DOWNLOAD

Samtang mataas nga ginawagayway ang Pula nga bandera sang Marxismo-Leninismo-Maoismo kag angkon ang lubos nga determinasyon nga pamunuan ang pungsodnon-demokratikong rebolusyon sang pumuluyong Pilipino, ginapaabot sang Komite Sentral sang Partido sang Pilipinas ang mainit nga pagpanamyaw sini sa tanan nga mga kadre kag aktibista sang Partido, mga Pulang hangaway sang Bagong Hukbong Bayan, mga alyado sa National Demokratic Front kag malapad nga masa sang pumuluyong Pilipino sa okasyon sang ika-56 nga anibersaryo sang pagkatukod sang Partido.

Sa okasyon nga ini, nagapanawagan kami sa bug-os nga Partido kag tanan nga rebolusyonaryo nga mga pwersa nga:

Padalumon kag palaparon ang kahublagan panadlong! Labi nga pabaskugon ang Partido! Manggamot sang mas madalom sa masa kag pamunuan ang ila pagpakig-away sa pasista kag burukrata-kapitalista nga rehimen US-Marcos! Magpanikasog sa pagsulong sang demokratikong rebolusyon sang banwa!

Subong nga adlaw, nagasaludo kami kay Jose Maria Sison, pangulo nga tagtukod sang Komite Sentral, nga nagsulat sang mga sinulat teoritikal nga padayon nga nagahatag kasanag sa rebolusyonaryo nga banas sang pumuluyong Pilipino. Tubtob katubtuban nga dumdumon sang bag-o nga henerasyon sang mga kadre sang Partido kag hangaway kag kuhaan sang inspirasyon ang bug-os nga kabuhi sang komunista nga dedikasyon ni Ka Joma sa proletaryado kag sa tanan nga ginapigos kag ginahimuslan nga mga sahi.

Ginapasidunggan namon ang tanan nga mga baganihan kag martir sang pumuluyong Pilipino nga wala sang pagkangilin nga naghalad sang kabuhi para sa pungsodnon-demokratiko nga handum sang pumuluyong Pilipino. Ginahatagan namon sang pinasahi nga pagkilala ang tanan nga mga lider sang Partido kag mga Pulang hangaway sang Bagong Hukbong Bayan nga nadagas sa pagsulong sang inaway banwa kag pakig-away sa pasistang rehimen US-Marcos sang nagligad nga tuig. Ang ila mga ngalan tubtob katubtoban nga nalista sa kasaysayan sang rebolusyon Pilipino.

Sa okasyon sang anibersaryo sang Partido, ginapaabot man namon ang militante nga rebolusyonaryo nga pagpanamyaw sa tanan nga kontra-imperyalista, progresibo kag demokratikong mga partido, organisasyon kag kahublagan sa bug-os nga kalibutan nga nagapakig-away sa imperyalismong US kag nagahimakas sa imperyalistang mga gyera kag peligro sang gyera. Ginapaabot namon ang pagpanamyaw sang pagpakig-abyan sa tanan nga rebolusyonaryong komunista nga nagatuon, nagatib-ong kag nagadapat sang Marxismo-Leninismo sa ila matag-pungsod, kag nagapamuno sa mga mamumugon kag pumuluyo sa ila paghimakas para sa pungsodnon nga kahilwayan kag sosyalismo.

Ginahanduraw naton ang ika-56 nga anibersaryo sang Partido nga matalum nga ginahakos kon paano ang madasig nga nagalala nga internasyunal kag lokal nga krisis sa ekonomiya kag pulitika nga nagatuga sang mga kondisyon nga paborable sa paglunsar sang rebolusyonaryong paghimakas.

Ang pangkalibutanon nga sistemang kapitalista padayon nga may kinaiya sang mga paghinay sa ekonomiya, lapnagon nga disempleyo, kag nagadako nga peligro sang istagplasyon kag resesyon. Ginapaypayan kag ginasulsolan sang imperyalismong US ang armadong mga kagamo sa Europe, sa Middle East kag Asia. Ginapakig-awayan sang mga mamumugon kag pumuluyo ang imperyalistang mga gyera, gyerang proxy, pasista nga pagpamigos, pagkaltas sang pondo sa serbisyo publiko, nagataas nga mga presyo, kag ginpabaskog ang ila singgitan para sa mas mataas nga sweldo kag iban pa nga hinanali nga demokratikong mga demanda.

Puno sang krisis sa ekonomiya kag pulitika ang nagahari nga sistema sa Pilipinas. Ang sosyo-ekonomiko nga kahimtangan sang puluan ka milyon nga Pilipino nagabulusok tungod sa wala untat nga pagsarurot sang lokal nga ekonomiya nga nakasalig-sa-import kag nakatum-ok-sa-eksport. Ang tayuyon nga paghuyang sang lokal nga produksyon sa agrikultura kag industriya nagresulta sa nagataas nga disempleyo kag lapnagon nga dislokasyon pang-ekonomiya. Sa pihak nga bahin, ang dumuluong nga kapitalistang ganansya kag manggad sang lokal nga oligarkiya padayon nga nagadako halin sa pagpamigos sa mga mamumugon kag duna nga manggad, kag halin sa pangpubliko nga paggasto kag ayuda nga ginpondohan sang utang. Nagagrabe ang korapsyon kag pangpulitika nga pagpamigos sa idalum sang burukrata-kapitalista kag pasista nga rehimen ni Marcos. Ang nagahari nga sistema napun-an sang padayon nga nagasingki nga krisis pang-pulitika. Ang pagyaob sang rehimeng Marcos sa heyopulitikal nga interes sang US nagabutong sa pungsod sa alimpuros sang inter-imperyalista nga gyera.

Ang nagalala nga krisis sa ekonomiya kag pulitika sang nagahari nga sistema sa idalum sang rehimen Marcos padayon nga nagatulod sa pumuluyong Pilipino nga maghulag kag maglunsar sang kolektibo nga paghimakas agud ipakig-away ang ila hinanali nga mga demanda. Nagatuga ini sang labi ka paborable nga kondisyon agud manggamot ang Partido sang mas madalum kag mas malapad sa masa para mapamunuan sila sa ila paghimakas batuk sa rehimen US-Marcos.

I. Sa tunga sang kapitalistang istagnasyon, ginapaypayan sang imperyalismo ang mga gyera kag ginasulsolan ang inaway

Ang kapitalista nga kalibutan ginabayo sang mga kagamo nga naghalin sa mga kontradiksyon sa tunga sang monopolyong burgesya kag proletaryado, sa tunga sang imperyalismo kag pumuluyo sang pigos nga mga pungsod, sa tunga sang imperyalismo kag mga pungsod nga nagaduso sang pungsodnon nga sobereniya, kag sa tunga sang nagabanggi-anay nga imperyalistang gahum. Sa subong, ang madasig nga nagasingki nga inter-imperyalistang kagamo ang nagabug-os sa nagapanguna nga kontradiksyon nga nagahorma sa subong nga pangkalibutanon nga sitwasyon, samtang nagapanulsol kag nagaduso sang mga gyera ang imperyalismong US sa lain-lain nga bahin sang kalibutan.

Ang kapitalista nga kalibutan ginabayo sang mga kagamo nga naghalin sa mga kontradiksyon sa tunga sang monopolyong burgesya kag proletaryado, sa tunga sang imperyalismo kag pumuluyo sang pigos nga mga pungsod, sa tunga sang imperyalismo kag mga pungsod nga nagaduso sang pungsodnon nga sobereniya, kag sa tunga sang nagabanggi-anay nga imperyalistang gahum. Sa subong, ang madasig nga nagasingki nga inter-imperyalistang kagamo ang nagabug-os sa nagapanguna nga kontradiksyon nga nagahorma sa subong nga pangkalibutanon nga sitwasyon, samtang nagapanulsol kag nagaduso sang mga gyera ang imperyalismong US sa lain-lain nga bahin sang kalibutan.

Padayon nga nagabalang-balang ang kapitalistang sistema tungod sa sobra nga produksyon sang mayor nga mga baligya, kon diin ang tayuyon nga sobra-sobra nga kapasidad nagatambak sang indi mabaligya nga imbentaryo sang mga produkto nga manupaktura (lakip ang pang-konsumo nga elektroniks, mga kagamitan pangbalay, awto, makinarya, salsalon kag materyal sa konstruksyon) kag produkto nga pang-agrikultura (soy beans, trigo, mais kag iban pa). Nagresulta ini sa masingki nga kapitalistang kompetisyon agud agawon ang kontrol sa mga merkado, subongman ang ginakuhaan sang hilaw nga materyales agud mapanubo ang gasto sa pagtuga sang mas madamuan nga baligya. Ang ginbunga sini nga pagkabangkarote, pag-isa kag pagbakal naglab-ot sa mas pa nga konsentrasyon sang kapital sa kamot sang pipila ka monopolyo.

Nagapabilin nga napuno sang krisis sa ekonomiya kag pinansya ang kalibutanon nga kapitalismo. Masobra isa kag tunga ka dekada na ini nga nalumos sa istagnasyon sang mahinay nga pag-uswag, kon diin madamo sang nagapanguna nga kapitalistang pungsod ang permanente nga yara sa bibi sang resesyon. Napaslawan ang “pagbawi” pagkatapos sang pandemya nga abuton ang daan nga lebel sang produksyon. Ang pangkalibutanon nga pag-uswag sang ekonomiya wala ginasigahum nga maglapaw sa 3% subong kag sa masunod nga tuig. Madasig nga nagakawasak kag nagakaagnas ang produktibong mga pwersa sa tunga sang mga pagsira kag kakasanay. Naga-antus ang mga mamumugon kag masang anakbalhas sa nagabagsak nga kahimtangan sa ekonomiya samtang ang pinakadalagko nga mga kapitalistang bilyonaryo padayon nga nagakamal sang manggad. Ang nagadalum nga limitasyon sa ikasarang nga magbakal sang sahing mamumugon nagatuga sang baral sa pangkonsumo relatibo sa produksyon. Ginatublag sang nagadaku nga proteksyunismo kag heopulitikal nga tensyon ang ilig sang bayluhanay kag nagatuga sang mga upang sa merkado nga nagapalala lang sa sobra nga produksyon.

Pareho sang nagligad, ang pangkabug-osan nga demanda ginaduso sang utang kag indi sang nagataas nga sweldo kag ikasarang nga magbakal sang sahing mamumuugon. Nagahabok ang pangkalibutanon nga utang padulong sa $322.9 trilyon, nga nagsaka sang $12 trilyon sa una nga kwarto sang 2024. Katumbas ini sang 326% sang pangkalibutanon nga gross domestic product (GDP). Ang dako nga parte sang dumuluong nga utang sadtong 2024 nagkadto sa pagpondo sa mga proyektong imprastraktura nga naghatag ligwa sa pagsulod sang multinasyunal nga mga kumpaniya, lakip ang sa subong ginpakete sa idalum sang ginatawag nga “green economy” (solar, mga proyektong nukleyar kag iban pa). Sadtong 2023, ang kabug-osan nga $1.4 trilyon nagkadto sa pagbayad sang dumuluong nga utang. Masobra sa 35 ka pungsod ang ginalupog sang utang kag yara sa peligro nga indi makabayad. Nagatuga sang ispekulatibong bukal sa mga stock, real estate, kag bisan sa mga cryptocurrency ang ginpahabok nga sektor pang-pinansya.

Nagapabilin nga yara sa istagnasyon ang ekonomiya sang US kon diin ang pag-uswag ginasigahum nga magalab-ot lang sa 2.7% subong nga tuig. Ginapas-an sini ang $35.5 trilyon nga utang nga 123% sang pangkabug-osan nga kadakuon sang ekonomiya sini. Suno sa upisyal nga mga estadistika, yara sa 16 milyon ka Amerikano nga mamumugon ang wala ukon kulang sang trabaho, apang suno sa independyente nga pagtantya yara sa 110 milyon ang wala sang trabaho. Samtang padayon nga nagakamal sang manggad ang 20 ka bilyonaryo nga Amerikano nga nagauyat sang $2.7 trilyon, ginabana-bana nga 43 milyon ka Amerikano ang nagakabuhi sa kaimolon, nagaantus sa nagalala nga kahimtangan sosyo-ekonomiko sa tunga sang nagataas nga implasyon, nagadako nga utang sang pumuluyo, manubo nga sweldo, pagsaka sang isip sang mga wala sang puluy-an, kag kawad-on sang akses sa pangpubliko nga pag-atipan sa ikaayong lawas. Temporaryo nga nasuportahan ang ekonomiya sang US sa pagsikad sang merkado sa pinansya kag stock sa US tungod sa pagsulod sang pangkalibutanon nga kwarta nga nagapangita sang luwas nga butangan, apang delikado nga palukpon sang krisis sa pinansya.

Ang pinakadako nga ekonomiya sa Europe naga-atubang man sa istagnasyon. Pagkatapos nga magsarurot sa resesyon sadtong nagligad nga tuig, ang ekonomiya sang UK ginasigahum nga mag-uswag sang indi maglapaw sa 1% subong nga tuig. Ginasigahum nga magkitid ang ekonomiya sang Germany sang 0.2% subong nga tuig halin sa 0.3% nga pagnubo sadtong nagligad nga tuig, tungod sa mahuyang nga demand para sa produktong manupaktura. Sa atubang sang wala sang tupong nga pangpubliko nga depisito, ang ekonomiya sang France ginasigahum nga mag-uswag sang indi maglapaw sa 1.1% subong nga tuig, kag 0.9% sa masunod nga tuig. Ginaatubang sang mga mamumugon kag pumuluyo sang Europe ang wala kasegurohan sa trabaho, nagalala nga kahimtangan sa pangabuhi, kondisyon sa trabaho, pagpahugot sang paha, nga nagresulta sa nagagamay nga akses sa serbisyo pangkatilingban, kag kulang nga sweldo nga indi makasarang nga suportahan ang nagasaka nga balor sang pangabuhi.

Ang ekonomiya sang Japan nagapabilin nga yara sa malawigon nga istagnasyon. Ginabana-bana nga magauswag ini sang mas manubo pa sa 1% subong nga tuig. Ginapiang ini sang $8.6 trilyon nga utang nga sobra 250% sang ekonomiya sini. Ang ekonomiya sang China ginasigahum nga mag-uswag sang indi magsobra sa 5% subong nga 2024, mas mahinay kumparar sa nagligad nga tuig kag pinakahinay halin dekada 1990. Ginatay-og ini sang krisis sa real estate sa tunga sang sobra nga suplay sang pabalay, nagagamay nga pangapital kag utang nga indi mabayaran sang mga debeloper sa real estate, nagataas nga utang sang pumuluyo kag nagahinay nga lokal nga paggasto sa konsumo. Sa tunga sang pangkabug-osan nga paghinay sang pangkalibutanon nga ekonomiya, nagapangita ang China sang mga pamaagi nga papagsikon ang iya ekonomiya sa atubang sang sobra nga produksyon nga duna sa kapitalismo kon diin sobra ang ikasarang sang mga produktibong pwersa nga magtuga sang mga baligya sang sa ikasarang ikonsumo ini sang merkado. Nagaatubang ini sa mga kontradiksyon nga duna sa banas sang pag-uswag sang kapitalismo.

Ang dako nga mayoriya sang mga pungsod sa Asia, Africa kag Latin America nagapabilin nga atrasado kag agraryo, kag nagaserbe nga tig-eksport sang hilaw nga materyales, ukon bilang tig-suplay sang barato nga kusog pangabudlay para sa mga korporasyon nga multinasyunal. Ang pangkalibutanon nga kapitalistang istagnasyon nagresulta sa mas manubo nga demand para sa barato nga eksport,kag nagapahinay sa dumuluong nga pangapital sa pagmanupaktura sa assembly-line. Labi sila nga ginapabudlayan sang nagataas nga depisito sa bayluhanay kag lebel sang utang. Nagaantus ang mayoriya sang pumuluyo sa nagalala nga kahimtangan sosyo-ekonomiko, nga nagaunod sang kapigaduhon, kagutuman, wala sang kinaalam, malnutrisyon, kag balatian, kag grabe nga epekto sang mga kalamidad nga dala sang pagbag-o sa klima, nga bunga sang pila ka tuig nga imperyalistang pagpangkawkaw sa ila mga pungsod.

Ginpalala sang pangkalibutanon nga kapitalistang istagnasyon ang mga kagamo sa ekonomiya kag pulitika sa tunga sang mayor nga imperyalistang mga gahum. Samtang padayon nga ginaduso sang US ang patakaran neoliberal agud buksan ang ekonomiya sang mga malakolonyal kag sang mga kapitalistang pungsod nga kasumpong sini, nagapatuman ini sang nagadamo nga tikang proteksyunista sa nagligad nga isa kag tunga ka dekada, sa pagtinguha nga liwat pasikaron ang lokal nga produksyon industriyal.

Nagbubo ang gobyerno sang US sa idalum ni Biden sang kapin $40 bilyon agud suportahan ang produksyon sang semikonduktor nga may katuyuan nga kontrolon ang 30% sang pangkalibutanon nga suplay, kag direkta nga gintapatan ang Taiwan kag Japan. Ginpasakaan sini ang tantos sang taripa sang lain-lain nga tipo sang mga produkto nga gina-import halin sa China. Dugang pa diri, nagpatuman ini sang pagpang-ipit sa ekonomiya kag pinansya sa Russia, nga may partikular nga katuyuan nga buhinan ang eksport sang Russia sang lana kag natural gas sa Europe. Ang manugsulod nga presidente sang US nga si Trump nagdeklarar na sang mga plano para mas pa pataason ang taripa sang China, subongman sa gina-import nga mga produkto halin sa Mexico kag Canada.

Ang duso sang US para sa proteksyunista nga mga tikang gintapatan na sang mga kontra-tikang sang imperyalistang mga kasumpong sini. Sa inisyatiba sang Russia kag China, ang BRICS (Brazil, Russia, India, China kag South Africa) sang sini lang ginpalapad agud sakupon ang apat pa ka mga pungsod (Egypt, Ethiopia, Iran kag United Arab Emirates), magluwas pa sa gindeklarar nga plano nga magdugang sang 13 ka “kabulig” nga pungsod. May mga pagtinguha man nga pauswagon ang alternatibo nga sistema pangpinansya kasubong sang insiyatiba nga BRICS cross-border payment (sistema nga binayranay sang mga pungsod), kwarta nga digital sang mga bangko sentral,kag iban pa nga sistema agud papagsikon ang baligyaanay nga wala nahigot sa dolyar sang US, nga nagabuhin sa bulnerabilidad sang mga ini sa pagpang-ipit sang US.

Ang nagasingki nga kumpetisyon sa ekonomiya nga naghalin sa pagtilaw sang monopolyong burgesya sang US nga punggan ang estratehikong pagbagsak sini naglab-ot na sa nagasingki nga mga kagamo-militar. Ang imperyalistang US ang pinakamapang-gyera sa tanan nga imperyalistang gahum samtang ginatinguhaan sini nga lupugon ang mga karibal sa handum nga liwat itukod ang kaugalingon bilang solo nga superpower. Sa subong, nagapanguna ini sa paglibod sang mga gyera sa bug-os nga kalibutan. Aktibo sini nga ginagatungan kag ginasulsolan ang mga gyera nga may katuyuan nga agawon ang estratehiko nga mga rekurso halin sa kontrol sang iya mga kasumpong. Ang pagbalik liwat ni Donald Trump bilang pangulo sang US nagpabwelo sa pagtuhaw sang mga grupo nga neopasista sa US. Ang agresibo nga pagduso niya sang proteksyunista nga mga patakaran sa US mas nga magagatong sa banggaan inter-imperyalista, sa China kag sa Russia, subongman sa tradisyunal nga mga alyado sang US.

Sa pagpa-armas sa Ukraine kag pagpusisyon sang mga armas malapit sa sidlangan nga dulunan sang pungsod sa Russia, nagmadinalag-on ang US sa paggarit-garit sa Russia nga nag-atake sadtong 2022. Halin sadto ginhatagan sini ang Ukraine sang masobra $115 bilyon sa dagway sang ayuda, masobra katunga sa dagway sang mga armas agud padugayon ang gyera sa katuyuan nga gasgason ang Russia. Agud mas pa nga pasingkion ang gyera, “ginpasugtan” sang sini lang sang US ang Ukraine nga magbuhi sang mga misayl nga mid-range padulong sa Russia, nga gintapatan sang Russia sa una nga higayon nga paggamit sang mga hypersonic nga misayl.

Padayon nga ginasuportahan sang US ang gyerang henosidyo sang Zionista nga Israel batuk sa pumuluyong Palestino sa Gaza nga nagpatay na sang masobra 45,000, lakip ang 17,000 ka bata, kag nagpilas sa naglab-ot sa 110,000 ka tawo. Ginhatagan sini ang Israel sang kapin $18 bilyon nga ayuda militar, lakip ang mga bomba kag misayl nga gingamit sang Israel sa pagpangbomba kag pagpangkanyon sa Gaza. Ginkumpormihan kag ginsuportahan man sang US ang mga airstrike sang Israel batuk sa Iran sadtong Oktobre, kag batuk sa Lebanon sadtong Nobyembre nga nagpatay sa 3,800 ka tawo kag nagpilas sa kapin 16,000. Nakigkunsabo ang US sa Israel, Turkey, sa UK kag mga pwersa sa NATO agud iduso ang pagpalayas sa presidente sang Syria nga si Bashar al-Assad (nga nagpanahanugot sa Russia nga magpabilin sang base militar) kag pagpabagsak sa gobyernong Syrian. Halin sadto, ginsuportahan sang imperyalismong US ang pagsakop sang Israel sa Golan Heights, paglunsar sang airstrike kag pag-abanse padulong sa sentro sang Syria, samtang ginaduso ang mas dako nga kontrol kag impluwensya sa pagtukod sang bag-o nga gobyerno.

Samtang ginapaypayan ang mga gyera sa Ukraine kag sa Middle East, ang mga pwersang militar sang US sa luwas sang pungsod mayor nga nagaduso sang ginatawag sini nga rehiyon nga Indo-Pacific, santo sa “pagliso sa Asia,” nga may prinsipal nga katuyuan nga ikahon ang China kag targeton ang Democratic People’s Republic of Korea (DPRK). Padayon sini nga ginapalig-on ang mga base militar sa Japan kag South Korea, subongman sa Pilipinas. Gintulod sini ang Japan nga dugangan ang gasto sa militar kag palaparon ang mga pwersang militar sini para magsuporta sa mga pwersang militar sang US. Gingamit sini ang Pilipinas bilang base sang mga operasyon sa South China Sea sa katuyuan nga painiton ang konplikto sa China.

Padayon man nga ginalunsar sang US ang interbensyon sa pulitika kag militar batuk sa mga pungsod nga nagaduso sang pungsodnon nga sobereniya. Ginapatigayon sini ang tanan nga dagway sang pagpabagsak batuk sa mga gobyerno sa Venezuela, Cuba kag iban pa nga mga pungsod sa Latin America. Gintarget man sini ang Iran, nga malig-on nga nagapanindugan batuk sa interbensyon sang US sa Middle East.

Nagatulod sang mga paghimakas masa kag tanan nga porma sang pakig-away ang imperyalistang krisis kag mga gyera. Natukod ang mga malapad nga alyansa sa tunga sang mga kahublagan kontra-imperyalista sang pumuluyo, subongman ang mga gobyerno nga batuk sa interbensyunismo sang US. Ginkuha sang Venezuela ang inisyatiba sa pagtukod sang isa ka kontra-pasista nga nagahiliugyon nga prente batuk sa imperyalismong US.

Naglupok ang mayor nga mga paghimakas sang mamumugon sa US kag iban pa nga mayor nga mga kapitalista nga pungsod agud igiit ang mas mataas nga sweldo kag mas maayo nga mga kondisyon sa pamugon, lakip ang welga sang 50,000 ka mamumugon sa pantalan sa US sadtong Oktobre, kag sang 33,000 ka mamumugon sa kumpaniya nga Boeing. Ginatos ka libo nga mamumugon ang nagwelga sa France bilang protesta sa pagkaltas sang badyet sa serbisyo pangpubliko. Ang mga mamumugon sang Germany naglunsar sang pungsodnon nga welga sadtong Oktobre para sa mas mataas nga sweldo. Mayor nga mga welga sang mamumugon man ang nalunsar sa Belgium, Finland, Italy, Spain, The Netherlands, Cyprus kag iban pa nga mga pungsod. Mga dalagko nga protesta sang mamumugon man ang ginpatigayon sa South Korea agud ipanawagan ang pagpahalin sa nagapungko nga presidente. Mayor nga mga aksyon protesta man ang padayon nga ginalunsar sa bug-os nga kalibutan agud iduso ang pagtapos sang pag-eksport sang armas sang US sa Israel kag ipanawagan ang pag-untat sang Zionista nga henosidyo sa mga Palestino. Sa tunga sang lapnagon nga protesta sang mga mamumugon, ang mga kondisyon labi nga nangin paborable, ilabi na sa mga kapitalista nga mga pungsod, agud mag-usbong ang militante nga mga alyansa kag konseho sang mga mamumugon para magserbe nga malapad nga nagahiliugyon nga prente sa ginapakig-away nga demanda sa ekonomiya kag pulitika.

Sa mayoriya sang mga pungsod sa bug-os nga kalibutan nga nagapabilin nga malakolonyal kag malapyudal ang kahimtangan, ang malapad nga masa sang mamumugon kag mangunguma, mala-proletaryado kag petiburgesya kag iban pa nga pigos nga mga sahi kag sektor nagalunsar sang militante nga mga paghimakas agud ipakig-away ang ila mga kinamatarung sa ekonomiya kag pulitika, batuk sa papet kag korap nga mga gobyerno. Ginalunsar nila ang tanan nga dagway sang pakig-away agud isulong ang ila kawsa para sa pungsodnon nga kahilwayan, partikular halin sa imperyalistang dominasyon sang US.

Nagalapad ang internasyunal nga praternal nga kahublagan kag organisasyon sang pumuluyo. Nagaani sila sang mayor nga mga kadalag-an sa pagpatuman sang mga resolusyon sang International People’s Tribunal bahin sa internasyunal nga makatawo nga laye, lakip na ang angot sa kahimtangan sang Pilipinas. Makita ini sa asod-asod nga mga pangkalibutanon nga mga asembliya nga lunsay wala sang tupong ang kadakuon kag kalaparon.

Ang mga paghimakas para sa pungsodnon nga kahilwayan sang pigos nga mga sahi kag pumuluyo sa mga pungsod malakolonyal kag malapyudal suportado sang paghimakas sang mga gobyerno nga nagapangapin sa ila pungsodnon nga sobereniya kag nagapakig-away sa agresyon, interbensyon kag subersyon sang imperyalistang US.

Padayon man nga ginasulong ang armadong pakig-away sang mga pumuluyo sa palibot sang kalibutan nga nagahimakas para sa pungsodnon nga kahilwayan. Ang mga pwersang rebolusyonaryo sa Palestine nagapabilin nga malig-on sa ila armadong paghimakas batuk sa pagpangsakop sang Israel sa ila kadutaan. Ang pumuluyong Kurdish nagalunsar man sang ila armadong pakig-away agud itukod ang isa ka independyenteng pungsod. Padayon nga nagapakig-away ang etniko nga minoryang mga grupo kag ila mga hukbo sa pasista nga rehimen nga Tatmadaw sa Myanmar. Padayon man nga ginapamunuan sang mga partido komunista ang armado nga pakig-away sa Turkey, Colombia, sa Pilipinas kag iban pa nga mga pungsod.

II. Nagalala nga kahimtangan sa ekonomiya, labi nga pagka-agnas sang pungsodnon nga sobereniya kag nagasingki nga pasistang pagpanumpo sa idalum sang rehimen US-Marcos

Padayon nga nagalala ang permanente nga krisis sa Pilipinas, nga nagapalubha sa sosyo-ekonomiko nga kahimtangan sang malapad nga masa sang pumuluyong Pilipino. Ang nagatagumatayon nga malakolonyal kag malapyudal nga moda sang produksyon nagaunod sang pagkawasak sang produktibong mga pwersa kag paglala sang pinakalubha sini nga aspeto.

May yara sang malaparan nga pagkawasak sa lokal nga produktibong pwersa nga nagalab-ot sa paghinay sang produksyon (sa pagmanupaktura kag agrikultura). Nagabunga ini sang lapnagon nga disempleyo, labi nga pagsandig sa imported nga produkto para sa konsumo kag pagtimbuok sang presyo.

Nagapabilin nga atrasado kag agraryo ang lokal nga produksyon. Wala sang sandigan nga mga industriya nga pwede magsuporta sa pag-uswag kag paglapad sang ekonomiya. Ginawasak sang dinekada nga liberalisasyon sa importasyon kag pagkambyo-gamit sang duta ang lokal nga produktibong mga pwersa, ilabi na ang lokal nga produksyon sa agrikultura. Ang produktibidad sa agrikultura nag-usmod sang nagligad nga tatlo ka tuig nga nagresulta sa makasaysayan nga depisito sa baligyaanay sa agrikultura, nagalala nga pagsandig sa importasyon sa pagkaon, kag nagausmod nga palangabuhian sang masang mangunguma. Ang parte sang ekonomiya sang sektor sang pagmanupaktura industriyal nag-usmod sa pinakanubo nga lebel halin 1949. Sa pihak sini, padayon ang wala-untat nga pagpatuman ni Marcos sang neoliberal nga mga patakaran nga nagapalala sa pagsandig sang pungsod sa import, nagapalapad sa mga prebilihiyo kag insentibo sang multinasyunal nga mga korporasyon kag labi nga nagapahuyang sa lokal nga produksyon.

Nagresulta ang mga ini sa mataas nga mga presyo, manubo nga sweldo kag sa pagkadula sang palangabuhian sang minilyon ka masang anakbalhas. Ang permanente nga depisito sa baligyaanay sang pungsod yara sa pinakamataas sa kasaysayan. Tungod wala sang ikasarang ang industriya pang-eksport sang pungsod nga magkita sang dumuluong nga kwarta, labi nga nakasandig ang ekonomiya sa dumuluong nga remitans kag dumuluong nga pautang agud pondohan ang mga import. Ang pangkabug-osan nga dumuluong nga utang sang pungsod naghabok padulong sa $139.6 bilyon sa ulihi nga lista sadtong Septyembre 2024—katumbas sang 31% sang gross domestic product (GDP) nga pinakataas sa halos 15 ka tuig—kon diin $86.9 bilyon ang dumuluong nga utang pangpubliko.

Sa idalum ni Marcos, padayon nga nagatimbuok ang utang sang pungsodnon nga gobyerno, naglab-ot sang sobra sa ₱16 trilyon sadtong Oktobre 2024, ukon dako nga lumpat nga ₱3.2 trilyon ukon 25% bisan wala pa katunga ang anum ka tuig niya nga termino. Ang pagsaka nagapanguna nga nagaserbe sa pagpalapad sang mga operasyon sang dalagko nga burgesya kumprador kag pagbayad sa dumuluong kag lokal nga utang. Ang pangkabug-osan nga bulanan nga utang sang gobyerno Marcos nga ₱204 bilyon sobra ka dako sa gintingob nga bulanan nga pagpangutang sa idalum sang rehimen Duterte (₱131 bilyon) kag Aquino (₱61.5 bilyon). Tayuyon nga nagasaka ang kantidad sang otomatiko nga ginabayad sa utang. Ang bayad sa interes pa lang nagsaka sang 22% halin ₱628.3 bilyon sadtong 2023 padulong ₱763.4 bilyon sining 2024. Natalana ini nga magsaka liwat sang 11% padulong sa ₱848 bilyon sa 2025. Kon tingbon, ang bayad sa interes kag prinsipal mas nagasaka kag nagadako halin ₱1.57 trilyon sadtong 2023, padulong sa ₱2.03 trilyon subong nga 2024 kag tantya nga ₱2.05 trilyon sa 2025.

Ang pangkalibutanon nga istagnasyon sa ekonomiya nagresulta sa paghinay sang lokal nga ekonomiya, partikular sa pag-asembol kag semi-processing. Sa tunga sang sobra nga suplay sa kalibutan, ginasigahum nga magakitid sang indi magnubo sa 10% ang eksport sang semikonduktor, nga magabunga sang pagsira ukon kakasanay sa mga lokal nga kumbuyahan sa pag-asembol. May yara sang kasubong nga kakasanay sa mga kumbuyahan nga nagahimo sang tela, wiring kag iban pa nga produktong pang-eksport.

Pinakataas pa gihapon sa kasaysayan ang isip sang mga Pilipino nga wala sang trabaho. Ginatabunan lang ini paagi sa manipulasyon sa estadistika sang mga ahensya sang estado. Sobra nila nga ginabutong pasaka ang mga kategorya nga “may trabaho” agud isipon bisan ang halos tatlo ka milyon nga wala sang sweldo nga mamumugon sa negosyo sang pamilya, subongman ang puluan ka milyon nga nagapamulot sang basura, mga tindera, gagmay nga opereytor sa transportasyon, nagapanag-iya sang mga sari-sari store, kabulig sa balay, mga Youtuber kag Tiktoker kag iban pa nga impormal nga trabaho. Ang matuod, madamo sa ila nga mga wala sang trabaho ang ginasulod bisan ano nga mapalangitan-an bisan manubo, wala sang kasegurohan kag lebel-kaimolon ang kita kag wala sang benepisyo kag sosyal nga proteksyon. Agud tabunan ang kalalaon sang disempleyo, ginpagamay man sang mga eksperto sa estadistika sang estado ang “labor force participation rate” ukon tantos sang partisipasyon sa kusog pangabudlay agud kakason ang minilyon ka Pilipino sa ginaisip nga mga wala sang trabaho.

Partikular nga malala ang kawad-on sang empleyo sa kubay sang pamatan-on, lakip ang mga nakatapos nga wala sang makita nga trabaho sa patag sang ila gin-eskwelahan. Nagaginutok sa pungsodnon nga sentro kag iban pa nga mayor nga syudad ang tuman ka dako nga reserba nga hukbo sang pamugon. Padayon nga nagataas ang kawad-on sang trabaho sa kaumhan sa atubang sang pagpang-agaw sang duta kag pagpang-agaw sang palangabuhian sang minilyon ka mangunguma. Bangud sini, sobra 7,500 ka mamumugon ang nagabiya sa pungsod kada adlaw agud mangita sang trabaho sa luwas sang pungsod sa una nga siyam ka bulan lang sang 2024, tungod sa kawad-on sang nagakaigo nga trabaho sa pungsod. Gin-report nga halos 11 milyon ka Pilipino ang nagatrabaho sa luwas sang pungsod, lakip ang yara sa anum ka milyon nga migrante nga dokumentado kag indi dokumentado.

Nagabulusok ang talaksan sa pangabuhi sang malapad nga masa sang pumuluyo sa idalum sang rehimen Marcos sa tunga sang tayuyon nga pagsaka sang presyo sang pagkaon, petrolyo, kuryente, tubig kag iban pa nga pangpubliko nga serbisyo kag yutiliti. Sa partikular, permi nga mataas ang implasyon sa pagkaon bangud sa presyo sang bugas nga kontrolado sang mga burgesyang kumprador nga kartel kag ismagler sa pakighimbon sa mga upisyal sang gobyerno. Padayon nga nagadako ang lang-at sang sweldo kag sweldo sang mga mamumugon kag simple nga mga empleyado sa kantidad sang inadlaw nga kinahanglanon sang lima ka tawo nga pamilya. Sa desperasyon nga “makaganyat” sang dumuluong nga kapital, patakaran sang rehimen Marcos nga ilansang ang sweldo.

Nagapaguwa ang mga upisyal ni Marcos sang sobra ka ginpanubo nga datos sa pagtantya sang kaimolon gamit ang manubo nga indi matuod nga talaksan sang kaimolon. Ginapahambog sang rehimen ang pag-uswag sang ekonomiya nga kuno pinakadasig sa rehiyon kag nga malapit na malab-ot sang pungsod ang istatus nga mataas nga nahanunga nga kita. Ang matuod, ang madasig nga nagadako amo ang isip sang mga imol kag nagakagutom nga mga Pilipino. Halin sang magpungko sa poder si Marcos, ang isip sang mga imol nga pamilyang Pilipino nagdako sa 50% (yara sa apat ka milyon) halin walo padulong sa masobra 12 milyones. Ang isip sang nagakagutom nga mga pamilya nagdako sang 120% (3.4 milyon) halin 2.9 milyon padulong sa sobra anum ka milyon. Sa pagtimbuok sang mga presyo kag pagbulusok sang ila ikasarang nga magbakal, nagdako ang isip sang mga pamilya nga wala sang sinoptan sa 1.5 milyon padulong sa sobra 20 milyon. Masobra sa 75% sang mga Pilipino ang imol kag nagaantus, nga ginkumpirma bisan sang mga pagtuon sang bangko sentral.

Samtang nagaantus ang dako nga mayoriya sang pumuluyong Pilipino sa nagalala nga kondisyon sa pangabuhi, kawad-on sang trabaho kag pagkadula sang palangabuhian, nagapagusa naman sa manggad kag pribilehiyo ang mga Marcos kag mga nagahari nga sahi. Ginagasto ni Marcos ang pondo sang publiko para sa pirme nga pagbyahe sa iban nga pungsod, paglupad gamit ang upisyal nga mga helikopter para sa personal nga byahe agud makalikaw sa grabe nga trapik, paghiwat sang mga handaan kag pribado nga konsyerto sa palasyo sang presidente, kag paghatag kahamungayaan sa kaugalingon kag iya pamilya sa isa ka mala-resort nga balay sa Malacañang.

Hayagan nga ginagamit sang rehimen Marcos ang pangpulitika nga pribiliheyo agud bawion ang binilyon ka piso nga manggad nga iligal nga ginkamol sa idalum sang 14 ka tuig nga diktaduryang Marcos Sr (1972-1986) nga ginsekwester sang nagligad nga mga rehimen. Halin sang nagpungko sa poder sadtong 2022, sunod-sunod nga ginbasura sang lokal nga mga korte ang indi magnubo sa walo ka kaso sang korapsyon kag kinawat nga manggad batuk sa pamilya Marcos, nga nagabalor sa indi magnubo sa ₱352 bilyon. Lakip sa mga kaso nga ini ang pondo sang coco levy nga ginkawat nanday Marcos, Juan Ponce Enrile kag Eduardo Conjuangco halin sa mga mangunguma agud magbakal sang stocks, kumpaniya, bangko kag ipautang sa mga kroni.

Kontrolado ni Marcos ang target nga ₱500 bilyon nga pondong publiko nga Maharlika Fund, kon diin ₱75 bilyon na ang nabalhin, nga libre na niya nga ihatag sa ginpaboran nga pribado nga negosyo kag mga proyektong imprastraktura nga ginagarantiyahan sang gobyerno. Sa badyet sang rehimen subong nga 2025, indi magnubo sa ₱1.5 trilyon ang nakatigana sa pagtukod ukon pagpalapad sang mga karsada kag taytay nga puno sang kurakot. Ginkaltasan ang badyet sa edukasyon, ikaayong lawas, kag iban pa nga serbisyo sosyal agud ibalhin sa pork barrel, sa dagway sang ginpagwa nga kwarta pang-subsidyo kag ayuda. Nagtigana ni Marcos sang ₱4.5 bilyon sa kaugalingon nga confidential and intelligence funds.
Ang nagalala nga krisis sang nagahari nga sistema padayon nga nagapatalum sa pangpulitika nga krisis sa idalum sang rehimen Marcos. Ang nagagamay nga rekurso sa ekonomiya nga pagatunga-tungaon sang nagahari nga sahi nagatulod sa nagahari nga mga burukrata kapitalista nga mas mangin sakon kag maghandum sang pribilihiyo kag manggad sang isa kag isa. Naga-inagaway sila sa mga kontrata sa gobyerno agud makuha ang ila bahin sa suhol. Ginagamit nila ang gahum kag pribiliheyo sa gobyerno agud paburan ang ila mga kroni sa negosyo kag loyalista sa pulitika.

Ang konplikto sang mga Marcos kag Duterte, nga nagatiglawas sa duha ka nagapanguna nga paksyon sa subong nga nagahari nga hubon nga naga-inagaway sa pribilehiyo sa ekonomiya kag gahum sa pulitika, nagatalum samtang nagahilapit ang midterm eleksyon 2025, nga ginakabig nga malahalon nga paghanda para sa eleksyon para sa pagka-pangulo sa 2028. Ginrekomendar sang House of Representatives nga dominado sang mga Marcos nga kasuhan si Duterte sang mga krimen sa katawhan, kasubong sang ginpasaka sang mga biktima sang ekstra-hudisyal nga pagpamatay sa International Criminal Court (ICC). Subongman, indi magnubo sa tatlo ka reklamo sang impeachment ang ginpasaka batuk sa bata ni Duterte, si Sara, bise presidente kag anay tiglikom sa edukasyon, tungod sa maanomaliya nga paggamit sa masobra sa ₱500 milyon nga “confidential funds,” magluwas sa madamo pa nga mga isyu. Tungod indi niya segurado ang bug-os nga katampad sang armadong hukbo kag sakup sang nabilin nga impluwensya sang mga Duterte sa militar, ginbitin ni Marcos ang pagpalayas kay Sara Duterte, kag ang paglagas kag pag-aresto sang ICC kay Rodrigo Duterte.

Padayon nga ginapakita sang papet nga rehimen Marcos ang hayagan nga pagyaob sini sa amo nga imperyalistang US. Ginpahanugutan sini ang US nga palig-unon ang tindog militar sa Pilipinas, agud magpakita kag magpalapad sang gahum militar sang US sa rehiyon Asia-Pacific. Kaupod sa mga upisyal sa depensa kag militar sang US, nagpirma ang rehimen Marcos sang Bilateral Security Guidelines kag Security Sector Assistance Roadmap, nga mas pa nga nagahigot sa Pilipinas sa heopulitikal nga interes sa militar sang US. Nagpirma man ini sa isa ka deklarasyon kaupod ang US kag Japan agud magtukod sang trilateral nga alyansa nga maathag nga nagaserbe sa “Indo-Pacific Strategy” sang Pentagon.

Sa idalum ni Marcos, nagdako ang isip sang mga base kag pasilidad militar sang US halin sa apat padulong sa 20, lakip ang mga upisyal nga ginakilala sa idalum sang Enhanced Defense Cooperation Agreement (EDCA), pati na mga lugar nga ginlikom sa publiko. Ang iskema sang US amo nga gamiton ang pungsod bilang lunsaran sang mga operasyon militar kag nabal sa rehiyon nga nakatutok batuk sa China kag sa DPRK. Ginpabilin man sini ang dako nga bulto sang mga pwersang militar sa Japan, South Korea, kag Australia, samtang indi magnubo sa tatlo ka carrier strike group ang tayuyon nga nagasuyod sa kadagatan sa palibot sang China. Nagalunsar ang US sang halos adlaw-adlaw nga paghanas sa gyera sa pungsod. Ang Balikatan exercises sadtong Abril ang pinakadako sa kasaysayan nga ginpakigbahinan sang masobra 11,000 ka soldado nga Amerikano.

Ginapadalagan sang militar sang US ang sentro sang kumand sini sa Palawan, subongman sa mayor nga hedkwarter sang Armed Forces of the Philippines (AFP), agud pamunuan kag ikoordinar ang mga operasyon nabal kag pwersang coast guard sang Pilipinas kag US lakip ang mga “supply mission” sa Ayungin Shoal, “freedom of navigation” kag iban pa nga mga operasyon sa South China Sea nga may katuyuan nga ipakita ang gahum militar sang US. Ang mga operasyon nga ini ang nagatulod kag nagapasaka sang tensyon sa China kag ginahimo nga katimbang sa kampanya agud paypayan ang Sinophobia sa mga Pilipino. Ginasabat sang China ang mga ini sang labi pa nga agresibo nga operasyon nabal kag pangdagat nga nagalapas sa eksklusibo nga kinamatarung sa ekonomiya sang Pilipinas sa West Philippine Sea, kabangdanan nga mas pa nga nangin mabudlay ang malinong nga dayalogo kag resolusyon sa mga banggaan pangdagat sa tunga sang Pilipinas kag China.

Sa mando sang US, padayon nga ginaduso sang rehimen Marcos ang “modernisasyon” sang AFP agud himuon ini nga “inter-operable” ukon mas mahapos nga kontrolon nga pwersa nga pangdugang sang US. Sa idalum sang “foreign military financing” (FMF ukon dumuluong nga pagpondo sa militar) sang US, “ginbalhin” ang mga daan nga mga kagamitan panggyera sa militar sang Pilipinas. Sa idalum sang FMF, nagpasalig ang US sang $500 milyon sa Pilipinas subong nga 2024, kag nagproponer sang $2.5 bilyon nga pakete para sa 2025-2029.

Uyat ang suportang militar kag pinansya sang US, ginpasingki sang rehimen Marcos ang pangpulitika nga pagpanumpo kag mga gyera sang pagsumpo nga nagatarget sa pumuluyong Pilipino kag sa ila organisadong pwersa nga patriyotiko kag demokratiko. Kadungan sini, naglunsar ini sang todo-todo nga kampanya sa disimpormasyon kag gyerang sikolohikal, sa pasulit-sulit nga pagdeklarar nga ang mga probinsya sa bug-os nga pungsod “insurgency-free” ukon wala na sang armadong pakig-away, nga pangtabon sa patarasak nga mga paglapas sa tawhanon nga kinamatarung kag internasyunal nga makatawo nga layi.

Pasulit-sulit nga gindeklarar sang AFP ang plano sini nga pagkambyo halin sa “internal nga depensa” padulong sa “eksternal nga depensa” kag pagpatuman sang “integrated territorial defense system” nga may kinaiya sang pagpalapad kag pagpabaskog sang mga yunit paramilitar (CAFGU) sini. Ang mga deklarasyon nga ini sa publiko paghatag kasegurohan sa imperyalistang amo ni Marcos nga ang iya gobyerno andam nga magtigana sang mas madamo nga pwersang militar agud suportahan ang pwersang militar sang US sa mga operasyon sini sa South China Sea sa panahon nga maga-igting ang inter-imperyalista nga armadong konplikto ukon hayagan nga gyera.

Sa iya pagkabuang sa pagdugmok sa armado kag indi armado nga pakig-away sang pungsod para kakason ang mga upang sa iya burukrata-kapitalista, pasista kag papet nga rehimen, ginagamit ni Marcos ang pinaka-brutal kag wala-puas nga pamaagi sang pagpangsumpo sa pumuluyo. Ginamanduan niya ang AFP nga magpatuman sang layi militar sa libuan ka mga barangay kag komunidad sa kaumhan, nga liwat nagbuhi sa maduguon nga taktika sang pasista nga pagpanumpo sadtong panahon sang ginakangil-aran nga diktadurya sang tiraniko niya nga amay.

Sa tabon sang mga “community support program,” nagapakat ang AFP sang mga hubon sang mga soldado pangkombat agud magtukod sang mga baraks kag detatsment sa sulod sang mga komunidad sa tupad sang mga kabalayan sang mga sibilyan, taliw-as sa internasyunal nga makatawo nga layi. Ginpatuman nila ang ila gahum kag nagasabwag sang kakugmat sa pumuluyo. Ginpaidalum ang mga komunidad sa mala-garison ukon mala-hamlet nga kontrol. Ginaipit sang mga pasista ang kinamatarung sang pumuluyo nga hilway nga makahulag ukon magbyahe gamit ang mga tsekpoynt kag logbook, pagblokeyo sa pagkaon kag komersyo, karpyu kag kon ano-ano pa nga arbitraryo nga mga patakaran. Lakip man sa mga ini ang pagdumili sa mga mangunguma nga magtrabaho sa mga ulumhan sa talana nga mga oras, nga nagahalit sa ila palangabuhian. Nagapostura nga mga hukom, hurado kag berdugo ang mga soldado nga ini sa pagbansag sa mga sibilyan bilang “tagasuporta” ukon “rebelde” kag pagduso sa ila nga “tinluan” ang ila mga ngalan ukon “magsungka” sa militar, guwa sa proseso nga ligal santo sa ila kaugalingon nga layi, kadungan sa mga pagpamahog sang ekstra-hudisyal nga pagpamatay ukon tortyur.

Ang mga pasista nga ini labi nga ginakangil-aran sang pumuluyo. Promotor sila sa paggamit sang ginadumilian nga droga, pornograpiya, prostitusyon kag iban pa nga anti-sosyal nga mga bisyo sa mga pamatan-on sa pagtinguha nga utdon ang ila handum para sa hustisya sosyal. Ginagamo ang kalinong sa mga komunidad sa kada gab-i nila nga pag-inum kag patarasak nga pagpalupok sang pusil sang mga soldado nga hubog. Ang mga soldado nga ini imbolbado sa nagadamo nga isip sang mga kaso nga sekswal nga pagpangharas, pagpangmolestya kag pagpanglugos batuk sa kababaenhan.

Padayon nga nagadamo ang mga masaker, ekstra-hudisyal nga pagpamatay, tortyur, pag-abdak, iligal nga pagpang-aresto kag iban pa nga mga krimen nga himo-himo sang mga soldado. Agud hatagan sang rason ang mga krimen nga ini, nagapaguwa sang peke nga mga pahayag ang AFP nga ang ila mga biktima mga Pulang hangaway nga napatay sa engkwentro, bisan pa ang mga ini lubos nga ginapanginwala sang mga lokal nga residente. May yara mga kaso sang pagpatay sa mga tigulang, bug-os nga pamilya, nagabusong kag mga bata. Pinakalala ang mga kaso sang pangpulitika nga pagpangsumpo, paglapas sa tawhanon nga kinamatarung kag mga krimen batuk sa makatawo nga layi sa mga lugar kon diin ginagamit ang militar agud palayason ang pumuluyo sa ila duta kag sumpuon ang ila pagpamatuk sa pagsulod sang mga dalagko nga kumpaniya sa mina kag plantasyon, mga proyektong enerhiya kag eko-turismo, kag iban pa.

Kasubong nga mga taktika sang pangpulitika nga pagpangsumpo ang ginagamit sang mga pwersang militar kag pulis agud sumpuon ang paghimakas sang pumuluyo sa kasyudaran. Nagapakat sila sang mga hubon sang soldado kag ahente sa mga komunidad sang mga imol nga taga-syudad agud ipaidalum ang pumuluyo sa pagpanilag, pagpangharas, “pagpasungka” kag iban pa nga operasyon sang “pagpabaliskad,” pag-aresto, pag-abdak kag pagpatay. Kakunsabo ang mga kapitalista, ginatumod sang mga ahente sang militar ang mga lider kag organisador sang unyon kag “ginabisitahan” sila sa ila mga balay agud kugmaton sila kag ila pamilya para piliton sila nga mag-untat sa ila hilikutong pag-organisa. Ginatarget man sang mga pwersang militar kag ahente sa paniktik ang mga estudyante, kababaenhan, tawong simbahan, mamumugon sa ikaayong lawas kag iban pa nga sektor. Sa tabon sang “pakig-away sa mapintas nga ekstrimismo,” nagalunsar ang AFP, upod ang National Task Force (NTF)-Elcac kag iban pa nga reaksyunaryo nga ahensya sang estado, sang kampanya sang kontra-komunista nga pagpanglagas nga nagalapas sa mga kinamatarung nga mag-organisa sang pumuluyo kag magpahayag sang ila mga reklamo.

Indi matay-og ang pumuluyong Pilipino sa atubang sang nagalala nga mga dagway sang pagpamigos kag pagpanghimulos kag pasista nga pag-atake. Determinado ang malapad nga masa sang pumuluyo nga ipakig-away ang ila mga kinamatarung, hinanali nga demanda kag pangmalawigon nga mga handum. Padayon sila nga naga-organisa kag nagalunsar sang militante nga paghimakas.

Ginlunsar sang mga drayber kag opereytor sang dyip ang militante nga mga aksyon protesta batuk sa plano sang rehimen Marcos nga i-phase out ang mga dyip nga magadingot sa palangabuhian sang puluan ka libo nga pumuluyo. Matalupangdan naton ang indi matago nga pagpagsik sang aktibidad sang mga mamumugon sa pagtukod sang mga unyon kag pagduso sang demanda para sa dugang nga sweldo. Padayon nga ginasulong ang pila ka lokal nga paghimakas mangunguma batuk sa pagtinguha sang mga agalon mayduta kag dalagko nga burgesya kumprador nga agawon ang ila duta. Ginapabaskog sang mga organisasyon masa ang ila boses para ipanawagan ang mas manubo nga presyo sang bugas, petrolyo, kuryente kag iban pa. Ang mga migrante nga mamumugon, halin sa Europe tubtob sa Middle East, halin sa mga mangingisda tubtob sa mga katimbang sa balay, aktibo nga nagapabaskog sang ila mga organisasyon kag militante nga nagasulong sang ila mga demanda.

May yara man mga aksyon protesta batuk sa paghanas militar sang US sa Pilipinas, batuk sa mga base militar sang US, kag interbensyon militar sa South China Sea. Ginlunsar man ang mga protesta bilang pagbuylog sa pumuluyong Palestino batuk sa henosidyo sang US-Israel sa Gaza.

Ang mga demanda para sa kumpensasyon sa kapaslawan sang estado nga segurohon ang kaluwasan sang pumuluyo ginapanawagan sang mga biktima sang sini lang nga mga kalamidad. Ginbatikos nila ang patakaran sang pagtib-ong sang pagmina kag iban pa nga mga mapangwasak sa kapalibutan nga aktibidad.

Padayon nga nagabaskog ang panawagan nila agud hilwayon ang mga bilanggong pulitikal, pagpatuhaw sa mga biktima sang pwersahan nga pagdula, kag hustisya sa tanan nga mga biktima sang paglapas sa tawhanon nga kinamatarung. Yara man ang nagabaskog nga demanda sa rehimen Marcos nga makigbuligay sa International Criminal Court para arestuhon kag pagbista kay Rodrigo Duterte sa mga krimen batuk sa katawhan. May yara man mga panawagan para sa impeachment ni Sara Duterte bilang bise presidente, samtang ginabatikos man nila ang korapsyon sang rehimen Marcos.

Samtang ginalunsar ang mga aksyon protesta batuk sa pagkaido-ido, korapsyon, pasismo kag kontra-pumuluyo nga mga patakaran sang rehimen Marcos, nagpadalagan ang mga ligal nga pungsodnon-demokratiko nga organisasyon masa, alyansa kag partido pulitikal sang 11- ka tawo nga kandidato sa pagka-senador, dugang sa pila ka grupo nga party-list nga nagapadalagan para sa mga pwesto sa kongreso. Aktibo nila nga ginatib-ong ang pungsodnon-demokratiko nga programa, upod ang programa para sa hinanali nga mga reporma, nga may katuyuan nga hatagan sang kasulhayan ang masa nga nagaantus sa lapnagon nga disempleyo kag madalum nga kaimolon. Ginbuyagyag kag ginahangkat nila ang reaksyunaryo nga eleksyon agud pukawon ang mas madamo nga isip sang pumuluyo, agud engganyuhon sila nga magboto para sa ila mga kandidato, kag mas importante, para magtukod sang bag-o nga mga tsapter kag magrekrut sang bag-o nga mga katapo, para sa mas nga mga dalagko nga paghimakas masa sa palaabuton.

Ang matutom nga pagtinguha agud pukawon, organisahon kag pahulagon ang pumuluyo segurado nga magabunga sang malig-on nga pagmartsa pasulong sang demokratikong kahublagan masa sa maabot nga tuig. Determinado ang pumuluyo nga magtukod, magpabaskog kag magpalapad sang ila mga unyon kag tanan nga tipo sang organisasyon masa para mas epektibo nila nga mapakigbato ang ila mga interes sa ekonomiya kag pulitika, kag isulong ang kawsa sang pungsodnon demokrasya.

Ang nagadalum nga makasahi nga kontradiksyon kag mga nagaigting nga krisis sa ekonomiya kag pulitika sang nagahari nga sistema nagatuga sang paborable nga mga kondisyon para mas nga palaparon kag pabaskugon ang Partido Komunista ng Pilipinas. Yara sa abaga sang mga kadre kag katapuan na sang Parido ang responsibilidad nga ubos-kusog nga magtinguha para mas madalum kag malapad nga manggamot sa masa, agud pukawon kag pamunuan sila sa banas sang demokratikong rebolusyon sang banwa.

III. Malig-on nga nakaugat ang kahublagan panadlong, apang madamo pa sang kinahanglan nga himuon

AAng Partido Komunista sang Pilipinas abanse nga destakamento sang proletaryadong Pilipino. Ginadapat sini ang pangkabug-osan nga teorya sang Marxismo-Leninismo-Maoismo, ang ideolohiya sang sahing mamumugon, sa kongkreto nga kondisyon sang katilingban Pilipinas, nga ginadominahan sang imperyalismong US, kag yara sa idalum sang makasahi nga paghari sang mga dalagko nga burgesya kag mga dalagko nga agalon mayduta. Ginhapag sang Partido ang programa para sa demokratikong rebolusyon sang banwa bilang solusyon sa permanente nga krisis sang malakolonyal kag malapyudal nga sistema, agud hugpungon ang mga makibanwahanon kag demokratikong sahi sang mga mamumugon, mangunguma, mala-proletaryado, gagmay nga burgesya kag pungsodnon nga burgesya.

Gintukod ang Partido sadtong Disyembre 26, 1968, kag halin sadto nagpamuno sa pumuluyong Pilipino sa pagsulong sang pungsodnon-demokratiko nga rebolusyon. Ini isa ka organisasyon nga may mataas nga disiplina santo sa mga prinsipyo sang demokratikong sentralismo. Ginabug-os ini sang mga proletaryadong kadre kag aktibista nga madalum kag malapad nga nakagamot sa masa. Nagapamuno ini sa mga rebolusyonaryong organisasyon kag paghimakas masa sang mga mamumugon, mangunguma kag iban pa nga demokratikong sahi kag sektor. Nagapamuno ini sa Bagong Hukbong Bayan sa pagsulong sang pangmalawigon nga inaway banwa sandig sa estratehikong linya nga palibutan ang kasyudaran halin sa kaumhan. Gintukod sini kag ginpamunuan ang National Democratic Front bilang pinaka-konsolidado nga ubod sang nagahiliugyon nga prente.

Ginagamit sang Partido ang pagsaway kag pagsaway sa kaugalingon agud maseguro nga nagasanto ang rebolusyonaryong praktika sa linya sang Marxismo-Leninismo-Maoismo kag sa mga sandigan nga prinsipyo kag patakaran sini. Tayuyon sini nga ginapakigbatuan ang mga ideya nga burges kag petiburges nga nagagiit sang impluwensya halin sa guwa kag sa sulod sini. Dapat pulupanahon nga ilunsar sang Partido ang mga kampanya sang pagpanadlong, pangkabug-osan man ukon partikular, bilang pamaagi sa pagtadlong sa mga kasaypanan sa mga patakaran kag praktika.

Eksakto isa ka tuig na ang nagligad sang nagpanawagan ang Komite Sentral sa bug-os nga katapuan sang Partido nga maglunsar sang isa ka kahublagan panadlong agud matalum nga tumuron, sawayon kag sikwayon ang tanan nga sahi sang petiburges nga suhetibismo, isa ka sakit nga naglaton sa Partido sa lain-lain nga lebel kag kagrabehon, kag nagpahuyang diri halin sa sulod. Sa sulod sang nagligad nga isa ka dekada ukon sobra pa, ang pagsulong sang rebolusyonaryo nga kahublagan masa gin-upangan sang mga Tuo nga oportunistang tendensya nga konserbatismo, ikogismo, ligalismo, ekonomismo, repormismo kag NGOismo; samtang ginpahuyang ang rebolusyonaryong armadong paghimakas sang kaugalingon nga pagpakitid nga nagdangat sa konserbatismong militar kag pagbuhi sa inisyatibang gerilya.

Ginakalipay namon nga i-report nga ang pangsulod nga kampanya sang pagtuon kag pagsaway sa kaugalingon malig-on nga nanggamot kag padayon nga nagalapnag. Apang madamo pa ang kinahanglan nga himuon. Yara pa lamang kita sa una nga tikang. Padayon nga nagatuhaw ang makahalalit nga impluwensya sang mga kasaypanan, kahuyangan kag kakulangan sang nagligad. Dapat labi pa nga padalumon ang kahublagan panadlong agud desaysibo nga gabuton ang suhetibistang mga ugat sang aton mga kasaypanan, kahuyangan kag kakulangan, agud palig-unon kag pabaskugon ang Partido, kag desaysibo nga pangibabawan ang madugay na nga problema sang istagnasyon, kag ibun-ag ang bag-o nga rebolusyonaryong pagbulwak.

Ang kahublagan panadlong isa ka kahublagan sang pagtuon nga nagatuyo nga ipasaka ang ikasarang sang mga kadre kag aktibista sang Partido nga gamiton ang syentipiko nga teorya kag proletaryong pamaagi sang panghuna-huna bilang mga instrumento agud ubayan kag ipasaka ang lebel sang praktikal nga rebolusyonaryong hilikuton. Liwat nga pagpalig-on ini sang panindugan sa Marxismo-Leninismo-Maoismo, pati man sa mga sandigan nga prinsipyo, pag-analisa kag patakaran sang Partido, kag programa para sa pagsulong sang pungsodnon-demokratiko nga rebolusuyon nga may sosyalistang perspektiba.

Ang subong nga kahublagan panadlong panguna nga nagatuyo nga tadlungon kag pangibabawan ang mga kahuyangan, kakulangan kag kasaypanan nga naghalin sa empirisismo. Ang empirisismo isa ka dagway sang suhetibismo nga naghalin sa kakulangan sang maukod nga pagtuon kag aplikasyon sang teorya agud ubayan, sumahon kag ipasaka ang lebel sang praktika. Luyag naton nga solbaron ang madugay na nga problema sang istagnasyon sa lain-lain nga patag sang rebolusyonaryong hilikuton sa sulod sang halos duha ka dekada, kag pag-atras kag halit halin 2017-2018. Ginahimo ini paagi sa pagsuma sang mga inagihan, patakaran kag programa sang Partido, kag paagi sa isa ka kampanya sang sosyal nga imbestigasyon kag pag-analisa sa sahi sa lain-lain nga lebel sang hilikuton sang Partido.

Ginasulong ang kahublagan panadlong sa atubang sang wala untat kag brutal nga kampanya sang pagpapas sang kaaway, sa kasyudaran kag kaumhan. Paagi sa pagpangibabaw sa mga kasaypanan, kahuyangan kag kakulangan sa nagligad nga mga tinuig, determindo kita nga paslawon ang patarasak nga gyera sang kaaway, bawion ang mga nadula, agumon ang bag-o nga mga kadalag-an kag isulong ang rebolusyonaryong pakig-away sang pumuluyong Pilipino.

Ang pagsugod sang kahublagan panadlong sadtong nagligad nga tuig ginsug-alaw sang tanan nga mga nagapamuno nga komite sang Partido. Ginpukaw kag ginhatagan inspirasyon sini ang mga kadre kag aktibista sang Partido, lakip na ang masang rebolusyonaryo. Inspirado sini ang mga nagapamuno kag katapuan sang Partido sang espirito sang pagsaway sa kaugalingon. Determinado sila nga tadlungon kag pangibabawan ang ila mga kasaypanan, kahuyangan kag kakulangan, agud pabaskugon ang Partido kag buligan nga pukawon ang pumuluyo nga mas maisog nga mag-away, magrebolusyon kag paslawon ang brutal nga inaway sang pagpapas sang kaaway.

Katuyuan sang kahublagan panadlong nga pandayon ang kalig-on sa ideolohiya kag pulitika sang aton mga kadre. Tungod sa nangin kakulangan sa tayuyon nga pagtuon sa ideolohiya kag liwat pagpalig-on sa proletaryong panindugan, kag sa atubang sang brutal nga gyera sang pagsumpo kag wala-puas nga mga pag-atake sang kaaway, naparalisa ang pila ka mga kadre tungod sa kahadlok ukon sang sobra nga paghandum sang kasulhayan. Apang ang mas nga dako nga mayoriya sang aton mga kadre, nga nagakuha sang kusog sa rebolusyonaryo nga handum sobra pa sa ila kaugalingon nga handum, determinado nga himuon ang ginakinahanglan nga sakripisyo agud segurohon ang ila seguridad kag ang kadalag-an sang Partido kag sang kahublagan panadlong sini.

Santo sa panawagan sang Komite Sentral, ginsugdan sang mga komite sang Partido kag mga rebolusyonaryong organisasyon masa ang plano para sa kampanya sa pagtuon sa bug-os nga tuig. Ginpatuman ang mga ini nga may lain-lain nga lebel sang kadalag-an. Ang iban ginpasanto ang ila mga pamaagi santo sa mga obhetibo nga kahimtangan (kaangay sang staggered ukon parte-parte nga diskusyon kag mas ginagmay nga grupo agud magsanto sa gerilyang kahimtangan nga mahulag, paghiwat sang mga klase sa gab-i agud magsanto sa kasakuon sa trabaho sang mga mangunguma sa adlaw, mga talakayan nga one-on-one sa mga bag-o nga rekrut, kag iban pa). May iban nga nagtukod sang pormal nga istruktura sang pagtuon sa idalum sang Eskwelahan Jose Maria Sison kon diin ang mga tumuluon nagapalista sa mga pormal kag regular nga klase. Ang mga libro kag artikulo nga Marxista-Leninista-Maoista ginapadamo sa dagway sang papel ukon digital. Apang may pila nga indi amo sini ka militante kag matinugahon, nga nagresulta sa mas manubo nga lebel sang kadalag-an.

Ang aton Partido nagpaguwa sini lang sang mga artikulo nga nagatuon sa pila ka importante nga hambalanon, lakip ang subong nga krisis sang imperyalismo kag mga peligro sang gyera, ang subong nga paghimakas para sa dugang nga sweldo, ang “BPO industry” kag ang penomenon sang mga “gig workers,” kag mga matingkad nga hambalanon sa taktika sa pagsulong sang pakig-away gerilya agud paslawon ang patarasak nga gyerang pagpangsumpo kag gradual constriction sang kaaway. Kinahanglan magpaguwa sang mas madamo pa nga teoritikong pagtulun-an kag artikulo sa mas importante nga mga hambalanon nga ginaatubang sang Partido sa adlaw-adlaw.

Ang mga pang-rehiyon nga komite sang Partido kag iban pa nga nagapanguna nga komite, lakip sa iban nga pungsod, pursigido nga nagatinguha nga kumpletuhon ukon repasuhon ang ila mga dokumento sang pagsuma santo sa kahublagan panadlong. Nakumpleto sang pila ka mga komite ang ila mga pagsuma antes pa man ang kahublagan panadlong. Ang iban yara sa proseso sang pagbalik-tuon sa ila mga dokumento sang pagsuma sa balayon sang kahublagan panadlong agud matumod ang mga partikular nga manipestasyon sang petiburges nga suhetibismo sa ila kaugalingon nga hilikuton sa ideolohiya, pulitika, kag organisasyon, bilang basehan sa pagsaway sa kaugalingon. Apang kalabanan sa aton nagapamuno nga komite yara pa sa lain-lain nga lebel sang pagkumpleto. Problema sang pila ka komite ang nagkaladula nga mga dokumento ukon kawad-on sang dokumentasyon sang hilikuton sang ila komite sa mga nagligad nga tuig, nga kabangdanan nga nabudlayan ang subong nga mga nagapamuno, ilabi na ang mga lamharon nga kadre, nga makumpleto ang panay-sayon sang ila hilikuton.

Halin sa panugod sang tuig, ginsugdan sang mga komite sang Partido, mga kadre, kag aktibista ang mga kampanyang SICA (sosyal nga imbestigayon kag pag-analisa sa sahi) santo sa programa kag mga instruksyon sang Komite Sentral. Katuyuan sang kampanya nga tadlungon ang daan nga kahuyangan sa paghimo sang mga taktika sa pag-organisa kag pagpahulag sa masa nga santo sa mga nagabag-o nga kondisyon, nga nagaresulta sa mekanikal kag wala nagasulong nga “hilikuton masa” sang nagligad. Lakip sa kampanya ang mga paghanas, liwat nga paghanas ukon pagpasangkad sang ihibalo sang mga kadre kag aktibista sa syentipiko nga mga pamaagi sang pag-imbestigar, pagkulekta kag pagkalap sang impormasyon halin sa masa kag iban pa. Ang pila ka inisyal nga pagtinguha nagresulta sa mapuslanon nga pagsulong sa paghimo sang estratehiya kag programa sa hilikuton masa, kag sa pagpaguwa sang napanahon nga panawagan para sa pag-organisa kag pagpahulag sa masa. Subongman, yara sa panugod nga halintang pa lang ang mayoriya sang aton mga komite.

Sa tunga sang malala nga krisis sa ekonomiya, tuman ka bukas ang malapad nga masa sang pumuluyo sa pungsodnon demokratikong propaganda kag pag-organisa. Mas determinado sila subong kumparar sa nagligad nga pamatukan ang korapsyon, pagpamigos kag mga pabug-at nga patakaran sang pasistang rehimen US-Marcos, kag ipakigbato ang ila mga sosyal, pang-ekonomiya kag pangpulitika nga interes, ilabi na sa atubang sang nagalala nga burukrata kapitalismo kag pasismo. Agud epektibo nga mag-away, dapat tukuron, palaparon kag pabaskugon ang ila mga organisasyon masa.

Ang mga kadre kag aktibista sang Partido ginapahulag agud kumprehensibo nga maghilikuton masa para pukawon ang masa, tukuron ang ila lain-lain nga klase sang asosasyon, kag pahulagon sila sa tanan nga bahin nga pamaagi. Ang mga grupo sa hilikuton masa ukon mga grupo pangpropaganda kag pang-organisa ginapadala sa mga pabrika, mga komunidad sang mga imol nga taga-syudad, mga kampus, lakip man sa mga komunidad sa kaumhan. Subongman, madamo ang nagakapunggan sang inersya, sang mga daan nga gawi sa hilikuton nga pasilhig, nahigot-sa-upisina, kag ginaduso lang sang aktibidad, kakulangan sang mga pultaym nga rebolusyonaryong organisador, kakulangan sang sosyal nga imbestigasyon, kahuyangan nga iangot ang mga mainit nga isyu pungsodnon sa mga lokal nga problema sang masa, kag pagkapaslaw nga iangot ang mga lokal nga problema sa mga pangkabug-osan nga kampanyang masa, kag iban pa nga mga kakulangan. Makita man naton ang mga problema sa “Wala” nga sektaryanismo nga nagapahulag lang sa gamay nga bahin sang mga aktibo nga elemento sang masa, kag wala nagapahulag sa mga elemento sang nahanunga agud kabigon ang mas naulihi. Bug-os ang desisyon sang mga komite kag kadre sang Partido nga pangibabawan kag solbaron ang ini nga mga problema paagi sa pagbalik sa mga sandigan nga prinsipyo sang linyang masa kag pagpamuno.

Tayuyon ang mga pagtinguha nga liwat itukod ang mga likom nga rebolusyonaryong organisasyon nga kaalyado sang National Democratic Front of the Philippines, kaangay sang mga pamatan-on, mga mamumugon, mga mangunguma, mga kababaenhan, mga manunudlo, mga mamumugon pang-ikaayong lawas, kag iban pa. Naghalin ini sa halos lubos nga pagpabaya sa pagtukod sang likom nga kahublagan rebolusyonaryo bunga sang kasaypanan sa ligalismo kag repormismo. May mga plano kag target para sa rekrutment, pagtukod sang mga bag-o nga tsapter, pagtib-ong kag pagsuporta sa rebolusyonaryong armadong paghimakas sa kaumhan. May mga pagtinguha nga papagsikon ang pagpalista nga mangin Pulang hangaway ukon upisyal sa pulitika sang Bagong Hukbong Bayan. Subongman, madamo pa ang dapat nga himuon agud sabton ang hinanali nga kinahanglanon para sa mga bag-o nga rekrut, ilabi na halin sa mga pamatan-on nga mamumugon kag intelektwal.

Sa paglunsar sang kahublagan panadlong sadtong nagligad nga tuig, ginhatagan pagtamod sang pamunuan sang Partido ang partikular nga problema sang self-constriction sang mga yunit sang BHB, nga nagresulta sa pagkitid sang baseng masa sa pila ka malig-on nga lugar. Ang madugay nga pagbase sa bukid sang mga kumpanya kag platun, paglimita sa lugar sang operasyon sa “mga paborito nga baryo” kag iban pa nga mga manipestasyon sang hungod nga pagpakitid nagresulta sa pagkadula sang inisyatiba, sibilyanisasyon kag konserbatismong militar. Sang ginlunsar sang kaaway ang mga estratehikong opensiba sadtong 2017-18, indi pipila sa mga yunit sang BHB ang nabulag sa suportang pangpulitika sang masa kag napwersa nga mabutang sa lunsay militar nga sitwasyon, samtang ang baseng masa nga mangunguma ginapulbos sang grabe nga brutalidad. Tungod sa mga kasaypanan kag kahuyangan nga ini, nag-agi sang mga dalagko nga kahalitan kag pag-atras ang BHB sa pila ka rehiyon kag mga larangan gerilya.

Sa pila ka larangan gerilya, ang mga platun kag iskwad sang BHB madasig nga liwat nag-organisa kag nagpakat santo sa kahublagan panadlong kag santo sa prinsipyo sang malapad kag dasok nga pakig-away gerilya base sa nagalapad kag nagadalum nga baseng masa. Matinugahon kag maalam nga ginagamit sang mga platun sang BHB ang pleksibilidad sa dispersal, konsentrasyon kag pagbalhin kag liwat nga magpakamaayo sa pareho ka dasig sa kilat nga paghulag. Ang kahublagan panadlong sang Partido naghatag inspirasyon sa mga Pulang hangaway sang Bagong Hukbong Bayan nga magtinguha sa mabudlay nga dalan sang pangmalawigon nga inaway banwa agud liwat itukod kag palaparon ang baseng masa, pangapinan ang pumuluyo batuk sa terorismo sang estado, ipreserba kag pabaskugon ang BHB kag paslawon ang estratehikong opensiba sang kaaway.

Padayon nga ginatukod sang Partido ang mga relasyon internasyunal sa basehan sang kontra-imperyalismo kag proletaryong internasyunalismo. Nakahatag ang Partido sang malahalon nga amot sa tatlo ka teoritikal nga kumperensya nga gin-organisa sang National Democratic Front of the Philippines (NDFP). Halin Oktobre 2023, gintalakay sang mga kumperensya nga ini ang mga hambalanon sang imperyalismo kag gyera, ang pangkalibutanon nga imperyalistang krisis sa ekonomiya, kag ang paghimakas para sa pungsodnon nga kahilwayan halin sa imperyalismo. Ang mga kumperensya nga ini nagserbe nga higayon para mahimo ang mas malapit nga relasyon kag paghangpanay sa tunga sang mga rebolusyonaryo nga partido kag grupong komunista kag pang-mamumugon.

Sa inisyatiba sang Partido, nagdamo sa nagligad nga tuig ang aktibidad para sa pagpabaskog sang proletaryong paghiliusa. Nakaangkon sang mas madamo nga bilateral nga bayluhanay kag pag-isa nga pagtuon sa tunga sang Partido kag iban nga proletaryong partido kag grupo. Nagpakigbahin kita sa mga kongreso sang iban nga partido kag naghatag sang kontribusyon sa lain-lain nga porum.

Padayon ang mga internasyunal nga tiglawas sang Partido kag NDFP sa aktibo nga pagtib-ong sa rebolusyon Pilipino, sa pagpanday sang paghiliusa sa mga kontra-imperyalistang partido, kag pagpauswag sang relasyon protodiplomatiko sa mga gobyerno sa basehan sang komun nga handum para sa pungsodnon kag sosyal nga kahilwayan.

Ang mga nagapamuno nga komite sang Partido sa tanan nga lebel ginadugangan sang bag-o nga dugo paagi sa aktibong promosyon sang mga lamharon nga kadre santo sa ila maayo nga rekord kag pagtuman sang mga katungdanan. Sa pagkumbina sang mga lamharon sa mga tigulang, ginaseguro naton nga ang pamunuan sang Partido may ikasarang, may enerhiya kag mapagsik, kag iya abagahon ang mga mabudlay nga katungdanan sang proletaryong pagpamuno sa malawig pa nga panahon. Ang pagbutang sang bag-o nga mga lamharon nga mga kadre sa mga pamunuan sa lain-lain nga lebel nagaduon sa kinahanglanon nga magsuma sang inagihan agud isaylo ang kahanason kag natipon nga kinaalam sa bag-o nga henerasyon sang mga lider sang Partido.

Gintukod ang mga komiteng pang-teritoryo agud pundaron kag pauswagon ang kahublagan masa sa guwa sang sakup kag maabot sang hukbo sang banwa. Sa amo sini, maseguro sang Partido ang ikasarang sini nga pukawon, organisahon kag pahulagon ang mga mamumugon, mangunguma, mala-proletaryado, estudyante kag iban pa nga sektor sa guwa ukon sa laylayan sang nga larangan gerilya, kag wala nagakahigot sa sakup ukon erya sang operasyon sang mga yunit gerilya sang BHB. Ang mga komite nga ini nagapakigbuligay sa mga komite sa larangan gerilya para segurohon ang tayuyon nga suportang pangpulitika, materyal kag pang-organisasyon para sa hukbo sang banwa kag para sa kontra-pyudal kag konta-pasista nga paghimakas sang masang mangunguma.

Paagi sa kahublagan panadlong, ang mga komite sang Partido sa subong mas matutom nga nagabantay sa liberalismo, ultra-demokrasya kag burukratismo. Ang mga kahuyangan nga ini nagaguba sa demokratikong sentralismo, kag sa ikasarang sang Partido nga dululungan nga magmartsa.

Sa pila ka bahin sang Partido kag kahublagan rebolusyonaryo, nakita naton ang mga paglapas sa lain-lain nga patakaran sa organisasyon kag disiplina sang Partido, nga ang pila napabayaan sa malawig nga panahon, nga nagguba sa prestihiyo sang Partido. Agud tadlungon ang sitwasyon nga ini, liwat naton nga ginpaguwa kag gin-athag ang mga patakaran. Ang mga paglapas nga ini desaysibo nga ginsaway, gin-analisa kag ginsikway sa pila ka bahin.

Padayon naton nga ginapabaskog ang sistema sang pag-report agud tadlungon ang sitwasyon nga ang mga sentro sang Partido bulag sa sitwasyon kag pag-uswag sang rebolusyonaryong hilikuton sang manubo nga mga komite. Ang aton mga nagapamuno nga organo subong relatibo nga mas hakus na ang sitwasyon sa ubos, gani makapaguwa sila sang napanahon nga patakaran, pagsulundan, mga panugyan kag plano. Apang, may pila ka manubo nga komite ang wala pa napauswag sa praktika kag wala pa nakapadala sang regular nga mga report.

Ang liberalismo kag ultra-demokrasya mga sakit nga nagaguba sa disiplina sang Partido. Sa pihak sang kahublagan panadlong, padayon nga naapektuhan sini ang iban nga bahin sang Partido sa lain-lain nga dagway pareho sang pagpangkudal, independyente nga grupo, wala sang katapusan nga debate kag indi masolbar nga mga lalisay. Sa pihak nga bahin, may yara man mga problema sang burukratismo, kon diin wala makahatag sang maukod nga pagtamod ang mga nagapamuno nga kadre sang Partido sa ginaatubang nga kahimtangan sang mga kolektibo kag katapo sa manubo nga komite, agud buligan sila nga solbaron ang ila mga problema kag magsulong.

Padayon nga ginaut-ot sang liberalismong petiburges ang militansya kag desisyon sang pila ka kadre. May pila ka kadre nga sobra nga nagakalumos sa madamo nga hambalanon pangkaugalingon kag indi makahatag sang bug-os nga atensyon sa rebolusyonaryong hilikuton. Madamo apektado pa gihapon sang panghuna-huna nga empleyado, kag nahigot sa ila mga upisina kag balay, kag indi makahatag sang lubos nga panahon sa hilikuton pag-organisa sa masa. May pila ka kadre nga wala pa gihapon nakatikang guwa sa ila mga “comfort zone.”

Samtang madamo pa ang dapat himuon, dapat nga sa subong malig-on ang panindugan sang Partido nga kumprehensibo nga isulong ang kahublagan panadlong. Paagi sa wala kakapoy nga pagtinguha sang aton mga proletaryong kadre kag rebolusyonaryong aktibista, bug-os kapat-uran naton nga madeklarar nga ang mga gamot sang kahublagan panadlong padayon nga magadalum kag magalapad. Tungod sini, magauswag ang Partido sang mas malig-on kag mas mabaskog, kadungan sa pagpamuno sini sa pumuluyo nga dala ang wala nagakadula nga rebolusyonaryong espirito.

IV. Ipatuman ang mga katungdanan sang kahublagan panadlong kag isulong ang rebolusyon!

Mas paborable subong ang obhetibo nga kahimtangan para sa pagsulong sang demokratikong rebolusyon sang banwa sa tunga sang padayon nga krisis sang kapitalismo sa bug-os nga kalibutan kag pagbulusok sang malakolonyal kag malapyudal nga kahimtangan sa pungsod. Yara sa mga pwersang suhetibo na kon paano hingalitan ang sitwasyon agud isulong ang handum sang pumuluyo para sa pungsodnon kag sosyal nga kahilwayan.

Sa pag-atubang sa subong nga sitwasyon, tuman ka kakinahanglanon nga ubos-kusog nga pabaskugon sa ideolohiya, pulitika kag organisasyon ang Partido kag tanan nga rebolusyonaryong pwersa. Dapat pabaskugon naton ang determinasyon kag kumprehensibo nga pataason ang aton ikasarang nga abagahon ang katungdanan nga pukawon, organisahon kag pahulagon ang malapad nga masa sa banas sang demokratikong rebolusyon sang banwa kag sosyalistang palaabuton sini.

Palaparon kag padalumon ang kahublagan panadlong! Labi nga pabaskugon ang Partido!

Ang kahublagan panadlong nga ginlunsar sadtong nagligad nga tuig sang Komite Sentral, isa ka internal nga kahublagan sang pagtuon kag pagsaway sa kaugalingon nga may katuyuan nga tadlungon ang mga kasaypanan kag pangibabawan ang mga kahuyangan kag kakulangan. Naghalin ang mga ini mayor sa suhetibismong petiburges, nagapanguna sa dagway sang empirisismo, sa hilikuton sang Partido sa ideolohiya, pulitika kag organisasyon.

Dapat padalumon kag palaparon ang kahublagan panadlong. Nakita naton sa nagligad nga tuig nga indi lang bastante nga ideklarar ang kahublagan panadlong kag magpahayag sang suporta diri. Tanan nga komite sang Partido, halin sa sentro tubtob sa tanan nga sanga, dapat magsaway sa kaugalingon, manadlong sang mga nagligad nga kasaypanan,lubos nga hakson ang Marxismo-Leninismo-Maoismo agud irebolusyonisa ang ila panghuna-huna kag mga pamaagi sa pagtrabaho, kag lubos nga may kainit nga magsulong. Takson naton ang kadalag-an sang kahublagan panadlong sa mga kongkreto nga numero nga nagapakita sang kantitatibo nga pagdako kag kalitatibo nga pag-uswag sang Partido, sang rebolusyonryong armadong paghimakas, sang rebolusyonaryong kahublagan masa kag sang organisadong baseng masa.

Liwat naton ginapalig-on ang 8 ka bahin nga kahublagan panadlong pareho sang ginbalay naton sa pahayag sadtong nagligad nga tuig. Ang mga bahin nga ini amo ang masunod: isa ka Marxista-Leninista-Maoistang kampanyang pagtuon, isa ka kampanya para sa liwat pagpalig-on sa konstitusyon kag programa sang Partido, isa ka kampanya sang pagtuon sa mga dokumento sang Una kag Ikaduha nga Dungganon nga Kahublagan Panadlong, isa ka kampanya sang pagsuma, isa ka kampanya sa sosyal nga imbestigasyon kag pag-analisa sa sahi (SICA), isa ka kampanya sang pagsaway kag pagsaway sa kaugalingon, isa ka kampanaya sang ebalwasyon kag promosyon sang mga kadre, kag isa ka nagapadayon nga kampanya para segurohon ang pagpatuman sang tatlo kag lebel nga kurso sa edukasyon sang Partido.

Sa pagpadalum sang kahublagan panadlong, kinahanglan nga tayuyon kag nagalanog nga ipatuman naton ang mga plano sa kampanya nga pagtuon, kadungan sa napanahon nga mga pagtasa agud segurohon nga madasig nga masolbar ang mga problema. Pauswagon anton ang militante nga estilo nga pagkumbina sang pagtuon sa teorya kag sang praktika, pareho sang pagbuligay sang mga petiburges nga intelektwal kag mga mamumugon sa pagtuon sang sweldo ukon Marxista nga pampulitikang ekonomiya.

Dapat mas matutom pa nga tun-an sang tanan nga kadre sang Partido ang Marxismo-Leninismo-Maoismo. Liwat naton nga ibalhag kag ipalapnag ang teksto sang Philippine Selections sang mga pinili nga yabe nga artikulo ni Mao Zedong agud magserbe nga rekisito sa pagbasa kag pagtuon sang tanan nga mga kadre sang Partido. Dapat hatagan sang lubos nga importansya sang mga kadre ang pagtuon sa teorya nga mas nga nangin kritikal samtang ginaabaga nila ang mas dalagko nga praktikal nga mga hilikuton rebolusyonaryo.

Dapat nga mas matalum naton nga tumuron, tuhayon kag pauswagon ang pseudo-sosyalismo, anarkismo, radikalismong pangkasarian, kag iban pa nga mga klase sang petiburges nga rebolusyonismo nga nakasulod sa iban nga bahin sang Partido. Nagadulot ini sang pagkalibog kag nagapahalog sa pag-uyat sa pila ka malahalon nga mga hambalanon. Kinahanglan nga ibuyagyag naton ang mga burges kag petiburges nga mga tendensya nga repormista sa mga mamumugon, mangunguma, intelektwal, kag iban pa nga mga sektor kag kahublagan, nga nagatilaw nga patalangon ang masang Pilipino palayo sa banas sang rebolusyonaryong paghimakas, ilabi na halin sa armadong paghimakas.

Dapat desaysibo nga kumpletuhon sang Komite Sentral ang pagsuma sa mayor nga mga hitabo kag desisyon sa nagligad nga panahon, agud magserbe nga pangkabug-osan nga ubay sa pagsuma sang tanan nga komite. Kadungan sini, ang una nga nasulat nga mga dokumento sang pagsuma sang mga nagapamuno nga komite (yadtong nagasakup sa panahon nga mga 2010 pasaka) dapat nga liwat tun-an halin sa lente sang subong nga kahublagan panadlong.

Magluwas sa paghimo sang panaysayon sang mga nagligad nga panghitabo kag desisyon, kag pagtumod sa aton mga kabaskugan kag kahuyangan, kinahanglan man naton tumuron ang petiburges nga makasahi nga kinaiya sang aton mga kasaypanan kag kahuyangan, agud mapabaskog naton ang proletaryong pagpamuno sa lain-lain nga patag sang rebolusyonaryong hilikuton. Kinahanglan may maathag nga pagsaway kag pagsaway sa kaugalingon ang aton mga kadre kag komite. Ang mga dokumento sang pagsuma dapat gilayon nga tun-an sang mga katapuan sa sakup nga teritoryo ukon linya sang hilikuton.

Sa pagpalapad sang kahublagan panadlong,luyag naton nga segurohon nga masakup sini ang tanan nga bahin sang Partido kag tanan nga aspeto sang hilikuton rebolusyonaryo. Ang walo ka bahin sang kahublagan panadlong dapat kumprehensibo nga ipatuman. Dapat tayuyon ang mga pagtinguha. Kinahanglan magbantay sa pagpabaya, pangibabawan ang inersya, kag pakigbatuan ang pagbalik sa mga daan nga gawi.

Padayon naton nga i-rebolusyonisa ang Partido paagi sa proletaryong pagbag-o sang kaugalingon sang mga kadre sa ila pamaagi sa pagtrabaho kag pagpamuno, lakip man ang ila estilo sang pangabuhi. Mahimo ini paagi sa pagseguro nga ang aton mga kadre kag komite hugot nga nakaangot sa masa sa tanan nga panahon. Nagapanawagan kami sa tanan nga mga kadre kag aktibista sang Partido nga kakason ang ila mga “comfort zones” kag bug-os nga ihalad ang ila kaugalingon sa lubos nga pagpatuman sang mga rebolusyonaryong hilikuton nga ginapatungdan sa ila. Dapat desaysibo nga sawayon kag isikway naton ang mga paglapas sa mga patakaran sang Partido kag segurohon nga permi mataas ang disiplina.

Dapat padayon nga ihapag sang Partido ang kritikal nga pag-analisa sini sa mga matingkad nga isyu kag panghitabo pungsodnon kag internasyunal kag ipasaka ang ihibalo kag kamuklatan sang pumuluyo. Kinahanglan nga padayon naton nga ibalhag kag padamuon ang mga nakabalhag nga kopya sang Ang Bayan kag segurohon nga lapnagon ini nga mapanghatag sa mga katapo sang tanan nga sanga sang Partido, lakip na sa mga rebolusyonaryo organisasyon masa.

Kinahanglan padayon nga padamuon ang katapuan sang Partido santo sa prinsipyo nga makahas nga magpalapad nga wala sang ginapasulod bisan isa ka malain nga elemento. Kinahanglan pabaskugon ang demokratikong sentralismo kag sistemang komite, nga nagaseguro sang regular nga pagpulong kag kolektibo nga pagdesisyon. Tanan nga komite dapat magtukod sang regular nga linya sang komunikasyon sa ila mataas nga komite kag magpasa sang regular kag napanahon nga mga report.

Kinahanglan nga pataason ang ikasarang sang mga seksyon kag sanga sang Partido nga tumanon ang mga rebolusyonaryo nga hilikuton sa sakup sang ila responsibilidad kag pagpamuno. Dapat nga ubayan kag hanason sang mga komite sang Partido halin sa mga distrito pasaka, sa sulod kag guwa sang mga larangan gerilya, ang mga lokal nga kadre sang Partido sa pagtungod sang ila hilikuton.

Kinahanglan ipabilin ang mga pagtinguha sa napanahon nga pagtasa kag pagpasaka sang mga kadre sang Partido sa mga pusisyon sang responsibiliad kag pagpamuno. Dapat ini nga himuon sa mga regular nga kumperensya, ukon paagi sa mga komiteng tagpatuman, sa tunga sang kumperensya.

Padalumon kag palaparon ang pag-ugat sa masa kag hugot nga pamunuan ang ila mga paghimakas batuk sa papet, burukrata-kapitalista, kag pasistang rehimen Marcos!

Ang rehimen US-Marcos ang pinaka-konsentrado nga ekspresyon sang mga sandigan nga problema sang imperyalismo, pyudalismo, kag burukrata kapitalismo. Makita naton sa idalum ni Marcos ang wala tupong nga korapsyon, pasismo, kag pagluhod-luhod sa imperyalistang US. Sa atubang sang paglala sang mga dagway sang pagpamigos kag pagpanghimulos, mas determinado ang pumuluyong Pilipino nga magtindog kag makig-away, kag isulong ang dalagkuan nga paghimakas kontra-pasista, kontra-imperyalista, kag kontra-pyudal sa mga maabot nga tinuig.

Bug-os ang desisyon nila nga ubos-kusog nga makig-away agud wasakon ang paghari sang pasistang kakugmat sa kaumhan, tapuson ang paghari sang layi militar sa mga komunidad sa kaumhan, kag pakig-awayan ang patakaran ni Marcos sang pangpulitika nga pagpang-ipit kag kalakasan sang estado. Ang pagpakig-away sa layi militar sa kaumhan dapat isulong sa kaumhan kag kasyudaran. Dapat tigayunon nga may determinasyon ang isa ka kampanya para ibuyagyag ang pasista nga terorismo sa kaumhan kag agud suportahan ang masang mangunguma sa ila pakig-away. Paborable ang mga kundisyon para sa pagtukod sang isa ka malapad nga kontra-pasista nga nagahiliugyon nga prente sa kubay sang lain-lain nga demokratikong sektor.

Ang nagalala nga mga kondisyon sosyo-ekonomiko nagatulod sa pumuluyo nga magtindog kag magprotesta batuk sa wala untat nga pagsaka sang presyo sang pagkaon, gasolina, kag iban pa nga mga nagapanguna nga balaklon, subongman batuk sa burukrata-kapitalistang korapsyon sa idalum sang rehimen Marcos. Matulod ang mga mamumugon nga mas pursigido nga maghimakas para sa dugang-sweldo agud mabuhi nga desente ang ila mga pamilya, para sa mas maayo nga kondisyon sa trabaho, kag para sa pagtapos sa kontraktwalisasyon sa pamugon kag iban pa nga mga mahimuslanon nga iskema sang pagtrabaho. Dapat palanugon ang singgitan nila para sa ₱1,200 nga pungsodnon nga minimum nga sweldo agud pukawon ang mga mamumugon nga tukuron ang ila mga unyon, kag isulong ang kolektibong paghimakas sa ila mga pabrika kag komunidad.

Matulod ang masang mangunguma nga paigtingon ang ila paghimakas batuk sa grabe nga liberalisasyon sang importasyon sang bugas kag iban pa nga pang-agrikultural nga baligya. Kadungan sini, obligado sila nga pursigido nga awayon ang pagsulod sang mga minahan, plantasyon kag iban pa nga operasyon nga nagaagaw sa duta kag nagaguba sa kapalibutan (ilabi na sa atubang sang ginaduso nga layi sa pagpalawig padulong sa 99 ka tuig ang pagpaarkila sang duta sa mga dumuluong kapitalista), kag ang militarisasyon sa ila komunidad. Ang mga kalamidad sa klima nagatulod sa masang Pilipino nga igiit ang bayad-kahalitan sa pagkadula sang ila propyedad kag pangabuhian. Dapat pabaskugon sang masang mangunguma ang ila mga organisasyon kag asosasyon kag maisog nga magtindog agud pangapinan ang ila mga kabuhi kag palangabuhian.

Ginaatubang sang pumuluyong Pilipino ang kakinahanglanon nga paigtingon ang ila kampanya batuk sa mga base militar sang US kag pagpasilabot militar sang US, kag pamatukan ang pagpaka-papet sang rehimen Marcos sa imperyalismong US, nga nagabutang sa pungsod sa nagadako nga peligro nga madalahig sa inaway inter-imperyalista. Kinahanglan naton nga ilunsar ang isa ka tayuyon nga kampanya agud ibuyagyag ang mga iskema sang US para sa pagpatuman sang kusog militar sini sa Pilipinas, kag kon paano ini nakaangot sa nagasingki nga banggaan inter-imperyalista kag mga padihot sang US nga ipatuman ang hegemoniya sini sa lain-lain nga bahin sang kalibutan. Kinahanglan naton nga pasagrabon ang patriyotismo sang mga Pilipino kag iangot ang ila mga paghimakas sa mga paghimakas kontra-imperyalista sang mga pumuluyo sa bug-os nga kalibutan.

Katungdanan sang Partido nga pamunuan ang malapad nga masa sang pumuluyong Pilipino sa ila mga paghimakas pang-ekonomiya kag pangpulitika paagi sa mas madalum kag mas malapad nga pag-ugat sa masa. Agud himuon ini, kinahanglanon naton nga ipasaka ang ikasarang sang Partido nga madamuan nga pukawon,organisahon kag pahulagon ang malapad nga masa. Kinahanglan nga pataason naton ang ila sosyal nga kamuklatan kag pangpulitika paagi sa pag-angot sang mga mainit nga isyu pungsodnon sa ila mga lokal nga problema, kag pagpasaka sang ila mga lokal nga isyu kag paghimakas sa mga sandigan nga problema sang pumuluyong Pilipino kag sa kakinahanglanon nga magsulong sang kolektibong paghimakas.

Kinahanglan nga tugahon naton ang kondisyon para sa demokratikong partisipasyon sang masa sa mga talakayan kag pagdesisyon,agud maganyat sila nga maghulag. Kinahanglan nga tinguhaan naton nga ikumbinar ang pasilhig nga propaganda kag pag-organisa, sa solido kag pursigido nga hilikuton masa. Dapat pangibabawan ang nagligad nga kahuyangan sa hilikuton nga lunsay pasilhig, kag ginatulod lang sang mga aktibidad, nakasentro sa isyu kag nahigot sa mga upisina. Kinahanglan naton nga magpatuhaw sang mas madamo nga kadre nga pultaym sa hilikuton masa, nga magkumbinar sa mas dako nga isip sang mga aktibista sa mga grupo pangpropaganda kag pag-organisa. Ang SICA dapat tigayunon nga may maathag nga katuyuan nga himuon ang isa ka plano para sa pag-organisa kag pagpahulag sa masa santo sa ila mga hinanali nga mga demanda pang-ekonomiya kag pangkatilingban.

Tukuron kag pabaskugon ang lain-lain nga tipo sang pungsodnon-demokratiko nga organisasyon masa agud konsolidahon ang relatibo aktibo ukon abanse nga elemento sa kubay sang masa. Dapat ini nga ikumbina sa pagtukod sang mas malapad nga mga pag-angtanay ukon organisasyon nga nakabase sa isyu, agud abuton kag pahulagon ang mga nahanunga nga elemento, nga sila makabulig sa pagkabig sa relatibo atrasado nga bahin sang masa. Kinahanglan nga gamiton naton ang matinugahon nga mga taktika agud tiyugan kag paslawon ang reaksyunaryo nga pagpaniktik kag mga patakaran pangsumpo.

Kinahanglan nga matutom nga tukuron ukon liwat tukoron ang kahublagan likom kag ang mga rebolusyonaryong organisasyon masa sa kasyudaran kag kaumhan. Ginakonsolida sang mga organisasyon masa nga katapo sang National Democratic Front of the Philippines (NDFP) ang pinaka-abanse nga bahin sang masa. Ang mga ini ang andam nga kuluhaan sang mga rekrut sa Partido. Ang kahublagan likom dapat palaparon agud mabuligan nga itago kag hatagan sang seguridad ang mga nagapanguna nga kadre kag organisador sang Partido. Dapat man tigayunon sang mga ini ang malapad nga rebolusyonaryong propaganda agud ipalapnag ang panawagan para sa inaway banwa kag pukawon ang pumuluyo nga magsuporta kag magpatapo sa Bagong Hukbong Bayan.

Dapat maayo nga ipakat sang Bagong Hukbong Bayan ang mga iskwad kag grupo sini agud maghilikuton masa kag segurohon nga padayon ang pag-uswag sang baseng masa. Agud padalumon ang angot sini sa masa, ang mga yunit sang BHB sa hilikuton masa dapat maghatag sang mga serbisyo pang-ekonomiya, pang-ikaayong lawas kag pang-edukasyon sa masang mangunguma, samtang ginaubayan sila sa pagsulong sang ila mga paghimakas kontra-pyudal.

Magpanikasog sa pagsulong sang demokratikong rebolusyon sang banwa!

Dapat mahangpan sang pumuluyong Pilipino nga ang bugtong nga pamaagi nga makaluwas sa krisis sang malakolonyal kag malapyudal nga sistema amo ang pagsulong sang demokratikong rebolusyon sang banwa agud pukanon ang imperyalismong US kag ang makasahi nga paghari sang mga dalagko nga burgesya kumprador kag mga dalagko nga agalon mayduta, paagi sa ila estado nga burukrata-kapitalista kag pasista.

Liwat ginapalig-on sang Partido, ang abanse nga destakamento sang proletaryadong Pilipino, ang desisyon sini nga pamunuan ang pumuluyong Pilipino sa pagsulong sang demokratikong rebolusyon sang banwa paagi sa pangmalawigon nga inaway banwa santo sa estratehikong linya nga palibutan ang kasyudaran halin sa kaumhan. Agud isulong ang rebolusyon, dapat padayon naton nga pabaskugon ang Partido, ang Bagong Hukbong Bayan kag ang National Democratic Front.

Samtang ginapamunuan ang masa sa mga paghimakas sa ekonomiya kag pulitika batuk sa rehimen US-Marcos, dapat naton isulong ang rebolusyonaryong armadong paghimakas, bilang nagapanguna nga porma sang paghimakas.

Paagi sa pagtadlong sang mga kasaypanan, kahuyangan kag kakulangan sa nagligad, katuyuan naton nga palig-unon ang Bagong Hukbong Bayan,bawion ang mga nadula kag paslawon ang estratehiko nga opensiba sang kaaway. Dapat maathag ang paghangup sang tanan nga kadre sang Partido kag mga kumander kag hangaway sang BHB sa diyalektika nga pangmalawigon nga inaway banwa,kon paano ini mag-uswag sa posible nga mga halintang sang estratehikong depensiba, estratehikong pagkapatas kag estratehikong opensiba.

Paagi sa pagsulong sang pakig-away gerilya sa sulod sang malawig nga panahon, ang Bagong Hukbong Bayan makasulong halin sa gamay kag mahuyang padulong sa pagdako kag mabaskog, paagi sa nabahin-bahin nga pagdugmok sa kaaway. Apang, ang mga kasaypanan kag kakulangan pareho sang indi napanahon nga regularisasyon kag adbenturismo militar, kag pagpakitid sa kaugalingon kag konserbatismong militar, mahimo nga mapwersa nga mag-atras ang BHB sa daan sini nga lebel. Sa bug-os nga panahon sang estratehikong depensa, nagalunsar ang BHB sang lapnagon kag dasok nga pakig-away gerilya base sa nagalapad kag nagadalum nga baseng masa.

Uyat ang maathag nga paghangup sa subong nga balanse sang mga pwersa kag lebel sang inaway banwa, ang mga yunit sang BHB liwat nga ginaayos kag ginapakat agud mas epektibo nga maghilikuton masa para bawion kag palaparon ang baseng masa kag maglunsar sang pakig-away gerilya batuk sa kaaway. Ang mga Pulang hangaway sang BHB dapat padayon nga magpakamaayo sa mga taktikang gerilya sang konsentrasyon, dispersal kag pagbalhin-balhin agud lutuson ang estratehiyang “gradual constriction” sang kaaway kag nakapokus kag tayuyon nga mga operasyon militar.
Dapat kuhaon sang tanan nga platun gerilya kag mga iskwad sang BHB, upod ang mga yunit sang milisya kag mga kwerpo nga pangdampig sa kaugalingon ang inisyatiba nga maglunsar sang mga taktikal nga opensiba, nga magpili sang mga target nga mahimo nila nga papason. Sa kada higayon, dapat nila nga birahon ang madamo nga mahuyang nga bahin sang kaaway. Indi kulang ang magamit nga armas, lakip ang mga mabaskog nga riple ukon mga hinimo nga mga pusil, bomba, granada, molotov, pana, bangkaw, tugalbong kag tirador. Dapat planuhan nila ang pagkuha sang armas sang kaaway agud armasan ang bag-o nga mga Pulang hangaway sang BHB.

Ang kada dako ukon gamay nga taktikal nga opensiba nga ginalunsar sang kada yunit gerilya sang BHB sandig sa ila ikasarang indi masikway nga amot sa paghimakas sang pumuluyong Pilipino batuk sa papet kag pasista nga rehimen Marcos. Nagapalig-on ini sa sulod sang pumuluyong Pilipino sa paglunsar nila sang tanan nga dagway sang pakig-away, kag nagahatag inspirasyon sa ila nga usoyon ang banas sang rebolusyonaryong armadong paghimakas.

Naghatag inspirasyon man sila sa tanan nga pigos nga sahi kag pumuluyo sa bug-os nga kalibutan, nga kaangay nila nagapakig-away para sa pungsodnon kag sosyal nga kahilwayan. Ang pagsulong sang pungsodnon-demokratikong rebolusyonaryong paghimakas sa Pilipinas ang pinakadako nga kontribusyon sang pumuluyong Pilipino sa pangkalibutanon nga paghimakas batuk sa imperyalismo kag pag-away sa mga gyera imperyalista.

Nagasalig kita nga paagi sa pagpadalum kag pagpalapad sang kahublagan panadlong, matukod naton ang isa ka mas malig-on kag mas gamhanan nga Partido Komunista sang Pilipinas, kag mapamunuan ang demokratikong rebolusyon sang banwa padulong sa mas dalagkuan nga kadalag-an sa mga magaabot nga tinuig.

Isulong ang kahublagan panadlong!

Iwagayway ang bandera sang Marxismo-Leninismo-Maoismo!

Mabuhay ang pumuluyong Pilipino!

Mabuhay ang pangkalibutanon nga proletaryo!

Mabuhay ang Partido Komunista sang Pilipinas!