Pagkakwari sa Negros, ginapahunong. Niadtong Agosto 12, miapela ang mga mag-uuma sa Silay City aron ipahunong ang mga operasyon sa pagkwari sa Silay City, Negros Occidental. Gikundena nila ang walay hunong nga paghawan sa kalasangan nga nagbunga sa pagbaha ug pagkaguba sa ilang mga umahan. Sa lima ka operasyon sa pagkwari sa lugar, usa ang gipanag-iyahan sa meyor sa syudad nga si Mark Andrew J. Golez.

Pagpanangtang sa Coca-Cola sa Cebu, napasuspinde. Temporaryong gisuspinde ang pagpanangtang sa Coca-Cola human magtibuok og kasabutan tali sa mga kontraktwal nga mamumuo ug ilang prinsipal nga kontraktor niadtong Agosto 9 sa Mandaue City, Cebu. Kini human magpasaka og kaso ang mga mamumuo sa National Conciliation and Mediation Board. Lakip sa ilang gireklamo ang union busting ug dili makitawhanong kahimtang sa pamuo, kung asa pugos nga ginapatrabaho ang mga mamumumuo sa lain pang mga trabaho.

Protesta sa Talisay City. Nagmartsa padulong sa upisina sa Civil Service Commission sa Bacolod City niadtong Agosto 9 ang mga gitangtang nga empleyado sa Talisay City Government ug Bacolod City Water District aron ipanawagan nga ibalik na sila sa trabaho.

Mga bakwit sa Haran, mibalik na sa Talaingod. Nakahukum nga mobalik ang nahabiling 100 ka lumad Talaingod Manobo sa ilang yutang kabilin niadtong Agosto 9 human ang pito ka tuig. Mibakwit ug misangtwaryo sila sa UCCP Haran Center sa Davao City sukad pa 2014 human subli-subli nga giatake sa militar ang ilang mga komunidad.