Koalisyong Makabayan, nagdeklara og suporta sa Leni-Kiko tandem

,
Kini nga artikulo adunay hubad sa PilipinoEnglishHiligaynon

Nagdeklara og suporta ang Koalisyong Makabayan sa tandem ni Leni Robredo-Francis “Kiko” Pangilinan isip kandidato sa pagka-presidente ug bise presidente sa nasud. Kini human sa pormal nga pag-endorso sa 1Sambayan niadtong Enero 28 sa kandidatura sa pagka-senador ni Atty. Neri Colmenares sa Makabayan sa umalabot nga eleksyon sa Mayo 2022.

Ang 1Sambayan natukod niadtong Marso 2021 isip koalisyon sa mga organisasyon ug indibidwal nga supak sa paghari ni Rodrigo Duterte ug nagkahiusa sa tinguhang pildihon ang iyang pundok sa 2022. Ginasuportahan sa 1Sambayan ang kandidatura ni Vice Pres. Robredo sa pagka-presidente.

Ang pagsuporta sa Makabayan sa Leni-Kiko tandem “mahinungdanong pag-abante sa paghiusa sa tanang demokratikong pwersa aron pildihon ang mga Marcos ug Duterte,” matud ni Renato Reyes, pangkinatibuk-ang kalihim sa Bayan.

Gisimbolo niini ang panaghiusa sa pakigbisog sa lain-laing grupo ug sektor sa pagsulay sa mga Marcos ug Duterte nga mobalik sa Malacañang. Sa banabana sa Makabayan, si Robredo ang adunay paglaum nga pildihon ang Marcos-Duterte tandem.

Mga komun nga baruganan sa isyu

Sa pamahayag sa midya niadtong Enero 29, gilatag sa Makabayan ang basihan ug kundisyon sa pag-endorso sa Leni-Kiko tandem. Matud nila, “ang mga komun nga baruganan sa isyu, ang track record sa mga kandidato ug ang labing mahinungdanon mao ang laraw nga pakyason ang Marcos-Duterte tandem”.

Lakip sa mga komun nga baruganan ang pagpatuman sa syentipiko ug makitawhanong pagtubag sa pandemya, ang pag-asdang sa katungod sa mga mamumuo ug pagsukol sa kontraktwalisasyon ug katungod sa mga mag-uuma sa yuta. Komun usab sa duha ka kampo ang pagbarog sa maong tandem batok sa paglapas sa tawhanong katungod, ang ilang baruganan alang sa nasudnong soberanya ug katungod sa West Philippine Sea.

Suportado usab nila ang tinguha sa maong tandem nga repasuhon ang mga kaso sa mga bilanggong pulitikal nga tigulang ug masakiton aron buhian sa makitawhanong basihan. Aduna usab silay parehong baruganan nga ibalik ang prangkisa sa ABS-CBN. Komun usab ang pag-atiman sa kinaiyahan, lumad, mag-uuma ug Pilipinong mananagat pinaagi sa pagrebyu ug parebisa sa mga palisiya ug balaod sa pagmina. Aduna usay pagkapareho sa baruganang irebyu ang pagsirado ug subling akreditasyon sa mga eskwelahang Lumad. Gisaad usab ni Robredo nga iyang pagarepasuhon ang istruktura ug nahimong mga gawi sa NTF-Elcac atubangan sa panawagan sa Makabayan nga bungkagon kini.

Nagkauyon ang duha ka kampo nga ipatuman ang panaghisgot kalinaw ug pagpanubag sa nahataas nga mga upisyal sa gubyerno nga nalambigit sa mga paglapas sa tawhanong katungod ug pagpangorakot ug pagtugot sa International Criminal Court aron ikiha si Duterte ug uban pang kakunsabo niini. Ginaduso usab nila ang mga elektoral ug pulitikanhong reporma aron batukan ang pag-abuso sa gahum ug mahatagan og partisipasyon ug tingog ang katawhan.

Koalisyong Makabayan, nagdeklara og suporta sa Leni-Kiko tandem