Isang masaklaw na war games o pagsasanay sa gera ang binuksan ng mga pwersa ng US sa teritoryo ng Pilipinas noong Hulyo 6, kasabay ng Cope Thunder na kasalukuyang inilulunsad sa Clark Air Base sa Pampanga. Magtatagal hanggang Hulyo 21 ang dalawang war games.

Binuksan ang Marine Aviation Support Activity (MASA) 2023 sa Taguig City ng mga upisyal mula sa US Marines at Philippine Marines. Lalahukan ito ng 2,711 personnel at 43 air assets, at sinabing isinasagawa para sa “mahigpit na integrasyon ng mga kagamitang panghimpapawid bilang suporta sa mga ground forces.”

Kabilang sa mga isasagawa sa war games na ito ang live fire na pagsasanay, bilateral air assault at pagsasanay sa pag-agaw ng mga paliparan, joint forward arming and refueling, at ibang aviation support operations. Isa sa mga gagawin dito ay ang pagpapalubog ng isang barko sa karagatan ng San Antonio, Zambales sa Hulyo 17. (Ginawa na ang ganitong “ehersisyo” sa ilalim ng Balikatan 2023.)

Tulad ng Cope Thunder, dalawang beses na inilulunsad ng US ang MASA sa loob ng isang taon.

Ang dalawang ito, katulad ng Balikatan na inilunsad noong Abril, ay bahagi ng 500 aktibidad na pinagkasunduan ng mga upisyal militar ng US at Pilipinas sa 2023. Naabot ang kasunduang ito noong nakaraang taon, matapos mailuklok sa poder si Ferdinand Marcos Jr. Halos doble ang bilang ito sa inilunsad na mga aktibidad ng US noong 2022. Kasabay nito ang pagratsada sa konstruksyon ng limang dating napagkasunduang mga base militar sa ilalim ng EDCA, at ang pagbubukas ng dagdag na apat na lokasyon.