Walo ka iligal nga pagpangaresto ang gipatuman sa mga armadong pwersa sa estado sa lain-laing bahin sa nasud sulod lamang sa unum ka adlaw atol sa Semana Santa. Silang tanan giakusahang myembro sa Bagong Hukbong Bayan (BHB) ug gitamnan og ebidensya aron pasakahan og gama-gamang kasong kriminal.

Giaresto sa dili moubos sa 15 ka yunit sa militar ug pulis ang tulo ka kababayen-ang mag-uuma nga myembro sa grupong Bayan Muna niadtong Abril 13 sa Barangay Mawaque, Mabalacat, Pampanga.

Silang Maria Teresa Buscayno, Erlinda David, ug Evelyn Muñoz nga pulos edaran na. Matud sa Karapatan-Central Luzon, deka-dekada na silang nanalipud sa interes ug kaayuhan sa mga mangingisda, katutubo, mamumuong panguma, mag-uuma ug kabus.

Duha ka adlaw ayha niini, giaresto samtang nakapila para magpabakuna sa Parañaque City silang Ernesto Lorenzo, Maria Fe Serrano ug Plinky Longhas. Si Lorenzo usa ka iladong konsultant sa National Democratic Front of the Philippines sa panaghisgot kalinaw. Ang kauban niyang si Serrano ang asawa sa bilanggong pulitikal nga si Eduardo Serrano nga namatay sa prisohan tungod sa pagdumili nga buhian siya bisan og gibasura na sa korte ang gama-gamang mga kaso batok kaniya.

Ayha sila, giaresto sa Cagayan de Oro ang aktibista nga si Aldeem Yañez sa Iglesia Filipina Independiente niadtong Abril 10. Kaadlawon dihang giatake sa mga sundalo ug pulis ang balay sa iyang ginikanan kung asa siya nanimuyo.

Niadtong Abril 8, giaresto sa Nueva Vizcaya si Isabelo Adviento, ika-upat nga nominado sa Anakpawis Partylist sa eleksyong 2022.

Sa panahon usab sa Semana Santa, gikanyon sa militar ang mga sibilyang komunidad sa Palo 12, Barangay Poblacion 2, Santiago, Agusan del Norte niadtong Abril 15. Kini ang balos sa mga sundalo human sila mahampak sa BHB.

Wala pa gihapon gipalutaw ang organisador sa Kadamay-Negros nga si Iver Larit, human gidagit sa gidudahang mga elemento sa estado niadtong Abril 5. Ulahi siyang nakita pagawas sa ilang balay sa Barangay Mansilingan, Bacolod City. Dugay na siyang biktima sa pagpang-redtag.

Sa Southern Tagalog, gipig-ot sa mga sundalo sa 85th IB ang libreng klinika nga giorganisa sa Katipunan ng mga Samahang Magbubukid sa Timog Katagalugan (Kasama-TK) sa Agdangan, Quezon niadtong Abril 10. Gibulabog sa mga sundalo ang benyu ug gikwestyon ang “ligalidad” sa aktbidad.

Samtang, gikwestyon sa Partido Komunista ng Pilipinas ang dinalian nga pagsunog (cremate) sa 1st Special Forces Battalion niadtong Abril 7 sa upat ka patayng lawas sa mga myembro kuno sa BHB nga napatay sa ginasulting engkwentro sa Barangay Tikalaan, Talakag, Bukidnon.

Gitaho usab sa NDF-Eastern Visayas niadtong Abril 9 ang pagdakop, pagtortyur ug pagpatay sa 20th IB kang Bryan Obin (Ka Tanel), usa ka kanhing Pulang manggugubat, sa Barangay Sag-od, Las Navas, niadtong Marso 12.

Sa Piat, Cagayan, gipatay sa mga sundalo sa 17th IB niadtong Abril 14 ang dili armadong mga myembro sa BHB nga si Saturnino Agunoy (Ka Peping), ug mga medik nga silang Augusto Gayagas (Ka Val) ug Mark Canta (Ka Uno). Nagabyahe sila aron ipatambal si Agunoy dihang giharang ug gipatay sa militar.

Sa Bicol, gipatay sa 49th IB si Armancio Malto, sa iyang balay sa Purok 5, Barangay Badbad, Oas, Albay niadtong Marso 27. Gidakop usab niini si Maricris Reblando, residente sa maong lugar. Giaresto usab si Franklin “Ka Drilon” Roaring, samaron nga Pulang manggugubat ug residente sa Barangay Mayag sa parehong lungsod.