Mga protesta
Pag-apruba sa RBH7 sa Kongreso, gibatukan. Nagprotesta atubangan sa Kongreso ang mga demokratikong organisasyon sa usa ka People’s Rally niadtong Marso 20 aron babagan ang pagratsada sa RBH7, ang balaudnon nga nagaduso sa charter change (chacha). Human ang pipila lamang ka oras kaniadtong adlawa, giaprubahan sa Kongreso ang balaudnon sa botong 288 (pabor), walo (supak) ug duha (abstain). Lakip sa walong misupak ang mga kongresista sa blokeng Makabayan. Dungan sa protesta sa Kongreso, nagprotesta usab ang mga estudyante sa Katipunan Avenue, atubangan sa Ateneo de Manila University.
Epekto sa El Niño, tubagon. Nagpiket ang Amihan, nasudnong pederasyon sa kababayen-ang mag-uuma, sa upisina sa Department of Agriculture sa Quezon City niadtong Marso 7 aron makmakon ang rehimeng Marcos sa kawalay aksyon niini sa epekto sa El Niño sa masang mag-uuma. Duso nila kang Marcos ug sa mga ahensya sa estado nga hatagan sila sa hinanaling alibyu ug hinabang, ilabina ang mga nadautan og pananum tungod sa hulaw.
Demolisyon sa Navotas City, gibabagan. Nagrali ang mga mangingisdang myembro sa Pambansang Lakas ng Kilusang Mamamalakaya ng Pilipinas (Pamalakaya) sa baybay sa Navotas City niadtong Marso 15 aron batukan ang mando sa lokal nga gubyerno nga baklason ang mga tahungan ug baklad (fish corral) aron hatagag dalan ang Navotas Bay Reclamation Project. Ang 650-ektaryang reklamasyon ginaduso sa lokal nga gubyerno ug kasosyo niining Argonbay Construction Company, subsidyaryo sa San Miguel Corporation nga gipanag-iyahan ni Ramon Ang. Bisan sa pagbabag, gihimo sa mga ginsakpan sa kumpanya ug sa Coast Guard ang demolisyon niadtong Marso 18.
Adlaw batok sa dagkung dam, gidumdum. Nagprotesta ang mga grupo sa nasudnong minorya ug tigpanalipud sa kinaiyahan sa upisina sa Department of Environment and Natural Resources (DENR) sa Visayas Avenue, Quezon City niadtong Marso 14 aron babagan ang pagtukod og dagkung dam sa nasud ug iduso nga hatagag-proteksyon ang mga sapa. Gihimo ang protesta dungan sa pagdumdum sa tibuok kalibutan sa International Day of Action for Rivers and Against Large Dams.
Marcos sa Germany, gisugat og protesta. Gisugat og protesta sa mga migranteng Pilipino ang pagbisita ni Ferdinand Marcos Jr sa Berlin, Germany niadtong Marso 13. Gipasiugdahan sa ALPAS Pilipinas ug Gabriela-Germany ang maong protesta ug gisalmutan sa mga higalang organisasyong German. Matud nila, ang pagbisita ni Marcos sa Germany ug sa uban pang mga nasud sa Europe gikan Marso 11-15 angayang himuong okasyon sa tanang mga migranteng Pilipino ug mga tigpanalipud sa tawhanong katungod nga kundenahon ang brutal nga rehimeng nagasabwag sa linuog nga paglapas sa tawhanong katungod ug international humanitarian law (IHL).
LGBTQIA+ sa EARIST, mibarog batok sa diskriminasyon. Nagprotesta ang mga LGBTQIA+ sa pagpanguna sa Bahaghari-EARIST sa kampus niini sa Santa Mesa, Manila niadtong Marso 15 atubangan sa pagbawal sa mga transwoman nga estudyante nga maka-enrol hangtud dili magpaalut. Human sa protesta, temporaryong gisuspinde sa eskwelahan ang palisiya.
