Brutal nga giatake sa mga ahente sa estado ang duha ka tigpanalipod sa mga Tumandok niadtong milabayng semana.

Gipusil ug napatay sa nagpailang mga pulis niadtong Pebrero 28 si Julie Catamin sa Malitbog, Tapaz, Capiz. Si Catamin ang kapitan sa Barangay Roosevelt sa parehong lungsod. Gibutyag ni Catamin nga gitamnan sa mga armas ug eksplosibo ang balay sa upat ka residente sa iyang barangay niadtong Disyembre 2020. Kadungan sa maong insidente ang pagmasaker sa siyam ka mag-uumang gitawag og Tumandok 9.

Niadtong Marso 3, gidunggab sa ulo ug likod sa duha ka wala mailang lalaki si Atty. Angelo Karlo Guillen sa Gen. Luna St., Iloilo City. Si Guillen ang abugado sa mga pamilya sa mga Tumandok ug mag-uumang giaresto sa Capiz ug Iloilo niadtong Disyembre 2020. Lakip usab siya sa mga abugado sa mga nagpasaka og petisyon batok sa Anti-Terror Law (ATL). Mibarog siyang pangkinatibuk-ang kalihim sa National Union of People’s Lawyers-Panay.