Magkasunod nga gibasura sa duha ka rehiyunal nga korte ug mga prosekyutor ang gama-gamang kasong gipasaka batok sa pito ka aktibista sa Metro Manila, Albay ug General Santos City, ug duha ka istap sa National Democratic Front of the Philippines (NDFP) karong bulana.

Unang gibasura niadtong Agosto 4 sa Legazpi Regional Trial Court sa Albay ang kasong gunrunning batok kang Pastor Danilo Balucio. Gibasura niini ang mandamyento nga gigamit sa pulisya sa pag-utingkay sa balay ni Balucio ug pag-aresto kaniya niadtong Mayo tungod kay wala kuno nakasubay ang pagpagawas niini sa tinuod nga impormasyon.

Niadtong Agosto 13, nabalita ang pagbasura sa mga prosekyutor sa reklamong kidnapping ug pakyas nga pagbalik sa usa ka menor de edad nga gipasaka sa pulisya batok sa kabatan-onang aktibista nga silang Elaine Edzel Emocling, Christine Joy Dual, Alex Danday ug Alfie Omaga. Giakusahan ang upat nga rekruter sa mga myembro sa hukbong bayan lambigit sa pag-kidnap kuno nila sa usa ka aktibistang ginganlan og “Trisha.” Gitin-aw sa mga prosekyutor nga dili armadong pakigbisog ang pagsalmot sa mga protesta.

Niadtong Agosto 12, gibasura sa General Santos City Regional Trial Court ang kasong illegal possession of firearms and explosives batok sa magtiayong Edgar ug Regina Patulombon nga giaresto sa pulisya niadtong 2015 subay sa gitanum nga mga ebidensyang pusil ug eksplosibo. Gibasura ang kaso human nasayran nga gipailalum ang magtiayon sa imbestigasyon nga walay kasayuran sa ilang mga katungod.

Niadtong Agosto 19, gibasura sa korte sa Quezon City ang search warrant nga gigamit aron tamnan og mga pusil ug eksplosibo ug arestuhon ang magtiayong Alexander ug Winona Birondo niadtong 2019. Pareho silang istap sa NDFP sa panaghisgot kalinaw.