Masadyaong gipasidunggan sa Komite Sentral sa Partido Komunista sa Pilipinas ang tanang banggiitang Pulang manggugubat ug kumander sa Bagong Hukbong Bayan niining makasaysayanong adlaw, ang ika-57 ka tuig nga anibersaryo sa pagtukod sa tinuod nga hukbo sa dinaogdaog nga katawhan. Niining adlawa, magbalik-lantaw kita sa dasig nga pag-asdang sa rebolusyonaryong armadong pakigbisog aron maangkon ang nasunong kagawasan ug tinuod nga demokrasya. Kutluon nato ang mga leksyon gikan sa lungtad natong pagbagtas sa liko-liko nga dalan sa mga pagsulong ug pag-atras, kapakyasan ug kadaugan.

Saluduhan nato ang tanang bayani ug martir sa katawhang Pilipino nga walay piling naghalad sa ilang kinabuhi alang sa dungganong tumong nga ilingkawas ang nasud gikan sa imperyalistang paghari ug sa tanang porma sa pagpangdaogdaog ug pagpanghimulos sa mga lokal nga hut-ong. Utang nato sa ilang sakripisyo ang tanang nakab-ot sa katawhan sa dalan sa rebolusyonaryong pagsukol. Dili gayud mapapha sa handumanan sa katawhan ang ilang mga ngalan ug kontribusyon. Sila ang nagsidlak nga mga bituon nga nagsilbing suga sa kangitngit nga gitabok sa nasud padulong sa Pulang kaadlawon.

Angay lang nga saulogon nato ang atong mga kadaugan sa pag-asdang sa rebolusyonaryong armadong pakigbisog sa miaging tuig, samtang matinagdanong gakutlo og mga leksyon gikan sa nasinati nga mga kapait. Kinahanglan huptan nato kini sa atong pagsulong sa dalan sa pagpalig-on ug pag-asdang sa atong gubat sa katawhan.

Padayon nga gibayaw sa BHB ang Pulang bandera sa rebolusyonaryong armadong pakigbisog. Sa ilalum sa pagpangulo sa Partido ug sa giya sa kalihukang pagtul-id, padayon nga gipakyas sa BHB ang walay puas nga pasistang pagpangatake sa mga armadong alagad sa papet nga rehimen ni Marcos batok sa hukbo sa katawhan ug sa katawhan nga nanglimbasog sa kabanikanhan ug kasyudaran. Sa pagpangulo sa Partido, ug atubangan sa labi pang grabe nga kahimtang sa nasud, labi pang milig-on ug mitaas ang rebolusyonaryong kadasig ug determinasyon sa mga Pulang manggugubat sa BHB nga ipakigbisog ug panalipdan ang masang dinaogdaog ug gipahimuslan.

Sukad gilunsad ang kalihukang pagtul-id, mas daghan na ang atong positibong kasinatian kaysa negatibo. Bisan pa nakasinati og kadaot ang pipila ka yunit, mas daghan ang mga yunit sa BHB nga nakapreserbar sa ilang kusog, nakapalapad sa erya sa operasyon, nakapalapad sa baseng masa, nakarekrut og bag-ong mga Pulang manggugubat, ug malamposong nakalunsad og lain-laing tipo sa taktikal nga opensiba ug armadong aksyong gerilya. Hinay-hinay natong gipatuman ang pagpahapsay sa moda o paagi sa gerilyang paglihok aron mapahugot ang relasyon sa masa samtang nagpakahanas aron malikyan ug ikyasan ang bagang presensya sa kaaway. Lig-ong nagpakusog pag-usab ang BHB, ug naglantaw kini sa pag-usbaw sa umalabot nga mga panahon. Sama sa pagsaka ngadto sa pungkay sa bukid, hingpit ang determinasyon sa Partido ug BHB nga bagtason ang liko-liko, lisod ug delikado nga dalan padulong sa rebolusyonaryong pag-usbaw.

Matag adlaw, nagkagrabe ang pag-antos sa katawhan taliwala sa imperyalistang gera ug krisis. Ang tibuok kalibutan gitay-og sa mga gubat nga giduslitan sa imperyalismong US aron ilogon ang mga nasud nga bahandianon sa lana ug mineral. Bahin kini sa mga desperado nga lakang aron palanaton ang kapitalistang produksyon ug produksyong militar. Apan sa proseso, labi lamang niining gipakunhod ang nagbiaw (stagnant) nga kalibutanong kapitalistang ekonomiya. Taliwala sa mga gerang agresyon sa US, midako ang hulga sa pagbuto sa mas dagko pang gera sa umalabot.

Walay puas ang pagyatak sa imperyalismong US sa kagawasan sa Pilipinas, sa nataran sa militar, ekonomiya ug politika, pinaagi sa ilang masinugtanong itoy nga si Marcos. Gitugotan ni Marcos nga gamiton sa militar sa US ang nasud isip base ug lansaran sa agresyong militar sa Asia-Pacific hangtod sa Middle East, kabaylo sa militar nga tabang ug politikal nga suporta sa iyang korap ug gikasilagang rehimen.

Sa ilalum ni Marcos, walay katapusan ang korapsyon sa mga burukata-kapitalista nga naa sa gahum, ingon man ang pyudal ug semi-pyudal nga mga porma sa pagpahimulos sa kabanikanhan, ang pagpangilog sa yuta ug panginabuhi, ang pagpangawkaw sa natural nga rekurso sa nasud sa mga dagko nga kapitalista ug ang pagpahimulos sa barato nga kusog-pamuo, ang paggun-ub sa kinaiyahan ug resulta niining kaylap nga pagkaguba sa kinabuhi ug panginabuhi sa masa. Ang nagkagrabe ug walay kalooy nga paggamit sa pasistang kabangis maoy timailhan sa desperasyon sa rehimeng US-Marcos nga ipreserba ang dunot nga sistema pinaagi sa paggamit og terror ug armadong pagpanumpo sa misukol nga katawhan. Ang panginahanglan alang sa rebolusyonaryong pakigbisog labaw pang mitataw. Alang sa katawhan, ang pag-armas makatarunganon ug gikinahanglan.

Bisan pa dako ug makalilisang kung tan-awon ang panggawas nga dagway sa pasistang mangtas nga papet nga estado tungod sa kadaghan sa iyang tropa, bag-o ug kusgan nga mga armas, ug pagbubo sa suporta gikan sa iyang agalon nga imperyalista—nasayod kita nga, sa esensya, huyang kini ug gabok. Kini usa ka baklag nga tuybo ug tigpanalipod sa nagkadunot nga sistema, puno sa lawom nga mga gintang tungod sa magkaribal nga mga paksyon, ug gikasilagan ug gisalikway sa katawhan. Samtang ang BHB nagpabiling gamay ug relatibong huyang, kini lig-ong nagkahiusa sa husto nga pagpangulo sa Partido, determinadong molapad ug magpalig-on sa kaugalingon subay sa lawom ug lapad nga suporta sa masa. Kauban sa nagkagrabe nga pagsukol ug pakigbisog sa katawhan, ang Partido ug ang BHB hingpit nga determinadong i-asdang ang demokratikong rebolusyon sa katawhan nga adunay mas taas nga ang-ang sa kaisog ug kabangis.

Gitay-og sa imperyalistang gera sa US ang tibuok kalibutan

Sulod sa duha ka bulan pa lang gikan sa pagsugod sa tuig, giatake na sa mga pwerang militar sa imperyalismong US, sa mando sa buang niining pasistang lider nga si Donald Trump—ang duha ka nasud nga dugay nang nanalipod sa ilang nasudnong kagawasan ug misukol sa imperyalistang kontrol ug paghari. Ang kahakog ni Trump sa dakong bahandi sa lana sa Venezuela ug Iran—mga nasud nga adunay pinakadako ug ikatulong pinakadako nga reserba sa lana sa kalibutan—mao ang tinuod nga tumong sa iyang mga gerang agresyon.

Giatake sa mga pwersang militar sa US ang Venezuela niadtong Enero 3 ug gidagit ang presidente niini nga si Nicolas Maduro ug asawa niyang si Cilia Flores, aron pugos na paluhuron ang gubyerno ug dawaton ang mga mando niini nga ipakontrol sa mga korporasyon Amerikano ang industriya sa lana sa nasud. Wala pay duha ka bulan, dungan nga gibomba sa US ug Zionistang estado sa Israel ang Iran niadtong Pebrero 28, ug gihimo ang operasyon sa asasinasyon batok sa lider niini nga si Ayatolla Ali Khamenei. Deklarado nga tumong ni Trump ang mang-aghat sa pag-alsa sa katawhan sa Iran, aron ipwesto sa gahum ang bag-ong gubyernong moluhod sa gahum sa US.

Sa samang panahon, dayag nga gihulga sa US nga sulungon sa mga armadong pwersa niini ang Cuba, Colombia, ug Mexico, nga daw nanulay kung kinsa ang moatras ug moluhod sa iyang mando, o hangtud asa niya makaya dad-on ang hulga sa pagpanulong. Sa wala pa kini, gihulga usab si Trump nga “angkonon pag-usab” ang Panama Canal. Subay kini tanan sa iyang pagbuhi pag-usab sa Doktrinang Monroe nga nag-angkon sa Latin America isip kaugalingong nataran sa US. Dungan niini, naghulga si Trump nga pugos nga ilogon ang Greenland, usa ka dako nga isla sa Arctic ug North Atlantic Ocean.

Sulod sa 25 ka adlaw, naghulog ang US ug Israel og dili moubos sa 23,000 bomba sa Iran, o kapin sa 920 bomba kada adlaw. Halos 2,000 Iranian ang napatay, lakip ang gatusan ka mga bata, ug 24,800 ang naangol sukad nagsugod ang pagpamomba sa US ug Israel. Gitarget sa pagpamomba dili lang ang mga pasilidad sa militar, kondili apil ang mga eskwelahan, balay, bilding pangkomersyo, ospital, mga planta sa enerhiya ug nukleyar, ug uban pang imprastrukturang sibilyan, sa tinguhang ipailalom ug paluhuron ang Iran sa gamhanan sa imperyalismong US, ug isurender niini ang bahanding lana ug nasudnong soberanya.

Ang armadong pagpanulong sa imperyalismong US sa Venezuela ug Iran mao ang timailhan sa bag-ong ang-ang sa paggrabi sa mga kontradiksyon tali sa mga imperyalista ug sa mga nasud nga nagbarug sa nasudnong soberanya, nga may kalabotan usab sa paggrabi sa inter-imperyalistang kontradiksyon. Dayag nga gihagit ug gustong bag-uhon ni Trump, sa ngalan sa mga monopolyo kapitalistang Amerikano, ang kasamtangang han-ay sa kalibutan sa milabayng tulo ka dekada—ang pagbahin tali sa mga imperyalista sa mga tinubdan sa lana ug uban pang mahinungdanong hilaw nga materyales, han-okanan sa sobra nga imbentaryo sa dili mabaligya nga mga pamatigayon, ug butanganan sa sobra nga kapital.

Kusganong gikundena sa China ug Russia ang armadong pagpangatake sa US sa Venezuela ug Iran. Atubangan sa grabeng kadaot nga natagamtam sa Iran tungod sa pagpamomba sa US, nagpadala pareho ang China ug Russia og tawhanong tabang. Nagpadayag ang Russia ug lain-laing nasud ug internasyunal nga ahensya og pagkabalaka sa pagtarget sa US sa mga plantang nukleyar nga mahimong magresulta sa kaalaot sa minilyong katawhan.

Ang pagpangatake sa US sa Venezuela ug Iran nagpasiugda usab og grabeng kabalaka sa mga kaalyadong nasud sa US, lakip ang mga sakop sa North Atlantic Treaty Organization (NATO). Daghan kanila ang mikundena sa paglapas sa US sa mga internasyunal nga lagda ug mga prinsipyo sa United Nations, pero wala sila dayag nga mikontra, ug sa katapusan nakighiusa sa tumong nga ibagsak ang mga gubyerno nga misukol sa imperyalistang dikta ug kontrol. Bisan pa, hilabihan silang nabalaka nga ang pag-inusara sa imperyalismong US moresulta sa labi pang pagdako sa rekurso nga gikontrol sa US, nga mag-usab sa kanhi balanse sa wala pa ang mga agresyong militar sa US. Sa wala pa kini, nagmugna usab og pintas nga mga kontradiksyon ang pagpahamtang sa US og tag-as nga taripa niadtong milabayng tuig sa lain-laing nasud sa kalibutan, pareho sa mga imperyalistang karibal ug kaalyado.

Ang mga agresyong militar sa US sa Venezuela ug Iran aron ilogon ang lana mga di direkta nga mga atake usab sa numero uno niining karibal nga China, nga maoy nanguna sa tigpalit sa lana nga gi-eksport sa maong mga nasud (15%–20% sa lana nga giimport sa China gikan sa 80%–90% sa langis nga gi-eksport sa Iran ug Venezuela). Ang pagsulayng ilogon ang dagkong tinubdan sa lana kabahin sa mga lakang pagpamig-ot sa US nga migrabe sa milabayng pipila ka tuig. Lakip niini ang pagpasaka sa taripa sa mga import gikan sa China, pagbawal sa paggamit sa mga pyesa elektroniko nga gihimo sa kumpanya sa China nga Huawei, pagbawal sa pagbaligya sa China sa abante nga semiconductor ug sa mga makina alang sa produksyon niini, ug uban pang mga lakang sa ekonomiya ug pamatigayon.

Dungan niini ang walay hunong nga pagpalig-on sa US sa iyang presensya sa “first island chain” sa palibot sa China, lakip ang pagbutang ug pagpalig-on sa presensyang militar sa iyang pwersa ug gamit iggugubat sa Pilipinas, Japan, ug South Korea, ug pagbaligya og armas sa Taiwan, sa takuban sa “pagpugong” (containment) sa giingong “potensyal nga operasyong militar” sa China sa Taiwan. Tanan kini mihagit sa balos nga pagpangandam ug pagpalig-on sa China, lakip ang pagpalapad sa presensya niini sa sulod ug gawas sa kadagatan sa palibot sa nasud.

Migasto ang militar sa US ug labaw sa $1 bilyon matag adlaw sa walay puas nga pagpamomba sa Iran. Nag-unang nakabenepisyo niini ang mga kumpanya nga nagsuplay sa mga armas ug gamit iggugubat sa militar sa US. Nangayo karon ang gubyernong Trump og dugang $200 bilyon aron mosulod sa bag-ong mga kontrata sa maong mga kumpanya alang sa dugang nga mga misayl, drone, ug uban pang gamit iggugubat.

Sukwahi sa unang plano sa US, ang pagpangatake niini sa Iran milungtad na sa usa ka bulan. Samtang nagpadayon, labi pang misamot ang pagsukol dinhi sulod sa US ug sa lain-laing nasud. Nagpasiugda kini og grabeng ispekulasyon sa presyo sa lana (gikan $65 ngadto sa $105 matag bariles sa krudo nga lana) nga miresulta sa “oil price shock” sa tibuok kalibutan, sa kaayohan sa dagkong kumpanya sa lana. Kaylap karon ang kahadlok nga moabot sa resesyon ug stagplasyon (taas nga implasyon, ubos nga produksyon ug kaylap nga disempleyo) ang daghang ekonomiya, lakip na ang US, labi na kung magpadayon pa ang gera sa US ug Israel batok sa Iran, ug magpabiling taas ang presyo sa krudo nga lana.

Bisan sa atubangan sa pagpangatake sa pinakagamhanang imperyalista sa tibuok kalibutan, wala miluhod ang katawhan sa Venezuela ug Iran. Minilyong Venezuelan ang midagsang sa kadalanan sa lain-laing lungsod aron kundenahon ang armadong pagsalakay ug pagpamomba sa US ug ipanghingusog nga ibalik sa ilang nasud ang ilang presidente nga si Maduro. Sama usab sa Iran, halos matag adlaw napuno ang mga plasa ug kadalanan sa minilyong nagdagsang sa mga demonstrasyon aron ipakita ang ilang panaghiusa, kundenasyon sa armadong agresyon sa US ug suklan sa pagsulay nga ipwesto sa gahum ang gubyernong mosilbi sa interes sa US.

Sa pagkakaron wala pa’y klaro kung unsaon sa US ug Israel tapuson ang ilang gerang agresyon batok sa Iran, labi na human napakyas silang kab-oton ang ilang gitakda nga tumong nga ipasurender ang Iran. Timaan sa grabeng pagkabulag sa imperyalismong US, wala makuha ni Trump ang suporta sa iyang mga imperyalistang kaalyado sa Europe nga magpadala og pwersang militar aron abrihan ang Strait of Hormuz. Timailhan nga molanat ang gera, moabot sa 50,000 sundalong Amerikano ang padulong karon sa rehiyon.

Sulod sa usa ka bulan, padayon usab nga naglunsad ang Iran og mga balos-atake pinaagi sa mga misayl ug drone nga mitarget sa Israel, ug sa mga base militar sa US sa mga nasud sa Middle East. Gimakmak sa UAE, Saudi Arabia, Bahrain, Qatar, Kuwait ug Jordan ang mga aksyon sa Iran isip “lapas sa soberanya,” pero mibalibad sila nga “madala sa gera nga dili ila.” Sigurado nga ma-usab pa ang kahimtang sa gera kung molanat kini, labi na kung motugpa diretso sa teritoryo sa Iran ang mga tropang Amerikano.

Atubangan sa nagpadayong krisis sa kalibutanong sistemang kapitalista, damhon nga magpadayon ug labi pang mosamot ang mga gerang agresyon sa US sa umalabot nga mga bulan ug tuig. Gipakita na ni Trump nga dili mapugngan ang iyang gubyerno sa bisan unsang internasyunal nga lagda, o bisan sa ligal nga proseso sa gubyernong US para sa paglunsad og gera. Gipakita ni Trump nga ang iyang pagkabuang walay utlanan. Sa kahakog nga ilogon ang kontrol sa rekurso sa lana ug mga estratehikong mineral sa ubang nasud, ug sumpuon ang mga imperyalistang karibal, labi na ang China, dili layo nga mobuto ang labi pang dagkong armadong panagbangi sa dili madugay nga panahon. Ang grabeng pag-antos nga dala niini sa mga dinaogdaog nga katawhan sa tibuok kalibutan mopukaw sa ilang kahimatngong anti-imperyalista ug modasig sa ilang determinasyon nga mosukol alang sa kagawasan.

Midaus-os sa krisis ang dunot nga nagharing sistema sa Pilipinas

Paspas nga midaus-os ang kahimtang sa pamuyo sa lapad nga masa sa katawhang Pilipino samtang labi pang midaus-os ngadto sa mas lawom ug grabe nga krisis ang naghari nga malakolonyal ug malapyudal nga sistema sa Pilipinas. Kini tungod sa pagsirit sa presyo sa lana human sa pagpanggera sa imperyalismong US sa Middle East. Dugang pang nabutyag ang atrasado nga kondisyon sa lokal nga ekonomiya o sistema sa produksyon nga nagsalig sa importasyon ug langyawng pautang. Dugang usab nabutyag ang responsibildad sa reaksyunaryong gubyernong Marcos sa nagkagrabe nga kahimtang sa kinabuhi sa kadaghanan sa katawhan, pinaagi sa iyang pagpabor sa interes sa mga langyawng kumpanya ug sa iyang mga kakonsabo nga dagkong burges kumprador ug burukratang kapitalista.

Sobrang kapit-os sa katawhang Pilipino ang dala sa pagpahimulos sa mga hakog-sa-kita nga kumpanya sa lana sa gera sa Middle East. Dungan-dungan nga gipasaka sa wala pa naabot nga taas nga lebel ang presyo sa mga produktong petrolyo. Labihan nga gipasirit ang presyo sa diesel nga nag-unang gigamit sa transportasyon, enerhiya ug komersyo. Ang dinagkong kita nga giangkon sa mga kumpanya sa lana maoy bug-at nga palas-anon sa masa nga nagsugakod sa matag pagtaas sa presyo. Dugang pa nga palas-anon sa katawhan ang patong-patong nga buhis nga gisingil sa gubyerno (excise ug value-added tax o VAT) nga moabot sa ₱160 bilyon matag tuig, nga halos 60% sa tinuig nga koleksyon nga ₱276 bilyon gikan sa kombinasyon sa duha ka buhis.

Ang walay hunong nga pagsaka sa presyo sa lana sukad sa sinugdanan sa tuig ug ang pagsirit sukad Marso miresulta sa padayon nga pagsaka sa presyo sa pagkaon ug uban pang batakang panginahanglanon, plete, balayronon sa kuryente, tubig ug uban pang serbisyo. Adunay hulga sa labi pang pagtaas sa mga presyo sa mga palaliton tungod sa pagbagsak sa bili sa piso batok dolyar sa pinaka-ubos nga lebel sa kasaysayan (₱60.5 kada dolyar). Una nga maigo niini ang masang anakpawis.

Paspas nga midaus-os ang kahimtang sa pamuyo sa kadaghanan sa katawhan—ang mga mamumuo, mag-uuma ug mga ordinaryong empleyado, nga walay o halos walay nadaginot ug nabuhi sa usa ka kahig-usa ka tuka. Kung magpadayon ang pagsaka sa presyo sa mga mosunod nga bulan, gibanabanang 2–3 milyong pamilya ang madugang sa 14.3 milyong pamilya nga nabuhi sa katimawa. Taliwala sa gerang agresyon sa US batok sa Iran, nabalaka ang kapin duha ka milyong migranteng mamumuo nga nagtrabaho sa nagkalain-laing nasud sa Middle East. Liboan na ang mipili mouli bisan wala silay maabtang trabaho o kabuhi sa nasud.

Ang pagsirit sa presyo sa lana labi pang magpakunhod sa panginabuhi sa masang Pilipino. Tungod sa pagtaas sa gasto sa produksyon, mikunhod ang kita sa mga drayber ug opereytor sa gagmay nga transportasyon, ingon man sa mga mangingisda, mga mag-uuma, gagmay nga tindero, negosyante ug mga manininda, mga nagpatrabaho sa kantina o karinderya, ug daghan pa. Labi pang mogamay ang bili sa suhol sa mga mamumuo tungod sa nagtaas nga gasto sa pamuyo. Taliwala sa kusog nga pagmakmak sa ubos nga suhol, padayon nga nagpabungol-bungol ang rehimeng Marcos sa dugay nang pangayo alang sa makabuhi nga minimum nga suhol nga ₱1,200 kada adlaw.

Dakong paantos sa katawhan ang kontrol sa kartel o kunsabohay sa pipila ka hakog nga dagkong kumpanya sa lana sa lokal nga distribusyon sa mga produktong petrolyo. Sukwahi sa saad sa balaod sa deregulasyon (1998) nga mokunhod ang presyo tungod sa kompetisyon, gisabutan matag semana sa pinakadagkong kumpanya sa lana ang presyo para sa maksimum nilang tubo. Walay nasudnong industriya sa lana sa Pilipinas. Imbis nga molambo, labi pang mihuyang ang lokal nga kapasidad sa produksyon sa repinadong lana. Bisan adunay natural gas sa mga kadagatan sa palibot sa Pilipinas, sama sa Malampaya, kini anaa sa kontrol sa dagkong burgesya kumprador ug kasosyo nga langyawng kapitalista sa pinansya.

Ang lokal nga industriya sa lana maoy salamin sa kinatibuk-ang kahimtang sa ekonomiya sa Pilipinas, nga giharian ug kontrolado sa mga langyawng kumpanya, kakunsabo ang dagkong burgesyang komprador, dagkong agalong yutaan ug burukratang kapitalista. Kakunsabo ang papet nga rehimen nga tigpatuman sa mga neoliberal nga palisiya nga gimando sa International Monetary Fund, gibabagan sa mga langyawng kumpanya ang paglambo sa lokal nga produksyon.

Ang ekonomiya sa Pilipinas nagpabiling atrasado, agraryo ug dili industriyalisado. Ang mga kinaiyanhong bahandi sa nasud—gikan sa kabukiran hangtud sa kadagatan—gikawkaw ug giilog sa mga langyawng monopolyo kapitalista ug sa mga nagharing hut-ong. Gipahimuslan ang ubos nga suhol sa mga mamumuo nga Pilipino. Ang gihakohako nga tubo wala gibalik sa pagpalapad ug pagpalambo sa lokal nga produksyon. Nagsalig ang lokal nga produksyon sa pag-import sa mga makinarya, pyesa ug uban pang sangkap sa produksyon, ug nagduso sa pag-eksport sa barato nga hilaw o bahin-bahin nga giproseso nga materyales (mineral, prutas), ug sa subling pag-eksport sa pamatigayon nga ubos nga dugang bili (sama sa mga semiconductor ug uban pang pyesang elektroniko).

Sa ilalum ni Marcos, labi pang nalunod sa utang ang Pilipinas. Walay kaparis sa miaging panahon ang kasamtangang langyawng utang nga mikabat na sa $99.1 bilyon (₱5.81 trilyon), halos upat ka pilo kumpara sa langyawng utang ($26 bilyon) nga gibiyaan ni Marcos Sr. niadtong 1986. Ang langyawng utang sa Pilipinas kabahin sa ₱18.13 trilyon kinatibuk-ang utang sa nasud niadtong Enero 2026, pinakataas sa kasaysayan. Ang langyawng utang, kauban ang dolyar nga gi-remit sa mga migranteng mamumuo, ang ginahimong bayad sa depisito sa pamatigayon sa gawas ($50–$60 bilyon sa miaging mga tuig), nga resulta sa dili patas nga binayloay sa gi-eksport nga baratong hilaw nga materyales, ug sa gi-import nga mas mahal nga ginama nang mga pamatigayon. Kini mao ang nagpuno sa depisito sa badyet o kakulang sa pondo sa gubyerno, nga dakong bahin gigahin sa mga maaanomalyang proyekto sa imprastruktura, grabe ka dako nga gasto sa militar ug bayad-utang.

Labi pang migrabe ug walay ulaw ang mga porma sa korapsyon sa nagharing sistema ilalum sa rehimeng US-Marcos. Pinakagrabe niini ang nabutyag nga maaanomalyang proyekto sa flood control ug uban pang imprastruktura, diin binilyong piso ang gibulsa sa mga burukrata-kapitalistang upisyal sa gubyerno. Bag-o lang, nabutyag nga si Marcos mismo maoy utok sa likod niining iskema. Kakunsabo ang pipila ka yaweng upisyal sa Malacañang, gibanabanang mokabat sa ₱8 bilyon ang direktang gibulsa ni Marcos sa porma sa mga kikbak. Gawas sa pipila ka ubos nga upisyal, wala pa’y napreso o gisang-atan og kaso nga taas nga upisyal nga ginganlan nga kalabot sa mga anomalya. Sama sa gilauman, walay resulta ang “imbestigasyon” sa ICI o Independent Commission on Infrastructure nga gitukod ni Marcos. Si Marcos mismo milusot sa pagpanubag. Ang kaso sa impeachment batok kaniya paspas nga gibasura sa mga kongresistang naa sa iyang bulsa.

Samtang, paspas nga gipahigayon sa House of Representatives ang pagpasaka sa kaso sa impeachment ug pagpahigayon og pagdungog batok kang Bise Presidente Sara Duterte, kalabot sa maaanomalyang paggasto sa ₱612.5 milyon nga intelligence funds, dili masabtan nga pagdako sa personal nga pagkaadunahan ug uban pang reklamo. Sa pagpangita sa hustisya, dugay nang giduso sa katawhan ang pagpanubag kang Sara Duterte ug sa iyang amahang kanhi presidente nga si Rodrigo Duterte. Nalipay ang liboan ka pamilya sa mga biktima sa kabangis sa estado ilalum ni Duterte sa gihimong pagdungog kaniya bag-o lang sa International Criminal Court sa The Hague aron kumpirmahon ang mga pasangil batok kaniya. Samtang gipapanubag sa katawhan ang mga Duterte, nasayod sila nga gigamit usab kini sa nagharing pundok ni Marcos ang presyur kang Sara Duterte ug sa pagdiskaril sa deklaradong plano sa karibal nga modagan sa eleksyon sa pagkapresidente sa 2028. Bisan layo pa kini, nakatutok na ang atensyon sa mga reaksyunaryong partido sa mga aregluhan, maniobra ug paggrupo-grupo sa mga paksyon.

Grabeng gikasilagan sa katawhang Pilipino ang korapsyon sa mga burukrata-kapitalista sa bisan unsang pundok sa mga nagharing hut-ong, nga dayag ang pagpangawkaw ug pagpangawat sa kwarta sa nasud, bisan taliwala sa nagkagrabe nga pag-antos sa masang anakpawis. Dili masukod ang kasuko sa katawhan, ilabi na sa mini o palpak nga mga proyekto sa flood control, nga gikawatan og binilyong piso, labi na atubangan sa sunod-sunod nga kalamidad tungod sa mga baha ug pagdahili sa yuta. Nasayod sila nga labaw pa sa flood control, daghan pa’y ubang iskema sa korapsyon sa ilalum sa dunot nga gubyerno, gikan sa nabutyag nga maaanomalyang proyekto sa “farm-to-market road” hangtud sa pagpalit sa mga trak sa bumbero.

Misulbong sa miaging tuig ang kasuko sa katawhan sa korapsyon. Sulod sa pipila ka bulan, balik-balik nga nag-walk-out ang mga estudyante gikan sa ilang mga eskwelahan ug pabalik-balik nga nagrali sa dalan ang linibong katawhan aron magprotesta sa nagkalain-laing bahin sa nasud. Bisan pa pugos na gipanalipdan si Marcos sa mga grupong sosyal-demokrata nga kaalyado niya ubos sa pagpangulo sa Akbayan, wala niini natabunan ang kusog nga singgit sa lapad nga han-ay sa kabatan-onan alang sa pagpatalsik kang Marcos ug Duterte, ug sa panawagan alang sa pagbag-o sa dunot nga sistema.

Ang mitumaw nga kalihukang protesta padayong mibwelo atubangan sa paspas nga pagdaus-os sa panginabuhi sa katawhan. Ang mga mibarug ug nagprotesta batok sa korapsyon sa miaging tuig nagpadayon sa pagbarug ug pagprotesta karong Marso. Misulbong ang sunod-sunod nga mga lihok protesta ug tigil-pasada sa tibuok nasud aron makmakon ang imperyalistang gera sa US batok sa Iran, kundenahon ang mapahimuslanong mga kompanya sa lana sa sobra-sobra nilang pagpasaka sa presyo sa diesel ug gasolina, ug kundenahon ang rehimeng US-Marcos sa kawalay-pulos niini atubangan sa krisis ug sa pagpabungol-bungol sa mga pangayo sa katawhan.

Sa tumong nga pugngan ang pagbwelo sa kalihukang protesta, padayon nga gigamit sa rehimeng US-Marcos ang mga armadong sagabay niini aron pig-oton ug hadlokon ang mga lider ug mga organisasyon sa nagkalain-laing sektor, magpakaylap og mga armadong pwersa ug mga ahente militar sa mga komunidad, kampus ug mga pabrika, ug sumpoon ang mga protesta sa masa sa kadalanan. Gigamit niini ang “terorista” nga pagbansag ug ang hulga sa pagpreso o pagdagit. Bahin kini tanan sa giingon nga “panaghiusa, kalinaw ug kalambuan” nga gilakipan usab og armadong pagpanumpo sa kabanikanhan ug mga operasyong pangkombat batok sa mga rebolusyonaryong armadong pwersa, aron hataga’g dalan ang mga langyawng kompanya, kauban ang mga lokal nga naghaharing hut-ong, nga mangilog og yuta, magpahiluna og mga minahan ug uban pang mga operasyong makawkawon ug maggun-ubon sa kinaiyahan.

Todo ang paggamit sa rekurso ug tawo-tawo sa reaksyunaryong rehimeng Marcos sa iyang desperasyon nga gukdon ang pagtapos sa BHB. Sukwahi sa mga deklarasyon nga “mapilde na” kuno ang BHB, nakapakat pa gihapon ang halos tanang batalyong pangkombat sa AFP sa mga natarang gerilya sa tibuok nasud, aron ipatuman ang ilang gitawag nga “focused military operations” nga gilakipan sa pagpailalom sa mga baryo sa paghari sa balaod militar, pagkontrol sa lihok sa populasyon, pag-blokeyo sa pagkaon ug komersyo, walay puas nga pagpamomba sama sa Mindoro, pagsumpo sa pakigbisog sa mga mag-uuma batok sa pagsulod sa mga operasyong mina sama sa Nueva Vizcaya, ekstrahudisyal nga pagpamatay sa mga gidudahang misuporta sa BHB, mini nga pagpasurender, pagdagit, pagtortyur ug pagpriso, ug uban pang mas daotan nga porma sa pagyatak sa mga tawhanong katungod.

Ang walay hunong nga pagsabwag sa pasistang kalisang sa AFP nahiuyon sa mando sa agalon niining imperyalistang US. Gibu-buan kini sa imperyalismong US og pondo ($250 milyon matag tuig hangtod 2032), gamit militar sa porma sa mga eroplanong iggugubat, bomba ug bala, ug hingpit nga suporta sa paniktik. Laraw sa imperyalismong US nga ipahiluna ang tibuok pwersa sa AFP sa pagsuporta sa mga giplano niining operasyon ug gera sa Asia-Pacific, ilabi na batok sa karibal niining China.

Walay duhaduhang pagaguyuron sa US ang Pilipinas sa bisan unsang gerang agresyon o gerang pagpanghilabot sa Asia. Baga na kaayo ang presensya militar sa US sa nagkadaghang EDCA “site” ug sa mga tagong pasilidad sa US sa nagkalain-laing bahin sa nasud. Taliwala sa gerang agresyon sa US batok sa Iran, liboang pang-atakeng tropang Amerikano ang paga-atimanon ug paga-tabangan sa AFP sa giplano nga Balikatan war exercises. Sakay sila sa ilang denukleyar nga mga barko-de-gera ug dala ang ilang mga armas iggugubat. Ang mga barkong nabal sa US kanunay nga nakadunggo o naglawig sa South China Sea, sa mga dagat sa palibot sa Pilipinas ug sulod sa teritoryo sa nasud. Bahin kini sa estratehiya sa paggamit sa Pilipinas isip dakong base militar ug lansaran sa mga operasyon niini sa rehiyon. Aron pamunuan kining mga operasyon, gitukod sa militar sa US ang Task Force Philippines. Bahin niini ang saywar nga “transparency operations” aron ibutyag ang giingong mga “agresibong maniobra” sa China sa South China Sea aron ipakita nga “higala” ug “kaalyado” sa Pilipinas ang US batok sa China. Sa duso usab sa US, sunod-sunod nga kasabutang militar ang gipirmahan ug pagapirmahan pa sa Pilipinas sa mga alyado sa US sama sa Japan, France, Canada ug uban pang mga nasud.

Ang nagpadayon nga imperyalistang gera sa US batok sa Iran ug ang krisis nga giresulta niini sa Pilipinas ug sa tibuok kalibutan, nagpatumaw sa sitwasyong kinahanglan gayud nga makigbisog ang mga dinaogdaog nga hut-ong ug sektor aron panalipdan ang ilang kaayohan. Gipukaw niini ang lapad nga katawhan sa panginahanglan alang sa rebolusyonaryong pagbag-o sa Pilipinas ug sa tibuok kalibutan. Ang mga rebolusyonaryong pwersa, sa pagpangulo sa Partido Komunista sa Pilipinas, determinadong mopukaw, mag-organsa ug magpalihok sa katawhang Pilipino sa dalan sa demokratikong rebolusyon sa katawhan.

Palig-onon ang BHB ug lagsik nga iasdang ang gubat sa katawhan!

Ang walay solusyong krisis sa nagharing sistemang malakolonyal ug malapyudal, ang bangis nga pagpanumpo sa pasista-teroristang rehimeng US-Marcos, ang nagkagrabeng ang-ang sa militar nga pagpanghilabot sa US, ang nagkagrabe nga gutom ug pag-antos, ug ang nagkagrabeng mga porma sa pagpangdaogdaog ug pagpahimulos mao ang nangunang mga hinungdan sa padayong pag-asdang sa demokratikong rebolusyong sa katawhan. Hingpit ang kabubut-on sa Partido, sa Bagong Hukbong Bayan ug sa tanang rebolusyonaryong pwersa nga i-asdang ang malungtarong gubat sa katawhan gikan sa kasamtangang ang-ang ngadto sa sunod.

Padayon nga mipalig-on ang BHB sa kabanikanhan. Padayon kining dasig nga nagpasiugda sa gimbuhatong masa ug nagpalapad sa mga sonang gerilya. Nagrekrut ug nagbansay kini og bag-ong mga Pulang manggugubat aron moabaga sa nagkadakong mga katungdanan sa pulitika ug militar.

Dako kaayong binuang ang deklarasyon ni Marcos sa miaging tuig nga “wala na’y grupong gerilya” sa nasud. Sama ka dakong binuang ang balik-balik nga deklarasyon sa Armed Forces of the Philippines (AFP) sa miaging mga tuig, nga hingpit na niining napuo na ang rebolusyonaryong armadong pakigbisog. Usa ka tuig na usab ang milabay nga wala nila matuman ang ilang gitakda nga katuyoan. Sa lain-laing bahin sa nasud, padayong nakigsangka ang mga yunit gerilya sa BHB. Sukwahi sa pagpanghambog niini nga napildi na kuno ang BHB, walay hunong ang AFP sa pagdeploy niini og binatalyong mga pwersang pangkombat gikan sa amihanang Luzon hangtod sa habagatang Mindanao, sa dautang laraw nga pig-oton ang masa ug tapuson ang hukbong bayan.

Lagsik natong gisaulog karon ang ika-57 nga anibersaryo sa Bagong Hukbong Bayan. Handumon nato kung giunsa kini gitukod sa Partido Komunista sa Pilipinas niadtong Marso 29, 1969 ubos sa labing taas nga giya sa Marxismo-Leninismo-Maoismo. Sukad sa pagtukod niini, ang BHB nagsilbing rebolusyonaryong hukbo sa katawhang Pilipino aron ibagsak ang imperyalismong US, ug ang maki-hut-ong nga paghari sa mga burgesyang komprador, agalong yutaan ug mga burukratang kapitalista. Ang BHB mao ang nag-unang instrumento sa Partido sa pagtuman sa sentral nga rebolusyonaryong tahas nga dugmokon ug ibagsak ang armadong kusog sa reaksyunaryong estado ug itukod ang bag-ong demokratikong gubyerno sa katawhan.

Adunay 60 ra ka Pulang manggugubat ang BHB sa dihang gitukod kini sa ikaduhang distrito sa probinsya sa Tarlac. Ilang gunit niadtong panahona ang siyam (9) ka ripleng awtomatik ug 26 ka mahuyang nga armas. Sa ilang pagpaningkamot nga moasdang subay sa estratehikong linya sa pagkubkob sa kasyudaran gikan sa kabanikanhan, ang BHB nakapalapad, una sa Central Luzon, sunod sa Cagayan Valley, ug sa ulahi sa nagkalain-laing probinsya sa Luzon, Visayas ug Mindanao.

Bisan kanus-a, wala nahimong babag sa pag-asdang sa rebolusyonaryong armadong pakigbisog ang pagka-gamay ug pagka-huyang sa pwersa sa BHB, tandi sa labi pang dako ug kusgang armadong pwersa sa kaaway. Gunit ang malapad ug lalom nga suporta sa masa, ang mga yunit sa BHB nagpakahanas sa paggamit sa mga taktikang gerilya aron hinay-hinay nga makapalapad ug makapalig-on. Sa kanunayng paghupot sa inisyatiba ug paspas nga lihok, ang mga yunit gerilya sa BHB nakabuntog sa mas mahuyang ug nahibulag nga bahin sa kaaway, ug nakasakmit sa mga armas niini.

Sulod sa 57 ka tuig, kapin napulo na ka estratehikong opensiba o gera sa pagpamig-ot ang gilunsad sa imperyalismong US, dungan ang walo ka papet nga reaksyunaryong gubyerno—gikan kang Marcos Sr. hangtod kang Marcos Jr.—aron mapildi ang BHB: Oplan Nip-in-the-bud, Oplan Katatagan, Oplan Lambat Bitag I, Oplan Lambat Bitag II, Oplan Mamamayan, Oplan Makabayan, Oplan Gordian Knot, Oplan Bantay Laya I, Oplan Bantay Laya II, Oplan Bayanihan, Oplan Kapayapaan, Joint Oplan Kapanatagan, ug NAP-UPD. Kini tanan misubay sa doktrina sa counterinsurgency sa militar sa US. Kini tanan mga estratehikong kampanya sa pagliyok sa BHB, dungan sa tumong nga ibulag ang hukbong bayan sa masa, sumpoon ang masa ug babagan ang daloy sa suporta niini sa BHB, aron ibutang ang mga yunit sa hukbong bayan sa sitwasyong lunlon militar ug mapildi sila gamit ang superyor nga kusog militar. Sa estratehikong gambalay niini, matag usa ka oplan migamit og nagkalain-laing mga taktika nga mas grabe, mas brutal, mas lapad kumpara sa miuna, tanan ubos sa giya ug suporta sa imperyalismong US.

Ang gerilya pakiggubat taktika sa tibuok katawhan, dili lamang sa hukbong bayan. Bisan pila ka higayon nga mas dako o mas kusog ang pasistang halimaw, dili kini makasagubang sa liboang paak sa pulang hantik. Walay pwersa sa kaaway ang makababag sa pag-asdang sa gubat sa katawhan. Sa hingpit nga panaghiusa sa masa ug sa hukbong bayan, yugto-yugto nga mo-asdang ang maluntarong gubay sa katawhan sa Pilipinas, makatigom og kusog sa kabanikanhan hangtod mahimo niining lupigon ang kasyudaran. Napamatud-an sa kasaysayan sa mga nasud kung asa nidaog ang gubat sa katawhan kung giunsa midaog ang gubat sa katawhan isip pangmasang kalihukan sa pulitika nga gisagubang sa minilyong katawhan, pinaagi nag-una sa armadong pakigbisog, dungan ug gisuportahan sa tanang porma sa pakigbisog.

Balik-balik nga napamatud-an sa BHB nga pinaagi sa paggamit sa hukbo ug sa masa sa mga taktika gerilya sa konsentrasyon, dispersal ug pagbalhin-balihin—pagpakita sa Sidlakan ug pagbira sa Habagatan, pagpasumbag sa hangin sa kaaway, pagbira sa likod sa kaaway, pagbira sa huyang ug nahibulag nga bahin sa kaaway, ug uban pa—bisan unsa ka dako, kalungtad ug kabangis ang mga kampanya sa hinay-hinay nga pagliyok ug pagbuntog, kini mapakyas sa BHB, ug sa proseso mamahimong makapalapad ug makapaglig-on kini. Balik-balik usab nga napamatud-an sa negatibong kasinatian nga bisan unsang pagluag sa mga prinsipyo ug taktikang gerilya—pagbiya sa inisyatiba ug pagpasibo, wala sa panahong konsentrasyon, pagkutang-bukid, self-constriction ug uban pang kahuyangan—maoy nagresulta sa mga kapildihan kung dili man pagkabuntog sa pipila ka bahin.

Gisinati man sa BHB ang gagmay ug dagkung kapildihan sa miaging panahon, moasdang ug molig-on kini pag-usab pinaagi sa pagbalik sa pundasyon sa mga batakang prinsipyo nga gilatid sa Partido. Sa giya sa Marxismo-Leninismo-Maoismo, gilunsad nato ang kalihukang pagtul-id niadtong 2023 sa katuyuang sumahon ug kutloon ang mga leksyon gikan sa nasinating mga kapildihan ug pag-atras tungod sa internal nga mga kahuyangan sa pagpa-asdang sa gubat sa katawhan ug pag-atubang sa kontra-rebolusyonaryong opensiba sa kaaway. Sa proseso, atong gihugtan ang atong pagsabot sa mga batakang prinsipyo ug atong gisalikway ang sayop nga mga tendensya sa miaging panahon. Sukad niadto, gipatuman nato ang kinahanglanong mga pagbag-o sa mga paagi sa gerilyang paglihok sa hukbong bayan sa tumong nga pahugton ang relasyon ug panaghiusa sa hukbong bayan ug masa, palapdon ug palig-onon ang BHB, padayon nga himoong buta ug bungol ang kaaway, pakyason ang iyang dagkung operasyon sa pagdumog, ug lisangon kini sa wala gilaumang mga taktikal nga opensiba ug aksyong gerilya.

Sa kasamtangang yugto sa gubat sa katawhan bayan, kinahanglan nato ipadayon ang pagpaasdang sa lapad ug subsob nga gerilyang pakiggubat sa basehan sa nagalapad ug nagalawom nga baseng masa. Aron mahimo kini, kinahanglan i-asdang nato ang halapad nga mga pakigbisog sa pulitika ug armado, dungan sa tahas nga tanang-bahin nga palig-onon ang Partido ug ang hukbo, ang mga organisasyong masa, ang mga organo sa gahum sa pulitika ug ang mga yunit sa milisyang bayan ug grupo sa pagpanalipod-sa-kaugalingon sa masa.

Yawe sa tanan niini mao ang pagpalig-on sa Partido. Kinahanglan dugang pakusgon ang pagtuon sa Marxismo-Leninismo-Maoismo, sa mga batakang prinsipyo sa Partido, ug ang paggamit niini sa pagtuon sa kongkreto nga sitwasyon ug sa pagpatuman sa mga praktikal nga rebolusyonaryong tahas. Kinahanglan padayon nga palawumon ang kalihukang pagtul-id pinaagi sa pagsuma ug pagtasa aron isalikway ang empirisismo ug dogmatismo sa ideolohiya, mga porma sa petiburges nga suhetibismo sa pulitika, ug ultrademokrasya ug burukratismo sa organisasyon. Kinahanglan pila ka pilo natong padak-on ang Partido. Kinahanglan itukod nato ang mga sanga sa Partido sa liboan ka baryo, eskwelahan, pabrika ug uban pang suuk sa tibuok nasud nga daghang tawo, sa kasyudaran ug kabanikanhan, aron masiguro ang lapad ug lawom nga pagpangulo sa Partido sa minilyong katawhan.

Sa kabanikanhan, kinahanglan palapdon ug palig-onon ang Pambansang Katipunan sa mga Magbubukid o PKM, ug uban pang rebolusyonaryong organisasyong masa sa han-ay sa mga kababayen-an ug kabatan-onan, aron palagsikon ang mga antipyudal nga pakigbisog (pagpakunhod sa abang sa yuta, pagtangtang sa usura, pagpasaka sa suhol, ug pagbaligya sa makatarunganong presyo sa mga produkto sa uma). Kinahanglan usab tukoron ang mga rebolusyonaryong organisasyong masa sa han-ay sa minoryang katawhan alang sa pagpanalipod sa katungod sa yutang kabilin. Dungan niini ang lapad nga mga pagkigbisog aron panalipdan ang katungod ug kaayohan sa masang mag-uuma batok sa pangilog ug pagpangawkaw sa yuta, pagpangawkaw ug paggun-ob sa kinaiyahan, langyawng militar nga pagpanghilabot, pasistang pagpanumpo ug pagpahamtang sa mga palisiya sa balaod militar ug uban pang porma sa pagpangdaogdaog.

Gipukaw, giorganisa ug gipalihok sa Partido ang masang mag-uuma sa lapad nga kabanikanhan. Sulod sa mga sona ug natarang gerilya, nag-unang braso sa Partido ang hukbong bayan sa pag-organisa ug pagpalihok sa masa, dungan ang pagpa-asdang sa armadong pakigbisog ug pagpalapad sa rebolusyonaryong baseng masa. Ang armadong pakigbisog mosuporta sa mga pakigbisog sa masang mag-uuma, mga mangingisda ug uban pang mga kabus sa kabanikanhan. Ang BHB mao ang bugtong instrumento nila batok sa mga armadong tawotawo, maton, ug mga pwersang paramilitar ug militar nga gigamit sa nagharing hut-ong batok kanila. Tungod sa bug-os nga pagpanalipod kanila sa hukbong bayan, ang masang dinaogdaog nahimong dili mahubsan nga tinubdan sa bag-ong mga Pulang manggugubat.

Sa kasyudaran, kinahanglan padayon nga palapdon ug palig-onon ang rebolusyonaryong kalihukan sa mga mamumuo, mala-mamumuo ug mga kabatan-onang intelektwal, ingon man ang uban pang sektor sa petiburgesya sa lungsod. Gitukod ug gipalig-on ang ilang mga tago nga rebolusyonaryong organisasyong masa ug gipalihok sila aron mosuporta ug mosalmot sa armadong pakigbisog sa kabanikanhan. Kauban niini, gipamunuan sa Partido ang ilang mga demokratikong pakigbisog aron panalipdan ang ilang mga katungod ug kaayohan, samtang lagsik silang gipasalmot sa lapad nga mga pakigbisog batok sa pasismo, korapsyon, militar nga pagpanghilabot sa US, mga paantos nga palisiyang mando sa langyaw, ug uban pang mga isyu nga giatubang sa tibuok nasud.

Kinahanglan padayon nga palig-onon ang National Democratic Front isip alyansa sa mga rebolusyonaryong organisasyong masa. Ang NDF mao ang labing konsolidado nga bahin sa alyansa sa mga patriyotiko ug demokratikong hut-ong ug sektor, nga nagkahiusa sa basehan sa pagpaasdang sa armadong pakigbisog. Subay sa kusog sa BHB ug sa NDF, matukod ang mga temporaryong alyansa sa pipila ka bahin sa nagharing hut-ong nga nag-ila sa kusog sa rebolusyonaryong kalihukan ug andam nga makighiusa sa nagkalain-laing panahon ug porma. Sa pagkakaron, gitukod nato ang labing lapad nga nagkahiusang prente batok sa nagharing paksyon sa mga Marcos ug Duterte, nga karon nagrepresentar sa labing reaksyunaryo ug labing pasistang paksyon sa nagharing hut-ong. Kinahanglan tibuok-kusog natong ibulag, batukan ug palagputon ang nagharing rehimeng US-Marcos nga nangunang nagpaantos ug nanumpo sa katawhan.

Taliwala sa krisis sa nagharing sistema nga nagmugna og walay kaparehas nga pag-antos sa lapad nga masa sa katawhan, labi pang mitin-aw ang panginahanglan nga moasdang sa dalan sa malungtarong gubat sa katawhan. Labing tataw kini sa mga kabatan-onan nga nagtinguha nga bag-ohon ang sistema ug itukod ang bag-ong kapalaran sa nasud. Mismo si Marcos, pinaagi sa negatibo nga pananglitan, ang nagtulod kanila nga makigbisog ug mohawid og armas. Sa miaging tuig, nakita nato ang nagkadaghan nga mga kabatan-onan, sa kabanikanhan ug kasyudaran, nga mitubag sa panawagan nga mosuporta ug mosalmot sa Bagong Hukbong Bayan. Padayon nga nadugangan og bag-ong dugo ang BHB nga naghatag niini og bag-ong kalagsik alang sa pagpaasdang sa armadong pakigbisog.

Hingpit ang determinasyon sa tanang yunit sa Bagong Hukbong Bayan, kauban ang mga yunit sa milisyang bayan, nga ilunsad ang ilang makaya nga mga taktikal nga opensiba o aksyong gerilya batok sa huyang, gikapoy o nahibulag nga mga yunit o elemento sa kaaway, aron makuha ang ilang mga hinagiban ug armahan ang bag-ong mga Pulang manggugubat. Target usab sa BHB ang mga armadong tauhan sa mga lunud-patay nga agalong yutaang nanghasi sa masa. Kinahanglan usab ipasiugda ang angayng mga lakang aron ipatuman ang sentensya sa mga hukumang bayan batok sa lunud-patay nga mga pasista ug kriminal nga ahente sa kaaway. Atubangan sa nagkadaghang mga kalamidad sa klima, kinahanglan usab molihok ang BHB isip tigpanalipod sa kinaiyahan ug ipatuman ang mga aksyong gerilya batok sa mga malungkabon ug magun-ubong mga empresa.

Hingpit ang determinasyon sa Partido ug Bagong Hukbong Bayan nga tibuok-kaya nga iasdang ang malungtarong gubat sa katawhan. Labi na karon sa atubangan sa nagkagrabe nga pagpanggera sa US nga naghulga nga mosuyop sa tibuok kalibutan sa alimpuyo sa imperyalistang gubat, nagkadako ang panginahanglang dugang palagsikon ang malungtarong gubat sa katawhan aron tubagon ang nagkakusog nga pangandoy sa katawhang Pilipino nga makalingkawas sa kuko sa imperyalismong US ug makab-ot ang tinuod nga nasudnong kagawasan ug demokrasya.

Ang malungtarong gubat sa katawhan usa ka tin-aw nga sulo nga naghatag og kahayag ug paglaum sa katawhang Pilipino, ug nagsilbing inspirasyon ug sundanan sa gatusan ka milyon nga dinaogdaog ug gipahimuslang mga mamumuo ug mag-uuma sa tibuok kalibutan. Kini ang halandong tampo sa proletaryong Pilipino sa kalibutanhong pakigbisog aron tapuson ang imperyalismo ug iasdang ang rebolusyon aron makab-ot ang kagawasan, demokrasya ug sosyalismo.

Ibagsak ang imperyalismo, pyudalismo ug burukratang kapitalismo!

Iasdang ang demokratikong rebolusyon sa katawhan!

Moabante sa dalan sas malungtarong gubat sa katawhan!

Mabuhi ang hut-ong mamumuo ug katawhang Pilipino!

Itaas ang Pulang bandila sa armadong pakigbisog!

Mabuhi ang ika-57 anibersaryo sa Bagong Hukbong Bayan!

Mabuhi ang Partido Komunista ng Pilipinas!