Komo pagkilala ha iya bug-os nga kinabuhi nga dedikasyon ngan mga kontribusyon ha demokratiko nga rebolusyon han katawhan, iginhahatag han Komite Sentral han Partido Komunista ng Pilipinas an pinakahitaas nga pagkilala kan Ka Louie Jalandoni. Diri bisan san-o mawawara an iya mga amot ha pagbubug-os ngan pagpapakusog han Partido ngan National Democratic Front ngan ha pagpapasulong han demokratiko nga rebolusyon han katawhan, prinsipal pinaagi han armado nga pakig-away, sugadman ha iba pa nga mga porma han pakigbisog, kaupod an negosasyon pankamurayawan.

Namatay hi Ka Louie yana nga adlaw. Nobenta anyos hiya.

Diri ordinaryo an nagin kinabuhi ni Ka Louie. Igin-anak hiya ha usa nga pamilya han dagko nga agaron maytuna ngan tag-iya han mga tubuhan ha Isla han Negros hadton Pebrero 26, 1935. Ha luyo han kahimyangan ngan pribilehiyo nga iya nahigimat-an, nagkamayda hi Ka Louie han hilarum nga kapukawan ha pulitika pinaagi han iya integrasyon ha kinabuhi ngan pakigbisog han mga trabahador ha tubo nga waray hunong ha pagtrabaho ha mga katubhan ha Negros.

Seryoso niya nga ginhangkupan an prinsipyo han “pagpabor ha kablas” komo giya ha iya kinabuhi. Komo usa nga hadto anay Katoliko nga padi, pinartisipar hiya ha programa nga “Singbahan ha mga Barrio,” nanguna ha mga inisyatiba ha mga napasibay-an nga komunidad ha kabaryuhan ngan personal nga nahiaguman an grabe nga reyalidad han kakurian, paniniyupi, ngan panmuypoy han estado. Ginbag-o hiya han iya buruhaton ha masa ngan dugang pa nga nagpadig-on han iya paninindugan nga gumios diri la komo pastol han pagtuo, kundi komo tagserbe han rebolusyon.

Hadton Pebrero 17, 1972, nagpatuman hin yawe nga responsabilidad hi Ka Louie ha pagtukod ha Christians for National Liberation (CNL) ha pag-oorganisa ha mga sugad niya nga relihiyoso nga may progresibo nga panhunahuna, agud atuhan an pasista nga ngirhat han estado han diktadura nga Marcos Sr. Ha asembleya han pagtukod hini, naeleher ngaduha hira Ka Louie ngan iya asawa nga hi Ka Coni ha National Executive Board. Ha sinunod nga bulan, hadton Marso 1972, inapi hi Ka Louie ha Partido Komunista ng Pilipinas. An CNL ha dayuday magseserbe nga usa ha mga alyado nga organisasyon nga tagapagtukod han NDFP hadton 1973.

Han magdeklara han balaud militar hi Marcos, nagin kaparte hi Ka Louie han sikreto nga kagiusan agud atuhan an pasista nga diktadura. Naaresto hiya ngan hi Ka Coni hadton 1973 ngan iginpriso ha Fort Bonifacio. Didto, haros usa katuig nga napriso hi Ka Louie ha usa nga masirom ngan waray bintana nga selda kaupod an unom o pito nga iba pa. Naduso han serye han mga protesta ngan kampanya han mga relihiyoso ngan internasyunal nga grupo ha tawhanon nga katungod an rehimen Marcos nga pagawason hira hadton Hulyo 1974.

Binalik ha rebolusyunaryo nga buruhaton hi Ka Louie han makagawas. Hadton 1975, binulig hiya ha pag-oorganisa ngan koordinasyon ha makasaysayan nga welga han mga trabahador ha La Tondeña ha Manila—an syahan nga mayor nga welga han mga trabahador ha ilarum han paghahadi militar. Epektibo nga ginbuong han welga an klima han kahadlok nga dara han balaud militar ngan ginmarkahan an utro nga pagbuylo han serye han mga panmasa nga pakigbisog ngan hiluagan nga mga demonstrasyon ha urhi nga parte han dekada 1970 ngan temprano nga parte han dekada 1980.

Hadton 1976, kinadto hi Ka Louie ha iba nga nasud agud pamunuan an buruhaton ha internasyunal nga pakikigsumpayan para ha Partido ngan ibuksas an brutal nga mga krimen han diktadura nga Marcos. Tungod ha mga hulga ha iya kinabuhi ngan kaseguruhan ha persekusyon (pan-gigipit) kun bumalik hira ha Pilipinas, naghangyo ngan gintagan hin political asylum hi Ka Louie ngan Ka Coni ha Netherlands—ngan hira an nagin mga syahan nga Pilipino nga nakakarawat hini. Tikang pagkakadistyero, maduroto nga nagtrabaho hi Ka Louie agud pakusgon an suporta para ha rebolusyon Pilipino.

Hadton Hulyo 1977, pormal nga igintuin hi Ka Louie komo Internasyunal nga Tinaglawas han NDFP. Kumatin hiya han importante nga papel ha pagtindog han Internasyunal nga Upisina han NDFP ha Utrecht ngan ha pag-oorganisa han pankalibutan nga suporta para ha pakigbisog han katawhan Pilipino ha diktadura nga US-Marcos. Nagserbe hiya nga yawe nga tag-organisa han People’s Permanent Tribunal on the Philippines hadton 1980 nga nagbuksas ha mga grabe nga pagtalapas han rehimen ha tawhanon nga katungod, ngan nagkilala ha NDF komo tinuod nga tinaglawas han katawhan Pilipino.

Komo nangunguna nga internasyunal nga representante han NDFP, ginhimo ni Ka Louie an proto-diplomatiko nga buruhaton ngan nagtukod han sumpayan ha mga langyaw nga gubyerno, internasyunal nga ahensya, mga grupo ha pagkamagbinurugto, ngan mga rebolusyunaryo nga kagiusan ngan partido ha bug-os nga kalibutan. Binulig hiya ha pagpapakusog han tingog han katawhan Pilipino pinaagi han pagpahayag han makatadungan nga kawsa han rebolusyunaryo nga kagiusan.

Hadton 1989, iginbutang hi Ka Louie komo prinsipal nga negosyador han NDFP ha negosasyon pankamurayawan ha Gubyerno han Republika han Pilipinas. Hini nga responsabilidad, iginpakita niya an madig-on nga panindugan han rebolusyunaryo nga kagiusan nga makab-ot an makatadungan ngan panmaihaan nga kamurayawan—usa nga kamurayawan nga magbabaton ha mga gamot han armado nga sumpakiay: kawaray han tuna, kakurian, ngan langyaw nga pananakop. Ha diri maihap nga mga serye han negosasyon, madig-on nga tinindog hi Ka Louie komo harigi han integridad ngan rebolusyunaryo nga determinasyon, nga pirme ginpapasiuna an katawhan Pilipino ha proseso.

Iginpapaabot namon an hukas-ha-kasingkasing nga pasasalamat kan Ka Louie Jalandoni ha paghalad han iya kinabuhi ha katawhan Pilipino, ha National Democratic Front, ngan ha Partido Komunista ng Pilipinas. Hasta ha kadayunan namon tatagan hin importansya an iya dako kaupay nga amot ha pagpasulong han pakigbisog han katawhan para ha nasyunal ngan pankatilingban nga katalwasan. Ha amon pagkasubo ha iya kamatay, madig-on namon nga iginsasaad nga igpapadayon namon an iya mga sulundanon han waray pagruhaduha nga pagseserbe, waray tubtuban nga pagkamapainubsanon, rebolusyunaryo nga integridad, ngan paninindugan ha paglalansar han demokratiko nga rebolusyon han katawhan tubtub hul-os nga makab-ot an kadaugan.

Mabuhay an hinumduman ni Ka Louie Jalandoni!

Igpadayon an iya dakila nga rebolusyunaryo nga sulundanon!