Pinagbantaan ng mga sundalo ng 94th IB na babarilin ang mag-asawang Tasi at kanilang mga kapitbahay sa Sityo Kambudlis, Barangay Mahalang, Himamaylan City, Negros Occidental noong Enero 3. Ang yunit ng 94th IB na nasa naturang barangay ay nakahimpil at nag-ooperasyon sa erya mula pa huling bahagi ng Disyembre 2024.

Ayon sa ulat ng mga residente, matapos pagbantaan ang mag-asawa ay pinalabas ng 94th IB na nakumpiska sa kanila ang maiiksing armas. Pinaratangan silang mga tagasuporta ng Bagong Hukbong Bayan (BHB). Hindi pa nakukumpirma kung inaresto ang mag-asawa at sinampahan ng mga kasong kriminal gamit ang itinanim na ebidensya.

Samantala, noong Disyembre 2024 ay pinagbabaril ang kubo ni Jesse Talaban sa parehong lugar. Pinag-interesan ng mga sundalo ang tanim na buyo na pinagkukunan ng kabuhayan ni Talaban. Ang buyo ay sangkap ng nga-nga, na nginunguya ng matatanda sa baryo.

Binatikos ni Ka Dionesio Magbuelas, tagapagsalita ng BHB-South Central Negros (Romeo Nanta Command), ang modus na ito ng 94th IB. Aniya, ipinakikita lamang ng panggigipit na ito at operasyong kombat ng 94th IB na peke ang deklarasyon nitong “dismantled” o nabuwag na ang larangang gerilya ng BHB sa South Central Negros.

Nanawagan si Ka Dionesio sa mamamayan ng Himamaylan City na magkaisa at matapang na ilantad ang mga krimen ng 94th IB para ipagtanggol ang kanilang mga karapatan, seguridad at kabuhayan.