Bisan taliwala sa pandemya, padayon nga nagsabwag ang rehimeng Duterte og kabangis sa mga komunidad sa mga Moro sa takuban sa “gyera kontra-terorismo.” Sukad Disyembre 2020, liboan ka pamilya ang nagbakwit tungod sa pag-atake sa Armed Forces of the Philippines (AFP) sa pipila ka mga komunidad sa mga operasyong paggukod kuno sa “nahabiling pwersa” sa Bangsamoro Islamic Freedom Fighters (BIFF), Abu Sayyaf ug gagmayng grupong ginalambigit sa rehimen ug US sa “ISIS.” Dili moubos sa unum ka menor de edad ug usa ka mabdos ang namatay tungod sa maong mga operasyon.

Lanao del Sur. Tulo ka kabatan-onan ang napatay samtang usa ka mabdos ang samaron dihang giatake sa mga elemento sa 5th IB ang Moro Islamic Liberation Front Extension Camp, sa Amai Manabilang niadtong Pebrero 20. Gikanyon ug giistraping sa mga sundalo ang komunidad sulod sa 15 ka minuto.

Niadtong Pebrero 4, gibomba usab sa 55th IB ang mga komunidad sa Alonganan ug Buayan, Datu Piang tungod kay adunay kunoy namatikdan dinhi nga mga myembro sa BIFF ug Dawlah Islamiyah.

Basilan. Niadtong Enero 29, kapin 40 ka pamilya ang mibakwit dihang giatake sa mga pwersa sa AFP ang ilang komunidad sa Barangay Bohebaca, Tipo-tipo. Usa ang natahong namatay samtang usa ang samaron.

Sa Barangay Seronggonon, aduna usay 200 ka pamilyang nagbakwit niadtong Enero 12 dihang miatake ang Joint Task Force Basilan sa ilang komunidad.

Maguindanao. Duha ka bata ang grabeng nasamdan sa pagpamomba sa 57th IB sa Sambulawan, Datu Salibo niadtong Disyembre 13, 2020. Namatay na ang usa sa mga biktima niadtong Pebrero 14.

Gibombahan ug giistraping usab sa 57th IB ug 2nd Mechanized Battalion ang mga residente sa barangay Pusaw sa Shariff Saydona Mustapha niadtong Disyembre 15. Namatay sa insidente si Rabea Damada Lakim nga pito ka bulang mabdos. Nagresulta ang mga pagpamomba sa pagbakwit sa 1,500 pamilya.

Niadtong Enero 30, kapin 600 ka pamilya ang mibakwit tungod sa panagsangka tali BIFF ug AFP sa Tapatan, Barangay Kitango, Datu Saudi Ampatuan.

Sulu. Sa Patikul ug Jolo, dili moubos sa 12 ka kababayen-ang Moro ang giaresto sa duha ka insidente sa pagpang-utingkay niadtong Oktubre 10, 2020 ug Pebrero 19 tungod kay potensyal kuno silang suicide bomber. Lakip kanila ang mga inahan nga adunay batang anak. Giila sila nga mga balo, asawa ug anak kuno sa mga lider sa Abu Sayyaf.