Lubos ang kalipay nga ginatamyaw sang Komite Sentral sang Partido Komunista sang Pilipinas ang tanan nga mga isganan nga Pulang hangaway kag kumander sang Bagong Hukbong Bayan sa maragtason nga adlaw nga ini sang ika-57 nga anibersaryo sang pagkatukod sang matuod nga hukbo sang pigos nga pumuluyo. Sa adlaw nga ini, aton balikan ang wala sang untat nga pagsulong sang rebolusyonaryong armadong paghimakas para abuton ang pungsodnon nga kahilwayan kag matuod nga demokrasya. Kuhaan naton sang mga pagtulun-an ang mga pag-usoy sang liko-liko nga dalan sang mga pagsulong kag pag-atras, kapaslawan kag kadalag-an.

Saludohan naton ang tanan nga baganihan kag martir sang pumuluyong Pilipino nga wala sang pagkangilin nga naghalad sang ila kabuhi para sa dungganon nga katuyuan nga hilwayon ang pungsod gikan sa imperyalistang paghari kag tanan nga dagway sang pagpamigos kag pagpanghimulos sang mga lokal nga sahi. Utang naton sa ila sakripisyo ang tanan nga naagum sang pumuluyo sa banas sang rebolusyonaryong pakig-away. Indi tubtob san-o madula sa handurawan sang pumuluyo ang ila mga ngalan kag amot. Sila amo ang mga naga-inggat nga bituon nga nagaserbe nga iwag sa kadulom nga gina-usoy sang pumuluyo padulong sa Pula nga pagbanag-banag. Nagakadapat lang nga saulugon naton ang naagum naton nga mga kadalag-an sa pagsulong sang rebolusyonaryong armadong paghimakas sang nagligad nga tuig, samtang husto nga magkuha sang mga pagtulun-an halin sa gin-agihan nga mga kabudlayan. Dapat uyatan ang mga ini sa pag-usoy naton sa banas sang pagpabaskog kag pagpasulong sang aton malawigon nga inaway banwa.

Padayon nga ginawagayway sang BHB ang Pula nga bandera sang rebolusyonaryong armadong paghimakas. Sa pagpamuno sang Partido kag ubay sang kahublagan panadlong, padayon nga ginapaslaw sang BHB ang patarasak nga pasistang pagpang-atake sang mga armadong gaway sang papet nga rehimen Marcos batuk sa hukbo sang banwa kag sa pumuluyo nga nagapakig-away sa kaumahan kag kasyudaran. Sa ubay sang Partido, kag sa atubang sang labi nga makaluluoy nga kahimtangan sang pumuluyo, mas nga nagalig-on kag nagasaka ang rebolusyonaryong espirito kag desisyon sang mga Pulang hangaway sang BHB nga ipakig-away kag pangapinan ang masang pigos kag ginahimuslan.

Halin sang ginlunsar naton ang kahublagan panadlong, labi pa nga nagsangkad ang aton positibo nga eksperyensiya sang sa negatibo. Bisan pa nga nag-agum sang mga kahalitan ang pila ka yunit, mas madamo nga yunit sang BHB ang nakapreserba sang kusog, nakapalapad sang erya sang operasyon, nakapalapad sang baseng masa, nakarekrut sang bag-o nga mga Pulang hangaway, kag madinalag-on nga nakalunsar sang lain-lain nga tipo sang taktikal nga opensiba kag armadong aksyon gerilya. Huluhalintang nga napatigayon ang pag-ayos sa moda ukon pamaagi sang gerilyang paghulag agud mapahugot ang angot sa masa samtang nagapakamaayo para likawan kag tiyugan ang madamol nga presensya sang kaaway. Malig-on nga liwat nakapabaskog ang BHB, kag nagapanglantaw ini sa liwat nga pagbuylo sa mga maabot nga panahon. Kasubong sa paglab-ot sa putok-putokan sang bukid, bug-os ang desisyon sang Partido kag BHB nga usoyon ang masibod, mabudlay kag makatalagam nga banas padulong sa rebolusyonaryong pagsulong.

Kada adlaw nagalala ang pag-antus sang pumuluyo sa tunga sang imperyalistang gyera kag krisis. Ang bug-os nga kalibutan ginatay-og sang mga inaway nga ginasindihan sang imperyalistang US para sa pag-agaw sang mga pungsod nga manggaranon sa lana kag mineral. Kabahin ini sang mga desperado nga tikang agud buhion ang kapitalistang produksyon kag produksyon militar. Apang sa proseso labi lang sini nga ginakuga ang nagatinga nga pangkalibutanon nga kapitalistang ekonomiya. Sa atubang sang mga gyerang agresyon sang US, nagadako nga nagadako ang peligro sang paglupok sang mas mga dalagko nga gyera sa palaabuton.

Patarasak ang paglapak sang imperyalistang US sa independensiya sang Pilipinas, sa militar, ekonomiya kag pulitika, paagi sa sunod-sunoran sini nga ido-ido nga si Marcos. Ginpasugtan ni Marcos nga gamiton sang militar sang US ang pungsod bilang base kag lunsaran sang agresyon militar sa Asia-Pacific tubtob sa Middle East, kabaylo sang ayudang militar kag pangpulitika nga suporta sa rehimen nga puno sang korapsyon kag ginakainitan sang pumuluyo.

Sa idalum ni Marcos, wala sang tupong ang korapsyon sang mga burukrata-kapitalista sa poder, ang pyudal kag mala-pyudal nga mga dagway sang pagpanghimulos sa kaumhan, ang pagpang-agaw sang duta kag pag-agaw sang palangabuhian, ang pagpangkawkaw sang mga dalagko nga kapitalista sa dunang manggad sang pungsod kag paghimulos sa barato nga kusog pangabudlay sang mga mamumugon, ang pagwasak sa kapalibutan kag ginatuga sini nga lapnagon nga paglaslas sa kabuhi kag palangabuhian sang masa. Ang nagasingki kag patarasak nga paggamit sang pasistang kalakasan patimaan sang desperasyon sang rehimen US-Marcos nga ipabilin ang dunot nga sistema paagi sa pagsabwag sang teroristang kakugmat kag armadong pagsumpo sa pumuluyo nga nagapakig-away. Mas nga nagaathag ang kakinahanglanon para sa rebolusyonaryong pakig-away. Para sa pumuluyo, ang pag-armas makatarungan kag kinahanglanon.

Dako man kag makahaladlok kon lantawon ang pangguwa nga hitsura sang pasista nga demonyo sang papet nga estado tungod sa kadamuon sang tinawo, bag-o nga mga mabaskog nga hinganiban, kag bubo sang suporta sang imperyalistang agalon, kahibalo kita nga ini, sa esensya, mahuyang kag gabok tungod ini nagausbong sa pagkadunot kag tagpangapin sang naganignig nga sistema, may madalum nga mga biak sang nagabanggaan nga paksyon, kag tuman nga ginakangil-aran kag ginasikway sang pumuluyo. Bisan magamay kag mahuyang pa ang BHB, malig-on ini nga nagahiliusa sa idalum sang husto nga pagpamuno sang Partido, kag determinado nga magpalapad kag magpabaskog dala ang madalum kag malapad nga suporta sang pumuluyo. Kaupod ang pagbangon kag paghulag sang masa, bug-os ang determinsasyon sang Partido kag BHB nga isulong ang demokratikong rebolusyon sang banwa nga may bag-o nga lebel sang pagkabagsik kag kabangis.

Ginatay-og sang imperyalistang gyera sang US ang kalibutan

Sa sulod lang sang duha ka bulan sa panugod sang tuig, ginsalakay sang mga pwersang militar sang imperyalismong US, sa mando sang buang nga pasistang pinuno sini nga si Donald Trump, ang duha ka pungsod nga madugay na nga nagatib-ong sang pungsodnon nga independensiya, kag nagapamatuk sa imperyalistang kontrol kag dikta. Ang paglaway ni Trump sa manggad nga lana sang Venezuela kag Iran, ang una kag ikatatlo nga may pinakadako nga reserba sa bug-os nga kalibutan, ang matuod nga rason sang ginpatigayon sini nga mga agresyon militar.

Ginsalakay sang mga pwersang militar sang US ang Venezuela sadtong Enero 3 kag gin-abdak ang presidente sini nga si Nicolas Maduro kag asawa nga si Cilia Flores, agud pwersahon nga paluhuron ang gobyerno kag batunon ang mga dikta sini nga kontrolon sang mga korporasyon Amerikano ang industriya sang lana sa pungsod. Wala pa matapos ang duha ka bulan, dungan nga ginbomba sang US kag Zionistang estado sang Israel ang Iran sadtong Pebrero 28, kag ginpatigayon ang operasyon asasinasyon batuk sa lider sini nga si Ayatolla Ali Khamenei. Deklarado nga tuyo ni Trump nga mangsulsol sang pag-alsa sang pumuluyo sang Iran, agud papungkuon sa poder ang bag-o nga gobyerno nga magaluhod sa gahum sang US.

Sa panahon man nga ini, direkta nga ginpaandaman sang US nga salakayon sang armadong pwersa sini ang Cuba, Colombia, kag Mexico, nga daw nagapanghagyat kon sin-o ang magsurender kag magduko sa iya mga dikta, ukon tubtob diin niya kaya nga tumanon ang pamahog nga pagsalakay. Antes pa sini, nagpamahog man si Trump nga “kuhaon liwat” ang Panama Canal. Sandig tanan ini sa liwat niya nga pagbuhi sang doktrinang Monroe nga nagagiit nga ang Latin America kaugalingon nga ugsaran sang US. Kadungan sini, nagpaandam si Trump nga pwersahon nga kuhaon ang Greenland, isa ka dako nga isla sa Arctic kag North Atlantic Ocean.

Sa sulod sang 25 ka adlaw, naghulog sang indi magnubo sa 23,000 ka bomba ang US kag Israel sa Iran, ukon masobra sa 920 ka bomba kada adlaw. Mga 2,000 ka Iranian ang napatay, lakip ang ginatos ka mga bata, kag 24,800 ang napilasan halin sang ginsugdan sang US kag Israel ang pagpangbomba. Gintarget sang pagpangbomba indi lang ang mga pasilidad pang-militar, kundi pati ang mga eskwelahan, kabalayan, bilding pang-komersyo, ospital, mga plantang pang-enerhiya kag pang-nukleyar, kag iban pa nga imprastrukturang sibilyan, sa pagtilaw nga paluhuron kag padukuon ang Iran sa gahum sang imperyalismong US, kag isungka ang manggad nga lana kag pungsodnon nga sobereniya sini.

Ang armadong pagsalakay sang imperyalismong US sa Venezuela kag Iran patimaan sang bag-o nga lebel sang pagsingki sang mga kontradiksyon sa tunga sang mga imperyalista kag sang mga pungsod nga nagagiit sang pungsodnon nga independensya, nga nakaangot man sa pagsingki sang inter-imperyalistang kontradiksyon. Direkta nga ginahangkat kag luyag bag-uhon ni Trump, sa ngalan sang mga monopolyo nga kapitalistang Amerikano, ang nagaluntad nga kaayusan sa kalibutan sa nagligad nga tatlo ka dekada—ang tungaay sa tunga sang mga imperyalista sa mga ginakuhaan sang lana kag iban pa nga importante nga mga hilaw nga materyales, tambakan sang sobra nga imbentaryo sang indi mabaligya nga mga baligya, kag bagsakan sang sobra nga kapital.

Hugot nga ginbatikos sang China kag Russia ang armadong pagsalakay sang US sa Venezuela kag Iran. Sa atubang sang grabe nga pagkawasak sang Iran tuga sang pagpangbomba sang US, lunsay nagpadala ang China kag Russia sang ayudang makatawo. Nagpahayag ang Russia kag lain-lain nga pungsod kag internasyunal nga ahensiya sang pagkabalaka sa pagtarget sang US sa mga plantang nukleyar nga pwede magresulta sa kalamidad sa minilyon ka tawo.

Ang pagsalakay sang US sa Venezuela kag Iran nagatuga man sang madalum nga pagkahangawa sa mga alyado nga pungsod sang US, lakip ang mga nagsulod sa North Atlantic Treaty Organization (NATO). Madamo sa ila ang nagsaway sa paglapas sang US sa mga internasyunal nga pagsulundan kag regulasyon sang United Nations, bisan wala nila direkta nga ginakontra,kag sa ulihi naga-isa sa katuyuan nga pukanon ang mga gobyerno nga nagakontra sa imperyalistang dikta kag kontrol. Apang grabe ang ila kahangawa nga ang pagsolo sang imperyalismong US magaresulta sa mas nga pagdako sang rekurso nga ginauyatan sang US, nga magabag-o sang daan nga nagaluntad nga balanse antes ang mga agresyon militar sang US. Antes sini, nagtuga man sang mga madalum nga kontradiksyon ang pagpatuman sang US sadtong nagligad nga tuig sang mga matag-as nga taripa sa lain-lain nga pungsod sa kalibutan, lakip ang kasubong nga mga imperyalistang karibal kag kaalyado.

Ang mga agresyon militar sang US sa Venezuela kag Iran para kontrolon ang lana mga pagbira sa numero uno sini nga karibal nga China, nga amo ang nagapanguna nga nagabakal sang gina-eksport nga lana sang mga pungsod nga ini (15%–20% sang gina-import nga lana sang China halin sa 80%–90% sang lana nga gina-eksport sang Iran kag Venezuela). Ang pagtilaw nga pag-agaw sa mga dalagko nga ginakuhaan sang lana kabahin sang mga tikang pagpang-ipit sang US sa China nga mas nagsingki sang nagligad nga pila ka tuig. Lakip sa mga ini ang pagpasaka sang taripa sa mga gina-import halin sa China, pagdumili sa paggamit sang mga pyesa elektroniko nga himo sang kumpaniya nga Huawei sang China, pagdumili sa pagbaligya sa China sang mga abanse nga semiconductor kag sang mga makina para sa produksyon sang mga ini, kag iban pa nga mga tikang pang-ekonomiya kag pang-baligyaanay.

Kadungan sini ang tayuyon nga pagpabaskog sang US sang presensya sa “first island chain” sa palibot sang China, lakip ang pagpwesto kag pagpabaskog sang presensyang militar sang mga pwersa kag kagamitan pang-gyera sini sa Pilipinas, Japan, kag South Korea, kag pagbaligya sang armas sa Taiwan, sa tabon sang “pagpugong” (containment) sa kuno “potensyal nga operasyon militar” sang China sa Taiwan. Ining tanan nagatulod sa kontra-paghanda kag pagpabaskog sang China, lakip ang pagpadamol sang presensya sa sulod kag guwa sang kadagatan sa palibot sang iya pungsod.

Nag-gasto ang militar sang US sang mas o menos $1 bilyon kada adlaw sa patarasak nga pagpangbomba sa Iran. Mayor nga nagbenepisyo diri ang mga kumpaniya nga nagasuplay sang mga armas kag kagamitan pang-gyera sa militar sang US. Nagpangayo subong ang gobyernong Trump sang dugang nga $200 bilyon para magsulod sa mga bag-o nga kontrata sa mga kumpaniya nga ini para sa dugang nga mga misayl, drone, kag iban pa nga kagamitan pang-gyera.

Kabaliskaran sa una nga plano sang US, ang pagsalakay sini sa Iran nagdugay na sang isa ka bulan. Samtang nagadugay, mas nga nagabaskog ang pagkontra diri sa sulod mismo sang US kag sa lain-lain nga mga pungsod. Nagbunga ini sang sobra nga ispekulasyon sa presyo sang lana (halin $65 padulong $105 kada bariles sang krudo nga lana) nga nagtuga sang “oil price shock” sa bug-os nga kalibutan, sa benepisyo sang mga dalagko nga kumpaniya sa lana. Malaparan subong ang kahangawa nga magasadsad sa resesyon kag istagplasyon (mataas nga implasyon, manubo nga produksyon kag lapnagon nga disempleyo) ang madamo nga ekonomiya, lakip ang US, ilabi na kon magdugay pa ang gyera sang US kag Israel sa Iran, kag magpabilin nga mataas ang presyo sang krudo nga lana.

Bisan sa atubang sang pagpangsalakay sang pinakagamhanan nga imperyalista sa bug-os nga kalibutan, wala nagduko ang pumuluyo sang Venezuela kag Iran. Minilyon ka Venezuelan ang naghagunos sa kadalanan sa lain-lain nga banwa para batikuson ang armadong pagpangsalakay kag pagpangbomba sang US kag igiit nga ibalik sa ila pungsod ang ila presidente nga si Maduro. Subongman sa Iran, halos kada adlaw nga nagakapuno ang mga plasa kag kadalanan sang minilyon nga nagadagsa sa mga demonstrasyon para ipakita ang ila paghiliusa, batikuson ang armadong agresyon sang US kag pakigbatuan ang pagtinguha nga papungkuon sa poder ang gobyernong magaserbe sa interes sang US.

Sa subong indi pa maathag kon paano tapuson sang US kag Israel ang gyerang pagpangsalakay batuk sa Iran, ilabi na nga napaslawan ini nga malab-ot ang gintalana nila nga katuyuan nga pasungkaon ang Iran. Palatandaan sang grabe nga pagkaligwin sang imperyalismong US, wala nakuha ni Trump ang suporta sang mga imperyalistang alyado sini sa Europe nga magpadala sang pwersang militar agud buksan ang Strait of Hormuz. Palatandaan nga magadugay ang gyera, nagalab-ot sa 50,000 ka mga soldado nga Amerikano ang padulong subong sa rehiyon.

Sa sulod sang isa ka bulan, tayuyon man nga nagapatigayon ang Iran sang mga balos salakay sang mga misayl kag drone nga ginatarget ang Israel, kag ang mga base militar sang US sa mga pungsod sa Middle East. Ginbatikos sang UAE, Saudi Arabia, Bahrain, Qatar, Kuwait kag Jordan ang mga aksyon sang Iran nga “lapas sa independensiya,” bisan pa nagapamalibad sila nga “madalahig sa gyera nga indi ila.” Segurado nga magabag-o pa ang hanayan sang gyera kon magdugay ini, ilabi na kon direkta na nga maghugpa sa mga teritoryo sang Iran ang mga tropang Amerikano.

Sa atubang sang nagapadayon nga krisis sang pangkalibutanon nga sistemang kapitalista, lauman nga magpadayon kag labi pa nga magsingki ang mga gyerang agresyon sang US sa mga maabot nga bulan kag tuig. Ginpakita na ni Trump nga indi mapunggan ang iya gobyerno sang ano man nga internasyunal nga pagsulundan, ukon bisan sang mga ligal nga proseso sang gobyernong US para sa paglunsar sang gyera. Ginpakita ni Trump nga ang iya kabuangan indi malimitahan. Sa paglaway nga agawon ang kontrol sa manggad nga lana kag mga estratehikong mineral sang iban nga pungsod, kag ipiton ang mga imperyalistang karibal, ilabi na gid ang China, indi malayo nga maglupok ang mas mga dalagko pa nga armadong kagamo indi magdugay sa palaabuton. Ang grabe nga pag-antus nga ginabunga sini sa pigos nga pumuluyo sa bug-os nga kalibutan nagapukaw sa ila kamuklatan kontra-imperyalista kag nagapadaba-daba sang ila desisyon nga makig-away para sa kahilwayan.

Nagasadsad sa krisis ang dunot nga nagaharing sistema sa Pilipinas

Madasig nga nagbulusok ang lebel sa pangabuhi sang malapad nga masa sang pumuluyong Pilipino kadungan sang mas nga pagsadsad sa mas madalum kag malala nga krisis sang nagahari nga sistemang mala-kolonyal kag mala-pyudal sa Pilipinas. Gintulod ini sang pagbutyog sang presyo sang lana sunod sang pagpang-gyera sang imperyalismong US sa Middle East. Labi pa nga nagakabuyagyag ang atrasado nga kahimtangan sang lokal nga ekonomiya ukon sistema sang produksyon nga nagasandig sa importasyon kag dumuluong nga pautang. Labi man nga nagakabuyagyag ang salabton sang reaksyonaryong gobyernong Marcos sa nagalala nga palangabuhian sang mayoriya sang pumuluyo, sa pag-upod sini sa interes sang mga dumuluong nga kumpaniya kag kakunsabo nga mga dalagko nga burges kumprador kag burukrata kapitalista.

Tuman nga paantus sa pumuluyong Pilipino ang pagpanghimulos sang sakon-sa-ganansiya nga mga kumpaniya sa lana sa gyera sa Middle East. Dululungan nga nagtimbuok sang wala pa sang kapareho ka taas nga lebel ang presyo sang mga produkto nga petrolyo. Tuman nga ginpabutyog ang presyo sang diesel nga nagapanguna nga ginagamit sa transportasyon, enerhiya kag komersyo. Ang higante nga ganansiya nga ginakamal sang mga kumpaniya sa lana pabug-at sa masa nga amo ang nagalukdo sa kada pagsaka sang presyo. Dugang pa nga palas-anon sang pumuluyo ang nagasinampaw nga buwis nga ginasukot sang gobyerno (excise kag value-added tax ukon VAT) nga nagalab-ot sa ₱160 bilyon kada tuig, nga halos 60% sang tuigan nga koleksyon nga ₱276 bilyon halin sa kumbinasyon sang duha ka buwis.

Ang wala-untat nga pagsaka sang presyo sang lana sa panugod sang tuig kag pagbutyog halin Marso nagresulta sang tayuyon nga pagsaka sang presyo sang pagkaon kag iban pa nga sandigan nga kinahanglanon, pamasahe, sukot sa kuryente, tubig kag iban pa nga serbisyo. May peligro sang labi pa nga pagsaka sang mga presyo sang mga balaklon tungod sa pagbagsak sang balor sang piso kontra dolyar sa pinakanubo nga balor sa kasaysayan (₱60.5 kada dolyar). Mayor nga gin-igo sini ang masang anakbalhas.

Madasig nga nagsarurot ang lebel sang pangabuhi sang mayoriya sang pumuluyo—ang mga mamumugon, mangunguma kag mga ordinaryo nga empleyado, nga wala ukon halos wala sang natago kag nagakabuhi sa isa ka kahig-isa ka tuka. Kon magpadayon ang pagsaka sang presyo sa mga maabot nga binulan, ginabana-bana nga 2-3 milyon ka pamilya ang madugang sa 14.3 milyon ka pamilya nga nagakabuhi sa kaimolon. Sa tunga sang gyerang agresyon sang US batuk sa Iran, nagakahangawa ang masobra duha ka milyon nga migranteng mamumugon nga nagatrabaho sa lain-lain nga pungsod sa Middle East. Pila ka puluan ka libo na ang nagpili nga magpauli bisan wala sila sang maabtan nga trabaho ukon palangabuhian sa pungsod.

Ang pagbutyog sang presyo sang lana labi nga magalumos sa palangabuhian sang masang Pilipino. Tungod sa pagsaka sang gasto sa produksyon, nagabagsak ang kita sang mga drayber kag opereytor sang mga magagmay nga transportasyon, bisan ang mga mangingisda, mga mangunguma, gagmay nga trader, negosyante kag mga nagatinda, mga nagapadalagan sang kantina ukon karenderya, kag madamo pa nga iban.

Mas magagamay pa ang balor sang sweldo sang mga mamumugon tungod sa nagasaka nga gasto sa pangabuhi. Sa pihak sang grabe nga reklamo sa manubo nga sweldo, padayon nga nagapabungol-bungol ang rehimen Marcos sa madugay na nga demanda para sa makabuhi nga minimum nga sweldo nga ₱1,200 kada adlaw. Sobra nga paantus sa pumuluyo ang kontrol sang kartel ukon himbunanay sang pila ka sakon nga mga dalagko nga kumpaniya sang lana sa lokal nga distribusyon sang mga produktong petrolyo. Taliw-as sa pangako sang layi sa deregulasyon (1998) nga maganubo ang presyo tungod sa kumpetisyon, gina-areglo kada semana sang mga pinakadalagko nga kumpaniya sa lana ang presyo para maksimisado ang ila ganansiya. Wala sang pungsodnon nga industriya sang lana sa Pilipinas. Imbes nga mag-uswag, labi nga nagahuyang ang lokal nga kapasidad sa produksyon sang repinado nga lana. May natural gas man sa kadagatan nga nakapalibot sa Pilipinas, kasubong sang Malampaya, ini yara sa kontrol sang mga dalagko nga burgesya kumprador kag kasosyo nga mga dumuluong nga kapitalista sa pinansiya.

Ang lokal nga industriya sang lana laragway sang kabug-osan nga kaayusan pang-ekonomiya sa Pilipinas, nga ginaharian kag yara sa kontrol sang dumuluong nga mga kumpaniya kahimbon ang mga dalagko nga burgesya kumprador, mga dalagko nga agalon mayduta kag burukrata kapitalista. Kakunsabo ang papet nga rehimen nga tagpatuman sang mga neoliberal nga patakaran nga dikta sang International Monetary Fund, ginaupangan sang mga dumuluong nga kumpaniya ang pag-uswag sang lokal nga produksyon.

Ang ekonomiya sang Pilipinas nagapabilin nga atrasado, agraryo kag indi industriyalisado. Ang dunang manggad sang pungsod—halin sa kabukiran tubtob sa kadagatan—ginakawkaw kag gina-agaw sang mga dumuluong monopolyong kapitalista kag mga nagahari nga sahi. Ginahimuslan ang manubo nga sweldo sang mga mamumugon Pilipino. Ang ginakamal nga ganansiya wala ginabalik sa pagpalapad kag pagpauswag sang lokal nga produksyon. Nakasandig ang lokal nga produksyon sa pag-import sang mga makinarya, pyesa kag iban pa nga sangkap sa produksyon, kag nakatutok sa pag-eksport sang barato nga hilaw ukon indi masyado naproseso nga materyales (mineral, prutas), kag sa liwat pag-eksport sang manubo nga dugang nga balor sang mga baligya (kasubong sang mga semiconductor kag iban pa nga pyesa nga elektroniko).

Sa idalum ni Marcos, labi nga nalumos sa utang ang Pilipinas. Wala sang tupong sang sa nagligad ang subong nga pangguwa nga utang sang pungsod nga naglab-ot na sa $99.1 bilyon (₱5.81 trilyon), halos apat ka sulit kumparar sa pangguwa nga utang ($26 bilyon) nga ginbilin ni Marcos Sr sadtong 1986. Ang dumuluong nga utang sang Pilipinas kabahin sang ₱18.13 trilyon nga kabug-osan nga utang sang pungsod sadtong Enero 2026, pinakataas na sa kasaysayan. Ang dumuluong nga utang, kaupod ang ginapadala pauli nga dolyar sang mga migranteng mamumugon, pangbayad sa depisito sa baligyaanay pangluwas ($50–$60 bilyon sang nagligad nga mga tuig), nga bunga sang indi patas nga bayluhanay sang gina-eksport nga barato nga mga hilaw nga materyales, kag gina-import nga mas mahal nga mga human nga baligya. Pangpuno ini sa depisito sa badyet ukon kakulangan sa pondo sang gobyerno, nga dako nga bahin nagakadto sa maanomaliya nga proyektong pang-imprastruktura, grabe ka dako nga gasto militar kag pangbayad utang.

Labi nga nagalala kag nangin barahubal ang mga dagway sang korapsyon sang nagahari nga sistema sa idalum sang rehimen US-Marcos. Pinakalala diri ang nabuyagyag nga maanomaliya nga proyektong flood control kag iban pa nga imprastruktura, kon diin binilyon ka piso ang ginbulsa sang mga burukrata kapitalista nga opisyal sang gobyerno. Nabuyagyag sang sini lang nga mismo si Marcos ang utok sa likod sang iskema nga ini. Kakunsabo ang pila ka yabe nga opisyal sang Malacañang, ginabana-bana nga nagalab-ot sa ₱8 bilyon ang direkta nga ginbulsa ni Marcos sa dagway sang mga kikbak. Magluwas sa pila ka mga manubo nga opisyal, wala pa sang nabilanggo ukon ginpasakaan sang kaso sa mga matag-as nga opisyal nga napangalanan nga imbolbado sa mga anomaliya. Kasubong sang ginasigahum, wala sang nadangatan ang “imbestigasyon” sang ICI ukon Independent Commission on Infrastructure nga gintukod ni Marcos. Mismo si Marcos nakalusot sa salabton. Ang kaso nga impeachment batuk sa iya madasig nga ginbasura sang mga kongresista nga yara sa iya bulsa.

Samtang, madasig naman nga ginpadayon sang House of Representative ang pagpasaka sang kaso nga impeachment kag pagpatigayon sang pag-hearing batuk kay Vice President Sara Duterte, kaangot sa maanomaliya nga pag-gasto sa ₱612.5 milyon nga intelligence funds, indi mapaathag nga pagdako sang personal nga manggad kag iban pa nga reklamo. Sa paghandum sang hustisya, madugay na nga ginaduso sang pumuluyo ang pagpasabat kay Sara Duterte kag sa amay niya nga anay presidente nga si Rodrigo Duterte. Ginkalipay sang puluan ka libo nga pamilya sang biktima sang kalakasan sang estado sa idalum ni Duterte ang ginpatigayon nga pag-hearing sa iya sang sini lang sang International Criminal Court sa The Hague agud kumpirmahon ang mga kaso batuk sa iya. Samtang ginapasabat sang pumuluyo ang mga Duterte, kahibalo sila nga ginagamit man sang nagahari nga hubon Marcos ang pag-ipit kay Sara Duterte kag pagdiskaril sa gindeklarar nga plano sang karibal nga magpadalagan sa piniliay sa pagka-presidente sa 2028. Bisan malayo pa ini, nakatutok na ang atensyon sang mga reaksyonaryong partido sa mga aregluhanay, maniobrahanay kag kampuhan.

Tuman na ang pagkangil-ad sang pumuluyo sa korapsyon sang mga burukrata-kapitalista sang bisan diin man nga hubon sang mga nagahari nga sahi, nga harap-harapan ang pagpangkawkaw kag pagpamanggad halin sa kaban sang banwa, bisan sa tunga sang nagalala nga pag-antus sang masang anakbalhas. Wala tupong ang kaakig sang pumuluyo, sa partikular, sa peke ukon palpak nga mga proyektong flood control, nga ginakitaan sang binilyon ka piso, ilabi na sa atubang sang sunod-sunod nga kalamidad tuga sang mga pagbaha kag pagkatiphag sang duta. Kahibalo sila nga magluwas sa flood control, madamo pa nga iban nga iskema sang korapsyon sa idalum sang dunot nga gobyerno, halin sa nabulgar nga maanomaliya nga proyektong “farm-to-market road” tubtob sa pagbakal sang mga trak sang bombero.

Naglupok sadtong nagligad nga tuig ang kaakig sang pumuluyo sa korapsyon. Sa sulod sang pila ka bulan, pasulit-sulit nga nag-walk-out ang mga estudyante halin sa puluan ka eskwelahan kag balik-balik nga nagrali sa kadalanan ang puluan ka libo nga pumuluyo para magprotesta sa lain-lain nga bahin sang pungsod. Bisan pa pilit nga ginaprotektaran si Marcos sang naga-alyado diri nga mga grupong sosyal-demokrata sa pagpanguna sang Akbayan, wala sini matabunan ang nagalanog nga singgit sang malapad nga kubay sang mga pamatan-on para sa pagpalayas kay Marcos kag Duterte, kag panawagan para sa pagbag-o sang dunot nga sistema.

Ang nagahorma nga kahublagan protesta padayon nga nagabuylo sa atubang sang madasig nga pagbagsak sang palangabuhian sang pumuluyo. Ang mga nagtindog kag nagprotesta batuk sa korapsyon sadtong nagligad nga tuig nagtindog kag nagprotesta subong nga Marso. Naglupok ang sunod-sunod nga hublag protesta kag untat-byahe sa bug-os nga pungsod para batikuson ang imperyalistang gyera sang US sa Iran, batikuson ang mga mahimuslanon nga mga kumpaniya sang lana sa grabe nga pagsaka sang presyo sang diesel kag gasolina, kag kundenaron ang rehimen US-Marcos sa pagka-inutil sini sa atubang sang krisis kag pagpabungol-bungol sa mga reklamo sang pumuluyo.

Sa handum nga punggan ang pagbuylo sang kahublagan protesta, padayon nga ginagamit sang rehimen US-Marcos ang mga armadong gaway sini agud ipiton kag hadlukon ang mga lider kag organisasyon sang lain-lain nga sektor, magpalapta sang mga armadong pwersa kag mga ahente militar sa mga komunidad, kampus kag mga pabrika, kag ipiton ang mga paghulag sang masa sa kadalanan. Ginagamit sini ang “teroristang” pagbansag kag ang pamahog sang pagkabilanggo ukon pag-abdak. Ini tanan kabahin kuno sang “paghiliusa, kalinong kag kauswagan”nga ginalakipan man sang armadong pagpangsumpo sa kaumhan kag mga operasyon pangkombat batuk sa mga rebolusyonaryong armadong pwersa, agud hatagan sang ligwa ang dumuluong nga mga kumpaniya, kakunsabo ang mga lokal nga nagahari nga sahi, nga mang-agaw sang duta, magbukas sang mga minahan kag iban pa nga mga operasyon nga nagapangkawkaw kag nagapangwasak sa kapalibutan.

Todo-bubo ang rekurso kag tinawo sang reaksyonaryong rehimen Marcos sa desperasyon sini nga lagson ang pagpapas sa BHB. Sa pihak sang mga deklarasyon nga “madugmok na” ang BHB, nakapakat pa gihapon ang halos tanan nga batalyon pangkombat sang AFP sa mga larangan gerilya sa bug-os nga pungsod, para patigayunon ang ginatawag sini nga “focused military operations” nga may kinaiya sang pagpaidalum sang mga baryo sa paghari sang layi militar, pagkontrol sa hulag sang populasyon, pagblokeyo sa pagkaon kag komersyo, patarasak nga pagpangbomba kaangay sa Mindoro, pagsumpo sang paghimakas sang mga mangunguma sa pagsulod sang mga operasyon mina kasubong sa Nueva Vizcaya, ekstrahudisyal nga pagpamatay sa mga ginasuspetsuhan nga mga nagasuporta sa BHB, peke nga pagpasurender, pag-abdak, pagtortyur kag pagbilanggo, kag iban pa nga mga grabe nga dagway sang pagtapak sa mga tawhanon nga kinamatarung.

Wala sang untat ang pagsabwag sang pasistang kakugmat sang AFP santo sa mando sang agalon sini nga imperyalistang US. Ginabubuan ini sang imperyalismong US sang pondo ($250 milyon kada tuig tubtob 2032), kagamitan militar sa dagway sang mga eroplano pang-gyera, bomba kag bala, kag hugot nga suportang paniktik. Tuyo sang imperyalismong US nga itigana ang bug-os nga pwersa sang AFP para magsuporta sa mga ginakasa nga operasyon kag gyera sang US sa Asia-Pacific, partikular na batuk sa karibal sini nga China.

Segurado nga ganuyon sang US ang Pilipinas sa ano man nga gyerang agresyon ukon gyerang pagpasilabot sa Asia. Mas nga nagadamol ang presensya militar sang US sa nagadamo nga mga EDCA “site” kag sa mga likom nga pasilidad sang US sa lain-lain nga bahin sang pungsod. Sa tunga sang gyerang agresyon sang US batuk sa Iran, linibo nga pangsalakay nga tropang Amerikano ang sugataon kag alalayan sang AFP sa plano nga patigayunon nga Balikatan war exercises. Nakasakay sila sa ila denukleyar nga mga barko-de-gyera kag dala ang ila mga armas pang-gyera. Ang mga barkong nabal sang US permanente nga nakadungka ukon nagapalawod sa South China Sea, sa mga dagat sa palibot sang Pilipinas kag sa sulod sang teritoryo sang pungsod. Kabahin ini sang estratehiya nga paggamit sa Pilipinas bilang dako nga base militar kag lunsaran sang mga operasyon sini sa rehiyon. Para pamunuan ang mga operasyon nga ini, gintukod sang militar sang US ang Task Force Philippines. Kabahin sini ang saywar nga mga “transparency operations” agud ibuyagyag ang ginatawag sini nga mga agresibo nga maniobra sang China sa South China Sea agud ipaguwa nga “abyan” kag “kaalyado” sang Pilipinas ang US batuk sa China. Sa duso man sang US, sunod-sunod nga mga kasugtanan militar ang ginpirmahan kag pagapirmahan pa sang Pilipinas sa mga alyado sang US kasubong sang Japan, France, Canada kag iban pa nga pungsod.

Ang nagapadayon nga imperyalistang gyera sang US sa Iran kag ginabunga sini nga krisis sa Pilipinas kag bug-os nga kalibutan, magabun-ag sang sitwasyon nga tuman ka kinahanglanon nga makig-away sang mga ginapigos nga sahi kag sektor para pangapinan ang ila kaayuhan. Ginapukaw sini ang malapad nga pumuluyo sa kakinahanglanon para sa rebolusyonaryong pagbag-o sa Pilipinas kag bug-os nga kalibutan. Ang mga rebolusyonaryong pwersa sa pagpamuno sang Partido Komunista sang Pilipinas determinado nga pukawon, organisashon kag pahulagon ang pumuluyong Pilipino sa banas sang demokratikong rebolusyon sang banwa.

Palig-unon ang BHB kag mapagsik nga isulong ang inaway banwa!

Ang wala sang kasolbaran nga krisis sang nagahari nga sistemang mala-kolonyal kag mala-pyudal, ang brutal nga pagpangsumpo sang pasista-teroristang rehimen US-Marcos, ang nagalala nga lebel sang pagpasilabot militar sang US, ang nagagrabe nga kagutuman kag pag-antus, kag nagalala nga dagway sang pagpamigos kag pagpanghimulos ang nagapanguna nga mga rason nga padayon nga ginasulong ang demokratikong rebolusyon sang banwa. Bug-os ang desisyon sang Partido, sang Bagong Hukbong Bayan kag tanan nga rebolusyonaryong pwersa nga isulong ang pangmalawigon nga inaway banwa halin sa subong nga halintang padulong sa masunod.

Padayon nga nagapabaskog ang BHB sa kaumhan. Tayuyon sini nga ginapapagsik ang hilikuton masa kag ginapalapad ang mga sonang gerilya. Nagarekrut kag nagahanas ini sang bag-o nga mga Pulang hangaway para mag-abaga sang nagadako nga katungdanan sa pulitika kag militar.

Dako nga kabulaskugan ang deklarasyon ni Marcos sadtong nagligad nga tuig nga “wala na sang grupong gerilya” sa pungsod. Amo man ka dako nga kabulaskugan ang pasulit-sulit nga deklarasyon sang Armed Forces of the Philippines (AFP) sang nagligad nga mga tinuig, nga lubos na sini nga matapos ang rebolusyonaryong armadong paghimakas. Isa ka tuig na naman ang nagligad nga wala natuman ang ila gintalana nga katuyuan. Sa lain-lain nga bahin sang pungsod, padayon nga nagapakig-away ang mga yunit gerilya sang BHB. Kabaliskaran sa iya ginapahambog nga nalutos na ang BHB, wala-untat ang AFP sa pagpakat sini sang binatalyon nga mga pwersang pangkombat halin sa norte sang Luzon tubtob sa sur sang Mindanao, sa maitum nga padihot nga sumpuon ang masa kag papason ang hukbo sang banwa.

Bug-os kapagsik naton nga saulogon subong nga adlaw ang ika-57 nga anibersaryo sang Bagong Hukbong Bayan. Dumdumon naton kon paano ini gintukod sang Partido Komunista sang Pilipinas sadtong Marso 29, 1969 sa pinakataas nga ubay sang Marxismo-Leninismo-Maoismo. Halin sang gintukod, ang BHB nagserbe ini nga rebolusyonaryong hukbo sang pumuluyong Pilipino para pukanon ang imperyalismong US, kag ang makasahi nga paghari sang mga burgesya kumprador, agalon mayduta kag mga burukrata kapitalista. Ang BHB ang nagapanguna nga instrumento sang Partido sa pagpatuman sang sentral nga rebolusyonaryong katungdanan nga dugmukon kag pukanon ang armadong kusog sang reaksyonaryong estado kag tukuron ang bag-ong demokratikong gobyerno sang banwa.

May 60 lang ka Pulang hangaway ang BHB sang gintukod ini sa ikaduha nga distrito sa probinsya sang Tarlac. Ginauyatan nila sadto ang siyam (9) ka riple nga otomatik kag 26 ka imperyor nga armas. Sa pagpanikasog nga magsulong santo sa estratehikong linya nga palibutan ang kasyudaran halin sa kaumhan, ang BHB nakapalapad, una, sa Central Luzon, sunod sa Cagayan Valley, kag sang ulihi sa lain-lain nga probinsya sang Luzon, Visayas kag Mindanao.

Indi tubtob san-o nangin upang sa pagsulong sang rebolusyonaryong armadong paghimakas ang pagkagamay kag mahuyang nga pwersa sang BHB, kumparar sa mas dako kag mabaskog nga armadong pwersa sang kaaway. Bitbit ang malapad kag madalum nga suporta sang masa, nagapakahanas ang mga yunit sang BHB sa paggamit sang mga taktikang gerilya agud huluhalintang nga makapalapad kag makapabaskog. Permi nga ginauyatan ang inisyatiba kag madasig nga nagahulag, nahimo sang mga yunit gerilya sang BHB nga iguon ang mas mahuyang kag naligwin nga bahin sang kaaway, kag kuhaon ang iya mga armas.

Sa sulod sang 57 ka tuig, masobra napulo ka estratehikong opensiba ukon gyera sang pagpapas na ang ginlunsar sang imperyalismong US kabulig ang walo ka papet nga reaksyonaryong gobyerno—halin kay Marcos Sr tubtob kay Marcos Jr—para lutoson ang BHB: Oplan Nip-in-the-bud, Oplan Katatagan, Oplan Lambat Bitag I, Oplan Lambat Bitag II, Oplan Mamamayan, Oplan Makabayan, Oplan Gordian Knot, Oplan Bantay Laya I, Oplan Bantay Laya II, Oplan Bayanihan, Oplan Kapayapaan, Joint Oplan Kapanatagan, kag NAP-UPD. Ini tanan ginbalay sa doktrina sang counterinsurgency sang militar sang US. Ang mga ini lunsay mga estratehikong kampanya sang pagkubkob sa BHB, nga may katuyuan nga iligwin ang hukbo sang banwa sa masa, sumpuon ang masa kag punggan ang ilig sang suporta sini sa BHB, agud ibutang ang mga yunit sang hukbo sang banwa sa sitwasyon nga lunsay militar kag lutoson sila gamit ang superyor nga kusog militar. Sa estratehikong balayon nga ini, kada isa ka oplan nagagamit sang lain-lain nga mga taktika nga mas masingki, mas brutal, mas masangkad sang sa ginsundan, tanan sa ubay kag suporta sang imperyalismong US.

Ang gerilyang pagpakig-away taktika sang bug-os nga pumuluyo, indi lang sang hukbo sang banwa.Pila ka sulit man nga mas dako ukon mas mabaskog ang pasistang demonyo, indi ini makapadugay sa pila ka libo nga kagat sang mga pula nga subay. Wala sang pwersa sang kaaway ang makaupang sa pagsulong sang inaway banwa. Sa hugot nga paghiliusa sang masa kag sang hukbo sang banwa, huluhalintang nga magasulong ang pangmalawigon nga inaway banwa sa Pilipinas, makatipon sang kusog sa kaumahan tubtob masarangan na sini nga lutoson ang kasyudaran. Napamatud-an sa kasaysayan sang mga pungsod nga nagdaog sa inaway banwa kon paano ang inaway banwa nagmadinalag-on bilang isa ka pangmasa nga kahublagan pangpulitika nga gina-abaga sang minilyon ka pumuluyo, paagi mayor sa armadong paghimakas, kadungan kag ginasuportahan sang tanan nga dagway sang paghimakas.

Pasulit-sulit nga napamatud-an sang BHB nga paagi sa paggamit sang hukbo kag sang masa sang mga taktikang gerilya sang konsentrasyon, dispersal kag pagbalhin—pagpakita sa Sidlangan kag pagbira sa Nakatungdan, pagpasumbag sa hangin sa kaaway, pagbira sa likuran sang kaaway, pagbira sa mahuyang kag mga naligwin nga bahin sang kaaway, kag iban pa—ano man ka dako, ka dugay kag ka bangis ang mga kampanya sang amat-amat nga pagkubkob kag pagpapas, masarangan ini nga paslawon sang BHB, kag sa proseso mahimo nga magpalapad kag magpabaskog. Pasulit-sulit man nga napamatud-an sa negatibo nga inagihan nga ano man ang paghalog sa mga prinsipyo kag taktikang gerilya—pagbuhi sa inisyatiba kag pagpasibo, wala sa panahon nga konsentrasyon, pagkuta sa bukid, self-constriction (pagpakitid sa kaugalingon) kag iban pa nga kahuyangan—magadangat sa mga kahalitan kon indi man pagkapapas sang pila ka bahin.

Nag-agum man sang mga magagmay kag mga dalagko nga kahalitan ang BHB sang nagligad, nahimo sini nga liwat magsulong kag magpabaskog paagi sa pagbalik sa pundasyon sang mga sandigan nga prinsipyo nga ginlatag sang Partido. Sa ubay sang Marxismo-Leninismo-Maoismo, ginlunsar naton ang kahublagan panadlong sadtong 2023 sa katuyuan nga sumahon kag kuhaan sang mga pagtulun-an halin sa mga gin-agihan nga mga kahalitan kag pag-atras bunga sang mga internal nga kahuyangan sa pagsulong sang inaway banwa kag pag-atubang sa kontra-rebolusyonaryong opensiba sang kaaway. Sa proseso ginapahugot naton ang aton paghakus sa mga sandigan nga prinsipyo kag ginasikway ang sayup nga mga kalakaran sang nagligad. Halin sadto ginapatigayon naton ang kinahanglanon nga pagbag-o sa mga pamaagi sang gerilyang paghulag sang hukbo sang banwa sa katuyuan nga pahugton ang angtanay kag paghiliusa sang hukbo sang banwa kag masa,palaparon kag pabaskugon ang BHB,ipabilin nga bulag kag bungol ang kaaway, paslawon ang iya mga dalagko nga operasyon sang pagdumog, kag kibuton ini sang wala ginasigahum nga mga taktikal nga opensiba kag aksyon gerilya.

Sa subong nga halintang sang inaway banwa, dapat naton padayunon ang pagsulong sang lapnagon kag dasok nga pakig-away gerilya base sa nagalapad kag nagadalum nga baseng masa. Agud mahimo ini, kinahanglan nga isulong naton ang mga malaparan nga paghimakas pangpulitika kag armado, upod ang katungdanan sang tanan nga bahin nga pagpabaskog sang Partido kag hukbo, ang mga organisasyon masa, mga organo sang gahum pangpulitika kag ang mga yunit sang milisya sang banwa kag grupo pangdepensa sa kaugalingon sang masa.

Yabe sa tanan nga ini ang pagpabaskog sang Partido. Dapat labi nga pabaskugon ang pagtuon sa Marxismo-Leninismo-Maoismo, sa mga sandigan nga prinsipyo sang Partido, kag paggamit sa mga ini sa pagtuon sa kongkreto nga sitwasyon kag pagpatuman sang mga praktikal nga rebolusyonaryong katungdanan. Dapat padayon nga padalumon ang kahublagan panadlong paagi sa pagsuma kag pagtasa agud masikway ang empirisismo kag dogmatismo sa ideolohiya, mga dagway sang petiburges nga suhetibismo sa pulitika, kag ultrademokrasya kag burukratismo sa organisasyon. Dapat pila ka sulit naton nga palaparon ang Partido. Dapat naton tukuron ang mga sanga sang Partido sa puluan ka libo nga baryo, eskwelahan, pabrika kag iban pa nga matawo nga bahin sang bug-os nga pungsod,sa kasyudaran kag kaumhan, agud segurohon ang malapad kag madalum nga pagpamuno sang Partido sa minilyon ka pumuluyo.

Sa kaumhan, dapat palaparon kag pabaskugon ang Pambansang Katipunan ng mga Magbubukid ukon PKM, kag iban pa nga rebolusyonaryong organisasyon masa sa kubay sang mga kababaehan kag pamatan-on, agud papagsikon ang mga paghimakas kontra-pyudal (pagpanubo sa arkila sa duta, pagdula sa usura, pagpasaka sang sweldo, kag pagbaligya sa makatarungan nga presyo sang mga produkto sa uma). Dapat man tukuron ang mga rebolusyonaryong organisasyon masa sa kubay sang minorya nga pumuluyo para sa pagdepensa sang kinamatarung sa duta nga ginpanubli sa mga katigulangan. Upod sini ang mga malaparan nga paghimakas para depensahan ang kinamatarung kag kaayuhan sang masang mangunguma batuk sa pagpang-agaw kag paghugakom sang kadutaan, pagpangkawkaw kag pagwasak sa kapalibutan, dumuluong nga pagpasilabot militar, pasistang pagpangsumpo kag pagpatuman sang mga patakaran sang layi militar kag iban pa nga dagway sang pagpamigos.

Ginapukaw, gina-organisa kag ginapahulag sang Partido ang masang mangunguma sa malapad nga kaumahan. Sa sulod sang mga sona kag larangan gerilya, nagapanguna nga butkon sang Partido ang hukbo sang banwa sa pag-organisa kag pagpahulag sa masa, kadungan sa pagpasulong sang armadong paghimakas kag pagpalapad sang rebolusyonaryong baseng masa. Ang armadong paghimakas nagasuporta sa mga paghimakas sang masang mangunguma, mga mangingisda kag iban pa nga imol sa kaumhan. Ang BHB ang solo nga kasangkapan nila batuk sa mga armadong tinawo, maton, kag mga pwersang paramilitar kag militar nga ginagamit sang nagahari nga sahi batuk sa ila. Tungod sa pursigido nga pagdepensa sa ila sang hukbo sang banwa, ang masang pigos nagaserbe nga wala nagakahubas nga bubon nga ginakuhaan sang bag-o nga mga Pulang hangaway.

Sa kasyudaran, dapat padayon nga palaparon kag pabaskugon ang rebolusyonaryong kahublagan sang mga mamumugon, mala-proletaryado kag mga pamatan-on intelektwal, subong man ang iban pa nga sektor sang petiburgesya sa syudad. Ginatukod kag ginapabaskog ang ila likom nga mga rebolusyonaryong organisasyon masa kag ginapahulag sila agud magsuporta kag magpakigbahin sa armadong paghimakas sa kaumhan. Upod sini, ginapamunuan sang Partido ang ila mga demokratikong paghimakas agud pangapinan ang ila mga kinamatarung kag kaayuhan, samtang mapagsik nga ginapaupod sila sa malapad nga mga paghimakas batuk sa pasismo, korapsyon, pagpasilabot militar sang US, mga paantus nga patakaran nga dikta sang dumuluong, kag iban pa nga hambalanon sa palaabuton sang bug-os nga pumuluyo.

Dapat tayuyon nga pabaskugon ang National Democratic Front bilang alyansa sang mga rebolusyonaryong organisasyon masa. Ang NDF ang pinaka-konsolidado nga bahin sang alyansa sang mga patriyotiko kag demokratikong sahi kag sektor, nga nagahiliusa base sa pagpasulong sang armadong paghimakas. Base sa kusog sang BHB kag NDF, matukod ang mga temporaryo nga alyansa sa pila ka bahin sang nagahari nga sahi nga nagakilala sa kusog sang rebolusyonaryong kahublagan kag handa nga makig-isa sa lain-lain nga panahon kag dagway. Sa subong, ginatukod naton ang pinakalapad nga nagahiliugyon nga prente batuk sa nagahari nga hubon Marcos kag Duterte, nga subong lunsay nagatiglawas sa pinaka-reaksyonaryo kag pinaka-pasista nga paksyon sang nagahari nga sahi. Dapat ubos kusog nga iligwin, pakig-awayan kag palayason ang nagahari nga rehimen US-Marcos nga nagapanguna nga nagapaantus kag naga-ipit sa pumuluyo.

Sa tunga sang krisis sang nagahari nga sistema nga nagadala sang wala sang tupong nga pag-antus sa malapad nga masa sang pumuluyo, labi pa nga nagaathag ang kakinahanglanon nga magsulong sa banas sang inaway banwa. Pinakatingkad ini sa mga pamatan-on nga nagahandum nga bag-uhon ang sistema kag itukod ang bag-o nga kapalaran sang pungsod. Mismo si Marcos, paagi sa negatibong halimbawa, ang nagatulod sa ila nga makig-away kag mag-uyat sang armas. Sang nagligad nga tuig, nakita naton ang madamo nga mga pamatan-on, sa kaumhan kag kasyudaran, nga nagsabat sa panawagan nga magsuporta kag magpatapo sa Bagong Hukbong Bayan. Tayuyon nga nagakadugangan sang bag-o nga dugo ang BHB nga nagahatag diri sang bag-o nga kapagsik para sa pagsulong sang armadong paghimakas. Bug-os ang determinasyon sang tanan nga yunit sang Bagong Hukbong Bayan, kaupod ang mga yunit sang milisya sang banwa, nga ilunsar ang masarangan sini mapadaug nga mga taktikal nga opensiba ukon aksyon gerilya batuk sa mahuyang, kapoy ukon naligwin nga mga yunit ukon elemento sang kaaway, para kuhaon ang ila mga armas agud armasan ang bag-o nga mga Pulang hangaway. Target man sang BHB ang mga armadong tinawo sang mga despotikong agalon mayduta nga nagapamintas sa masa. Dapat man patigayunon ang nagakasanto nga mga tikang agud ipatuman ang pamatbat sang mga hukmanan sang pumuluyo batuk sa mga pasistang berdugo kag kriminal nga ahente sang kaaway. Sa atubang sang nagadako nga kalamidad sa klima, dapat man maghulag ang BHB bilang tagpangapin sang kapalibutan kag patigayunon ang mga aksyon gerilya batuk sa mga nagapangkawkaw kag nagapangguba nga mga empresa.

Bug-os ang desisyon sang Partido kag Bagong Hukbong Bayan nga ubos-kusog nga isulong ang pangmalawigon nga inaway banwa.Ilabi na subong sa atubang sang nagasingki nga pagpanggyera sang US nga nagabutang sa peligro nga higupon ang bug-os nga kalibutan sa alimpuros sang imperyalistang gyera, tuman ka hugot ang panginahanglanon nga labi nga papagsikon ang inaway banwa agud sabton ang nagabaskog nga handum sang pumuluyong Pilipino nga makaluwas sa pagdagit sang imperyalismong US kag malab-ot ang matuod nga pungsodnon nga kahilwayan kag demokrasya.

Ang pangmalawigon nga inaway banwa isa ka masanag nga sulo nga nagadala sang kasanag kag paglaum sa pumuluyong Pilipino, kag nagaserbe nga inspirasyon kag huwaran para sa ginatos ka milyon nga ginapigos kag ginahimuslan nga mga mamumugon kag mangunguma sa bug-os nga kalibutan. Ini ang dungganon nga amot sang proletaryong Pilipino sa pangkalibutanon nga paghimakas para tapuson ang imperyalismo kag isulong ang rebolusyon para lab-uton ang kahilwayan, demokrasya kag sosyalismo.

Ibagsak ang imperyalismo, pyudalismo kag burukrata kapitalismo!

Isulong ang demokratikong rebolusyong sang banwa!

Magsulong sa banas sang pangmalawigon nga inaway banwa!

Mabuhay ang sahing mamumugon kag pumuluyong Pilipino!

Iwagayway ang Pulang bandera sang armadong paghimakas!

Mabuhay ang ika-57 nga anibersaryo sang Bagong Hukbong Bayan!

Mabuhay ang Partido Komunista sang Pilipinas!