Patuloy na lumalawak ang mga kilos-protesta ng mga mamamayan sa buong mundo bilang suporta sa mamamayang Palestino para sa tunay na kalayaan at laban sa gerang henosidyo ng Israel. Sa pinakahuling mga ulat, kumalat na ang mga kilos protesta sa 40 bansa at sa iba’t ibang syudad sa loob ng naturang mga bansa.

Sa Pilipinas, pinakahuli ang pagtipun-tipon noong Oktubre 16 ng mahigit sa 12,000 residente ng South Cotabato sa isang rali ng pananampalataya para ipanawagan ang kagyat na pagtigil ng pambobomba ng Israel sa Gaza. Dala-dala ang mga bandila ng Palestine, nanawagan sila para sa paglaya ng Palestine. Ilang araw bago nito, nagdaos din ng mga rali sa Marawi City at sa Maynila bilang pagsuporta sa Palestine.

Noong Oktubre 13, sabay-sabay na nagrali ang mga mamamayan sa tinaguriang “Byernes ng Al-Aqsa Flood.” Tugon ito sa panawagan ni Khaled Meshal, dating lider ng Hamas, sa mamamayan sa kalapit na bansa na suportahan ang Palestine. Ang mga pagkilos ay pakikiisa ng mamamayang Arabo sa kanilang “pinakamamahal na Palestine, Al-Qud at Al-Aqsa.” Itinuturing na banal ang Al Aqsa, isang importanteng mosque, hindi lamang sa mamamayang Palestino kundi sa iba pang Arabo at Islamikong mamamayan.

Tumugon sa panawagan ang mamamayan sa Jordan, Lebanon, Syria, Iran at Egypt. Sa Jordan, marahas na binuwag ng mga pwersa ng estado ang isinagawang pagkilos sa hangganan ng bansa at ng Palestine. Sa Iraq, isang dambuhalang protesta na nilahukan ng daanlibo mamamayan ang idinaos sa sentro ng Baghdad.

Sa US, isinagawa ang pagkilos sa New York, Los Angeles, Chicago, Atlanta at San Francisco. Nagkaroon ng mga pagkilos sa loob ng malalaking unibersidad tulad ng UCLA at Harvard. Kabilang sa mga nagprotesta sa New York ang mga Israeli na mula sa Jewish Voice for Peace, isang grupo ng mga Jews at biktima ng Holocaust, na nanawagan para sa pagtigil ng henosidyo ng Israel sa Gaza. Panawagan din nila sa US na suportahan ng mga mambabatas ng US ang isang tigil-putukan. Sinupil ang kanilang pagkilos at 57 sa kanila ang inaresto.

Sa France, 150,000 mamamayan ang humugos sa lansangan sa tinaguriang “Day of Rage” sa kabila ng pagbabawal ng gubyernong Macron laban sa gayong mga demonstrasyon. Sa gabi ng Oktubre 12, nakipagsagupaan ang mga raliyista sa daan-daang pulis na ipinadala ni Macron para buwagin ang mga protesta.

Sa United Kingdom, libu-libo ang sumama sa mga vigil at protesta sa London. Sa Greece, tumungo ang kabataan sa embahada ng Israel para tutulan ang henosidyo nito. Libu-libo rin ang nagprotesta sa Ireland, Germany, Iceland, Norway at Spain. Sa The Netherlands, 15,000 ang nagrali noong Oktubre 15. Sa Switzerland, nagtungo sa upisina ng United Nations sa Geneva ang mga raliyista.

Sa India, inilunsad ng mamamayang Muslim sa bansa ang pagkilos kasabay ng kanilang pagdarasal. Sa Malaysia, 1,000 ang nagrali at nagsunog ng dalawang effigy na may nakasabit na mga bandila ng Israel. Nagkaroon din ng mga pagkilos sa Indonesia, Bangladesh, Pakistan, Japan at Sri Lanka.

Sa Latin America, malakas ang pagkundena ng mamamayan sa Brazil, Uruguay at Venezuela. Samantala, sinipa ng Colombia ang ambasador ng Israel sa kanilang bansa. Mariing kinundena ng presidente nitong si Gustavo Petro ang pang-aatake ng Israel sa Gaza na inihalintulad niya sa mga aksyon ng Nazi ng Germany. Nagkaroon din ng mga pagkilos sa Mexico at pahayag ng pasuporta mula sa Cuba.

Sa Australia, may 1,000 ang nagmartsa sa mga lansagan sa Sydney para ipanawagan ang pag-atras ng kanilang gubyerno ng suporta nito sa Israel. Nagkaroon din ng protesta sa Melbourne.

Sa Canada, nagkaroon ng mga protesta sa limang syudad.

Nauna nang nagkaroon ng dambuhalang mga rali sa Yemen at Turkey. Nagkaroon din ng mga pagkilos sa Afhganistan, Tunisia, South Africa at Serbia.