Sa Sitio Emerald, Barangay Diatagon, Lianga, Surigao Del Sur kapin kun kulang sa alas 8 sa kabuntagon Enero 24, 2023 walay duha-duha nga gipaarakan og bala ang 5 ka managsilingang mag-uuma sa tropa sa 3rd SFB, 9th Company ilalom sa pagpangulo ni Army Captain Agoña. Isa niini ang naigo patay nga nailang si Danny Malinao, 48 anyos, minyo ug lumulupyo sa nahisgutang lugar samtang luwas nga nakadagan tungod sa grabeng kalisang ang upat niini.

Sumala sa nadawat nga report, wala sila makabantay sa nagpundo nga tropa niini. Kalit lang silang gipamusil sa ilang umahan samtang mangharvest na unta sa gulayon nga gikamatay sa maong biktima. Ang maong patay’ng lawas anaa gidala sa sentrong bahin sa sityo. Mokabat sa 20 minutos ang pinatakang pagpamusil sa mga sundalo.

Ang NPA ug tibuok rebolusyonaryong pwersa sa Surigao Del Sur hugot nga nagkundena niining bangis nga binuhatan sa AFP ngadto sa mga sibilyan nga nahimong nag-unang target sa ilang focused military operations, aron magpagawas na usab og pekeng engkwentro bisan klaro nga walay presensya sa NPA sa maong lugar. Kini ang unang natala nga bag-ong kaso sa ekstrahudisyal nga pagpatay sa unang kwarto sa tuig 2023.

Tataw nga sila ang nag-unang tig sabwag og terorismo ngadto sa katawhan. Ang pinatakang pagpamusil ug pagpagawas og pekeng engkwentro, mga sibilyan ang nag-unang bulnerable niini. Ang maong panghitabo, naghatag lamang og dugang basehanan aron mas mailhan pa sa katawhan ang kalahian sa AFP ug NPA, kung asa sa duha ang matinud-anong nag-alagad sa interes ug nag depensa sa ilang demokratikong katungod. Dugang hagit usab kini sa mga kauban aron labaw pang mapanalipdan ang masa ug ipaasdang sa lahutay ang Demokratikong Rebolusyon sa Katawhan.

Busa, nag awhag kami sa mga sibilyang adunay kahibalo sa maong insidente nga ibutyag kining hinungog nga binuhatan sa reaksyonaryong AFP/PNP. Ayaw kamo pagpadala sa kahadlok sa pagpanghulga kun mosibya sa kamatuoran kay samot lang ninyong gihatagan og gahum ang kaaway sa iyang kabangis. Ayaw ninyo tuguti nga ilubong nalang sa kalimot ang mga brutal nga pagpamatay ngadto sa mga sibilyan nga walay ikasukol. Gidasig usab namo ang mga taong midya ug tanang adunay pagpakabana sa tawhanong katungod nga motabang aron masayran sa publiko ang ingon niining insidente ug mapanubag sila sa ilang krimen nga nahimo.

Padayong suklan ug papanubagon ang reaksyonaryo ug ilehitimong rehimeng itoy sa US ug China nga si Marcos Junior nga naghatag og gahum sa iyang pasistang kasundaluhan aron hasion ang masang gipahimuslan ug dinaugdaug!

Katawhan sa Surigao Del Sur, hiniusang mubarog, dili mahadlok!

Kab-oton ang hustisya! Mangahas makigbisog!