Nakagawas na niadtong Mayo 14 ang giilang Bakwit School 7 gikan sa halos tulo ka bulang pagkabilanggo human gibasura sa korte sa Davao del Norte ang gama-gamang mga kaso batok kanila. Ang Bakwit School 7 mao silang Chad Booc, Roshelle Mae Porcadilla, Benito Bay-ao, Segundo Milong, Jomar Benag, Esmelito Oribawan ug Moddie Mansimuy-at. Giaresto sila sa gihimong reyd sa pulis sa kampus sa University of San Carlos sa Cebu City niadtong Pebrero 15. Gikasuhan sila og kidnapping ug iligal nga detensyon sa mga batang Lumad.

Ayha niini, giilog sa militar ug pulis ang 26 ka estudyanteng Lumad ug “gipauli” sila sa Mindanao. Desiotso kanila ug ilang mga ginikanan nakapailalum pa sa kontrol sa militar hangtud karon.

Luyo sa pagbasura sa kaso sa korte, nanghulga ang NTF-ELCAC niadtong Mayo 19 nga subling magpasaka og mga kaso batok sa pito.