Hul-os nga kalipay nga ginbabati han Komite Sentral han Partido Komunista ng Pilipinas an tanan nga mabayanihon nga Pula nga mangaraway ngan kumander han Bagong Hukbong Bayan hini nga makasaysayan nga adlaw han ika-57 nga anibersaryo han pagkakatukod han tinuod nga hukbo han tinalumpigos nga katawhan. Hini nga adlaw, lingion naton an waray hunong nga pagpapasulong han rebolusyunaryo nga armado nga pakig-away agud kab-uton an nasyunal nga katalwasan ngan tinuod nga demokrasya. Kumuha kita han mga leksyon tikang ha paghasog ha puno han liko ngan birik nga dalan han pag-abante ngan pag-atras, kapakyasan ngan kadaugan.

Maghatag-pasidungog kita ha ngatanan nga bayani ngan martir han katawhan Pilipino nga waray pagkamakaiya nga naghatag han ira kinabuhi para ha dakila nga katuyuanan nga talwason an nasud tikang ha imperyalista nga paghahadi ngan tanan nga porma han pananalumpigos ngan paniniyupi han mga lokal nga naghahadi nga klase. Utang naton ha ira sakripisyo an tanan nga nakab-ot han katawhan ha dalan han rebolusyunaryo nga pag-ato. Diri bisan kan-o magpapapas ha hinumduman han katawhan an ira ngaran ngan amot. Nagraranggat hira nga mga bituon nga nagseserbe nga lamrag ha kasisidman nga ginhahasog han nasud ngadto ha Pula nga pagpunias.

Kaangayan la nga igselebrar naton an nakab-ot naton nga mga kadaugan ha pagpapasulong han rebolusyunaryo nga armado nga pakig-away ha naglabay nga tuig, samtang tukma nga nakuha han mga leksyon tikang ha nahiaguman nga mga kapaitan. Kinahanglan pankatinan ini ha pagsungsong naton ha dalan han pagpapakusog ngan pagpasulong han aton panmaihaan nga gerra han katawhan.

Padayon nga iginpapalaypakay han BHB an Pula nga bandera han rebolusyunaryo nga armado nga pakig-away. Ha pamumuno han Partido ngan giya han kagiusan pagtutul-id, padayon nga ginpapakyas han BHB an waray wantas nga pasista nga pangangatake han mga armado nga tawuhan han niyutiyo nga rehimen Marcos kontra ha hukbo han katawhan ngan ha katawhan nga naato ha kabaryuhan ngan kasyudaran. Ha giya han Partido, ngan ha atubangan han mas makuri nga kamutangan han kataw-han, dugang nga dumig-on ngan humitaas an rebolusyunaryo nga diwa ngan determinasyon han mga Pula nga mangaraway han BHB nga ipakigbisog ngan depensahan an masa nga tinalumpigos ngan tiniyupi.

Tikang han iginlansar naton an kagiusan pagtutul-id, mas nalabaw an aton positibo nga eksperyensya tanding ha negatibo. Bisan pa man kun nahiagum han mga kahibangan an pira nga yunit, mas damo nga yunit han BHB an nakapagpreserbar han kusog, nakakapahilapad han erya han operasyon, nakakapahiluag han base panmasa, nakakagrekluta han bag-o nga mga Pula nga mangaraway, ngan madinaugon nga nakakaglansar han magkalain-lain nga tipo han taktikal nga opensiba ngan armado nga gerilya nga aksyon. Papitad-pitad nga nahihimo an pag-aayad ha moda ngan pamaagi han ginerilya nga paggios agud mapahugot an sumpayan ha masa samtang nagpapakaupay agud likyan ngan birikan an madakmol nga presensya han kaaway. Madig-on nga utro nakakagpakusog an BHB, ngan nakatan-aw ini ha utro nga pagbuylo ha mga tiarabot nga panahon. Sugad han pagsangpaw ha pungkay han bukid, bug-os an determinasyon han Partido ngan BHB nga hasugon an damo an liko, makuri ngan delikado nga dalan ngadto ha rebolusyunaryo nga pag-abante.

Kada adlaw natikagrabe an pag-aantos han katawhan ha butnga han imperyalista nga gerra ngan krisis. Ginbabay-og an bug-os nga kalibutan han mga gerra nga gindadagkutan han imperyalismo nga US para ha pangagaw han mga nasud nga riko ha lana ngan mineral. Kaparte ini han mga desperado nga pitad agud buhion an kapitalista nga produksyon ngan panmilitar nga produksyon. Kundi ha proseso dugang la hini nga titiluon an tikamatay nga pankalibutan nga kapitalista nga ekonomiya. Ha atubangan han mga gerra nga agresyon han US, tikadako gud an hulga han pagbuto han mas dagko nga gerra ha tidaraon.

Waray wantas an pagtamas-tamas han imperyalismo nga US ha paglulugaring han Pilipinas, ha militar, ekonomiya ngan pulitika, pinaagi han sunud-sunuran hini nga niyutiyo nga hi Marcos. Gintutugutan ni Marcos nga gamiton han militar han US an nasud komo base ngan lansaran han panmilitar nga agresyon ha Asia-Pacific tubtub ha Middle East, kabalyo han panmilitar nga ayuda ngan pampulitika nga suporta ha rehimen nga putos ha korapsyon ngan ginkakangalsan han katawhan.

Ha ilarum ni Marcos, waray tubtuban an korapsyon han mga burukrata kapitalista ha poder, an pyudal ngan bagapyudal nga mga porma han paniniyupi ha kabaryuhan, an panlulupot han tuna ngan pangangagaw han pakabuhian, an pandambong han dagko nga kapitalista ha natural nga karikuhan han nasud ngan paniniyupi ha kusog-pagtrabaho han mga trabahador, an paghibang ha kalibungan ngan bunga hini nga hiluagan nga destroso ha kinabuhi ngan pakabuhi han masa. An natikagrabe ngan waray wantas nga paggamit han pasista nga kamadarahug panigamnan han desperasyon han rehimen US-Marcos ngan igpabilin an dunot nga sistema pinaagi han pagsasabrag han terorista nga ngirhat ngan armado nga panmuypoy ha katawhan nga naato. Mas natiklaro an panginahanglan para ha rebolusyunaryo nga pag-ato. Para ha katawhan, an pag-aarmas makatadungan ngan kinahanglanon.

Dako man ngan makaharadlok kun pagkit-an an pan-gawas nga postura han pasista nga halimaw han niyutiyo nga estado tungod ha kadamo han tawuhan, bag-o nga magbakod nga armas, ngan pagbuhos han suporta han imperyalismo nga amo, maaram kita nga ini, ha esensya, maluya ngan matapok tungod kay dunot ini nga tubo ngan tagdepensa han nagnanana nga sistema, mayda higlarum nga butak han nagsusumpakiay nga paksyon, ngan sobra nga ginkakangalsan ngan iginsasalikway han katawhan. Bisan kun guti ngan maluya pa an BHB, madig-on ini nga nagkakaurusa ha ilarum han tukma nga pamumuno han Partido, ngan determinado nga magpahiluag ngan magpakusog amkon an hilarum ngan hiluag nga suporta han katawhan. Kaupod an pagbangon ngan paggios han masa, bug-os an determinasyon han Partido ngan BHB nga ipasulong an demokratiko nga rebolusyon han katawhan nga mayda bag-o nga lebel han pintas ngan bangis.

Ginbabay-og han imperyalista nga gerra han US an bug-os nga kalibutan

Ha sakob la han duha kabulan tikang han pagtikang han tuig, gin-atake han mga panmilitar nga pwersa han imperyalismo nga US, ha mando han tuyaw nga pasista nga pinuno hini nga hi Donald Trump, an duha nga nasud nga maiha na nga nag-uundong han nasyunal nga paglulugaring, ngan natipa ha imperyalista nga kontrol ngan dikta. An paglalaway ni Trump ha karikuhan nga lana han Venezuela ngan Iran, an syahan ngan ikatulo nga mayda pinakadako nga reserba ha bug-os nga kalibutan, an tinuod nga hinungdan han iginhimo hini nga panmilitar nga agresyon.

Gin-atake han mga panmilitar nga pwersa han US an Venezuela hadton Enero 3 ngan ginsikmit an presidente hini nga hi Nicolas Maduro ngan asawa nga hi Cilia Flores, agud pwersahay nga paluhuron an gubyerno ngan karawton an mga dikta hini nga kontrolon han mga korporasyon nga Amerikano an industriya han lana ha nasud. Waray pa maglabay an duha kabulan, magkatig-ob nga ginbomba han US ngan Zionista nga estado han Israel an Iran hadton Pebrero 28, ngan iginhimo an operasyon nga asasinasyon kontra ha lider hini nga hi Ayatolla Ali Khamenei. Deklarado nga larang ni Trump nga magsulsol han pag-aalsa han katawhan han Iran, agud ibutang ha poder an bag-o nga gubyerno nga maluhod ha poder han US.

Hini liwat nga panahon, butaray nga gintarhug han US nga aatakihon han armado nga pwersa hini an Cuba, Colombia, ngan Mexico, nga baga hin nangangayat kun hin-o an mapilo ngan mayukbo ha iya dikta, o tubtub diin niya kaya nga tumanon an tarhug nga pag-atake. Antes pa hini, nanarhug liwat hi Trump nga “utro nga kukuhaon” an Panama Canal. Nasubay ini ngatanan ha utro niya nga ginbuhi nga Doktrina nga Monroe nga nag-iinsister nga an Latin America kalugaringon nga teritoryo han US. Kadungan hini, nanarhug hi Trump nga pwersahay nga kukuhaon an Greenland, usa nga dako nga isla ha Arctic ngan North Atlantic Ocean.

Ha sakob han 25 kaadlaw, naghulog han diri mamenos ha 23,000 nga bomba an US ngan Israel ha Iran, o masobra 920 nga bomba adlaw-adlaw. Haros 2,000 nga Iranian an napatay, kaupod an gatus-gatos nga bata, 24,800 an nasamaran tikang han tikangan an panmomba han US ngan Israel. Gintarget han panmomba diri la an mga panmilitar nga pasilidad, kundi hasta an mga eskoylahan, kabablayan, pankomersyo nga bilding, ospital, mga pan-enerhiya ngan pan-nukleyar nga planta, ngan iba pa nga pansibilyan nga imprastraktura, ha pag-atentar nga paluhuron ngan payukbuon an Iran ha poder han imperyalismo nga US, ngan igsurender an karikuhan nga lana ngan nasyunal nga soberaniya hini.

An armado nga pag-atake han imperyalismo nga US ha Venezuela ngan Iran pangilal-an han bag-o nga balitang han pagpintas han mga kontradiksyon giutan han mga imperyalista ngan han mga nasud nga nag-iinsister han nasyunal nga soberaniya, nga nakasumpay gihap ha pagpintas han inter-imperyalista nga kontradiksyon. Butaray nga gin-aayat ngan karuyag bag-uhon ni Trump, ha ngaran han mga monopolyo kapitalista nga Amerikano, an naeksister nga kaayusan ha kalibutan ha naglabay nga tulo kadekada—an bahinay giutan han mga imperyalista ha mga surok han lana ngan iba pa nga importante nga hilaw nga materyales, tambakan han sobra nga imbentaryo ngan diri mabaligya nga mga epektos, ngan pagbubutangan han sobra nga kapital.

Mahugot nga ginsukna han China ngan Russia an armado nga pag-atake han US ha Venezuela ngan Iran. Atubangan han grabe nga destroso ha Iran dara han panmomba han US, ngaduha nagpadara an China ngan Russia han makatawo nga ayuda. Nagpahayag an Russia ngan magkalain-lain nga nasud ngan internasyunal nga ahensya han kabaraka ha pagtarget han US ha mga nukleyar nga planta nga posible magresulta ha kalamidad ha milyun-milyon katawo.

An pag-atake han US ha Venezuela ngan Iran nagreresulta liwat han hilarum nga kabaraka han mga alyado nga nasud han US, kalakip an mga nakasakob ha North Atlantic Treaty Organization (NATO). Damo ha ira an nagsuson ha pagtalapas han US ha mga internasyunal nga pagsurundon ngan prinsipyo han United Nations, bisan kun waray nira butaray nga ginkontra, ngan ha urhi kausa ha katuyuanan nga ibagsak an mga gubyerno nga nakontra ha imperyalista nga dikta ngan kontrol. Sugadman, sobra hira nga nababaraka nga an pagsosolo han imperyalismo nga US magreresulta ha labaw nga pagdako han rekurso nga katin han US, nga magbabag-o ha naeksister hadto nga balanse antes an mga panmilitar nga agresyon han US. Antes hini, naghimo liwat han higlarum nga kontradiksyon an pag-iimponer han US hadton nakalabay nga tuig han higtaas nga taripa ha magkalain-lain nga parte han kalibutan, kalakip ngaduha an mga imperyalista nga karibal ngan kaalyado.

An mga panmilitar nga agresyon han US ha Venezuela ngan Iran agud kontrolon an lana ngaduha pagbira ha numero uno hini nga karibal nga China, nga amo an prinsipal nga napalit han igin-eeksport nga lana hini nga mga nasud (15%-20% han igin-iimport nga lana han China tikang ha 80%-90% han lana nga igin-eeksport han Iran ngan Venezuela). An gin-atentar nga pag-agaw ha dagko nga surok han lana kaparte han mga pitad han pan-gigipit han US ha China nga natikagrabe ha naglabay nga pira katuig. Kalakip hini an pagpahitaas han taripa ha mga igin-iimport tikang ha China, pagdidiri ha paggamit han mga pyesa nga elektroniko nga produkto han kompaniya nga Huawei han China, pagdidiri ha pagbaligya ha China han mga abante nga semiconductor ngan han mga makina para ha produksyon hini, ngan iba pa nga mga pitad nga pan-ekonomiya ngan pan-negosyuhay.

Kadungan hini an dirudiretso nga pagpapakusog han US han presensya ha “first island chain” ha palibot han China, kalakip an pagpupwesto ngan pagpapakusog han panmilitar nga presensya han mga pwersa ngan higamit pan-gerra hini ha Pilipinas, Japan, ngan South Korea, ngan pagbabaligya han armas ha Taiwan, ha tahub han “pagpugong” (containment) ha kunuhay “potensyal nga panmilitar nga operasyon” han China ha Taiwan. Ngatanan ini nagsusulsol han kontra-pangandam ngan pagpapakusog han China, kalakip an pagpapadakmol han presensya ha sakob ngan gawas han kadagatan ha palibot han iya nasud.

Ginastos an militar han US han sumobra-kumulang $1 kabilyon adlaw-adlaw ha waray wantas nga panmomba ha Iran. Prinsipal nga nagpulos dinhi an mga kompaniya nga nagsusuplay han mga armas ngan higamit pan-gerra ha militar han US. Naaro yana an gubyerno nga Trump han kadugangan nga $200 kabilyon agud sumakob ha mga bag-o nga kontrata hini nga mga kompaniya para ha kadugangan nga misayl, drone, ngan iba pa nga higamit pan-gerra.

Sukwahi ha syahan nga plano han US, an pag-atake hini ha Iran nag-iha na hin usa kabulan. Samtang natikaiha, mas natikakusog an pagkontra dinhi ngaduha ha sakob han US ngan han magkalain-lain nga nasud. Nagresulta ini han sobra nga ispekulasyon ha presyo han lana (tikang $65 ngadto $105 kada bariles han krudo nga lana) nga naghimo han “oil price shock” ha bug-os nga kalibutan, ha kapulsanan han dagko nga kompaniya ha lana. Hiluag yana an kabaraka nga maludlod ha resesyon ngan istagplasyon (hitaas nga implasyon, himubo nga produksyon ngan hiluag nga disempleyo) an damo nga ekonomiya, kalakip an US, labina kun mag-iha pa an gerra han US ngan Israel ha Iran, ngan magpabilin nga hitaas an presyo han krudo nga lana.

Bisan ha atubangan han pangangatake han pinakapoderoso nga imperyalista ha bug-os nga kalibutan, waray yumukbo an katawhan han Venezuela ngan Iran. Milyun-milyon nga Venenzuelan an nirabunos ha kalsada ha magkalain-lain nga bungto agud suknaon an armado nga pangatake ngan panmomba han US ngan ig-insister nga igbalik ha ira nasud an ira presidente nga hi Maduro. Sugad liwat ha Iran, haros adlaw-adlaw nga napupuno an mga plasa ngan kakalsadahan han milyun-milyon nga nahugos ha mga demonstrasyon agud igpakita an ira pagkakaurusa, suknaon an armado nga agresyon han US ngan atuhan an pag-atentar nga ibutang ha poder an gubyerno nga magseserbe ha interes han US.

Ha yana diri pa klaro kun tiunan-o tatapuson han US ngan Israel an gerra nga pangangatake kontra ha Iran, labina nga pakyas ini nga makab-ot an igintalaan nira nga katuyuanan nga pasurenderon an Iran. Tigaman han sobra nga kahimulag han imperyalismo nga US, waray makuha ni Trump an suporta han mga imperyalista nga alyado hini ha Europe nga magpadara han panmilitar nga pwersa agud abrihan an Strait of Hormuz. Tigaman nga mag-iiha an gerra, maabot ha 50,000 nga sundalo nga Amerikano an tikadto yana ha rehiyon.

Ha sakob han usa kabulan, dirudiretso liwat nga naghimo an Iran han mga bulos nga atake han mga misayl ngan drone nga ginpuntirya an Israel, ngan an mga base militar han US ha mga nasud ha Middle East. Ginkundenar han UAE, Saudi Arabia, Bahrain, Qatar, Kuwait ngan Jordan an mga aksyon han Iran nga “talapas ha soberaniya,” bisan kun nadiri hira nga “madanas ha gerra nga diri ira.” Piho nga magbabag-o pa an pagharuhan-ay ha gerra kun mag-iiha ini, labina kun butaray nga humugdon ha mga teritoryo han Iran an mga tropa nga Amerikano.

Atubangan han nagpapadayon nga krisis han pankalibutan nga sistema nga kapitalista, lauman na nga magpapadayon ngan dugang nga magrabe an mga gerra nga agresyon han US ha mga tiarabot nga bulan ngan tuig. Iginpakita na ni Trump nga diri mapupugngan an iya gubyerno han anuman nga internasyunal nga pagsurundon, o bisan han mga ligal nga proseso han gubyerno nga US para ha paglalansar han gerra. Iginpakita ni Trump nga an iya katuyawan diri natutubtuban. Ha pagkahakog nga agawon an kontrol ha karikuhan nga lana ngan mga estratehiko nga mineral han iba nga nasud, ngan gipiton an mga imperyalista nga karibal, labina an China, diri hirayo nga bumuto an mas dagko pa nga armado nga agway ha tidaraon. An sobra nga pag-aantos nga igindudurot hini ha tinalumpigos nga katawhan ha bug-os nga kalibutan nagpupukaw ha ira kontra-imperyalista nga kapukawan ngan nagpapalarab han ira determinasyon nga umato para ha katalwasan.

Nadarusdos ha krisis an bulok nga naghahadi nga sistema ha Pilipinas

Madagmit nga natikabagsak an lebel han panginabuhi han hiluag nga masa han katawhan Pilipino kadungan han dugang nga pagdarusdos ha mas hilarum ngan grabe nga krisis han naghahadi nga sistema nga bagakolonyal ngan bagapyudal ha Pilipinas. Duso ini han paghitaas han presyo han lana kasunod han pan-gegerra han imperyalismo nga US ha Middle East. Mas nabubuksas an atrasado nga kamutangan han lokal nga ekonomiya o sistema han produksyon nga nakasarig ha importasyon ngan langyaw nga pautang. Mas nabubuksas liwat an baratunon han reaksyunaryo nga gubyerno nga Marcos ha natikagrabe nga panginabuhi han mayoriya han katawhan, ha pagpabor hini ha interes han mga langyaw nga kompaniya ngan kakunsabo nga dagko nga kumprador burges ngan burukrata kapitalista.

Sobra nga pakuri ha katawhan Pilipino an paniniyupi han hakog-ha-tubo nga mga kompaniya ha lana ha gerra ha Middle East. Dudrungan nga naghinitaas ha waray pa katupong nga lebel an presyo han mga produkto nga petrolyo. Ginpahitaas hin duro an presyo han diesel nga prinsipal nga gin-gagamit ha transportasyon, enerhiya ngan komersyo. An higante nga tubo nga ginhahakin han mga kompaniya ha lana pabug-at ha masa nga nagsusugbong ha kada paghitaas han presyo. Dugang pa nga paras-anon han katawhan an nakaluon nga buhis nga ginsusukot han gubyerno (excise ngan value-added tax o VAT) nga naabot ha ₱160 kabilyon kada tuig, nga haros 60% han tinuig nga koleksyon nga ₱276 kabilyon tikang ha kumbinasyon han duha nga buhis.

An waray hunong nga paghitaas han presyo han lana tikang han pagtikang han tuig ngan tigda nga paghitaas tikang Marso nagresulta han dirudiretso nga paghitaas han presyo han pagkaon ngan iba pa nga batakan nga panginahanglan, pamasahe, sukot ha kuryente, tubig ngan iba pa nga serbisyo. Mayda hulga han dugang nga paghitaas han mga presyo han mga papliton tungod ha pagbagsak han balor han piso kontra dolyar ha pinakahimubo nga balor ha kasaysayan (₱60.5 kada dolyar). Prinsipal nga gin-iigo hini an masa nga anakbalhas.

Madagmit nga nadarusdos an lebel han panginabuhi han mayoriya han katawhanan—an mga trabahador, parag-uma ngan mga ordinaryo nga empleyado, nga waray o haros waray natitirok ngan nabubuhi hin kabkab-tuka. Kun magpapadayon an paghitaas han presyo ha mga maabot nga bulan, gintatantiya nga 2-3 kamilyon nga pamilya an madudugang ha 14.3 kamilyon nga pamilya nga nabubuhi ha kakurian. Ha butnga han gerra nga agresyon han US kontra ha Iran, nababaraka an masobra duha kamilyon nga migrante nga trabahador nga nagtatrabaho ha magkalain-lain nga nasud ha Middle East. Pira kanapulo kayukot na an ginpili nga umuli bisan kun waray hira aabutan nga trabaho o pakabuhuian ha nasud.

An tigda nga paghitaas han presyo han lana mas magluludlod ha panginabuhi han masa nga Pilipino. Tungod ha paghitaas han gastos ha produksyon, nabagsak an kita han mga drayber ngan opereytor han gudti nga transportasyon, hasta han mga parupangisda, mga parag-uma, gudti nga trader, negosyante ngan mga parupaninda, mga nagpapadalagan han canteen o karinderya, ngan damo pa nga iba. Mas maguti an balor han suhol han mga trabahador tungod ha natikahitaas nga gastos ha panginabuhi. Ha luyo han grabe nga araba ha himubo nga suhol, padayon nga nagpapakabungol an rehimen Marcos ha maiha na nga demanda para ha makaburuhi nga minimum nga suhol nga ₱1,200 kada adlaw.

Sobra nga pakuri ha katawhan an kontrol han kartel o kunsabuhay han pira nga hamad nga dagko nga kompaniya ha lana ha lokal nga distribusyon han mga produkto nga petrolyo. Sukwahi ha saad han balaud ha deregulasyon (1998) nga mahimubo an presyo tungod ha kompetisyon, gin-aareglo kada semana han pinakadagko nga kompaniya ha lana an presyo para maksimisado an ira tubo. Waray nasyunal nga industriya han lana ha Pilipinas. Imbes nga umuswag, mas nagluya an lokal nga kapasidad ha produksyon han repinado nga lana. Mayda man natural gas ha kadagatan nga nakapalibot ha Pilipinas, sugad han Malampaya, aada ini ha kontrol han dagko nga kumprador burgesya ngan kasosyo nga langyaw nga kapitalista ha pinansya.

An lokal nga industriya han lana espiho han kabug-usan nga pan-ekonomiya nga kaayusan ha Pilipinas, nga ginhahadian ngan aada ha kontrol han langyaw nga mga kompaniya kakunsabo an dagko nga kumprador burgesya, dagko nga agaron maytuna ngan burukrata kapitalista. Kakunsabo an niyutiyo nga rehimen nga tagapagpatuman han mga neoliberal nga palisiya nga dikta han International Monetary Fund, gin-uulang han mga langyaw nga kompaniya an pag-uswag han lokal nga produksyon.

An ekonomiya han Pilipinas nagpapabilin nga atrasado, agraryo ngan diri industriyalisado. An natural nga karikuhan han nasud—tikang ha kabukiran tubtub ha kadagatan—gindadambong ngan ginlulupot han mga langyaw nga monopolyo kapitalista ngan mga naghahadi nga klase.

Ginsisingabot an himubo nga suhol han mga trabahador nga Pilipino. An ginhahakin nga tubo diri iginbabalik ha pagpapahiluag ngan pagpapauswag han lokal nga produksyon. Nakasarig an lokal nga produksyon ha pag-iimport han mga makinarya, pyesa ngan iba pa nga sangkap ha produksyon, ngan nakatadong ha pag-eeksport han barato nga hilaw o tala nga naproseso nga materyales (mineral, prutas), ngan ha utro nga pag-eeksport han himubo nga dugang nga balor han mga epektos (sugad han mga semiconductor ngan iba pa nga pyesa nga elektroniko).

Ha ilarum ni Marcos, dugang nga nalumos ha pagkakautang an Pilipinas. Waray katupong ha nakalabay an presente nga pan-gawas nga utang han nasud nga inabot na ha $99.1 kabilyon (₱5.81 katrilyon), haros upat kabeses tanding ha pan-gawas nga utang ($26 kabilyon) nga ginbilin ni Marcos Sr hadton 1986. An langyaw nga utang han Pilipinas kaparte han ₱18.13 katrilyon nga kabug-usan nga utang han nasud hadton Enero 2026, pinakahitaas na ha kasaysayan. An langyaw nga utang, kalakip an igin-uuli nga dolyar han mga migrante nga trabahador, pambayad ha depisito ha pan-gawas nga negosyuhay ($50-$60 kabilyon ha naglabay nga mga tuig), nga bunga han diri pantay nga balyuay han igin-eeksport nga barato nga hilaw nga materyales, ngan igin-iimport nga mas mahal nga human nga epektos. Pampuno ini ha depesito ha badyet ngan kakulangan ha pondo han gubyerno, nga dako nga parte nahihingadto ha mga maanomaliya nga pan-imprastraktura nga proyekto, ura-ura kadako nga panmilitar nga gastuson ngan pambayad utang.

Mas naggrabe ngan nagin butaray an mga porma han korapsyon han naghahadi nga sistema ha ilarum han rehimen US-Marcos. Pinakagrabe dinhi an nabuksas nga mga maanomaliya nga flood control nga proyekto ngan iba pa nga imprastruktura, diin bilyun-bilyon kapiso an iginbursa han mga burukrata kapitalista nga upisyal han gubyerno. Nabuksas diri pala maiha nga hi Marcos mismo an utok ha likod hini nga iskema. Kakunsabo an pira nga yawe nga upisyal han Malacañang, gintatantiya nga inabot ha ₱8 kabilyon an direkta nga iginbursa ni Marcos ha porma han mga kikbak. Labot ha pira nga mga himubo nga upisyal, waray pa napipriso o ginsasalawdan han kaso ha higtaas nga upisyal nga gin-ngaranan nga dabi ha mga anomaliya. Sugad han ginlalauman, waray hingaradtuan an “imbestigasyon” han ICI o Independent Commission on Infrastructure nga ginbug-os ni Marcos. Mismo hi Marcos nakakalusot ha baratunon. An kaso nga impeachment kontra ha iya paspas nga iginbasura han mga kongresista nga aada ha iya bursa.

Samtang, madagmit naman ngan iginpadayon han House of Representative an pagsalawad han kaso nga impeachment ngan paghimo han pagbista kontra kan Vice Presidente Sara Duterte, kasumpay han maanomaliya nga paggastos han ₱612.5 kamilyon nga intelligence funds, diri mapaliwanag nga pagdako han personal nga karikuhan ngan iba pa nga reklamo. Ha paghihingyap han hustisya, maiha na nga iginduduso han katawhan an pagpapabaton kan Sara Duterte ngan ha amay niya nga hadto anay presidente nga hi Rodrigo Duterte. Iginkalipay han pira kayukot nga pamilya han biktima han kamadarahug han estado ha ilarum ni Duterte an iginhimo nga pagbista ha iya diri pala maiha han International Criminal Court ha The Hague agud kumpirmahon an mga kaso kontra ha iya. Samtang ginpapagbaton han katawhan an mga Duterte, maaram hira nga gin-gagamit liwat han mga naghahadi nga barkadahan nga Marcos an pagpiit kan Sara Duterte agud idiskaril an igindeklara nga plano han karibal nga dumalagan ha eleksyon ha pagkapresidente ha 2028. Bisan kun hirayo pa ini, nakatadong na an atensyon han mga reaksyunaryo nga partido ha mga aregluhay, maniobrahan ngan kampuhan.

Nangangalas gud an katawhan Pilipino ha korapsyon han mga burukrata kapitalista han diin man nga barkadahan han mga naghahadi nga klase, nga butaray an pandambong ngan pagpapariko tikang ha pondo han katawhan, bisan ha butnga han tikagrabe nga pag-inantos han masa nga anakbalhas. Waray sukol an kangalas han katawhan, ha partikular, ha buwa ngan palpak nga mga flood control nga proyekyto, nga gin-gaganansyahan han bilyun-bilyon kapiso, labina ha atubangan han susrunod nga kalamidad durot han mga pagbaha ngan katimpag han tuna. Maaram hira nga lahos ha flood control, damo pa an iba nga iskema han korapsyon ha ilarum han dunot nga gubyerno, tikang ha nabuksas nga mga maanomaliya nga proyekto nga “farm-to-market road” hasta ha pagpalit han mga trak han bumbero.

Binuto hadton nakalabay nga tuig an kangalas han katawhan ha korapsyon. Ha sakob han pira kabulan, pauru-utro nga nag-walk-out an mga estudyante tikang ha pira kanapulo nga eskoylahan ngan pabalik-balik nga nagrali ha kalsada an narunapulo kayukot nga katawhan agud magprotesta ha magkalain-lain nga parte han nasud. Bisan kun pirit nga iginsasagang hi Marcos han nakikialyado dinhi nga mga grupo nga sosyal-demokrata ha pangunguna han Akbayan, waray hini matahuban an nag-aningal nga guliat han hiluag nga ranggo han mga kabatan-unan para ha pagpapatalsik kan Marcos ngan Duterte, ngan panawagan para ha pagbabag-o han dunot nga sistema.

An nabubug-os nga kagiusan protesta padayon nga nabuylo atubangan han madagmit nga pagbagsak han pakabuhian han katawhan. An mga tinindog ngan nagprotesta kontra ha korapsyon hadton naglabay nga tuig natindog ngan nagpoprotesta yana nga Marso. Binuto an susrunod nga gios protesta ngan ukoy-pasada ha bug-os nga nasud agud suknaon an imperyalista nga gerra han US ha Iran, suknaon an mga matiyupion nga mga kompaniya ha lana ha sobra nga pagpapahitaas ha presyo han diesel ngan gasolina, ngan kundenaron an rehimen US-Marcos ha kawaray pulos hini atubangan han krisis ngan pagpapakabungol ha mga demanda han katawhan.

Ha paghingyap nga pugngan an pagbuylo han kagiusan protesta, padayon nga gin-gagamit han rehimen US-Marcos an mga armado nga alipures hini agud gipiton ngan hadlukon an mga lider ngan asosasyon han magkalain-lain nga sektor, magpasarang han armado nga pwersa ngan mga ahente militar ha mga komunidad, kampus ngan mga pabrika, ngan puypuyon an mga paggios han masa ha kakalsadahan. Gin-gagamit hini an “terorista” nga pagbabansag ngan an hulga han panmriso o pagsikmit. Kaparte ini ngatanan han kunuhay “pagkakaurusa, kamurayawan ngan kauswagan” nga ginlalakipan liwat han armado nga pagpuypoy ha kabaryuhan ngan mga pankombat nga operasyon kontra ha mga rebolusyunaryo nga armado nga pwersa, agud tagan lugway an mga langyaw nga kompaniya, kakunsabo an mga lokal nga naghahadi nga klase, nga manlupot han tuna, mag-abre han mga minahan ngan iba pa nga mga operasyon nga mapandambong ngan mapanhibang ha kalibungan.

Todo-buhos an rekurso ngan tawuhan han reaksyunaryo nga rehimen Marcos ha desperasyon hini nga lanaton an paglipol ha BHB. Ha luyo han deklarasyon nga “marurumok na” an BHB, nakapakat pa gihapon an haros ngatanan nga pankombat nga batalyon han AFP ha mga prente gerilya ha bug-os nga nasud, agud himuon an gintatawag hini nga “focused military operations” nga ginlaladawan han pagpapailarum han mga baryo ha balaud militar nga paghahadi, pagkontrol ha gios han populasyon, pagblokeyo ha pagkaon ngan komersyo, waray wantas nga panmomomba sugad ha Mindoro, pagpuypoy ha pakigbisog han mga parag-uma ha pagsulod han mga operasyon nga mina sugad ha Nueva Viscaya, ekstrahudisyal nga panmatay ha mga gintatahapan nga nasuporta ha BHB, peke nga pagpapasurender, pagsikmit, pagtortyur ngan panmriso, ngan iba pa nga mga grabe nga porma han pagtamak ha tawhanon nga katungod.

An waray hunong nga pagsasabrag han pasista nga ngirhat han AFP subay ha mando han amo hini nga imperyalista nga US. Ginbubuhusan ini han imperyalismo nga US han pondo ($250 kamilyon kada tuig tubtub 2032), higamit militar ha porma han mga edro nga pan-gerra, bomba ngan bala, ngan mahugot nga suporta nga paniktik. Tuyo han imperyalismo nga US nga ig-alutaga an bug-os nga pwersa han AFP para sumuporta ha mga iginkakasa nga operasyon ngan gerra han US ha Asia-Pacific, partikular kontra ha karibal hini nga China.

Piho nga dadanason han US an Pilipinas ha anuman nga gerra nga agresyon o gerra nga panginginlabot ha Asia. Natikadakmol pa an panmilitar nga presensya han US ha tikadamo nga mga EDCA “site” ngan ha mga sikreto nga pasilidad han US ha magkalain-lain nga parte han nasud. Ha butnga han gerra nga agresyon han US kontra ha Iran, yukut-yukot nga pan-atake nga tropa nga Amerikano an tatapuon ngan aalalayan han AFP ha plano nga himuon nga Balikatan war exercises. Sakay hira han ira denukleyar nga mga bokis de gerra ngan dara an ira mga armas pan-gerra.

An mga barko nga nabal han US pirmihan nga nakaduong o naglalayag ha South China Sea, ha mga dagat ha palibot han Pilipinas ngan ha sakob han teritoryo han nasud. Kaparte ini han estratehiya han paggamit ha Pilipinas komo dako nga base militar ngan lansaran han mga operasyon hini ha rehiyon. Agud pamunuan ini nga mga operasyon, ginbug-os han militar han US an Task Force Philippines. Kaparte hini an saywar nga mga “transparency operations” para ibuksas an gintatawag hini nga mga agresibo nga maniobra han China ha South China Sea agud pagawason nga “sangkay” ngan “kaalyado” han Pilipinas an US kontra ha China. Ha duso liwat han US, susrunod nga panmilitar nga kasarabutan an ginpirmahan ngan pipirmahan pa han Pilipinas ha mga alyado han US sugad han Japan, France, Canada ngan iba pa nga nasud.

An nagpapadayon nga imperyalista nga gerra han US ha Iran ngan iginbubunga hini nga krisis ha Pilipinas ngan bug-os nga kalibutan, nag-aanak han sitwasyon nga kinahanglan gud umato han mga tinalumpigos nga klase ngan sektor agud depensahan an ira interes. Ginpupukaw hini an hiluag nga katawhan ha panginahanglan para ha rebolusyunaryo nga pagbabag-o ha Pilipinas ngan ha bug-os nga kalibutan. An mga rebolusyunaryo nga pwersa ha pamumuno han Partido Komunista ng Pilipinas determinado nga pukawon, organisahon ngan pagiuson an katawhan Pilipino ha dalan han demokratiko nga rebolusyon han katawhan.

Pakusgon an BHB ngan bug-os-kadasig nga ipasulong an gerra han katawhan!

An waray kasolbaran nga krisis han naghahadi nga sistema nga bagakolonyal ngan bagapyudal, an brutal nga panmuypoy han pasista-terorista nga rehimen US-Marcos, natikagrabe nga lebel han panmilitar nga panginginlabot han US, natikagrabe nga kagutom ngan pag-inantos, ngan natikagrabe nga porma han pananalumpigos ngan paniniyupi an prinsipal nga mga hinungdan nga padayon nga iginpapasulong an demokratiko nga rebolusyon han katawhan. Bug-os an determinasyon han Partido, han Bagong Hukbong Bayan ngan tanan nga rebolusyunaryo nga pwersa nga ipasulong an panmaihaan nga gerra han katawhan tikang ha presente nga yugto ngadto ha masunod.

Padayon nga nagpapakusog an BHB ha kabaryuhan. Dirudiretso hini nga ginpaparayhak an buruhaton masa ngan ginpapahilapad an mga sona nga gerilya. Nagrerekluta ngan nagpapahiara han bag-o nga mga Pula nga mangaraway agud magsugbong han tikadako nga mga buruhaton ha pulitika ngan militar. Dako nga kalurungan an deklarasyon ni Marcos hadton nakalabay nga tuig nga “waray na grupo nga gerilya” ha nasud.

Sugad kadako nga katuyawan an pauru-utro nga deklarasyon han Armed Forces of the Philippines (AFP) ha naglabay nga mga tuig, nga hul-os na hini nga mahuhuman an rebolusyunaryo nga armado nga pakig-away. Usa katuig na liwat an linabay nga waray nira mapatuman an ira gintalaan nga karab-uton. Ha magkalain-lain nga parte han nasud, padayon nga naato an mga yunit gerilya han BHB. Sukwahi ha iya iginrarakudako nga naperdi na an BHB, waray hunong an AFP ha pagdeploy hini han barubatalyon nga mga pankombat nga pwersa tikang norte han Luzon tubtub ha sur han Mindanao, ha maraut nga larang nga puypuyon an masa ngan lipulon an hukbo han katawhan.

Hul-os nga karayhak naton nga igselebrar yana nga adlaw an ika-57 nga anibersaryo han Bagong Hukbong Bayan. Hinumduman naton kun tiunan-o ini igintukod han Partido Komunista ng Pilipinas hadton Marso 29, 1969 ha pinakahitaas nga giya han Marxismo-Leninismo-Maoismo. Tikang han igintukod, an BHB nagserbe nga rebolusyunaryo nga hukbo han katawhan Pilipino para ibagsak an imperyalismo nga US, ngan an makaklase nga paghahadi han mga kumprador burgesya, agaron maytuna ngan mga burukrata kapitalista. An BHB an prinsipal nga instrumento han Partido ha pagpatuman han sentral nga rebolusyunaryo nga buruhaton nga rumpagon ngan ibagsak an armado nga kusog han reaksyunaryo nga estado ngan tukuron an bag-o nga demokratiko nga gubyerno han katawhan.

Mayda la 60 nga Pula nga mangaraway an BHB han tukuron ini ha ikaduha nga distrito han prubinsya han Tarlac. Katin nira hadto an siyam (9) nga riple nga otomatik ngan 26 nga magluya nga armas. Ha pagpupursige nga umabante subay ha estratehiko nga linya han pagpalibot ha kasyudaran tikang ha kabaryuhan, nakapahiluag an BHB, syahan, ha Central Luzon, kasunod ha Cagayan Valley, ngan ha dayuday ha magkalain-lain nga prubinsya han Luzon, Visayas ngan Mindanao.

Waray kan-o man magin ulang ha pagpasulong han rebolusyunaryo nga armado nga pakig-away an pagigin guti ngan maluya nga pwersa han BHB, tanding ha mas dako ngan makusog nga armado nga pwersa han kaaway. Amkon an hiluag ngan hilarum nga suporta han masa, nagpakabatid an mga yunit han BHB ha paggamit han mga ginerilya nga taktika agud barubalitang nga makapagpahiluag ngan makapagpakusog. Pirme katin an inisyatiba ngan paspas nga nagios, nahimo han mga yunit gerilya han BHB nga atakihon an mas magluya ngan nahimumulag nga parte han kaaway, ngan kuhaon an iya mga armas.

Ha sakob han 57 katuig, masobra napulo nga estratehiko nga opensiba o gerra han paglipol na an iginlansar han imperyalismo nga US kabakyang an walo nga niyutiyo nga reakasyunaryo nga gubyerno—tikang kan Marcos Sr tubtub kan Marcos Jr—agud perdihon an BHB: Oplan Nip-in-the-bud, Oplan Katatagan, Oplan Lambat Bitag I, Oplan Lambat Bitag II, Oplan Mamamayan, Oplan Makabayan, Oplan Gordian Knot, Oplan Bantay Laya I, Oplan Bantay Laya II, Oplan Bayanihan, Oplan Kapayapaan, Joint Oplan Kapanatagan, ngan NAP-UPD. Ngatanan ini ginbalayan ha doktrina han counterinsurgency han militar han US. Ngatanan ini mga estratehiko nga kampanya han pagpalibot ha BHB, nga mayda katuyuanan nga ihimulag an hukbo han katawhan ha masa, puypuyon an masa ngan ulangon an agos han suporta hini ha BHB, agud ibutang an mga yunit han hukbo han katawhan ha lus-ay militar nga sitwasyon ngan perdihon hira gamit an superyor nga kusog militar. Hini nga estratehiko nga balayan, kada usa nga oplan nagamit han magkalain-lain nga mga taktika nga mas grabe, mas brutal, mas hiluag tanding ha ginsundan, ngatanan ha giya ngan suporta han imperyalismo nga US.

An ginerilya nga pakigerra taktika han bug-os nga katawhan, diri la han hukbo han katawhan. Pira kabeses man nga mas madako o mas makusog an pasista nga halimaw, diri hini mailob han pira kayukot nga tukob han magpula nga hamtik. Waray pwersa han kaaway an makakaulang ha pag-abante han gerra han katawhan. Ha mahugot nga pagkakaurusa han masa ngan han hukbo han katawhan, barubalitang nga maabante an panmaihaan nga gerra han katawhan ha Pilipinas, makakatirok han kusog ha kabaryuhan tubtub nga kaya na hini nga sakupon an kasyudaran. Napamatud-an ha kasaysayan han mga nasud nga nagdaug an gerra han katawhan kun tiunan-o an gerra han katawhan nagdaug komo usa nga panmasa nga pampulitika nga kagiusan nga iginsusugbong han milyun-milyon nga katawhan, pinaagi prinsipal han armado nga pakig-away, kadungan ngan ginsusuportahan han ngatanan nga porma han pakigbisog.

Pauru-utro nga napamatud-an han BHB nga pinaagi han paggamit han hukbo ngan han masa han mga ginerilya nga taktika han konsentrasyon, dispersal ngan pagbalhin—pagpapakita ha Sinirangan ngan pagbira ha Katundan, pagpapasuntok ha hangin han kaaway, pagbira ha likuran han kaaway, pagbira ha maluya ngan nahimumulag nga parte han kaaway, ngan iba pa—ano man kadako, kaiha ngan kabangis an mga kampanya han hinay-hinay nga pagkubkob ngan paglipol, akos ini pakyason han BHB, ngan ha proseso mahihimo nga magpahiluag ngan magpakusog. Pauru-utro liwat nga napamatud-an ha negatibo nga eksperyensya nga anuman nga pagharukal ha mga prinsipyo ngan ginerilya nga taktika—pagbul-iw ha inisyatiba ngan pagpapasibo, waray ha panahon nga konsentrasyon, pagkukuta ha bukid, self-constriction (pagpahaligot ha kalugaringon) ngan iba pa nga kaluyahan—nahihingadto ha mga kahibangan kun diri man pagkalipol han pira nga parte.

Nahiagum man han gudti ngan dagko nga destroso an BHB ha nakalabay, nahihimo hini nga utro nga umabante ngan magpakusog pinaagi han pagbalik ha pundasyon han mga batakan nga prinsipyo nga iginlatag han Partido. Ha giya han Marxismo-Leninismo-Maoismo, iginlansar naton an kagiusan pagtutul-id hadton 2023 ha katuyuanan nga sumahon ngan kumuha han mga leksyon tikang ha mga nahiaguman nga kahibangan ngan pag-atras bunga han mga internal nga kaluyahan han pagpasulong han gerra han katawhan ngan pag-atubang ha kontra-rebolusyunaryo nga opensiba han kaaway. Ha proseso ginpapahugot naton an aton kasantupan ha mga batakan nga prinsipyo ngan iginsasalikway an sayop nga mga kahiaraan ha nakalabay. Tikang hadto ginhimo naton an ginkikinahanglan nga pagbabag-o ha mga pamaagi han ginerilya nga paggios han hukbo han katawhan ha katuyuanan nga pahugton an sumpayan ngan pagkakaurusa han hukbo han katawhan ngan masa, pahiluagon ngan pakusgon an BHB, igpabilin nga buta ngan bungol an kaaway, pakyason an iya dagko nga operasyon han pagdumog, ngan sorpresahon ini han diri ginlalauman nga mga taktikal nga opensiba ngan ginerilya nga aksyon.

Ha presente nga balitang han gerra han katawhan, kinahanglan naton igpadayon an pagpapasulong han hiluagan ngan sik-on nga ginerilya nga pakigerra basar ha tikahilapad ngan tikahilarum nga base panmasa. Agud mahimo ini, kinahanglan ipasulong naton an hiluagan nga pakigbisog nga pampulitika ngan armado, kadungan an buruhaton nga ngatanan-nga-gapil nga pakusgon an Partido ngan an hukbo, an organisasyon masa, mga organo han pampulitika nga poder ngan an mga yunit han milisya han katawhan ngan grupo nga pandepensa-ha-kalugaringon han masa.

Yawe hini ngatanan an pagpapakusog han Partido. Kinahanglan dugang nga pakusgon an pag-aram ha Marxismo-Leninismo-Maoismo, ha mga batakan nga prinsipyo han Partido, ngan paggamit hini ha pag-aram ha kongkreto nga sitwasyon ngan pagpatuman han mga praktikal nga rebolusyunaryo nga buruhaton. Kinahanglan padayon nga pahilarumon an kagiusan pagtutul-id pinaagi han pagsusuma ngan pag-aases agud igsalikway an empirisismo ngan dogmatismo ha ideolohiya, mga porma han petiburges nga suhetibismo ha pulitika, ngan ultrademokrasya ngan burukratismo ha organisasyon. Kinahanglan pira kapilo naton nga pahiluagon an Partido. Kinahanglan naton tukuron an mga sanga han Partido ha pira kanapulo kayukot nga baryo, eskoylahan, pabrika ngan iba pa nga tawuhon nga dapit ha bug-os nga nasud, ha kasyudaran ngan kabaryuhan, agud seguruhon an hiluag ngan hilarum nga pamumuno han Partido ha milyun-milyon nga katawhan.

Ha kabaryuhan, kinahanglan pahiluagon ngan pakusgon an Pambansang Katipunan ng mga Magbubukid o PKM, ngan iba pa nga rebolusyunaryo nga asosasyon masa ha ranggo han mga kababayin-an ngan kabatan-unan, agud parayhakon an mga kontra-pyudal nga pakigbisog (pagpahimubo ha plete ha tuna, pagpara ha usura, pagpahitaas han suhol, ngan pagbaligya ha makatadungan nga presyo han mga produkto ha uma). Kinahanglan liwat bug-uson an mga rebolusyunaryo nga asosasyon masa ha ranggo han minoriya nga katawhan para ha pagdepensa han katungod ha ansestral nga tuna. Kadungan hini an higluag nga pakigbisog agud depensahan an katungod ngan kaupayan han masa nga parag-uma kontra ha pangagaw ngan panlulupot han tuna, pandambong ngan pagruba ha kalibungan, langyaw nga panmilitar nga panginginlabot, pasista nga panmuypoy ngan pag-iimponer han mga palisiya han balaud militar ngan iba pa nga porma han panraugdaug.

Ginpupukaw, gin-oorganisa ngan ginpapagios han Partido an masa nga parag-uma ha hiluag nga kabaryuhan. Ha sakob han mga sona ngan prente gerilya, nangunguna nga instrumento han Partido an hukbo han katawhan ha pag-oorganisa ngan pagpapagios ha masa, kadungan han pagpapasulong han armado nga pakig-away ngan pagpapahiluag han rebolusyunaryo nga base panmasa. An armado nga pakig-away nasuporta ha mga pakigbisog han masa nga parag-uma, mga parupangisda ngan iba pa nga kablas ha kabaryuhan. An BHB gud la an hinganiban nira kontra ha mga armado nga tawuhan, maton, ngan mga pwersa nga paramilitar ngan militar nga gin-gagamit han naghahadi nga klase kontra ha ira. Tungod ha pursigido nga pagdepensa ha ira han hukbo han katawhan, an masa nga rinaugdaug nagseserbe nga diri nahuhubas nga atabay nga gintitikangan han bag-o nga mga Pula nga mangaraway.

Ha kasyudaran, kinahanglan padayon nga pahiluagon ngan pakusgon an rebolusyunaryo nga kagiusan han mga trabahador, baga-trabahador ngan mga kabatan-unan nga intelektwal, sugad liwat an iba pa nga sektor han petiburgesya ha syudad. Ginbubug-os ngan ginpapakusog an ira mga sikreto nga rebolusyunaryo nga organisasyon masa ngan ginpapagios hira para sumuporta ngan magpartisipar ha armado nga pakig-away ha kabaryuhan. Kadungan hini, ginpapamunuan han Partido an ira mga demokratiko nga pakigbisog agud depensahan an ira mga katungod ngan kaupayan, samtang marayhak nga ginpapapartisipar hira ha mga hiluag nga mga pakigbisog kontra ha pasismo, korapsyon, panmilitar nga panginginlabot han US, mga pakuri nga palisiya nga dikta han langyaw, ngan iba pa nga karukayaknon nga ginkakaatubang han bug-os nga katawhan.

Kinahanglan dirudiretso nga pakusgon an National Democratic Front komo alyansa han mga rebolusyunaryo nga organisasyon masa. An NDF an pinakakonsolidado nga parte han alyansa han mga patriyotiko ngan demokratiko nga klase ngan sektor, nga nagkakaurusa basar ha pagpapasulong han armado nga pakig-away. Basar ha kusog han BHB ngan han NDF, matutukod an mga temporaryo nga alyansa ha pira nga parte han naghahadi nga klase nga nagkikilala ha kusog han rebolusyunaryo nga kagiusan ngan andam makig-usa ha magkalain-lain nga panahon ngan porma. Ha presente, ginbubug-os naton an pinakahilapad nga nagkakaurusa nga prente kontra ha naghahadi nga barkadahan nga Marcos ngan Duterte, nga yana ngaduha nga nagtataglawas ha pinakareaksyunaryo ngan pinakapasista nga paksyon han naghahadi nga klase. Kinahanglan bug-os-kusog nga ihimulag, atuhan ngan patalsikon an naghahadi nga rehimen US-Marcos nga prinsipal nga nagpapakuri ngan nanmumuypoy ha katawhan.

Ha butnga han krisis han naghahadi nga sistema nga nagdadara han waray katupong nga pag-inantos ha hiluag nga masa han katawhan, mas natikaklaro an panginahanglan nga umabante ha dalan han gerra han katawhan. Pinakalandaw ini ha mga kabatan-unan nga naghihingyap nga bag-uhon an sistema ngan tukuron an bag-o nga kapalaran han nasud. Hi Marcos mismo, pinaagi han negatibo nga pananglitan, an nagduduso ha ira nga umato ngan kumatin han armas. Ha naglabay nga tuig, nakit-an naton an tikadamo nga mga kabatan-unan, ngaduha ha kabaryuhan ngan kasyudaran, nga nabaton ha panawagan nga sumuporta ngan umapi ha Bagong Hukbong Bayan. Dirudiretso nga nadudugngan hin bag-o nga dugo an BHB nga nahatag dinhi han bag-o nga rayhak para ha pagpapasulong han armado nga pakig-away.

Bug-os an determinasyon han ngatanan han yunit han Bagong Hukbong Bayan, kaupod an mga milisya han katawhan, nga iglansar an maaakos hini nga igdaug nga mga taktikal nga opensiba o ginerilya nga aksyon kontra ha maluya, pagal o nahimumulag nga mga yunit o elemento han kaaway, agud kuhaon an ira mga armas agud armasan an bag-o nga mga Pula nga mangaraway. Target liwat han BHB an mga armado nga tawuhan han mga despotiko nga agaron maytuna nga nananarhug ha masa. Kinahanglan gihap himuon an haum nga mga pitad agud ipatuman an desisyon han mga husgado han katawhan kontra ha mga pasista nga lunod-patay ngan kriminal nga ahente han kaaway. Atubangan han natikadako nga mga kalamidad ha klima, kinahanglan liwat gumios an BHB komo tagdepensa han kalibungan ngan iglansar an mga ginerilya nga aksyon kontra ha mga mapandambong ngan mapanhibang nga empresa.

Hul-os an determinasyon han Partido ngan Bagong Hukbong Bayan nga bug-os-kusog nga ipasulong an panmaihaan nga gerra han katawhan. Labina yana atubangan han natikagrabe nga pan-gegerra han US nga namamangpangan nga danason an bug-os nga kalibutan ha alimpuros han imperyalista nga gerra, mahugot gud an panginahanglan nga labaw nga parayhakon an gerra han katawhan agud batunon an natikahilarum nga paghiningyap han katawhan Pilipino nga makaalinggawas ha gunit han imperyalismo nga US ngan makab-ot an tinuod nga nasyunal nga katalwasan ngan demokrasya.

An panmaihaan nga gerra han katawhan usa nga mapawa nga sulo nga nagdadara han kapawa ngan paglaum ha katawhan Pilipino, ngan nagseserbe nga inspirasyon ngan susbaranan para ha gatus-gatos kamilyon nga tinalumpigos ngan gintitiyupi nga mga trabahador ngan parag-uma ha bug-os nga kalibutan. Ini an dakila nga amot han proletaryo nga Pilipino ha pankalibutan nga pakigbisog agud tapuson an imperyalismo ngan ipasulong an rebolusyon agud kab-uton an katalwasan, demokrasya ngan sosyalismo.

Ibagsak an imperyalismo, pyudalismo ngan burukrata kapitalismo!

Ipasulong an demokratiko nga rebolusyon han katawhan!

Umabante ha dalan han panmaihaan nga gerra han katawhan!

Mabuhay an klase nga trabahador ngan katawhan Pilipino!

Igpalaypakay an Pula nga bandera han armado nga pakig-away!

Mabuhay an ika-57 nga anibersaryo han Bagong Hukbong Bayan!

Mabuhay an Partido Komunista ng Pilipinas!