mga batang biktima ng walang habas na pambobomba at pamamaril sa kanayunan ng bansa.

Mulat ang AFP-PNP at NTF-ELCAC sa paglabag sa mga tuntunin ng digma at internasyunal na makataong batas na nagtatanggol sa karapatan ng mga sibilyan lalo ng mga bata. Dapat singilin at papanagutin ang mga asong ulol na militar at pulis sa kanilang mga krimen lalo sa mga bata.

Habang nakikiisa at tinutupad ng MGC ang mga internasyunal na makataong batas at kinikilala at itinataguyod ang karapatan ng mga bata, makakaasa ang buong sambayanan na ipagtatanggol ng NPA ang kapakanan ng mamamayan kabilang ang mga bata. Sa inspirasyon ng susunod na henerasyon at tagumpay ng digmang bayan, malilikha ang bagong lipunang tunay na maglilingkod para sa mga bata at buong sambayanan!

Sagot sa kahirapan, digmang bayan!
Mabuhay ang CPP-NPA-NDFP!