Gipatas-an sa Department of Trade and Industry (DTI) ang presyo sa mga nag-unang palaliton human niining gipahamtang niadtong Enero 27 ang mas taas nga bag-ong mga suggested retail price (SRP o sugyot nga presyo sa binuuk) sa 73 ka batakan ug nag-unang mga palaliton.

Kumpara sa ulahing listahan sa SRP nga gipagawas sa DTI niadtong Agosto 29, 2021, nakatakdang mosaka og 1-10% ang presyo sa mga palaliton, lakip ang mga delatang sardinas ug produktong karne, gatas, pan, nudels, asin, sabong panglaba ug panligo, nakabotilyang tubig, kandila, ug baterya.

Sa kinatibuk-an, mamahimong mokabat sa ₱1.25 ang dugang presyo sa lain-laing mga delatang sardinas; ₱2.25 sa mga produktong gatas; ₱3.5 sa usa ka putos sa pan; ₱0.25 sa nudels; ₱1.45 sa asin; ₱2.25 sa sabong panglaba; ₱4 sa nakabotilyang tubig; ₱15 sa kandila; ₱1.5 sa meat loaf; ₱3 sa karne norte; ₱1.5 sa beef loaf; ₱1.25 sa sabong pangligo; ug ₱17.25 sa baterya.

Pagapas-anon ang dugang presyo sa mayorya sa kapin 18.6 milyong pinakakabus nga pamilyang Pilipino o 81.8 milyong katawo nga mumho lamang ang kinitaan. Lakip kanila ang 2.9 milyong pamilya nga mikita lamang og ₱11,000 paubos kada bulan. Pagapas-anon usab kini sa 8.4 milyong pamilya nga mikita og ₱11,000-₱22,000, ug 7.6 milyong pamilya nga mikita og ₱22,000-₱44,000. Gibanabanang mokabat sa ₱10,071 ang gigahin sa maong mga pamilya sa pagpalit og mga pagkaon ug batakang panginahanglan kada bulan. Kulang kaayo ang ilang kita aron tubagon ang pinakabatakang mga panginahanglan sa usa ka lima-katawong pamilya.

Gianunsyo ang pagsaka sa mga presyo human gipanghinambog sa rehimen nga padayon nga nagaubos ang tantos sa implasyon sa milabayng pipila ka bulan. Bisan og ang maong pagkunhod nag-unang hinungdan sa paghuyang sa demand nga gibunga sa disempleyo, pagbagsak sa kita, pagkahurot sa tinigom ug mas ubos nga paggasto sa mga pamilya. Sa kinatibuk-an, mihagba og kapin 5% ang paggasto sa mga pamilya alang sa ilang konsumo niadtong ulahing kwarto sa 2021 kumpara sa ikatulong kwarto.

Sa patuyang nga pagsaka sa mga presyo, gilauman nga labaw pang magpalisud sa mga pamilyang hilabihan ka nihit ang kita aron abton ang sarang nga nutrisyon. Matud sa usa ka pagtuon sa Foodlink Advocacy Cooperative, gibanabana nga nagkinahanglan sa usa ka pamilyang Pilipino nga adunay lima ka myembro og ₱14,368 kada bulan alang sa sarang ug masustansyang pagkaon subay sa Pinggang Pinoy. Ang Pinggang Pinoy usa ka giya sa pagkaon nga gitakda sa Food and Nutrition Research Institute aron masiguro nga nakatagamtam og igong enerhiya ug nutrisyon ang kalawasan sa katawhan.