Siraragsak a kabkablaawan ti Committee Central ti Communist Party of the Philippines ti amin a nabanwar a Nalabbaga a mannakigubat ken kumander ti New People’s Army iti daytoy nga istorikal nga aldaw ti maika-57 anibersaryo ti pannakaitakder ti pudno a hukbo ti maidadanes nga umili. Iti daytoy nga aldaw, sublian tayo ti awan sarday a panangiyabante ti rebolusyonaryo nga armado a dangadang ken pudno a demokrasya. Umadaw tayo kadagiti adal iti panagabante ken panagsanud, pannakapaay ken balligi manipud iti panagdalyasat iti nalikaw a dalan.

Padayawan tayo ti amin a banwar ken martir ti umili a Pilipino a sipupuso a nangidaton ti biag da para iti natan-ok a panggep a wayawayaan ti pagilyan manipud iti imperyalista a panagari ken amin a langa ti panangidadanes ken panaggundaway dagiti lokal a dasig. Utang tayo iti sakripisyo da ti amin a nagun-od ti umili iti dana ti rebolusyonaryo a panaglaban. Saan to pulos nga agkupas iti lagip ti umili dagiti nagan ken naibinglay da. Isuda ket narimat a bitwen nga agserserbi a silaw iti kasipngetan a daydalyasaten ti umili agturong iti Nalabbaga a parbangon.

Nasken laeng a rambakan ti nagun-od tayo a balligi iti panangiyabante ti rebolusyonaryo nga armado a dangadang iti napalabas a tawen, bayat a naanep nga umad-adaw kadagiti adal manipud kadagiti napait a kapadasan. Rumbeng a pangiggeman dagitoy iti panagsaranget tayo iti dana ti panangpapigsa ken panagabante ti naunday a gubat ti umili tayo.

Agtultuloy nga itagtag-ay ti NPA ti Nalabbaga a bandera ti rebolusyonaryo nga armado a dangadang. Iti panangidaulo ti Partido ken tarabay ti tignay panagilinteg, agtultuloy a papaayen ti NPA ti narungsot a pasista a panagatake dagiti armado a gamat ti aso-aso a rehimen Marcos laban iti hukbo ti umili ken iti umili a lumablaban iti kaaw-awayan ken kasyudadan. Iti tarabay ti Partido, ken iti sango ti ad-adda a nakaay-ay-ay a kasasaad ti umili, ad-adda a timmibker ken ngimmato ti rebolusyonaryo a pakinakem ken pangngeddeng dagiti Nalabbaga a mannakigubat ti NPA nga ilaban ken salakniban ti masa a maikuskuspil ken magungundawayan.

Manipud idi isayangkat tayo ti tignay panagilinteg, ad-adu ti kapadasan tayo a positibo ngem negatibo. Uray pay nagsagaba ti sumagmamano a yunit kadagiti dangran,ad-adu a yunit ti NPA ti nakapagpreserba ti pigsa, nakapagpalapad ti erya ti operasyon, makapalpalawa ti base a masa, makapagrekrekrut kadagiti baro a Nalabbaga a mannakigubat ken naballigi a maikairusruswat ti nadumaduma a tipo ti taktikal nga opensiba ken armado nga aksyon gerilya. Addang-addang a maiyar-aramid ti panangisimpa iti moda wenno wagas ti gerilya a panagtignay tapno mapairut ti silpo iti masa bayat nga agpakpakalaing tapno liklikan ken rikusan ti napuskol a presensya ti kabusor. Natibker a balbaliw a makapappapigsa ti NPA, ken nakatannawag daytoy iti balbaliw a panagbwelo kadagiti sumaruno a panawen. Kas iti panaglung-aw iti tuktok ti bantay, sibubukel ti pangngeddeng ti Partido ken NPA a dalyasaten ti nalikaw, narigat ken napeggad a dana agturong iti rebolusyonaryo a panagabante.

Tunggal aldaw ket kumarkaro ti panagsagaba ti umili iti tengnga ti imperyalista a gera ken krisis. Ti intero a lubong ket daydayyegen dagiti gubat a ganggangtan ti imperyalismo a US tapno agawen dagiti pagilyan a nabaknang iti langis ken mineral. Paset daytoy kadagiti desperado nga addang tapno biagen ti kapitalista a produksyon militar. Ngem iti proseso ket ad-adda laeng a bekbekkelen daytoy ti agbugbugsot a sangalubongan a kapitalista nga ekonomya. Iti sango dagiti gera nga agresyon ti US, dumakdakkel a dumakdakkel ti pangta ti panagbettak dagiti dakdakkel pay a gera iti masangwanan.

Nakadangdangkok ti panangrabngis ti imperyalismo a US iti panagwaywayas ti Pilipinas, iti militar, ekonomya ken pulitika, babaen ti paspasurot nga aso-aso daytoy a ni Marcos. Palpalubosan ni Marcos nga aramaten ti US ti pagilyan kas base ken pagrubwatan ti agresyon militar iti Asia-Pacific agingga Middle East, kasukat ti ayuda a militar ken pangpulitika a suporta iti rehimen a natatek ti kunniber ken kagurgura ti umili.

Iti sidong ni Marcos, awan patengga ti korapsyon dagiti burukrata-kapitalista iti poder, dagiti pyudal ken malapyudal a langa ti panaggundaway iti kaaw-awayan, ti panagkamkam ti daga ken panagrabsut iti pagbiagan, ti panagsamsam ti dadakkel a kapitalista iti natural a gameng ti pagilyan ken panaggundawayi ti nalaka a pigsa’t tegged dagiti mangmangged, ti panagdadael iti kalikasan ken ti ibungbunga daytoy a nasaknap a perdisyon iti biag ken pagbiagan ti masa. Ti kumarkaro ken nadangkes a panagaramat ti pasista a kinaranggas ket pakakitaan ti desperasyon ti rehimen US-Marcos a pagtalinaeden ti bulok a sistema babaen ti panagimula ti terorismo ken armado a represyon iti umili a lumablaban. Ad-adda a lumawlawag ti pagkasapulan para iti rebolusyonaryo a panaglaban. Para iti umili, ti panagarmas ket nainkalintegan ken kasapulan.

Dakkel man ken nakabutbuteng nu kitaen ti pangruar a langa ti pasista a halimaw ti aso-aso nga estado gapu iti kinaadu ti tauhan, kabarbaro ken napipigsa nga armas ken maibuybuyat a suporta ti imperyalista nga amo daytoy, siaammo tayo, nga iti esensya ket nakapsut ken narukop gapu ta daytoy ket bulok a timmaud ken salaknib ti agruprupsa a sistema, addaan nauuneg a rekka ti agbibinnusor a paksyon ken palalo a kagurgura ken ilaklaksid ti umili. Nu man pay bassit ken nakapsut pay ti NPA, natibker daytoy nga agkaykaysa iti sidong ti usto a panangidaulo ti Partido, determinado nga agpalawa ken agpapigsa ken addaan nauneg ken nasaknap a suporta ti umili. Kagiddan ti panagbangon ken panagtignay ti masa, naan-anay ti determinasyon ti Partido ken NPA nga iyabante ti demokratiko a rebolusyon ti umili nga addaan baro a tukad ti kinamaingel.

Daydayyegen ti imperyalista a gera ti US ti intero a lubong

Iti unos laeng ti dua a bulan manipud iti rugi ti tawen, rinaut dagiti pwersa a militar ti imperyalismo a US ti dua a pagilyan a nabayagen a mangitantandudo ti nailyan a panagwaywayas, ken agkedkedked iti imperyalista a kontrol ken diktar, iti mandar ti mauyong a pasista a pangulo daytoy a ni Donald Trump. Ti panaggargartem ni Trump iti kinabaknang ti langis ti Venezuela ken Iran, nga umuna ken maikatlo nga addaan kadakkelan a reserba iti intero a lubong , ti pudno a makagapu iti inyaramid daytoy nga agresyon militar.

Rinaut dagiti pwersa a militar ti US ti Venezuela idi Enero 3 ken dinukot ti presidente da a ni Nicolas Maduro ken asawa na a ni Cilia Flores, tapno pwersaen a pagrukmaen ti gubyerno ken tungpalen dagiti diktar daytoy a kontrolen dagiti korporasyon nga Amerikano ti industriya ti langis iti pagilyan. Saan pay a nalabes ti dua a bulan, agkadwa a binomba ti US ken Zionista nga estado ti Israel ti Iran idi Pebrero 28, ken inyaramid da ti operasyon nga asasinasyon laban iti lider daytoy a ni Ayatolla Ali Khamenei. Deklarado a plano ni Trump a mangsugsog iti panagrukwas ti umili ti Iran, tapno ipatugaw iti poder ti baro a gubyerno nga agpaisidong iti turay ti US.

Iti daytoy met laeng a panawen, agdadata a pinangtaan ti US a rauten ti armado a pwersa daytoy ti Cuba, Colombia ken Mexico, a kas mangsubsubok nu siasino ti agrukma iti diktar na, wenno sadinno ti pagpatenggaan ti kabaelan na nga ipaypayso ti pangta a panagraut. Sakbay daytoy, nagpangta met ni Trump a “nga alaen manen” ti Panama Canal. Umannurot amin daytoy iti panangpaungar na iti Doktrina a Monroe a mangipagpaganetget a ti Latin America ket bukod a paraangan ti US. Kagiddan daytoy, nagpangta ni Trump a pwersado nga alaen ti Greenland, maysa a dakkel nga isla itiArctic ken North Atlantic Ocean.

Iti unos ti 25 aldaw, nagitennag ti US ken Israel iti Iran ti saan a bumaba iti 23,000 bomba, wenno nasurok 920 bomba iti inaldaw. Dandani 2,000 Iranian ti napatay, karaman ti ginasut nga ubbing, ken 24,800 ti nasugatan manipud idi rugyan ti US ken Israel ti panagbomba. Pinuntirya dagiti panagbomba saan laeng a dagiti pasilidad pang-militar, nu di ket pati dagiti eskwelaan, kabalbalayan, pasdek a pangkomersyo, ospital, dagiti planta a pang-enerhiya ken pang-nukleyar, ken dadduma pay nga imprastruktura a pang-sibilyan, iti gandat a pagrukmaen ti Iran iti turay ti imperyalismo a US, ken isuko ti langis ken nailyan a soberanya daytoy.

Ti armado a panagraut ti imperyalismo a US idiay Venezuela ken Iran ket tanda ti baro a tukad ti panagirteng dagiti kontradiksyon iti baet dagiti imperyalista ken dagiti pagilyan a mangiruprupir ti nailyan a panagwaywayas, a nakasilpo met iti panagirteng ti inter-imperyalista a kontradiksyon. Iti nagan dagiti monopolyo kapitalista nga Amerikano, agdadata a karkariten ken kayat a baliwan ni Trump ti agraraira nga urnos iti lubong iti napalabas a tallo dekada—ti panagbibingay dagiti imperyalista kadagiti pagtataudan ti langis ken dadduma pay a napateg a naata a materyales, tambakan ti sobra nga imbentaryo dagiti saan a malako a tagilako ken pangidepositoan ti sobra a kapital.

Nainget a binatikos ti China ken Russia ti armado a panagraut ti US iti Venezuela ken Iran. Iti sango ti nakaro a pannakadadael ti Iran gapu ti panagbombomba ti US, agpada a nagipatulod ti China ken Russia ti ayuda a makatao. Nagiyebkas ti Russia ken nadumaduma a pagilyan ken internasyunal nga ahensya ti panagdanag iti panangpuntirya ti US kadagiti planta a nukleyar a mabalin nga agresulta iti didigra iti minilyon a katao.

Ti panagraut ti US idiay Venezuela ken Iran ket mangituntunda met ti nauneg a panagdanag dagiti alyado a pagilyan ti US, kabilang dagiti nakapauneg iti North Atlantic Treaty Organization (NATO). Adu kadakwada ti nagdillaw iti panaglabsing ti US kadagiti internasyunal nga allagaden ken pagannurotan ti United Nations, nu man pay saan da a direkta a kinontra, ken iti maudi ket nakikaykaysa da iti panggep nga ibagsak dagiti gubyerno a kumonkontra iti imperyalista a diktar ken kontrol. Nu pay kasta, napalalo ti panagdanag da nga iti panagsolsolo ti imperyalismo a US ket agresulta iti ad-adda a panagdakkel ti rekurso nga iggem ti US, a mangbaliw iti sigud nga agraraira a balanse sakbay dagiti agresyon a militar ti US. Sakbay daytoy, nangparnuay met ti nauuneg a kontradiksyon ti panangipataw ti US ti nangangato a taripa idi napan a tawen iti nadumaduma a pagilyan iti lubong, karaman dagiti imperyalista karibal ken uray dagiti kaalyado na.

Dagiti agresyon militar ti US iti Venezuela ken Iran tapno kontrolen ti langis ket agpada met a saan a direkta a tirada iti karibal na a China, a kangrunaan a gumatgatang ti mailuluwas a langis dagitoy a pagilyan (15%–20% ti ang-angkaten a langis ti China ket manipud iti 80%–90% ti langis nga iluluwas ti Iran ken Venezuela). Ti gandat a panangagaw iti dadakkel a pagtataudan ti langis ket paset dagiti addang a pananglipit ti US iti China a kumarkaro iti napalabas a mano a tawen. Kabilang kadagitoy ti panagngato ti taripa kadagiti maang-angkat manipud iti China, panangiparit iti panagaramat kadagiti pyesa nga elektroniko nga aramid ti kumpanya a Huawei ti China, panangiparit iti panaglako iti China kadagiti abante a semikonduktor ken dagiti makina para iti produksyon dagitoy, ken dadduma pay nga addang a pang-ekonomya ken panglinnakwan.

Kagiddan daytoy ti tuluy-tuloy a panagpapigsa ti US iti presensya iti “first island chain” iti aglikmot ti China, kabilang ti panagipwesto ken panagpapigsa ti presensya a militar dagiti pwersa ken ramit a panggubat daytoy iti Pilipinas, Japan ken South Korea, ken panagilako ti armas iti Taiwan, iti linged ti “pananglapped” (containment) iti kano “potensyal nga operasyon militar” ti China iti Taiwan. Amin dagitoy ket mangprobprobokar ti pangkontra ti China babaen ti panagsagana ken panagpapigsa, kabilang ti panangpapuskol ti presensya iti uneg ken ruar ti kabaybayan iti aglawlaw ti pagilyan na.

Gimmastos ti militar ti US ti nasurok-kumurang $1 bilyon iti inaldaw iti awan sarday a narungsot a panagbobomba iti Iran. Kangrunaan a nakinabang ditoy dagiti kumpanya nga agsupsuplay kadagiti armas ken ramit a panggubat iti militar ti US. Dumawdawat tatta ti gubyerno ni Trump ti nayon a $200 bilyon tapno sumrek kadagiti baro a kontrata kadagitoy a kumpanya para iti nayon a misayl, drone, ken dadduma pay a ramit panggubat.

Kaniwas iti umuna a plano ti US, ti panagraut daytoy iti Iran ket nagpauten ti maysa a bulan. Bayat a bumaybayag, ad-adda a pumigpigsa ti panagsupyat ditoy iti uneg ti US ken iti nadumaduma a pagilyan. Nagitunda daytoy ti nalabes nga ispekulasyon iti presyo ti langis (manipud $65 agturong $105 kada bariles ti krudo a langis) a nangparnuay ti “oil price shock” iti sangalubongan, iti pakinabang ti dadakkel a kumpanya iti langis. Nasaknap tatta ti panagdanag a sumadsad ti adu nga ekonomya,iti resesyon ken istagplasyon (nangato nga implasyon, nababa a produksyon ken nasaknap a disempleyo), kabilang ti US, nangruna nu agpaut pay ti gera ti US ken Israel iti Iran, ken agtalinaed a nangato ti presyo ti krudo a langis.

Uray iti sango ti panagraut ti kabilegan nga imperyalista iti lubong, saan a nagrukma ti umili ti Venezuela ken Iran. Minilyon a Venezuelan ti bimmuyat iti kalsada iti nadumaduma a pagilyan tapno babalawen ti armado a panagraut ken panagbomba ti US ken ipaganetget nga isubli iti pagilyan da ti presidente da a ni Maduro. Kasta met idiay Iran, dandani inaldaw a mapunpunno dagiti plasa ken kalsada ti minilyon nga agturturong kadagiti demonstrasyon tapno ipamatmat ti panagkaykaysa da, babalawen ti armado nga agresyon ti US ken labanan ti panaggandat nga ipatugaw iti poder ti gubyerno nga agserbi iti interes ti US.

Iti agdama ket saan pay a nalawag nu kasano a leppasen ti US ken Israel ti gera nga agresyon laban iti Iran, nangruna ta napaay daytoy a pasukwen ti Iran. Tanda ti palalo a pannakaisina ti imperyalismo a US, saan a naala ni Trump ti suporta dagiti imperyalista nga alyado daytoy idiay Europe nga agpaitulod ti pwersa a militar tapno luktan ti Strait of Hormuz. Pakakitaan nga agpaut ti gera, dumanon iti 50,000 soldado nga Amerikano ti agturong tatta iti rehiyon.

Iti unos ti maysa a bulan, tuloy-tuloy met a nagiyaramid ti Iran kadagiti bales a panagatake dagiti misayl ken drone a pinuntirya ti Israel, ken dagiti base miliitar ti US kadagiti pagilyan iti Middle East. Binabalaw ti UAE, Saudi Arabia, Bahrain, Qatar, Kuwait ken Jordan dagiti aksyon ti Iran a “labsing iti independensya,”uray pay agkedkedked da a “maguyod iti gera a saan a para kadakwada.” Sigurado nga agbaliw pay ti panagiintar iti gera nu agpaut pay daytoy, nangruna nu direkta nga agdissaag kadagiti teritoryo ti Iran dagiti tropa nga Amerikano.

Iti sango ti agtultuloy a krisis ti sangalubongan a sistema a kapitalista, namnamaen nga agtuloy ken ad-adda pay a kumaro dagiti gera nga agresyon ti US kadagiti umay a bulan ken tawen. Inpamatmaten ni Trump a saan a mapawilan ti gubyerno ti anyaman nga internasyunal a pagannurotan, wenno uray dagiti ligal a proseso ti gubyerno a US para iti panangisayangkat ti gera. Inpakita ni Trump a ti kinamauyong na ket awan patengga na. Iti kinabukatot nga agawen ti kontrol iti gameng a langis ken dagiti estratehiko a mineral ti sabali a pagilyan, ken lipiten dagiti imperyalista a karibal, nangruna ti China, saan nga adayo a bumtak dagiti dakdakkel pay nga armado a binnusor iti saan nga adayo a masangwanan. Ti nalabes a panagsagaba nga ipaay daytoy iti maidadanes nga umili iti intero a lubong ket mangririing iti anti-imperyalista a kapanunotan ken mangrubrubrob iti pangngeddeng da a lumaban para iti wayawaya.

Agsusuwek iti krisis ti bulok nga agar-ari a sistema iti Pilipinas

Napaspas nga agsusuwek ti tukad ti panagbiag ti nalawa a masa ti umili a Pilipino kagiddan ti panagtennag iti naun-uneg ken nakarkaro a krisis ti agar-ari a sistema a malakolonyal ken malapyudal iti Pilipinas. Duron daytoy ti panagtayok ti presyo ti langis kasaruno ti pananggera ti imperyalismo a US iti Middle East. Ad-adda a naiparang ti atrasado a kasasaad ti lokal nga ekonomya wenno sistema ti produksyon a nakasanggir iti importasyon ken gangannaet a pautang. Ad-adda met a naiparang ti sungsungbatan ti reaksyunaryo a gubyerno ni Marcos iti dumakdakes a pagbiagan ti mayorya ti umili, iti panangpabor daytoy iti interes dagiti gangannaet a kumpanya ken kakunsabos da a dadakkel a burges kumprador ken burukrata kapitalista.

Parigat la unay iti umili a Pilipino ti panaggundaway dagiti bukatot-iti-ganansya a kumpanya iti langis iti gera idiay Middle East. Aggigiddan a timmayok iti awan pay makaartap a kangato a tukad ti presyo dagiti produkto a petrolyo. Pinatayok da nga usto ti presyo ti diesel a kangrunaan a maar-aramat iti transportasyon, enerhiya ken komersyo. Ti higante a ganansya nga ak-akupen dagiti kumpanya iti langis ket padagsen iti masa a mangbakbaklay iti tunggal panagngato ti presyo. Nayon pay a padagsen iti umili ti agtuon a buwis a singsingiren ti gubyerno (excise ken value-added tax wenno VAT) a dumandanon iti ₱160 bilyon a tinawen, a dandani 60% ti tinawen a koleksyon a ₱276 bilyon manipud iti kumbinasyon ti dua a buwis.

Ti awan ressat a panagngato ti presyo ti langis manipud rugi iti tawen ken panagtayok manipud Marso ket nagresulta iti tuluy-tuloy a panagngato iti presyo ti taraon ken dadduma pay a basaran a pagkasapulan, plete, singir iti kuryente, danum ken dadduma pay a serbisyo. Adda ti pangta ti ad-adda pay a panagngato dagiti presyo dagiti gagatangen gapu iti panagbagsak ti balor ti piso kontra dolyar iti kababaan a balor iti pakasaritaan (₱60.5 kada dolyar). Kangrunaan a tamtamaan daytoy ti masa nga anakling-et.

Napardas nga agsusuwek ti tukad ti panagbiag ti mayorya ti umili – dagiti mangmangged, mannalon ken dagiti ordinaryo nga empleyado, nga awan wenno dandani awanan ti urnong ken agbibiag iti maysa a kur-ay, maysa a tuktok. Nu agtuloy ti panagngato ti presyo kadagiti umay a bulan, mapatta-patta a 2–3 milyon a pamilya ti mainayon iti agbibiag iti kinakurapay. Iti tengnga ti gera nga agresyon ti US laban iti Iran, agam-amak ti nasurok dua a milyon a migrante a mangmangged nga agtrabtrabaho iti nadumaduma a pagilyan iti Middle East. Mano pulo a ribo ti nangpili nga agawiden uray awan ti masangpetan da a trabaho wenno pagbiagan iti pagilyan.

Ti panagtayok ti presyo ti langis ket ad-adda a mangitennag iti pagbiagan ti masa a Pilipino. Gapu iti panagngato ti gastos iti produksyon, matentennag ti sapul dagiti drayber ken opereytor ti babassit a transportasyon, uray dagiti mangngalap, mannalon, babassit a trader, negosyante ken dagiti aglaklako, dagiti agpatpataray ti kantina wenno karinderya ken dadduma pay. Ad-adda a bumassit ti balor ti sweldo dagiti mangmangged gapu iti ngumatngato a gastos iti panagbiag. Iti laksid ti napigsa nga arungaing iti nababa a pasweldo, agtultuloy nga agintutuleng ti rehimen Marcos iti nabayagen nga arungaing para iti makabiag a minimum a sweldo a ₱1,200 kada aldaw.

Palalo a parigat iti umili ti kontrol ti kartel wenno sabwatan ti sumagmamano a garamugam a dadakkel a kumpanya iti langis iti lokal a distribusyon dagiti produkto a petrolyo. Kaniwas iti kari iti deregulasyon (1998) a bumaba ti presyo gapu iti kumpetisyon, ti presyo ket linawas a pagnunumwan dagiti kadakkelan a kumpanya ti langis tapno maksimisado ti ganansya da. Awan ti nailyan nga industriya ti langis iti Pilipinas. Imbes a rumang-ay, ad-adda a kimmapsut ti lokal a kapasidad iti produksyon ti repinado a langis. Adda man natural a gas iti kabaybayan a nakapalikmot iti Pilipinas, kas ti Malampaya, daytoy ket adda iti kontrol ti dadakkel a burges kumprador ken kasosyo da a gangannaet a kapitalista iti pinansya.

Ti lokal nga industriya ti langis ket pakakitaan ti kabuklan nga urnos pang-ekonomya iti Pilipinas, a pagar-arian ken kontrolado dagiti gangannaet a kumpanya kasabwat dagiti dadakkel a burges komprador, dadakkel nga apo’t daga ken burukrata kapitalista. Kasabwat ti aso-aso a rehimen a para-ipatungpal kadagiti neoliberal a patakaran a diktar ti International Monetary Fund, laplapdan dagiti gangannaet a kumpanya ti panagdur-as ti lokal a produksyon.

Ti ekonomya ti Pilipinas ket agtaltalinaed nga atrasado, agraryo ken saan nga industriyalisado. Ti natural a kinabaknang ti pagilyan—manipud iti kabanbantayan agingga kabaybayan—ket kamkamkamen dagiti gangannaet a monopolyo kapitalista ken dagiti agar-ari a dasig. Gungundawayan da ti nababa a sweldo dagiti mangmangged a Pilipino. Ti ak-akupen da a ganansya ket saan da nga isubsubli iti panagpalawa ken panagpadur-as ti lokal na produksyon. Nakasanggir ti lokal a produksyon iti panagangkat kadagiti makinarya, pyesa ken dadduma pay a ramen iti produksyon, ken nakaturong iti panageksport ti nalaka a naata wenno apagapaman a naproseso a materyales (mineral, prutas) ken iti balbaliw a panageksport ti nababa a nayon a balor dagiti tagilako (kas kadagiti semikonduktor ken dadduma pay a pyesa nga elektroniko).

Iti sidong ni Marcos, ad-adda a naikali iti utang ti Pilipinas. Awan kapada iti napalabas ti agdama nga utang a pangruar ti pagilyan a dimmanunen iti $99.1 bilyon (₱5.81 trilyon), dandani uppat a daras kumpara iti utang a pangruar ($26 bilyon) nga inbati ni Marcos Sr idi 1986. Ti gangannaet nga utang ti Pilipinas ket paset ti ₱18.13 trilyon a kabuklan nga utang ti pagilyan idi Enero 2026, kangatwanen iti pakasaritaan. Ti gangannaet nga utang, kabilang ti iyaw-awid a dolyar dagiti migrante a mangmangged, ket pangbayad iti depisito iti linnakwan a pangruar ($50–$60 bilyon kadagiti napalabas a tawen), a bunga ti saan a patas a sinnukatan ti mailuluwas a nalaka a naata a materyales, ken maang-angkat a nanginngina a nalpas a tagilako. Daytoy ket pangpunno iti depisito iti badyet wenno kinakurang iti pondo ti gubyerno, a dakkel a paset ket mapmapan iti naanomalya a proyekto a pang-imprastruktura, palalo a nakadakdakkel a gastos iti militar ken pagbayad utang.

Ad-adda a kimmaro ken nagbalin a garapal dagiti langa ti korapsyon ti agar-ari a sistema iti sidong ti rehimen US-Marcos. Kakarwan ditoy ti naibulgar a naanomalya a proyekto a flood control ken dadduma pay nga imprastruktura, nu sadinno a binilyon a piso ti inbulsa dagiti burukrata-kapitalista nga upisyal ti gubyerno. Naibunannag itay nabiit a mismo a ni Marcos ti utek iti likod ti daytoy nga iskema. Kakunsabos ti mano a kangrunaan nga upisyal ti Malacañang, mapatta-patta a dumanon iti ₱8 bilyon ti direkta nga inbulsa ni Marcos iti langa dagiti kikbak. Malaksid kadagiti sumagmamano a nababa nga upisyal, awan pay ti naibalud wenno napilaan ti kaso kadagiti nangato nga upisyal a napanaganan a sangkot kadagiti kunniber. Kas ti ninamnama, awan nagmaayan ti imbestigasyon” ti ICI wenno Independent Commission on Infrastructure a binukel ni Marcos. Mismo a ni Marcos ket manglikliklik iti sungsungbatan. Ti kaso nga impeachment laban kenkwana ket dardaras nga inbasura dagiti konggresista nga iggem na.

Kabayatanna, napaspas met nga intuloy ti House of Representatives ti panangipila ti kaso nga impeachment ken panagdengngeg laban ken Vice President Sara Duterte, kanaig ti naanomalya a panaggastos iti ₱612.5 milyon nga intelligence funds, saan a maipalawag a panagdakkel ti personal a kinabaknang ken dadduma pay a reklamo. Iti panagtarigagay ti hustisya, nabayagen nga idurduron ti umili ti panagpasungbat ken Sara Duterte ken iti ama na a dati a presidente a ni Rodrigo Duterte. Nakaragsakan ti mano pulo a ribo a pamilya ti biktima ti kinaranggas ti estado iti sidong ni Duterte ti naiyaramid a panagdengngeg kenkwana itay nabiit ti International Criminal Court idiay The Hague tapno kumpirmaen dagiti kaso laban kenkwana. Bayat a pagsungsungbaten ti umili dagiti Duterte, siaammo da nga ar-aramaten met ti agar-ari a bunggoy ni Marcos ti panagipit ken Sara Duterte ken panangdiskaril iti indeklara a plano ti karibal na a tumaray iti panagbobotos para iti presidente inton 2028. Uray adayo pay, nakaturongen ti atensyon dagiti reaksyunaryo a partido para kadagiti panagtutulag, minnaniobra ken panagpapaksyon.

Palalo nga agpungpungtoten ti umili a Pilipino iti korapsyon dagiti burukrata-kapitalista ti anya man a bunggoy dagiti agar-ari a dasig, a sangon-sango ti panagtakaw ken panagpabaknang iti kaban ti umili, uray iti tengnga ti kumarkaro a panagsagaba ti masa nga anakling-et. Saan a marukod ti pungtot ti umili, iti partikular, kadagiti ubbaw wenno palpak a proyekto a flood control, a nagkurakutan ti binilyon a piso, nangruna iti sango ti agsasaruno a didigra gubway dagiti panaglayus ken panagreggaay ti daga. Ammo da a malaksid iti flood control, adu pay dagiti iskema ti korapsyon iti sidong ti bulok a gubyerno, manipud iti naibulgar a naanomalya a proyekto a “farm-to-market road” agingga iti panaggatang kadagiti trak ti bumbero.

Bimtak idi napan a tawen ti pungtot ti umili iti korapsyon. Iti uneg ti mano a bulan, paulit-ulit a nag-walk-out dagiti estudyante manipud iti mano pulo a pagadalan ken agsubli-subli a nagrali iti kalsada ti pinullo a ribo nga umili tapno agprotesta iti nadumaduma a paset ti pagilyan. Uray pay pilit a salsalakniban da ni Marcos, saan a nagaburan dagiti umal-alyado kenkwana a sosyal-demokrata iti panangiyuna ti Akbayan ti umaw-aweng a pukkaw ti nalawa nga intar dagiti kabataan para iti panangpatapwak ken Marcos ken Duterte, ken panawagan para iti panagbalbaliw ti bulok a sistema.

Ti mabukbukel a tignay protesta ket agtultuloy nga agbwelo iti sango ti napaspas a panagtennag ti pagbiagan ti umili. Dagiti timmakder ken nagprotesta laban iti korapsyon idi napalabas a tawen ket tumaktakder ken aprotprotesta idi Marso. Bimtak ti agsasaruno a tignay protesta ken tigil-pasada iti intero a pagilyan tapno babalawen ti imperyalista a gera ti US idiay Iran, batikusen dagiti mananggundaway a kumpanya iti langis iti panangingato iti presyo ti diesel ken gasolina, ken kundenaren ti rehimen US-Marcos iti kinainutil daytoy iti sango ti krisis ken panagintutuleng kadagiti arungaing ti pagilyan.

Iti tarigagay a lapdan ti panagbwelo ti tignay protesta, agtultuloy nga ar-aramaten ti rehimen US-Marcos dagiti armado a gamat daytoy tapno ipiten ken butbutngen dagiti lider ken timpuyog ti nadumaduma a sektor, agiwaras kadagiti armado a pwersa ken ahente a militar kadagiti komunidad, kampus ken kadagiti pabrika, ken pawilan dagiti tignay ti masa iti kalsada. Us-usaren daytoy ti “terorista” a panangbirngas ken ti pangta ti panangibalud wenno panagdukot. Paset amin dagitoy ti kunkunada a “panagkaykaysa, kapya ken panagdur-as” a pakaibilangan met ti armado a represyon iti kaaw-awayan ken dagiti operasyon a pangkombat laban kadagiti rebolusyonaryo nga armado a pwersa, tapno wayaan dagiti gangannaet a kumpanya, kasabwat dagiti lokal nga agar-ari a dasig, a mangkamkam ti daga, mangilukat kadagiti minasan ken dadduma pay nga operasyon a managkamkam ken managdadael iti kalikasan.

Todo-todo ti panagibuyat ti reaksyunaryo a rehimen Marcos iti rekurso ken tauhan na iti desperasyon a kamaten ken rebbeken ti NPA. Iti laksid dagiti deklarasyon a “maparmeken” ti NPA, nakapakat pay latta ti dandani amin a batalyon a pangkombat ti AFP kadagiti larangan gerilya iti intero a pagilyan, tapno iyaramid ti aw-awagan daytoy a “focused military operations” a maipatpatungpal babaen ti panangipaisidong kadagiti baryo iti panagari ti linteg militar, panangkontrol iti garaw ti populasyon, panangblokeyo iti taraon ken komersyo, narungsot ken awan pilpilyenna a panagbomba kas idiay Mindoro, pananglapped iti dangadang dagiti mannalon iti panagserrek kadagiti operasyon a minas kas idiay Nueva Vizcaya, ekstrahudisyal a pammapatay kadagiti atapen da a sumupsuporta iti NPA, peke a panagpasuko, panagdukot, panagtortyur ken panagibalud ken dadduma pay a nadangkes a langa ti panangrabngis iti karbengan-tao.

Ti awan sarday a panangimula ti AFP iti pasista a teror ket umannurot iti mandar ti amo daytoy nga imperyalista a US. Bukbukbokan ti imperyalismo a US daytoy ti pondo ($250 milyon a tinawen agingga 2032), ramit militar kas kadagiti eroplano a panggubat, bomba ken bala kasta met ti nairut a suporta a paniktik. Gagem ti imperyalismo a US nga ipaay ti sibubukel a pwersa ti AFP tapno sumuporta kadagiti maikaskasa nga operasyon ken gera ti US iti Asia-Pacific, partikular a laban iti karibal daytoy a China.

Sigurado a guyoden ti US ti Pilipinas iti anyaman a gera nga agresyon wenno gera nga interbensyon iti Asia. Pumuskol a pumuskol ti presenya a militar ti US iti umad-adu nga EDCA “site” ken kadagiti limed a pasilidad ti US iti nadumaduma a paset ti pagilyan. Iti tengnga ti gera nga agresyon ti US laban iti Iran, rinibo a pangraut a tropa nga Amerikano ti sabaten ken alalayan ti AFP iti plano nga iyaramid a Balikatan war exercises. Nakalugan da kadagiti de-nukleyar a barko-de-gera ken awit dagiti armas a panggubat. Dagiti barko a nabal ti US ket kanayon a nakasanglad wenno aglaylayag iti South China Sea, kadagiti baybay iti aglikmot ti Pilipinas ken iti uneg ti teritoryo ti pagilyan. Paset daytoy ti estratehiya ti panagaramat iti Pilipinas kas dakkel a base militar ken pagrubwatan kadagiti operasyon daytoy iti rehiyon. Tapno idaulwan dagitoy nga operasyon, binukel ti militar ti US ti Task Force Philippines. Paset daytoy ti saywar a “transparency operations” tapno iparang ti aw-awagan daytoy nga agresibo a maniobra ti China iti South China Sea tapno parwaren a “gayyem” ken “kaalyado” ti Pilipinas ti US laban iti China. Iti met laeng duron ti US, agsasaruno a katulagan militar ti pinirmaan ken pirmaan pay ti Pilipinas kadagiti alyado ti US kas ti Japan, France, Canada ken dadduma pay a pagilyan.

Ti agtultuloy nga imperyalista a gera ti US iti Iran ken ibungbunga daytoy a krisis iti Pilipinas ken iti sangalubongan, ket mangipaspasngay ti sitwasyon a kasapulan la unay a lumaban dagiti maidadanes a dasig ken sektor tapno ilaban ti pagimbagan da. Ririingen daytoy ti nalawa nga umili iti pagkasapulan para iti rebolusyonaryo a panagbalbaliw iti Pilipinas ken intero a lubong. Dagiti rebolusyonaryo a pwersa iti panangidaulo ti Communist Party of the Philippines ket determinado a riingen, organisaen ken patignayen ti umili a Pilipino iti dana ti demokratiko a rebolusyon ti umili.

Papigsaen ti NPA ken sireregta nga iyabante ti gubat ti umili!

Ti saan a marisrisut a krisis ti agar-ari a sistema a malakolonyal ken malapyudal, ti brutal a represyon ti pasista-terorista a rehimen US-Marcos, kumarkaro a tukad ti interbensyon militar ti US, kumarkaro a panagbisin ken panagsagaba ken dumakdakes a langa ti panangidadanes ken panaggundaway ti kangrunaan a makagapu nga agtultuloy a maiyab-abante ti demokratiko a rebolusyon ti umili. Sibubukel ti pangngeddeng ti Partido, New People’s Army ken amin a rebolusyonaryo a pwersa nga iyabante ti naunday a gubat ti umili manipud iti agdama a tukad agturong iti sumaruno.

Agtultuloy nga agpappapigsa ti NPA iti kaaw-awayan. Tuluy-tuloy daytoy a parparegtaen ti gawaing masa ken palpalapaden dagiti sona a gerilya. Agrekrekrut ken agsansanay daytoy kadagiti baro a Nalabbaga a mannakigubat tapno bumaklay ti dumakdakkel a rebbengen iti pulitika ken militar.

Bin-ig a kinapangas ti deklarasyon ni Marcos idi napalabas a tawen nga “awanen ti grupo a gerilya” iti pagilyan. Kasta met a linalastog ti paulit-ulit a deklarasyon ti Armed Forces of the Philippines (AFP) kadagiti napalabas a tawen, a naan-anay a magibusanen daytoy ti rebolusyonaryo nga armado a dangadang. Makatawen manen ti napalabas a saan da a natungpal ti inkeddeng da a panggep. Iti nadumaduma a paset ti pagilyan, agtultuloy a lumablaban dagiti yunit gerilya ti NPA. Kaniwas iti maipanpannakkel a naatiwen ti NPA, awan ressat nga ipakpakat ti AFP ti bata-batalyon a pwersa a pangkombat manipud amyanan a Luzon agingga kaabagatanan a Mindanao, iti nagulib a gagem da a pawilan ti masa ken iddepen ti hukbo ti umili.

Sireregta a rambakan tayo tatta nga aldaw ti maika-57 anibersaryo ti New People’s Army. Lagipen tayo nu kasano nga intakder daytoy ti Communist Party of the Philippines idi Marso 29, 1969 iti kangatwan a tarabay ti Marxismo-Leninismo-Maoismo. Manipud idi naitakder, ti NPA ket nagserbi a rebolusyonaryo a hukbo ti umili a Pilipino tapno ibagsak ti imperyalismo a US, ti naindasigan a panagari dagiti dadakkel a burges komprador, apo’t daga ken dagiti burukrata kapitalista. Ti NPA ti kangrunaan nga instrumento ti Partido iti panagtungpal iti sentral a rebolusyonaryo a rebbengen a rebbeken ken ibagsak ti armado a pwersa ti reaksyunaryo nga estado ken ibangon ti baro a demokratiko a gubyerno ti umili.

Addaan laeng 60 a Nalabbaga a mannakigubat ti NPA idi nabwangay daytoy iti maikadwa a distrito ti prubinsya ti Tarlac. Iggem da idi ti sisiyam (9) a riple nga awtomatik ken 26 a nakapsut nga armas. Iti panagpinget nga umabante umannurot iti estratehiko a linya ti panagkubkob iti kasyudadan, ti NPA ket nakapagpalawa, umuna idiay Central Luzon, sumaruno idiay Cagayan Valley ken idi agangay ket iti nadumaduma a prubinsya ti Luzon, Visayas ken Mindanao.

Iti kaanoman ket saan a nagbalin a lapped ti kinabassit ken kinakapsut ti pwersa ti NPA, iti panagabante ti rebolusyonaryo nga armado a dangadang kumpara iti ad-adda a dakkel ken napigsa nga armado a pwersa ti kabusor. Iti nalawa ken nauneg a suporta ti masa, dagiti yunit ti NPA ket agpakpakalaing iti panagaramat kadagiti taktika a gerilya tapno tukad-tukad a makapagpalawa ken makapagpapigsa. Babaen ti kanayon a panangiggem iti inisyatiba ken napaspas a panaggaraw, naaramid dagiti yunit gerilya ti NPA a patamaan dagiti nakapkapsut ken naisina a paset ti kabusor, ken alaen ti armas na.

Iti unos ti 57 a tawen, nasurok sangapulo nga estratehiko nga opensiba wenno gera a pangrebbek ti naisayangkaten ti imperyalismo a US a kabinnadang ti walo nga aso-aso a reaksyunaryo a gubyerno—manipud ken Marcos Sr agingga ken Marcos Jr—tapno iddepen ti NPA: Oplan Nip-in-the-bud, Oplan Katatagan, Oplan Lambat Bitag I, Oplan Lambat Bitag II, Oplan Mamamayan, Oplan Makabayan, Oplan Gordian Knot, Oplan Bantay Laya I, Oplan Bantay Laya II, Oplan Bayanihan, Oplan Kapayapaan, Joint Oplan Kapanatagan ken NAP-UPD. Amin dagitoy ket naibalangkas iti doktrina ti kontra-insurhensiya ti militar ti US. Dagitoy ket agpapada nga estratehiko a kampanya ti panangkubkob iti NPA, tapno isina ti hukbo ti umili iti masa, pawilan ti masa ken lapdan ti ayus ti suporta daytoy iti NPA, tapno ikabil dagiti yunit ti hukbo ti umili iti sitwasyon a puro militar ken atiwen isuda ti superyor a pigsa ti militar. Iti daytoy nga estratehiko a balangkas, tunggal maysa nga oplan ket agar-aramat ti nadumaduma a taktika a napigpigsa, narungrungsot ken nasaksaknap ngem iti sinaruno da, nga amin ket tinarabayan ken sinuportaran ti imperyalismo a US.

Ti pannakigubat a gerilya ket taktika ti intero nga umili, saan laeng nga ti hukbo da. Mano a daras man a dakdakkel wenno napigpigsa ti pasista a halimaw, saan daytoy a madaeran ti mano ribo a kinnit ti nalabbaga a kuton. Awan ti pwersa ti kabusor a makalapped iti panagabante ti gubat ti umili. Iti nairut a panagkaykaysa ti masa ken hukbo ti umili, tukad-tukad a makaabante ti naunday a gubat ti umili iti Pilipinas, makaurnong ti pigsa iti kaaw-awayan agingga a kabaelan nan gammatan ti kasyudadan. Napaneknekan iti pakasaritaan dagiti pagilyan nu kasano a ti gubat ti umili ket nagballigi kas maysa a pangmasa a tignay pangpulitika nga ibakbaklay ti minilyon nga umili, babaen a kangrunaan ti armado a dangadang, kagiddan ken supsuportaran ti amin a langa ti dangadang.

Paulit-ulit a napaneknekan ti NPA a babaen ti panagaramat na ken ti masa kadagiti taktika a gerilya ti konsentrasyon, panagwaras ken panagakar-akar iti Daya ken panagbira iti Laud, panagpadanog iti angin ti kabusor, panagbira iti likudan, panagbira iti nakapsut ken naisina a paset da, ken dadduma pay- kasano man kadakkel, kapaut ken karungsot dagiti kampanya ti in-inut a panagkubkob ken panagparmek, ket kabaelan a paayen ti NPA, ken iti proseso ket maaramid na nga agpalawa ken agpapigsa. Paulit-ulit met a napaneknekan iti negatibo a kapadasan nga anyaman a panaglukay kadagiti prinsipyo ken taktika a gerilya—panagibbat iti inisyatiba ken panagpasibo, saan a napapanawen a konsentrasyon, panagkampo a nabayag iti bantay, panangkubong ti bagbagi ken dadduma pay a pagkapuyan ket agtentennag kadagiti dangran nu saan a pannakarebbek ti dadduma a paset.

Nagsagrap man ti babassit ken dadakkel a dangran ti NPA iti napalabas, maar-aramid daytoy a balbaliw nga umabante ken agpapigsa babaen ti panagsubli iti pundasyon dagiti basaran a prinsipyo nga inyaplag ti Partido. Iti tarabay ti Marxismo-Leninismo-Maoismo, insayangkat tayo ti tignay panagilinteg idi 2023 tapno lagumen ken umadaw kadagiti adal manipud iti sinagrap a dangran ken panagatras nga intunda dagiti pang-uneg a pagkapuyan iti panangiyabante ti gubat ti umili ken panagsango iti kontra-rebolusyonaryo nga opensiba ti kabusor. Iti proseso ket papairuten tayo ti panangimtuod kadagiti basaran a prinsipyo ken iwakwaksi tayo dagiti kamali a tendensya iti napalabas. Manipud idi ket inyaramid tayo ti kasapulan a panagbalbaliw kadagiti pamuspusan ti gerilya a tignay ti hukbo ti umili iti panggep a pairuten ti silpo ken panagkaykaysa ti hukbo ti umili ken masa, palawaen ken papigsaen ti NPA, pagtalinaeden a bulag ken tuleng ti kabusor, paayen dagiti dadakkel nga operasyon ti panagdarup ken kigtoten daytoy kadagiti saan a namnamaen a taktikal nga opensiba ken aksyon a gerilya.

Iti agdama a tukad ti gubat ti umili, rumbeng nga ituloy tayo ti panangiyabante ti nasaknap ken nasedsed a pannakigubat a gerilya basar iti lumaplapad ken umun-uneg a base a masa. Tapno maaramid daytoy, kasapulan nga iyabante tayo iti amin-a-benneg dagiti nasaknap a dangadang a pangpulitika ken armado, kagiddan ti rebbengen a papigsaen ti Partido ken hukbo, dagiti organisasyon ti masa, dagiti organo ti bileg pangpulitika ken dagiti yunit ti milisya ti umili ken pangkat pangdepensa-iti-bagi ti masa.

Iti amin kadagitoy, tulbek ti panangpapigsa iti Partido. Rumbeng nga ad-adda pay a papigsaen ti panagadal iti Marxismo-Leninismo-Maoismo, kadagiti basaran a prinsipyo ti Partido ken panagaramat kadagitoy iti panagadal iti kongkreto a sitwasyon ken panagtungpal kadagiti praktikal a rebolusyonaryo a rebbengen. Nasken nga ituloy a paunegen ti tignay panagilinteg babaen ti panaglagom ken panagtasa tapno iwaksi ti empirisismo ken dogmatismo iti ideolohiya, dagiti langa ti petiburges a suhetibismo iti pulitika ken ultrademokrasya ken burukratismo iti organisasyon. Rumbeng a mano a daras a palawaen tayo ti Partido. Kasapulan nga itakder tayo dagiti sangay ti Partido iti mano pulo a ribo a baryo, pagadalan, pabrika ken dadduma pay a natao a suli iti intero a pagilyan, iti kasyudadan ken kaaw-awayan, tapno siguradwen ti nalawa ken nauneg a panangidaulo ti Partido iti minilyon nga umili.

Iti kaaw-awayan, nasken a palawaen ken papigsaen ti Pambansang Katipunan ng mga Magbubukid wenno PKM, ken dadduma pay a rebolusyonaryo a timpuyog iti intar dagiti babbai ken kabataan, tapno paregtaen dagiti dangadang nga antipyudal (panangibaba iti abang ti daga, panangpunas ti usura, panangingato iti sweldo ken panangilako iti nainkalintegan a presyo kadagiti produkto ti talon). Kasapulan met a buklen dagiti rebolusyonaryo a timpuyog ti masa iti intar ti minorya nga umili para iti panagsalaknib ti karbengan iti daga a tawid. Kagiddan daytoy ti nalalawa a dangadang tapno salakniban ti karbengan ken pagimbagan ti masa a mannalon laban iti panangagaw ken panagkamkam ti daga, panagsamsam ken panangdadael iti aglawlaw, gangannaet nga interbensyon militar, pasista a represyon ken panagiyatnag kadagiti patakaran ken linteg militar ken dadduma pay a langa ti panangidadanes.

Ririingen, or-organisaen ken patpatignayen ti Partido ti masa a mannalon iti nalawa a kaaw-awayan. Iti uneg dagiti sona ken larangan gerilya, kangrunaan a takyag ti Partido ti hukbo ti umili iti panagorganisa ken panagpatignay iti masa, kagiddan ti panangiyabante ti armado a dangadang ken panagpalawa ti rebolusyonaryo a base a masa. Ti armado a dangadang ket sumupsuporta kadagiti dangadang ti masa a mannalon, dagiti mangngalap ken dadduma pay a nakurapay iti kaaw-awayan. Ti NPA ti kaykaysuna nga instrumento da laban kadagiti armado a tauhan, maton, ken dagiti pwersa a paramilitar ken militar nga ar-aramaten ti agar-ari a dasig laban kadakwada, Gapu iti napinget a panangsalaknib kadakwada ti hukbo ti umili, ti masa a maikuskuspil ket agserserbi a bubon a saan a maatyanan a pagtataudan dagiti baro a Nalabbaga a mannakigubat.

Iti kasyudadan, nasken nga agtuloy a palawaen ken papigsaen ti rebolusyonaryo a tignay dagiti mangmangged, mala-mangmangged ken dagiti kabataan nga intelektwal, kasta met ti dadduma pay a sektor ti petiburgesya iti syudad. Bukbuklen ken pappapigsaen da dagiti rebolusyonaryo nga organisasyon ti masa a limed ken patpatignayen tapno sumuporta ken makipaset iti armado a dangadang iti kaaw-awayan. Kagiddan daytoy, idadaulwan ti Partido dagiti demokratiko a dangadang da tapno salakniban dagiti karbengan ken pagimbagan da, bayat a naregta a mapatpatignay isuda kadagiti nasaknap a dangadang laban iti pasismo, korapsyon, interbensyon a militar ti US, dagiti parigat a patakaran a diktar ti gangannaet, ken dadduma pay a kangrunaan a pakaseknan ti intero nga umili.

Kasapulan a tuloy-tuloy a papigsaen ti National Democratic Front bilang alyansa dagiti rebolusyonaryo nga organisasyon ti masa. Ti NDF ti pinakakonsolidado a paset ti alyansa dagiti patriyotiko ken demokratiko a dasig ken sektor, nga agkaykaysa iti basaran ti panangiyabante ti armado a dangadang. Iti basaran ti pigsa ti NPA ken NDF, maitakder dagiti temporaryo nga alyansa iti sumagmamano a paset ti agar-ari a dasig a mangbigbigbig iti pigsa ti rebolusyonaryo a tignay ken nakasagana a makikaykaysa iti nadumaduma a panawen ken langa. Iti agdama, bukbuklen tayo ti kalapadan a nagkaykaysa a prente laban iti agar-ari a bunggoy da Marcos ken Duterte, a tatta ket agpada a mangibagbagi iti kakarwan a reaksyunaryo ken pasista a paksyon ti agar-ari a dasig. Nasken nga ipan amin a kabaelan nga isina, labanan ken patapwaken ti agar-ari a rehimen US-Marcos a kangrunaan a mangparparigat ken mangbekbekkel iti umili.

Iti tengnga ti krisis ti agar-ari a sistema a mangituntunda ti awan kapada a panagsagaba ti nalawa a masa ti umili, ad-adda a lumawlawag ti pagkasapulan nga umabante iti dana ti gubat ti umili. Kalatakan daytoy kadagiti kabataan nga agtartarigagay a baliwan ti sistema ken itakder ti baro a gasat ti pagilyan. Mismo a ni Marcos, babaen ti negatibo nga ehemplo, ti mangidurduron kadakwada a lumaban ken agiggem ti armas. Iti napalabas a tawen, nakita tayo ti umad-adu a kabataan, agpada iti kaaw-awayan ken kasyudadan, a sumungsungbat iti awag a sumuporta ken agkameng iti New People’s Army. Tuloy-tuloy a manaynayunan ti baro a dara ti NPA a mangmangted ditoy ti baro a regta para iti panangiyabante ti armado a dangadang.

Sibubukel ti determinasyon ti amin a yunit ti New People’s Army, karaman dagiti yunit ti milisyang bayan, nga isayangkat ti kabaelan daytoy nga ipagballigi dagiti taktikal nga opensiba wenno aksyon a gerilya laban iti nakapsut, nabannog wenno dagiti naisina a yunit wenno elemento ti kabusor, tapno alaen dagiti armas da nga usaren dagiti baro a Nalabbaga a mannakigubat. Target met ti NPA dagiti armado a tauhan dagiti despotiko nga apo’t daga a mangrangranggas iti masa. Nasken met nga iyaramid dagiti umannatop nga addang tapno ipatungpal ti desisyon dagiti korte ti umili laban kadagiti napeklan a pasista ken kriminal nga ahente ti kabusor. Iti sango ti dumakdakkel a didigra iti klima, rumbeng met nga agtignay ti NPA kas salaknib ti kalikasan ken iyaramid dagiti aksyon a gerilya laban kadagiti managkamkam ken managdadael a negosyo.

Sibubukel ti pangngeddeng ti Partido ken New People’s Army a sipipinget nga iyabante ti naunday a gubat ti umili. Nangruna tatta iti sango ti rumungrungsot a panagatake ti US nga agpangpangta a mangigup ti intero a lubong iti allawig ti imperyalista a gubat, nakair-irut ti pagkasapulan nga ad-adda a paregtaen ti gubat ti umili tapno sungbatan ti pumigpigsa a tarigagay ti umili a Pilipino a makaruk-at iti saklot ti imperyalismo a US ken magun-od ti pudno a nailyan a wayawaya ken demokrasya.

Ti naunday a gubat ti umili ket naranyag a silaw a mangmangted ti namnama iti umili a Pilipino, ken agserserbi nga inspirasyon ken pagwadan para iti ginasut a milyon a maidadanes ken magungundawayan a mangmangged ken mannalon iti intero a lubong. Daytoy ti naindaklan a maibinglay ti proletaryo a Pilipino iti sangalubongan a dangadang tapno gibusan ti imperyalismo ken iyabante ti rebolusyon tapno gun-oden ti wayawaya, demokrasya ken sosyalismo.

Ibagsak ti imperyalismo, pyudalismo ken burukrata kapitalismo!

Iyabante ti demokratiko a rebolusyon ti umili!

Umabante iti dana ti naunday a gubat ti umili!

Agbiag ti dasig a mangmangged ken umili a Pilipino!

Agbiag ti maika-57 anibersaryo ti New People’s Army!

Agbiag ti Communist Party of the Philippines!