DOWNLOAD

Sa taas nga paghupot sa Pulang bandera sa Marxismo-Leninismo-Maoismo ug sa tumang determinasyon nga pangulohan ang nasudnon demokratikong rebolusyon sa katawhang Pilipino, gipadangat sa Komite Sentral sa Partido Komunista sa Pilipinas ang mainitong rebolusyonaryong pagtimbaya niini sa tanang mga kadre ug aktibista sa Partido, mga Pulang manggugubat sa Bagong Hukbong Bayan, mga kaalyado sa National Democratic Front ug sa lapad nga masa sa katawhang Pilipino, sa okasyon sa ika-56 nga anibersaryo sa pagkatukod sa Partido.

Niining okasyuna, gipanawagan namo sa tibuok Partido ug sa tanang rebolusyonaryong pwersa nga:

Palalumon ug palapdon ang kalihukang pagtul-id! Palig-onon pa ang Partido! Mas lalum nga mogamot sa masa ug lig-ong pangulohan ang ilang pakigbisog batok sa pasista ug burukrata-kapitalistang rehimeng US-Marcos! Manglimbasog sa pagpaasdang sa demokratikong rebolusyon sa katawhan!

Karong adlawa, among gipasidunggan si Ka Jose Maria Sison, founding chair sa Komite Sentral, kansang mga Marxista-Leninista-Maoistang teoretikanhong sinulat padayong nagadan-ag sa rebolusyonaryong dalan sa katawhang Pilipino. Kanunay nga mahinumduman sa bag-ong henerasyon sa mga kadre ug manggugubat sa Partido ug pagakutluan og inspirasyon ang tibuok kinabuhi sa komunistang dedikasyon ni Ka Joma alang sa proletaryado ug tanang dinaugdaug ug pinahimuslang hut-ong.

Amo usab nga gipasidunggan ang tanang mga bayani ug martir nga mihalad sa halangdong kinabuhi alang sa nasudnon demokratikong kawsa sa katawhang Pilipino. Among gihatagan og espesyal nga pag-ila ang tanang lider sa Partido ug mga Pulang manggugubat sa Bagong Hukbong Bayan nga namartir atol sa paglunsad sa gubat sa katawhan ug pagsukol sa pasistang rehimeng US-Marcos sa miaging tuig. Ang ilang mga pangalan magpabiling nakakudlit sa kasaysayan sa rebolusyong Pilipino hangtud sa kahangturan.

Sa okasyon sa anibersaryo sa Partido, buot usab namong ipaabot ang militanteng rebolusyonaryong pagtimbaya sa tanang anti-imperyalista, progresibo ug demokratikong partido, organisasyon ug kalihukan sa tibuok kalibutan nga nakigbatok sa imperyalismong US ug sa imperyalistang mga gubat ug hulga sa gubat. Amo usab gipaabot ang praternal nga pagtimbaya ngadto sa tanang rebolusyonaryong pwersang komunista nga nagtuon, nagpasiugda ug nagpraktika sa Marxismo-Leninismo sa ilang mga nasud, ug nangulo sa mga mamumuo ug katawhan sa pakigbisog alang sa nasudnong kalingkawasan ug sosyalismo.

Atong gisaulog ang ika-56 nga anibersaryo sa Partido nga adunay tumang pagsabot nga ang paspas nga pagtiurok sa internasyunal ug lokal nga ekonomikanhon ug pulitikanhong krisis paborable alang paglunsad og rebolusyonaryong pakigbisog.

Ang kalibutanong kapitalistang sistema padayong nagpakita sa mga paghinay sa ekonomiya, kaylap ang kawalay trabaho, ug nagkadakung hulga sa istagplasyon ug resesyon. Ginahulhogan ug ginanulsol sa imperyalistang US ang armadong kaguliyang sa Europe, Middle East, ug Asia. Ginabatukan sa mga mamumuo ug katawhan ang imperyalistang gubat, proxy war, pasistang pagpanglupig, pagkunhod sa pangpublikong pondo, pagsaka sa presyo. Ila usab nga gipakusog ang panawagan alang sa mas taas nga suhulan ug uban pang mga hinanaling demokratikong pangayo.

Nalubog sa ekonomikanhon ug pulitikanhon krisis ang nagharing sistema sa Pilipinas. Labaw nga mihagba ang sosyo-ekonomikanhong kahimtang sa minilyong katawhang Pilipino tungod sa padayong pagtiurok sa ekonomiya import-dependent (nagsalig-sa-import) ug export-oriented (nakapunting-sa-eksport). Ang kanunayng pagluya sa lokal nga produksyon sa agrikultura ug industriya miresulta sa nagkadakung disempleyo ug kaylap nga dislokasyon sa ekonomiya. Sa pikas bahin, padayong midaku ang ganansya ug bahandi sa langyawng kapitalista ug lokal nga oligarkiya gikan sa pagpahimulos sa mga mamumuo ug natural nga bahandi, ug sa pangpublikong badyet ug subsidyong ginapondohan sa utang. Migrabe ang korapsyon ug pulitikanhong pagpanumpo ilalum sa burukrata-kapitalista ug pasistang rehimen ni Marcos. Nalubog usab sa grabeng pulitikanhong krisis ang nagharing sistema. Ang pagyukbo sa rehimeng Marcos ngadto sa heopulitikal nga interes sa US mibira sa nasud ngadto lilo sa inter-imperyalistang gubat.

Ang nagkagrabeng krisis sa ekonomiya ug pulitika sa nagharing sistema ilalum sa rehimeng Marcos padayon nga mitukmod sa katawhang Pilipino nga molihok ug maglunsad og kolektibong pakigbisog alang sa ilang hinanaling mga pangayo. Naghatag kini sa mas paborableng kundisyon aron mas lalum ug mas lapad nga makaugat ang Partido sa han-ay sa masa ug aron mapangulohan sila sa ilang pakigbisog batok sa rehimeng US-Marcos.

I. Taliwala sa kapitalistang istagnasyon, ginasugnuran sa imperyalismo ang mga gyera ug ginaaghat ang pagsukol

Gihampak ang kapitalistang kalibutan sa mga panagbangi nga naggikan sa mga kontradiksyon tali sa monopolyong burgesya ug proletaryado, tali sa imperyalismo ug mga katawhan sa mga dinaugdaug nga nasud, tali sa imperyalismo ug mga nasud nga nanghingusog sa nasudnong soberanya, ug tali sa mga magkaatbang nga imperyalistang gahum. Sa pagkakaron, ang paspas nga pagkusog sa inter-imperialistang mga panagbangi mao ang nag-unang kontradiksyon nga mihulma sa kasamtangang kahimtang sa kalibutan, samtang ang imperyalismong US nanulsol ug nangsugnod og mga gyera sa lain-laing bahin sa kalibutan.

Padayong mipirigpirig ang katipalistang sistema tungod sa sobrang produksyon sa mayor nga mga igbabaligya, nga nagkinaiya sa makanunayong sobra-sobrang kapasidad ug sa pagtipun-og sa dili mabaligyang imbentaryo sa mga produktong manupaktura (lakip ang pangkonsumong elektroniks, mga gamit pangbahay, sakyanan, makinarya, puthaw ug materyales pangkonstruksyon) ug produktong pang-agrikultura (soy beans, trigo, mais ug uban pa). Nagresulta kini sa grabeng kapitalistang kompetisyon aron ilugon ang kontrol sa mga merkado, ingonman ang mga tinubdan sa hilaw nga materyales aron mapaubsan ang gasto sa pagmugna og mas daghang igbabaligya. Ang gibunga niining pagkabangkrap, pag-ipon ug pagpanag-iya misangpot pa sa labawng konsentrasyon sa kapital sa kamot sa pipila ka tig-monopolyo.

Padayong nalubong sa krisis sa ekonomiya ug pinansya ang kalibutanong kapitalismo. Kapin usa ka dekada ug tunga na kining anaa sa istagnasyon sa hinay nga paglambo, diin daghang nag-unang kapitalistang nasud ang kanunay nagbalik-balik sa ngilit sa resesyon. Pakyas ang “rebound” pagkahuman sa pandemya nga abton ang kanhing ang-ang sa produksyon. Ang kalibutanong paglambo sa ekonomiya wala gilaumang molapas sa 3% karon ug sa mosunod nga tuig. Paspas nga naguba ug mius-us ang produktibong pwersa taliwala sa mga pagsirado ug pagpanangtang. Nag-antus ang mga mamumuo ug masang kabus sa pagtiurok sa kahimtang sa ekonomiya samtang ang pinakadagkung kapitalistang bilyunaryo padayong mihakop og bahandi. Ang nagkalalum nga limitasyon sa kapasidad nga mopalit sa hut-ong mamumuo nagmugna og bara sa pagkonsumo kumpara sa produksyon. Giguba sa nagkakusog nga proteksyunismo ug heopulitikal nga tensyon ang daloy sa pamatigayon ug nagmugna og mga babag sa merkado nga nagpagrabe lamang sa sobrang produksyon.

Sama kaniadto, ang kinatibuk-ang demand ginatukmod sa utang ug dili sa nagsaka nga suhulan ug katakus mupalit sa hut-ong mamumuo. Miburot ang kalibutanong utang ngadto sa $322.9 trilyon, nga misaka og $12 trilyon sa unang tulo ka kwarto sa 2024. Katugbang kini sa 326% sa kalibutanong gross domestic product (GDP). Ang dakung bahin sa langyawng utang niadtong 2024 napadulong sa pagpondo sa mga proyektong imprastruktura nga naghatag dalan sa pagsulod sa multinasyunal nga mga kumpanya, lakip ginapakete karon ubos sa ginatawag nga “green economy” (solar, mga proyektong nukleyar ug uban pa). Niadtong 2023, ang kinatibuk-ang $1.4 trilyon napadulong sa pagbayad sa langyawng utang. Kapin 35 ka nasud ang nabug-atan sa utang ug lagmit dili na makabayad. Nagmugna og ispekulatibong bula (speculative bubbles) sa mga stock, real estate, ug bisan sa mga cryptocurrency ang gipadakung sektor sa pinansya.

Nagpabiling anaa sa istagnasyon ang ekonomiya sa US diin ang paglambo gilauman lamang nga moabot og 2.7% karong tuiga. Gipas-an niini ang $35.5 trilyong utang nga 123% sa kinatibuk-ang ekonomiya niini. Matud sa upisyal nga mga estadistika, anaa sa 16 milyong Amerikanong mamumuo ang wala o kulang sa trabaho, apan sumala sa independyenteng banabana mikabat og 110 milyon ang walay trabaho. Samtang padayon nga naghakop og bahandi ang 20 ka bilyunaryong Amerikano nga adunay gunit nga $2.7 trilyon, gibanabanang 43 milyong Amerikano ang nagpuyo sa kalisud, nag-antus sa nagkagrabeng sosyo-ekonomikanhong kahimtang taliwala sa nagkataas nga implasyon, nagkadakung utang sa panimalay, ubos nga suhulan, pagsaka sa ihap sa mga walay mapuy-an, ug kakulang sa akses sa pangpublikong panglawas. Temporaryong nakaabag sa ekonomiya sa US ang pagsikad sa merkado sa pinansya ug stock tungod sa pagsulod sa kalibutanong kwrta nga nangita og luwas nga kabutangan, apan delikadong moulbo ngadto sa krisis sa pinansya.

Ang pinakadakung ekonomiya sa Europe nag-atubang usab sa istagnasyon. Human mius-us sa resesyon niadtong milabayng tuig, ang ekonomiya sa UK gilaumang molambo og dili molapas sa 1% karong tuiga. Gilaumang mokipot ang ekonomiya sa Germany og 0.2% karong tuiga gikan 0.3% nga pag-ubos niadtong milabayng tuig, tungod sa hinay nga demand alang sa produktong manupaktura. Atubangan sa walay katugbang nga pangpublikong depisito, ang ekonomiya sa France gilaumang motubo sa dili molapas sa 1.1% karong tuiga, ug 0.9% sa mosunod nga tuig. Giatubang sa mga mamumuo ug katawhan sa Europe ang kawalay kasiguruhan sa trabaho, nagkagrabeng kahimtang sa pagpuyo, kundisyon sa trabaho, hilabihang pagdaginot, nga nagresulta sa nagkagamay nga akses sa katilingbanong serbisyo, ug kulang nga suhulan nga dili makasuporta sa nagkataas nga kantidad sa pagpuyo.

Nagpabiling anaa sa dugay nang istagnasyon ang ekonomiya sa Japan. Gibanabanang motubo kini og mas ubos pa sa 1% karong tuiga. Gipiang kini sa $8.6 trilyong utang nga kapin 250% sa ekonomiya niini. Ang ekonomiya sa China gilaumang motubo sa dili molapas sa 5% karong 2024, mas hinay kumpara sa milabayng tuig ug pinakahinay sukad dekada 1990. Gitay-og kini sa krisis sa real estate taliwala sa sobrang suplay sa pabalay, paggamay sa pamuhunan ug utang nga dili mabayaran sa mga debeloper sa real estate, pagsaka sa utang sa pamalay ug paghinay sa lokal nga gasto sa konsumante. Taliwala sa kinatibuk-ang paghinay sa kalibutanong ekonomiya, nangita ang China og mga pamaagi aron palagsikon ang ekonomiya niini atubangan sa sobrang produksyon nga natural sa kapitalismo diin mas daku ang kapasidad sa produktibong pwersa nga magmugna og mga igbabaligya kaysa sa kapasidad sa merkado nga dawaton kini. Nag-atubang na kini sa mga kontradiksyon nga natural sa dalan sa paglambo sa kapitalismo.

Ang dakung mayorya sa mga nasud sa Asia, Africa ug Latin America nagpabiling atrasado ug agraryo, ug nagsilbing tig-eksport sa hilaw nga materyales, o nagsilbing tig-suplay og baratong kusog-pamuo alang sa mga korporasyong multinasyunal. Ang kalibutanong kapitalistang istagnasyon nagresulta sa mas ubos nga demand alang sa baratong eksport, ug nagpahinay sa langyawng pamuhunan sa assembly-line nga manupaktura. Labaw silang ginapaantus sa nagkadakung depisito sa pamatigayon ug ang-ang sa utang. Nag-antus ang mayorya sa katawhan sa nagkagrabeng sosyo-ekonomikanhong kahimtang, nga naghulagway sa kalisud, kagutom, kawalay kahibalo, malnutrisyon, ug sakit, ug sa grabeng epekto sa mga katalagmang dala sa pag-usab sa klima, nga bunga sa pipila ka tuig nga imperyalistang pagpangawkaw sa ilang mga nasud.

Gipagrabe sa kalibutanong kapitalistang istagnasyon ang mga panagbangi sa ekonomiya ug pulitika tali sa mayor nga mga imperyalistang gahum. Samtang padayon nga ginaduso sa US ang mga palisiyang neoliberal aron ablihan ang ekonomiya sa mga semikolonya ug sa mga kapitalistang nasud nga kaatbang niini, nagpatuman kini sa nagkadaghang proteksyunistang lakang sa milabayng usa ka dekada ug tunga, sa pagsulay nga subling palagsikon ang lokal nga industriya.

Nagbubu ang gubyerno sa US ubos ni Biden og halos $40 bilyon aron suportahan ang produksyon sa semikonduktor nga nagtinguhang kontrolon ang 30% sa kalibutanong suplay, ug direktang atbangan ang Taiwan ug Japan. Gipatas-an niini ang tantos sa taripa sa lain-laing tipo sa mga produktong ginaimport gikan China. Dugang dinhi, nagpahamtang kini og sangsyon sa ekonomiya ug pinansya sa Russia, nga adunay partikular nga laraw nga kibhangan ang eksport sa Russia sa lana ug natural gas sa Europe. Ang mosuluray nga presidente sa US nga si Trump nagdeklara na og mga plano aron labaw pang ipataas ang taripa sa China, ingonman sa ginaimport nga mga produkto gikan sa Mexico ug Canada. Ang pagduso sa US sa proteksyunistang mga lakang gisugat sa mga kontra-lakang sa mga imperyalistang kaaway niini. Sa inisyatiba sa Russia ug China, ang BRICS (Brazil, Russia, India, China ug South Africa) gipalapad bag-o lang aron lakipon ang upat ka nasud (Egypt, Ethiopia, Iran ug United Arab Emirates), lahi pa sa gideklarang plano nga pagaapilon ang 13 ka laing “partner” nga nasud. Aduna usay mga pagsulay nga palambuon ang alternatibong sistemang pangpinansya sama sa inisyatibang BRICS cross-border payment (sistema sa pagbayad sa mga nasud), kwartang digital sa mga bangko sentral, ug uban pang sistema aron palagsikon ang pamatigayon nga dili hikot sa dolyar sa US, nga momenos sa bulnerabilidad sa pagmig-ot sa US.

Misangpot na ngadto sa nagkagrabeng mga panagbanging militar ang nagkakusog nga kumpetisyon sa ekonomiya nga naggikan sa pagsulay sa monopolyong burgesya sa US nga pugngan ang estratehikong pagtiurok niini. Ang imperyalistang US ang labing hingaway o agresibo sa tanang imperyalistang gahum samtang nagsulay kining sumpuon ang mga karibal sa laraw nga subling ipabarog ang kaugalingon isip nag-inusarang superpower. Sa kasamtangan, nanguna kining promotor sa mga gyera sa tibuok kalibutan. Aktibo niining ginasulsulan ug ginasugnuran ang mga gubat nga nagtinguhang ilugon ang estratehikong mga rekurso gikan sa kontrol sa iyang mga karibal. Ang pagbalik ni Donald Trump isip presidente sa US nagpabwelo sa pagtumaw sa mga grupong neopasista sa US. Ang iyang agresibong pagduso sa proteksyunistang mga palisiya sa US labaw nga magpakusog sa panagbanging inter-imperyalista, pareho sa China ug Russia, ingonman sa tradisyunal nga mga alyado sa US.

Pinaagi sa pag-armas sa Ukraine ug pagpusisyon sa mga armas duul sa sidlakang utlanan sa nasud sa Russia, nagmalampuson ang US nga hagiton ang Russia nga moatake niadtong 2022. Sukad kaniadto gihatagan niini ang Ukraine og kapin $115 bilyong ayuda, kapin katunga dinhi sa porma sa mga armas aron palungtaron ang gubat sa laraw nga ugtason ang Russia. Aron labawng pagrabehon ang gubat, “gitugutan” bag-o lang sa US ang Ukraine nga magpalupad og mga misayl nga mid-range ngadto sa Russia, nga gitugbangan sa Russia sa kinaunhang paggamit sa mga hypersonic nga misayl.

Padayong ginasuportahan sa US ang gyerang henosidyo sa Zionistang Israel batok sa katawhang Palestino sa Gaza nga mipatay sa kapin 45,000, lakip ang 17,000 bata, ug miangol sa halos 110,000 katawo. Gihatagan niini ang Israel og halos $18 bilyong ayudang militar, lakip ang mga bomba ug misayl nga gigamit sa Israel sa pagpamomba ug pagpanganyon sa Gaza. Giuyunan ug gisuportahan usab sa US ang mga airstrike sa Israel batok sa Iran niadtong Oktubre, ug batok sa Lebanon niadtong Nobyembre nga mipatay sa 3,800 katawo ug miangol sa halos 16,000. Nakigkunsaba ang US sa Israel, Turkey, UK ug mga pwersa sa NATO aron iduso ang pagpalagpot sa presidente sa Syria nga si Bashar al-Assad (nga nagtugot sa Russia nga makabutang og base militar) ug pagpahagba sa gubyernong Syrian. Sukad kaniadto, gisuportahan na sa imperyalistang US ang pagsakop sa Israel sa Golan Heights, paglunsad og airstrike ug pag-abante ngadto sa sentro sa Syria, samtang ginaduso ang mas dakung kontrol ug impluwensya sa pagtukod sa bag-ong gubyerno.

Samtang ginasugnuran ang mga gubat sa Ukraine ug sa Middle East, ang mga pwersang militar sa US nga anaa gawas sa nasud niini mimaniobra nag-una sa gitawag niining rehiyong Indo-Pacific, subay sa “pivot to Asia,” nga adunay prinsipal nga tinguhang palibutan ug ikahon ang China ug targeton ang Democratic People’s Republic of Korea (DPRK). Padayon niining gipalig-on ang mga base militar sa Japan ug South Korea, ingonman sa Pilipinas. Giduso niini ang Japan nga dugangan ang gastos militar ug palapdon ang mga pwersang militar niini aron makasuporta sa mga pwersang militar sa US. Ginagamit niini ang Pilipinas isip base sa mga operasyon sa South China Sea sa laraw nga painiton ang bangi sa China.

Padayon usab nga ginalunsad sa US ang interbensyon sa pulitika ug militar batok sa mga nasud nga nanghingusog sa nasudnong soberanya. Gihimo niini ang tanang porma sa pagpahagba sa mga gubyerno sa Venezuela, Cuba ug uban pang mga nasud sa Latin America. Ginatarget usab niini ang Iran, nga lig-ong mibarog batok sa interbensyon sa US sa Middle East.

Ang imperyalistang krisis ug mga gubat mitukmod sa lapad nga mga pakigbisog ug tanang porma sa pagsukol. Natukod ang lapad nga alyansa tali sa mga kalihukang anti-imperyalista sa katawhan, ingonman sa mga gubyernong supak sa interbensyunismo sa US. Gipatuman sa Venezuela ang inisyatiba sa pagtukod sa usa ka anti-pasistang nagkahiusang prente batok sa imperyalismong US.

Miulbo ang dagkung mga pakigbisog sa mga sa mamumuo sa US ug uban pang mayor nga kapitalistang nasud aron iduso ang mas taas nga suhulan ug mas maayong mga kundisyon sa pamuo, lakip ang welga sa 50,000 ka mamumuo sa dunggoanan sa US niadtong Oktubre, ug sa 33,000 ka mamumuo sa kumpanyang Boeing. Gatusan ka libong mga mamumuo ang nagwelga sa France isip protesta sa pagkibhang sa badyet sa serbisyong publiko. Naglunsad og nasudnong welga ang mga mamumuo sa Germany niadtong Oktubre alang sa mas taas suhulan. Dakung mga welgang mamumuo usab ang gilunsad sa Belgium, Finland, Italy, Spain, The Netherlands, Cyprus ug uban pang mga nasud. Dakung protesta sa mamumuo usab ang gihimo sa South Korea aron ipanawagan ang pagpalagpot sa presidente. Mayor nga mga aksyong protesta usab ang padayon nga ginalunsad sa tibuok kalibutan aron iduso ang pagtapos sa pag-eksport og armas sa US sa Israel ug ipanawagan ang paghunong sa Zionistang henosidyo ngadto sa mga Palestino. Taliwala sa malukpanong protesta sa mga mamumuo, ang mga kundisyon labaw nga nahimong paborable, ilabina sa mga kapitalistang nasud, aron motumaw ang militanteng mga alyansa ug konseho sa mga mamumuo aron magsilbing lapad nga nagkahiusang prente sa pakigbisog alang sa ekonomikanhon ug pulitikanhong pangayo.

Sa mayorya sa mga nasud sa tibuok kalibutan nga nagpabiling semikolonyal ug semipyudal ang kondisyon, ang lapad nga masa sa mamumuo ug mag-uuma, semi-proletaryado ug petiburgesya ug uban pang dinaugdaug nga hut-ong ug sektor nagalunsad og militanteng mga pakigbisog alang sa ilang mga katungod sa ekonomiya ug pulitika, batok sa papet ug korap nga mga gubyerno. Ginalunsad nila ang tanang porma sa pagsukol aron iasdang ang ilang kawsa alang sa nasudnong paglingkawas, partikular gikan sa imperyalistang dominasyon sa US.

Padayong milapad ang mga kalihukan ug organisayong naghiusa sa mga katawhan sa lain-laing nasud. Miani sila og mayor nga mga kadaugan sa pagpatuman sa mga resolusyon sa International People’s Tribunal mahitnungod sa internasyunal nga makitawhanong balaod, lakip ang kahimtang sa Pilipinas. Makita kini sa magkasunod nga kalibutanong mga asembliya nga walay kapareho sa gidak-on ug gilapdon.

Ang mga pakigbisog alang sa nasudnong paglingkawas sa dinaugdaug nga mga hut-ong ug katawhan sa mga semikolonyal ug semipyudal nga nasud kaabag sa pakigbisog sa mga gubyernong nanalipud sa ilang nasudnong soberanya ug nagabatok sa agresyon, interbensyon ug subersyon sa imperyalistang US.

Padayon usab nga naglunsad og armadong pagsukol ang mga katawhan sa tibuok kalibutan nga nakigbisog alang sa nasudnong kalingkawasan. Nagpabiling lig-on ang mga pwersang rebolusyonaryo sa Palestine sa ilang armadong pakigbisog batok sa pagpanakop sa Israel sa ilang kayutaan. Nagalunsad usab ang katawhang Kurdish sa ilang armadong pagsukol aron ipabarog ang usa ka independyenteng nasud. Padayon nga nagasukol ang etnikong minoryang mga grupo ug ilang mga hukbo sa pasistang rehimeng Tatmadaw sa Myanmar. Padayon nga ginalunsad ang rebolusyonaryong armadong pakigbisog sa India aron batukan ang brutal nga gubat sa pasistang rehimeng Modi. Padayon usab nga gipangulohan sa mga partido komunista ang armadong pagsukol sa Turkey, Colombia, sa Pilipinas ug uban pang mga nasud.

II. Nagkagrabeng ekonomikanhong kahimtang, labaw nga pagkalugbak sa nasudnong soberanya ug nagkakusog nga pasistang pagpanumpo ilalum sa rehimeng US-Marcos

Padayong nagkagrabe ang makanunayong krisis sa Pilipinas, nga nagpasamot sa sosyo-ekonomikong kahimtang sa lapad nga masa sa katawhang Pilipino. Ang himalatyon nga semikolonyal ug semipyudal nga moda sa produksyon nagpakita sa pagkaguba sa produktibong mga pwersa ug paggrabe sa labing dunot niining aspeto.

Nagtunhay ang malukpanong pagkaguba sa lokal nga produktibong pwersa nga misangpot sa paghinay sa produksyon (sa manupaktura ug agrikultura). Nagbunga kini sa malukpanong disempleyo, labaw pang pagsalig sa imported nga igbabaligya para sa konsumo, ug pagsaka sa presyo.

Nagpabiling atrasado ug agraryo ang lokal nga produksyon. Walay basihan nga mga industriya nga mamahimong motabang sa paglambo ug paglapad sa ekonomiya. Giguba sa deka-dekadang liberalisasyon sa importasyon ug kumbersyon sa yuta ang lokal nga produktibong mga pwersa, ilabina ang lokal nga produksyon sa agrikultura. Mihagba ang produktibidad sa agrikultura sa milabayng tulo ka tuig nga miresulta sa makasaysayanong depisito sa pamatigayon sa agrikultura, nagkagrabeng pagsalig sa importasyon sa pagkaon, ug nagkaubos nga panginabuhi sa masang mag-uuma. Ang sektor sa industriya sa pagmanupaktura mihagba sa pinakaubos nga ang-ang sukad 1949. Apan padayon ang walay hunong nga pagpatuman ni Marcos sa neoliberal nga mga palisiya nga nagpagrabe sa pagsalig sa nasud sa import, nagpalapad sa mga pribilehiyo ug insentibo sa multinasyunal nga mga korporasyon, ug labaw pang nagpahuyang sa lokal nga produksyon.

Nagresulta kini sa taas nga presyo, ubos nga suhulan ug sa pagkahanaw sa panginabuhian sa minilyong masang anakpawis. Ang makanunayong depisito sa pamatigayon sa nasud pinakataas sa kasaysayan. Tungod kay walay kapasidad ang industriyang pang-eksport sa nasud nga makatigum og langyawng salapi, hilabihang nagsaliga ang ekonomiya sa langyawng remitans ug langyawng pautang aron pondohan ang mga import. Miburot ang kinatibuk-ang langyawng utang sa nasud ngadto sa $139.6 bilyon sukad Setyembre 2024—katugbang sa 31% sa gross domestic product (GDP) nga pinakataas sa halos 15 ka tuig—kung asa $86.9 bilyon ang pangpublikong langyawng utang.

Sa ilalum ni Marcos, padayong midaku ang utang sa nasudnong gubyerno, mga miabot og kapin ₱16 trilyon niadtong Oktubre 2024, o ₱3.2 trilyon o 25% bisan wala pa nakatunga sa unum ka tuig niyang termino. Kini nga pagsaka nag-unang nagsilbi sa pagpalapad sa mga operasyon sa dagkung burgesya-kumprador ug pagbayad sa langyaw ug lokal nga utang. Ang kinatibuk-ang binulan nga utang sa gubyernong Marcos nga ₱204 bilyon labaw nga mas daku sa giusang binulang utang ilalum sa rehimeng Duterte (₱131 bilyon) ug Aquino (₱61.5 bilyon). Padayon nga misaka ang balor sa awtomatikong ginabayad sa utang. Ang bayad sa interes pa lamang misaka na sa 22% gikan ₱628.3 bilyon niadtong 2023 ngadto sa ₱763.4 bilyon niining 2024. Nakatakda kining subling mosaka og 11% ngadto sa ₱848 bilyon sa 2025. Kung tipunon, ang bayad sa interes ug prinsipal labaw nga nagkataas ug nagkadaku gikan ₱1.57 trilyon niadtong 2023, ngadto sa ₱2.03 trilyon karong 2024 ug gibanabanang ₱2.05 trilyon sa 2025.

Ang kalibutanong istagnasyon sa ekonomiya nagresulta sa paghinay sa lokal nga ekonomiya, partikular sa pag-asembol ug semi-processing. Taliwala sa sobrang suplay sa kalibutan, gilaumang mokipot sa dili moubos sa 10% ang eksport sa semikonduktor, nga mosangpot sa pagsirado o pagpanangtang sa mga lokal nga empresa sa pag-asembol. Adunay susamang pagpanangtang sa mga empresang nagamugna og tela, wiring ug uban pang produktong pang-eksport.

Pinakataas pa gihapon sa kasaysayan ang ihap sa mga Pilipinong walay trabaho. Gitabunan lamang kini pinaagi sa manipulasyon sa estadistika sa mga ahensya sa estado. Ginainat nila pag-ayo ang mga kategorya nga “adunay trabaho” aron ilakip bisan ang halos tulo ka milyong walay sweldong trabahante sa negosyo sa pamilya, ingonman ang pipila ka milyong tigpunit og basura, mga vendor, gagmayng opereytor sa transportasyon, mga tag-iya sa sari-sari store, katabang, mga Youtuber ug Tiktoker ug uban pang impormal nga trabaho. Ang tinuod, daghan kanila ang walay trabaho nga misulod na lamang sa bisan unsang trabaho nga ubos ang suhulan, walay kasiguruhan ug ubos kaayong kita ug walay benepisyo ug katilingbanong proteksyon. Aron tabunan ang gigrabehon sa disempleyo, gipagamay usab sa mga eksperto sa estadistika sa estado ang “labor force participation rate” o tantos sa nagasalmot nga kusog-pamuo aron tangtangon ang minilyong Pilipino sa ihap sa mga walay trabaho.

Partikular nga grabe ang kawalay trabaho sa han-ay sa kabatan-onan, lakip ang mga nakagradwar nga walay makitang trabaho sa kursong ilang gitun-an. Nagdasok sa nasudnong kabisera ug uban pang mayor nga syudad ang daku kaayong reserbang hukbo sa pamuo. Padayong midaghan ang walay trabaho sa kabanikanhan atubangan sa pagpangilog og yuta ug panginabuhian sa minilyong mag-uuma. Bunga niini, kapin 7,500 ka mamumuo ang mihawa sa nasud adlaw-adlaw aron mangita og trabaho sa ubang nasud sa unang siyam ka bulan lamang sa 2024, tungod sa kawalay igong trabaho sa nasud. Halos 11 milyon ang Pilipinong nagtrabaho sa gawas sa nasud, lakip ang anaa sa unum ka milyong migranteng dokumentado ug dili dokumentado.

Paspas nga mitiurok ang istandart sa pamuyo sa lapad nga masa sa katawhan ilalum sa rehimeng Marcos taliwala sa padayon nga pagsaka sa presyo sa pagkaon, petrolyo, kuryente, tubig ug uban pang pangpublikong serbisyo ug yutilitad. Sa partikular, kanunay taas ang implasyon sa pagkaon sama sa presyo sa bugas nga kontrolado sa mga burgesya-kumprador nga kartel ug ismagler sa pakigkunsaba sa mga upisyal sa gubyerno. Padayong midaku ang gintang sa suhulan ug sweldo sa mga mamumuo ug yanong mga empleyado sa bili sa inadlawng panginahanglan sa lima-katawong pamilya. Sa desperasyong “maka-agni” sa langyawng kapital, palisiya sa rehimeng Marcos nga ilansang ang suhulan.

Nagpagula ang mga upisyal ni Marcos sa ubos kaayong datos sa kalisud gamit ang dili katohoang basihan sa kalisud. Gipanghinambog sa rehimen ang paglambo sa ekonomiya nga kuno pinakapaspas sa rehiyon ug daw hapit nang maabot sa nasud ang taas sa hatungang-kita. Ang tinuod, ang paspas nga midaku mao ang ihap sa mga Pilipinong kabus ug gutom. Sukad nga makalingkod sa poder si Marcos, ang ihap sa kabus nga pamilyang Pilipino midaku og 50% (anaa sa upat ka milyon) gikan walo hangtud kapin 12 milyon. Ang ihap sa gutom nga mga pamilya midaku og 120% (3.4 milyon) gikan 2.9 milyon ngadto sa kapin unum ka milyon. Sa pagsaka sa mga presyo ug pagtiurok sa ilang katakus nga mopalit, midaku ang ihap sa mga pamilyag walay tinigum og 1.5 milyon ngadto sa kapin 20 milyon. Kapin 75% sa mga Pilipino ang naglisud ug nag-antus, nga gikumpirma bisan sa mga pagtuon sa bangko sentral.

Samtang nag-antus ang dakung mayorya sa katawhang Pilipino sa nagkagrabeng kundisyon sa pamuyo, kawalay trabaho ug pagkawala sa panginabuhi, nagpakatagbaw usab sa bahandi ug pribilehiyo ang mga Marcos ug mga nagharing hut-ong. Ginagasto ni Marcos ang pangpublikong pondo alang sa pirming pagbyahe sa ubang nasud, paglupad gamit ang upisyal nga mga helikopter alang sa personal nga byahe aron molikay sa grabeng trapik, paglunsad og mga salu-salo ug pribadong konsyerto sa palasyo sa presidente, ug pagpuyong haruhay sa kaugalingon ug iyang pamilya sa isang daw resort nga balay sa Malacañang.

Dayag nga ginagamit sa rehimeng Marcos ang pangpulitikang pribilehiyo aron bawion ang binilyong pisong bahandi nga iligal nga gikawat ilalum sa 14 ka tuig sa diktadurang Marcos Sr (1972-1986) nga gisekwester (o giimbargo) sa nangaging mga rehimen. Sukad nga milingkod sa poder niadtong 2022, sunud-sunod nga gibasura sa lokal nga mga korte ang dili moubos sa walo ka kaso sa korapsyon ug kinawat nga bahandi batok sa pamilyang Marcos, nga gilangkuban sa dili moubos sa ₱352 bilyon. Lakip niining mga kasoha ang pondong coco levy nga gikawat nilang Marcos, Juan Ponce Enrile ug Eduardo Conjuangco gikan sa mga mag-uuma aron mopalit sa mga sapi (stocks), kumpanya, bangko ug magpautang sa mga kroni.

Kontrolado ni Marcos ang target nga ₱500 bilyong pondong publiko alang sa Maharlika Fund, kung asa ₱75 bilyon na ang nabalhin, nga libre na niyang ihatag sa gipaborang pribadong negosyo ug mga proyektong imprastruktura nga ginagarantiyahan sa gubyerno. Sa badyet sa rehimen karong 2025, dili moubos sa ₱1.5 trilyon ang gigahin sa pagtukod o pagpalapad sa mga kalsada ug tulay nga puno sa kurapsyon. Gikibhangan ang badyet sa edukasyon, panglawas, ug uban pang katilingbanong serbisyo aron ibalhin sa pork barrel, sa porma sa ginapagawas nga kwartang pang-subsidyo ug ayuda. Naggahin si Marcos og ₱4.5 bilyon sa kaugalingon niining confidential and intelligence funds.

Ang nagkagrabeng krisis sa nagharing sistema padayong nagpahait sa pulitikahong krisis ilalum sa rehimeng Marcos. Ang nagkagamay nga rekurso sa ekonomiya nga pagabahin-bahinon sa mga nagharing hut-ong nagtukmod sa nagharing mga buruktrata-kapitalista nga mahimong mas hakog ug agapan sa pribilehiyo ug bahandi. Nag-ilog sila sa mga kontrata sa gubyerno aron makuha ang ilang bahin sa kikbak. Ginagamit nila ang gahum ug pribilehiyo sa gubyerno aron paburan ang ilang mga kroni sa negosyo ug loyalista sa pulitika.

Ang bangi sa mga Marcos ug Duterte, nga nagrepresenta sa duha ka nag-unang paksyon sa kasamtangang nagharing pundok nga nag-ilog sa pribilehiyo sa ekonomiya ug gahum sa pulitika, nagkaigting samtang nagkaduul ang eleksyong midterm sa 2025, nga ginailang mahinungdanong pagpangandam alang sa eleksyon presidensyal sa 2028. Girekomenda sa House of Representatives nga dominado sa mga Marcos nga kasuhan si Duterte sa mga krimen sa katawhan, sama sa mga gipasaka sa mga biktima sa ekstra-hudisyal nga pagpatay sa International Criminal Court (ICC). Ingonman, dili moubos sa tulo ka reklamo sa impeachment ang gipasaka batok sa anak ni Duterte nga si Sara, nga bise presidente ug kanhing kalihim sa edukasyon, tungod sa maanomalyang paggamit sa kapin ₱500 milyong “confidential funds,” gawas sa daghan pang isyu. Tungod dili niya hingpit nga gunit kontrol sa armadong hukbo ug nalangkub ang nahabiling impluwensya sa mga Duterte sa militar, ginapalangan ni Marcos ang pagpalagpot kang Sara Duterte, ug ang pagtaral ug pag-aresto sa ICC kang Rodrigo Duterte.

Padayon nga ginapakita sa papet nga rehimeng Marcos ang dayag nga pagyukbo niini sa among imperyalistang US. Gitugutan niini ang US nga palig-onon ang presensyang militar niini sa Pilipinas, aron magpakita ug magpalapad sa gahum militar sa US sa rehiyong Asia-Pacific. Uban ang mga upisyal sa depensa ug militar sa US, mipirma ang rehimeng Marcos sa Bilateral Security Guidelines ug Security Sector Assistance Roadmap, nga labaw pang naghikot sa Pilipinas sa heopulitikal nga interes sa militar sa US. Mipirma usab kini sa usa ka deklarasyon uban ang US ug Japan aron magtukod og trilateral nga alyansa nga tin-aw nga nagsilbi sa “Indo-Pacific Strategy” sa Pentagon.

Ilalum ni Marcos, midaku ang ihap sa mga base ug pasilidad militar sa US gikan upat ngadto sa 20, lakip ang mga upisyal nga ginaila ilalum sa Enhanced Defense Cooperation Agreement (EDCA), lakip ang mga lugar nga gitago sa publiko. Ang iskema sa US mao ang gamiton ang nasud isip lunsaran sa mga operasyong militar ug nabal sa rehiyon nga nakapukos batok sa China ug sa DPRK. Gipabilin usab niini ang dakung bulto sa mga pwersang militar sa Japan, South Korea, ug Australia, samtang dili moubos sa tulo ka carrier strike group ang padayon nga nagasuyod sa kadagatan sa palibot sa China. Naglunsad ang US og halos adlaw-adlaw nga mga pagbansay og gubat sa nasud. Ang Balikatan exercises niadtong Abril ang pinakadaku sa kasaysayan nga gisalmutan sa kapin 11,000 ka sundalong Amerikano.

Ginapadagan sa militar sa US ang sentro sa kumand niini sa Palawan, ingonman sa nag-unang hedkwarter sa Armed Forces of the Philippines (AFP), aron pangulohan ug ikoordina ang mga operasyong nabal ug pwersang coast guard sa Pilipinas ug US lakip ang mga “supply mission” sa Ayungin Shoal, “freedom of navigation” ug uban pang mga operasyon sa South China Sea nga adunay tumong nga ipakita ang gahum militar sa US. Kini nga mga operasyon nagtukmod ug nagpataas sa tensyon sa China ug ginahimo uban sa kampanya aron paypayan ang Sinophobia sa mga Pilipino. Giatubang kini sa China sa labawng agresibong operasyong nabal ug pangdagat nga nagalapas sa eksklusibong katungod sa ekonomiya sa Pilipinas sa West Philippine Sea, hinungdan nga labawng nahimong lisud ang malinawong dayalogo ug resolusyon sa mga bikil sa kadagatan tali sa sa Pilipinas ug China.

Sa mando sa US, padayon nga ginaduso sa rehimeng Marcos ang “modernisasyon” sa AFP aron himuon kining “interoperable” o mas daling kontrolon nga pwersang pamulig sa US. Ilalum sa “foreign military financing” (FMF o langyawng pagpondo sa militar) sa US, “ginabalhin” ang gamit nang mga himang iggugubat sa militar sa Pilipinas. Ilalum sa FMF, nagsaad ang US og $500 milyon sa Pilipinas karong 2024, ug nagsugyot og $2.5 bilyong pakete alang sa 2025-2029.

Gunit ang suportang militar ug pinansya sa US, gipakusog sa rehimeng Marcos ang pulitikanhong pagpanumpo ug ang gubat sa pagsumpo nga nagatarget sa katawhang Pilipino ug sa ilang organisadong pwersang patriyotiko ug demokratiko. Dungan niini, naglunsad kini og todo-todong kampanya sa disimpormasyon ug gyerang sikolohikal, sa subli-subli nga pagdeklara nga “insurgency-free” o wala nay armadong pagsukol sa mga prubinsya sa tibuok nasud, aron tabunan ang walay pili nga paglapas sa tawhanong katungod ug internasyunal nga makitawhanong balaod.

Balik-balik nga gideklara sa AFP ang plano niining pagkambyo gikan “internal nga depensa” ngadto sa “eksternal nga depensa” ug pagtuman sa “integrated territorial defense system” nga nagkinaiya sa pagpalapad ug pagpakusog sa mga yunit paramilitar (CAFGU) niini. Ang maong mga deklarasyong sa publiko paghatag kasiguruhan sa imperyalistang amo ni Marcos nga ang iyang gubyerno andam maggahin og mas daghang pwersang militar aron suportahan ang pwersang militar sa US sa mga operasyon niini sa South China Sea sa panahong moulbo ang inter-imperyalistang armadong kaguliyang o direktang gubat.

Sa iyang obsesyon nga pulbuson ang armado ug dili armadong pagsukol sa katawhan aron tangtangon ang mga babag sa iyang burukrata-kapitalista, pasista ug papet nga rehimen, ginagamit ni Marcos ang pinakabrutal ug walang hunong nga pamaagi sa pagpanumpo sa katawhan. Gimandoan niya ang AFP nga magpahamtang og balaod militar sa liboang barangay ug komunidad sa kabanikanhan, nga mibanhaw sa maduguong taktika sa pasistang pagpanumpo niadtong panahon sa gikasilagang diktadurya sa tiraniko niyang amahan.

Sa takuban sa mga “community support program,” nagdeploy ang AFP og mga tim sa mga sundalong pangkombat aron magtukod og mga baraks ug detatsment sulod sa mga komunidad sa kilid sa mga balay sa mga sibilyan, nga lapas sa internasyunal nga makitawhanong balaod. Gipahamtang nila ang ilang gahum ug nagsabwag og kabangis ngadto sa katawhan. Ginapailalum ang mga komunidad sa daw garison o hamlet nga kontrol. Ginapig-ot sa mga pasista ang katungod sa katawhan nga gawasnong molihok o mobyahe gamit ang mga tsekpoynt ug logbook, pagblokeyo sa pagkaon ug komersyo, curfew ug bisan unsang arbitraryong mga palisiya. Lakip usab dinhi ang pagbawal sa mga mag-uuma nga magtrabaho sa mga umahan sa takdang mga oras, nga nagadaut sa ilang panginabuhi. Mibarog nga hukum, hurado ug berdugo ang maong mga sundalo sa pag-akusa sa mga sibilyan isip “tigsuporta” o “rebelde” ug pagtukmod kanila nga “i-clear” ang ilang mga pangalan o “mosurender” sa militar, gawas sa mga prosesong ligal sumala sa kaugalingon nilang balaod, nga giduyugan sa mga hulga sa ekstra-hudisyal nga pagpatay o tortyur.

Grabeng gikasilagan sa katawhan ang maong mga pasista. Promotor sila sa paggamit sa gibawal nga droga, pornograpiya, prostitusyon ug uban pang anti-sosyal nga mga bisyo sa mga kabatan-onan sa sulayng tikloon ang ilang tinguha alang sa katilingbanong hustisya. Ginatugaw ang kalinaw sa mga komunidad sa matag gabii nilang pag-inuman ug paturagas nga pagpamusil sa mga hubog nga sundalo. Kining mga sundaloha nalambigit sa nagkadaghang mga kasong sekswal nga pagpangharas, pagpangmolestya ug pagpanglugos sa mga babaye.

Padayon nga midaghan ang mga masaker, ekstra-hudisyal nga pagpamatay, tortyur, pagdagit, iligal nga pag-aresto ug uban pang mga krimeng hinimo sa mga sundalo. Aron hatagag pangatarungan ang maong mga krimen, nagapagula og mga bakak nga pamahayag ang AFP nga ang ilang mga biktima mga Pulang manggugubat nga napatay sa engkwentro, bisan og kusganon kining ginapanghimakak sa mga lokal nga residente. Adunay mga kaso sa pagpatay sa tigulang, tibuok mga pamilya, mabdos ug mga bata. Mas grabe ang mga kaso sa pulitikanhong pagpanumpo, paglapas sa tawhanong katungod ug mga krimen batok sa makitawhanong balaod sa mga lugar kung asa ginagamit ang militar para palayason ang mga lumulupyo sa ilang yuta ug sumpuon ang ilang pagsupak sa pagsulod sa dagkung kumpanya sa mina ug plantasyon, mga proyektong enerhiya ug eko-turismo, ug uban pa.

Susamang mga taktika sa pulitikanhong pagpanumpo ang ginagamit sa mga pwersang militar ug pulis aron sumpuon ang pakigbisog sa katawhan sa mga syudad. Nagdeploy sila og mga tim sa sundalo ug ahente sa mga komunidad sa mga kabus nga kasyudaran aron ipailalum ang katawhan sa pagpaniktik, pagpangharas, “pagpasurender” ug uban pang mga operasyon sa “kumbersyon,” pag-aresto, pagdagit ug pagpatay. Kakunsaba ang mga kapitalista, ginaila sa mga ahenteng militar ang mga lider ug organisador sa unyon ug “ginabisita” sila sa ilang mga balay aron hadlukon sila ug ilang pamilya aron pugson silang moundang sa ilang pag-organisa. Ginatarget usab sa mga pwersang militar ug ahente sa paniktik ang mga estudyante, kababayen-an, tawong-simbahan, mamumuo sa panglawas ug uban pang sektor. Sa takuban sa “pagsukol sa bangis nga ekstrimismo,” naglunsad ang AFP, uban ang National Task Force (NTF)-Elcac ug uban pang reaksyunaryong ahensya sa estado, sa kampanya sa anti-komunistang pagpamig-ot nga nagalapas sa mga katungod mag-organisa sa katawhan ug magpahayag sa ilang mga reklamo.

Wala nahadlok ang katawhang Pilipino atubangan sa nagkagrabeng mga porma sa pagpangdaugdaug ug pagpahimulos ug pasistang atake. Determinado ang lapad nga masa sa katawhan nga panalipdan ang ilang mga katungod, hinanaling pangayo ug malungtarong mga pangandoy. Padayon silang nag-organisa ug nagalunsad og militanteng pakigbisog.

Gilunsad sa mga drayber ug opereytor sa dyip ang militanteng mga aksyong protesta batok sa plano sa rehimeng Marcos nga i-phase out ang mga dyip nga maghikaw sa panginabuhian sa pipila ka libong katawhan. Makita nato ang dayag nga paglagsik sa aktibidad sa mga mamumuo sa pagtukod og mga unyon ug pagduso sa pangayo alang sa dugang suhulan. Padayong ginaasdang ang pipila ka lokal nga pakigbisog sa mag-uuma batok sa hulga sa mga agalong yutaan ug dagkung burgesya-kumprador nga kawkawon ang ilang yuta. Ginapakusog sa mga organisasyong masa ang ilang tingog aron ipanawagan ang mas ubos nga presyo sa bugas, petrolyo, kuryente ug uban pa. Ang mga migranteng mamumuo, gikan Europe hangtud Middle East, gikan sa mga marino hangtud sa mga katabang, aktibong nagpakusog sa ilang mga organisasyon ug militanteng ginaasdang ang ilang mga pangayo.

Adunay mga aksyong protesta batok sa pagbansay militar sa US sa Pilipinas, batok sa mga base militar sa US, ug interbensyong militar sa South China Sea. Gilunsad usab ang mga protesta isip pakighiusa sa katawhang Palestino batok sa henosidyo sa US-Israel sa Gaza.

Gipanawagan sa mga biktima sa mga kalamidad ang kumpensasyon tungod sa kapalpak sa estado nga siguruhon ang kaluwasan sa katawhan. Gimakmak nila ang palisiya sa pagpatuman sa pagmina ug uban pang mga magun-ubong aktibidad.

Padayon nga mikusog ang ilang panawagan aron buhian ang mga bilanggong pulitikal, paglutaw sa mga biktima sa pugos nga pagkawala, ug hustisya sa tanang mga biktima sa paglapas sa tawhanong katungod. Nagkakusog usab ang panawagan sa rehimeng Marcos nga makigtinabangay sa International Criminal Court alang sa pag-aresto ug pagtaral kang Rodrigo Duterte sa mga krimen batok sa katawhan. Aduna usay mga panawagan alang sa impeachment kang Sara Duterte isip bise presidente, samtang ginamakmak usab nila ang korapsyon sa rehimeng Marcos.

Samtang ginalunsad ang mga aksyong protesta batok sa pagpakaitoy, korapsyon, pasismo ug anti-katawhang mga palisiya sa rehimeng Marcos, nagpadagan ang mga ligal nga nasudnon-demokratikong organisasyong masa, alyansa ug pulitikanhong partido og 11-katawong kandidato pagkasenador. Dugang kini sa pipila ka grupong party-list nga midagan aron makalingkod sa kongreso. Aktibo nilang ginapatuman ang nasudnon-demokratikong programa, uban ang programa alang sa hinanaling mga reporma, nga larawng hatagag alibyu ang masang nag-antus sa malukpanong disempleyo ug lalum nga kalisud. Ginabutyag ug ginahagit nila ang reaksyunaryong eleksyon aron pukawon ang labing daghang ihap sa katawhan, aron aghaton silang mobotar alang sa ilang mga kandidato, ug mas importante, aron magtukod og bag-ong mga balangay ug magrekrut og bag-ong mga myembro, alang sa mas dakung pakigbisog sa masa sa umalabot.

Ang mainantusong paningkamot aron pukawon, organisahon ug palihukon ang katawhan siguradong magresulta sa lig-ong pagmartsa paabante sa demokratikong kalihukang masa sa umalabot nga tuig. Determinado ang katawhan nga magtukod, magpakusog ug magpalapad sa ilang mga unyon ug tanang tipo sa organisasyong masa aron mas epektibo nilang mapanalipdan ang ilang mga interes sa ekonomiya ug pulitika, ug iasdang ang tinguha sa nasudnong demokrasya.

Ang nagkalalum nga makihut-ong nga kontradiksyon ug ang nagkakusog nga ekonomikanhon ug pulitikanhong krisis sa nagharing sistema nagmugna og paborableng mga kundisyon aron labaw pang palapdon ug pakusgon ang Partido Komunista ng Pilipinas. Anaa na sa abaga sa mga kadre ug myembro sa Partido ang responsibilidad nga kusganong maningkamot aron mas lalum ug lapad nga mougamot sa masa, aron pukawon ug pangulohan sila sa dalan sa demokratikong rebolusyon sa katawhan.

III. Lig-ong nakagamot ang kalihukang pagtul-id, apan daghan pa ang kinahanglang buhaton

Ang Partido Komunista ng Pilipinas ang abanteng destakamento sa proletaryadong Pilipino. Ginadapat niini ang teorya sa Marxismo-Leninismo-Maoismo, ang ideolohiya sa hut-ong mamumuo, sa kongkretong kundisyon sa katilingbang Pilipino, nga nga gidominahan sa imperyalismong US, ug nakapailalum sa makihut-ong nga paghari sa dagkung burgesya ug dagkung agalong yutaan. Gihikyad sa Partido ang programa alang sa demokratikong rebolusyon sa katawhan isip solusyon sa makanunayong krisis sa semikolonyal ug semipyudal nga sistema, aron hugpungon ang mga makinasudnon ug demokratikong hut-ong sa mga mamumuo, mag-uuma, malaproletaryado, gagmayng burgesya ug nasudnong burgesya.

Gitukod ang Partido niadtong Disyembre 26, 1968, ug sukad kaniadto, nangulo sa katawhang Pilipino sa pagpaasdang sa nasudnon-demokratikong rebolusyon. Kini usa ka organisasyong adunay taas nga disiplina subay sa mga prinsipyo sa demokratikong sentralismo. Gilangkuban kini sa mga proletaryadong kadre ug aktibista nga lalum ug lapad nga nakaugat sa masa. Nangulo kini sa mga rebolusyonaryong organisasyon ug pakigbisog sa masa sa mga mamumuo, mag-uuma ug uban pang demokratikong hut-ong ug sektor. Nangulo kini sa Bagong Hukbong Bayan sa pagpaasdang sa malungtarong gubat sa katawhan subay sa estratehikong linya sa pagliyok sa kasyudaran gikan sa kabanikanhan. Gitukod niini ug ginapangulohan ang National Democratic Front isip pinakakonsolidadong ubod sa nagkahiusang prente.

Ginagamit sa Partido ang pagpuna ug pagpuna sa kaugalingon aron masiguro nga nakasubay ang rebolusyonaryong praktika sa linya sa Marxismo-Leninismo-Maoismo ug sa mga batakang prinsipyo ug palisiya niini. Padayon niining ginabatukan ang mga ideyang burges ug petiburges nga impluwensya gikan sa gawas ug sa sulod niini. Kinahanglang pupanahong ilunsad sa Partido ang mga kampanya sa pagtul-id, kinatibuk-an man o partikular, isip pamaagi sa pagtul-id sa mga kasaypanan sa mga palisiya ug praktika.

Eksaktong usa ka tuig na ang milabay dihang manawagan ang Komite Sentral sa tibuok ginsakpan sa Partido nga maglunsad og usa ka kalihukang pagtul-id aron hait nga puntingon, sawayon ug tul-iron ang tanang klase sa petiburges nga suhetibismo, sakit nga mihunob sa Partido sa lain-laing ang-ang ug gigrabehon, ug nagpahuyang dinhi gikan sa sulod. Sulod sa milabayng usa ka dekada o kapin pa, ang pag-asdang sa rebolusyonaryong kalihukang masa gibalda sa mga Toong oportunistang tendensya sa konserbatismo, ikogismo, ligalismo, ekonomismo, repormismo ug NGOismo; samtang ginapahuyang ang rebolusyonaryong armadong pakigbisog sa kaugalingong pagkipot nga misangpot sa konserbatismong militar ug paghugak sa gerilyang inisyatiba.

Malipayon namong gipaambit nga ang pangsulod nga kampanya sa pagtuon ug pagpuna-sa-kaugalingon lig-ong miugat ug padayon nga mikaylap. Apan daghan pa ang kinahanglang buhaton. Anaa pa lamang kita sa mga unang ang-ang. Nagatunhay pa gihapon ang makadaut nga impluwensya sa mga kasaypanan, kahuyangan ug kakulangon sa nangagi. Kinahanglang labaw nga palalumon ang kalihukang pagtul-id aron mahukmanong ibton ang suhetibistang mga gamot sa atong mga kasaypanan ug kahuyangan, aron palig-onon ug pakusgon ang Partido, ug mahukmanong patigbabawan ang dugay nang problema sa pag-uk-uk, ug ipatumaw ang bag-ong rebolusyonaryong pag-abante.

Ang kalihukang pagtul-id ay isang kalihukang pagtuon nga nagtinguhang ipataas ang kakayahan sa mga kadre ug aktibista sa Partido nga gamitin ang siyentipikong teorya ug proletaryong pamaagi sa pag-iisip bilang mga instrumento aron giyahan ug ipataas ang ang-ang sa praktikal nga rebolusyonaryong gimbuhaton. Subling pagpapatibay kini sa paninindigan sa Marxismo-Leninismo-Maoismo, pati nga rin sa mga batakang prinsipyo, pagsusuri ug palisiya sa Partido, ug programa para sa pagsusulong sa nasudnon-demokratikong rebolusyon nga adunay sosyalistang perspektiba.

Ang kasamtangang kalihukang pagtul-id nag-una para tul-iron ug patigbabawan ang mga kahuyangan, kakulangon ug kasaypanan nga naggikan sa empirisismo. Ang empirisismo usa ka dagway sa suhetibismo nga naggikan sa kakulang sa istriktong pagtuon ug aplikasyon sa teorya aron giyahan, sumadahon ug ipataas ang ang-ang sa praktika. Gusto natong sulbaron ang dugay nang problema sa istagnasyon sa lain-laing natad sa rebolusyonaryong gimbuhaton sulod sa halos duha ka dekada, ug pag-atras ug kadaut gikan 2017-2018. Ginahimo kini pinaagi sa pagsumada sa mga kasinatian, pagpuna ug pagpuna-sa-kaugalingon, subay sa mga batakang prinsipyo, palisiya ug programa sa Partido, ug pinaagi sa usa ka kampanya sa katilingbanong pagtuki ug pagkisusi sa hut-ong sa lain-laing ang-ang sa gimbuhaton sa Partido.

Ginaasdang ang kalihukang pagtul-id atubangan sa walay hunong ug brutal nga mapanumpuon kampanya sa kaaway, pareho sa kasyudaran ug kabanikanhan. Pinaagi sa pagpatigbabaw sa mga kasaypanan, kahuyangan ug kakulangon sa mga milabayng tuig, determinado kitang pakyason ang walay hunong nga gubat sa kaaway, bawion ang mga nawala, mokab-ot og bag-ong mga kadaugan ug iasdang ang rebolusyonaryong pagsukol sa katawhang Pilipino.

Ang pagsugod sa kalihukang pagtul-id niadtong milabayng tuig, gidawat sa tanang mga nangulong komite sa Partido. Gipukaw ug gahatagag inspirasyon niini ang mga kadre ug aktibista sa Partido, lakip na usab ang masang rebolusyonaryo. Gihumol niini ang mga lider ug myembro sa Partido sa diwa sa pagpuna-sa-kaugalingon. Determinado silang isugakod ug patigbabawan ang ilang mga kasaypanan, kahuyangan ug kakulangon, aron pakusgon ang Partido ug tabangang pukawon ang katawhan nga mas militanteng mosukol, magrebolusyon ug pakyason ang brutal nga gubat pagpanumpo sa kaaway.

Laraw sa kalihukang pagtul-id nga pandayon ang kalig-on sa ideolohiya ug pulitika sa atong mga kadre. Tungod sa kakulangon sa makanunayong pagtuon sa ideolohiya ug subling pagpalig-on sa proletaryong baruganan, ug atubangan sa brutal nga gubat pagpanumpo ug walay hunong nga mga pag-atake sa kaaway, pipila ka mga kadre ang naparalisa tungod sa kahadlok o sa grabeng pagtinguha og kaharuhay. Apan ang dakung mayorya sa atong mga kadre, nga nagakutlo og kusog sa rebolusyonaryong kawsa labaw sa ilang kaugalingong tinguha, ang determinadong himuon ang gikinahanglang sakripisyo aron siguruhon ang ilang seguridad ug ang tagumpay sa Partido ug sa kalihukang pagtul-id niini.

Subay sa panawagan sa Komite Sentral, gisugdan sa mga komite sa Partido ug mga rebolusyonaryong organisasyong masa ang plano alang sa mga kampanya sa pagtuon sa tibuok tuig. Gipatuman kini nga adunay lain-laing ang-ang sa kalampusan. Ang uban gipahaum ang ilang mga pamaagi subay sa mga obhetibong kahimtang (sama sa staggered nga diskusyon ug mas gagmayng grupo aron mopahaum sa malihukong gerilyang maniobra, pagpahigayon sa mga klase sa gabii aron mopahaum sa pagkabisi sa trabaho sa mga mag-uuma sa araw, mga diskusyong one-on-one sa mga bag-ong rekrut, ug uban pa). Adunay uban nga nagtukod og pormal nga istruktura sa pagtuon ilalum sa Paaralang Jose Maria Sison kung asa ang mga estudyante nagpa-enrol sa mga pormal ug regular nga klase. Kinapadaghan ang libro ug artikulong Marxista-Leninista-Maoista sa pormang papel o digital. Apan adunay pipila nga dili ingon niini ka militante ug mamugnaon, nga nagresulta sa mas ubos nga ang-ang sa kalampusan.

Bag-o lang, nagpagula ang atong Partido og mga artikulong nagtuon sa pipila ka mahinungdanong hisgutanan, lakip ang kasamtangang krisis sa imperyalismo ug mga hulga sa gubat, ang kasamtangang pakigbisog alang sa dugang suhulan, ang “BPO industry” ug ang penomenon sa mga “gig workers,” ug mga tataw nga hisgutanan sa taktika sa pag-asdang sa gerilyang pakiggubat aron pakyason ang walay hunong nga gubat pagpanumpo ug gradual constriction sa kaaway. Kinahanglang magpagawas og mas daghan pang teoretikong pagtuon ug artikulo sa mahinungdanong usaping gikaatubang sa Partido sa matag adlaw.

Ang mga rehiyunal nga komite sa Partido ug uban pang nangunang komite, lakip sa ubang nasud, kusganong naningkamot nga makumpleto o marepaso ang ilang mga dokumento sa pagsumada subay sa kalihukang pagtul-id. Nakumpleto sa pipila ka mga komite ang ilang mga pagsumada sa wala pa ang kalihukang pagtul-id. Ang uban anaa pa proseso sa pagbalik-tuon sa ilang mga dokumento sa pagsumada sa gambalay sa kalihukang pagtul-id aron mapunting ang mga partikular nga manipestasyon sa petiburges nga suhetibismo sa ilang kaugalingong gimbuhaton sa ideolohiya, pulitika, ug organisasyon, isip basihan para sa pagpuna-sa-kaugalingon. Apan kadaghanan sa atong mga nangulong komite anaa pa sa lain-laing ang-ang sa pagkumpleto. Problema sa pipila ka komite ang nawalang mga dokumento o kawalay dokumentasyon sa gimbuhaton sa ilang komite sa mga milabayng tuig, hinungdan nga naglisud ang kasamtangang mga nangulo, ilabina ang mga batang kadre, nga makumpleto ang kaagi sa ilang gimbuhaton.

Sukad sa pagsugod sa tuig, gisugdan sa mga komite sa Partido, mga kadre, ug aktibista ang mga kampanyang SICA (katilingbanong pakisusi ug pagtuki sa hut-ong) matud sa programa ug mga instruksyon sa Komite Sentral. Laraw sa kampanya nga tul-iron ang kanhing kahuyangan sa paghimo sa mga taktika sa pag-organisa ug pagpalihok sa masa nga haum sa mga nagbagong kundisyon, nga nagresulta sa mekanikal ug wala nagaabanteng “gimbuhatong masa” sa nangagi. Uban sa kampanya ang mga pagbansay, subling pagbansay o pagpalapad sa kahibalo sa mga kadre ug aktibista sa syentipikong mga pamaagi sa pag-imbestiga, pagkulekta ug pagkalap og impormasyon gikan sa masa ug uban pa. Ang pipila ka pasiunang paningkamot nagresulta sa mahinungdanong paglambo sa paghimo og estratehiya ug programa sa gimbuhatong masa, ug sa pagpagula sa untop nga mga panawagan alang sa pag-organisa ug pagpalihok sa masa. Ingonman, anaa pa lamang sa sayong yugto ang mayorya sa atong mga komite.

Taliwala sa grabeng krisis sa ekonomiya, abli ang lapad nga masa sa katawhan sa pagdawat sa nasudnon demokratikong propaganda ug pag-organisa. Labaw sa tanan, determinado silang babagan ang korapsyon, pagpangdaugdaug ug mga pabug-at nga palisiya sa pasistang rehimeng US-Marcos, ug ipakigbisog ang ilang mga katilingbanon, ekonomikanhon ug pulitikanhong interes, ilabina atubangan sa nagkagrabeng burukrata-kapitalismo ug pasismo. Aron epektibong mosukol, kinahanglang tukuron, palapdon ug pakusgon ang ilang mga organisasyong masa.

Ginapalihok ang mga kadre ug aktibista sa Partido aron kumprehensibong magpatuman og gimbuhatong masa aron pukawon ang masa, tukuron ang ilang lain-laing porma sa organisasyon, ug palihukon sila sa kumprehensibong pamaagi. Ang mga tim sa gimbuhatong masa o mga tim pangpropaganda ug pang-organisa ginadeploy sa mga pabrika, mga komunidad sa mga kabus sa kasyudaran, mga kampus, lakip na sa mga komunidad sa kabanikanhan. Bisan pa man, daghan pa gihapon ang nahikot sa katapol, sa mga karaang praktika sa gimbuhatong sinilhig, nahikot-sa-upisina, ug paglihok lamang kung adunay aktibidad, kakulang sa mga pultaym nga rebolusyonaryong organisador, kakulang sa katilingbanong pagtuki, kahuyangan sa paglambigit ang labing init nga nasudnong isyu sa mga lokal nga problema sa masa, ingonman sa kapakyas nga ilambigit ang mga lokal nga problema ngadto sa kinatibuk-ang kampanyang masa, ug uban pang mga kakulangon. Nakita usab nato ang mga problema sa “Walang” sektaryanismo sa pagpalihok lamang sa gamayng bahin sa mga aktibong elemento sa masa, ug dili mapalihok ang tunga-tungang elemento aron kabigon ang mas naulahi. Determinado ang mga komite ug kadre sa Partido nga patigbabawan ug sulbaron ang ingon niining mga problema pinaagi sa pagrebyu sa mga batakang prinsipyo sa linyang masa ug pagngulo.

Padayon ang mga paningkamot nga subling tukuron ang mga tago nga rebolusyonaryong organisasyong kaalyado sa National Democratic Front of the Philippines, sama sa mga kabatan-onan, mga mamumuo, mga mag-uuma, mga kababayen-an, mga magtutudlo, mga mamumuong panglawas, ug uban pa. Naggikan kini sa halos hingpit nga pagpasagad sa pagtukod sa tago nga kalihukang rebolusyonaryo tungod sa kasaypanan sa ligalismo ug repormismo. Adunay mga plano ug target alang sa rekrutment, pagtukod og mga bag-ong balangay, pagpasiugda ug pagsuporta sa rebolusyonaryong armadong pakigbisog sa kabanikanhan. Adunay mga paningkamot nga palagsikon ang pagpasampa isip Pulang manggugubat o upisyal sa pulitika sa Bagong Hukbong Bayan. Ingonman, daghan pang kinahanglang himuon aron sulbaron ang hinanaling panginahanglan alang sa mga bag-ong rekrut, ilabina gikan sa mga kabatan-onang mamumuo ug intelektwal.

Sa paglunsad sa kalihukang pagtul-id niadtong milabayng tuig, gihatagag-pagtagad sa liderato sa Partido ang partikular nga problema sa self-constriction (o pagpakipot sa kaugalingon) sa mga yunit sa BHB, nga nagresulta sa pagnipis sa baseng masa sa pipila ka lig-ong mga lugar. Ang dinugay nga pagbase sa bundok sa mga kumpanya ug platun, paglimita sa lugar sa operasyon sa “mga paboritong baryo” ug uban pang mga manipestasyon sa pagpakipot sa kaugalingon nagresulta sa pagkawala sa inisyatiba, sibilyanisasyon ug konserbatismong militar. Dihang gilunsad sa kaaway ang mga estratehikong opensiba niadtong 2017-18, dili lamang pipila ka mga yunit sa BHB ang nahimulag sa pulitikanhong suporta sa masa ug napwersang sa lun-lon militar nga sitwasyon, samtang ang baseng masang mag-uuma gitarget sa grabeng kabangis. Tungod sa maong mga kasaypanan ug kahuyangan, nakasinati og dagkung kadaut ug pag-atras ang BHB sa ilang rehiyon ug mga natarang gerilya.

Sa pipila ka natarang gerilya, ang mga platun ug iskwad sa BHB paspas nga subling nag-organisa ug nagdeploy sigon sa kalihukang pagtul-id ug sa prinsipyo sa lapd ug subsub nga gerilyang pakiggubat subay sa nagkalapad ug nagkalalum nga baseng masa. Mamugnaon ug hanas nga gigamit sa mga platun sa BHB ang pleksibilidad sa dispersal, konsentrasyon ug pagbalhin-balhin ug subling nagpakamaayo sa pinaspas nga paglihok daw sama sa kidlat. Ang kalihukang pagtul-id sa Partido naghatag inspirasyon sa mga Pulang manggugubat sa Bagong Hukbong Bayan nga manglimbasog sa lisud nga dalan sa malungtarong gubat sa katawhan aron subling tukuron ug palapdon ang baseng masa, panalipdan ang katawhan batok sa terorismo sa estado, ipreserba ug pakusgon ang BHB ug pakyason ang estratehikong opensiba sa kaaway.

Padayon nga ginatukod sa Partido ang mga relasyong internasyunal subay sa anti-imperyalismo ug proletaryong internasyunalismo. Mahinungdanong kakatampo ang Partido sa tulo ka teoretikal nga kumperensyang giorganisa sa National Democratic Front of the Philippines (NDFP). Mula Oktubre 2023, gihisgutan sa maong mga kumperensya ang mga topiko sa imperyalismo ug gubat, ang kalibutanong imperyalistang krisis sa ekonomiya, ug ang pakigbisog alang sa nasudnong pagpalingkawas gikan sa imperyalismo. Ang maong mga kumperensya nagsilbing higayon alang sa pagtibuok sa labing suod nga relasyon ug pagsabot tali sa mga rebolusyonaryong partido ug grupo sa mga komunista ug mamumuo.

Sa inisyatiba sa Partido, midaghan sa miaging tuig ang aktibidad alang sa pagpakusog sa proletaryong pakighiusa. Nakapahigayon og mas daghang bilateral nga panag-ambitay ug magkatapo nga pagtuon tali sa Partido ug uban pang proletaryong partido ug grupo. Misalmot kita sa mga kongreso sa ubang partido ug naghatag sa kontribusyon sa lain-laing porum.

Padayon ang mga internasyunal nga kinatawan sa Partido ug NDFP sa aktibong pagpromot sa rebolusyong Pilipino, sa pagpanday sa panaghiusa sa mga anti-imperyalistang partido, ug pagpalambo sa relasyong protodiplomatiko sa mga gubyerno subay sa komun nga tinguha alang sa nasudnon ug katilingbanong paglingkawas.

Ang mga nangulong komite sa Partido sa tanang ang-ang gipon-an sa bag-ong dugo pinaagi sa aktibong promosyon sa batan-ong kadre subay sa ilang maayong rekord ug pagpatuman sa mga tahas. Sa pagkumbina sa batan-on ug mga tigulang, ginasiguro natong ang pangulohan sa Partido adunay kapasidad, enerhiya ug kalagsik, ug kayang abagahon ang malisud nga tahas sa proletaryong pagpangulo sa taas pang panahon. Ang pagbutang sa bag-ong batan-ong kadre sa mga liderato sa lain-laing ang-ang nagduso sa kapanginahanglang isumada ang kasinatian aron ibalhin ang kahanas ug natigum nga kahibalo sa bag-ong henerasyon sa mga lider sa Partido.

Gipangtukod ang mga komiteng pangteritoryo aron ipundar ug palambuon ang kalihukang masa gawas sa langkub ug sa maabot sa hukbong bayan. Sa ingon, masiguro sa Partido ang kapasidad niining pukawon, organisahon ug palihukon ang mga mamumuo, mag-uuma, semi-proletaryado, estudyante ug uban pang sektor sa gawas o daplin sa mga natarang gerilya, ug dili mahikot sa langkub o erya sa operasyon sa mga yunit gerilya sa BHB. Ang maong mga komite nakigtinabangay sa mga komite sa natarang gerilya aron siguruhon ang padayon nga pulitikanhon, materyal ug pang-organisasyong suporta sa hukbong bayan ug alang sa antipyudal ug antipasistang pakigbisog sa masang mag-uuma.

Pinaagi sa kalihukang pagtul-id, ang mga komite sa Partido sa kasamtangan mas igmat sa pagbantay sa liberalismo, ultra-demokrasya ug burukratismo. Ang maong mga kahuyangan nagaguba sa demokratikong sentralismo, ug sa katakus sa Partido nga dungan-dungang magmartsa.

Sa pipila ka bahin sa Partido ug kalihukang rebolusyonaryo, nakita nato ang mga paglapas sa lain-laing palisiya sa organisasyon ug disiplina sa Partido, nga ang pipila gipasagdan sa taas nga panahon, nga miguba sa panaghiusa, nagpapeligro sa seguridad sa mga kadre, ug midaut sa prestihiyo sa Partido. Aron tul-iron kini, subli natong gipagula ug gitin-aw ang mga palisiya. Ang maong mga kalapasan mahukmanong gipuna, gituki ug gitul-id sa pipila ka bahin.

Padayon natong ginapakusog ang sistema sa pagtaho aron tul-iron ang sitwasyon nga ang mga sentro sa Partido buta sa sitwasyon ug paglambo sa rebolusyonaryong gimbuhaton sa nahaubos nga mga komite. Ang atong mga nangulong organo karon relatibong mas nasayod sa sitwasyon sa ubos, maong nakapagula sila og untop nga palisiya, programa, mga pahimangno ug plano. Ingonman, adunay pipila ka nahaubos nga komite ang wala pa nagkapalambo sa praktika ug wala pa nakapadala og regular nga mga taho.

Ang liberalismo ug ultra-demokrasya mga sakit nga nagaguba sa disiplina sa Partido. Taliwala sa kalihukang pagtul-id, padayon nga naapektuhan niini ang ubang bahin sa Partido sa lain-laing porma sama sa turfism (pagkoral sa teritoryo), mentalidad sa gamayng-grupo, walay katapusang debate ug walay kasulbarang mga panaglalis. Sa pikas bahin, aduna pa gihapoy mga problema sa burukratismo, kung asa wala nakahatag og mainantusong pagtagad ang mga nangulong kadre sa Partido sa gikaatubang nga kahimtang sa mga kolektibo ug myembro sa ubos nga mga komite aron tabangan silang sulbaron ang ilang mga problema ug moabante.

Padayon nga ginauk-ok sa liberalismong petiburges ang militansya ug determinasyon sa pipila ka kadre. Adunay pipila ka kadreng nalunod pag-ayo sa daghang problemang personal ug wala nakahatag og tibuok atensyon sa rebolusyonaryong gimbuhaton. Daghan ang apektado pa gihapon sa panghunahunang empleyado, ug nahikot sa ilang mga upisina ug balay, ug wala nakahatag og tibuok panahon sa gimbuhatong pag-organisa sa masa. Adunay pipila ka kadre nga wala pa gihapon nakagawas sa ilang mga “comfort zone.”

Samtang daghan pa angayang buhaton, kanus-aman labawng lig-on ang baruganan sa Partido nga kumprehensibong iasdang ang kalihukang pagtul-id. Pinaagi sa walay-kapuol nga paningkamot sa atong mga proletaryong kadre ug rebolusyonaryong aktibista, sigurado kitang labaw pang molalum ug molapad ang paggamot sa kalihukang pagtul-id. Tungod niini, mas lig-on ug mas kusog nga molambo ang Partido samtang gipangulohan niini sa katawhan sa tumang porsigidong rebolusyonaryong kadasig.

IV. Tumanon ang mga tahas sa kalihukang pagtul-id ug iasdang ang rebolusyon!

Labaw nga paborable karon ang obhetibong kahimtang alang sa pagpaasdang sa demokratikong rebolusyon sa katawhan taliwala sa padayon nga krisis sa kapitalismo sa tibuok kalibutan ug pagtiurok sa semikolonyal ug semipyudal nga kahimtang sa nasud. Anaa sa mga pwersang suhetibo kung paunsa pahimuslan ang sitwasyon aron iasdang ang tinguha sa katawhan alang sa nasudnon ug katilingbanong paglingkawas.

Sa pag-atubang sa kasamtangang sitwasyon, labing gikinahanglan ang tumang paningkamot aron pakusgon ang ideolohiya, pulitika ug organisasyon sa Partido ug sa tanang rebolusyonaryong pwersa. Kinahanglan natong pakusgon ang determinasyon ug kumprehensibong ipataas ang atong katakus nga abagahon ang responsibidad nga pukawon, organisahon ug palihukon ang lapad nga masa sa dalan sa demokratikong rebolusyon sa katawhan ug sosyalistang niini kaugmaon.

Palapdon ug palalumon ang kalihukang pagtul-id! Dugang pakusgon ang Partido!

Ang kalihukang pagtul-id nga gilunsad niadtong milabayng tuig sa Komite Sentral, usa ka internal nga kalihukan sa pagtuon ug pagpuna-sa-kaugalingon nga nagtinguhang tul-iron ang mga kasaypanan ug patigbabawan ang mga kahuyangan ug kakulangon. Naggikan kini sa suhetibismong petiburges, nag-una sa porma sa empirisismo, sa gimbuhaton sa Partido sa ideolohiya, pulitika ug organisasyon.

Kinahanglang palalumon ug palapdon ang kalihukang pagtul-id. Nakita nato sa milabayng tuig nga dili igo nga ideklara ang kalihukang pagtul-id ug magpadayag og suporta dinhi. Tanang komite sa Partido, gikan sa sentro hangtud sa tanang sanga, kinahanglang magpuna-sa-kaugalingon, magtul-id sa mga miaging kasaypanan, hingpit nga gakson sa Marxismo-Leninismo-Maoismo aron i-rebolusyunisa ang ilang panghunahuna ug mga pamaagi sa pagtrabaho, ug tibuok kadasig nga moabante. Atong sukdon ang kadaugan sa kalihukang pagtul-id sa mga konkretong ihap nga nagpakita sa kantitatibong pagdaku ug kalitatibong paglambo sa Partido, sa rebolusyonaryong armadong pakigbisog, sa rebolusyonaryong kalihukang masa ug sa organisadong baseng masa.

Subli natong ginapalig-on ang 8 ka puntong bahin sa kalihukang pagtul-id sama sa atong gigambalay sa pamahayag niadtong milabayng tuig. Kini mao ang: usa ka Marxista-Leninista-Maoistang kampanyang pagtuon, usa ka kampanya alang sa subling pagpalig-on sa konstitusyon ug programa sa Partido, usa ka kampanyang pagtuon sa mga dokumento sa Una ug Ikaduhang Bantugang Kalihukang Pagtul-id, usa ka kampanya sa pagsumada, usa ka kampanya sa katilingbanong pakisusi ug pagtuki sa hut-ong (SICA), usa ka kampanya sa pagpuna ug pagpuna-sa-kaugalingon, usa ka kampanya sa ebalwasyon ug promosyon sa mga kadre, ug usa ka nagapadayong kampanya aron siguruhon ang pagpatuman sa tulo ka ang-ang nga kurso sa edukasyon sa Partido.

Sa pagpalalum sa kalihukang pagtul-id, kinahanglan natong padayon ug madasigong ipatuman ang mga plano sa kampanyang pagtuon, dungan ang napanahong mga pag-ases aron siguruhong paspas ginasulbad ang mga problema. Atong palambuon ang militanteng estilo sa pagkombina sa pagtuon sa teorya ug sa praktika, sama sa pag-abag sa mga petiburges nga intelektwal ug mga mamumuo sa pagtuon sa suhulan o Marxistang pulitikanhong ekonomiya.

Kinahanglang sustenidong tun-an sa tanang kadre sa Partido ang Marxismo-Leninismo-Maoismo. Subli natong iimprinta ug ipakayap ang teksto sa Philippine Selections sa mga piniling yaweng artikulo ni Mao Zedong aron magsilbing rekisito sa pagbasa ug pagtuon sa tanang mga kadre sa Partido. Kinahanglang hatagan og labing importansya sa mga kadre ang pagtuon sa teorya nga nahimong mas kritikal samtang ilang ginaabaga ang mas dagkung praktikal nga gimbuhatong rebolusyonaryo.

Kinahanglang mas hait natong aninagon, ihimulag ug punahon ang pseudo-sosyalismo, anarkismo, radikalismong sa kasarian, ug uban pang mga klase sa petiburges nga rebolusyonismo nga mituhop sa ubang bahin sa Partido. Kini nagresulta og kalibog ug nagpahugak sa paggunit sa pipila ka mahinungdanong hisgutanan. Kinahanglang atong ibutyag ang mga burges ug petiburges nga mga repormistang tendensiya sa mga mamumuo, mag-uuma, intelektwal, ug uban pang mga sektor ug kalihukan, nga nagsulay nga isaag ang masang Pilipino palayo sa dalan sa rebolusyonaryong pakigbisog, ilabina sa armadong pakigbisog.

Kinahanglang mahukmanong kumpletuhon sa Komite Sentral ang pagsumada sa nag-unang panghitabo ug desisyon sa milabayng panahon, aron magsilbing pangkinatibuk-ang giya sa pagsumada sa tanang komite. Dungan niini, ang unang nasulat nga mga dokumento sa pagsumada sa mga nangulong komite (kadtong langkub sa tuig 2010 pataas) kinahanglang subling tun-an gikan sa lente sa kasamtangang kalihukang pagtul-id.

Gawas sa pagtibuok sa mga milabayng panghitabo ug desisyon, ug pagpunting sa atong mga kalig-on ug kahuyangan, kinahanglan usab natong ilhon ang petiburges nga maki-hut-ong nga kinaiya sa atong mga kasaypanan ug kahuyangan, aron mapakusog nato ang proletaryong pagpangulo sa lain-laing natad sa rebolusyonaryong gimbuhaton. Kinahanglang adunay tin-aw nga pagpuna ug pagpuna-sa-kaugalingon ang atong mga kadre ug komite. Ang mga dokumento sa pagsumada angayang diha-dihang tun-an sa mga myembro sa langkub nga teritoryo o linya sa gimbuhaton.

Sa pagpalapad sa kalihukang pagtul-id, tinguha natong siguruhon nga nalangkub niini ang tanang bahin sa Partido ug tanang aspeto sa gimbuhatong rebolusyonaryo. Ang walo ka bahin sa kalihukang pagtul-id kinahanglang kumprehensibong ipatuman. Kinahanglang padayon ang mga paningkamot. Kinahanglang magbantay sa pagpasagad, patigbabawan ang katapol, ug batukan ang pagbalik sa mga karaang praktika.

Padayon natong i-rebolusyunisa ang Partido pinaagi sa proletaryong pagremolda sa mga kadre sa ilang pamaagi sa pagtrabaho ug pagpangulo, lakip na usab sa ilang estilo sa pamuyo. Mahimo kini pinaagi sa pagsiguro nga ang atong mga kadre ug komite hugot nga nakalambigit sa masa sa tanang panahon. Nanawagan kami sa tanang mga kadre ug aktibista sa Partido nga mohaw-as sa ilang mga “comfort zones” ug bug-os nga ihalad ang ilang kaugalingon sa pagpatuman sa mga rebolusyonaryong gimbuhatong gisangon kanila. Kinahanglan natong mahukmanong sawayon ug tul-iron ang mga paglapas sa mga palisiya sa Partido ug siguruhong kanunay taas ang disiplina.

Kinahanglang padayon nga ihikyad sa Partido ang kritikal nga pagtuki niini sa mga tataw nga nasudnon ug internasyunal nga isyu ug panghitabo ug ipataas ang kahibalo ug kahimatngon sa katawhan. Kinahanglang padayon natong imantala ug padaghanon ang mga nakaimprintang kopya sa Ang Bayan ug siguruhong lapad kining naapud-apud sa mga myembro sa tanang sangay sa Partido, lakip sa mga rebolusyonaryong organisasyong masa.

Kinahanglang padayong ipataas ang ginsakpan sa Partido subay sa prinsipyo sa mapangahasong pagpalapad nga walay ginapasulod ni bisan usa ka dautang elemento. Kinahanglang pakusgon ang demokratikong sentralismo ug sistemang komite, nga nagsiguro sa regular nga pagtigum ug kolektibong pagdesisyon. Tanang komite kinahanglang maghimo og regular nga linya sa komunikasyon sa ilang nahitaas nga komite ug magsumite og regular ug untop nga mga taho.

Kinahanglang ipataas ang kapasidad sa mga seksyon ug sangay sa Partido nga tumanon ang mga rebolusyonaryong gimbuhaton sa langkub sa ilang responsibilidad ug pagpangulo. Kinahanglang giyahan ug bansayon sa mga komite sa Partido gikan sa mga distrito pataas, sulod ug gawas sa mga natarang gerilya, ang mga lokal nga kadre sa Partido sa pagpatuman sa ilang gimbuhaton.

Kinahanglang ipabilin ang mga paningkamot sa untop nga pag-ebalwar ug pagpromot sa mga kadre sa Partido sa mga pusisyon sa responsibilidad ug pagpangulo. Kinahanglan kining mahitabp sa mga regular nga kumperensya, o pinaagi sa mga komiteng tigpatuman, tali sa mga kumperensya.

Palalumon ug palapdon ang pag-ugat sa masa ug hugot nga pangulohan ang ilang mga pakigbisog batok sa papet, burukrata-kapitalista, ug pasistang rehimeng Marcos!

Ang rehimeng US-Marcos ang pinakakonsentradong ekspresyon sa mga batakang problema sa imperyalismo, pyudalismo, ug burukrata-kapitalismo. Nakita nato ubos ni Marcos ang walay susamang korapsyon, pasismo, ug pagpakaitoy sa imperyalistang US. Atubangan sa paggrabe sa mga porma sa pagpangdaugdaug ug pagpahimulos, labaw nga determinado ang katawhang Pilipino nga mobarog ug mosukol, ug iasdang ang dagkung anti-pasista, anti-imperyalista, ug anti-pyudal nga pakigbisog sa mga umalabot nga tuig.

Determindo silang mosukol aron bungkagon ang paghari sa pasistang teror sa kabanikanhan, tapuson ang paghari sa balaod militar sa mga komunidad sa kabukiran, ug batukan ang palisiya ni Marcos sa pulitikanhong pagpanumpo ug kabangis sa estado. Kinahanglan iasdang ang pagbatok sa balaod militar pareho sa kabanikanhan diha sa mga baryo ug kasyudaran. Kinahanglang determinadong ipatuman ang usa ka kampanya aron ibutyag ang pasistang terorismo sa kabanikanhan ug aron suportahan ang masang mag-uuma sa ilang pagsukol. Paborable ang mga kundisyon alang sa pagtatukod og usa ka lapad nga anti-pasistang nagkahiusang prente sa han-ay sa lain-laing demokratikong sektor.

Ang nagkagrabeng mga kundisyong sosyo-ekonomiko nagtukmod sa katawhan nga mobarog ug magprotesta batok sa walay hunong nga pagsaka sa presyo sa pagkaon, gasolina, ug uban pang mga batakang palaliton, ingonman batok sa burukrata-kapitalistang korapsyon ilalum sa rehimeng Marcos. Natukmod ang mga mamumuo nga mas pakusgon ang pakigbisog alang sa dugang-suhulan aron mabuhi nga disente ang ilang mga pamilya, alang sa mas maayong kundisyon sa pamuo, ug alang sa pagtapos sa kontraktwalisasyon sa pamuo ug uban pang mga mapahimuslanong iskema sa pamuo. Kinahanglang palanugon ang ilang singgit alang sa ₱1,200 nga nasudnong minimum nga suhulan aron pukawon ang mga mamumuo nga tukuron ang ilang mga unyon, ug iasdang ang kolektibong pakigbisog sa ilang mga pabrika ug komunidad.

Natukmod ang masang mag-uuma nga pakusgon ang ilang pakigbisog batok sa labaw pang liberalisasyon sa importasyon sa bugas ug uban pang pang-agrikulturang igbabaligya. Dungan niini, obligado silang kusganong suklan ang pagsulod sa mga minahan, plantasyon ug uban pang operasyong nagailog sa yuta ug nagaguba sa kinaiyahan (ilabina atubangan sa ginaduso nga balaod nga magpalanat ngadto sa 99 ka tuig sa pag-abang sa mga langyawng kapitalista sa yuta), ug ang militarisasyon sa ilang mga komunidad. Ang mga katalagman sa klima nagtukmod sa masang Pilipino nga ipanghingusog ang bayad-danyos sa pagkawala sa ilang kabtangan ug panginabuhian. Kinahanglang pakusgon sa masang mag-uuma ang ilang mga organisasyon ug asosasyon ug maisugong mobarog aron panalipdan ang ilang mga kinabuhi ug panginabuhian.

Gisagubang sa katawhang Pilipino ang panginahanglang pakusgon ang pipila ka kampanya batok sa mga base militar sa US ug interbensyon militar sa US, ug batukan ang pagpakaitoy sa rehimeng Marcos sa imperyalismong US, nga nagbutang sa nasud sa nagkadakung hulga nga masambod sa inter-imperyalistang gubat. Kinahanglan natong ilunsad ang usa ka sustenidong kampanya aron ibutyag ang mga iskema sa US aron ipahamtang ang kusog militar niini sa Pilipinas, ug kung paunsa kini nakasumpay sa nagkakusog nga inter-imperyalistang bangi ug mga pakana sa US nga ipahamtang ang hegemonya niini sa lain-laing bahin sa kalibutan. Kinahanglan natong padilaabon ang patriyotismo sa mga Pilipino ug ilambigit ang ilang mga pakigbisog sa mga anti-imperyalistang pakigbisog sa mga katawhan sa tibuok kalibutan.

Katungdanan sa Partido nga pangulohan ang lapad nga masa sa katawhang Pilipino sa ilang mga ekonomikanhon ug pulitikanhong pakigbisog pinaagi sa mas lalum ug mas lapad nga paggamot sa masa. Aron mapatuman kini, kinahanglan natong ipataas ang katakus sa Partido nga dinaghang pukawon, organisahon, ug palihukon ang lapad nga masa. Kinahanglang ipataas nato ang ilang katilingbanon ug pulitikanhong kahimatngon pinaagi sa paglambigit sa nagdilaab nga isyu ngadto sa ilang mga lokal nga problema, ug pagpataas sa ilang mga lokal nga isyu ug pakigbisog sa mga batakang problema sa katawhang Pilipino ug sa panginahanglang maglunsad og kolektibong pakigbisog.

Kinahanglan natong andamon ang kundisyon alang sa demokratikong pagsalmot sa masa sa mga diskusyon ug pagdesisyon, aron maawhag silang molihok. Kinahanglang paningkamutan natong ikumbina ang pinasilhig nga propaganda ug pag-organisa, sa solido ug pursigidong gimbuhatong masa. Kinahanglang patigbabawan ang milabayng mga kahuyangan sa gimbuhatong propaganda nga lunlon pinasilhig, ug ginahimo lamang sa mga aktibidad, nakasentro sa isyu ug nakahikot sa mga upisina. Kinahanglan natong magpalutaw og mas daghang kadreng pultaym sa gimbuhatong masa, nga magkumbina sa mas dakung ihap sa mga aktibista sa mga tim pangpropaganda ug pang-organisa. Kinahanglang ipatuman ang SICA nga adunay tin-aw nga tinguhang tibuukon ang usa ka plano alang sa pag-organisa ug pagpalihok sa masa subay ilang mga hinanaling mga ekonomikanhon ug katilingbanong pangayo.

Tukuron ug pakusgon ang lain-laing porma sa nasudnon-demokratikong organisasyong masa aron konsolidahon ang relatibong aktibo o nag-unang elemento sa han-ay sa masa. Kinahanglan kining ikumbina sa pagtukod sa mas lapad nga mga kutay o organisasyong nakabasi sa isyu, aron abton ug palihukon ang mga hatungang elemento, nga silang makatabang sa pagkabig sa relatibong naulahing bahin sa masa. Kinahanglang gamitin nato ang mamugnaong mga taktika aron lutsan ug pakyason ang reaksyunaryong paniniktik ug mga palisiyang malupigon.

Kinahanglang makugihon natong tukuron o subling tukuron ang kalihukang tago ug ang mga rebolusyonaryong organisasyong masa sa kasyudaran ug kabanikanhan. Ginakonsolida sa mga organisasyong masa nga alyado sa National Democratic Front of the Philippines (NDFP) ang pinakaabanteng seksyon sa masa. Kini ang andam nga atabay sa mga bag-ong rekrut sa Partido. Kinahanglang palapdon ang kalihukang tago aron motabang sa pagtago ug paghatag-seguridad sa mga nag-unang kadre ug organisador sa Partido. Kinahanglan usab niining himuon ang lapad nga rebolusyonaryong propaganda aron mapakaylap ang panawagan alang sa gubat sa katawhan ug pukawon ang katawhan nga mosuporta ug mosampa sa Bagong Hukbong Bayan.

Kinahanglang epektibong ideploy sa Bagong Hukbong Bayan ang mga iskwad ug tim niini aron magpahigayon og gimbuhatong masa ug siguruhon ang padayon nga paglambo sa baseng masa. Aron palalumon ang koneksyon niini sa masa, ang mga yunit sa BHB sa gimbuhatong masa kinahanglang makahatag og mga serbisyong ekonomikanhon, panglawas ug edukasyon sa masang mag-uuma, samtang ginagiyahan sila sa pagpaasdang sa ilang mga antipyudal pakigbisog.

Moangot sa pagpaasdang sa demokratikong rebolusyon sa katawhan!

Kinahanglang maamguhan sa katawhang Pilipino nga ang bugtong pamaagi sa paghaw-as sa krisis sa semikolonyal ug semipyudal nga sistema mao ang pagpaasdang sa demokratikong rebolusyon sa katawhan aron ibagsak ang imperyalismong US ug ang maki-hut-ong nga paghari sa dagkung burgesya-kumprador ug dagkung agalong yutaan, pinaagi sa ilang estadong burukrata-kapitalista ug pasista.

Subling gipalig-on sa Partido, ang abanteng destakamento sa proletaryong Pilipino, ang katungdanan niining pangulohan ang katawhang Pilipino sa paglunsad sa demokratikong rebolusyon sa katawhan pinaagi sa malungtarong gubat sa katawhan subay sa estratehikong linya sa pagliyok sa kasyudaran gikan sa kabanikanhan. Aron iasdang ang rebolusyon, kinahanglan natong padayong pakusgon ang Partido, ang Bagong Hukbong Bayan ug ang National Democratic Front.

Samtang ginapangulohan ang masa sa mga pakigbisog sa ekonomiya ug pulitika batok sa rehimeng US-Marcos, kinahanglan natong iasdang ang rebolusyonaryong armadong pakigbisog, isip nag-unang porma sa pakigbisog.

Pinaagi sa pagtul-id sa mga kasaypanan, kahuyangan ug kakulangon sa nangagi, laraw natong palig-onon ang Bagong Hukbong Bayan, bawion ang mga nawala, ug pakyason ang estratehikong opensiba sa kaaway. Kinahanglang tin-aw ang pagsabot sa tanang kadre sa Partido ug mga kumander ug manggugubat sa BHB sa diyalektika sa malungtarong gubat sa katawhan, kung paunsa kini milambo sa posibleng mga yugto sa estratehikong depensiba, estratehikong pagkapatas ug estratehikong opensiba.

Pinaagi sa pag-asdang sa gerilyang pakiggubat sulod sa taas nga panahon, ang Bagong Hukbong Bayan makaabante gikan sa gamay ug huyang ngadto sa daku ug kusog, pinaagi sa bahin-bahin nga pagpukan sa kaaway. Bisan pa man, ang mga kasaypanan ug kakulangon sama sa ahat nga regularisasyon ug abenturismong militar, ug pagpakipot sa kaugalingon ug konserbatismong militar, posibleng mapwersa ang BHB nga mobalik sa kanhing ang-ang. Sa tibuok panahon sa estratehikong depensa, naglunsad ang BHB og malangkubon ug subsub nga gerilyang pakiggubat sa subay nagkalapad ug nagkalalum nga baseng masa.

Sa tin-aw nga pagsabot sa kasamtangang balanse sa mga pwersa ug ang-ang sa gubat sa katawhan, ang mga yunit sa BHB subling giorganisa ug gideploy aron mas epektibong maggimbuhatong masa sa tinguhang bawion ug palapdon ang baseng masa ug maglunsad sa gerilyang pakiggubat batok sa kaaway. Ang mga Pulang manggugubat sa BHB kinahanglang padayon nga magpakahanas sa mga taktikang gerilya sa konsentrasyon, dispersal ug pagbalhin-balhin aron pakyason ang estratehiyang “gradual constriction” sa kaaway ug nakapokus ug makanunayong mga operasyong militar.

Kinahanglang sakmiton sa tanang platung gerilya ug mga iskwad sa BHB, uban ang mga yunit sa milisya ug mga kwerpong depensa-sa-kaugalingon ang inisyatiba nga maglunsad og mga taktikal nga opensiba ug mopili og mga target nga pwede nilang mapukan. Sa matag higayon, kinahanglan nilang hampakon ang daghang huyang nga bahin sa kaaway. Dili kulang ang magamit nga armas, gikan sa kusog nga riple o mga ginamang pusil, bomba, granada, molotov, pana, bangkaw, lit-ag o tirador. Kinahanglang planuhan nila ang pagsakmit og armas gikan sa kaaway aron armasan ang bag-ong mga Pulang manggugubat sa BHB.

Ang matag daku o gamayng taktikal nga opensiba nga himuon sa kada yunit gerilya sa BHB subay sa ilang kapasidad usa ka dili kabayrang tampo sa pakigbisog sa katawhang Pilipino batok sa papet ug pasistang rehimeng Marcos. Inspirasyon kini sa katawhang Pilipino sa paglunsad nila sa tanang porma sa pagsukol ingonman sa ilang pagbaktas sa dalan sa rebolusyonaryong armadong pakigbisog.

Inspirasyon usab sila sa tanang dinaugdaug nga hut-ong ug katawhan sa tibuok kalibutan, nga sama nila nakigbisog alang sa nasudnon ug katilingbanong paglingkawas. Ang pagpaasdang sa nasudnon-demokratikong rebolusyonaryong pakigbisog sa Pilipinas ang pinakadakung kontribusyon sa katawhang Pilipino sa kalibutanong pakigbisog batok sa imperyalismo ug pagsukol sa mga imperyalistang gubat.

Masaligon kita nga pinaagi sa pagpalalum ug pagpalapad sa kalihukang pagtul-id, mapanday nato ang usa ka mas lig-on ug mas gamhanang Partido Komunista ng Pilipinas, ug mapangulohan ang demokratikong rebolusyon sa katawhan ngadto sa mas dagkung kadaugan sa mga umalabot nga tuig.

Iasdang ang kalihukang pagtul-id!

Ibayaw ang bandera sa Marxismo-Leninismo-Maoismo!

Mabuhi ang katawhang Pilipino!

Mabuhi ang kalibutanong proletaryo!

Mabuhi ang Partido Komunista ng Pilipinas!