Buong pusong tinanggap ng mga rebolusyonaryong pwersa sa TK ang hamon ng kilusang pagwawasto na nilaman ng mensahe ng Komite Sentral sa ika-55 anibersaryo ng Partido Komunista ng Pilipinas. Tumimo ang panawagan sa bawat organo at kasapi ng Partido sa TK at naging tulak upang isagawa ang mga kritikal sa sariling pagsusuma ng mga karanasan at masikhay na pag-aaral.

Nakapanayam ng Kalatas si Ka Ethel, isang kadre ng rebolusyonaryong kilusang manggagawa, kaugnay ng kilusang pagwawasto at aplikasyon nito sa kanyang kinikilusang sektor. Isang dekada na siyang pultaym at kasalukuyang nag-oorganisa sa hanay ng mga manggagawa sa manupaktura at warehousing.

Kalatas (K): Ano ang pagtingin sa panawagang pagwawasto ng PKP?

Ka Ethel (E): Wasto at signipikante ang panawagan ng Partido sapagkat nagsilbi itong paalaala para sa lahat ng mga kadre at kasapi ng Partido na muling hawakan ng mahigpit at seryosong isabuhay ang linya, prinsipyo at patakaran ng Partido sa gabay ng Marxismo-Leninismo-Maoismo. Kung hindi matalas na nasuri ng Partido ang tunay na dahilan ng ating mga kamalian at kahinaan, tiyak na mas malalaking pinsala pa ang maaaring matamo ng kilusan at tuluyang mapapaniwala ang mga masa at ilang kasama na superyor ang kaaway.

Positibong tinanggap ng aming organo ang mga natukoy na kamalian at kahinaan. Matapat kaming nagpuna at mapagkaisang tumatalima sa pagwawasto. Bagamat mahirap ang kalagayang panseguridad, ligtas naming nailunsad ang pulong-pagtatasa at nagbalangkas ng plano at programa na nakaayon sa panawagang magwasto. Isinagawa ang mga pulong hanggang sa mga sangay ng Partido sa lokal. Isinaayos namin ang istruktura at pagpapagana ng mga lihim na makinarya, kasabay ng pag-aaral sa mga memo.

K: Anu-anong mga pag-aaral ang inyong inilunsad?

E: Nakapaglunsad ng BKP1 [1], TU Handbook [2] at IKP [3], pagbabalik aral sa Memo sa Gawaing Organisasyon at Edukasyon at PPSPL [4]. Tinitiyak na naibabahagi at natatalakay ang AB, memo at advisory sa lahat ng mga yunit.

K: Anong mga aral ang tumampok sa mga kasama?

E: Nang talakayin ang pahayag ng Komiteng Rehiyon ng TK sa ika-55 anibersaryo ng BHB, tumampok sa mga mag-aaral ang panahon ng paglihis at paglulunsad ng Ikalawang Dakilang Kilusang Pagwawasto (IDKP). Higit na naunawaan ng mga kasama ang pinsalang idudulot ng maluwag na paghawak sa MLM at hindi pagtalima sa mga patakaran ng Partido. Sa ibang pag-aaral, naarmasan ang mga kasama ng kaalaman at pamamaraan sa pag-oorganisa ng mga manggagawa kasabay ang reyalisasyon na ang pag-oorganisa sa mga manggagawa ay hindi lamang para isulong ang pang-ekonomyang pakikibaka bagkus ay hamigin sila para sa demokratikong rebolusyong bayan.

K: Tinukoy ang empirisismo na pangunahing mukha ng suhetibismo bilang ugat ng mga kamalian sa ideolohiya na “nagsisilbing mga batong pabigat na patuloy na pumipigil sa ating pagsulong at humihila sa atin sa mga pag-atras at pinsala.” Anu-ano ang nakikitang manipestasyon ng suhetibismo sa inyong yunit?

E: Nakita ang mga manipestasyon ng suhetibismo sa aming yunit kasama na ang ilang mga mukha ng konserbatismo, burukratismo, liberalismo, ligalismo, sektoralismo, lokalismo at ekonomismo.

Hindi mahigpit na naisasabuhay ang gawaing masa maging ang pagkukumbina ng ligal at iligal, hayag at di hayag na pagkilos. Marami sa mga kadre’t organisador ang de-opisina, de-lastiko at sandal sa elektronikong komunikasyon ang manera. Hindi nakikipamuhay sa mga manggagawa. Sa mga kadre naman sa lokal, bumatangal na ang pagrerekluta ng mga network at kasapi ng Partido dahil nadala ng takot sa pasistang atake ng estado. Ang pagrerekluta ay iniaasa na lamang sa mga mapangahas na organisador.

Litaw rin ang manipestasyon ng kaisipang ekonomismo, sektoralismo at lokalismo, sapagkat aktibo o masigla lamang ang pagpapakilos ng mga manggagawa kapag ang usapin ay may kinalaman sa kanilang kabuhayan, pangsektor at/o panglokal. Kulang ang inisyatiba para magpahayag ng mga paninindigan kaugnay ng maiinit na isyu. Kulang din sa kasigasigan. Kapag napagod, nahirapan at napuna sa gawain ay nag-iisip nang mag-lielow o mag-partaym.

K: Ano ang inyong mga hakbangin upang iwasto ang mga natukoy na kahinaan?

E: Ang hakbangin namin ay maglunsad ng tuloy-tuloy ng pamPartidong pag-aaral. Naging madalas din ang pulong-konsultahan ng mga makinarya. Balik-aral sa mahahalagang dokumento laluna para sa mga pultaym.

K: Anu-ano ang iyong kinakaharap na krisis at kahirapan sa iyong pagkilos? Paano mo ito iniigpawan?

E: Tuluy-tuloy ang atake ng kaaway sa saklaw ng aking nakikilusan at patuloy rin ang pagtugis sa akin. Nagkakaroon ng kahirapan sa mobilidad pero hindi naman ito naging daan upang maputol ang pakikipag-ugnayan ko sa masa o tumigil ako sa gawain. Para maigpawan ang sitwasyon, mahigpit akong tumatalima sa mga patakarang panseguridad ng Partido. Gumagamit ako at tinuruan ko ang mga pwersa at aking pamilya sa paggamit ng ligtas na komunikasyon. Lihim ang aking pagbibiyahe at lagi akong nagdadala ng ekstrang damit at gamit personal.

Palabasa ako ng mga dokumento, memo at advisory. Malaking bagay ito para patuloy na pataasin ang kamulatan at commitment, kaya kahit anong hirap at sakripisyo ay nakakayanan at napapakitunguhan ko.

K: Paano mo nakikita ang iyong sarili sa kasalukuyang estado ng rebolusyon?

E: Nakikita ko ang aking sarili sa ngayon na gumagampan ng sekundaryong papel, nagtataguyod ng rebolusyon sa kalunsuran, dahil ang kaya pang iambag sa ngayon ay buong panahon na pagkilos sa kalunsuran para mag-organisa ng mga manggagawa, magrekluta ng mga rebolusyonaryong pwersa at magpalitaw ng mga rekurso at iba pang gamit para sa armadong pakikibaka. Itinuturing ko itong panimulang hakbang at paghahanda para sa ganap na pagyakap sa rebolusyon sa hinaharap.

K: Ano ang iyong perspektiba bilang rebolusyonaryong manggagawa?

E: Inaasahan ng Partido ang mga kadre, organisador at mga kasapi ng Partido sa rebolusyonaryong kilusang manggagawa na ubos-kayang mag-ambag para palakasin ang Partido at ipagtagumpay ang rebolusyong Pilipino. Ang mahusay na pagsasabuhay sa MLM, linya at prinsipyo ng Partido, mga aral ng IDKP at ng kasalukuyang inilulunsad na kilusang pagwawasto ang mga materyales upang umani ng maraming rebolusyonaryong manggagawa at rebolusyonaryong base. Natatanaw ko na susulong at muling lalakas ang kilusang paggawa at ang Partido. Itatayo ang maraming rebolusyonaryong unyon sa mga pagawaan na mamumuno sa mga pakikibakang masa sa kalunsuran. Pamumunuan ng mga rebolusyonaryong unyon ang mga welga sa mga engklabo at pagawaan na magpapayanig sa mga ganid na dayuhan at lokal na kapitalista. Maraming rebolusyonaryong manggagawa ang lalabas ng pabrika para yakapin ang armadong pakikibaka.

———
1 – Batayang Kurso ng Partido, Unang Aklat
2 – Trade Union Handbook – Kulumpon ng mga pag-aaral sa kilusang paggawa
3 – Intermedyang Kurso ng Partido
4 – Pagtatayo at pagpapagana ng Sangay ng Partido sa Lokal