Upisyal nga gibutayag sa publiko sa Commission on Elections (Comelec) niadtong Enero 30 ang upinyon ni Commissioner Rowena Guanzon sa kasong diskwalipikasyon batok kang Ferdinand “Bongbong” Marcos Jr. Gipaboran ni Guanzon ang apela nga bawalang modagan ang anak sa diktador tungod kay napamatud-an sa usa ka korte sa Quezon City nga sad-an sa dili pagbayad sa iyang mga buhis.

Subay sa nakasulat nga hukum batok kaniya, “sublisubli nga gilapas” ni Marcos Jr. ang balaod, nga nagpasabot sa kawalay moral nga basihan aron tibouk panahon siyang idiskwalipika sa pagdagan sa unsa mang pusisyon sa gubyerno. Giakusahan ni Guanzon ang pareho niyang komisyuner nga si Aimee Ferolino sa paglangaylangay sa pagpagula sa desisyon aron mabalewala ang iyang boto. Nahuman ang pangatungdanan ni Guanzon sa Comelec niadtong Pebrero 3 nga walay nakab-ot nga pinal nga desisyon. Niadtong Pebrero 2, nagrali ang demokratikong mga grupo atubangan sa upisina sa Comelec aron suportahan si Guanzon ug iduso sa ahensya ang hinanali nga ibasura ang kandidatura ni Marcos Jr.