NAGMARTSA NIADTONG ADLAW sa Kababayen-an, Marso 8, ang mga grupo sa kababayen-an sa pagpanguna sa Gabriela, ug lain-laing demokratikong organisasyon, aron ipadayag ang ilang pagsupak sa charter change (chacha) sa rehimeng Marcos, ug ang panawagan alang sa katungod, panginabuhian ug kaugalingnan. Nagmartsa sila gikan sa España Avenue padulong unta sa Mendiola apan giharang sila sa mga pulis sa kalsada pa lang sa Morayta. Naglunsad sila og programa atubangan sa Far Eastern University.

Sa programa, giprisinta sa Gabriela ang usa ka obra nga naghulagway sa “regalo” sa rehimeng Marcos sa kababayen-an nga adunay tatak nga chacha. Sulod sa kahon, mga halas nga misimbolo sa 100% pagpanag-iya sa mga langyaw, dugang nga mga base militar sa US sa nasud, ug pagpalungtad sa paglingkod sa gahum sa mga upisyal sa estado. Ang kahon giputos sa bandera sa US.

Gilunsad ang susamang mga protesta sa mga syudad sa Baguio, Calamba, Naga, Cebu, Iloilo, Bacolod ug Davao.