Kalbaryo sa kabus sa Semana Santa. Gilunsad sa mga grupo sa kabus ang tinuig nga Kalbaryo sa Maralita isip pagdumdum sa Semana Santa. Niadtong Abril 8, naglunsad og protesta-prusisyon ang Kadamay sa Tatalon, Quezon City. Sa Cebu niadtong Abril 15, nag-organisa ang Panaghugpong-Kadamay Cebu ug Movement Against Carbon Market Privatization sa mga istasyon sa krus nga nagahisgut sa isyu sa katawhan sama sa pribatisasyon, pagsaka sa presyo sa lana, pagpangawkaw og yuta ug kontraktwalisasyon. Aduna usay susamang aktibidad sa Davao City.

Protesta sa mga mamumuo sa Cebu. Nagprotesta ang 293 ka kontraktwal nga mamumuo sa Universal Robina Corporation atubangan sa pabrika niini sa Tabok, Mandaue City, Cebu niadtong Abril 13. Kini aron babagan ang pagbalhin kanila gikan sa agency nga People First Labor Service Cooperative ngadto agency nga HR Team Asia. Supak ang mga mamumuo sa maong kausaban tungod kay pagailhon silang mga bag-ong mga empleyado sa URC ug dili na nila makuha ang ilang separation pay.

Embahada sa US, gidagsang. Gidagsang sa 30 ka kabatan-onan sa pagpasiugda sa League of Filipino Students ang embahada sa US sa Roxas Boulevard, Manila niadtong Abril 8 sa kaadlawon aron batikuson ang Balikatan 2022 war exercises nga gilunsad sa Pilipinas niadtong Marso 28-Abril 8.

Pagsupak sa proyektong incinerator sa Davao. Nagpiket atubangan sa Sangguniang Panglunsod sa Davao City ang grupong Panalipdan-Youth niadtong Abril 20 aron babagan ang proyektong Waste-To-Energy Incineration. Nakatakda kining tukuron sa Barangay Biao Escuela, usa ka komunidad nga agrikultural sulod sa syudad. Matud sa grupo, magbunga og dautang epekto sa panglawas sa mga residente ang maong proyekto.