Kalbaryo sang imol sa Semana Santa. Ginlunsar sang mga grupo sang imol ang tuigan nga Kalbaryo ng Maralita bilang pagdumdom sa Semana Santa. Sang Abril 8, naglunsar sang protesta-prusisyon ang Kadamay sa Tatalon, Quezon City. Sa Cebu sang Abril 15, nag-organisa ang Panaghugpong-Kadamay Cebu kag Movement Against Carbon Market Privatization sang mga istasyon sang krus nga nagtalakay sa isyu sang pumuluyo pareho sang pribatisasyon, pagtaas sang sukot sa langis, pagpang-agaw sang duta kag kontraktwalisasyon. May ara man nga kapareho nga aktibidad sa Davao City.

Protesta sang mga mamumugon sa Cebu. Nagprotesta ang 293 kontraktwal nga mamumugon sang Universal Robina Corporation sa atubang sang pabrika sini sa Tabuk, Mandaue City, Cebu sang Abril 13. Ini para pamatukan ang pagsaylo sa ila halin sa People First Labor Service Cooperative pakadto sa agency nga HR Team Asia. Batuk ang mga mamumugon sa pagsaylo nga ini bangud pagabilangon sila nga mga bag-o nga empleyado sang URC kag indi nila mabaton ang ila separation pay.

Embahada sang US, ginsulong. Ginsulong sang 30 pamatan-on sa pagpanguna sang League of Filipino Students ang embahada sang US sa Roxas Boulevard, Manila sang Abril 8 sang kaaganhon agud pakamalauton ang Balikatan 2022 war exercises nga ginhiwat sa Pilipinas sang Marso 28-Abril 8.

Pagpamatuk sa proyekto nga incinerator sa Davao. Nagpiket sa atubang sang Sangguniang Panglunsod sang Davao City ang grupong Panalipdan-Youth sang Abril 20 para pamatukan ang proyekto nga Waste-To-Energy Incineration. Natalana ini nga tukuron sa Barangay Biao Escuela, isa ka komunidad nga agrikultural sa sulod sang syudad. Suno sa grupo, magadulot sang malain nga epekto sa ikaayong lawas sang mga residente ang amo nga proyekto.