Walo nga iligal nga pagpang-aresto ang ginhimo sang mga armadong pwersa sang estado sa nagkalainlain nga bahin sang pungsod sa sulod lang sang anum ka adlaw sa tion sang Semana Santa. Tanan sila ginaakusahan nga katapu sang Bagong Hukbong Bayan (BHB) kag gintamnan sang ebidensya para pasakaan sang himu-himo nga kasong kriminal.

Gin-aresto sang indi magnubo sa 15 yunit militar kag pulis ang tatlo ka kababainhan nga mangunguma nga katapu sang grupong Bayan Muna sang Abril 13 sa Barangay Mawaque, Mabalacat, Pampanga.

Sanday Maria Teresa Buscayno, Erlinda David, kag Evelyn Muñoz nga lunsay may edad na. Suno sa Karapatan-Central Luzon, dinekada na sila nga nagatib-ong sa interes kag kaayuhan sang mga mangingisda, tumandok, mamumugon sa uma, mangunguma kag imol.

Duha ka adlaw antes sini, gin-aresto samtang nagapila para magpabakuna sa Parañaque City sanday Ernesto Lorenzo, Maria Fe Serrano kag Plinky Longhas. Si Lorenzo kilala nga konsultant sang National Democratic Front of the Philippines sa sugilanon pangkalinungan. Ang upod niya nga si Serrano asawa sang bilanggong pulitikal nga si Eduardo Serrano nga napatay sa kulungan dulot sang pagbalibad nga hilwayon siya bisan pa ginbasura na sang korte ang himu-himo nga mga kaso batuk sa iya.

Antes sila, gin-aresto sa Cagayan de Oro ang lider-pamatan-on nga si Aldeem Yanez sang Iglesia Filipina Independiente sang Abril 10. Kaaganhon sang ginsalakay sang mga suldado kag pulis ang balay sang iya mga ginikanan kon sa diin siya nagapuyo.

Sang Abril 8, gin-aresto sa Nueva Vizcaya si Isabelo Adviento, ikaapat nga nominado sang Anakpawis Partylist sa eleksyon 2022.

Sa tion man sang Semana Santa, ginkanyon sang militar ang mga sibilyan nga komunidad sa Palo 12, Barangay Poblacion 2, Santiago, Agusan del Norte sang Abril 15. Ini ang balos sang mga suldado pagkatapos sila mabunalan sang BHB.

Wala gihapon ginatuhaw ang organisador sang Kadamay-Negros nga si Iver Larit, pagkatapos nga madukot sang ginapatihan mga elemento sang estado sang Abril 5. Ulihi siya nga nakita paggwa sa ila balay sa Barangay Mansilingan, Bacolod City. Madugay na siya nga biktima ng red-tagging.

Sa Southern Tagalog, gin-ipit sang mga suldado sang 85th IB ang libre nga klinika nga gin-organisa sang Katipunan ng mga Samahang Magbubukid sa Timog Katagalugan (Kasama-TK) sa Agdangan, Quezon sang Abril 10. Gintublag sang mga suldado ang benyu kag ginkwestyon ang “ligalidad” sang aktibidad.

Samtang, ginkwestyon sang Partido Komunista sang Pilipinas ang gilayon nga pagsunog (cremate) sang 1st Special Forces Battalion sang Abril 7 sa apat ka bangkay sang kuno mga myembro sang BHB nga napatay sa ginasiling engkwentro sa Barangay Tikalaan, Talakag, Bukidnon.

Ginreport man sang Eastern Visayas sang Abril 9 ang pagdakup, pagpaantus kag pagpatay sang 20th IB kay Bryan Obin (Ka Tanel), isa ka anay Pulang hangaway, sa Barangay Sag-od, Las Navas, sang Marso 12.

Sa Piat, Gagayan, ginpatay sang mga suldado sang 17th IB sang Abril 14 ang di-armado nga myembro sang BHB nga si Saturnino Agunoy (Ka Peping), kag mga medik nga sanday Augusto Gayagas (Ka Val) kag Mark Canto (Ka Ubo). Nagabyahe sila agud ipabulong si Agunoy sang balabagan kag patyon sang militar.

Sa Bicol, ginpatay sang 49th IB si Armancio Malto, sa iya balay sa Purok 5, Barangay Badbad, Oas, Albay sang Marso 27. Gindakup man si Maricris Reblando, residente sang amo nga lugar. Gin-aresto man si Franklin “Ka Drilon” Roaring, pilason nga Pulang hangaway kag residente sang Barangay Mayag sang pareho nga banwa.