Gianunsyo niining Marso sa tulo ka dagkung burgesya-kumprador ang ilang “pag-usa” alang sa operasyon sa Ilijan LNG terminal, ang kinaunhang “integrated LNG import facility” nga gitukod sa Atlantic Gulf & Pacific Company (AG&P) sa baybay sa Barangay Ilijan, Batangas City. Nag-usa ang Meralco PowerGen, Aboitiz Power ug San Miguel Global Power (SMGP) aron paliton ang maong pasilidad og $3.3 bilyon (₱184 bilyon).

Langkub sa Ilijan LNG terminal ang siyam ka ektaryang yuta ug hangtud 700 metrong katubigan gikan sa baybay alang sa “nagalutaw nga mga tipiganan” sa LNG (liquified natural gas). Gawas sa dungguanan ug tipiganan, magsilbi usab kining pasilidad alang sa “regasification” (proseso sa pagtransporma sa LNG gikan sa likido ngadto sa orihinal niini nga pormang gas). Nagasuplay ang maong pasilidad og natural gas sa ginatukod nga dakung planta sa enerhiya nga gipanag-iyahan sa San Miguel Corporation (SMC).

Lakip ang maong pasilidad ug planta sa 12 ka “terminal” ug 35 ka bag-ong planta sa enerhiya nga planong tukuron aron mosalo sa imported nga LNG ug diesel. Pito sa mga terminal ug walo sa bag-ong mga planta nakatakdang tukuron sa baybay sa Batangas, atubangan sa Verde Island Passage (VIP). Ang uban planong tukuron sa Leyte, Navotas City ug Zamboanga. Usa sa mga plantang LNG, nga planong tukuron sa baybay sa Tañon Strait sa San Carlos, Negros Occidental, temporaryong napaatras sa mga protesta sa mga residente, tawong-simbahan ug mga grupong maki-kinaiyahan. Daghan sa mga proyektong LNG ginaduso sa SMC, kauban ang multinasyunal nga mga institusyon ug bangkong Japanese, Amerikano ug British.

Sa kasamtangan, unum ka plantang LNG ang adunay operasyon sa nasud, ug lima niini anaa sa baybay sa Batangas.

Bodega sa sarplas nga LNG sa US

Giabli sa Pilipinas ang pag-import sa LNG gikan 2021 atubangan sa ginataho nga pagkahurot hapit sa reserbang natural gas sa Malampaya gas fields sa 2027. Gigamit kini sa US aron itukmod ang nasud nga mag-import og LNG.

Ang US ang nag-unang prodyuser sa LNG sa tibuok kalibutan sukad pa niadtong 2011. Nalapawan niini ang Russia, Australia ug Qatar ug nahimong numero unong eksporter sa unang higayon niadtong Disyembre 2023. Kini bunga nag-una sa pag-ilog sa US sa merkado sa LNG sa Western Europe (Germany, France, UK, ug uban pa) nga kanhing nagadaloy sa mga tubo gikan sa Russia. Gawas sa pagpahamtang sa US og sangsyon sa pagpalit og LNG sa Russia sukad nga miulbo ang gyera sa Ukraine, gipabusikad pa niini ang Nordstream pipeline aron dili makaismagol og LNG. Walag too ang gikinahanglang tukuron nga mga LNG terminal aron han-ukanan sa LNG gikan sa US nga ginadala sa Western Europe sakay sa dagkung barko.

Direktang resulta sa proxy war sa US sa Ukraine ang pagsaka sa presyo sa LNG ngadto $40 kada usa ka milyong British thermal unit (mmBtu) niadtong 2022. Bisan pa man, tungod sa sobrang produksyon sa US sa LNG, nabira paubos ang presyo sa kalibutanong merkado ngadto sa $9.80 kada mmBtu niadtong 2023.

Napuliki karon ang US nga mag-abli og bag-ong mga merkado ug monopolisahon ang kanhing mga merkado sa Asia aron himuong bodega sa sarplas nga LNG ug ipabiling taas ang demand ug presyo niini. Pinaka-interasadong mag-import og LNG ang mga kumpanyang Amerikano sama sa ExxonMobil, Novatek ug Chevron.

Mikunhod man ang presyo sa LNG sa kalibutanong merkado, temporaryo lamang kini ug wala nagpasabot nga paubsan niini ang singil sa kuryente sa Pilipinas. Niadtong 2023, mas taas og $1-$3/mmBtu ang imported nga LNG kumpara sa lokal nga natural gas. Subay sa banabana sa Institute for Energy Economics and Financial Analysis, anaa sa ₱9 kada kilowatt hour (kwh) hangtud ₱16/kwh ang presyo sa namugnang enerhiya gikan sa imported nga LNG. Mas taas kini sa abereyds nga ₱7.38/kwh nga presyo sa enerhiya gikan sa kaparehong imported nga karbon ug diesel niadtong 2023, ug ₱4.4/kwh gamit ang lokal nga solar power.

Taliwala sa siguradong mas taas nga singil, gihimo pang rekisito sa Department of Energy ang pagkuha sa tanang distribyutor sa kuryente gikan sa mga plantang nagaproseso sa imported nga LNG. Subay sa “energy map” sa rehimeng Marcos, patas-an sa Pilipinas ang paggamit sa imported nga LNG ug mga enerhiyang “renewable” gikan 29% (kung asa 13% ang LNG) ngadto sa 35% pag-abot sa 2030 ug 50% sa 2050.


Hulga sa VIP ug panginabuhian sa mga mangingisda

Ginabaligya ang LNG isip “transition fuel” tungod kay mas limpyo kuno kini kumpara sa karbon ug diesel. Apan nagamugna pa gihapon kini og mga greenhouse gas (GHG) sama sa methane, carbon monoxide ug carbon dioxide. Gani, makita sa mga pagtuon nga mas makadaut sa kinaiyahan ang ginabuga niining methane, tungod kay 80-100 ka beses kining mas dugay nga nagatap-uk og kainit sa atmospera kumpara sa carbon dioxide.

Gisugdan atol sa pandemya (2021) ug nahuman niadtong 2023 ang konstruksyon sa Ilijan LNG terminal. Kitukod kini sa AG&P, usa ka kumpanyang nakabase sa United Arab Emirates, kaabag ang Osaka Gas ug Japan Bank for International Cooperation. Niadtong Pebrero, gipalit sa Amerikanong kumpanyang Nebula Energy ang dibisyon sa AG&P nga nakapukos sa LNG.

Kaabag sa Ilijan LNG terminal ang Batangas Combine Cycle Power Plant nga kasamtangang ginatukod sa SMGP sa Sta. Rita, Batangas. Bisan magkabulag nga proyekto, magkasumpay ang duha ka pasilidad ug nag-atubang sa parehong bahin sa VIP.

Matud sa pagtuon sa maki-kinaiyahang grupo, hulga ang duha ka pasilidad, ug uban pang susama niini, sa ekosistema sa VIP nga ginaila sa mga syentista isip “pinaka-adunahang habitat sa dagat” sa tibuok kalibutan. Sa konstruksyon pa lang, apektado na sa sediment (lalog) ug balas ang langkub sa pasilidad. Gitugaw sa konstruksyon ang siklo ug puluy-anan sa mga isda ug uban pang kinabuhi sa dagat dili lang sa hinanaling langkub niini apan bisan sa tibuok VIP. Nagresulta kini sa labaw nga pag-ubos sa kalidad sa mga coral reefs ug pag-ubos sa nasikop nga mga isda sa mga mangingisda.

Gawas sa kadaut sa kadagatan, nag-atubang usab ang AG&P sa kasong iligal nga kumbersyon sa mga yutang agrikultural sa mga barangay sa Ilijan ug De La Paz. Kini aduna usay mga kasong iligal nga pagputol sa kalubihan sa lugar. Gani, nagpagula og “cease and desist order” ang Department of Agriculture batok sa kumpanya niadtong milabayng tuig tungod sa kawalay permit niini. Kining tanan wala gitagad sa AG&P ug mga bangko sa Japan.

Dugay nang apektado ang gatusan ka mangingisda sa Batangas sa mga operasyon sa mga plantang pang-enerhiya sa First Gen ug SMC. Ayha pa gisugdan pagtukod ang mga bag-ong planta ug pasilidad, kapin tunga na ang gikibhang sa nasikop nga isda (tulingan ug galunggong) gikan 2019. Labaw pa silang naipit dihang gibawal ang pagpanagat sa mga baybay duul sa konstruksyon.

Dugang dinhi, gikabalak-an sa mga residente ang posibleng pag-awas sa LNG sa kadagatan, ilabina nga bulnerable ang VIP sa mga kusog ug grabeng bagyo. Wala pa nakabawi, ug posibleng dili na makabawi, ang VIP gikan sa kadaut bunga sa pag-awas sa lana gikan sa barkong giarkila sa SMC, ang MT Princess Empress, niadtong milabayng tuig.

Labaw nga mahugaw ang hangin ug tubig sa Batangas dungan sa pagdapog sa mga planta sa hugaw nga enerhiya sa mga baybay niini. Labaw usab nga matugaw ang kinabuhi sa dagat tungod kay modaghan ang mogawas-sulod nga mga barkong magdala og imported nga LNG.

Labaw nga mawad-an og kakuhaan sa panginabuhian ug bisan sa puluy-anan ang daghang komunidad sa baybay. Mokabat sa duha ka milyong Pilipino ang direktang nagsalig sa bahandi sa kadagatan sa VIP.