Ika-38 Cordillera Day sa Baguio City. Sa tema nga “Iabanse ang bag-o nga pulitika, mag-isa para sa duta kag kabuhi!” gindumdom sang pumuluyo sang Cordillera ang ika-38 tuig nga selebrasyon sang Cordillera Day halin Abril 24 tubtob Mayo 3. Sa ulihi nga adlaw sang aktibidad, nagtipon ang mga aktibista kag tagasuporta sini sa Universtity of Cordillera sa Baguio City. Kabahin sang ila pagdumdom ang promisa nga paslawon ang pagtuyo sang mga Marcos nga manumbalik sa Malacañang kag sang mga Duterte nga magpabilin sa poder.

Alay Lakad kontra sa pagmina sa Cagayan. Masobra 1,000 mangingisda kag residente sang Aparri, Cagayan ang nagtigayon sang “Alay Lakad” kontra sa pagmina sang black sand sa prubinsya sang Abril 22. Siling nila ang operasyon sang pagmina sa lugar daku nga katalagman sa naturalisa kag ila pangabuhian. Nagpasakup sa aktibidad ang mga residente halin sa mga banwa sang Aparri, Gattaran, Ballesteros, Buguey, Gonzaga kag Sta. Ana. Ginapaggwa sang lokal nga gubyerno nga river dredging lang ang ginahimo pero ang matuod pagmina ini sang black sand.

Kalampagan sa Kamaynilaan. Ginlunsar sang mga demokratikong organisasyon sang Abril 29 ang mga noise barrage sa nagkalainlain nga bahin sang Metro Manila agud itambol ang panawagan sang mga mamumugon kag batuk sa pagdinaya sa maabot nga eleksyon. May kalampagan sa Tondo kag Taft Avenue sa Maynila; Maysapang, Taguig; Monumento, South Caloocan; Commonwealth Avenue kag Welcome Rotunda, Quezon City.

Padyak para sa Naturalisa. Masobra 300 siklista ang nagsikad sang Abril 24 para isulong ang adyenda nga maka-naturalisa sa tunga sang eleksyon. Ang aktibidad ginsanto sa pagdumdom sang Earth Day 2022 sa bilog nga kalibutan. Halin sa Bonifacio Shrine sa Maynila nagsikad ang mga siklista padulong sa Bantayog ng mga Bayani sa Quezon City. May ara man nga pareho nga aktibidad sa Davao City.