Nasakmit sa atletang si Hidilyn Diaz ang kinaunhang medalyang bulawan (unang pwesto) sa Pilipinas sa 2020 Tokyo Olympics niadtong Abril 26. Nanguna siya sa kategoryang women’s 55-kilogram sa kumpetisyon sa weightlifting human niya gipildi ang atleta sa China nga si Liao Qiuyun. Ang maong kadaugan bunga nag-una sa iyang paningkamot luyo sa kakulangon sa suporta gikan sa reaksyunaryong gubyerno alang sa pagbansay sa mga atleta.

Una kining nabutyag niadtong 2019 dihang nangayo si Diaz og suportang pinansyal gikan sa mga pribadong isponsor tungod kay matud niya “nalisud na kaayo” siya. Gitarget siya sa mga troll sa rehimen sa social media tungod sa maong pagpadayag. Gilambigit usab siya sa rehimen sa “Oust Duterte matrix” nga gipagula sa parehong tuig.

Parehon usab nga nasakmit sa mga atleta nga silang Nesthy Petecio ug Carlos Paalam ang medalyang silber (ikaduhang pwesto) sa tagsa-tagsa nilang dula sa boksing niadtong Agosto 3 ug Agosto 7. Nasakmit usab ang medalyang bronse (ikatulong pwesto) sa boksingerong si Eumir Marcial. Kini ang kinaunhang Olympics kung asa nakasakmit og kapin usa ka medalya ang Pilipinas.