DOWNLOAD

Samtang hitaas nga ginpapalakaypakay an Pula nga bandera han Marxismo-Leninismo-Maoismo ngan amkon an dugang nga determinasyon nga pamunuan an nasyunal-demokratiko nga rebolusyon han katawhan Pilipino, iginpapaabot han Komite Sentral han Partido Komunista ng Pilipinas an naglalarab nga pagbati hini ha ngatanan nga mga kadre ngan aktibista han Partido, mga Pula nga mangaraway han Bagong Hukbong Bayan, mga alyado ha National Democratic Front ngan hiluag nga masa han katawhan Pilipino, ha okasyon han ika-56 nga anibersaryo han katukod han Partido.

Hini nga okasyon, nananawagan kami ha bug-os nga Partido ngan ngatanan nga rebolusyunaryo nga mga pwersa nga:

Pahilarumon ngan pahiluagon an kagiusan nga pagtutul-id! Dugang nga pakusgon an Partido! Hilarum nga gumamot ha masa ngan madig-on nga pamunuan an ira pag-ato ha pasista ngan burukrata-kapitalista nga rehimen US-Marcos! Magpursige ha pagpasulong han demokratiko nga rebolusyon han katawhan!

Yana nga adlaw, ginpapasidunggan namon hi Ka Jose Maria Sison, tagapangulo nga tagapagtukod han Komite Sentral, nga nagsurat han mga Marxista-Leninista-Maoista nga teoretikal nga mga dokumento nga padayon nga nahatag-lamrag ha rebolusyunaryo nga dalan han katawhan Pilipino. Waray katapusan nga hihinumdumon han bag-o nga henerasyon han mga kadre han Partido ngan mangaraway ngan kukuhaan hin inspirasyon an bug-os nga kinabuhi nga komunista nga dedikasyon ni Ka Joma ha proletaryado ngan ha ngatanan nga gintatalumpigos ngan gintitiyupi nga mga klase.

Ginhahandum namon an ngatanan nga mga bayani ngan martir han katawhan Pilipino nga waray pagkamakaiya nga naghalad han kinabuhi para ha nasyunal-demokratiko nga kawsa han katawhan Pilipino. Gintatagan namon hin nalalain nga pagkilala an ngatanan nga mga lider han Partido ngan mga Pula nga mangaraway han Bagong Hukbong Bayan nga namatay ha pagpasulong han gerra han katawhan ngan pag-ato ha pasista nga rehimen US-Marcos ha nakalabay nga tuig. An ira mga ngaran ha kadayunan nakasurat ha kasaysayan han rebolusyon Pilipino.

Ha okasyon han anibersaryo han Partido, ginpapaabot liwat namon an militante nga rebolusyunaryo nga pagbati ha ngatanan nga kontra-imperyalista, progresibo ngan demokratiko nga mga partido, organisasyon ngan kagiusan ha bug-os nga kalibutan nga naato ha imperyalismo nga US ngan nakikigbisog ha imperyalista nga mga gerra ngan hulga han gerra. Ginpapaabot namon an pagbati hin pagkamagbinurugto ha ngatanan nga rebolusyunaryo nga komunista nga nag-aaram, nag-uundong ngan nag-aaplikar han Marxismo-Leninismo ha ira mga nasud, ngan namumuno ha mga trabahador ngan katawhan ha ira pakigbisog para ha nasyunal nga katalwasan ngan sosyalismo.

Ginsasalin-urog naton an ika-56 nga anibersaryo han Partido nga matarum nga nasasantop kun tiunan-o an madagmit nga natikagrabe nga internasyunal ngan lokal nga krisis ha ekonomiya ngan pulitika naghihimo hin mga kundisyon nga paborable ha paglansar hin rebolusyunaryo nga pakig-away.

Padayon nga ginlaladawan an pankalibutan nga sistema nga kapitalista hin mga paghinay ha ekonomiya, hiluagan nga disempleyo, ngan natikagrabe nga hulga han istagplasyon ngan resesyon. Ginpapaypayan ngan ginsusulsulan han imperyalista nga US an armado nga mga sumpakiay ha Europe, ha Middle East ngan Asia. Gin-aatuhan han mga trabahador ngan katawhan an imperyalista nga mga gerra, proxy nga gerra, pasista nga pananalumpigos, pag-iban han pondo ha pampubliko nga serbisyo, natikahitaas nga mga presyo, ngan ginpapakusog an ira tingog para ha mas hitaas nga suhol ngan iba pa nga kadagmitan nga demokratiko nga mga demanda.

Ludlod ha krisis ha ekonomiya ngan pulitika an naghahadi nga sistema ha Pilipinas. Natikabagsak an sosyo-ekonomiko nga kamutangan han pira kamilyon nga Pilipino tungod ha waray hunong nga pagbagsak han lokal nga ekonomiya nga nakasarig-ha-import ngan nakatadong-ha-eksport. An dirudiretso nga pagluya han lokal nga produksyon ha agrikultura ngan industriya nagreresulta ha natikahitaas nga disempleyo ngan hiluagan nga pan-ekonomiya nga dislokasyon. Ha luyo nga gapil, padayon nga natikadako an langyaw nga kapitalista nga ganansya ngan karikuhan han lokal nga oligarkiya tikang ha paniniyupi ha mga trabahador ngan natural nga karikuhan, ngan tikang ha pampubliko nga paggastos ngan ayuda nga ginpondohan han utang. Naggrabe an korapsyon ngan pampulitika nga panmuypoy ha ilarum han burukrata-kapitalista ngan pasista nga rehimen ni Marcos. Ludlod an naghahadi nga sistema ha padayon nga natikapintas nga pampulitika nga krisis. Ginbubutong an nasud han pagyukbo han rehimen Marcos ha heopulitikal nga interes han US ngadto ha ipo-ipo han inter-imperyalista nga gerra.

An natikagrabe nga krisis ha ekonomiya ngan pulitika han naghahadi nga sistema ilarum han rehimen Marcos, padayon nga nagduduso ha katawhan Pilipino nga gumios ngan maglansar hin kolektibo nga pakig-away agud ipakigbisog an ira kadagmitan nga mga demanda. Naghihimo ini hin labaw nga paborable nga kundisyon agud gumamot an Partido hin mas hilarum ngan mas hiluag ha masa agud mapamunuan hira ha pakigbisog kontra ha rehimen US-Marcos.

I. Ha butnga han kapitalista nga istagnasyon, ginpapaypayan han imperyalismo an mga gerra ngan ginduduso an pag-ato

Ginlalasurbo an kapitalista nga kalibutan hin mga sumpakiay nga nagtitikang ha mga kontradiksyon giutan han monopolyo nga burgesya ngan proletaryado, giutan han imperyalismo ngan mga katawhan han tinalumpigos nga mga nasud, giutan han imperyalismo ngan mga nasud nga nag-iinsister han nasyunal nga soberaniya, ngan giutan han magkakaribal nga mga imperyalista nga poder. Ha yana, an madagmit nga natikapintas nga inter-imperyalista nga sumpakiay amo an prinsipal nga kontradiksyon nga naglaladawan han presente nga pankalibutan nga sitwasyon, samtang nanunulsol ngan nagduduso hin mga gerra an imperyalismo nga US ha magkalain-lain nga parte han kalibutan.

Padayon nga nagtitiwog-tiwog an kapitalista nga sistema tungod ha sobra nga produksyon han mayor nga mga epektos, diin an dirudiretso nga sobra-sobra nga kapasidad ngan katambak han diri mahibaligya nga imbentaryo han mga produkto nga manupaktura (kalakip an pankonsumo nga elektroniks, mga gamit ha panimalay, mga kotse, makinarya, puthaw ngan materyales ha konstruksyon) ngan produkto nga pan-agrikultura (soybeans, trigo, mais ngan iba pa). Nagreresulta ini ha grabe nga kapitalista nga isan-isanay agud agawon an kontrol ha mga merkado, sugad liwat an ginkukuhaan han hilaw nga materyales agud mapahimubo an gastos ha paghimo hin mas damo nga epektos. An ginbubunga hini nga pagkabangkrap, pagtig-ob (merger) ngan pagpalit (buyout) nahihingadto ha dugang nga konsentrasyon han kapital ha kamot han pipira nga monopolyo.

Nagpapabilin nga ludlod ha krisis ha ekonomiya ngan pinansya an pankalibutan nga kapitalismo. Masobra usa kadekada ngan hin tunga na ini nga aada ha istagnasyon han mahinay nga pagtubo, diin damo nga nangunguna nga kapitalista nga nasud permi aada ha peligro han resesyon. Pakyas an “rebanse” (pagrekober) kahuman han pandemya nga kab-uton an daan nga balitang han produksyon. An pankalibutan nga pagdako han ekonomiya diri ginlalauman nga malahos ha 3% yana ngan ha masunod nga tuig. Madagmit nga naruruba ngan nagluluya an produktibo nga mga pwersa ha butnga han mga pagserra ngan taranggalay. Nag-aantos an mga trabahador ngan masa nga anakbalhas ha natikabagsak nga sosyo-ekonomiko nga kamutangan samtang an pinakadagko nga kapitalista nga bilyunaryo padayon nga naghahakin hin karikuhan. An natikahilarum nga limitasyon ha kapas nga pumalit han klase nga trabahador naghihimo hin bara ha pagkonsumo relatibo ha produksyon. Ginriringgal han natikadako nga proteksyunismo ngan heopulitikal nga tensyon an agos han negosyuhay ngan naghihimo hin mga ulang ha merkado nga nagpapagrabe la ha sobra nga produksyon.

Sugad hadto, an kabug-usan nga demand ginduduso han utang imbes nga pahitas-on an suhol ngan kapas nga pumalit han klase nga trabahador. Naglobo an pankalibutan nga utang ngadto ha $322.9 katrilyon, nga naghitaas hin $12 katrilyon ha syahan nga tulo nga kwarto han 2024. Katugbang ini han 326% han pankalibutan nga gross domestic product (GDP). An dako nga parte han langyaw nga utang hadton 2024 nahingadto ha pagpondo ha mga proyekto nga imprastruktura nga naghagudalan ha pagsakob han multinasyunal nga mga kompaniya, kalakip an ginpapakete yana ha ilarum han gintatawag nga “green economy” (solar, mga proyekto nga nukleyar ibp). Hadton 2023, an kabug-usan nga $1.4 katrilyon nahingadto ha pagbayad hin langyaw nga utang. Masobra 35 nga nasud an ginpapakurian han utang ngan aada ha peligro nga diri makabayad. Naghihimo hin ispekulatibo nga bura ha mga sapi, real estate, ngan bisan ha mga cryptocurrency an ginpapalobo nga pampinansya nga sektor.

Nagpapabilin ha istagnasyon an ekonomiya han US diin ginlalauman nga maabot la an pagdako ha 2.7% yana nga tuig. Ginsusugbong hini an $35.5 katrilyon nga utang, nga 123% han kabug-usan nga kadako han ekonomiya hini. Sigon ha opisyal nga mga estadistika (datos), aada ha 16 kamilyon nga Amerikano nga trabahador an waray o kulang hin trabaho, kundi sigon ha independyente nga pagtantiya aada ha 110 kamilyon an waray trabaho. Samtang padayon nga naghahakin hin karikuhan an 20 nga bilyunaryo nga Amerikano nga may katin nga $2.7 katrilyon, gintatantiya nga 43 kamilyon nga Amerikano an nabubuhi ha kakablasan, nag-aantos ha natikaraut nga sosyo-ekonomiko nga kamutangan ha butnga han natikahitaas nga implasyon, natikadako nga utang han mga panimalay, himubo nga suhol, paghitaas han ihap han mga waray puruy-anan, ngan kawaray akses ha pampubliko nga serbisyo pankalibsugan. Temporaryo nga nasusuportahan an ekonomiya han US han pagbuylo han merkado ha pinansya ngan sapi tungod ha pagsulod han pankalibutan nga kwarta nga namimiling hin talwas nga madeposituhan, kundi namamangpangan ini nga patikangan han krisis ha pinansya.

Naatubang liwat ha istagnasyon an pinakadagko nga ekonomiya ha Europe. Kahuman bumagsak ha resesyon hadton nakalabay nga tuig, ginlalauman nga an ekonomiya han UK madako hin diri maunhan hin 1% yana nga tuig. Ginlalauman nga mahaligot an ekonomiya han Germany hin 0.2% yana nga tuig tikang ha 0.3% nga pagluros hadton nakalabay nga tuig, tungod ha maluya nga demand para ha produkto nga manupaktura. Ha atubangan han waray katupong nga pampubliko nga depisito, an ekonomiya han France ginlalauman nga madako hin diri malahos ha 1.1% yana nga tuig, ngan 0.9% ha masunod nga tuig. Ginkakaatubang han mga trabahador ngan katawhan han Europe an kawaray seguridad ha trabaho, natikagrabe nga kamutangan ha kinabuhi, kundisyon ha trabaho, grabe nga pagtitipid nga nagresulta ha natikaguti nga akses ha pankatilingban nga serbisyo, ngan kulang nga suhol nga diri na makasustiner ha natikahitaas nga gastos agud mabuhi.

Nagpapabilin nga aada ha panmaihaan nga istagnasyon an ekonomiya han Japan. Gintatantiya nga madako ini hin mas himubo pa ha 1% yana nga tuig. Ginpapakurian ini han $8.6 katrilyon nga utang nga nalahos ha masobra 250% han ekonomiya hini. An ekonomiya han China ginlalauman nga madako hin diri malabaw ha 5% yana nga 2024, mas mahinay itanding ha nakalabay nga tuig ngan pinakamahinay tikang dekada 1990. Ginbabay-og ini han krisis ha real estate ha butnga han sobra nga suplay han pabalay, natikaguti nga pamumuhunan ngan utang nga diri nababaydan han mga debeloper ha real estate, natikahitaas nga utang han mga panimalay ngan paghinay han lokal nga paggastos ha konsumo. Ha butnga han pankabug-usan nga pagluya han pankalibutan nga ekonomiya, namimiling an China han mga pamaagi agud parayhakon an ekonomiya hini ha atubangan han sobra nga produksyon nga unob ha kapitalismo diin lahos an kapas han mga produktibo nga pwersa nga maghimo hin mga epektos tanding ha kapas han merkado nga makonsumo ini. Naatubang na ini ha mga kontradiksyon nga unob ha dalan han pag-uswag han kapitalismo.

An dako nga mayoriya han mga nasud ha Asia, Africa ngan Latin America nagpapabilin nga atrasado ngan agraryo, ngan nagseserbe nga mga taga-eksport han hilaw nga materyales, o komo taga-suplay han barato nga kusog-pagtrabaho para ha mga multinasyunal nga korporasyon. Nagresulta an pankalibutan nga kapitalista nga istagnasyon ha mas himubo nga demand para ha barato nga eksport, ngan nagpahinay ha langyaw nga pamuhunan ha assembly-line nga pagmanupaktura. Sobra hira nga ginpapakurian han natikahitaas nga depisito ha balyuay ngan lebel han utang. Nag-aantos an mayoriya han katawhan ha natikagrabe nga sosyo-ekonomiko nga kamutangan, nga ginlaladawan han kakablasan, kagutom, diri paghibaro han pagbasa ngan pagsurat, malnutrisyon, ngan sakit, ngan han grabe nga epekto han mga kalamidad nga dara han pagbag-o ha klima, nga bunga han pira katuig nga imperyalista nga pandambong ha ira mga nasud.

Ginpapagrabe han pankalibutan nga kapitalista nga istagnasyon an mga sumpakiay ha ekonomiya ngan pulitika giutan han mayor nga imperyalista nga mga poder. Samtang padayon nga ginduduso han US an mga neoliberal nga palisiya para abrihan an ekonomiya han mga bagakolonya ngan han mga kapitalista nga nasud nga karibal hini, nagpapatuman ini han mas proteksyunista nga mga pitad ha nakalabay nga usa ngan tunga kadekada, ha pag-atentar nga utro nga pabuyluhon an lokal nga industriyal nga produksyon.

Nagbuhos an gubyerno han US ilarum ni Biden hin haros $40 kabilyon para suportahan an produksyon han semikonduktor nga may katuyuanan nga kontrolon an 30% han pankalibutan nga suplay, nga direkta nga natupong ha Taiwan ngan Japan. Ginpahitaas hini an tantos han taripa ha dirudilain nga klase han mga produkto nga gin-iimport tikang ha China. Dugang hini, nag-imponer ini hin mga panggigipit ha ekonomiya ngan pinansya ha Russia, nga may partikular nga tuyo nga ibanan an eksport han Russia han lana ngan natural gas ngadto ha Europe. An tisakob nga presidente han US nga hi Trump nagdeklara na hin mga plano nga dugang pa nga pahitas-on an taripa han China, sugad liwat ha gin-iimport nga mga produkto tikang ha Mexico ngan epektos.

An duso han US para ha proteksyunista nga mga pitad gintutugbangan na han mga kontra-pitad han imperyalista nga mga karibal hini. Ha inisyatiba han Russia ngan China, ginpahiluag hadin naglabay an BRICS (Brazil, Russia, India, China ngan South Africa) agud lupgupon an upat pa nga mga nasud (Egypt, Ethiopia, Iran ngan United Arab Emirates), labot pa ha pagdeklara hini han plano nga magdugang hin 13 nga “kabakyang” nga nasud. May mga paningkamot liwat nga pauswagon an alternatibo nga sistema nga pampinansya sugad han inisyatiba nga BRICS cross-border payment (sistema han bayaray han mga nasud), digital nga kwarta han mga bangko sentral, ngan iba pa nga sistema agud aghaton an negosyuhay nga diri nakahigot ha dolyar han US, nga naiban ha bulnerabilidad hini ha pan-gigipit han US.

An nagigin mapintas nga isan-isanay ha ekonomiya nga nagtitikang ha pag-atentar han monopolyo nga burgesya han US nga pugngan an estratehiko nga pagbagsak hini, nahingadto na ha natikapintas nga mga militar nga sumpakiay. An imperyalista nga US an pinakamakiaawayon ha ngatanan nga imperyalista nga poder samtang nag-aatentar ini nga balyahon an mga karibal ha hingyap nga utro nga ig-establisar an kalugaringon komo nag-uusahan nga superpower. Ha presente, nangunguna ini ha pagsulsol han mga gerra ha bug-os nga kalibutan. Aktibo hini nga ginsusunghan ngan ginsusulsulan an mga gerra nga may katuyuanan nga agawon an estratehiko nga mga rekurso tikang ha kontrol han iya mga karibal. An pagbalik ni Donald Trump komo presidente han US nagpabuylo ha pagbutho han mga neopasista nga grupo ha US. Dugang nga magpapapintas ha inter-imperyalista nga sumpakiay, ngaduha ha China ngan Russia, sugad liwat ha tradisyunal nga mga alyado han US, an iya agresibo nga pagduso han proteksyunista nga mga palisiya ha US.

Ha pag-armas ha Ukraine ngan pagposisyon han mga armas hini apiki ha este nga bawnderi han nasud ha Russia, nagmanilampuson an US nga iduso an pag-atake han Russia hadton 2022. Tikang hadto gintagan hini an Ukraine hin masobra $115 kabilyon ha porma han ayuda, masobra katunga ha porma han mga armas agud palawigon an gerra ha tuyo nga paluyahon an Russia. Agud labaw nga papintason an gerra, “gintugutan” hadin naglabay han US an Ukraine nga magbuhi hin mga mid-range nga misayl tipakadto ha Russia, nga gintugbangan han Russia han pinakasyahan nga paggamit han mga hypersonic nga misayl.

Padayon nga ginsusuportahan han US an henosidyo nga gerra han Zionista nga Israel kontra ha katawhan Palestino ha Gaza nga nagpatay na han masobra 45,000, kaupod an 17,000 nga kabataan, ngan nagsamad ha maabot 110,000 katawo. Gintagan hini an Israel hin haros $18 kabilyon nga ayuda militar, kalakip an mga bomba ngan misayl nga gin-gamit han Israel ha panmomba ngan panganyon ha Gaza. Gin-abuyunan ngan ginsuportahan liwat han US an mga airstrike han Israel kontra ha Iran hadton Oktubre, ngan kontra ha Lebanon hadton Nobyembre nga nagpatay ha 3,800 katawo ngan nagsamad ha haros 16,000. Nakigkonsabuhay an US ha Israel, Turkey, ha UK ngan mga pwersa ha NATO agud iduso an pagpatalsik ha presidente han Syria nga hi Bashar al-Assad (nga nagtugot ha Russia nga magmentinar hin base militar) ngan pagpabagsak ha Syrian nga gubyerno. Tikang hadto, ginsuportahan han imperyalista nga US an pagsakop han Israel ha Golan Heights, paglansar hin airstrike ngan pag-abante ngadto ha sentro han Syria, samtang ginduduso an mas dako nga kontrol ngan impluwensya ha pagbug-os hin bag-o nga gubyerno.

Samtang ginpapaypayan an mga gerra ha Ukraine ngan ha Middle East, nagduduso an mga panmilitar nga pwersa han US ha langyaw nga labnasan prinsipal ngadto ha gintatawag hini nga Indo-Pacific nga rehiyon, subay ha “pivot to Asia,” nga may prinsipal nga katuyuanan nga palibutan ngan ikahon an China ngan targeton an Democratic People’s Republic of Korea (DPRK). Padayon hini nga ginpapadig-on an mga base militar ha Japan ngan South Korea, sugad liwat ha Pilipinas. Ginduso hini an Japan nga dugangan an gastos ha militar ngan pahiluagon an mga pwersa militar hini agud bumakyang ha mga pwersa militar han US. Gin-gagamit hini an Pilipinas komo base han mga operasyon ha South China Sea ha katuyuanan nga papintason an sumpakiay ha China.

Padayon liwat nga ginlalansar han US an interbensyon ha pulitika ngan militar kontra ha mga nasud nga nag-iinsister han nasyunal nga soberaniya. Ginhimo hini an ngatanan nga porma han pagpabagsak kontra ha mga gubyerno ha Venezuela, Cuba ngan iba pa nga mga nasud ha Latin America. Gintatarget liwat hini an Iran, nga madig-on nga naninindugan kontra ha interbensyon han US ha Middle East.

Nagduduso hin mga panmasa nga pakigbisog ngan ngatanan nga porma han pag-ato an imperyalista nga krisis ngan mga gerra. Nahitukod an higlapad nga alyansa giutan han mga kontra-imperyalista nga kagiusan han katawhan, sugad liwat han mga gubyerno nga natipa ha interbensyunismo han US. Ginkuha han Venezuela an inisyatiba ha pagtukod han usa nga kontra-pasista nga nagkakaurusa nga prente kontra ha imperyalismo nga US.

Binuto an mayor nga mga pakigbisog han trabahador ha US ngan iba pa nga mayor nga kapitalista nga nasud agud idemanda an mas hitaas nga suhol ngan mas maupay nga mga kondisyon ha pagtrabaho, kalakip an welga han 50,000 nga Amerikano nga trabahador ha piyer hadton Oktubre, ngan han 33,000 nga trabahador ha kompaniya nga Boeing. Gatus-gatos kayukot nga mga trabahador an nagwelga ha France komo protesta ha pag-iban han badyet ha pampubliko nga serbisyo. Naglansar hin nasyunal nga welga an mga trabahador han Germany hadton Oktubre agud magdemanda hin mas hitaas nga suhol. Mayor liwat nga mga welga han trabahador an ginlansar ha Belgium, Finland, Italy, Spain, The Netherlands, Cyprus ngan iba pa nga nasud. Dagko nga protesta han trabahador an ginhimo ha South Korea agud ipanawagan an pagpatalsik ha nakalingkod nga presidente. Mayor nga mga aksyon protesta liwat an padayon nga ginlalansar ha bug-os nga kalibutan nga nagdedemanda ha US nga paundangon an pag-eksport hin armas ngadto ha Israel ngan nananawagan ha pagtapos ha Zionista nga henosidyo han mga Palestino. Ha butnga han hiluagan nga protesta han mga trabahador, labaw nga nagigin paborable an mga kundisyon, labina ha mga kapitalista nga nasud, agud ig-anak an mga militante nga alyansa ngan konseho han mga trabahador nga magseserbe nga hiluag nga nagkakaurusa nga prente para ha ira ginpapakigbisugan nga mga demanda ha ekonomiya ngan pulitika.

Ha mayoriya han mga nasud ha bug-os nga kalibutan nga nagpapabilin nga bagakolonyal ngan baga-pyudal an kamutangan, naglalansar an hiluag nga masa han trabahador ngan parag-uma, bagaproletaryado ngan petiburgesya ngan iba pa nga tinalumpigos nga mga klase ngan sektor han militante nga mga pakigbisog agud ipakigbisog an ira mga katungod ha ekonomiya ngan pulitika, kontra ha niyutiyo ngan korap nga mga gubyerno. Ginlalansar nira an ngatanan nga porma han pag-ato agud ipasulong an ira hingyap para ha nasyunal nga katalwasan, partikular tikang ha imperyalista nga dominasyon han US.

Padayon nga natikahiluag an mga kagiusan ngan organisasyon han pagmagbinurugto han mga katawhan. Naani hira hin mayor nga mga kadaugan ha pagpatuman han mga resolusyon han International People’s Tribunal hiunong ha internasyunal nga makatawo nga balaud, kalakip an kasumpay ha kamutangan ha Pilipinas. Nakikit-an ini ha susrunod nga pankalibutan nga mga asembleya nga ngatanan waray katupong ha kadako ngan kahiluagon.

An mga pakigbisog para ha nasyunal nga katalwasan han tinalumpigos nga mga klase ngan katawhan ha mga nasud nga bagakolonyal ngan bagapyudal, kabakyang han pakigbisog han mga gubyerno nga nagdedepensa ha ira nasyunal nga soberaniya ngan naato ha agresyon, panginlabot ngan subersyon han imperyalista nga US.

Padayon gihapon nga ginpapasulong han armado nga pag-ato han mga katawhan ha bug-os nga kalibutan, nga nakikig-away para ha nasyunal nga katalwasan. Nagpapabilin nga madig-on an mga rebolusyonaryo nga pwersa ha Palestine ha ira armado nga pakig-away kontra ha pagsakop han Israel ha ira katunaan. Naglalansar liwat an katawhan nga Kurdish han ira armado nga pag-ato para tukuron an usa nga naglulugaring nga nasud. Padayon nga naato an etniko nga minoriya nga mga grupo ngan ira mga hukbo ha pasista nga rehimen Tatmadaw ha Myanmar. Padayon nga ginlalansar an rebolusyunaryo nga armado nga pakig-away ha India agud atuhan an brutal nga gerra han pasista nga rehimen Modi. Padayon liwat nga ginpapamunuan han mga partido komunista an armado nga pag-ato ha Turkey, Colombia, Pilipinas ngan iba pa nga mga nasud.

II. Natikagrabe nga kamutangan ha ekonomiya, dugang nga pagpapas han nasyunal nga soberaniya ngan natikapintas nga pasista nga panmuypoy ilarum han rehimen US-Marcos

Padayon nga nagrabe an permihan nga krisis ha Pilipinas, nga nagpapagrabe ha sosyo-ekonomiko nga kamutangan han hiluag nga masa han katawhan Pilipino. An tikamatay nga bagakolonyal ngan bagapyudal nga moda han produksyon ginlaladawan han karuba han produktibo nga mga pwersa ngan paggrabe han pinakamagraut hini nga aspeto.

Mayda hiluagan nga pagkaruba ha lokal nga produktibo nga mga pwersa nga nahingangadto ha paghinay han produksyon (ngaduha ha pagmanupaktura ngan agrikultura). Nagbubunga ini hin hiluagan nga disempleyo, dugang nga pagsarig ha imported nga epektos para ha konsumo, ngan tigda nga paghitaas han presyo.

Nagpapabilin nga atrasado ngan agraryo an lokal nga produksyon. Waray batakan nga mga industriya nga poyde bumakyang ha pagdako ngan paghiluag han ekonomiya. Ginruba han dirudekada nga liberalisasyon ha importasyon ngan kumbersyon han tuna an lokal nga produktibo nga mga pwersa, labina an lokal nga produksyon ha agrikultura. Natikabagsak pa ngani an produktibidad ha agrikultura ha nakalabay nga tulo katuig nga nagresulta ha makasaysayan nga depisito ha negosyuhay ha agrikultura, natikagrabe nga pagsarig ha importasyon han pagkaon, ngan natikabagsak nga pakabuhi han masa nga parag-uma. An parte ha ekonomiya han sektor han industriyal nga pagmanupaktura, binagsak ngadto ha pinakahimubo nga lebel tikang 1949. Kundi padayon an waray wantas nga pagpatuman ni Marcos han neoliberal nga mga palisiya nga nagpapagrabe ha pagsarig han nasud ha import, nagpahiluag ha mga pribilehiyo ngan insentibo han multinasyunal nga mga korporasyon, ngan dugang nga nagpaluya ha lokal nga produksyon.

Nagresulta ini ha higtaas nga presyo, himubo nga suhol ngan kawara han pakabuhi han milyun-milyon nga masa nga anakbalhas. An permihan nga depisito ha negosyuhay han nasud aada ha pinakahitaas ha kasaysayan. Tungod kay waray kapas an pan-eksport nga industriya han nasud nga kumita hin langyaw nga kwarta (foreign currency), sobra nga nakasarig an ekonomiya ha langyaw nga remitans ngan langyaw nga pautang para pondohan an mga import. An kabug-usan nga langyaw nga utang han nasud linobo ngadto ha $139.6 kabilyon hadton Septyembre 2024—katugbang hin 31% han gross domestic product (GDP) nga pinakahitaas ha haros 15 katuig—diin $86.9 kabilyon an langyaw nga pampubliko nga utang.

Ilarum ni Marcos, padayon nga natikahitaas an utang han nasyunal nga gubyerno, nga inabot na ha masobra ₱16 katrilyon hadton Oktubre 2024, o dako nga paglukso nga ₱3.2 katrilyon o 25% bisan kun waray pa magkatunga an unom katuig niya nga termino. Prinsipal nga nagseserbe an umento ha pagpahiluag han mga operasyon han dagko nga burgesya komprador ngan pagbayad ha langyaw ngan lokal nga utang. An kabug-usan nga binulan nga utang han gubyerno nga Marcos nga ₱204 kabilyon, mas dako ha gintig-ob nga binulan nga pag-utang ilarum han mga rehimen Duterte (₱131 kabilyon) ngan Aquino (₱61.5 kabilyon). Dirudiretso nga natikahitaas an balor han otomatiko nga ginbabayad ha utang. Hinitaas na hin 22% an bayad ha interes pala, tikang ₱628.3 kabilyon hadton 2023 ngadto ha ₱763.4 kabilyon yana nga 2024. Nakatalaan ini nga utro nga humitaas hin 11% ngadto ha ₱848 kabilyon ha 2025. Mas hitaas ngan mas dako an gintig-ob nga bayad ha interes ngan ha prinsipal tikang ₱1.57 katrilyon hadton 2023, ngadto ha ₱2.03 trilyon yana nga 2024 ngan gintatantiya ngadto ha ₱2.05 katrilyon ha 2025.

Nagresulta an pankalibutan nga istagnasyon ha ekonomiya ha paghinay han lokal nga ekonomiya, partikular ha pag-asembol ngan semi-processing. Ha butnga han sobra nga suplay ha kalibutan, ginlalauman nga mahaligot hin diri mamenos ha 10% an eksport han semikonduktor, nga magbubunga hin pagserra o pananggal ha trabaho ha mga lokal nga empresa ha pag-asembol. Mayda kapareho nga pananggal ha trabaho ha mga empresa nga naghihimo hin panapton, wiring ngan iba pa nga produkto nga pan-eksport.

Pinakahitaas pa gihapon ha kasaysayan an ihap han mga Pilipino nga waray trabaho. Gintatahuban la ini pinaagi han manipulasyon ha estadistika han mga ahensya han estado. Sobra nira nga gin-uunat an mga kategoriya nga “mayda trabaho” para mahiupod hasta an haros tulo kamilyon nga diri sinuhulan nga trabahador ha negosyo han pamilya sugad liwat an pira kamilyon nga tagapurot han basura, mga parupamaligya, gudti nga opereytor ha transportasyon, tag-iya han mga sari-sari store, kabulig ha balay, mga Youtuber ngan Tiktoker ngan iba pa nga impormal nga trabaho. An tinuod, damo ha ira mga waray trabaho nga ginsusulod bisan ano nga pakabuhian bisan kun himubo, waray kaseguruhan ngan kanan-kablas an kita ngan waray benepisyo o pankatilingban nga proteksyon. Para tahuban an kagrabihon han disempleyo, ginpapaguti liwat han mga eksperto ha estadistika han estado an “labor force participation rate” (tantos han partisipasyon han kusog-pagtrabaho) para tanggalon an milyun-milyon nga Pilipino ha gin-iihap nga mga waray trabaho.

Partikular nga grabe an kawaray empleyo ha ranggo han kabatan-unan, kaupod an mga nakatangpos nga waray mabilngan nga trabaho ha natad nga ira gin-adman. Nagsusuruot ha nasyunal nga kabisera ngan iba pa nga mayor nga syudad an dako ura-ura nga reserba nga hukbo han pagtrabaho. Padayon nga natikahitaas an kawaray trabaho ha kabaryuhan ha atubangan han panlupot han tuna ngan pangagaw han pakabuhi han milyun-milyon nga parag-uma. Bunga hini, masobra 7,500 nga trabahador an nagikan ha nasud kada adlaw agud mamiling hin trabaho ha iba nga nasud ha syahan nga siyam kabulan pala han 2024, tungod ha kawaray hin sadang nga trabaho ha nasud. Ginrereport nga haros 11 kamilyon an Pilipino nga nagpapakabuhi ha langyaw nga labnasan, kaupod an aada ha unom kamilyon nga migrante nga dokumentado ngan diri dokumentado.

Natikabagsak an kalidad han kinabuhi han hiluag nga masa han katawhan ilarum han rehimen Marcos ha butnga han dirudiretso nga pag-umento han presyo han pagkaon, petrolyo, kuryente, tubig ngan iba pa nga pampubliko nga serbisyo ngan yutiliti. Ha partikular, permi hitaas an implasyon ha pagkaon tungod ha presyo han bugas nga kontrolado han mga burgesya komprador nga kartel ngan ismagler ha pakigkonsabuhay ha mga upisyal han gubyerno. Padayon nga natikadako an diperensya han suhol ngan sweldo han mga trabahador ngan ordinaryo nga mga empleyado, itanding ha balor han inadlaw nga panginahanglan han lima-katawo nga pamilya. Ha desperasyon nga “makakayer” han langyaw nga kapital, napatuman an rehimen Marcos hin palisiya han pagraysang ha suhol.

Nagpapagawas an mga upsiyal ni Marcos hin ura-ura nga ginpahimubo nga datos ha pagsukol ha kakurian gamit an diri matuod-tuod nga himubo nga suklanan han kakablasan. Ginrarakudako han rehimen an pagdako han ekonomiya nga kunuhay pinakamadagmit ha rehiyon, ngan diri na maiha makakab-ot na han nasud an istatus nga hitaas nga namumutngaan-an-kita. Ha kamatuoran, an paspas nga nagdadako amo an ihap han mga kablas ngan nagugutom nga mga Pilipino. Tikang han lumingkod ha poder hi Marcos, dinako an ihap han mga kablas nga pamilya nga Pilipino hin 50% (nakada ha upat kamilyon) tikang walo ngadto ha masobra 12 kamilyon. An ihap han nagugutom nga mga pamilya dinako hin 120% (3.4 kamilyon) tikang 2.9 kamilyon ngadto ha masobra unom kamilyon. Ha tigda nga paghitaas han mga presyo ngan pagbagsak han ira kapas nga pumalit, nagdako an ihap han mga panimalay nga waray natitirok nga kwarta (savings) hin 1.5 kamilyon ngadto ha masobra 20 kamilyon. Masobra 75% han mga Pilipino kablas ngan nag-aantos, nga ginkumpirma bisan han mga pag-aram han bangko sentral.

Samtang nag-aantos an dako nga mayoriya han katawhan Pilipino ha natikagrabe nga kundisyon ha panginabuhi, kawaray trabaho ngan kawara hin pakabuhi, napatakas naman ha karikuhan ngan pribilehiyo an mga Marcos ngan mga naghahadi nga klase. Gin-gagastos ni Marcos an pondo han publiko para ha agsub nga pagbiyahe ha iba nga nasud, nalupad gamit an upisyal nga mga helikopter para ha personal nga byahe agud lumikay ha grabe nga trapik, naghihimo hin mga magarbo nga pangaon ngan pribado nga konsyerto ha palasyo han presidente, ngan nagpaparasa han kalugaringon ngan iya pamilya ha usa nga baga-resort nga balay ha Malacañang.

Waray kaawod nga gin-gagamit han rehimen Marcos an pampulitika nga pribilehiyo agud bawion an bilyun-bilyon kapisos nga karikuhan nga iligal nga ginhakin ha ilarum han 14 katuig han diktadura nga Marcos Sr (1972-1986) nga ginbawi han nakalabay nga mga rehimen. Tikang han liningkod hi Marcos ha poder hadton 2022, susrunod nga ginbasura han lokal nga mga korte an diri mamenos ha walo nga kaso han korapsyon ngan ginkawat nga karikuhan kontra ha pamilya Marcos, nga nabalor hin diri mamenos ha ₱352 kabilyon. Kalakip hini nga mga kaso an pondo nga coco levy nga ginkawat nira Marcos, Juan Ponce Enrile ngan Eduardo Conjuangco tikang ha mga parag-uma agud pumalit hin mga sapi, kompaniya, bangko ngan magpautang ha mga kroni.

Kontrolado ni Marcos an target nga ₱500 kabilyon nga pampubliko nga pondo han Maharlika Fund, diin ₱75 kabilyon na an nahibalhin, nga libre na niya nga ihatag ha ginpapaboran nga pribado nga negosyo ngan mga proyekto nga pan-imprastruktura nga gin-garantiyahan han gubyerno. Ha badyet han rehimen yana nga 2025, diri mamenos ha ₱1.5 katrilyon an nakaalutaga ha pagtindog o pagpahiluag han mga kalsada ngan tulay nga notoryus ha korapsyon. Gin-ibanan an badyet ha edukasyon, kalibsugan, ngan iba pa nga pankatilingban nga serbisyo para ibalhin ngadto ha pork barrel, ha porma han ginpapagawas nga kwarta nga pansubsidyo ngan ayuda. Nag-alutaga hi Marcos hin ₱4.5 kabilyon ha kalugaringon nga confidential and intelligence funds.

An natikagrabe nga krisis han naghahadi nga sistema padayon nga nagpapatarum ha pampulitika nga krisis ha ilarum han rehimen Marcos. An natikaguti nga rekurso ha ekonomiya nga mapagbababhinan han naghahadi nga mga klase amo an nagduduso ha naghahadi nga mga buruktrata-kapitalista nga magin mas hakog ngan maipa ha pribilehiyo ngan karikuhan han kada tagsa. Nag-aaragaw hira ha mga kontrata ha gubyerno para makuha an ira parte ha suborno. Gin-gagamit nira an poder ngan pribilehiyo han gubyerno para paboran an ira mga kroni ha negosyo ngan loyalista ha pulitika.

Natikatarum an sumpakiay han mga Marcos ngan Duterte, nga nagtataglawas ha duha nga nangunguna nga paksyon han presente nga naghahadi nga grupo nga nag-aaragaw ha pribilehiyo ha ekonomiya ngan pampulitika nga poder, samtang tikahirani an midterm nga eleksyon ha 2025, nga ginkukunsidera nga importante nga pangandam para ha pampresidente nga eleksyon ha 2028. Ginrekomenda han House of Representatives nga dominado han mga Marcos nga kasuhan hi Duterte han mga krimen ha katawhan, sugad han mga ginsalawad han mga biktima han ekstra-hudisyal nga panmatay ha International Criminal Court (ICC). Sugad liwat, diri mamenos ha tulo nga reklamo han impeachment an ginsalawad kontra ha anak ni Duterte, hi Sara, bise presidente ngan hadto anay sekretaryo ha edukasyon, tungod ha maanomaliya nga paggamit ha masobra ₱500 kamilyon nga “confidential funds,” labot ha damo pa nga isyu. Tungod kay diri hiya segurado ha hul-os nga leyaltad han armado nga hukbo ngan lupgop han nasasalin nga impluwensya han mga Duterte ha militar, gindedelatar ni Marcos an pagpatalsik kan Sara Duterte, ngan an pagkaso ngan pag-aresto han ICC kan Rodrigo Duterte.

Padayon nga ginpapakita han niyutiyo nga rehimen Marcos an butaray nga pagyukbo hini ha amo nga imperyalista nga US. Gintutugutan hini an US nga padig-unon an panmilitar nga posisyon hini ha Pilipinas, para magpadasig ngan magpahiluag han panmilitar nga gahum han US ha Asia-Pacific nga rehiyon. Kaupod an mga opisyal ha depensa ngan militar han US, nagpirma an rehimen Marcos han Bilateral Security Guidelines ngan Security Sector Assistance Roadmap, nga dugang pa nga naghihigot ha Pilipinas ha heopulitikal nga interes ha militar han US. Nagpirma liwat ini ha usa nga deklarasyon kaupod an US ngan Japan agud magbubug-os hin trilateral nga alyansa nga klaro nga nagseserbe ha “Indo-Pacific Strategy” han Pentagon.

Ha ilarum ni Marcos, nagdamo an ihap han mga base ngan pasilidad militar han US tikang upat ngadto ha 20, kalakip an mga opisyal nga ginkikilala ha ilarum han Enhanced Defense Cooperation Agreement (EDCA), hasta na an mga lugar nga ginsisikreto ha publiko. An disenyo han US amo an gamiton an nasud komo lansaran han mga operasyon militar ngan nabal ha rehiyon nga nakatadong kontra ha China ngan ha DPRK. Ginpapabilin liwat hini an dako nga bulto han mga panmilitar nga pwersa ha Japan, South Korea, ngan Australia, samtang diri mamenos ha tulo nga carrier strike group an dirudiretso nga nagsusulay-sukay ha kadagatan ha palibot han China. Naglalansar an US hin haros kada adlaw nga mga treyning ha gerra ha nasud. An Balikatan exercises hadton Abril amo an pinakadako ha kasaysayan nga ginpartisiparan han masobra 11,000 nga sundalo nga Amerikano.

Ginpapadalagan han militar han US an sentro han kumand hini ha Palawan, sugad liwat ha prinsipal nga hedkwarters han Armed Forces of the Philippines (AFP), agud pamunuan ngan ikoordinar an mga nabal nga operasyon ngan pwersa nga coast guard han Pilipinas ngan US kalakip an mga “supply mission” ha Ayungin Shoal, “freedom of navigation” ngan iba pa nga mga operasyon ha South China Sea nga may katuyuanan nga idasig an panmilitar nga poder han US. Ini nga mga operasyon nagsusulsol ngan nagpapagrabe han tensyon ha China ngan ginhihimo kadungan han kampanya agud paypayan an Sinophobia (kangalas ha mga Chinese) ha mga Pilipino. Ginbaton ini han China hin dugang nga mas agresibo nga nabal ngan pandagat nga operasyon nga natamak ha eksklusibo nga katungod ha ekonomiya han Pilipinas ha West Philippine Sea, hinungdan nga mas nagigin makuri an murayaw nga dayalogo ngan resolusyon ha mga pandagat nga tipa-tipa giutan han Pilipinas ngan China.

Ha mando han US, padayon nga ginduduso han rehimen Marcos an “modernisasyon” han AFP para himuon ini nga “interoperable” o mas masayon kontrolon nga pandugang nga pwersa han US. Ha ilarum han “foreign military financing” (FMF o langyaw nga pagpondo ha militar) han US, “ginbabalhin” an segunda mano nga mga higamit pan-gerra ngadto ha militar han Pilipinas. Ha ilarum han FMF, nagsaad an US hin $500 kamilyon ha Pilipinas yana nga 2024, ngan nagproponer hin $2.5 kabilyon nga pakete para ha 2025-2029.

Katin an militar ngan pinansya nga suporta han US, ginpapintas han rehimen Marcos an pampulitika nga pan-gigipit ngan an gerra han panmuypoy nga natarget ha katawhan Pilipino ngan ha ira organisado nga patriyotiko ngan demokratiko nga pwersa. Kadungan hini, naglalansar ini hini todo-larga nga kampanya ha disimpormasyon ngan sikolohikal nga gerra, ha pauru-utro nga pagdeklara nga an mga probinsya ha bug-os nga nasud “insurgency-free” o waray na armado nga pag-ato, nga tahub ha waray wantas nga mga pagtalapas ha tawhanon nga katungod ngan internasyunal nga makatawo nga balaud.

Pauru-utro nga gindeklara han AFP an plano hini nga pagbirik tikang “internal nga depensa” ngadto ha “eksternal nga depensa” ngan pagpatuman han “integrated territorial defense system” nga ginlaladawan han pagpahiluag ngan pagpakusog han mga paramilitar nga yunit (CAFGU) hini. Ini nga mga dekla-rasyon ha publiko, paghatag kaseguruhan ni Marcos ha imperyalista nga amo nga andam an iya gobyerno nga mag-alutaga hin mas damo nga panmilitar nga pwersa agud suportahan an panmilitar nga pwersa han US ha mga operasyon hini ha South China Sea ha panahon nga magpintas an inter-imperyalista nga armado nga agway o butad nga gerra.

Tungod ha grabe niya nga karuyagon nga rumkon an armado ngan diri armado nga pag-ato han katawhan agud tanggalon an mga ulang ha iya burukrata-kapitalista, pasista ngan niyutiyo nga rehimen, gin-gagamit ni Marcos an pinakabrutal ngan waray kaluoy nga pamaagi han panmuypoy ha katawhan. Ginmandaran niya an AFP nga mag-imponer hin balaud militar ha yukut-yukot nga barangay ngan komunidad ha kabaryuhan, nga utro nga nagbuhi ha madugo nga taktika han pasista nga panmuypoy hadton panahon han ginkakangalsan nga diktadura han iya tiraniko nga amay.

Ha tahub han mga “community support program,” nagdedeploy an AFP hin mga grupo han mga pankombat nga sundalo para magtindog hin mga baraks ngan detatsment ha sakob han mga komunidad ha ligid han kabablayan han mga sibilyan, sukwahi ha internasyunal nga makatawo nga balaud. Gin-iimponer nira an ira poder ngan nagsasabrag hin ngirhat ha katawhan. Ginpapailarum an mga komunidad ha baga-garison o baga-hamlet nga kontrol. Gin-gigipit han mga pasista an katungod han katawhan nga libre nga makagios o bumiyahe gamit an mga tsekpoynt ngan logbook, pagblokeyo ha pagkaon ngan komersyo, karpyu ngan bisan ano la nga arbitraryo nga mga palisiya. Kalakip liwat hini an pagdiri ha mga parag-uma nga magtrabaho ha mga umhanan ha nakatalaan nga mga oras, nga nakakaringgal ha ira pagpakabuhi. Napostura nga huwes, husgado ngan berdugo ini nga mga sundalo ha pagbansag ha mga sibilyan komo “tagsuporta” o “rebelde” ngan pagduso ha ira nga “magpa-klir” han ira mga ngaran o “magsurender” ha militar, gawas ha mga ligal nga proseso subay ha ira kalugaringon nga balaud, kadungan han mga panarhug han ekstra-hudisyal nga pagpatay o tortyur.

Sobra nga ginkakangalsan han katawhan ini nga mga pasista. Nangunguna hira ha paggamit han gindidiri nga druga, pornograpiya, prostitusyon ngan iba pa nga kontra-sosyal nga mga bisyo ha mga kabatan-unan ha larang nga patayon an ira hingyap para ha pankatilingban nga hustisya. Ginsasamok nira an kamurayawan ha mga komunidad ha kada gab-i nira nga pag-inirignom ngan waray wantas nga pagpabuto han pusil han mga hubog nga sundalo. Dabi ini nga mga sundalo ha natikadamo nga ihap han mga sekswal nga kaso han panharas, panmolestiya ngan panlugos han kababayin-an.

Padayon nga natikadamo an mga masaker, ekstra-hudisyal nga panmatay, tortyur, pagsikmit, iligal nga pangaresto ngan iba pa nga mga krimen nga ginbuhat han mga sundalo. Agud tagan rason ini, nagpapagawas hin buwa nga mga pahayag an AFP nga an ira mga biktima mga Pula nga mangaraway nga napatay ha engkwentro, bisan pa kun direkta ini nga ginpapanhimuwa han mga lokal nga residente. Mayda mga kaso han panmatay ha kalagsan, bug-os nga pamilya, burod ngan kabataan. Pinakagrabe an mga kaso han pampulitika nga panmuypoy, pagtalapas ha tawhanon nga katungod ngan mga krimen kontra ha makatawo nga balaud ha mga lugar diin gin-gagamit an militar agud palayason an katawhan ha ira tuna ngan puypuyon an ira pagtipa ha pagsakob han dagko nga kompaniya han mina ngan plantasyon, mga proyekto nga enerhiya ngan eko-turismo, ngan iba pa.

Kapareho nga mga taktika han pampulitika nga panmuypoy an gin-gagamit han mga pwersa nga militar ngan pulis agud puypuyon an pakigbisog han katawhan ha mga syudad. Nagdedeploy hira hin mga grupo han armado nga sundalo ngan ahente ha mga komunidad han mga kablas ha syudad para igpailarum an katawhan ha sarbeylans, panharas, “pagpasurender” ngan iba pa nga mga operasyon han “pagkumbert,” pag-aresto, pagsikmit ngan pagpatay. Kakunsabo an mga kapitalista, gintutudlok han mga ahente han militar an mga lider ngan organisador han unyon ngan “ginbibisita” hira ha ira mga balay agud hadlukon hira ngan an ira pamilya ha tuyo nga piriton hira nga umundang ha ira buruhaton nga pag-organisa. Gintatarget liwat han mga militar nga pwersa ngan ahente ha paniktik an mga estudyante, kababayin-an, tawo-ha-singbahan, trabahador pankalibsugan ngan iba pa nga sektor. Ha tahub han “pag-ato ha madarahug nga ekstrimismo,” naglalansar an AFP, kaupod an National Task Force (NTF)-Elcac ngan iba pa nga reaksyunaryo nga ahensya han estado, hin kampanya han kontra-komunista nga panmuypoy nga natalapas ha mga katungod nga mag-organisa han katawhan ngan magpahayag han ira mga demanda.

Diri nababantad an katawhan Pilipino ha atubangan han natika-grabe nga mga porma han pananalumpigos ngan paniniyupi ngan pasista nga pangatake. Determinado an hiluag nga masa han katawhan nga ipakigbisog an ira mga katungod, kadagmitan nga demanda ngan panmaihaan nga mga hingyap. Padayon hira nga nag-oorganisa ngan naglalansar hin militante nga pakigbisog.

Ginlansar han mga drayber ngan opereytor han dyip an militante nga mga aksyon protesta kontra ha plano han rehimen Marcos nga i-phase out an mga dyip, nga maghihikaw han pakabuhi ha pira kayukot nga katawhan. Maoobserbahan naton an landaw nga pagrayhak han aktibidad han mga trabahador ha pagbug-os han mga unyon ngan pagduso han demanda para ha umento ha suhol. Padayon nga ginpapasulong an pira nga lokal nga pakigbisog han parag-uma kontra ha pag-atentar han mga agaron maytuna ngan dagko nga burgesya kumprador nga luputon an ira tuna. Ginpapadako han mga panmasa nga organisasyon an ira tingog agud ipanawagan an mas himubo nga presyo han bugas, petrolyo, kuryente ngan iba pa. An mga migrante nga trabahador, tikang Europe tubtub Middle East, tikang ha mga mandaragat tubtub ha mga kabulig ha balay, aktibo nga nagpapakusog han ira mga organisasyon ngan militante nga ginpapasulong an ira mga demanda.

Nagkamayda hin mga aksyon protesta kontra ha treyning militar han US ha Pilipinas, kontra ha mga base militar han US, ngan interbensyon militar ha South China Sea. Ginlansar liwat an mga protesta komo pakig-usa ha katawhan nga Palestino kontra ha henosidyo han US-Israel ha Gaza.

Ginpahayag han mga biktima han mga kalamidad hadin naglabay an panawagan para ha danyos-perwisyo ha kapakyasan han estado nga seguruhon an katalwasan han katawhan. Ginsukna nira an palisiya han pag-undong ha mina ngan iba pa nga mga aktibidad nga mapanhibang ha kalibungan.

Padayon nga nagkukusog an ira panawagan agud pagawason an mga priso pulitikal, palutawon an mga biktima han pwersahay nga pagkawara, ngan hustisya ha ngatanan nga mga biktima han pagtalapas ha tawhanon nga katungod. Aada liwat an natikakusog nga demanda ha rehimen Marcos nga makigbuligay ha International Criminal Court para ha pag-aresto ngan pagbista kan Rodrigo Duterte ha mga krimen kontra ha katawhan. Mayda liwat mga panawagan para ha impeachment ni Sara Duterte komo bise presidente, samtang ira liwat ginsusukna an korapsyon han rehimen Marcos.

Samtang ginlalansar nira an mga aksyon protesta kontra ha pagpakaniyutiyo, korapsyon, pasismo ngan kontra-katawhan nga mga palisiya han rehimen Marcos, nagpadalagan an mga ligal nga nasyunal-demokratiko nga panmasa nga organisasyon, alyansa ngan pampulitika nga partido hin 11-katawo nga kandidato ha pagkasenador, dugang ha pira nga party-list nga grupo nga nadalagan para ha mga pwesto ha kongreso. Aktibo nira nga gin-uundong an nasyunal-demokratiko nga programa, kabakyang an programa para ha kadagmitan nga mga reporma, nga tuyo nga haw-ason an masa tikang ha pagkaludlod ha hiluag nga disempleyo ngan hilarum nga kakablasan. Ginbubuksas ngan gin-aayat nira an reaksyunaryo nga eleksyon agud pukawon an labaw nga mas damo nga ihap han katawhan, agud aghaton hira nga bumoto para ha ira mga kandidato, ngan labaw nga mas importante, agud magtukod hin bag-o nga mga tsapter ngan magrekrut hin bag-o nga mga kaapi, para ha labaw nga mas dagko nga panmasa nga pakibisog ha tidaraon.

An makurimot nga panalinguha para pukawon, organisahon ngan pagiuson an katawhan, piho nga magbubunga ha madig-on nga pagmartsa tipaunhan han demokratiko nga kagiusan masa ha tiarabot nga tuig. Determinado an katawhan nga magtukod, magpakusog ngan magpahiluag han ira mga unyon ngan ngatanan nga klase han panmasa nga organisasyon para mas epektibo nira nga ipakigbisog an ira mga interes ha ekonomiya ngan pulitika, ngan ipasulong an kawsa han nasyunal nga demokrasya.

Naghihimo hin paborable nga mga kondisyon an natikahilarum nga makaklase nga kontradiksyon ngan an natikagrabe nga krisis ha ekonomiya ngan pulitika han naghahadi nga sistema, agud dugang nga pahiluagon ngan pakusgon an Partido Komunista ng Pilipinas. Aada na ha sugbong han mga kadre ngan kaapi han Partido an responsabilidad nga bug-os kusog nga maningkamot para mas hilarum ngan hiluagan nga gumamot ha masa, agud pukawon ngan pamunuan hira ha dalan han demokratiko nga rebolusyon han katawhan.

III. Madig-on nga nakakagamot an kagiusan nga pagtutul-id, kundi daramo pa an kinahanglan himuon

An Partido Komunista ng Pilipinas amo an abante nga destakamento han proletaryado nga Pilipino. Gin-aaplikar hini an unibersal nga teorya han Marxismo-Leninismo-Maoismo, an ideolohiya han klase nga trabahador, ha kongkreto nga kamutangan han katilingban Pilipino, nga kontrolado han imperyalismo nga US, ngan aada ha ilarum han makaklase nga paghahadi han dagko nga burgesya ngan agaron maytuna. Ginlatag han Partido an programa para ha demokratiko nga rebolusyon han katawhan komo baton ha permihan nga krisis han bagakolonyal ngan bagapyudal nga sistema, agud butukon an mga patriyotiko ngan demokratiko nga klase han mga trabahador, parag-uma, bagaproletaryado, gudti ngan nasyunal nga burgesya.

Gintukod an Partido hadton Dis-yembre 26, 1968, ngan tikang hadto namuno ini ha katawhan Pilipino ha pagpasulong han nasyunal demokratiko nga rebolusyon. Usa ini nga organisasyon nga hitaas an disiplina subay ha mga prinsipyo han demoktratiko sentralismo. Ginkokomponer ini han mga proletaryo nga kadre ngan aktibista nga hilarum ngan hiluag nga nakagamot ha masa. Namumuno ini ha mga rebolusyunaryo nga organisasyon ngan panmasa nga pakigbisog han mga trabahador ngan iba pa nga demokratiko nga klase ngan sektor. Namumuno ini ha Bagong Hukbong Bayan ha pagpasulong han panmaihaan nga gerra han katawhan subay ha estratehiko nga linya han pagpalibot ha kasyudaran tikang ha kabaryuhan. Gintukod hini ngan ginpapamunuan an National Democratic Front komo pinakakonsolidado nga rubas han nagkakaurusa nga prente.

Gin-gagamit han Partido an pagsuson ngan pagsuson-ha-kalugaringon agud maseguro nga nasubay an rebolusyunaryo nga praktika ha linya han Marxismo-Leninismo-Maoismo ngan ha mga batakan nga prinsipyo ngan palisiya hini. Dirudiretso hini nga gin-aatuhan an mga burges ngan petiburges nga panhuna-huna, nga nag-iinsister han impluwensiya tikang ha gawas ngan ha sakob hini. Kinahanglan pana-panahon nga ilansar han Partido an mga kampanya ha pagtutul-id, pankabug-usan man o partikular, komo pamaagi han pagtul-id ha mga pagsasayop ha mga palisiya ngan praktika.

Eksakto usa katuig na an naglabay han manawagan an Komite Sentral ha bug-os nga kaapihan han Partido nga maglansar hin usa nga kagiusan nga pagtutul-id agud matarum nga tudlukon, susnan ngan isalikway an ngatanan nga tipo han suhetibismo nga petiburges, usa nga sakit nga namahut-pahot ha Partido ha dirudilain nga lebel ngan kagrabihon, ngan nagpaluya dinhi tikang ha sakob. Ha sakob han naglabay nga usa kadekada o masobra pa, an pag-abante han rebolusyunaryo nga kagiusan masa gin-ulang han mga Tuo nga oportunista nga tendensiya han konserbatismo, ikogismo, ligalismo, ekonomismo, repormismo ngan NGOismo; samtang ginpaluya an rebolusyunaryo nga armado nga pakig-away han kalugaringon nga konstriksyon nga nahingadto ha konserbatismo militar ngan pagbul-iw ha ginerilya nga inisyatiba.

Iginkakalipay namon nga ireport nga an internal nga kampanya han pag-aram ngan pagsuson-ha-kalugaringon madig-on nga nakakagamot ngan padayon nga natikahiluag. Kundi, daramo pa an kinahanglan himuon. Aada pala kita ha syahan nga mga pitad. Padayon nga nalutaw an makahiribang nga impluwensya han mga pagsasayop, kaluyahan ngan kakulangan han naglabay. Kinahanglan mas pahilarumon an kagiusan nga pagtutul-id agud mapagdesisyon nga gabuton an suhetibista nga gamot han aton mga pagsasayop, kaluyahan ngan kakulangan, agud padig-unon ngan pakusgon an Partido, ngan mapagdesisyon nga ungbawan an maiha na nga problema han istagnasyon, ngan ig-anak an bag-o nga rebolusyunaryo nga pagrabunos.

An kagiusan nga pagtutul-id usa nga kagiusan nga pag-aram nga nagtutumuyo nga pahitas-on an kapas han mga kadre ngan aktibista han Partido nga gamiton an syentipiko nga teorya ngan proletaryado nga pamaagi han panhuna-huna komo mga hinganiban agud giyahan ngan pahitas-on an balitang han praktika han rebolusyunaryo nga buruhaton. Utro nga pagpadig-on ini han panindugan ha Marxismo-Leninismo-Maoismo, hasta na liwat ha mga batakan nga prinsipyo, pag-analisar ngan palisiya han Partido, ngan programa para ha pagpasulong han nasyunal demokratiko nga rebolusyon nga mayda sosyalista nga perspektiba.

An presente nga kagiusan nga pagtutul-id prinsipal nga nagtutumuyo nga itul-id ngan ungbawan an mga kaluyahan, kakulangan ngan pagsasayop nga nagtikang ha empirisismo. An empirisismo usa nga porma han suhetibismo nga nagtikang ha kakulangan han makurimot nga pag-aram ngan aplikasyon han teorya agud giyahan, sumahon ngan pahitas-on an balitang han praktika. Karuyag naton solbaron an maiha na nga problema han istagnasyon pagbiaw ha magkalain-lain nga natad han rebolusyunaryo nga buruhaton sakob hin haros duha kadekada, ngan pag-atras ngan kahibangan tikang 2017-2018. Ginhihimo ini pinaagi han pagsusuma han mga eksperyensya, pagsuson ngan pagsuson-ha-kalugaringon subay ha mga batakan nga prinsipyo, palisiya ngan programa han Partido, ngan pinaagi han usa nga kampanya han pankatilingban nga imbestigasyon ngan pag-analisar ha klase ha magkalain-lain nga lebel han buruhaton han Partido.

Iginpapasulong an kagiusan nga pagtutul-id atubangan han waray hunong ngan madarahug nga kampanya han panmuypoy han kaaway, ngaduha ha kasyudaran ngan kabaryuhan. Pinaagi han pag-ungbaw ha mga pagsasayop, kaluyahan ngan kakulangan ha naglabay nga mga tuig, determinado kita nga pakyason an todo-gerra han kaaway, makarekaber ha mga kaperdihan, magkab-ot hin bag-o nga mga kadaugan ngan ipasulong an rebolusyunaryo nga pag-ato han katawhan Pilipino.

Ginkalipay han tanan nga mga namumuno nga komite han Partido an pagtikang han kagiusan nga pagtutul-id hadton naglabay nga tuig. Ginpukaw ngan gintagan inspirasyon hini an mga kadre ngan aktibista han Partido, hasta na liwat an rebolusyunaryo nga masa. Ginpatuhop hini han diwa han pagsuson-ha-kalugaringon an mga namumuno ngan kaapi han Partido. Determinado hira nga itul-id ngan ungbawan an ira mga pagsasayop, kaluyahan ngan kakulangan, agud pakusgon an Partido ngan bumulig nga pukawon an katawhan nga mas maisog nga umato, magrebolusyon ngan pakyason an madarahug nga mapanmuypoy nga gerra han kaaway.

Katuyuanan han kagiusan nga pagtutul-id nga pandayon an kadig-on ha ideolohiya ngan pulitika han aton mga kadre. Tungod ha nagin kakulangan ha dirudiretso nga pag-aram ha ideolohiya ngan utro nga pagpadig-on ha proletaryo nga panindugan, ngan ha atubangan han madarahug nga mapanmuypoy nga gerra ngan waray hunong nga mga pag-atake han kaaway, piho nga mapaparalisa an pira nga kadre tungod ha kahadlok o sobra nga paghingyap hin kalungganayan. Kundi mas dako nga mayoriya han aton mga kadre, nga nakuha hin kusog ha rebolusyunaryo nga kawsa nga labaw ha ira kalugaringon nga hingyap, determinado nga himuon an ginkikinahanglan nga sakripisyo agud seguruhon an ira seguridad ngan an kadaugan han Partido ngan han kagiusan nga pagtutul-id hini.

Subay ha panawagan han Komite Sentral, gintikangan han mga komite han Partido ngan mga rebo-lusyunaryo nga panmasa nga organisasyon an plano para ha mga kampanya nga pag-aram ha bug-os nga tuig. Iginpatuman ini nga may dirudilain nga lebel han kadaugan. An iba ginhaum an ira mga pamaagi subay ha mga obhetibo nga kamutangan (sugad han staggered o pinatipat nga diskusyon ngan mas gudti nga grupo agud humaum ha magios nga ginerilya nga pagmaniobra, paghimo hin mga klase ha gab-i agud humaum ha kalibangan han mga parag-uma ha adlaw, mga one-on-one ha mga bag-o nga rekrut, ngan iba pa). May iba nga nagtukod hin pormal nga istruktura ha pag-aram ha ilarum han Paaralang Jose Maria Sison kun diin an mga estudyante nagpapalista ha mga pormal ngan regular nga klase. Ginpapadamo an mga libro ngan artikulo nga Marxista-Leninista-Maoista ha porma nga papel o digital. Kundi, may pira nga diri sugad kamilitante ngan mahimuon, nga nagreresulta ha mas himubo nga balitang han kadaugan.

Nagpagawas hadin naglabay an aton Partido hin mga artikulo nga nag-aaram ha pira nga importante nga karukayaknon, kalakip an presente nga krisis han imperyalismo ngan mga hulga han gerra, an presente nga pakigbisog para ha dugang nga suhol, an “BPO industry” ngan an penomenon nga “gig workers” (pareho han freelancer), ngan mga landaw nga karukayaknon ha taktika han pagpasulong han ginerilya nga pakiggerra agud pakyason an waray wantas nga mapanmuypoy nga gerra ngan gradual constriction han kaaway. Kinahanglan magpagawas hin mas daramo pa nga teoretikal nga pag-aram ngan artikulo ha mga importante nga karukayaknon nga ginkakaatubang han Partido ha matag-adlaw.

Pursigido nga naniningkamot an mga panrehiyon nga komite han Partido ngan iba pa nga namumuno nga komite, kalakip an aadto ha iba nga nasud, nga makumpleto o marebyu an ira mga dokumento han sumada subay ha kagiusan nga pagtutul-id. Nakumpleto han pira nga mga komite an ira mga sumada antes pa man an kagiusan nga pagtutul-id. An iba aada ha proseso han pagrebyu han ira dokumento han sumada ha balayan han kagiusan nga pagtutul-id, agud matudlok an mga partikular nga pangilal-an han petiburges nga suhetibismo ha ira kalugaringon nga buruhaton ha ideolohiya, pulitika, ngan organisasyon, komo basaranan para ha pagsuson-ha-kalugaringon. Kundi kadam-an han aton mga namumuno nga komite aada ha dirudilain nga lebel pa han pagkumpleto. Problema han pira nga komite an nawawara nga mga dokumento o kawaray dokumentasyon han buruhaton han ira komite ha mga naglabay nga tuig, nga hinungdan nga nakukurian an presente nga mga namumuno, labina an mga batan-on nga kadre, nga makumpleto an paglaygay han ira buruhaton.

Tikang ha katikang han tuig, gintikangan han mga komite han Partido, mga kadre ngan aktibista an mga kampanya nga SICA (pankatilingban nga imbestigasyon ngan pag-analisar ha klase) subay ha programa ngan mga instruksyon han Komite Sentral. Katuyuanan han kampanya nga itul-id an hadto pa nga kaluyahan ha pagbug-os han mga taktika ha pag-organisa ngan pagpagios ha masa nga haum ha nagbabag-o nga kondisyon, nga naresulta ha mekanikal ngan diri naabante nga buruhaton masa ha naglabay. Kalakip ha kampanya an mga pagpahiara, utro nga pagpahiara o pagpahiluag han kahibaruan han mga kadre ngan aktibista ha syentipiko nga pamaagi han imbestigasyon, koleksyon ngan pangalap hin impormasyon tikang ha masa ngan iba pa. An pira nga patikang nga panalinguha nagresulta ha mahinungdanon nga pag-abante ha pagbug-os hin estratehiya ngan programa ha buruhaton masa, ngan ha pagpagawas hin mga napapanahon nga panawagan ha pag-organisa ngan pagpagios ha masa. Sugadman, aada pala ha pasiuna nga balitang an kadam-an han aton mga komite.

Ha butnga han tikagrabe nga krisis ha ekonomiya, abrido kaupay an hiluag nga masa han katawhan ha nasyunal demokratiko nga propaganda ngan pag-organisa. Labaw san-o pa man determinado hira nga tipahan an korapsyon, paniniyupi ngan mga pabug-at nga palisiya han pasista nga rehimen US-Marcos, ngan ipakigbisog an ira mga pankatilingban, pan-ekonomiya ngan pampulitika nga interes, labina ha atubangan han nagtitikagrabe nga burukrata kapitalismo ngan pasismo. Agud epektibo nga umato, kinahanglan tukuron, pahiluagon ngan pakusgon an ira mga panmasa nga organisasyon.

Ginpapagios an mga kadre ngan aktibista han Partido agud komprehensibo nga magburuhaton masa para pukawon an masa, tukuron an ira dirudilain nga asosasyon, ngan pagiuson hira ha ngatanan-nga-gapil nga pamaagi. Gindidisponer an mga grupo ha buruhaton masa o mga grupo ha propaganda ngan pag-organisa ha mga pabrika, mga komunidad han mga kablas ha syudad, mga kampus, hasta na liwat ha mga komunidad ha kabaryuhan. Sugadpaman, daramo an napupugngan han inersya (pagin hunong), han mga kadaan nga kahiaraan ha pasilhig nga buruhaton, kahigot ha opisina, ngan naduduso la han mga aktibidad, kakulang han mga pultaym nga rebolusyunaryo nga organisador, kakulang han pankatilingban nga imbestigasyon, kapakyasan nga isumpay an magpaso nga nasyunal nga isyu ha mga lokal nga problema han masa, ngan kapakyasan nga isumpay an mga lokal nga problema ha mga pankabug-usan nga panmasa nga kampanya, ngan iba pa nga mga kakulangan. Nakikit-an liwat naton an mga problema ha “Wala” nga sektaryanismo nga nagpapagios la ha guti nga parte han mga aktibo nga masa, ngan diri ginpapagios an mga butnga nga elemento agud kabigon an mas nauurhi. Bug-os an desisyon han mga komite ngan kadre han Partido nga ungbawan ngan solbaron an sugad hini nga mga problema pinaagi han pagrebyu ha mga batakan nga prinsipyo han linya panmasa ngan pamumuno.

Dirudiretso an mga panalinguha nga utro nga tukuron an mga sikreto nga rebolusyunaryo nga organisasyon nga kaalyado han National Democratic Front of the Philippines, sugad han kanan mga kabatan-unan, mga trabahador, mga parag-uma, mga kababayin-an, mga magturutdo, mga trabahador pankalibsugan, ngan iba pa. Nagtikang ini ha haros hul-os nga pagpasibaya ha pagbug-os hin sikreto nga rebolusyunaryo nga kagiusan bunga han pagsasayop ha ligalismo ngan repormismo. Mayda mga plano ngan target para ha pagrekrut, pagtukod hin mga bag-o nga tsapter, pag-undong ngan pagsuporta ha rebolusyunaryo nga armado nga pakig-away ha kabaryuhan. Mayda mga panalinguha nga parayhakon an pagpalista nga magin Pula nga mangaraway o pampulitika nga opisyal han Bagong Hukbong Bayan. Sugadpaman, daramo pa an kinahanglan himuon agud batunon an dagmit nga panginahanglan para ha mga bag-o nga rekrut, labina tikang ha mga kabatan-unan nga trabahador ngan intelektwal.

Ha paglansar hin kagiusan nga pagtutul-id hadton naglabay nga tuig, gintagan-atensyon han pamunuan han Partido an partikular nga problema ha kalugaringon nga konstriksyon han mga yunit han BHB, nga nagresulta ha paghaligot han base panmasa ha pira nga magdig-on nga lugar. An tag-iha nga pagbase ha guba han mga kumpanya ngan platun, paglimita ha lugar han operasyon ha “mga paborito nga baryo” ngan iba pa nga manipestasyon han tinuyo nga pagpahaligot nagbunga hin pagkawara han inisyatiba, sibilyanisasyon ngan konserbatismo nga militar. Han ilansar han kaaway an mga estratehiko nga opensiba hadton 2017-2018, diri la pipira ha mga yunit han BHB an nahimulag ha pampulitika nga suporta han masa ngan napwersa nga mahibutang ha lus-ay militar nga sitwasyon, samtang an base panmasa nga parag-uma ginhampak han sobra nga pandarahug. Tungod hini nga mga pagsasayop ngan kaluyahan, nahiagum han dagko nga destroso ngan pag-atras an BHB ha pira nga rehiyon ngan mga prente gerilya.

Ha pira nga prente gerilya, madagmit nga utro nga nag-organisa ngan nagdeploy subay ha kagiusan nga pagtutul-id ngan subay ha prinsipyo han hiluagan ngan sik-on nga ginerilya nga pakigerra basar ha tikahiluag ngan tikahilarum nga base panmasa. Mahimuon ngan baltok nga gin-gamit han mga platun han BHB an pleksibilidad ha dispersal, konsentrasyon ngan pagbalhin ngan utro nga nagpakabatid ha sugad kadagmit han kidlat nga paggios. An kagiusan nga pagtutul-id han Partido naghatag inspirasyon ha mga Pula nga mangaraway han Bagong Hukbong Bayan nga magpursige ha makuri nga dalan han panmaihaan nga gerra han katawhan agud utro nga tukuron ngan pahiluagon an base pammasa, panalipdan an katawhan kontra ha terorismo han estado, igpreserbar ngan pakusgon an BHB ngan pakyason an estratehiko nga opensiba han kaaway.

Padayon nga gintutukod han Partido an mga internasyunal nga relasyon basar ha kontra-imperyalismo ngan proletaryo nga internasyunalismo. Nakaghatag an Partido hin mga mahinungdanon nga amot ha tulo nga teoretikal nga kumperensya nga gin-organisa han National Democratic Front of the Philippines (NDFP). Tikang Oktubre 2023, gintalakay hini nga mga kumperensya an mga karukayaknon han imperyalismo ngan gerra, an pankalibutan nga imperyalista nga krisis ha ekonomiya, ngan an pakigbisog para ha nasyunal nga katalwasan tikang ha imperyalismo. Nagserbe nga higayon ini nga mga kumperensya para ha pagbug-os han mas suok nga relasyon ngan pakigsarabot giutan han rebolusyunaryo nga komunista, ngan mga partido ngan grupo han trabahador.

Ha inisyatiba han Partido, nagdamo ha naglabay nga tuig an aktibidad para ha pagpakusog han proletaryo nga pagkaurusa. Nagkamayda hin mas damo nga bilateral nga balyuay ngan magkatig-ob nga pag-aram giutan han Partido ngan iba pa nga proletaryo nga Partido ngan grupo. Nagpartisipar kita ha mga kongreso han iba nga Partido ngan nag-amot ha magkalain-lain nga porum.

Padayon an mga internasyunal nga tinaglawas han Partido ngan NDFP ha aktibo nga pag-undong ha rebolusyon Pilipino, ha pagpanday hin pagkaurusa ha mga kontra-imperyalista nga partido, ngan pagpauswag han proto-diplomatiko nga relasyon ha mga gubyerno ha basaranan han komun nga hingyap para ha nasyunal ngan pankatilingban nga katalwasan.

Gintibhugan hin bag-o nga dugo an mga namumuno nga Komite han Partido ha ngatanan nga lebel pinaagi han aktibo nga promosyon han mga batan-on nga kadre basar ha ira maupay nga rekord ngan pagpatuman han mga responsabilidad. Ha pagkombinar han batan-on ha mga edaran, ginseseguro naton nga an mga pamunuan han Partido mayda kapas, may enerhiya ngan marayhak, ngan akos nga sugbungon an magkuri nga responsabilidad han proletaryo nga pamumuno ha hilaba pa nga panahon. An pagbutang hin bag-o nga batan-on nga kadre ha mga pamunuan ha dirudilain nga lebel nagduduon ha panginahanglan nga sumahon an eksperyensya agud ipasa an kapas ngan natirok nga kahibaruan ngadto ha bag-o nga henerasyon han mga lider.

Gintutukod an mga panteritoryo nga komite agud mahipundar ngan mapauswag an kagiusan masa ha gawas han lupgop ngan naaabot han hukbo han katawhan. Ha sugad, naseseguro han Partido an kapas hini nga pukawon, organisahon ngan pagiuson an mga trabahador, parag-uma, baga-proletaryado, estudyante ngan iba pa nga sektor ha gawas o ha ligid han mga prente gerilya, ngan diri nahihigot han lupgop o erya han operasyon han mga yunit gerilya han BHB. Nakikigbuligay ini nga mga komite ha mga komite ha prente gerilya agud seguruhon an dirudiretso nga pampulitika, materyal ngan pan-organisasyon nga suporta para ha hukbo han katawhan ngan para ha kontrapyudal ngan kontrapasista nga pagkigbisog han masa nga parag-uma.

Pinaagi han kagiusan nga pagtutul-id, mas makurimot an mga komite han Partido ha yana nga magbantay ha liberalismo, ultrademo-krasya ngan burukratismo. Ini nga mga kaluyahan naghihibang ha demokratiko sentralismo, ngan ha kapas han Partido nga dudrungan nga magmartsa.

Ha pira nga parte han Partido ngan rebolusyunaryo nga kagiusan, nakit-an naton an mga pagtalapas ha dirudilain nga palisiya han organisasyon ngan disiplina han Partido, nga an pira ginpasagdan ha maiha nga panahon, nga naghibang ha pagkaurusa, nagbutang ha kadelikaduhan ha seguridad han mga kadre, ngan naghibang ha prestihiyo han Partido. Agud itul-id ini nga sitwasyon, utro naton nga gin-gawas ngan ginklaro an mga palisiya. Ini nga mga pagtalapas mapagdesisyon nga ginsusnan, gin-analisar ngan ginsalikway ha pira nga parte.

Padayon naton nga ginpakusog an sistema han pagreport agud itul-id an sitwasyon diin an mga sentro han Partido buta ha sitwasyon ngan ha pag-uswag han rebolusyunaryo nga buruhaton han mga uruubos nga mga komite. An aton mga namumuno nga organo yana relatibo nga mas batido ha sitwasyon ha ubos, sanglit nakakapagawas hira hin mga napapanahon nga palisiya, pagsurundon, mga pahibaro ngan plano. Sugadman, may pira nga uruubos nga komite an diri pa nagpapauswag ha praktika ngan diri pa nakakagpadara hin regular nga mga sumat.

An liberalismo ngan ultra-demokrasya mga sakit nga nagpapaluya ha disiplina han Partido. Bisan kun mayda kagiusan nga pagtutul-id, padayon nga apektado hini an iba pa nga parte han Partido ha magkalain-lain nga porma sugad han kada iya kahadian, paglugaring hin grupo, waray kahumanan nga debate ngan waray masolbar nga mga tipa-tipa. Ha luyo nga gapil, mayda pa gihapon mga problema han burukratismo, kun diin diri nakakaghatag hin makurimot nga pagtagad an mga namumuno nga kadre han Partido ha ginkakaatubang nga kamutangan han mga kolektibo ngan kaapi ha uruubos nga komite, agud mabuligan hira nga solbaron an ira mga problema ngan umabante.

Padayon nga ginkukutkot han petiburges nga liberalismo an militansya ngan dedikasyon han pira nga kadre. May pira nga kadre nga nagpapakalumos ha daramo nga personal nga karukayaknon ngan diri nakakapokus ha rebolusyunaryo nga buruhaton. Damo an apektado pa gihapon han empleyado nga mentalidad, ngan nahihigot ha ira mga opisina ngan panimalay, ngan diri nakakaghatag hin bug-os nga panahon ha buruhaton nga pag-organisa ha masa. May pira nga kadre nga diri gihapon nakakabaya han ira mga “comfort zone.”

Samtang damo pa an kinahanglan himuon, labaw san-o pa man madig-on an panindugan han Partido nga komprehensibo nga ipasulong an kagiusan nga pagtutul-id. Pinaagi han waray kapagal nga panalinguha han aton mga proletaryo nga kadre ngan rebolusyunaryo nga aktibista, piho nga mahidedeklara naton nga an mga gamot han kagiusan nga pagtutul-id padayon nga mahilarum ngan mahiluag. Tungod hini, magrarabong an Partido hin mas madig-on ngan mas makusog, kadungan han pamumuno hini ha katawhan, angkon an diri napapas nga diwa nga rebolusyunaryo.

IV. Tumanon an mga buruhaton han kagiusan nga pagtutul-id ngan ipasulong an rebolusyon!

Dugang nga paborable yana an obhetibo nga kamutangan para ha pagpasulong han demokratiko nga rebolusyon han katawhan ha butnga han padayon nga krisis han kapitalismo ha bug-os nga kalibutan ngan grabe nga pagbagsak han bagakolonyal ngan bagapyudal nga kamutangan ha nasud. Aada ha mga suhetibo nga pwersa kun tiunan-o sisingabuton an sitwasyon agud ipasulong an kawsa han katawhan para ha nasyunal ngan pankatilingban nga katalwasan.

Ha pag-atubang ha presente nga sitwasyon, hugot nga ginkikinahanglan an bug-os-kusog nga pagpadig-on ha ideolohiya, pulitika ngan organisasyon ha Partido ngan ngatanan nga rebolusyunaryo nga pwersa. Kinahanglan padig-unon naton an determinasyon ngan komprehensibo nga pahitas-on an aton kapas nga sugbungon an buruhaton nga pukawon, organisahon ngan pagiuson an hiluag nga masa ha dalan han demokratiko nga rebolusyon han katawhan ngan sosyalista nga kabubwason hini.

Pahiluagon ngan pahilarumon an kagiusan nga pagtutul-id! Dugang nga pakusgon an Partido!

An kagiusan nga pagtutul-id nga iginlansar han nakalabay nga tuig han Komite Sentral, usa nga internal nga kagiusan han pag-aram ngan pagsuson-ha-kalugaringon nga nagtutumuyo nga itul-id an mga pagsasayop ngan ungbawan an mga kaluyahan ngan kakulangan. Nagtikang ini prinsipal ha petiburges nga suhetibismo, prinsipal ha porma han empirisismo, ha buruhaton han Partido ha ideolohiya, pulitika ngan organisasyon.

Kinahanglan pahilarumon ngan pahiluagon an kagiusan nga pagtutul-id. Nakit-an naton ha nakalabay nga tuig nga diri sadang nga igdeklara an kagiusan nga pagtutul-id ngan magpahayag hin suporta dinhi. Ngatanan nga komite han Partido, tikang ha sentro tubtub ha ngatanan nga sanga, kinahanglan magsuson-ha-kalugaringon, magtul-id han mga nakalabay nga mga kasaypanan, hul-os nga humangkop ha Marxismo-Leninismo-Maoismo agud irebolusyunisa an ira panhuna-huna ngan mga pamaagi han pagtrabaho, ngan hin may hul-os nga determinasyon ini nga ipasulong. Masusukol naton an kadaugan han kagiusan nga pagtutul-id ha mga kongkreto nga ihap nga nagpapakita han kantitatibo nga pagtubo ngan kalitatibo nga pag-uswag han Partido, han rebolusyonaryo nga armado nga pakig-away, han rebolusyonaryo nga kagiusan masa ngan han organisado nga base panmasa.

Utro naton nga ginpapadig-on an 8-kaparte nga kagiusan nga pagtutul-id sugad han ginbalayan naton ha pahayag hadton nakalabay nga tuig. Masunod ini nga mga parte: usa nga Marxista-Leninista-Maoista nga kampanya nga pag-aram, usa nga kampanya para ha utro nga pagpadig-on ha konstitusyon ngan programa han Partido, usa nga kampanya nga pag-aram ha mga dokumento han Syahan ngan Ikaduha nga Dakila nga Kagiusan nga Pagtutul-id, usa nga kampanya han pagsumada, usa nga kampanya han pankatilingban nga imbestigasyon ngan pag-analisar ha klase (SICA), usa nga kampanya han pagsuson ngan pagsuson-ha-kalugaringon ha ngatanan nga lebel, usa nga kampanya han ebalwasyon ngan promosyon han mga kadre, ngan usa nga nagpapadayon nga kampanya agud seguruhon an pagpatuman han tulo-kabalitang nga kurso ha edukasyon han Partido.

Ha pagpahilarum han kagiusan nga pagtutul-id, kinahanglan naton sustenido ngan marayhak nga ipatuman an mga plano ha kampanya nga pag-aram, kadungan an napapanahon nga mga asesment agud seguruhon nga madagmit nga ginsosolbar an mga problema. Pauswagon naton an militante nga estilo han pagkombina han pag-aram ha teorya ngan praktika, sugad han pagbinuligay han mga petiburges nga intelektwal ngan mga trabahador ha pag-aram han suhol o Marxista nga ekonomiya nga pampulitika.

Kinahanglan mas maduruto pa nga adman han ngatanan nga kadre han Partido an Marxismo-Leninismo-Maoismo. Utro naton nga ig-iimprenta ngan igpapasarang an teksto han Philippine Selections han mga ginpili nga yawe nga artikulo ni Mao Zedong agud magserbe nga rekisito ha pagbasa ngan pag-aram han ngatanan nga mga kadre han Partido. Kinahanglan tagan hin dugang pa nga importansya han mga kadre an pag-aram ha teorya nga mas nagigin kritikal samtang ginsusugbong an mas dagko nga praktikal nga rebolusyonaryo nga buruhaton.

Kinahanglan mas matarum naton nga tudlukon, paglainon ngan susnan an pseudo-sosyalismo, anarkismo, gender radicalism (pagpasulong han pagbag-o ha katilingban basar ha pagkakaiba han tawoa) ngan iba pa nga mga klase han petiburges nga rebolusyunismo nga nakapamahot-pahot ha iba nga parte han Partido. Nagreresulta ini ha kagupungan ngan nagpapaharukal ha pagkatin ha pira nga mga importante nga karukayaknon. Kinahanglan ibuksas naton an mga burges ngan petiburges nga mga repormista nga huyob ha mga trabahador, parag-uma, intelektwal, ngan iba pa nga mga sektor ngan kagiusan, nga naglalarang nga iburong an masa nga Pilipino tipahirayo ha dalan han rebolusyunaryo nga pakigbisog, labina ha armado nga pakig-away.

Kinahanglan mapagdesisyon nga kumpletuhon han Komite Sentral an pagsumada ha prinsipal nga panhitabo ngan desisyon ha nakalabay nga panahon, agud magserbe nga pankabug-usan nga giya ha pagsumada han ngatanan nga komite. Kadungan hini, an syahan nga nahisurat nga mga dokumento han pagsumada han mga namumuno nga komite (hadton naglulupgop ha panahon nga dapit 2010 tipaunhan) kinahanglan utro nga adman tikang ha lente han presente nga kagiusan nga pagtutul-id.

Labot ha pagbug-os han kronolohiya han nakalabay nga mga panhitabo ngan desisyon, ngan pagtudlok ha aton mga kabaskugan ngan kaluyahan, kinahanglan liwat naton tudlukon an petiburges nga maka-klase nga kinaiya han aton mga pagsasayop ngan kaluyahan, agud mapakusog naton an proletaryo nga pamumuno ha magkalain-lain nga natad han rebolusyunaryo nga buruhaton. Kinahanglan mayda klaro nga pagsuson ngan pagsuson-ha-kalugaringon an aton mga kadre ngan komite. Kinahanglan an mga dokumento han sumada adman ha gilayon han mga kaapi ha lupgop nga teritoryo o linya han buruhaton.

Ha pagpahiluag han kagiusan nga pagtutul-id, karuyag naton seguruhon nga nalulupgop hini an ngatanan nga parte han Partido ngan ngatanan nga aspeto han rebolus-yonaryo nga buruhaton. An walo-kaparte nga kagiusan nga pagtutul-id kinahanglan nga komprehensibo nga ipatuman. Kinahanglan dirudiretso an mga panalinguha. Kinahanglan magin mabinantayon ha pagpapasibaya, ungbawan an inersya ngan atuhan an pagbalik ha mga daan nga higwaos.

Padayon naton nga igrebolusyunisa an Partido pinaagi han proletaryo nga pagremolde han mga kadre ha ira mga pamaagi han pagtrabaho ngan pamumuno, hasta na liwat han ira estilo han panginabuhi. Mahihimo ini pinaagi han pagseguro nga an aton mga kadre ngan komite mahugot nga nakasumpay ha masa ha ngatanan nga panahon. Nananawagan kami ha ngatanan nga mga kadre ngan aktibista han Partido nga bumaya ha ira mga “comfort zones” ngan hul-os nga ihalad an ira kalugaringon ha hul-os nga pagpatuman han mga rebolusyunaryo nga buruhaton nga gintahas ha ira. Kinahanglan mapagdesisyon nga susnan ngan isalikway naton an mga pagtalapas ha mga palisiya han Partido ngan seguruhon nga permi hitaas an disiplina.

Kinahanglan padayon nga ipahayag han Partido an kritikal nga pag-analisar hini ha mga landaw nga isyu ngan nasyunal ngan internasyunal nga panhitabo ngan pahitas-on an kahibaruan ngan kapukawan han katawhan. Kinahanglan padayon naton nga ig-imprenta ngan padamuon an mga nakaimprenta nga kopya han Ang Bayan ngan seguruhon nga hiluagan ini nga nahipapasamwak ha mga kaapi han ngatanan nga sanga han Partido, upod na han mga rebolusyonaryo nga organisasyon masa.

Kinahanglan padayon nga padamuon an kaapihan han Partido subay ha prinsipyo han maisugon nga pagpahiluag nga waray ginpapasulod bisan usa nga maraut nga elemento. Kinahanglan pakusgon an demokratiko sentralismo ngan sistema nga komite, nga nagseseguro han regular nga miting ngan kolektibo nga pagdesisyon. Ngatanan nga komite kinahanglan magtukod hin regular nga linya han komunikasyon ha ira hiruhitaas nga komite ngan magpadangat hin regular ngan napapanahon nga mga report.

Kinahanglan pahitas-on an kapas han mga seksyon ngan sanga han Partido nga tumanon an mga rebolusyunaryo nga buruhaton ha lupgop han ira responsibilidad ngan pamumuno. Kinahanglan giyahan ngan pahiaraon han mga komite han Partido tikang ha mga distrito tipaigbaw, ha sakob ngan gawas han mga prente gerilya, an mga lokal nga kadre han Partido ha pagpatuman han ira buruhaton.

Kinahanglan igsustiner an mga panalinguha ha napapanahon nga asesment ngan promosyon han mga kadre han Partido ha mga posisyon han responsibilidad ngan pamumuno. Kinahanglan ini ipatuman ha mga regular nga kumperensya, o pinaagi han mga komite nga tagapatuman, pinaagi han mga kumperensya.

Pahilarumon ngan pahiluagon an paggamot ha masa ngan mahugot nga pamunuan an ira mga pakigbisog kontra ha niyutiyo, burukrata-kapitalista, ngan pasista nga rehimen Marcos!

An rehimen US-Marcos an pinakakonsentrado nga ladawan han mga batakan nga problema han imperyalismo, pyudalismo, ngan burukrata kapitalismo. Nakikit-an naton ha ilarum ni Marcos an waray katupong nga korapsyon, pasismo, ngan pag-inalagad ha imperyalista nga US. Atubangan han natikagrabe nga mga porma han pananalumpigos ngan paniniyupi, mas determinado an katawhan Pilipino nga tumindog ngan umato, ngan ipasulong an dagko nga kontra-pasista, kontra-imperyalista, ngan kontra-pyudal nga pakigbisog ha tiarabot nga mga tuig.

Determinado hira nga bug-os kusog nga umato agud rumkon an paghahadi han pasista nga ngirhat ha kabaryuhan, tapuson an paghahadi han balaud militar ha mga komunidad ha kabaryuhan, ngan atuhan an palisiya ni Marcos han pampulitika nga panmuypoy ngan pandarahug han estado. An pag-ato ha balaud militar ha kabaryuhan kinahanglan ipasulong ngaduha ha kabaryuhan ngan kasyudaran. Kinahanglan pursigido nga himuon an usa nga kampanya agud ibuksas an pasista nga terorismo ha kabaryuhan ngan agud suportahan an masa nga parag-uma ha ira pag-ato. Paborable an mga kundisyon para ha pagtukod han usa nga hiluag nga kontra-pasista nga nagkakaurusa nga prente ha ranggo han dirudilain nga demokratiko nga sektor.

An natikagrabe nga mga sosyo-ekonomiko nga kundisyon nagduduso ha katawhan nga tumindog ngan magprotesta kontra ha waray hunong nga pag-umento han presyo han pagkaon, gasolina, ngan iba pa nga mga batakan nga papliton, sugadman kontra ha burukrata-kapitalista nga korapsyon ha ilarum han rehimen Marcos. Naduduso an mga trabahador nga mas pursigido nga makigbisog para ha dugang-nga-suhol agud mabuhi hin disente an ira mga pamilya, para ha mas maupay nga kundisyon ha pagtrabaho, ngan para ha pagpaundang ha kontraktwalisasyon ha pagtrabaho ngan iba pa nga magtiyupion nga iskema han pagtrabaho. Kinahanglan pakusgon an guliat nira para ha ₱1,200 nga nasyunal nga minimum nga suhol agud pukawon an mga trabahador nga bug-uson an ira mga unyon, ngan ipasulong an kolektibo nga pakigbisog ha ira mga pabrika ngan komunidad.

Naduduso an masa nga parag-uma nga pakusgon an ira pakigbisog kontra ha dugang nga liberalisasyon han importasyon han bugas ngan iba pa nga pan-agrikultura nga epektos. Kadungan hini, naduduso hira nga pursigido nga atuhan an pagsakob han mga minahan, plantasyon ngan iba pa nga operasyon nga naglulupot ha tuna ngan nagruruba ha kalibungan (labina atubangan han iginduduso nga balaud nga pahilawigon ngadto ha 99 katuig an pagpaplete han tuna ha mga langyaw nga kapitalista), ngan an militarisasyon ha ira mga komunidad. An mga kalamidad ha klima nagduduso ha masa nga Pilipino nga ig-insister an danyos-perwisyo ha pagkawara han ira mga pananag-iya ngan pakabuhi. Kinahanglan pakusgon han masa nga parag-uma an ira mga organisasyon ngan asosasyon ngan maisugon nga tumindog agud depensahan an ira mga kinabuhi nga pakabuhi.

Ginkakaatubang han katawhan Pilipino an panginahanglan nga pakusgon an ira kampanya kontra ha mga base militar han US ngan panginlabot militar han US, ngan atuhan an pagpakaniyutiyo han rehimen Marcos ha imperyalismo nga US, nga nagbubutang ha nasud ha tikadako nga peligro nga madabi ha inter-imperyalista nga gerra. Kinahanglan naton iglansar an usa nga dirudiretso nga kampanya agud ibuksas an mga iskema han US para ha pag-imponer han kusog militar hini ha Pilipinas, ngan kun tiunan-o ini nakasumpay ha natikapintas nga inter-imperyalista nga sumpakiay ngan mga larang han US nga ig-imponer an hegemoniya hini ha magkalain-lain nga parte han kalibutan. Kinahanglan naton palarabon an patriyotismo han mga Pilipino ngan isumpay an ira mga pakigbisog ha mga kontra-imperyalista nga pakigbisog han katawhan ha bug-os nga kalibutan.

Buruhaton han Partido nga pamunuan an hiluag nga masa han katawhan Pilipino ha ira pan-ekonomiya ngan pampulitika nga mga pakigbisog pinaagi han mas hilarum ngan mas hiluag nga paggamot ha masa. Para himuon ini, kinahanglan naton pahitas-on an kapas han Partido nga tinagdamo nga pukawon, organisahon, ngan pagiuson an hiluag nga masa. Kinahanglan pahitas-on naton an ira pankatilingban ngan pampulitika nga kapukawan pinaagi han pagsumpay han magpaso nga nasyunal nga isyu ha ira mga lokal nga problema, ngan isahon an ira mga lokal nga isyu ngan pakigbisog ha mga batakan nga problema han katawhan Pilipino ngan ha panginahanglan nga magpasulong han kolektibo nga pakigbisog.

Kinahanglan himuon naton an kundisyon para ha demokratiko nga pagpartisipar han masa ha mga diskusyon ngan pagdesisyon, agud maaghat hira nga gumios. Kinahanglan talinguhaon naton nga ikombina an pasilhig nga propaganda ngan pag-organisa, ha solido ngan makurimot nga buruhaton masa. Kinahanglan ungbawan an nakalabay nga mga kaluyahan ha makausa-kagapil nga pasilhig, duso-han-aktibidad, nakasentro-ha-isyu ngan nakahigot-ha-opisina nga mga buruhaton. Kinahanglan naton magpalutaw hin mas damo nga pultaym nga kadre ha buruhaton masa, nga magkokombina ha mas dako nga ihap han mga aktibista ha mga yunit pampropaganda ngan pag-organisa. Kinahanglan himuon an SICA hin may klaro nga katuyuanan nga bug-uson an usa nga plano para ha pag-organisa ngan pagpagios ha masa basar ha ira mga kadagmitan nga mga pan-ekonomiya ngan pankatilingban nga demanda.

Tukuron ngan pakusgon an dirudilain nga tipo han nasyunal-demokratiko nga organisasyon masa agud konsolidahon an relatibo nga aktibo o abante nga elemento ha ranggo han masa. Kinahanglan ini ikombina ha pagbug-os han mas hilapad nga mga sumpayan o organisasyon nga nakabasar ha isyu, agud abuton ngan pagiuson an mga namumutngaan nga elemento, nga amo an makakabulig ha pagkabig ha relatibo nga atrasado nga parte han masa. Kinahanglan gamiton naton an mahimuon nga mga taktika agud likyan ngan pakyason an reaksyunaryo nga paniktik nga mga mapanmuypoy nga palisiya.

Kinahanglan makurimot naton nga tukuron ngan utro nga bug-uson an sikreto nga kagiusan ngan an mga rebolusyunaryo nga asosasyon masa ha kasyudaran ngan kabaryuhan. Ginkokonsolida han mga organisasyon masa nga alyado nga organisasyon han National Democratic Front of the Philippines (NDFP) an pinakaabante nga parte han masa. Andam ini nga pagtikangan han mga rekrut ha Partido. Kinahanglan pahiluagon an mga sikreto nga kagiusan agud mabuligan nga itago ngan tagan-seguridad an mga nangunguna nga kadre ngan organisador han Partido. Kinahanglan liwat himuon hini an hiluag nga rebolusyunaryo nga propaganda agud ipasamwak an panawagan para ha gerra han katawhan ngan pukawon an katawhan nga sumuporta ngan umapi ha Bagong Hukbong Bayan.

Kinahanglan epektibo nga idisponer han Bagong Hukbong Bayan an mga iskwad ngan tim hini para magburuhaton masa ngan seguruhon an padayon nga pagrabong han base panmasa. Agud pahilarumon an sumpayan hini ha masa, an mga yunit han BHB ha buruhaton masa kinahanglan makaghatag hin mga pan-ekonomiya, pankalibsugan ngan pan-edukasyon nga serbisyo ha masa nga parag-uma samtang gin-gigiyahan hira ha pagpasulong han ira mga kontrapyudal nga pakigbisog.

Magpursige ha pagpasulong han demokratiko nga rebolusyon han katawhan!

Kinahanglan mahibaruan han katawhan Pilipino nga an pamaagi gud la agud matalwas ha krisis han bagakolonyal ngan bagapyudal nga sistema amo an pagpasulong han demokratiko nga rebolusyon han katawhan agud ibagsak an imperyalismo nga US ngan an makaklase nga paghahadi han dagko nga bur-gesya komprador ngan dagko nga agaron maytuna, pinaagi han ira burukrata-kapitalista ngan pasista nga estado.

Utro nga ginpapadig-on han Partido, an abante nga destakamento han proletaryado nga Pilipino, an determinasyon hini nga pamunuan an katawhan Pilipino ha pagpasulong han demokratiko nga rebolusyon han katawhan pinaagi han panmaihaan nga gerra han katawhan subay ha estratehiko nga linya han pagpalibot ha kasyudaran tikang ha kabaryuhan. Agud ipasulong an rebolusyon, kinahanglan padayon naton nga pakusgon an Partido, an Bagong Hukbong Bayan ngan an National Democratic Front.

Samtang ginpapamunuan an masa ha mga pakigbisog ha ekonomiya ngan pulitika kontra ha rehimen US-Marcos, kinahanglan naton ipasulong an rebolusyunaryo nga armado nga pakig-away, komo prinsipal nga porma han pakigbisog.

Pinaagi han pagtul-id ha mga kasaypanan, kaluyahan ngan kakulangan ha nakalabay, katuyuanan naton nga padig-unon an Bagong Hukbong Bayan, makarekaber ha mga kaperdihan, ngan pakyason an estratehiko nga opensiba han kaaway. Kinahanglan klaro an pag-santop han ngatanan nga kadre han Partido ngan mga kumander ngan mangaraway han BHB ha diyalektika han panmaihaan nga gerra han katawhan, kun tiunan-o ini nauswag ha posible nga mga balitang han estratehiko nga depensiba, estratehiko nga pagkapatas ngan estratehiko nga opensiba.

Pinaagi han pagpasulong han ginerilya nga pakiggera ha sakob han maiha nga panahon, makakaabante an Bagong Hukbong Bayan tikang ha pagin guti ngan maluya ngadto ha pagin dako ngan makusog, pinaagi han parte-parte nga pagrumok ha kaaway. Kundi, an mga kasaypanan ngan kakulangan sugad han diri napapanahon nga regularisasyon ngan adbenturismo militar, ngan pagpahaligot ha kalugaringon ngan konserbatismo militar, poyde magpwersa ha BHB nga umatras ha daan hini nga balitang. Ha bug-os nga panahon han estratehiko nga depensa, naglalansar an BHB hin hiluagan ngan sik-on nga ginerilya nga pakiggerra basar ha tikahiluag ngan tikahilarum nga base panmasa.

Angkon an klaro nga pagsantop ha presente nga balanse han mga pwersa ngan lebel han gerra han katawhan, utro nga gin-ayad ngan gindisponer an mga yunit han BHB agud mas epektibo nga magburuhaton masa para bawion ngan pahiluagon an base panmasa ngan maglansar hin ginerilya nga pakiggerra kontra ha kaaway. Kinahanglan padayon nga magpakaupay an mga Pula nga mangaraway han BHB ha mga ginerilya nga taktika han konsentrasyon, dispersal ngan pagbalhin agud perdihon an estratehiya nga “gradual constriction” han kaaway ngan nakapokus ngan dirudiretso nga mga operasyon militar.

Kinahanglan kuhaon han ngatanan nga platun gerilya ngan mga iskwad han BHB, kaupod an mga yunit han milisya ngan mga kwerpo han pagdepensa-ha-kalugaringon, an inisyatiba nga maglansar hin mga taktikal nga opensiba, nga pumili hin mga target nga poyde nira lipulon. Ha kada higayon, kinahanglan patamaan an damo nga maluya nga parte han kaaway. Diri kulang an magagamit nga armas, kalakip an magbakod nga riple o mga hinimo nga pusil, bomba, granada, molotov, pana, sugob, lit-ag, o lastiko. Kinahanglan pagplanuhan nira an pagkuha hin armas han kaaway agud armasan an bago nga mga Pula nga mangaraway han BHB.

An kada dako o guti nga taktikal nga opensiba nga iglalansar han kada yunit gerilya han BHB basar ha ira kapas diri mamemenos nga amot ha pakig-away han katawhan Pilipino kontra ha niyutiyo ngan pasista nga rehimen Marcos. Nagpapadig-on ini ha kaburut-on han katawhan Pilipino ha ira paglansar han ngatanan nga porma han pag-ato, ngan nahatag-inspirasyon ha ira nga hasugon an dalan han rebolusyonaryo ng armado nga pakig-away.

Nahatag-inspirasyon liwat hira ha ngatanan nga tinalumpigos nga klase ngan katawhan ha bug-os nga kalibutan, nga kapareho nira nga nakikigbisog para ha nasyunal ngan pankatilingban nga katalwasan. An pagpasulong han nasyunal-demokratiko nga rebolusyonaryo nga pakigbisog ha Pilipinas an pinakadako nga kontribusyon han katawhan Pilipino ha pankalibutan nga pakigbisog kontra ha imperyalismo ngan pag-ato ha mga imperyalista nga gerra.

Natapod kita nga pinaagi han pagpahilarum ngan pagpahiluag han kagiusan nga pagtutul-id, mabubug-os naton an usa nga mas madig-on ngan mas gamhanan nga Partido Komunista ng Pilipinas, ngan mapapamunuan an demokratiko nga rebolusyon han katawhan ngadto ha mas dagko nga kadaugan ha mga tiarabot nga tuig.

Ipasulong an kagiusan nga pagtutul-id!

Igpalaypakay an bandera han Marxismo-Leninismo-Maoismo!

Mabuhay an katawhan Pilipino!

Mabuhay an pankalibutan nga proletaryo!

Mabuhay an Partido Komunista ng Pilipinas!