Isip pag-ila sa iyang tibuok kinabuhi nga dedikasyon ug mga kontribusyon sa demokratikong rebolusyon sa katawhan, labing taas nga pasidungog ang gihatag sa Komite Sentral sa Partido Komunista ng Pilipinas kang Ka Louie Jalandoni. Kanus-aman dili mahikalimtan ang iyang mga kontribusyon sa pagtukod ug pagpalig-on sa Partido ug sa National Democratic Front, ug sa pagpaasdang sa demokratikong rebolusyon sa katawhan, nag-una pinaagi sa armadong pakigbisog, ingonman sa ubang porma sa pakigbisog lakip na ang mga negosasyon sa kalinaw.

Namatay si Ka Louie karong adlawa sa edad nga 90 anyos.

Dili ordinaryo ang kinabuhi ni Ka Louie. Natawo siya sa usa ka pamilya sa dagkung agalong yutaan ug tag-iya sa tubuhan sa Isla sa Negros niadtong Pebrero 26, 1935. Bisan pa sa kaharuhay ug pribilehiyo nga iyang nahimat-an, nakabaton si Ka Louie og lalum nga pulitikanhong kahibalo pinaagi sa pakig-unong sa kinabuhi ug pakigbisog sa mga mamumuong-panguma nga walay hunong nga nagtrabaho sa katubhan sa Negros.

Seryoso niyang gigakus ang prinsipyo sa “paghatag prayoridad sa kaayuhan sa mga kabus” isip giya sa iyang kinabuhi. Isip usa ka kanhi paring Katoliko, miapil siya sa programang “Simbahan sa mga Baryo,” nanguna sa mga inisyatibo sa mga kabus nga komunidad sa kabukiran ug personal nga nasinati ang pait nga reyalidad sa kalisud, pagpahimulos, ug pagpanglutos sa estado. Ang iyang pakigduyog sa mga masa ang nagbag-o kaniya ug nagpalalum sa iyang determinasyon nga molihok dili lang isip usa ka magbalantay sa pagtuo, apan isip usa ka alagad sa rebolusyon.

Niadtong Pebrero 17, 1972, mipatuman si Ka Louie og yaweng papel sa pagtukod sa Christians for National Liberation (CNL) sa pag-organisa sa mga sama niyang relihiyoso nga adunay progresibong panghunahuna aron batukan ang pasistang terorismo sa diktadurya ni Marcos Sr. Sa asembliya pagkatukod niini, napili si Ka Louie ug ang iyang asawa nga si Ka Coni sa National Executive Board. Sa misunod bulan, niadtong Marso 1972, miapil si Ka Louie sa Partido Komunista ng Pilipinas. Ang CNL nahimong usa sa mga alyadong organisasyon nga nagtukod sa NDFP niadtong 1973.

Sa dihang gideklara ni Marcos ang martial law, nahimong kabahin si Ka Louie sa tago nga kalihukan aron suklan ang pasistang diktadurya. Nadakpan siya ug si Ka Coni niadtong 1973 ug gipriso sa Fort Bonifacio. Didto, halos usa ka tuig nga nakabilanggo si Ka Louie sa usa ka ngitngit ug walay bintanang selda uban lain pang unum o pito. Tungod sa balud-balod nga protesta ug kampanya sa mga relihiyoso ug internasyunal nga grupo sa tawhanong katungod, napugos ang rehimeng Marcos nga buhian sila niadtong Hulyo 1974.

Sa dihang nakagawas siya sa prisohan, mipadayon si Ka Louie sa rebolusyonaryong gimbuhaton. Niadtong 1975, mitabang siya sa pag-organisa ug koordinasyon sa makasaysayanong welga sa mga mamumuo sa La Tondeña sa Manila—ang unang dakung welga sa mga mamumuo ilalum sa martial law. Epektibong gibungkag sa welga ang kahadlok nga dala sa martial law ug nagtimaan sa pagkusog sa serye sa mga pakigbisog sa masa ug dagkung mga demonstrasyon sa ulahing bahin sa 1970s ug sayong bahin sa 1980s.

Niadtong 1976, miadto si Ka Louie sa gawas sa nasud aron mangulo sa internasyunal nga pakigrelasyon sa para sa Partido ug ibutyag ang brutal nga mga krimen sa diktaduryang Marcos. Tungod sa hulga sa ilang kinabuhi ug seguridad nga sila pagasilutan kung mobalik sa Pilipinas, nangayo ug gihatagan si Ka Louie ug Ka Coni og political asylum sa Netherlands—sila ang unang mga Pilipino nga nakadawat niini. Gikan sa pagkadistyero, madasigong nagtrabaho si Ka Louie nga walay kakapoy aron palig-onon ang suporta alang sa rebolusyong Pilipino.

Niadtong Hulyo 1977, upisyal nga gihimong International Representative sa NDFP si Ka Louie. Daku ang iyang papel sa pagtukod sa International Office sa NDFP sa Utrecht ug sa pag-organisar sa internasyunal nga suporta alang sa pakigbisog sa katawhang Pilipino batok sa diktaduryang US-Marcos. Nagsilbi siyang yaweng organisador sa People’s Permanent Tribunal on the Philippines niadtong 1980 nga nagpanghimatuud sa grabeng paglapas sa tawhanong katungod sa rehimeng Marcos ug nag-ila sa NDF isip tinuod nga representante sa katawhang Pilipino.

Isip tsirman sa internasyunal nga representante sa NDFP, gipatuman ni Ka Louie ang mga proto-diplomatikong gimbuhaton ug nagtukod og relasyon sa mga langyawng gubyerno, internasyunal nga ahensya, mga grupong pangsolidaridad, ug mga rebolusyonaryong kalihukan ug partido sa tibuok kalibutan. Mitabang siya sa pagpalanog sa tingog sa katawhang Pilipino pinaagi sa pagpasabot sa matarunganong kawsa sa rebolusyonaryong kalihukan.

Niadtong 1989, gitudlo si Ka Louie isip chief negotiator sa NDFP sa mga negosasyon sa kalinaw tali sa Gubyerno sa Republika sa Pilipinas (GRP). Sa pagpatuman sa katungdanan, gipakita niya ang lig-on nga baruganan sa rebolusyonaryong kalihukan sa pag-angkon sa makatarunganon ug malungtarong kalinaw—kalinaw nga motubag sa ugat sa armadong panagbangi: kawad-on sa yuta, kalisud, ug langyawng dominasyon. Pinaagi sa daghang mga hugna sa negosasyon, nagpabiling lig-ong pundasyon sa integridad ug rebolusyonaryong determinasyon si Ka Louie, nga kanunay nagbutang sa masang Pilipino sa sentro sa proseso.

Gipadayag namo ang among tibuok kinasingkasing nga pagpasalamat kang Ka Louie Jalandoni sa paghalad sa iyang kinabuhi alang sa katawhang Pilipino, sa National Democratic Front, ug sa Partido Komunista ng Pilipinas. Tibuok panahon namong pasidunggan ang iyang dakung kontribusyon sa pagpaasdang sa pakigbisog sa katawhan alang sa nasudnon ug katilingbanong kagawasan. Samtang nagbangutan kami sa iyang pagpanaw, hugot namong gipanumpa nga ipadayon ang iyang legasiya sa walay pagpanuko nga pag-alagad, walay kinutubang kamapaubsanon, rebolusyonaryong integridad, ug dedikasyon sa pagpadayon sa demokratikong rebolusyon sa katawhan hangtud sa hingpit nga kadaugan.

Mabuhi ang handumanan ni Ka Louie Jalandoni!

Ipadayon ang iyang bantugang rebolusyonaryong legasiya!