Konstruksyon sa Kaliwa Dam, gibabagan. Nagprotesta niadtong Disyembre 28 sa upisina sa Metropolitan Waterworks and Sewerage System (MWSS) sa Quezon City ang mga lumad, tigpanalipud sa kinaiyahan, ug uban pang mga grupo aron iduso ang hinanaling pagpahunong sa konstruksyon sa New Centennial Water Source-Kaliwa Dam Project nga ginatukod sa mga dapit sa prubinsya sa Rizal ug Quezon.

Ika-2 ka tuig sa Tumandok Massacre. Nagkuyog ug nagdagkot og kandila sa usa ka protesta ang lain-laing organisasyon sa pagpangulo sa Sandugo-Movement of Moro and Indigenous Peoples for Self-Determination sa Philcoa, Quezon City niadtong Disyembre 30, 2022 aron manawagan og hustisya alang sa tanang biktima sa pagmasaker sa mga sundalo ug pulis sa siyam ka Tumandok sa Panay niadtong Disyembre 30, 2020.

Protesta batok sa buhis sa tubig sa Bacolod. Miadto sa Bacolod Government Center ang mga myembro Sa Bayan-Negros ug AMLIG Tubig niadtong Enero 4 aron iduso kang Bacolod City Mayor Albee Benitez nga tangtangon ang 12% value-added tax sa tubig ilalum sa Bacolod Water District (Baciwa)-Primewater partnership. Dugay nang gipadayag sa mga grupo ang ilang daghang mulo kalabot sa Joint Venture Agreement sa Baciwa ug Primewater nga gipanag-iyahan sa pamilyang Villar.

Katungod sa pag-unyon, gipakigbisogan. Nagpiket niadtong Enero 6 ang mga mamumuo sa pagpanguna sa Kilusang Mayo Uno ug Federation of Free Workers sa upisina sa RTWPD Region 6 sa Iloilo City aron iduso ang pagpataas sa suhulan ug pagpanalipud sa katungod sa mga mamumuo nga mag-organisa.