Binabati at nagpupugay ang National Democratic Front-Southern Tagalog sa mga manggagawa ng Nexperia Philippines at kanilang mga tagasuporta sa matagumpay nilang welga noong Marso 5-8. Naparalisa ng kanilang solidong pagkilos ang produksyon ng kumpanya na nagdulot ng ₱1.96B kawalang kita sa kapitalista. Matapos ang halos 4 na araw na welga, nakamit ng mga manggagawa sa pamamagitan ng kanilang unyon na Nexperia Philippines Inc. Workers’ Union (NPIWU-National Federation of Labor Unions-Kilusang Mayo Uno) na maibalik sa trabaho ang dalawa sa apat na upisyal ng kanilang unyon na iligal na tinanggal ng maneydsment noong Disyembre, ₱57 dagdag na sahod at ₱20,000 signing bonus.

Mataas ang determinasyon ng mga manggagawa ng Nexperia na ipaglaban ang kanilang mga hinaing at karapatan na nagtulak sa kanila para pangibabawan ang lahat ng balakid sa kanilang welga. Hindi sila nagpatinag sa ilang ulit na panggigipit ng kapitalistang pigilan ang welga, wasakin ang kanilang unyon at buwagin ang welga. Sa mismong araw ng welga ay ipinailalim ng Department of Labor & Employment (DOLE) sa Assumption of Jurisdiction ang pagawaan para pigilan ang welga at obligahing agad bumalik sa trabaho ang mga manggagawa. Gamit rin ang kautusang ito, maaaring pakilusin ng DOLE ang pulis at militar para supilin ang mga manggagawang susuway sa kanilang kautusan. Hindi rin natinag ang mga manggagawa ng mga ipinataw na blokeyo ng kapitalista sa kanilang pagkain, tubig at gamot, ganundin ang pagpatay nito ng kuryente na nagresulta sa malubhang pagkakasakit ng dalawang welgista.

Kung tutuusin, ang labang ito ng mga manggagawa ng Nexperia ay nagsimula pa noong 2023 sa hindi pagtugon ng kumpanya sa giit nilang dagdag na sahod at sa halip ay ilang beses na ipinatupad ang pagtatanggal sa trabaho ng aabot sa 600 manggagawa. Ilang beses ding nagdeadlock ang mga pagsisikap na ilunsad ang collective bargaining agreement dahil sa pananabotahe at katigasan ng kapitalistang dinggin ang hinaing ng mga manggagawa kaugnay sa kabuhayan at karapatan.

Ramdam ang inspirasyong ibinigay sa mamamayan ng magiting na paglaban ng mga manggagawa ng Nexperia. Umani ang welga ng malawak na suporta sa hanay ng kapwa manggagawa at mga unyonista, mga organisasyon at lider ng kilusang paggawa, iba pang sektor tulad ng kabataan-estudyante at kababaihan. Para ipakita ito, sumama sila sa piket sa labas ng Light Industry Science Park 1 sa Cabuyao, Laguna at sinalubong nila ang matagumpay na mga welgista paglabas ng pabrika. Nagpahayag rin ng suporta ang sektor ng akademya, mga taong simbahan, maging mga migranteng manggagawang Pilipino sa ibayong dagat.

Naghahatid ng pag-asa sa malawak na hanay ng masang manggagawa at buong mamamayan sa Timog Katagalugan at buong bansa ang isinagawang welga ng mga manggagawa ng Nexperia. Sa gitna ng lagim ng de facto na batas militar at sumasahol na kahirapan ng bayan, ipinakita ng mga manggagawa ang kapangyarihan ng kanilang sama-samang paglaban, sa pamamagitan ng kanilang unyon para ipanalo ang kanilang mga demanda at pagkaitan ng tubo ang kapitalista. Nasaksihan ng bayan kung paanong ang malaki’t dayuhang kumpanya ay pinayuko ng mga aba ngunit determinado’t nagkakaisang manggagawa. Magsisilbi itong apoy sa malawak na kaparangan at magpapaalab sa diwa ng sambayanang magbigkis at lumaban sa kapitalista at lahat ng uring mapang-api at mapagsamantala.

Dapat higit na patibayin at palakasin ang kapasyahan ng mga manggagawa at iba pang aping uri na lumaban para sa buhay kabuhayan at karapatan. Kasabay nito, dapat isanib ng mga manggagawa sa Nexperia ang kanilang pakikibaka sa laban ng buong uring manggagawa para kamtin ang nakabubuhay na P1,200 pambansang arawang sahod across-the-board, wakasan ang kontraktwalisasyon at lahat ng iskema ng pleksibilisasyon sa paggawa.

Ang tuluy-tuloy na pagmumulat sa masang manggagawa at pag-uugnay ng kanilang pakikibakang pang-ekonomya sa pampulitikang pakikibaka ang mga susing hakbang upang isustine at ibayong patatagin ang kilusang paggawa at mga unyon. Dapat mabatid ng uring manggagawa na para gapiin ang kapitalismo na umabot sa parasitikong yugto ng imperyalismo, kinakailangang maglunsad ng rebolusyon ang kanilang uri at pamunuan ito kasama ang lahat ng api at pinagsamantalahan ng sistemang ito. Kailangang itaas ang pampulitikang kamulatan, antas ng pagkilos at organisasyon ng mga manggagawa, sumapi sa kanyang talibang Partido, ang Partido Komunista ng Pilipinas at isulong ang bagong tipong pambansa-demokratikong rebolusyon.