![]( https://philippinerevolution.nu/wp-content/uploads/2024/09/cpp-npa-panay-island-1024x576.png )
Dayawon kag ipagkit sa kasaysayan ang handurawan sang 11 ka Martir at Baganihan sang Agosto sa Panay!
August 30, 2024 | Pinakamataas na pagpasidungog ang ginahatag sang Komiteng Rehiyon-Panay kanday Vicente Hinojales (Ka Hadjie/Ka LG/Ka Jorge), Concha Araneta-Bocala (Ka Jojo/Ka Unding/Ka Minay/Ka Marta/Ka Ling/Ka Tonya), Rewilmar `Vivian’ Torrato (Ka Mia/Kikay/Minerva/Mara/Moray) kag sa walo pa ka Martir kag Baganihan sang Agosto sa Panay. Sila ang mga kadre ng Partido, Pulang kumander kag hangaway nga maisog nga nagpakig-away sa pasistang rehimeng-Marcos agud pangapinan kag isulong ang demokratiko nga mga interes sang mga pigos kag ginahimuslan nga Panayanon kag sang bilog nga pumuluyong Pilipino para sa tunay na kahilwayan at demokrasya.
Si Ka Hadjie, Ka Minay kg Ka Minerva upod kanday Romulo Iturriaga Gangoso (Ka Reagan/Biboy/Pedik), Aurelio Bosque (Ka Zarco/Baijan/Rio), Jose Jerry Tacaisan (Ka Boy/Miller), Juvylene Silverio (Ka Porang/Inday/Kaykay), Benjamin Cortel (Ka Amor/Ruby/Mamang), Armando Sabares (Ka Nene/Kamlon), John Paul Capio (Ka Roling/Ronron), at Jielmor Gauranoc (Ka Doc/Tango/Baron), ang naptay sa serye sang armado nga engkwentro sa mga pwersa ng 12IB, 82IB, 61IB kag PNP-RMFB sadtong Agosto 5, 7, 8, 15 sa Calinog at Lambunao, Iloilo at noong Agosto 24 sa Valderrama, Antique.
Nagahatag kami sang pinasahi nga pagdayaw kag pagpasidungog kanday Ka Hadjie, Ka Minay, kag Ka Minerva. Si Ka Hadjie nangin katapu sang Komite Sentral kag Sekretaryo sang Komiteng Rehiyon humalin sang ulihi nga bahin sang 2016, nagpanguna sa pagpatuman sang Ikatatlo nga Kampanya sa Pagpanadlong kag sang 5-Tuig nga Programa sang Komite Sentral. Wala-kakapoy kag ubos-ikasarang nga ginpaambit niya ang abanse nga mga inagihan sang iya ginhalinan nga rehiyon sa Mindanao. Indi nangin sablag ang iya kabag-uhon sa Panay kag sa mga kaupod para epektibo nga matungdan ang iya reslonsibilidad. Huwaran sya sa pagpatuman sang mga polisiya kag desisyon sang Komiteng Rehiyon kag sang mataas nga organo. Si Ka Minay nagserbe nga Ikaduha nga Depyuti nga Sekretaryo sang Komiteng Rehiyon kag isa sa mga tagapanguna nga nagpundar sang rebolusyonaryo nga hublag sa isla sang Panay humalin sang 1972. Ginpamunuan niya ang IDKP labi na pagsulat sang burador sang 13-tuig nga pagsuma sang rebolusyonaryo nga praktika sang Panay kag ang pagpakig-away sa paksyunalismo sang Tabara-Dumalaog nga hubon. Huwaran sya sang wala-kutod nga optimismo, katampad sa Partido kag armado nga rebolusyon. Sa pihak sang iya katigulangon sa edad nga 71 kag naagum nga pisikal nga kasablagan sang 2021 nga halos nabulag ang iya mata bangud sa eye stroke, ginpili niya nga magpabilin sa kaumhan agud padayon nga pamunuan ang Partido kag NPA. Si Ka Minerva ang katapu sang Komite nga Tagapatuman sang Komiteng Rehiyon kag nangin sekretaryo sang Komite sang Partido sa Central Panay kag sang ulihi sang Southern Panay. Huwaran siya sa wala-kutod nga paghangop sang responsibilidad, katutom, ka-episyente sa mga hilikuton kag kalig-on sa mga kabudlayan kag sakripisyo. Tunay nga daku nga mga kadulaan sila sa pamunuan sang Partido sa Panay.
Ang Komiteng Rehiyon-Panay nagapakig-unong sa kasubo sang mga pamilya sang Onse ka Martir kag Baganihan, sa tanan nga mga kadre kag katapuan sang Partido, mga Pulang kumander kag hangaway sang NPA, sa mga alyado nga organisasyon sang NDF kag mga abyan kag taga-suporta sa kawsa sang pungsodnon-demokratiko nga rebolusyon. Mas mabug-at pa sa Bukid Madyaas ang aton ginabatyag nga kasubo sa kamatayon sang Onse ka Martir apang mas labaw nga mabug-at kag nagapangibabaw ang aton kaakig sa pasista nga rehimeng-Marcos Jr. kag sa iya uhaw-sa-dugo nga berdugo militar.
Mabaskog nga ginapakamalaut kag ginakondenar sang Komiteng Rehiyon-Panay ang 3rd Infantry Division kag 301st Brigade sang Philippine Army kag ang PNP-Region 6 ang brutal nga pàgpatay kag paglapas sa tawhanon nga kinamatarung sang siyam (9) ka mga kaupod, ang Aglonok 5 (Ka Reagan, Ka Nene, Ka Zarco, Kaykay at Ka Tanggo) kag Cabatangan 4 (Ka Hadjie, Ka Minay, Ka Minerva, Ka Miller) nga mga hors de combat na sa tion sang gina-alegar sang 3rd ID nga mga engkwentro sang Agosto 7, 8 kag 15. Masobra sa duha ka semana na nga gutom bangud sa kakulang sang pagkaon, sobra kakapoy kag kulang sa tulog (physically kag mentally exhausted) bangud sang inadlaw nga lakat/maniobra sa mataas kag mabudlay nga kabukiran, tigulang na kag may balatian (hypertension, diabetes) ang kadam-an sa ila. Sandig sa panugod nga pagpangusisa sang mga yunit sang NPA wala sang nabatian nga baslanay sang lupok ang pila ka masa nga yara malapit sa lugar sang engkwentro. Nagpahayag man sang obserbasyon ang pila ka pamilya sang mga martir nga may palatandaan sa torture ang mga biktima kag may katapu sang midya ang nagpahayag nga sobra-sobra ang ila kapilasan nga nagapatimaan sang “overkill”. Sa layi sang gyera nga nakasaad sa International Humanitarian Law kag Comprehensive Agreement on Human Rights and Internationational Humanitarian Law dapat amligan ang kinamatarung sang mga hors de combat ukon wala na sang ikasarang nga mag-away.
Malaba ang rekord sang 3rd Infantry Division, Philippine Army kag sang PNP-Region 6 sa paglapas sang tawhanon nga kinamatarung—pagpatay sa bata nga Tumandok nga si Rodelyn Aguirre sang 2012, Antique 7 masaker sang 2018, Tumandok 9 masaker sang 2020, pagpatay kay Brgy Capt Julie Catamin sang Roosevelt, Tapaz sang 2021, pagdakop kag pagpatay kay Ka Blu kag Ka Hope sang 2022 kag madamo pa.
Ang Onse ka Martir kag Baganihan sang Agosto sa Panay ang pinakaulihi nga tanda sang ginatos-ka-tuig na nga pagpakig-away sang pumuluyong Panayanon batuk sa dumuluong kag lokal nga pagpanghimulos kag pagpamigos humalin pa sa mga pag-alsa batuk sa kolonyalistang Katsila, gyera nga pagpanakop sang Amerikano kag Hapon tubtob sa pagpakig-away batuk sa pasista nga rehimeng-Marcos Jr. kag ginsundan sini nga mga pasistang rehimen.
Ang Onse ka Martir kag Baganihan nga naghalin sa apat ka probinsya sang Panay kag sa Mindanao ang nagatiglawas sang halos tanan nga sahi kag sektor sang katilingban nga Pilipino nga ginhiliuisa sang prinsipyo sang pag-alagad sang pumuluyo sa kawsa sang pungsodnon-demokratiko nga rebolusyon paagi sa armado nga paghimakas. Ginpanindugan nila ang ini nga mga prinsipyo kag kawsa tubtob sa ila katapusan nga ginhawa. Dapat pirme lab-as sa aton pamensaron kag hatagan sang kabuhi sa aton matag-adlaw praktika ang mga prinsipyo kag kawsa nga ila ginpanginmatyan. Angkunon naton ang ila mga kinaiya sang wala pagkalingkang sa mga kabudlayan kag sakripisyo, wala kahadlok sa kamatayon, wala-kutod nga optimismo, ubos-ikasarang nga pag-alagad sa masa, kag katampad sa Partido kag sa rebolusyon. Sa sini nga paagi mahatagan naton sang pinakauna nga tikang ang paghatag sang hustisya sa kamatayon sang Onse ka Martir kag Baganihan kag sa linibo nga nauna pa.
Gina-atas sang Komiteng Rehiyon-Panay sa tanan nga mga yunit sang Partido kag Hukbo sa isla ang paghiwat sang mga pulong pagpasidungog kag paghanduraw sa Onse ka Martir kag Baganihan. Ginapanawagan man sa mga alyado nga organisasyon sang NDF kag ibanpa nga abyan sang rebolusyon nga maghimo sang kapareho nga mga aktibidad. Ginabuyok ang tanan sa pag-amot sang ibanpa nga dagway sang pagpasidungog kag paghanduraw kaaangay sang mga pahayag sa PRWC, alternatibong midya, kag mainstream midya, mga binalaybay, sugilanon, kag ibanpa nga pangkultura nga inobrahan. Ipagkit naton ang Agosto 26 sang kada tuig bilang Adlaw sang mga Martir kag Baganihan sang Panay.
Ginapanawagan sang Komiteng Rehiyon-Panay ang pagpatapu sa NPA sang tanan nga may ikasarang pisikal-mental labi na ang halin sa sektor sang kabataan-estudyante, mamumugon kag propesyunal. Subong ang panahon nga may pinasahi nga kabilinggan sa pag-amot sang inyo ikasarang para sa pagpaabanse sang armadong paghimakas bilang nagapanguna kag makahulusga nga dagway sang rebolusyonaryo nga paghimakas sa pagseguro sang kadalag-an sang pungsodnon-demokratiko nga rebolusyon kag sosyalismo.
Dalamguhanon sang nagabugtaw kag pagpakita sang pagkamango sang kasaysayan kag sa kinaiya sang rebolusyonaryo nga organisasyon ang mga pahayag sang pamunuan sang 3rd ID kag 301st Bde sang Philippine Army nga ang kamatayon sang tatlo ka nagapanguna nga lider sang Komiteng Rehiyon-Panay ang marka sang katapusan na sang rebolusyonaryo nga hublag sa Panay. Ginpamatud-an sang kasaysayan sang bisan diin man nga katilingban sa kalibutan nga ang rebolusyonaryo nga paghimakas sang pumuluyo pat-ud nga magatuhaw kag magasulong samtang nagaluntad ang pagpanghimulos kag pagpamigos sa malapad mga masa sang pumuluyo. Ginpamatud-an man sang kasaysayan nga sa tagsa ka lider nga nagakatumba sa patag-awayan pat-ud man nga may nagabulos. Sa bahin sang Partido Komunista sang Pilipinas, nagaluntad ang sistema sang kadena sang pamunuan nga sa tagsa ka pagbakante sang posisyon may gilayon nga kadre nga nagaako sang responsibilidad sa pagpamuno.
Pat-ud nga malampuwasan sang rebolusyonaryo nga pwersa sa isla sang Panay ang ano man nga mga kahalitan kag pag-atras nga naagum sini subong kag sang nagliligad nga mga tinuig kag mapaslaw ang dalamguhanon sang 3rd Infantry Division nga tapuson ang armado nga rebolusyon sa Panay sa sini nga Septyembre kag sa katapusan sang tuig 2024. Sa ubay sang Partido kag sa ginasulong subong nga Hublag sa Pagpanadlong matumod ang mga pangsulod nga mga kasaypanan kag kahuyangan nga amo ang ugat sang mga kahalitan kag pag-atras kag liwat ini nga magaabanse. Ginapanaad sang nabilin nga mga kadre kag katapuan sang Partido kag mga Pulang kumander kag hangaway sang NPA nga padayon nga padabdabon sini ang kalayo sang armado nga rebolusyon tubtob sa lubos nga kadalag-an.
Pirme handurawon ang Onse ka Baganihan nga Martir sang Agosto sa Panay!
Mabuhay ang Bagong Hukbong Bayan!
Mabuhay ang National Democratic Front of the Philippines!
Mabuhay ang Partido Komunista ng Pilipinas!
Mabuhay ang pumuluyong Pilipino!