Apat ka mangunguma sa Bicol, ginpatay sang AFP
Apat ka mangunguma ang ginpatay sa Bicol kag apat man ang gin-aresto sang mga pwersa sang estado sa mga adlaw antes ang State of the Nation Address ni Rodrigo Duterte.
Ginpatay sang mga pulis sanday Jemar Palero, katapu sang Organisasyon ng mga Magsasaka sa Albay kag Marlon Naperi sang Albay People’s Organization, gab-i sang Hulyo 25, sa Banao Bridge, Maharlika Highway, Guinobatan, Albay. Nagapinta sadto ang duha, upod ang duha pa ka aktibista, sang panawagan “Duterte Ibagsak!” sa haywey. Ginpagwa sang mga pulis nga nagbato ang duha, bagay nga ginpangin-wala sang ila mga paryente. Ulihi nga nakita nga buhi ang duha samtang ginasakay sang mga pulis sa isa ka van.
Ginpatay man sang mga suldado sanday Louie Austria kag Benjamin Delos Santos sa Sagñay, Camarines Sur sang Hulyo 20. Ginpagwa sang mga elemento sang 83rd IB nga napatay sila sa isa ka engkwentro kag nagparada pa sang 12 ka mataas nga kalibreng pusil nga nakuha kuno sa inaway.
Iligal na pag-aresto. Iligal nga gin-aresto sang militar kag ginkasuhan sang paglapas sa Anti-Terror Act ang apat ka mangunguma sa Sityo Buscad, Barangay Tuban, Sablayan, Occidental Mindoro sang Hulyo 19. Gin-akusar sanday Miguel Manguera, Fe Marinas, Sherlito Casidsid kag Allen Dela Fuente nga nagabulig sa Bagong Hukbong Bayan kag gin-ulamid sa engkwentro sa tunga sang AFP kag hangaway sang banwa sang Hulyo 5. Ginkasuhan ang duha sa ila sang illegal possession of firearms and explosives kag ang duha sang obstruction of justice.
Sa Sorsogon, gin-aresto sang mga pulis ang mag-asawa nga Ruel Llamera kag Annie Jean Castillo, mga katapu sang Sorsogon People’s Organization sang Hulyo 8 samtang nagabyahe pauli sa Sorsogon City. Ginpasakaan sila sang himu-himo nga kaso nga illegal possession of firearms and explosives.
Kalakasan. Pataratas nga nagpalupok ang mga elemento sang 62nd IB kag 16th Scout Ranger Company sa Barangay Banwage, Guihulngan, Negros Oriental sang Hulyo 15. Ginhabuyan man sang granada ang balay ni Alo Lojanio, residente sang Sityo Kapudlusan.
Sa Northern Samar, pilit nga ginapapirma sang mga suldado ang mga upisyal sang barangay sang 17 baryo sa Las Navas, 14 baryo sa Silvino Lobos, anum ka baryo sa Pambujan, isa ka baryo sa Catubig kag tanan nga baryo sa Matuginao para ideklarar nga persona non grata ang BHB.
Pagpanganyon. Sang Hulyo 20 tubtob 21, ginkanyon sang 87th IB ang kagulangan sang Km. 14 tubtob Km. 17 sa San Jose de Buan, Western Samar. Indi magnubo sa 20 beses nga nagpalupok ang AFP sa sunod-sunod nga adlaw nga nagresulta sa pagkaguba sang mga ulumhan kag nagtulod sa mga residente sa Sityo Salvacion, Barangay San Nicolas nga temporaryo nga magbakwit.
Sa Northern Samar, duha ka balay ang naigo sang magpalupok ang PNP-Special Action Force sang grenade launcher sang Hulyo 10 sa Barangay Hitapian, Catubig. Target sini ang yunit sang BHB nga naglunsar sang opensiba sa pareho nga adlaw. Kadungan sini, ginkawat sang pulis ang pinya nga ginabaligya sang mga residente. Ginpahog man nila ang mga upisyal sang barangay.
Pagbakwit. Sa Northern Samar, ginreport sa Hulyo 30 nga isyu sang Larab nga nagbakwit ang mga residente sa Barangay San Jose, Las Navas dulot sang pataratas nga pagpamomba. Sa mga baryo sang Sag-od, Epaw kag San Jose sa amo nga banwa, halos wala na sang nabilin nga tawo dulot sang okupasyon militar. Amo man ang natabo sa mga baryo sang Senonogan de Tubang, Hiyaot, kag Balod sa Silvino Lobos. Nagbakwit man ang mga residente sang Barangay Ligaya kag Barangay Carolina nga ara sa dulunan sang Matuginao, Western Samar.
