DOWNLOADBayat a nangato nga itagtag-ay ti Nalabbaga a bandera ti Marxismo-Leninismo-Maoismo ken napigpigsa ti determinasyon na nga idauluan ti nailyan-demokratiko a rebolusyon ti umili a Pilipino, idandanon ti Komite Sentral ti Communist Party of the Philippines ti nabara a kablaaw iti amin a kadre ken aktibista ti Partido, dagiti Nalabbaga a mannakigubat ti New People’s Army, dagiti alyado iti National Democratic Front ken nalawa a masa ti umili a Pilipino iti okasyon ti maika-56 anibersaryo ti pannakaibangon ti Partido.

Iti daytoy nga okasyon, umaw-awag kami iti intero a Partido ken amin a rebolusyonaryo a pwersa a:

Paunegen ken palawaen ti tignay panagilinteg! Ad-adda pay a papigsaen ti Partido! Naun-uneg a rumamut iti masa ken idauluan ti panaglaban da iti pasista ken burukrata-kapitalista a rehimen US-Marcos! Agpinget iti panangiyabante demokratiko a rebolusyon ti umili!

Ita nga aldaw, padpadayawan mi ni Ka Jose Maria Sison, dadaulo a nangbuangay ti Komite Sentral, a nangsurat kadagiti teoretikal a babasaen nga agtultuloy a mangmangted silaw iti rebolusyonaryo a dana ti umili a Pilipino. Agnanayon a lagipen ti baro a henerasyon dagiti kadre ti Partido ken mannakigubat ken pagadawan ti inspirasyon ti intero a biag ti komunista a dedikasyon ni Ka Joma iti proletaryado ken iti amin a maidadanes ken dagiti magungundawayan a dasig.

Padpadayawan mi ti amin a banwar ken martir ti umili a Pilipino a sipupudno a nagidaton ti biag da para iti nailyan-demokratiko a tarigagay ti umili a Pilipino. It-ited mi ti naisangsangayan a panangbigbig iti amin a lider ti Partido ken dagiti Nalabbaga a mannakigubat ti New People’s Army a naidasay iti panangiyabante ti gubat ti umili ken pananglaban iti pasista a rehimen US-Marcos iti napalabas a tawen. Ti nagnagan da ket agnanayon a nakaimaldit iti pakasaritaan ti rebolusyon a Pilipino.

Iti okasyon ti anibersaryo ti Partido, idandanon mi met ti militante a rebolusyonaryo a kablaaw iti amin nga anti-imperyalista, progresibo ken dagiti demokratiko a partido, organisasyon ken sangalubongan a tignay a lumablaban iti imperyalista a US ken makidangdangadang kadagiti imperyalista a gera. Idandanon mi ti kablaaw ti pannakikabsat iti amin a rebolusyonaryo a komunista nga agad-adal, mangitantandudo ken mangipakpakat ti Marxismo-Leninismo iti pagpagilyan da, ken mangidadaulo kadagiti mangmangged ken umili iti dangadang da para iti nailyan a wayawaya ken sosyalismo.

Laglagipen tayo ti maika-56 nga anibersaryo ti Partido a natadem a makaawat nu kasano a ti napaspas a kumarkaro nga internasyunal ken lokal a krisis iti ekonomya ken pulitika ket mangparparnuay kadagiti kundisyon a paborable iti panangisayangkat ti rebolusyonaryo a dangadang.

Ti sangalubongan a sistema a kapitalista ket agtultuloy nga aggalgalad iti panagbuntog ti ekonomya, nasaknap a disempleyo ken dumakdakkel a pangta ti istagplasyon ken resesyon. Paypaypayan ken durdurogan ti imperyalista a US dagiti armado a risiris iti Europe, Middle East ken Asia. Lablabanan dagiti mangmangged ken umili dagiti imperyalista a gera, gubat a proxy, pasista a panangidadanes, panagkissay ti pondo iti serbisyo publiko, ngumatngato a presyo ken mapappapigsa ti boses da para iti nangatngato a sweldo ken dadduma pay a kadagusan a demokratiko a kadawatan.

Ti agar-ari a sistema iti Pilipinas ket natatek ti krisis iti ekonomya ken pulitika. Ti sosyo-ekonomiko a kasasaad ti manopulo a milyon a Pilipino ket agsusuwek gapu iti awan-sarday a panagtennag ti lokal nga ekonomya a nakasanggir-iti-import ken nakaturong-iti-eksport. Ti tuloy-tuloy a panagkapsut ti lokal a produksyon iti agrikultura ken industriya ket agresresulta iti ngumatngato a disempleyo ken nasaknap a dislokasyon iti ekonomya. Iti bangir na, ti gangannaet a kapitalista a ganansya ken kinabaknang ti lokal nga oligarkiya ket agtultuloy a dumakdakkel manipud iti panaggundaway kadagiti mangmangged ken natural a kinabaknang, ken manipud iti pangpubliko a panaggastos ken ayuda a pinondoan ti utang. Kimmaro ti korapsyon ken pulitikal a panagikuspil iti sidong ti burukrata-kapitalista ken pasista a rehimen ni Marcos. Ti agar-ari a sistema ket natatek ti agtultuloy a kumarkaro a krisis iti pulitika. Ti panagpakpakaaso-aso ti rehimen Marcos iti heopulitikal nga interes ti US ket mangguyguyod iti pagilyan iti allawig ti inter-imperyalista a gera.

Ti kumarkaro a krisis iti ekonomya ken pulitika ti agar-ari a sistema iti sidong ti rehimen Marcos ket agtultuloy a mangidurduron iti umili a Pilipino nga agtignay ken mangisayangkat ti kolektibo a dangadang tapno ilaban dagiti madagdagus a kadawatan da. Mangparparnuay daytoy ti ad-adda a paborable a kundisyon tapno ti Partido ket rumamut iti masa a naun-uneg ken nalaplapad tano maidauluan isuda iti dangadang da laban iti rehimen US-Marcos.

I. Iti tengnga ti kapitalista nga istagnasyon, paypaypayan ti imperyalismo dagiti gera ken durdurogan na ti panaglaban

Ti kapitalista a lubong ket pangpang-uren dagiti risiris nga agtataud kadagiti kontradiksyon iti baet ti monopolyo a burgesya ken proletaryado, iti baet ti imperyalismo ken umili dagiti maidadanes a pagilyan, iti baet ti imperyalismo ken dagiti pagilyan a mangipagpaganetget ti nailyan a soberanya, ken iti baet ti aglalaban nga imperyalista a bileg. Iti agdama, ti napaspas a kumarkaro nga inter-imperyalista a susik ti mangbukbukel ti kangrunaan a kontradiksyon a mangmulmuli iti agdama a sangalubongan a sitwasyon, bayat a ti imperyalismo a US ket mangsugsugsog ken mangidurduron kadagiti gera iti nadumaduma a paset ti lubong.

Ti kapitalista a sistema ket agtultuloy nga agir-irig gapu iti sobra a produksyon dagiti mayor a tagilako, nu sadinno a ti tuloy-tuloy a nalablabes a kapasidad ket agigabgabsuon ti saan a mailako nga imbentaryo dagiti produkto a manupaktura (kabilang dagiti pangkonsumo nga elektroniks, dagiti alikamen a pangbalay, kotse, makinarya, landok ken materyales iti konstruksyon) ken produkto a pang-agrikultura (soy beans, trigo, mais ken dadduma pay). Agresresulta daytoy iti nakaro a kapitalista a kompetisyon tapno agawen ti kontrol kadagiti merkado, kasta met ti pagtataudan ti naata a materyales tapno maibaba ti gastos iti panagpartuat iti ad-adu a tagilako. Ti ibungbunga daytoy a pannakabangkarote, panagtipon ken panaggatang ket dumandanon iti ad-adda a konsentrasyon ti kapital iti ima ti sumagmamano a monopolyo.

Ti sangalubongan a kapitalismo ket agtaltalinaed a natatek ti krisis iti ekonomya ken pinansya . Nasurok maysa ket kagudwa a dekada daytoyen a nakasubsob iti istagnasyon ti nabuntog a panaglangto, nu sadinno nga ad-adu kadagiti nangnangruna a kapitalista a pagilyan ti kanayon nga adda iti ngarab ti resesyon. Napaay ti “panagballatek” kalpasan ti pandemya tapno agsubli ti sigud a tukad ti produksyon. Ti sangalubongan a panaglangto ti ekonomya ket saan a manamnama a lumabes iti 3% tatta ken iti sumaruno a tawen, Napaspas a madaddadael ken marunrunot dagiti produktibo a pwersa iti tengnga dagiti panagserra ken panagikkat. Agsagsagaba dagiti mangmangged ken masa nga anakling-et iti bumagbagsak nga ekonomya bayat a ti kadadakkelan a kapitalista a bilyunaryo ket agtultuloy nga agak-akop ti kinabaknang. Ti umun-uneg a limitasyon ti dasig a mangmangged iti kabaelan da a gumatang ket agparpartuat ti sullat iti panagkonsumo relatibo iti produksyon. Ti ayos ti sinnukatan ket disdistorboen ti lumanglangto a proteksyunismo ken heyopulitikal a tensyon ken mangparparnuay kadagiti lapped iti merkado a mangpakpakaro laeng iti nalabes a produksyon.

Kas ti dati, ti kabuklan a demand ket idurduron ti utang ken saan a ngumatngato a sweldo ken kabaelan a gumatang ti dasig a mangmangged. Ti sangalubongan nga utang ket bimmussog agturong ti $322.9 trilyon, a ngimmato iti umuna a tallo a kwarto ti 2024. Kabatog daytoy ti 326% ti sangalubongan a gross domestic product (GDP). Ti dakkel a paset ti gangannaet nga utang idi 2024 ket napan iti panangpondo kadagiti proyekto nga imprastruktura a nangted-dalan iti panagserrek dagiti multinasyunal a kumpanya, kabilang ti ipakpakete da tatta iti sidong ti aw-awaganda a “green economy” (solar, dagiti proyekto a nukleyar kdpy). Idi 2023, ti kabuklan a $1.4 trilyon ket napan iti panagbayad ti gangannaet nga utang. Nasurok 35 pagilyan ti pilpilayen ti utang ken adda iti peligro a saan a makabayad. Mangpatpataud ti ispekulatibo a labutab kadagiti stock, real estate, ken uray kadagiti cryptocurrency dagiti mapabpabussog a sektor ti pinansya.

Ti ekonomya ti US ket agtaltalinaed nga adda iti istagnasyon nu sadinno a ti panaglangto na ket manamnama a dumanon laeng iti 2.7% tatta a tawen. Bakbaklayen na ti $35.5 trilyon nga utang a 123% ti kabuklan a kadakkel ti ekonomya na. Segun kadagiti upisyal nga estadistika, adda 16 milyon nga Amerikano a mangmangged ti awanan wenno agkurang ti trabaho, ngem segun iti independyente a panagtaya ket adda iti 110 milyon ti awanan trabaho. Bayat nga agtultuloy nga agak-akop ti kinabaknang ti 20 a bilyonaryo nga Amerikano nga agig-iggem ti $2.7 trilyon, mapatta-patta a 43 milyon nga Amerikano ket agbibiag iti kinarigat, agsagsagaba iti kumarkaro a sosyo-ekonomiko a kasasaad iti tengnga ti ngumatngato nga implasyon, dumakdakkel nga utang ti umili, nababa a sweldo, panagngato ti bilang dagiti awanan pagtaengan, ken kinaawan ti akses iti pangpubliko a panangtagiben ti salun-at. Ti ekonomya ti US ket temporaryo a matultulungan ti panagkugtar ti merkado iti pinansya ken stock iti US gapu iti serrek ti sangalubongan a kwarta nga agbirbirok ti natalged a pangidepositoan, ngem delikado a bumtakan ti krisis iti pinansya.

Dagiti kadakkelan nga ekonomya iti Europe ket sumangsango met ti istagnasyon. Kalpasan a ti UK ket nagkaruskos iti resesyon idi napalabas a tawen, ti ekonomya na ket manamnama a lumangto iti saan a lumbes iti 1% ita a tawen. Manamnama nga umakikid ti ekonomya ti Germany ti 0.2% ita a tawen manipud iti 0.3% a panagbaba idi napalabas a tawen, gapu iti nakapsut a demand para iti produkto a manupaktura. Iti sango ti awan kapada a pangpubliko a depisito, ti ekonomya ti France ket manamnama a lumangto iti saan a lumbes iti 1.1% ita a tawen, ken 0.9% iti sumaruno a tawen. Sangsangwen dagiti mangmangged ken umili ti Europe ti kinaawan kasiguraduan iti trabaho, dumakdakes a kasasaad iti panagbiag, kundisyon iti trabaho, panagirot ti sinturon, nga agresresulta iti bumasbassit nga akses iti serbisyo iti gimong, ken kurang a sweldo a saan a kabaelan a gumiddan iti ngumatngato a gatad ti panagbiag.

Ti ekonomya ti Japan ket agtaltalinaed nga adda iti napaut nga istagnasyon. Mapatta-patta a lumangto daytoy iti nababbaba pay iti 1% ita a tawen. Daytoy ket pilpilayen ti $8.6 trilyon nga utang a nasurok 250% ti ekonomya na. Ti ekonomya ti China ket manamnama a lumangto iti saan a sumurok iti 5% tatta 2024, nabunbuntog kumpara iti napalabas a tawen ken kabuntogan manipud dekada 1990. Gungungonen daytoy ti krisis iti real estate iti tengnga ti sobra a suplay ti pabalay, bimmassit a panagpuonan ken utang a saan a mabaybayadan dagiti bumalay ken bimmuntog a lokal a panaggastos iti konsumo. Iti tengnga ti kabuklan a panagbuntog ti sangalubongan nga ekonomya, ti China ket agsapsapul kadagiti pamuspusan tapno paregtaen ti ekonomya na iti sango ti nalabes a produksyon a natural iti kapitalismo nu sadinno a labes iti kabaelan dagiti produktibo a pwersa nga agpartuat kadagiti tagilako ngem iti kabaelan nga ikonsumo ti merkado. Sumangsangon daytoy kadagiti kontradiksyon a natural iti dana ti panagdur-as ti kapitalismo.

Ti dakkel a mayorya dagiti pagilyan iti Asia, Africa ken Latin America ket agtaltalinaed nga atrasado ken agraryo, ken agserserbi a para-eksport ti naata a materyales, wenno kas para-suplay ti nalaka a pigsa’t tegged para kadagiti korporasyon a multinasyunal. Ti sangalubongan a kapitalista nga istagnasyon ket nagresulta iti nababbaba a demand para iti nalaka nga eksport, ken nagpabuntog iti gangannaet a panagpuonan iti panagmanupaktura nga assembly-line. Nalabes isuda a parparigaten ti ngumatngato a depisito iti sinnukatan ken tukad ti utang. Agsagsagaba ti mayorya nga umili iti kumarkaro a sosyo-ekonomiko a kasasaad, a pakaitampokan ti kinarigat, panagbisin, kinakuneng, malnutrisyon, saksakit, ken dagiti nakaro nga epekto dagiti didigra nga ituntunda ti panagbaliw iti klima, a bunga ti mano a tawen nga imperyalista a panaggamrud kadagiti pagilyan da.

Pakpakaruen ti sangalubongan a kapitalista nga istagnasyon dagiti risiris iti ekonomya ken pulitika iti baet ti dagiti mayor nga imperyalista a bileg. Bayat nga agtultuloy nga idurduron ti US dagiti neoliberal a patakaran tapno luktan ti ekonomya dagiti malakolonya ken dagiti kapitalista a pagilyan a kabalubal na, agipatpatungpal daytoy ti umad-ado a proteksyunista nga addang iti napalabas a maysa ket gudwa a dekada, iti gandat a balbaliw a paregtaen ti lokal a produksyon nga industriyal.

Ti gubyerno ti US iti sidong ni Biden ket nagibuyat ti dandani $40 bilyon tapno suportaran ti produksyon ti semikonduktor nga addaan panggep a kontrolen ti 30% ti sangalubongan a suplay, ken direkta a batogan ti Taiwan ken Japan. Inngato daytoy ti tantos ti taripa iti nadumaduma a tipo dagiti produkto nga ang-angkatenna manipud iti China. Nayon na, nagipataw daytoy ti panagirut iti ekonomya ken pinansya iti Russia, nga addaan partikular a panggep a kissayan ti eksport a langis ken natural a gas ti Russia idiay Europe. Ti sumrek a presidente ti US a ni Trump ket nagdeklaran kadagiti plano tapno ad-adda pay nga ingato ti taripa ti China, kasta met iti ang-angkaten na a produkto manipud iti Mexico ken Canada.

Ti duron ti US para kadagiti proteksyunista nga addang ket binatoganen dagiti kontra-addang dagiti imperyalista a kalaban na. Iti inisyatiba ti Russia ken China, ti BRICS (Brazil, Russia, India, China ken South Africa) ket napalawa itay nabiit tapno sakupen ti uppat pay a pagilyan (Egypt, Ethiopia, Iran ken United Arab Emirates), malaksid pay iti indeklara da a plano nga agnayon ti 13 a “kabinnadang” a pagilyan. Adda met dagiti gaed a padur-asen ti alternatibo a sistema iti pinansya kas ti inisyatiba a BRICS cross-border payment (sistema ti binnayadan dagiti pagilyan), kwarta a digital dagiti bangko sentral, ken dadduma pay a sistema tapno paregtaen ti linnakuan a saan a nakagalut iti dolyar ti US, a mangkiskissay iti bulnerabilidad dagitoy iti panangliplipit ti US.

Ti agbalbalin a nainget a kumpetisyon iti ekonomya nga agtataud iti gandat ti monopolyo a burgesya ti US a lapdan ti estratehiko a panagbagsak daytoy ket dimmanonen iti uming-inget a risiris-militar. Iti amin nga imperyalista a bileg, ti imperyalista a US ti kakaruan a managgubat, bayat a gangandaten na a dungparen dagiti karibal na iti gagem a balbaliw nga itakder ti bagbagi na kas kaykaysuna a superpower. Iti agdama, umun-una daytoy iti panangilako kadagiti gera iti intero a lubong. Aktibo a sungsungrodan ken durduroganna dagiti gera nga addaan panggep a rabsuten na dagiti estratehiko a rekurso manipud iti kontrol dagiti kalaban na. Ti panagsubli ni Donald Trump kas pangulo ti US ket nagpabwelo iti panagtaud dagiti grupo a neopasista iti US. Ti agresibo a panangiduron na kadagiti proteksyunista a patakaran iti US ket ad-adda a mangsungrod iti inter-imperyalista a binnusor, agpada iti China ken Russia, kasta met kadagiti tradisyunal nga alyado ti US.

Iti panangarmas iti Ukraine ken panangipusisyon kadagiti armas asideg iti daya a beddeng ti pagilyan iti Russia, nagballigi ti US a durogan ti Russia, nga umatake idi 2022. Manipud idi ket inikkan na ti Ukraine ti nasurok $115 bilyon iti langa ti ayuda, a nasurok kagudwa ket iti porma ti armas tapno pabayagen ti gera iti panggep a gasgasen ti Russia. Tapno ad-adda pay a pakaruen ti gera, “pinalubosan” itay nabiit ti US ti Ukraine a mangpabulos kadagiti misayl a mid-range agturong iti Russia, a binatogan ti Russia ti kaunaan a panagaramat kadagiti hypersonic a misayl.

Agtultuloy a supsuportaran ti US ti gera a henosidyo ti Zionista nga Israel laban iti umili a Palestino iti Gaza a pimmatayen ti nasurok 45,000, kabilang ti 17,000 nga ubbing, ken nangdunor iti dumanon iti 110,000 katao. Inikkan ti US ti Israel ti dandani $18 bilyon nga ayuda a militar, kabilang dagiti bomba ken misayl nga inaramat ti Israel laban iti Iran idi Oktubre, ken laban iti Lebanon idi Nobyembre a pimmatay iti 3,800 katao ken nangdunor iti dandani 16,000. Nakikunsabos ti US iti Israel, Turkey, UK ken kadagiti pwersa iti NATO tapno iduron ti panangpadisi iti presidente ti Syria a ni Bashar al-Assad (a nangpalubos iti Russia a mangpatalinaed ti base militar) ken panangpabagsak iti gubyerno a Syrian. Manipud idi, sinuportaran ti imperyalista a US ti panagsakop ti Israel iti Golan Heights, panagisayangkat ti airstrike ken panagabante agturong iti sentro ti Syria bayat nga idurduronna ti dakdakkel a kontrol ken impluwensya iti panangbukel ti baro a gubyerno.

Bayat a paypaypayanna dagiti gera iti Ukraine ken iti Middle East, dagiti pwersa a militar ti US iti ballasiw-taaw ket agturturong kangrunaan iti aw-awagan daytoy a rehiyon nga Indo-Pacific, umannurot iti “pivot to Asia,” nga addaan prinsipal a panggep a palikmutan ken ikahon ti China ken puntiryaen ti Democratic People’s Republic of Korea (DPRK). Agtultuloy a patpatibken na dagiti base militar iti Japan ken South Korea, kasta met iti Pilipinas. Induron na ti Japan a nayunan ti gastos iti militar ken palawaen dagiti pwersa a militar na tapno gumiddan kadagiti pwersa militar ti US. Ar-aramaten na ti Pilipinas kas base dagiti operasyon na South China Sea iti panggep a pabaraen ti binnusor iti China.

Agtultuloy met nga isaysayangkat ti US ti interbensyon iti pulitika ken militar laban kadagiti pagilyan a mangiruprupir ti nailyan a soberanya. Inyaramid na ti amin a porma ti panagpabagsak laban kadagiti gubyerno iti Venezuela, Cuba ken daddumapay a pagilyan iti Latin America. Punpuntiryaen na met ti Iran, a natibker a tumaktakder laban iti interbensyon ti US iti Middle East.

Ti imperyalista a krisis ken dagiti gera ket mangparparnuay kadagiti dangadang ti masa ken amin a porma ti panaglaban. Maibangbangon dagiti nalapad nga alyansa iti baet dagiti tignay anti-imperyalista ti umili, kasta met dagiti gubyerno a sumupsupyat iti interbensyunismo ti US. Pinangiggeman ti Venezuela ti inisyatiba iti panangitakder ti maysa nga anti-pasista a nagkaykaysa a prente laban iti imperyalismo a US.

Bimtak dagiti mayor a dangadang ti mangmangged iti US ken dadduma pay a mayor a kapitalista a pagilyan tapno ipaganetget ti nangatngato a sweldo ken dagiti naur-urnos a kundisyon iti tegged, kabilang ti welga ti 50,000 mangmangged iti sangladan iti US idi Oktubre, ken ti 33,000 mangmangged iti kumpanya a Boeing. Ginasut a ribo a mangmangged ti nagwelga idiay France kas protesta iti panagkissay ti badyet iti serbisyo publiko ken para iti nangatngato a sweldo. Mayor a welga ti mangmangged met ti naisayangkat idiay Belgium, Finland, Italy, Spain, The Netherlands, Cyprus ken dadduma pay a pagilyan. Dadakkel a protesta ti mangmangged met ti naiyaramid idiay South Korea tapno ipanawagan ti panangpadisi iti nagtugaw a presidente. Mayor nga aksyon protesta met ti agtultuloy a maisaysayangkat iti intero a lubong tapno iduron ti pananggibus ti panag-eksport ti US ti armas idiay Israel ken ipanawagan ti panagsardeng ti Zionista a henosidyo kadagiti Palestino. Iti tengnga ti nasaknap a protesta ti mangmangged, dagiti kundisyon ket ad-adda nga agbalbalin a paborable, nangruna kadagiti kapitalista a pagilyan, tapno tumaud dagiti militante nga alyansa ken konseho dagiti mangmangged tapno agserbi a nalawa a nagkaykaysa a prente iti ilablabanda a kadawatan iti ekonomya ken pulitika.

Iti mayorya dagiti pagilyan iti intero a lubong nga agtaltalinaed a malakolonyal ken malapyudal a kasasaad, ti nalawa a masa ti mangmangged ken mannalon, malaproletaryado ken petiburgesya ken dadduma pay a maidadanes a dasig ken sektor ket agisaysayangkat kadagiti militante a dangadang tapno ilaban dagiti karbengan da iti ekonomya ken pulitika ken laban kadagiti aso-aso ken korap a gubyerno. Isaysayangkat da ti amin a langa ti panaglaban tapno iyabante dagiti tarigagay da para iti nailyan a wayawaya, partikular manipud iti imperyalista a dominasyon ti US.

Agtultuloy a lumawlawa dagiti tignay ken organisasyon ti panagkikinnabsat dagiti umili. Uman-ani da kadagiti mayor a balligi iti panangipatungpal kadagiti resolusyon ti International People’s Tribunal kanaig kadagiti internasyunal a makatao a linteg, karaman ti kasasaad ti Palestine. Maimatmatangan daytoy iti agsasaruno a sangalubongan nga asembliya nga awan makaartap iti kadakkel ken kalawa.

Dagiti dangadang para iti nailyan a wayawaya dagiti maidadanes a dasig ken umili kadagiti pagilyan a malakolonyal ken malapyudal ket kagiddan ti dangadang dagiti gubyerno a mangsalsalaknib iti nailyan a soberanya da ken lumablaban iti agresyon, interbensyon ken subersyon ti imperyalista a US.

Agtultuloy met a mangiyab-abante ti armado a panaglaban dagiti umili iti aglikmot ti lubong a makidangdangadang para iti nailyan a wayawaya. Dagiti pwersa a rebolusyonaryo iti Palestine ket agtaltalinaed a natibker iti armado a dangadang da laban iti panagsakop ti Israel iti daga da. Ti umili a Kurdish ket agisaysayangkat met ti armado a panaglaban da tapno itakder ti maysa nga agwaywayas a pagilyan. Agtultuloy a lumablaban dagiti etniko a minorya a grupo ken dagiti hukbo da iti pasista a rehimen a Tatmadaw iti Myanmar. Agtultuloy a maisaysayangkat ti rebolusyonaryo nga armado a dangadang idiay India tapno labanan ti brutal a gera ti pasista a rehimen a Modi. Agtultuloy met nga idadauluan dagiti partido komunista ti armado a panaglaban idiay Turkey, Colombia, iti Pilipinas ken dadduma pay a pagilyan.

II. Kumarkaro a kasasaad iti ekonomya, ad-adda pay a pannakarunot ti nailyan a soberanya ken uming-inget a pasista a panangikuspil iti sidong ti rehimen US-Marcos

Agtultuloy a kumarkaro ti agnanayon a krisis iti Pilipinas, a mangpakpakaro iti sosyo-ekonomiko a kasasaad ti nalawa a masa ti umili a Pilipino. Ti agbugbugsot a malakolonyal ken malapyudal a moda ti produksyon ket pakaitampokan ti pannakadadael dagiti produktibo a pwersa ken panagkaro dagiti kadadaksan nga aspeto daytoy.

Adda ti nasaknap a pannakadadael dagiti lokal a produktibo a pwersa nga agtentennag iti panagbuntog ti produksyon (agpada iti panagmanupaktura ken agrikultura). Agbungbunga daytoy ti nasaknap a disempleyo, nakarkaro a panagsanggir iti imported a tagilako para iti konsumo ken panagtayok ti presyo.

Agtaltalinaed nga atrasado ken agraryo ti lokal a produksyon. Awan dagiti basaran nga industriya a mabalin a gumiddan iti panaglangto ken panaglawa ti ekonomya. Dagiti lokal a produktibo a pwersa ket dinadael ti deka-dekada a liberalisasyon iti importasyon ken panagsukat ti usar ti daga, nangruna ti lokal a produksyon iti agrikultura. Ti produktibidad iti agrikultura ket bimmagsak iti napalabas a tallo a tawen a nagresulta iti istorikal a depisito iti linnakuan iti agrikultura, kumarkaro a panagsanggir iti importasyon ti taraon, ken matentennag a pagbiagan ti masa a mannalon. Ti paset ti ekonomiya a sektor ti panagmanupaktura nga industriyal ket natennag iti kababaan a tukad manipud 1949. Iti laksid daytoy, agtultuloy ken awan-sarday ti panagipatungpal ni Marcos kadagiti neoliberal a patakaran a mangpakpakaro iti panagsanggir ti pagilyan iti import, nangpalawa kadagiti pribilehiyo ken insentibo dagiti multinasyunal a korporasyon, ken ad-adda a nangpakapsut iti lokal a produksyon.

Dagitoy ket nagresulta iti nangangato a presyo, nababa a sweldo ken pannakapukaw ti pagbiagan ti minilyon a masa nga anakling-et. Ti agnanayon a depisito iti linnakuan ti pagilyan ket kangatuan iti pakasaritaan. Gapu ta ti industriya a pang-eksport ti pagilyan ket awanan kabaelan a makapagpastrek ti gangannaet a kwarta, palalo a nakasanggir ti ekonomya iti gangannaet a remitans ken gangannaet a pautang tapno pondoan dagiti import. Ti kabuklan a gangannaet nga utang ti pagilyan ket dimmakkel agturong iti $139.6 bilyon iti naudi a rekord idi Setyembre 2024—kabatog ti 31% ti gross domestic product (GDP) a kangatuan iti dandani 15 tawen—nu sadinno $86.9 bilyon ti gangannaet nga utang pangpubliko.

Iti sidong ni Marcos, agtultuloy a tumaytayok ti utang ti nailyan a gubyerno, dimmanon iti nasurok ₱16 trilyon idi Oktubre 2024, wenno nangato a lagto a ₱3.2 trilyon wenno 25%, uray saan pay a gumudwa ti innem a tawen a termino na. Ti panagngato ket kangrunaan nga agserserbi iti panagpalawa dagiti operasyon dagiti dadakkel a burges kumprador ken panagbayad iti gangannet ken lokal nga utang. Ti kabuklan a binulan nga utang ti gubyerno a Marcos a ₱204 bilyon ket dakdakkel iti pinagtipon a binulan a panagutang iti sidong ti rehimen Duterte (₱131 bilyon) ken Aquino (₱61.5 bilyon). Tuluy-tuloy a ngumatngato ti balor ti awtomatiko nga ibaybayad iti utang. Ti bayad iti interes pay laeng ket ngimmato iti 22% manipud ₱628.3 bilyon idi 2023 agturong iti ₱763.4 bilyon daytoy 2024. Nakaituding daytoy a balbaliw a ngumato iti 11% agturong iti ₱848 bilyon iti 2025. Nu pinagtipon, iti interes ken prinsipal ket ad-adda a ngumatngato ken dumakdakkel manipud ₱1.57 trilyon idi 2023, agturong ti ₱2.03 trilyon tatta 2024 ken mapatta-patta a ₱2.05 trilyon iti 2025.

Ti sangalubongan nga istagnasyon iti ekonomya ket nagresulta iti panagbuntog ti lokal nga ekonomya, partikular iti panag-asembol ken semi-processing. Iti tengnga ti sobra a suplay iti sangalubongan, ti eksport ti semikonduktor ket manamnama nga umakikid iti saan a bumaba iti 10%, nga agibunga ti panagserra wenno panagikkat (kadagiti mangmangged) kadagiti lokal nga empresa iti panag-asembol. Adda ti kapada a panagikkat kadagiti empresa nga agar-aramid ti tela, wiring ken dadduma pay a produkto a pang-eksport.

Kangatuan pay laeng iti pakasaritaan ti bilang dagiti Pilipino nga awanan trabaho. Makalkaluban laeng daytoy babaen ti manipulasyon iti estadistika dagiti ahensya ti gubyerno. Palalo da a benbennaten dagiti kategorya nga “addaan trabaho” tapno ibilang da uray ti dandani tallo a milyon nga awanan sweldo a mangmangged iti negosyo ti pamilya, kasta met ti manopulo a milyon nga agpidpidot ti basura, dagiti aglaklako, babassit nga opereytor iti transportasyon, agtagikua kadagiti sari-sari store, agtagibalay, dagiti Youtuber ken Tiktoker ken dadduma pay nga impormal a trabaho. Kinapudno na, adu kadakuada ket awanan trabaho a sumsumrek iti anyaman a pagsapulan uray nababa, saan a sigurado ken tukad-kinarigat ken awanan benepisyo ken proteksyon pangkagimongan. Tapno kaluban ti kinakaro ti disempleyo, pabpabassiten met dagiti eksperto iti estadistika ti estado ti “labor force participation rate” wenno tantos ti makipaspaset a pigsa’t tegged tapno ikkaten ti minilyon a Pilipino iti maibilbilang nga awanan trabaho.

Partikular a nakaro ti kinaawan empleyo iti intar ti kabataan, kabilang dagiti nakaturpos nga awanan mabirukan a trabaho iti linya ti nagadalan da. Ti nakadakdakkel a reserba a hukbo ti tegged ket agseseksek iti nailyan a kabisera ken dadduma pay a mayor a syudad. Agtultuloy a ngumatngato ti kinaawan panggedan iti kaaw-awayan iti sango ti panagkamkam ti daga ken panangagaw ti pagbiagan ti minilyon a mannalon. Bunga daytoy, 7,500 mangmangged ti pimmanaw iti pagilyan iti pay laeng umuna a siyam a bulan ti 2024, gapu iti kinaawan ti naan-anay a trabaho iti pagilyan. Maiyul-ulat a dandani 11 milyon ti Pilipino a mangmangged iti ballasiw-taaw, kabilang ti agarup innem a milyon a migrante a dokumentado ken saan a dokumentado.

Agsusuwek ti pagrukodan iti panagbiag ti nalawa a masa ti umili iti sidong ti rehimen Marcos iti tengnga ti tuluy-tuloy a panagngato iti presyo ti taraon, petrolyo, kuryente, danum ken dadduma pay a pangpubliko a serbisyo ken yutiliti. Iti partikular, kanayon a nangato ti implasyon iti taraon duron ti presyo ti bagas a kontrolado dagiti burges kumprador a kartel ken ismagler iti pannakikumplot dagiti upisyal ti gubyerno. Agtultuloy a dumakdakkel ti baet ti tangdan ken sweldo dagiti mangmangged ken kadawyan nga empleyado iti gatad ti inaldaw a pagkasapulan ti lima-katao a pamilya. Iti desperasyon a “makaguyugoy” ti gangannaet a kapital, patakaran ti rehimen Marcos nga ilansa ti sweldo.

Dagiti upisyal ni Marcos ket agiruruar ti palalo a pinababa a datos iti panangpatta-patta iti kinakurapay babaen ti nababa a saan a nakapapati a pagrukodan ti kinarigat. Ipangpangas ti rehimen ti panaglangto ti ekonomya a kano ket kapaspasan iti rehiyon ken asidegen a madanon ti pagilyan ti istatus a nangato-nga-akintengnga a sapul. Ti agpayso, ti napaspas a dumakdakkel ket ti bilang ti nakurapay ken mabisbisinan a Pilipino. Manipud idi nagtugaw iti poder ni Marcos, ti bilang ti nakurapay a pamilya a Pilipino ket dimmakkel iti 50% (adda iti uppat a milyon) manipud walo agturong ti nasurok 12 milyon. Ti bilang ti mabisbisinan a pamilya ket dimmakkel iti 120% (3.4 milyon) manipud 2.9 milyon agturong ti nasurok innem a milyon. Iti panagtayok dagiti presyo ken panagsuwek ti kabaelan da a gumatang, dimmakkel ti bilang dagiti pamilya nga awanan ti urnong iti 1.5 milyon agturong iti nasurok 20 milyon. Nasurok 75% dagiti Pilipino ket nakurapay ken agsagsagaba, a kinumpirma uray dagiti panagadal ti bangko sentral.

Bayat nga agsagsagaba ti dakkel a mayorya ti umili a Pilipino iti kumarkaro a kundisyon iti panagbiag, kinaawan trabaho ken pannakapukaw ti pagbiagan, agpappapas met iti kinabaknang ken pribilehiyo dagiti Marcos ken dagiti agar-ari a dasig. Gasgastosen ni Marcos ti pondo ti publiko para iti masansan a panagbyahe iti sabali a pagilyan, panagtayab usar dagiti upisyal a helikopter para iti personal a byahe tapno lumiklik iti nakaro a trapik, panangiyaramid kadagiti padaya ken pribado a konsyerto iti palasyo ti presidente, ken panangpabus-oy iti bagbagi ken ti pamilya na iti maysa a mala-resort a balay iti Malacañang.

Agdadata nga ar-aramaten ti rehimen Marcos ti pribilehiyo na iti pulitika tapno subboten ti binilyon a piso nga iligal a kinabaknang a kinamkam ti diktadura a Marcos Sr iti unos ti 14 tawen (1972-1986) a sinikwester dagiti napalabas a rehimen. Manipud nagtugaw iti poder idi 2022, agsasaruno nga inbasura dagiti lokal a korte ti saan a bumaba iti walo a kaso ti korapsyon ken tinakaw a kinabaknang laban iti pamilya a Marcos, a pakaibilangan ti saan a bumaba iti ₱352 bilyon. Kabilang kadagitoy a kaso ti pondo a coco levy a tinakaw da Marcos, Juan Ponce Enrile ken Eduardo Conjuangco manipud kadagiti mannalon tapno gumatang kadagiti stock, kumpanya, bangko ken agpautang kadagiti kroni.

Kontrolado ni Marcos ti target a ₱500 bilyon a pondo ti publiko a Maharlika Fund, nu sadinno a ₱75 bilyonen ti naiyakar, a libre nga ited nan iti pabpaboranna a pribado a negosyo ken dagiti proyekto nga imprastruktura a gargarantiyaan ti gubyerno. Iti badyet ti rehimen tatta 2025, saan a bumaba iti ₱1.5 trilyon ti nakailatang iti panagitakder wenno panagpalawa kadagiti kalsada ken rangtay a natatek iti kurakot. Nakissayan ti badyet ti edukasyon, salun-at, iti porma ti pagparparangenda a kwarta a pang-subsidyo ken ayuda. Nagilatang ni Marcos ti ₱4.5 bilyon iti bukod a confidential and intelligence funds.

Ti kumarkaro a krisis ti agar-ari a sistema ket agtultuloy a mangpatpatadem iti krisis iti pulitika iti sidong ti rehimen Marcos. Ti bumasbassit a rekurso iti ekonomya a mapagbibingayan dagiti agar-ari a dasig ket mangidurduron kadagiti agar-ari a burukrata kapitalista nga agbalin a narawrawet ken managgartem iti pribilehiyo ken kinabaknang. Agiinnagaw da kadagiti kontrata iti gubyerno tapno maala ti bingay da iti pasuksok. Ar-aramatenda ti bileg ken pribilehiyo ti gubyerno tapno paboran dagiti kroni da iti negosyo ken loyalista iti pulitika.

Ti risiris dagiti Marcos ken Duterte, a mangibagbagi iti dua a kangrunaan a paksyon ti agdama nga agar-ari a bunggoy nga agin-innagaw iti pribilehiyo iti ekonomya ken bileg iti pulitika, ket tumadtadem bayat nga umadani ti eleksyon a midterm iti 2025, a maibilbilang a napateg a panagsagana para iti eleksyon a presidensyal inton 2028. Inrekomenda ti House of Representatives a dominado dagiti Marcos nga idarum ni Duterte kadagiti krimen na iti sangkatao-an, kas kadagiti inyuli dagiti biktima ti ekstra-hudisyal a pammapatay iti International Criminal Court (ICC). Kasta met a saan a bumaba iti tallo a reklamo ti impeachment ti naiyuli laban iti anak ni Duterte, ni Sara, bise presidente ken dati a sekretarya iti edukasyon, gapu iti naanomalya a panagusar iti nasurok ₱500 milyon a “confidential funds,” malaksid pay iti adu nga isyu. Gapu ta saanna a sigurado ti kinapudno ti armado a hukbo ken sakupen ti nabatbati nga impluwensya dagiti Duterte iti militar, itantantan ni Marcos ti panangpadisi ken Sara Duterte, ken panangusig ken panangaresto ti ICC ken Rodrigo Duterte.

Agtultuloy nga ipakpakita ti aso-aso a rehimen Marcos ti agdadata a panagkurkurno na iti amo na nga imperyalista a US. Palpalubosan na ti US a patibkeren ti takder militar iti Pilipinas, tapno agipakita ken agpalawa ti bileg militar ti US iti rehiyon Asia-Pacific. Nagpirma ti rehimen Marcos ken dagiti upisyal iti depensa ken militar ti US ti Bilateral Security Guidelines ken Security Sector Assistance Roadmap, nga ad-adda a mangigalgalut iti Pilipinas iti heopulitikal nga interes iti militar ti US. Nagpirma met isuna iti maysa a deklarasyon karaman ti US ken Japan tapno mangbukel ti trilateral nga alyansa a nalawag nga agserserbi iti “Indo-Pacific Strategy” ti Pentagon.

Iti sidong ni Marcos, dimmakkel ti bilang dagiti base ken pasilidad militar ti US manipud uppat agturong ti 20, kabilang dagiti upisyal a mabigbig iti sidong ti Enhanced Defense Cooperation Agreement (EDCA), karamanen dagiti lugar nga ilimlimed da iti publiko. Ti iskema ti US ket aramaten ti pagilyan kas pagrubwatan dagiti operasyon militar ken nabal iti rehiyon a nakatutok laban iti China ken iti DPRK. Pagtaltalinaeden na met ti dakkel a bulto dagiti pwersa a militar iti Japan, South Korea ken Australia, bayat a saan a bumaba iti tallo a carrier strike group ti tuloy-tuloy a mangsugsugod iti kabaybayan iti aglawlaw ti China. Agisaysayangkat ti US ti gistay inaldaw a panagsanay iti gera iti pagilyan. Ti Balikatan Exercises idi Abril ti kadakkelan iti pakasaritaan a dinar-ayan ti nasurok 11,000 a soldado nga Amerikano.

Patpatarayen ti militar ti US ti sentro ti kumand na idiay Palawan, kasta met iti kangrunaan a detatsment ti Armed Forces of the Philippines (AFP), tapno idauluan ken ikoordina dagiti operasyon a nabal ken pwersa a coast guard ti Pilipinas ken US kabilang dagiti “supply mission” iti Ayungin Shoal, “freedom of navigation” ken dadduma pay nga operasyon iti South China Sea nga addaan panggep nga ipakita ti bileg militar ti US. Dagitoy nga operasyon ket mangparparnuay ken mangpangpangato ti tensyon iti China ken maar-aramid kagiddan ti kampanya tapno paypayan ti Sinophobia kadagiti Pilipino. Sinungbatan ti China dagitoy iti ad-adda pay nga agresibo nga operasyon a nabal ken pangbaybay a lumablabsing iti eksklusibo a karbengan iti ekonomya ti Pilipinas iti West Philippine Sea, gapu na nga ad-adda a rumigrigat ti natalna a dayalogo ken resolusyon kadagiti susik iti kabaybayan iti baet ti Pilipinas ken China.

Iti mandar ti US, agtultuloy nga idurduron ti rehimen Marcos ti “modernisasyon” ti AFP tapno aramiden daytoy nga “interoperable” wenno nalaklaka a kontrolen a nayon a pwersa ti US. Iti sidong ti “foreign military financing” (FMF wenno gangannaet a panangpondo iti militar) ti US, “maiyak-akar” dagiti nagpalusan a ramit panggubat iti militar ti Pilipinas. Iti sidong ti FMF, nagkari ti US ti $500 milyon iti Pilipinas tatta 2024, ken nangilungalong ti $2.5 bilyon a pakete para iti 2025-2029.

Iggem ti suporta a militar ken pinansya ti US, pinainget ti rehimen Marcos ti pulitikal a panagipawil ken ti gera a panagikuspil a mangpunpuntirya iti umili a Pilipino ken dagiti organisado a pwersa da a patriyotiko ken demokratiko. Kagiddan daytoy, agisaysayangkat daytoy ti todo-todo a kampanya iti disimpormasyon ken gera a sikolohikal, iti paulit-ulit a panagideklara a dagiti prubinsya iti intero a pagilyan ket “insurgency-free” wenno awanen ti armado a panaglaban, a panglinged iti nadamsak a panaglabsing iti karbengan-tao ken internasyunal a makatao a linteg.

Paulit-ulit nga indeklara ti AFP ti plano daytoy a panagkambyo manipud iti “internal a depensa” agturong iti “eksternal a depensa” ken panagipatungpal ti “integrated territorial defense system” nga addaan galad ti panagpalawa ken panagpapigsa kadagiti yunit paramilitar (CAFGU) daytoy. Dagitoy a deklarasyon iti publiko ket panangisigurado iti imperyalista nga amo ni Marcos a ti gubyerno na ket nakasagana a mangituding ti ad-adu a pwersa a militar tapno suportaran ti pwersa a militar ti US kadagiti operasyon na iti South China Sea iti panawen nga uminget ti inter-imperyalista nga armado a binnusor wenno agdadata a gera.

Iti pannakaiduyos na iti panangrebbek iti armado ken saan nga armado a panaglaban ti umili tapno ikkaten dagiti lapped iti burukrata-kapitalista, pasista ken aso-aso a rehimen na, ar-aramaten ni Marcos ti karanggasan ken awan-ressat a pamuspusan ti panangipawil iti umili. Minandaran na ti AFP nga agipataw ti linteg militar iti rinibo a barangay ken komunidad iti nadara a taktika ti pasista a panangikuspil idi panawen ti diktadura ti tiraniko nga ama na a kagurgura ti umili.

Iti linged dagiti “community support program,” agipakpakat ti AFP kadagiti pangkat dagiti soldado a pangkombat tapno agitakder kadagiti baraks ken detatsment iti uneg dagiti komunidad iti igid ti kabalbalayan dagiti sibilyan, kaniwas iti internasyunal a makatao a linteg. Ipatpataw da ti turay da ken agisaksaknap ti alyaw iti umili. Ipaspasidong da dagiti komunidad iti mala-garison wenno mala-hamlet a kontrol. Liplipiten dagiti pasista ti karbengan ti umili a nawaya a makagaraw wenno agbyahe babaen kadagiti logbook, panagblokeyo iti taraon ken komersyo, karpyu ken anya pay dita nga arbitraryo a patakaran. Kabilang kadagitoy ti panangiparit kadagiti mannalon nga agtrabaho kadagiti taltalon iti naikeddeng nga oras, a mangperperdi iti pagbiagan da. Dagitoy a soldado ket agpospostura nga ukom, hurado ken berdugo iti panangbirngas kadagiti sibilyan kas “tagasuporta” wenno “rebelde” ken panangiduron kadakuada a “dalusan” ti nagnaganda wenno “sumuko” iti militar, ruar kadagiti proseso a ligal segun iti bukod da a linteg, kagiddan dagiti panagpangta ti ekstra-hudisyal a pammapatay wenno tortyur.

Dagitoy a pasista ket bin-ig a kagurgura ti umili. Promotor da iti panagusar ti maiparparit a droga, pornograpiya, prostitusyon ken dadduma pay nga anti-sosyal a bisyo kadagiti agtutubo iti gandat da nga iddipen ti tarigagay da iti hustisya iti gimong. Rirriribuken da ti talna kadagiti komunidad iti rinabii a panagiinom ken dursok a panagpappaputok ti paltog dagiti nabartek a soldado. Dagitoy a soldado ket karaman iti umad-ado a bilang dagiti kaso a sekswal a panagharas, panagmolestiya ken panagrames kadagiti babbai.

Agtultuloy nga umad-ado dagiti masaker, ekstra-hudisyal a pammapatay, tortyur, panagdukot, iligal a panag-aresto ken dadduma pay a krimen nga aramid dagiti soldado. Tapno ikalintegan dagitoy a krimen, ti AFP ket agiruruar kadagiti palso a pablaak a dagiti biktima da ket Nalabbaga a mannakigubat a napatay iti engkwentro, uray nu dagitoy ket agdadata a panpaneknekan dagiti lokal a residente a saan a pudno. Adda dagiti kaso ti pammapatay kadagiti natataengan, dagiti sibubukel a pamilya, masikog ken ubbing. Kadadaksan dagiti kaso ti pulitikal a panagikuspil, panaglabsing iti karbengan-tao ken dagiti krimen laban iti makatao a linteg kadagiti lugar nu sadinno a maar-aramat dagiti militar tapno pagtalawen dagiti umili manipud iti daga da ken pawilan ti panagsupyat da iti panagserrek ti dadakkel a kumpanya iti minas ken plantasyon, dagiti proyekto nga enerhiya ken eko-turismo ken dadduma pay.

Kapada a taktika ti pulitikal a panagikuspil ti us-usaren dagiti pwersa a militar ken pulis tapno pawilan ti dangadang ti umili ladagiti syudad. Agipakpakat da kadagiti pangkat ti soldado ken ahente kadagiti komunidad dagiti nakurapay iti syudad tapno ipasidong ti umili iti panag-espiya, panagharas, “panagpasuko” ken dadduma pay nga operasyon ti “panagpabaliktad,” panag-aresto, panagdukot ken pammapatay. Kakumplot dagiti kapitalista, itudtudo dagiti ahente a militar dagiti lider ken organisador ti unyon ken “bisbisitaenda” isuda kadagiti balbalayda tapno kigtoten isuda ken dagiti pamilya da ken piliten a sumardeng iti trabaho da iti panag-organisa. Punpuntiryaen met dagiti pwersa a militar ken ahente iti paniktik dagiti estudyante, babbai, tao ti simbaan, mangmangged iti salun-at ken dadduma pay a sektor. Iti linged ti “panaglaban iti naranggas nga ekstrimismo,” agisaysayangkat ti AFP, kadwa na ti National Task Force (NTF)-Elcac ken dadduma pay a reaksyunaryo nga ahensya ti estado, ti kampanya ti anti-komunista a panagkamat, a lumablabsing kadagiti karbengan nga agorganisa iti umili ken agipablaak kadagiti arungaing da.

Saan a magungon ti umili a Pilipino iti sango dagiti dumakdakes a langa ti panangidadanes ken pananggundaway ken pasista nga atake. Determinado ti nalawa a masa ti umili nga ilaban dagiti karbenganda, madagdagus a kadawatan ken mataginayon a tartarigagay. Agtultuloy nga agor-organisa ken agisaysayangkat da ti militante a dangadang.

Insayangkat dagiti drayber ken opereytor ti dyip dagiti militante nga aksyon protesta laban iti plano ti rehimen Marcos nga i-phase out dagiti dyip a mangipaidam iti pagbiagan ti manopulo a ribo nga umili. Mapaliiw tayo ti nakadkadlaw a panagregta ti aktibidad dagiti mangmangged iti panagbukel kadagiti unyon ken panagiduron ti kadawatan para iti nayon a sweldo. Agtultuloy a maiyab-abante ti sumagmamano a lokal a dangadang ti mannalon laban iti gandat dagiti apo’t daga ken dadakkel a burges kumprador a kamkamen ti daga da. Pappapigsaen dagiti oranisasyon masa dagiti boses da tapno ipanawagan ti nababbaba a presyo ti bagas, petrolyo, kuryente ken dadduma pay. Dagiti migrante a mangmangged, manipud Europe agingga Middle East,manipud kadagiti marino agingga kadagiti agtagibalay, ket aktibo nga agpappapigsa kadagiti organisasyon da ken militante nga iyab-abante da dagiti kadawatan da.

Napasamak dagiti aksyon protesta laban iti panagsanay militar ti US iti Pilipinas, laban kadagiti base militar ti US, ken interbensyon militar iti South China Sea. Naisayangkat met dagit protesta kas pannakikaykaysa iti umili a Palestino laban iti henosidyo ti US-Israel iti Gaza.

Ti kadawatan para iti kumpensasyon iti pannakapaay ti estado a siguraduen ti kinatalged ti umili ket inpanawagan dagiti biktima kadagiti kalamidad itay nabiit. Binabalaw da ti patakaran ti panangitandudo iti panagminas ken dadduma pay nga aktibidad a managdadael iti law-ang.

Agtultuloy a pumigpigsa ti panawagan tapno ruk-atan dagiti balud-pulitikal, panangiparang kadagiti biktima ti inkapilitan a panagpukaw, ken hustisya iti amin a biktima ti panaglabsing iti karbengan-tao. Adda met dita ti pumigpigsa a kadawatan iti rehimen Marcos a makitinnulong iti International Criminal Court para iti panag-aresto ken panangusig ken Rodrigo Duterte kadagiti krimen laban iti sangkatao-an. Adda met dagiti panawagan para iti impeachment ni Sara Duterte bilang bise presidente, bayat a babbabalawen da met ti korapsyon ti rehimen Marcos.

Bayat a maisaysayangkat dagiti aksyon protesta laban iti panagpakaaso-aso, korapsyon, pasismo ken dagiti kontra-umili a patakaran ti rehimen Marcos, nagpataray dagiti ligal a nailyan-demokratiko nga organisasyon ti masa, alyansa ken partido pulitikal ti 11-katao a kandidato ti kinasenador, nayon iti grupo a party-list a tumartaray para kadagiti pwesto iti kongreso. Aktibo da nga itantandudo ti nailyan-demokratiko a programa, kagiddan ti programa para kadagiti madagdagus a reporma, nga agpangpanggep nga ikkan gin-awa ti masa nga agsagsagaba iti nasaknap a disempleyo ken nauneg a kinarigat. Irakrakurak ken karkaritenda ti reaksyunaryo nga eleksyon tapno riingen ti ad-adu a bilang ti umili, tapno allukoyen isuda nga agbotos para kadagiti kandidato da, ken nangruna a napateg, tapno agitakder kadagiti baro a balangay ken agrekrut kadagiti baro a kameng, para iti dakdakkel a dangadang ti masa iti masangwanan.

Ti naanus ken napinget a panangriing, panang-organisa ken panangpatignay iti umili ket sigurado nga agibunga ti natibker a panagmartsa paabante ti demokratiko a tignay masa iti sumungad a tawen. Determinado ti umili a mangbuangay, mangpapigsa ken mangpalawa kadagiti unyon da ken amin a tipo ti organisasyon ti masa tapno ad-adda nga epektibo a mailaban da dagiti interes da iti ekonomya ken pulitika, ken iyabante ti tarigagay ti nailyan demokrasya.

Ti umad-adalem a naindasigan a kontradiksyon ken ti uming-inget a krisis iti ekonomya ken pulitika ti agar-ari a sistema ket mangpatpataud kadagiti paborable a kundisyon iti ekonomya ken pulitika tapno ad-adda a palawaen ken papigsaen ti Partido Komunista ng Pilipinas. Naipabaklay kadagiti kadre ken kameng ti Partido ti responsibilidad nga agsalukag tapno naun-uneg ken nalawa a rumamut iti masa, tapno riingen ken idauluan isuda iti dana ti demokratiko a rebolusyon ti umili.

III. Natibker a rumamramut ti tignay panagilinteg, ngem adu pay ti kasapulan nga aramiden

Ti Communist Party of the Philippines ket abante a destakamento ti proletaryado a Pilipino. Ipakpakat na ti kabuklan a teorya ti Marxismo-Leninismo-Maoismo, ti ideolohiya ti dasig a mangmangged, iti kongkreto a kundisyon ti gimong a Pilipinas, a salsallukoban ti imperyalismo a US, ken adda iti naindasigan a panagari ti dadakkel a burgesya ken dadakkel nga apo’t daga. Indatag ti Partido ti programa para iti demokratiko a rebolusyon ti umili kas solusyon ti tuloy-tuloy a krisis ti malakolonyal ken malapyudal a sistema, tapno pagkaykaysaen dagiti patriyotiko ken demokratiko a dasig dagiti mangmangged, mannalon, malaproletaryado, babassit a burgesya ken nailyan a burgesya.

Naitakder ti Partido idi Disyembre 26, 1968, ken manipud idi ket nangidaulo iti umili a Pilipino iti panangiyabante iti nailyan-demokratiko a rebolusyon. Daytoy ket maysa nga organisasyon nga addaan nangato a disiplina umannurot kadagiti prinsipyo ti demokratiko a sentralismo. Bukbuklen daytoy dagiti proletaryado a kadre ken aktibista a nauneg ken nalawa a nakaramut iti masa. Mangidadaulo daytoy kadagiti rebolusyonaryo nga organisasyon ken dangadang ti masa dagiti mangmangged, mannalon ken dadduma pay a demokratiko a dasig ken sektor. Mangidadaulo daytoy iti New People’s Army iti panangiyabante iti naunday a gubat ti umili umannurot iti estratehiko a linya ti panangkubkob iti kasyudadan manipud iti kaaw-awayan. Inbangon daytoy ti National Democratic Front kas pinakakonsolidado a bugas ti nagkaykaysa a prente.

Ar-aramaten ti Partido ti panagdillaw ken panagdillaw-iti-bagi tapno masigurado a ti rebolusyonaryo a praktika ket uman-annurot iti linya ti Marxismo-Leninismo-Maoismo ken kadagiti basaran a prinsipyo ken patakaran na. Tuluy-tuloy a lablabanan na dagiti ideya a burges ken petiburges nga agipagpaganetget ti impluwensya manipud iti ruar ken iti uneg na. Nasken a pana-panawen nga isayangkat ti Partido dagiti kampanya iti panagilinteg, kabuklan man wenno partikular, kas pamuspusan ti panangilinteg kadagiti kamali kadagiti patakaran ken praktika.

Eksakto a makatawenen ti napalabas idi nagpanawagan ti Komite Sentral iti intero a kamkameng ti Partido a mangisayangkat ti maysa a tignay panagilinteg tapno natadem nga itudo, dillawen ken iwaksi ti amin a klase ti petiburges a suhetibismo, maysa a sakit a simmaknap iti Partido iti nadumaduma a tukad ken kinakaro, ken nangpakapsut ditoy manipud iti uneg. Iti unos ti napalabas a maysa a dekada wenno nasurok pay, ti panagabante ti rebolusyonaryo a tignay masa ket linapdan dagiti Kannawan nga oportunista a tendensya ti konserbatismo, buntotismo, ligalismo, ekonomismo, repormismo ken NGOismo; bayat a ti rebolusyonaryo nga armado a dangadang ket pinakapsut ti bukod a panagpaakikid a nagtennag iti konserbatismo a militar ken panagibbat iti inisyatiba a gerilya.

Maragsakan kami nga iyulat a ti pang-uneg a kampanya ti panagadal ken panagdillaw-iti-bagi ket natibker a rumamramut ken agtultuloy a sumaksaknap. Ngem adu pay ti kasapulan nga aramiden. Adda tayo pay laeng iti umuna nga addang. Agtultuloy a tumataud dagiti makaperdi nga impluwensiya dagiti kamali, pagkapuyan ken pagkurangan ti napalabas. Kasapulan nga ad-adda pay a paunegen ti tignay panagilinteg tapno mapangngeddeng a paruten dagiti suhetibista a ramut dagiti kamali, pagkapuyan ken pagkurangan tayo, tapno patibkeren ken papigsaen ti Partido, ken mapangngeddeng a rimbawan ti nabayagen a parikut ti istagnasyon ken ipasngay ti baro a rebolusyonaryo a panagdalluyon.

Ti tignay panagilinteg ket maysa a tignay panagadal nga agpangpanggep nga ingato ti kabaelan dagiti kadre ken aktibista ti Partido nga aramaten ti siyentipiko a teorya ken proletaryo a pamuspusan ti panagpanunot kas intrumento tapno tarabayan ken ingato ti tukad ti praktikal a rebolusyonaryo a trabaho. Daytoy ket balbaliw a panangpatibker iti takder iti Marxismo-Leninismo-Maoismo, pati metten kadagiti basaran a prinsipyo, panagamiris ken patakaran ti Partido, ken programa para iti panangiyabante ti nailyan-demokratiko a rebolusyon nga addaan sosyalista a perspektiba.

Ti agdama a tignay panagilinteg ket kangrunaan nga agpangpanggep nga ilinteg ken rimbawan dagiti pagkapuyan, pagkurangan ken panagkamali a nagtaud iti empirisismo. Ti empirisismo ket maysa a langa ti suhetibismo a nagtaud iti kinakurang ti naanep a panagadal ken aplikasyon ti teorya tapno tarabayan, lagumen ken ingato ti tukad ti praktika. Gagem tayo a risuten ti nabayagen a parikut ti istagnasyon iti nadumaduma a tay-ak ti rebolusyonaryo a trabaho iti unos ti dandani dua a dekada, ken panag-atras ken perdi manipud 2017-2018. Ar-aramiden daytoy babaen ti panagsuma kadagiti kapadasan, panagdillaw ken panagdillaw-iti-bagi, umannurot kadagiti basaran a prinsipyo, patakaran ken programa ti Partido, ken babaen ti maysa a kampanya ti panagsukisok iti gimong ken panagamiris iti dasig iti nadumaduma a tukad ti trabaho ti Partido.

Maiyab-abante ti tignay panagilinteg iti sango ti awan-ressat ken brutal a kampanya ti kabusor a panangpugipog, agpada iti kasyudadan ken kaaw-awayan. Babaen ti panangrimbaw kadagiti kamali, pagkapuyan ken pagkurangan kadagiti napalabas a tawen, determinado tayo a paayen ti nalablabes a gera ti kabusor, subboten dagiti napukaw, aggun-od kadagiti baro a balligi ken iyabante ti rebolusyonaryo a panaglaban ti umili a Pilipino.

Ti panagrugi ti tignay panagilinteg idi napalabas a tawen ket pinadayawan ti amin a mangidadaulo a komite ti Partido. Riniing ken inikkan inspirasyon daytoy dagiti kadre ken aktibista ti Partido, pati metten ti masa a rebolusyonaryo. Pinennek daytoy dagiti mangidadaulo ken kamkameng ti Partido iti kababagas ti panagdillaw-iti-bagi. Determinado da nga ilinteg ken rimbawan dagiti nagkamalian, nagkapuyan ken nagkurangan, tapno papigsaen ti Partido ken tulungan a riingen ti umili a naturtured a lumaban, agrebolusyon ken paayen ti brutal a gubat a pangpugipog ti kabusor.

Panggep ti tignay panagilinteg a pandayen ti kinatibker dagiti kadre tayo iti ideolohiya ken pulitika. Gapu iti kinakurang iti tuluy-tuloy a panagadal iti ideolohiya ken balbaliw a panangpatibker iti proletaryo a takder, ken iti sango ti brutal a gubat a panagikuspil ken saan a maanawa a panagatake ti kabusor, napilay ti sumagmamano a kadre gapu iti buteng wenno nalabes a panagtarigagay iti gin-awa. Ngem ti dakdakkel a mayorya dagiti kadre tayo, nga umad-adaw ti pigsa iti rebolusyonaryo a tarigagay a labes iti bukod nga interes, ket determinado a mangaramid ti kaskenan a sakripisyo tapno siguraduen ti seguridad da ken ti balligi ti Partido ken ti tignay panagilinteg daytoy.

Umannurot iti panawagan ti Komite Sentral, rinugian dagiti komite ti Partido ken dagiti rebolusyonaryo nga organisasyon ti masa ti plano para kadagiti kampanya iti panagadal iti makatawen. Naipatungpal dagitoy nga addaan nadumaduma a tukad ti balligi. Ti dadduma ket nakaannatup kadagiti pamuspusan da segun kadagiti obhetibo a kasasaad (kas ti staggered wenno paset-paset a diskusyon ken dagiti basbassit a grupo tapno annatupan ti gerilya a kasasaad a nagaraw, panagisayangkat kadagiti klase iti rabii tapno umannatop iti pannakakumikom iti trabaho dagiti mannalon iti aldaw, dagiti panagsasarita a saggaysa kadagiti baro a rekrut, ken dadduma pay). Adda ti dadduma a nagitakder ti pormal nga istruktura ti panagadal iti sidong ti Pagadalan a Jose Maria Sison nu sadinno a dagiti agadal ket agpalpalista kadagiti pormal ken regular a klase. Dagiti libro ken artikulo a Marxista-Leninista-Maoista ket mapapaadu iti langa ti papel wenno digital. Ngem adda ti sumagmamano a saan a kas militante ken manaparnuay, nga agresresulta iti nababbaba a tukad ti balligi.

Ti Partido tayo ket nagiruar itay nabiit kadagiti artikulo nga agad-adal iti sumagmamano a napateg nga isyu, kabilang ti agdama a krisis ti imperyalismo ken dagiti pangta ti gubat, ti agdama a dangadang para iti nayon a sweldo, ti “BPO industry,” ti penomenon dagiti “gig workers,” ken dagiti nalatak nga usapin iti taktika iti panangiyabante ti gubat a gerilya tapno paayen ti nadamsak a gubat ti panagikuspil ken gradual constriction wenno in-inot a pananglipit ti kabusor. Kasapulan nga agiruar ti ad-adu pay a teoretiko a panagadal ken artikulo iti napapateg nga usapin a sangsangwen ti Partido iti inaldaw.

Dagiti pangrehiyon a komite ti Partido ken dadduma pay a mangidadaulo a komite, karaman dagiti adda iti ballasiw-taaw, ket agpingpinget a makumpleto wenno marepaso dagiti dokumento ti panaglagom da umannurot iti tignay panagilinteg. Nakumpleto ti sumagmamano a komite dagiti panaglagom da sakbay pay ti tignay panagilinteg. Ti dadduma ket adda iti proseso ti panangrepaso kadagiti dokumento da iti balangkas ti tignay panagilinteg tapno matudo dagiti partikular a manipestasyon ti petiburges a suhetibismo iti bukod da a trabaho iti ideolohiya, pulitika ken organisasyon kas basaran para iti panagdillaw-iti-bagi. Ngem kaadwan kadagiti mangidadaulo a komite tayo ket adda iti nadumaduma a tukad pay ti panagkumpleto. Problema ti dadduma a komite dagiti mapukpukaw a dokumento wenno kinaawan ti dokumentasyon ti trabaho ti komite da kadagiti napalabas a tawen, a makagapu a marigrigatan dagiti agdama a mangidadaulo, nangruna dagiti agkabanwag a kadre, a makumpleto ti panangisalaysay ti trabaho da.

Manipud rugi ti tawen, rinugian dagiti komite ti Partido,dagiti kadre ken aktibista dagiti kampanya ti SICA (panagsukisok iti gimong ken panagamiris iti dasig) segun iti programa ken dagiti instruksyon ti Komite Sentral. Panggep ti kampanya nga ilinteg ti sigud a pagkapuyan iti panangbukel kadagiti taktika iti panag-organisa ken panagpatignay iti masa nga umannatop kadagiti nagbaliw a kundisyon, nga agresresulta iti mekanikal ken saan nga umab-abante a “gawaing masa” iti napalabas. Karaman iti kampanya dagiti panagsanay, balbaliw a panagsanay wenno panagpalawa ti kammuan dagiti kadre ken aktibista kadagiti syentipiko a pamuspusan ti panag-imbestiga, panagkulekta ken panagkalap ti impormasyon manipud iti masa ken dadduma pay. Ti sumagmamano a panagpinget ket nagresulta iti signipikante a panagabante iti panangbukel ti estratehiya ken programa iti gawaing masa, ken iti panangiruar ti napapanawen a panawagan para iti panag-organisa ken panagpatignay iti masa. Nupay kasta, adda pay laeng iti umuna a tukad ti mayorya dagiti komite tayo.

Iti tengnga ti nakaro a krisis iti ekonomya, silulukat ti nalawa a masa ti umili iti nailyan-demokratiko a propaganda ken panag-organisa. Iti kaanoman ket determinado da a supyaten ti korapsyon, panangidadanes ken dagiti padagsen a patakaran ti pasista a rehimen US-Marcos, ken ilaban dagiti pangkagimongan, pang-ekonomya ken pangpulitika nga interes da, nagruna iti sango ti kumarkaro a burukrata kapitalismo ken pasismo. Tapno epektibo a lumaban, rumbeng nga ibangon, palawaen ken papigsaen dagiti organisasyon masa da.

Dagiti kadre ken aktibista ti Partido ket mapatpatignay tapno komprehensibo nga aggawaing masa tapno riingen ti masa, ibangon ti nadumaduma a klase ti timpuyog da ken patignayen isuda iti amin-a-benneg a wagas. Dagiti pangkat ti gawaing masa wenno dagiti pangkat pangpropaganda ken pang-organisa ket maipatpatulod kadagiti pabrika, komunidad dagiti nakurapay iti syudad, kadagti kampus, pati metten kadagiti komunidad iti kaaw-awayan. Nupay kasta, adu ti malaplapdan ti kinaawan pangngeddeng nga agtignay, kadagiti daan a manera iti trabaho a pasagad, nakagalut iti upisina, ken duron laeng ti aktibidad, kinakurang dagiti pultaym a rebolusyonaryo nga organisador, kinakurang ti panagkusisok iti gimong, pagkapuyan nga isilpo dagiti napudot nga isyu ti umili kadagiti lokal a problema ti masa, ken pannakapaay nga isilpo dagiti lokal a problema kadagiti kabuklan a kampanya ti masa, ken dadduma pay a kinakurang. Makitkita tayo met dagiti problema iti “Kannigid” a sektaryanismo a makapatpatignay laeng iti bassit a paset dagiti aktibo nga elemento ti masa, ken saan nga agpatpatignay kadagiti elemento ti tengnga tapno awiden dagiti maud-udi. Sibubukel ti pangngeddeng dagiti komite ken kadre ti Partido a rimbawan ken risuten dagitoy a problema babaen ti panagsubli kadagiti basaran a prinsipyo ti linya a masa ken panangidaulo.

Agtultuloy a maikagkagumaan a balbaliw nga ibangon dagiti limed a rebolusyonaryo nga organisasyon a kaalyado ti National Democratic Front of the Philippines, kas kadagiti agtutubo, mangmangged, mannalon, babbai, manursuro, mangmangged iti salun-at ken dadduma pay. Nagtaud daytoy iti dandani naan-anay a panangbaybay-a iti panangbukel ti limed a tignay rebolusyonaryo bunga ti panagkamali iti ligalismo ken repormismo. Adda dagiti plano ken target para iti rekrutment, panangitakder kadagiti baro a balangay, panangitandudo ken panangsuporta iti rebolusyonaryo nga armado a dangadang iti kaaw-awayan. Maikagkagumaan a paregtaen ti panagpalista nga agbalin a Nalabbaga a mannakigubat wenno upisyal iti pulitika ti New People’s Army. Nupay kasta, adu pay ti kasapulan nga aramiden tapno sungbatan ti madagdagus a pagkasapulan para kadagiti baro a rekrut, nangruna manipud kadagiti agtutubo a mangmangged ken intelektwal.

Iti panangisayangkat ti tignay panagilinteg idi napan a tawen, inikkan atensyon ti mangidaulo a komite ti Partido ti partikular a problema ti panagpailet dagiti yunit ti NPA, a nagresulta iti panagilet ti base a masa iti sumagmamano a natitibker a lugar. Ti nabayag a panagbase dagiti kumpanya ken platun iti banbantay, pananglimitar iti lugar ti operasyon kadagiti “paborito a baryo” ken dadduma pay a manipestasyon ti panagpailet ket nagresulta iti pannakapukaw ti inisyatiba, sibilyanisasyon ken konserbatismo a militar. Idi insayangkat ti kabusor dagiti estratehiko nga opensiba idi 2017-18, saan a manmano a yunit ti NPA ti naisina iti suporta a pangpulitika ti masa ken napwersa a maikabil iti puro militar a sitwasyon, bayat a ti base a masa a mannalon ket nabasbasnut ti nalabes a brutalidad. Gapu kadagitoy a kamali ken pagkapuyan, ti NPA ket nagsagrap ti dadakkel a perdi ken panag-atras iti sumagmamano a rehiyon ken larangan gerilya.

Iti sumagmamano a larangan gerilya, dagiti platun ken iskwad ti NPA ket napaspas a balbaliw a nag-organisa ken nagpakat umannurot iti tignay panagilinteg ken umannurot iti prinsipyo ti nasaknap ken nainget a pannakigubat a gerilya basar iti lumawlawa ken umun-uneg a base a masa. Managparnuay ken nasirib nga ar-aramaten dagiti platun ti NPA ti pleksibilidad iti dispersal wenno panagwaras, konsentrasyon ken panagakar ken balbaliw nga agpakpakalaing iti panagtignay a kas kapardas ti kimat. Ti tignay panagilinteg ti Partido ket nangted inspirasyon kadagiti Nalabbaga a mannakigubat ti New People’s Army nga agpinget iti narigat a dana ti naunday a gubat ti umili tapno balbaliw nga itakder ken palawaen ti base a masa, depensaan ti umili laban iti terorismo ti estado, ipreserba ken papigsaen ti NPA ken paayen ti estratehiko nga opensiba ti kabusor.

Agtultuloy nga itaktakder ti Partido dagiti relasyon nga internasyunal iti basaran ti anti-imperyalismo ken proletaryo nga internasyonalismo. Nakaited ti Partido ti napapateg a kontribusyon iti tallo a teoretikal a kumperensya nga inorganisa ti National Democratic Front of the Philippines (NDFP). Manipud Oktubre 2023, tinalantan dagitoy a kumperensya dagiti usapin ti imperyalismo ken gubat, ti sangalubongan nga imperyalista a krisis iti ekonomya, ken ti dangadang para iti nailyan a wayawaya manipud iti imperyalismo. Dagitoy a kumperensya ket agserserbi a gundaway para iti panangbukel ti as-asideg pay a relasyon ken panagkikinnaawatan iti baet dagiti rebolusyonaryo a partido ken grupo a komunista ken pang-mangmangged.

Iti inisyatiba ti Partido, immado iti napalabas a tawen ti aktibidad para iti panangpapigsa ti proletaryo a panagkaykaysa. Naangay ti ad-adu a bilateral a sinnukat ken nagtipon a panagadal iti baet ti Partido ken dadduma a proletaryo a partido ken grupo. Dimmar-ay tayo kadagiti kongreso ti dadduma a partido ken agibingbingay iti nadumaduma a porum.

Dagiti internasyunal a mangibagi iti Partido ken NDFP ket agtultuloy iti aktibo a panangitandudo iti rebolusyon a Pilipino, iti panangpanday ti panagkaykaysa kadagiti anti-imperyalista a partido ken panangpadur-as ti relasyon a protodiplomatiko kadagiti gubyerno basar iti komun a tarigagay para iti wayawaya iti pagilyan ken kagimongan.

Dagiti mangidadaulo a komite ti Partido iti amin a tukad ket manaynayonan ti baro a dara babaen ti aktibo a promosyon ti agkakabanwag a kadre basar iti nasayaat a rekord da iti panangipatungpal kadagiti rebbengen. Iti panagkumbina ti agkakabanwag kadagiti natataengan, sigsiguraduen tayo a ti pamunuan ti Partido ket addaan kabaelan, addaan enerhiya ken naregta, ken kabaelan na nga ibaklay ti naririgat a rebbengen ti proletaryo a panangidaulo iti napaut pay a panawen. Ti panangikabil ti baro nga agkakabanwag a kadre iti pamunuan iti nadumaduma a tukad ket agtaltalmeg iti pagkasapulan nga aglagom ti kapadasan tapno iyalis ti kasanayan ken naurnong a kaamuan iti baro a henerasyon dagiti lider ti Partido.

Maitaktakder dagiti komite a pangteritoryo tapno ipundar ken padur-asen ti tignay masa iti ruar ti saklaw ken madanon ti hukbo ti umili. Iti kasta, masigsigurado ti Partido ti kabaelan daytoy a riingen, organisaen ken patignayen dagiti mangmangged, mannalon, malaproletaryado, estudyante ken dadduma pay a sektor iti ruar wenno gayadan dagiti larangan gerilya, ken saan a maigalut iti saklaw wenno erya ti operasyon dagiti yunit gerilya ti NPA. Dagitoy a komite ket makitintinnulong kadagiti komite iti larangan gerilya tapno siguraduen ti tuluy-tuloy a suporta a pangpulitika, materyal ken pang-organisasyon para iti hukbo ti umili ken para iti antipyudal ken antipasista a dangadang ti masa a mannalon.

Babaen ti tignay panagilinteg, dagiti komite ti Partido iti agdama ket naan-anep nga agbanbantay iti liberalismo, ultra-demokrasya ken burukratismo. Dagitoy a pagkapuyan ket mangdaddadael iti demokratiko a sentralismo, ken iti kabaelan ti Partido nga aggigiddan nga agmartsa.

Iti dadduma a paset ti Partido ken tignay rebolusyonaryo, nakita tayo dagiti panaglabsing iti nadumaduma a patakaran iti organisasyon ken disiplina ti Partido, a ti dadduma ket nabaybay-an iti nabayag a panawen, a nangdadael iti panagkaykaysa, nangipeggad iti seguridad dagiti kadre ken nangdadael iti prestihiyo ti Partido. Tapno mailinteg daytoy a sitwasyon, balbaliw nga inruar ken inlawag tayo dagiti patakaran. Dagitoy a panaglabsing ket mapangngeddeng a dinillaw, inamiris ken inwaksi iti sumagmamano a paset.

Agtultuloy a pappapigsaen tayo ti sistema ti panagulat tapno ilinteg ti sitwasyon a dagiti sentro ti Partido ket bulag iti sitwasyon ken panagdur-as ti rebolusyonaryo a trabaho dagiti nababbaba a komite. Dagiti mangidadaulo nga organo tayo tatta ket relatibo a makabkabisado da ti sitwasyon iti baba, isu a makairuruar da ti napapanawen a patakaran, pagannurotan, dagiti balakad ken plano. Nupay kasta, adda sumagmamano a nababbaba a komite ti saan pay a nakapagpadur-as iti praktika ken saan pay a nakaipatpatulod ti regular nga ulat.

Ti liberalismo ken ultra-demokrasya ket sakit a mangperperdi iti disiplina ti Partido. Iti laksid ti tignay panagilinteg, agtultuloy nga ap-apektaran daytoy ti dadduma a paset ti Partido iti nadumaduma a langa kas ti panag-alad, agbukbukod a grupo, awan-patengga a debate ken saan a marisut nga apa. Iti bangir na, adda pay laeng problema iti burukratismo, nu sadinno a dagiti mangidadaulo a kadre ti Partido ket saan a makait-ited ti naanep nga atensyon iti sangsangwen a kasasaad dagiti kolektibo ken kameng iti nababbaba a komite, tapno tulungan isuda a risuten dagiti problema da ken umabante.

Agtultuloy a perperdien ti liberalismo a petiburges ti militansya ken pangngeddeng ti sumagmamano a kadre. Adda sumagmamano a kadre a malmalmes iti adu nga usapin a para iti bagbagi da ken saan a makait-ited ti sibubukel nga atensyon iti rebolusyonaryo a trabaho. Ti adu ket apektado pay latta ti kapanunotan nga empleyado, ken nakagalut kadagiti upisina ken balbalay da, ken saan a makait-ited ti sibubukel a panawen iti trabaho a panagorganisa iti masa. Adda sumagmamano a kadre a saan pay laeng nga umad-addang paruar kadagiti “comfort zone” da.

Bayat nga adu pay ti rumbeng nga aramiden, iti kaanoman ket natibker ti takder ti Partido a komprehensibo nga iyabante ti tignay panagilinteg. Babaen ti awan-pannakabannog a panagpinget dagiti proletaryo a kadre ken rebolusyonaryo nga aktibista tayo, naan-anay a sigurado a maideklara tayo a dagiti ramut ti tignay panagilinteg ket agtuloy nga umuneg ken lumapad. Gapu ditoy, lumangto ti Partido a natibtibker ken napigpigsa, kagiddan ti panangidaulo na iti umili, awit ti saan a mapukpukaw a rebolusyonaryo a pakinakem.

IV. Tungpalen dagiti rebbengen ti tignay panagilinteg ken iyabante ti rebolusyon!

Ad-adda a paborable tatta ti obhetibo a kasasaad tapno iyabante ti demokratiko a rebolusyon ti umili iti tengnga ti agtultuloy a krisis ti kapitalismo iti intero a lubong ken panagsuwek ti malakolonyal ken malapyudal a kasasaad iti pagilyan. Adda kadagiti pwersa a suhetibo nu kasano a gundawayan ti sitwasyon tapno iyabante ti tarigagay ti pagilyan para iti wayawaya ti pagilyan ken kagimongan.

Iti panagsango iti agdama a sitwasyon, kasapulan nga ingge’t kabaelan a papigsaen ti ideolohiya, pulitika ken organisasyon ti Partido ken amin a rebolusyonaryo a pwersa. Kasapulan a papigsaen tayo ti determinasyon ken kumprehensibo nga ingato ti kabaelan tayo nga ibaklay dagiti rebbengen a riingen, organisaen ken patignayen ti nalawa a masa iti dana ti demokratiko a rebolusyon ti umili ken sosyalista a masakbayan daytoy.

Palawaen ken paunegen ti tignay panagilinteg! Ad-adda pay a papigsaen ti Partido!

Ti tignay panagilinteg nga insayangkat idi napan a tawen ti Komite Sentral, ket maysa nga internal a tignay ti panagadal ken panagdillaw-iti-bagi nga addaan gagem nga ilinteg dagiti kamali ken rimbawan dagiti pagkapuyan ken pagkurangan. Kangrunaan nga agtataud dagitoy iti suhetibismo a petiburges, kangrunaan iti langa ti empirisismo, iti trabaho ti Partido iti ideolohiya, pulitika ken organisasyon.

Nasken a paunegen ken palapaden ti tignay panagilinteg. Nakita tayo iti napalabas a tawen a saan nga umanay nga ideklara ti tignay panagilinteg ken agiyebkas ti suporta ditoy. Amin a komite ti Partido, manipud iti sentro agingga iti amin a sangay, ket rumbeng nga agdillaw-iti-bagi, agilinteg kadagiti napalabas a kamali, naan-anay nga umarakop iti Marxismo-Leninismo-Maoismo tapno irebolusyunisa ti panagpanpanunot ken dagiti wagas ti panagtrabaho, ken sipipinget nga umabante. Rukoden tayo ti balligi ti tignay panagilinteg kadagiti kongkreto a bilang nga agipakpakita ti kantitatibo a panagdakkel, ken kalitatibo a panagdur-as ti Partido, ti rebolusyonaryo nga armado a dangadang, ti rebolusyonaryo a tignay masa ken ti organisado a base a masa.

Balbaliw tayo a paspasingkedan ti 8-paset a tignay panagilinteg kas ti binalangkas tayo iti pablaak iti napan a tawen. Sumagannad dagitoy a paset: maysa a Marxista-Leninista-Maoista a kampanya iti panagadal, maysa a kampanya para iti balbaliw a panangpasingked iti konstitusyon ken programa ti Partido, maysa a kampanya a panagadal kadagiti dokumento ti Umuna ken Maikadwa a Tignay Panagilinteg, maysa a kampanya a panaglagom, maysa a kampanya ti panagsukisok iti gimong ken panagamiris iti dasig (SICA), maysa a kampanya ti panagdillaw ken panagdillaw-iti-bagi, maysa a kampanya ti ebalwasyon ken promosyon dagiti kadre, ken maysa nga agtultuloy a kampanya tapno siguraduen ti panagipatungpal ti tallo-tukad a kurso iti edukasyon ti Partido.

Iti panangpauneg ti tignay panagilinteg, kasapulan a tuloy-tuloy ken napasnek nga ipatungpal tayo dagiti plano iti kampanya iti panagadal, kagiddan dagiti napapanawen a panagtasa tapno siguraduen a napaspas a marisut dagiti problema. Padur-asen tayo ti militante nga estilo ti panangikumbina ti panagadal iti teorya ken ti praktika, kas ti panagbinnadang dagiti petiburges nga intelektwal ken dagiti mangmangged iti panagadal iti sweldo wenno Marxista a pangpulitika nga ekonomya.

Nasken a naregregget pay a pagadalan ti amin a kadre ti Partido ti Marxismo-Leninismo-Maoismo. Balbaliw tayo nga iyemprenta ken iwaras ti teksto ti Philippine Selections dagiti napili a kangrunaan nga artikulo ni Mao Zedong tapno agserbi a rekisito iti panagbasa iti teorya ken panagadal ti amin a kadre ti Partido. Rumbeng nga ikkan ti ad-adda a panangipateg dagiti kadre ti panagadal iti teorya nga agbalbalin nga ad-adda a kritikal bayat a bakbaklayenda dagiti dakdakkel a praktikal a rebolusyonaryo a trabaho.

Kasapulan a natadtadem a tuduen, iduma ken dillawen tayo ti pseudo-sosyalismo, anarkismo, radikalismo a pangkasarian, ken dadduma pay a klase ti petiburges a rebolusyonismo a simmagepsep iti dadduma a paset ti Partido. Daytoy ket mangituntunda ti pannakariribuk ken mangpalpalukay iti panangiggem iti sumagmamano a napateg nga usapin. Nasken nga ibunannag tayo dagiti burges ken petiburges a turongen a repormista kadagiti mangmangged, mannalon, intelektwal ken dadduma pay a sektor ken tignay, nga aggangandat nga iyaw-awan ti masa a Pilipino paadayo manipud iti dana ti rebolusyonaryo a dangadang, nangruna manipud iti armado a dangadang.

Rumbeng a mapangngeddeng a kumpletuen ti Komite Sentral ti panaglagom iti kangrunaan a pasamak ken desisyon iti napalabas a panawen, tapno agserbi a kabuklan a tarabay iti panaglagom ti amin a komite. Kagiddan daytoy, dagiti immuna a naisurat a dokumento ti panaglagom dagiti mangidadaulo a komite (dagiti sumaksaklaw iti panawen ti 2010 agpangato) ket kasapulan a balbaliw a pagadalan manipud iti lente ti agdama a tignay panagilinteg.

Malaksid iti panangbukel ti salaysay kadagiti napalabas a paspasamak ken desisyon, ken panangitudo kadagiti pagpigsaan ken pagkapuyan tayo, nasken met a tuduen tayo ti petiburges a naindasigan a kagagalad dagiti kamkamali ken pagkapuyan tayo, tapno mapapigsa ti proletaryo a panangidaulo tayo iti nadumaduma a tay-ak ti rebolusyonaryo a trabaho. Rumbeng nga adda ti nalawag a panagdillaw ken panagdillaw-iti-bagi dagiti kadre ken komite tayo. Dagiti dokumento ti panaglagom ket kasapulan a dagus a pagadalan dagiti kameng iti saklaw ti teritoryo wenno linya ti trabaho.

Iti panagpalapad ti tignay panagilinteg, gagem tayo a siguraduen a saksakupen daytoy ti amin a paset ti Partido ken amin nga aspeto ti trabaho a rebolusyonaryo. Ti walo a paset ti tignay panagilinteg ket kasapulan a komprehensibo nga ipatungpal. Nasken a tuloy-tuloy dagiti panagregget. Nasken nga agbantay iti panagbaybay-a, rimbawan ti inersya wenno kinaawan regta, ken labanan ti panagsubli kadagiti dati nga aramid.

Agtultuloy tayo nga irebolusyunisa ti Partido babaen ti proletaryo a panagmuli-iti-bagi dagiti kadre kadagiti wagas ti panagtrabaho ken panangidaulo da, karamanen ti istilo ti panagbiag da. Maaramid daytoy babaen ti pananagisigurado a dagiti kadre ken komite tayo ket nairut a nakasilpo iti masa iti amin a panawen. Agpanpanawagan kami iti amin a kadre ken aktibista ti Partido a rumwar kadagiti “comfort zones” wenno komportable a lugar ken panagbiag a saanda a mapanawan, ken sibubukel nga idaton ti bagbagida iti naan-anay a panangipatungpal kadagiti rebolusyonaryo a trabaho a naiyatas kadakuada. Rumbeng a mapangngeddeng a dillawen ken iwaksi tayo dagiti panaglabsing kadagiti patakaran ti Partido ken siguraduen a kanayon a nangato ti disiplina.

Kasapulan nga agtultuloy nga idatag ti Partido ti kritikal a panagamiris daytoy kadagiti nalatak nga isyu ken paspasamak iti pagilyan ken sangalubongan ken ingato ti kaamuan ken kamulatan ti umili. Nasken nga ituloy tayo nga ipablaak ken paaduen dagiti nakaimprenta a kopya ti Ang Bayan ken siguraduen a nasaknap a maiwarwaras kadagiti kameng ti amin a sangay ti Partido, pati metten dagiti rebolusyonaryo nga organisasyon ti masa.

Rumbeng nga agtultuloy nga ingato ti bilang ti kamkameng ti Partido umannurot iti prinsipyo ti natured a panagpalawa nga awan ti maipastrek a saan a nasayaat nga elemento. Kasapulan a papigsaen ti demokratiko a sentralismo ken sistema a komite, a mangisigsigurado ti regular a panagpulong ken kolektibo a panagdesisyon. Amin a komite ket nasken a mangaramid ti regular a linya ti komunikasyon iti nangatngato a komite da ken agisumite ti regular ken napapanawen nga ulat.

Nasken nga ingato ti kabaelan dagiti seksyon ken sangay ti Partido a tungpalen dagiti rebolusyonaryo a trabaho iti saklaw ti responsibilidad ken panangidaulo. Rumbeng a tarabayan ken sanayen dagiti komite ti Partido manipud iti distrito agpangato, iti uneg ken ruar dagiti larangan gerilya, dagiti lokal a kadre ti Partido iti panangipatungpal kadagiti trabaho da.

Kasapulan nga ikagumaan latta dagiti napapanawen a panagtasa ken panangingato kadagiti kadre ti Partido kadagiti pusisyon ti responsibilidad ken panangidaulo. Nasken a mapasamak dagitoy kadagiti regular a kumperensya wenno babaen kadagiti komite a tagaipatungpal, iti baet dagiti kumperensya.

Paunegen ken palawaen ti panagramut iti masa ken nairut
nga idauluan dagiti dangadang da laban iti aso-aso a
burukrata-kapitalista ken pasista a rehimen Marcos!

Ti rehimen US-Marcos ti pinakakonsentrado nga ekspresyon dagiti basaran a parikut ti imperyalismo, pyudalismo ken burukrata kapitalismo. Makitkita tayo iti sidong ni Marcos ti awan kapada a korapsyon, pasismo ken panagparparintumeng iti imperyalista a US. Iti sango ti panagkaro dagiti langa ti panangidadanes ken panaggundaway, ad-adda a determinado ti umili a Pilipino a tumakder ken lumaban, ken iyabante ti dadakkel a dangadang nga anti-pasista, anti-imperyalista ken anti-pyudal kadagiti sumaruno a tawen.

Sibubukel ti pangngeddeng da nga ingge’t kabaelan a lumaban tapno buraken ti panagari ti pasista a teror iti kaaw-awayan, gibusan ti panagari ti linteg militar kadagiti komunidad iti kaaw-awayan, ken labanan ti patakaran ni Marcos iti pulitikal a panangikuspil ken kinaranggas ti estado. Ti panaglaban iti linteg militar iti kaaw-awayan ket rumbeng nga iyabante agpada iti kaaw-awayan ken kasyudadan. Kasapulan a determinado nga iyaramid ti maysa a kampanya tapno ibunannag ti pasista a terorismo iti kaaw-awayan ken tapno suportaran ti masa a mannalon iti panaglaban da. Paborable dagiti kundisyon para iti panagitakder ti maysa a nalawa nga anti-pasista a nagkaykaysa a prente iti intar ti nadumaduma a demokratiko a sektor.

Dagiti dumakdakes a kundisyon a sosyo-ekonomiko ket mangidurduron iti umili a tumakder ken agprotesta laban iti awan-sarday a panagngato ti presyo ti taraon ken gasolina, ken dadduma pay a kangrunaan a gagatangen, kasta met laban iti burukrata-kapitalista a korapsyon iti sidong ti rehimen Marcos. Maidurduron dagiti mangmangged a napinget a makidangadang para iti nayon a sweldo tapno agbiag a disente dagiti pamilya da, para iti nasaysayaat a kundisyon iti panagtrabaho ken para iti pananggibus iti kontraktwalisasyon iti panagtrabaho ken dadduma pay a mananggundaway nga iskema ti panagtrabaho. Nasken a paawengen ti pukkaw da para iti ₱1,200 a minimum a sweldo tapno riingen dagiti mangmangged a buklen dagiti unyon da, ken iyabante ti kolektibo a dangadang kadagiti pabrika ken komunidad da.

Maidurduron dagiti mannalon a papigsaen dagiti dangadang da laban iti ad-adda a liberalisasyon ti importasyon ti bagas ken dadduma pay a pang-agrikultura a tagilako. Kagiddan daytoy, obligado da a napinget a labanan ti panagserrek dagiti minasan, plantasyon ken dadduma pay nga operasyon nga umag-agaw iti daga ken mangdaddadael iti law-ang (nangruna iti sango ti maidurduron a linteg a mangpaatiddog agturong ti 99 tawen ti panagpaabang ti daga kadagiti gangannaet a kapitalista), ken ti militarisasyon kadagiti komunidad da. Dagiti didigra iti klima ket mangidurduron iti masa a Pilipino nga irupir ti bayad-danyos iti pannakapukaw dagiti sanikua ken pagbiagan da. Kasapulan a papigsaen ti masa a mannalon dagiti organisasyon ken asosasyon da ken natured a tumakder tapno salakniban ti biag ken pagbiagan da.

Sangsangwen ti umili a Pilipino ti pagkasapulan a papigsaen ti kampanya laban kadagiti base militar ti US ken interbensyon a militar ti US ken supyaten ti panagpakaaso-aso ti rehimen Marcos iti imperyalismo a US, a mangikabkabil iti pagilyan iti dumakdakkel a peggad a mapulipolan iti gubat nga inter-imperyalista. Nasken nga isayangkat tayo ti tuloy-tuloy a kampanya tapno ibunannag dagiti iskema ti US para iti panagipataw ti bileg militar na iti Pilipinas, ken nu kasano a nakasilpo daytoy iti kumarkaro nga inter-imperyalista a binnusor ken dagiti panggep ti US nga ipataw ti hegemonya na iti nadumaduma a paset ti lubong. Rumbeng a paapoyen tayo ti patriyotismo dagiti Pilipino ken isilpo dagiti dangadang da kadagiti dangadang nga anti-imperyalista dagiti umili iti intero a lubong.

Rebbengen ti Partido nga idauluan ti nalawa a masa ti umili a Pilipino kadagiti pang-ekonomya ken pangpulitika a dangadang da babaen ti naun-uneg ken nalawlawa a panagramut iti masa. Tapno maaramid daytoy, kasapulan nga ingato tayo ti kabaelan ti Partido nga aduan a riingen, organisaen ken patignayen ti nalawa a masa. Kasapulan nga ingato tayo ti pannakariing da iti kagimongan ken pulitika babaen ti panangisilpo ti napupudot nga isyu ti umili kadagiti lokal a problema da, ken panangingato kadagiti lokal nga isyu da iti dangadang kadagiti basaran a parikut ti umili a Pilipino ken iti pagkasapulan ti panangiyabante iti kolektibo a dangadang.

Nasken a parnuayen tayo ti kundisyon para iti demokratiko a pannakipaset ti masa kadagiti innadal ken panagdesisyon, tapno maallukoy da nga agtignay, Rumbeng nga ikagumaan tayo nga ikombina ti pasagad a propaganda ken panag-organisa, iti solido ken pursigido a gawaing masa. Rumbeng a rimbawan dagiti napalabas a pagkapuyan iti trabaho a puro pasagad, ken idurduron laeng dagiti aktibidad, nakasentro iti isyu ken nakagalut kadagiti upisina. Kasapulan nga agpataud tayo ti ad-adu a kadre a pultaym iti gawaing masa, a mangikombina iti dakdakkel a bilang dagiti aktibista kadagiti pangkat pangpropaganda ken panag-organisa. Ti SICA ket rumbeng nga iyaramid nga addaan nalawag a panggep a buklen ti maysa a plano para iti panag-organisa ken panagpatignay iti masa basar kadagiti madagdagus a pang-ekonomiya ken panggimong a kadawatan da.

Itakder ken papigsaen ti nadumaduma a tipo ti demokratiko nga organisasyon ti masa tapno konsolidaen ti relatibo nga aktibo wenno abante nga elemento iti intar ti masa. Kasapulan nga ikombina daytoy iti panangbukel kadagiti nalaplapad a panagsisilpo wenno dagiti organisasyon a nakabasar iti isyu, tapno danunen ken patignayen dagiti makintengnga nga elemento, nga isuda ti makatulong iti panang-awid iti relatibo a maud-udi a paset ti masa. Nasken nga aramaten tayo dagiti managparnuay a taktika tapno rikusan ken paayen ti reaksyunaryo a panag-espiya ken dagiti patakaran a manangikuspil.

Rumbeng a naanus nga itakder tayo wenno balbaliw a buklen ti tignay a limed ken dagiti rebolusyonaryo a timpuyog ti masa iti kasyudadan ken kaaw-awayan. Konkonsolidaen dagiti organisasyon ti masa a kameng iti National Democratic Front of the Philippines (NDFP) ti kadur-asan a paset ti masa. Dagitoy ti nakasagana a pagtaudan dagiti rekrut iti Partido. Ti tignay a limed ket rumbeng a palawaen tapno matulungan nga ilemmeng ken ikkan seguridad dagti nangnangruna a kadre ken organisador ti Partido. Kasapulan met nga iyaramid dagitoy ti nalawa a rebolusyonaryo a propaganda tapno pasaknapen ti panawagan para iti gubat ti umili ken riingen ti umili a sumuporta ken agkameng iti New People’s Army.

Nasken a nalaing nga ipakat ti New People’s Army dagiti iskwad ken pangkat na tapno aggawaing masa ken siguraduen ti agtultuloy a panaglangto ti base a masa. Tapno paunegen ti silpo na iti masa, dagiti yunit ti NPA iti gawaing masa ket rumbeng a makaited iti serbisyo a pang-ekonomya, pangsalun-at ken pang-edukasyon iti masa a mannalon, bayat a tartarabayan isuda iti panangiyabante kadagiti anti-pyudal a dangadang da.

Agpinget iti panangiyabante iti demokratiko a rebolusyon ti umili!

Rumbeng a maamwan ti umili a Pilipino a ti kaykaysuna a pamuspusan iti panaglung-aw iti krisis ti malakolonyal ken malapyudal a sistema ket ti panangiyabante iti demokratiko a rebolusyon ti umili tapno ibagsak ti imperyalismo a US ken ti naindasigan a panagari ti dadakkel a burgesya kumprador ken dadakkel nga apo’t daga, babaen ti burukrata-kapitalista ken pasista nga estado da.

Balbaliw a paspasingkedan ti Partido, ti abante a destakamento ti proletaryado a Pilipino, ti pangngeddeng daytoy nga idauluan ti umili a Pilipino iti panangiyabante ti demokratiko a rebolusyon ti umili babaen ti naunday a gubat ti umili umannurot iti estratehiko a linya ti panangkubkob iti kasyudadan manipud iti kaaw-awayan. Tapno iyabante ti rebolusyon, kasapulan nga agtultuloy a papigsaen tayo ti Partido, ti New People’s Army ken ti National Democratic Front.

Bayat nga idadauluan ti masa kadagiti dangadang da iti ekonomya ken pulitika laban iti rehimen US-Marcos, nasken nga iyabante tayo ti rebolusyonaryo nga armado a dangadang.

Babaen ti panagilinteg kadagiti nagkamalian, pagkapuyan ken pagkurangan iti napalabas, panggep tayo a papigsaen ti New People’s Army, subboten dagiti napukaw ken paayen ti estratehiko nga opensiba ti kabusor. Rumbeng a nalawag ti pannakaawat ti amin a kadre ti Partido ken dagiti kumander ken mannakigubat ti NPA iti diyalektika ti naunday a gubat ti umili, nu kasano daytoy a dumurdur-as iti nalabit a tukad ti estratehiko a depensiba, estratehiko a panagpatas ken estratehiko nga opensiba.

Babaen ti panagabante ti pannakigubat a gerilya iti uneg ti atiddog a panawen, ti New People’s Army ket makaabante manipud iti kinabassit ken kinakapsut agturong kinadakkel ken kinapigsa, babaen ti paset-paset a panangrebbek iti kabusor. Nupay kasta, dagiti nagkamalian ken pagkurangan kas ti adelantado a regularisasyon ken abenturismo a militar, ken panagpaakikid iti bagi ken konserbatismo a militar, ti NPA ket mabalin a mapwersa nga agatras iti sigud a tukad na. Iti intero a panawen ti estratehiko a depensa, ti NPA ket agisaysayangkat ti nasaknap ken nairteng a pannakigubat a gerilya basar iti lumawlawa ken umun-uneg a base a masa.

Awit ti nalawag a pannakaawat iti agdama a balanse dagiti pwersa ken tukad ti gubat ti umili, dagiti yunit ti NPA ket balbaliw a naisimpa ken naipakat tapno mas epektibo nga aggawaing masa tapno subboten ken palawaen ti base a masa ken mangisayangkat ti gubat a gerilya laban iti kabusor. Dagiti Nalabbaga a mannakigubat ti NPA ket kasapulan nga agtultuloy nga agpakalaing kadagiti taktika a gerilya ti konsentrasyon, dispersal ken panagakar-akar tapno paayen ti estratehiya a “gradual constriction” ti kabusor ken dagiti nakapokus ken tuluy-tuloy nga operasyon militar.

Kasapulan nga alaen ti amin a platun gerilya ken dagiti iskwad ti NPA, karaman dagiti yunit ti milisya ken dagiti kwerpo a depensa-iti-bagi ti inisyatiba nga agisayangkat kadagiti taktikal nga opensiba, nga agpili kadagiti target a mabalin da a pugipogen. Iti tunggal gundaway, nasken a biraenda ti adu a nakapsut a paset ti kabusor. Saan a kurang ti maaramat nga armas, kabilang ti napipigsa a riple wenno dagiti aramid a paltog, bomba, granada, molotov, pana, gayang, palab-og wenno palsiit. Nasken a pagplanuan da ti panagala ti armas ti kabusor tapno armasan dagiti baro a Nalabbaga a mannakigubat ti NPA.

Ti tunggal dadakkel wenno babassit a taktikal nga opensiba nga isayangkat ti tunggal yunit gerilya ti NPA a basar iti kabaelanda ket saan a matawaran a kontribusyon iti dangadang ti umili a Pilipino laban iti aso-aso ken pasista a rehimen Marcos. Agpatpatibker daytoy iti uneg ti umili a Pilipino iti panangisayangkat da ti amin a langa ti panaglaban, ken mangmangted inspirasyon kadakuada a dalyasaten ti dana ti rebolusyonaryo nga armado a dangadang.

Ti NPA ket mangmangted met inspirasyon iti amin a maidadanes a dasig ken umili iti intero a lubong, a kas kadakuada ket makilablaban para iti wayawaya ti pagilyan ken kagimongan. Ti panangiyabante ti nailyan-demokratiko a rebolusyonaryo a dangadang iti Pilipinas ti kadakkelan a kontribusyon ti umili a Pilipino iti sangalubongan a dangadang laban iti imperyalismo ken panaglaban kadagiti gubat nga imperyalista.

Natalek tayo a babaen ti panangpauneg ken panagpalawa iti tignay panagilinteg, mabukel tayo ti maysa a natibtibker ken nabilbileg a Communist Party of the Philippines, ken maidauluan ti demokratiko a rebolusyon ti umili agturong iti dakdakkel pay a balligi kadagiti umay a tawen.

Iyabante ti tignay panagilinteg!

Itag-ay ti bandera ti Marxismo-Leninismo-Maoismo!

Agbiag ti umili a Pilipino!

Agbiag ti sangalubongan a proletaryo!

Agbiag ti Communist Party of the Philippines!