Ubos-kusog nga maghulag agud tapuson ang kadulom sang bag-o nga layi militar
Sa sulod sang pila ka adlaw, pagadumdumon sang pumuluyong Pilipino ang ika-48 tuig nga pagpapanaog sang layi militar sang diktaduryang Marcos. May dugang nga importansya ang pagdumdom sa adlaw nga ini bangud madamo ang pagkapareho sang sitwasyon sadto sa subong nga kahimtangan. Madalom ang importansya sang mga leksyon sa 14-tuig nga paghimakas batuk sa diktadurya nga dapat gamiton nga ubay sa pag-atubang kag pagbato sa pasistang tirano ni Duterte.
Daw ginbutong ni Duterte ang pungsod paatras sa madulom nga panahon sang layi militar ni Marcos sa porma sang patarasak nga pagpang-atake sa demokrasya kag kahilwayan. Pareho sadto, sistematiko nga ginadingut ang mga kinamatarung sang pumuluyo kag ginatapna ang ila mga paghimakas agud padayon nga makaalagwa si Duterte kag iya mga kroni kag suluguon.
Pareho sa anay diktador, indi mahubsan ang kauhaw sa gahum kag manggad ni Duterte. Gamit ang armadong pwersa sang estado para pabahaon ang dugo kag kugmaton ang tanan, gintukod niya ang iya indi pwede makwestyon nga awtoridad. Tanan dapat magluhod kag mag-ampo. Si Duterte isa ka walay kabulusgan nga sapat nga indi makuritan ang kabangis sa pagpatay sa mga magahangkat sa iya paghari-harian.
Nagapungko siya sa abaga sang mga pulis kag suldado. Hari siya sang kapintas kag brutalidad. Ginduplaan kag ginlapakan niya ang mga kinamatarung sang pumuluyo. Pataratas ang mga pagpatay kag iban pa nga porma sang terorismo kag kalakasan batuk sa imol nga pumuluyo kag sa sin-o man nga nagapanindugan kag nagabato para sa banwa. Sa apat ka tuig lang, ginlabawan na ni Duterte ang anay diktador sa kadamuon sang ginpamatay sang mga armadong ahente sang estado.
Wala sang iban nga tuyo ang tubtob-buhi niya nga mga gera kundi tapnaon kag pahipuson ang pumuluyo kag para busgon sa gera ang iya mga suldado kag pulis. Labaw nga ginakangil-aran ang malapad nga kapalpakan, kainutilan kag krisis sa pangabuhian nga gintuga sang iya pasista nga sabat sa pandemya nga Covid-19.
Si Duterte subong ang hari sang burukrata kapitalismo. Siya ang puno nga agalon sang droga sa Pilipinas. Siya ang pinakadaku nga traidor sa kahilwayan kag soberanya sang Pilipinas, kag kahimbon sang China sa pagpandambong sa manggad sang pungsod. Paltik ang iya pagka anti-Amerikano nga wala sang nahimo kundi magduko sa imperyalistang amo.
Sa pagdumdom sa layi militar ni Marcos sa atubang sang todo-todo nga pasismo ni Duterte, dumdumon kag kuhaan naton sang inspirasyon kag kaisog ang pagkabaganihan sang pumuluyong Pilipino, sang pulu-pulo ka libo nga anak sang banwa nga walay duha-duha nga naglatas sa mabudlay kag peligroso nga dalan sang paghimakas, nagsakripisyo kag naghalad sang kabuhi agud tapuson ang diktadurya. Lakip sa ila ang madamo nga nagkadto sa kaumhan agud isabwag kag palambuon ang armadong rebolusyon.
Sa madulom nga tinuig sang layi militar nag-alsa ang mga mamumugon para ipakigbato ang mga kinamatarung kag kaayuhan, amo man ang handum sang bilog nga banwa para sa kahilwayan. Nagmartsa sang ginatos ka kilometro ang mga mangunguma kag imol. Ang mga plasa kag karsada nangin daku nga eskwelahan para sa mga estudyante kon sa diin nahanas ang ila kinaalam kag nagtuon sa mga leksyon sang kasaysayan kag paghimakas. Ang kaumhan kag mga kabukiran nagdabadaba sa malapad nga armadong pagbato kag nagserbi nga balwarte sang demokratiko nga gahum sang pumuluyo. Ang tanan nga sapa sang pagbato nagtipon sa makagagahum nga suba sang paghimakas kag naglab-ot sa daku nga pagbangon.
Ang handum sang pumuluyo sadto nga mahilway halin sa layi militar ni Marcos amo man subong ang handum sang pumuluyo nga mahilway halin sa pagpamigos kag pagpang-ulipon sang tirano nga si Duterte. Sa idalom sang malaut nga rehimeng Duterte, nakasubsob subong ang mayorya sang pumuluyong Pilipino sa walay tupong nga krisis sa pangabuhian, kaimulon kag ikaayong lawas, samtang nagaalagwa ang mga kroni kag dumuluong nga kahimbon ni Duterte sa korapsyon, pasismo kag pagpandambong.
Gamit ang kugmat sang bag-o nga Anti-Terrorism Law, mga pagpamatay, pagdukot kag pagpang-aresto, ginapahipos kag ginapiang sang rehimeng Duterte ang demokratiko nga pagbato sang pumuluyo. Tanan nga taktika ginagamit agud unahan ang anuman nga pagtinguha sang pumuluyo nga matukod sa isa ka malapad nga prente ang tanan nga demokratikong pwersa kag dululungan nga maghulag sa isa makagagahum nga pagbangon.
Ginaganyat sang Partido ang pumuluyong Pilipino kag ila demokratiko nga kahublagang masa nga lubos nga maghulag kag paslawon ang pagtinguha sang rehimeng Duterte nga dalayon sila nga piguson. Dapat gamiton ang tanan nga posible nga paagi nga malaparan nga pahulagon ang pumuluyo.
Dapat pangibabawan ang mga restriksyon sa kinamatarung nga ginapatuman ni Duterte sa tabon sang pagsabat sa pandemya nga Covid-19. Ang paglimitar sa pangpubliko nga transportasyon, ang pagdumili sa mga pamatan-on nga maggwa sa balay kag mga restriksyon sa pangmasa nga pagtilipon nagaserbi nga praktikal nga sablag sa malaparan nga pagpukaw, pag-organisa kag pagpahulag sa masa.
Dapat tandaan nga wala sang restriksyon nga lubos nga makaupang sa paghulag sang pumuluyo nga muklat kag determinado nga magbato para tapuson ang pagginahum sang kalainan ni Duterte. Ang yabi amo ang pagpukaw sa pumuluyo kag pagpataas sang ila kamuklatan kag kahandaan nga maghulag.
Dapat sige-sige nga pabaskugon ang hilikuton propaganda kag edukasyon sa masa nga ginahingalitan lunsay ang pagpailig sang impormasyon, mga pahayag kag panawagan paagi sa internet kon sa diin may ara, kadungan sang pagpabaskog kag pagpalapad sang pagpagwa sang regular nga mga pahayagan kag mga polyeto bilang solido nga alagyan sang propaganda.
Tinguhaon nga itransporma ang mga pabrika kag komunidad padulong sa mga sentro sang pangpulitika nga aktibidad paagi sa paglunsar sang mga pangmasa nga talakayan bahin sa mga matag-adlaw nga halambalanon nga ginaatubang sang masa, kon paano nakaangut ang ila mga problema sa subong nga dalagan sang pungsod kag kon ngaa kinahanglan nga maghulag. Sa mga lugar nga militarisado, dapat gamiton ang mga matinugahon nga paagi para malikawan ang pagpanilag kag pag-istrikto sang mga ahente sang estado.
Dapat ubos-kusog nga isulong ang demokratiko nga pangmasang paghimakas sang basehan nga mga sahi kag sektor. Ang kusog kag kaisog sang masang anakbalhas ang magaganyat sa iban pa nga sahi kag pwersa nga manindugan kag magbato, lakip ang mga ara sa konserbatibo nga oposisyon kag mga alyado sini sa sulod sang militar kag pulis nga natak-an na kay Duterte. Dapat pabaskugon kag labi nga palaparon ang nagahiliugyon nga prente sang tanan nga pwersang demokratiko sa panawagan para sa pagbiya sa poder ni Duterte o pagpatalsik sa iya sa poder.
Dapat sige-sige nga paigtingon kag palaparon sang Bagong Hukbong Bayan ang pagpakig-away gerilya sa bilog nga pungsod. Katuwang ang milisyang bayan kag mga yunit sa pagdepensa-sa-kaugalingon, dapat paduguon sa linibo nga pilas ang pasistang rehimen agud makabulig lunsay sa pagbwelo sang mga pangmasang paghimakas kag dugang nga pagpabaskog sa hangaway kag sang mga organo sang demokratikong gahum sang banwa.
Indi dapat pagpabay-an nga makahari nga wala sang sablag ang pasista nga rehimeng Duterte. Samtang nagadugay kag labi nga nangin mabangis, labi sini nga ginapaypayan ang kaakig kag determinasyon sang banwa nga magbato, kag labing nagapalapit ang adlaw sang pagtapos sa bag-o nga pagginahum militar ni Duterte.
