Kas panangbigbig iti unos ti panagbiag a dedikasyon ken dagiti kontribusyon na iti demokratiko a rebolusyon ti umili, isagsagut ti Central Committee-Communist Party of the Philippines ti kangatwan a panangbigbig ken Ka Louie Jalandoni. Saan pulos a mapukaw dagiti naibingay na iti panangbukel ken panangpapigsa iti Partido ken National Democratic Front, ken iti panangiyabante ti demokratiko a rebolusyon ti umili, kangrunaan babaen ti armado a dangadang, kabilang ti negosasyon iti kapya.

Ni Ka Louie ket pimmusay tatta nga aldaw. Isuna ket 90 anyos.

Saan a kadawyan ti nagbalin a biag ni Ka Louie. Naiyanak isuna iti maysa a pamilya ti dadakkel nga apo’t daga ken agtagikua kadagiti kaunasan iti Isla ti Negros idi Pebrero 26, 1935. Iti laksid ti kinanam-ay ken pribilehiyo a nariingan na, naaddaan ni Ka Louie ti nauneg a kaamuan iti pulitika babaen ti pannakitipon na iti biag ken dangadang dagiti mangmangged iti unas nga awan sarday nga agtrabtrabaho kadagiti kaunasan iti Negros.

Sinsero nga inarakup na ti prinsipyo ti “panangpabor iti marigrigat” kas tarabay iti biag na. Kas maysa a dati a padi a Katoliko, nakipaset isuna iti programa a “Simbaan kadagiti Baryo,” nangiyuna kadagiti inisyatiba kadagiti nabaybay-an a komunidad iti kaaw-awayan ken personal a napadasan na dagiti nakaro a kinapudno ti kinarigat, panaggundaway ken panagikuspil ti estado. Binaliwan isuna ti gawaing masa na ken ad-adda pay a nangpatibker ti takder na nga agtignay saan laeng a pastor ti pammati, nu di ket kas agserbi iti rebolusyon.

Idi Pebrero 17, 1972, nagakem ti kangrunaan a rebbengen ni Ka Louie iti panangbuangay ti Christians for National Liberation (CNL) iti panang-organisa kadagiti kapada na a relihiyoso nga addaan progresibo a panagpanpanunot, tapno labanan ti pasista a teror ti estado ti diktadura a Marcos Sr. Iti asembliya ti panangbuangay ditoy, agpada a nabotosan da Ka Louie ken ti asawa na a ni Ka Coni iti National Executive Board. iti sumaruno a bulan idi Marso 1972, nagkameng ni Ka Louie iti Communist Party of the Philippines. Ti CNL idi agangay ket agserbi a maysa kadagiti alyado nga organisasyon a nangpundar ti NDFP idi 1973.

Idi nagideklara ti martial law ni Marcos, nakipaset ni Ka Louie iti tignay a limed tapno labanan ti pasista a diktadura. Isuna ken ni Ka Coni ket naaresto idi 1973 ken naibalud idiay Fort Bonifacio, nu sadinno a naikulong ni Ka Ka Louie iti nasipnget ken awanan tawa a selda karaman ti innem wenno pito pay a kadwa na a balud. Naiduron ti serye dagiti protesta ken kampanya dagiti relihiyoso ken internasyunal a grupo iti karbengan-tao ti rehimen Marcos a ruk-atan isuda idi Hulyo 1974.

Intuloy ni Ka Louie ti rebolusyonaryo a trabaho idi nawayawayaan. Idi 1975, timmulong isuna iti panag-organisa ken koordinasyon iti istorikal a welga dagiti mangmangged iti La Tondeña idiay Manila—ti umuna a mayor a welga dagiti mangmangged iti sidong ti turay militar. Epektibo a binurak ti welga ti klima ti buteng a gubuayen ti martial law ken minarkaan daytoy ti balbaliw a panagbwelo ti serye dagiti dangadang ti masa ken dagiti nasaknap a demonstrasyon iti maudi a paset ti dekada 1970 ken nasapa a paset ti dekada 1980.

Idi 1976, napan ni Ka Louie iti ballasiw-taaw tapno idauluan ti trabaho iti internasyunal a pannakisilpo para iti Partido ken ibunannag dagiti brutal a krimen ti diktadura a Marcos. Gapu kadagiti pangta iti biag ken kinasigurado ti pannakausig na nu agsubli iti Pilipinas, dimmawat ken naikkan ti political asylum si Ka Louie ken Ka Coni idiay Netherlands—ken isuda dagiti umuna a Pilipino a nakaawat ditoy. Manipud iti pannakadistyero, napasnek a nagtrabaho ni Ka Louie tapno papigsaen ti suporta para it rebolusyon a Pilipino.

Idi Hulyo 1977, pormal a nadutokan ni Ka Louie kas Internasyunal a Mangibagi iti NDFP. Nagakem isuna ti napateg a papel iti panangitakder ti Internasyunal nga Upisina ti NDFP idiay Utrecht ken iti panang-organisa ti sangalubongan a suporta para iti panaglaban ti umili a Pilipino iti diktadura a US-Marcos. Nagserbi isuna a kangrunaan a nangbuangay ti People’s Permanent Tribunal on the Philippines idi 1980 a nangibunannag kadagiti nakaro a panaglabsing ti rehimen iti karbengan-tao, ken nangbigbig iti NDF kas pudno a mangibagi iti umili a Pilipino.

Kas dadaulo nga internasyunal a mangibagi iti NDFP, inyaramid ni Ka Louie ti proto-diplomatiko a trabaho ken nangbuangay ti silpo kadagiti gangannaet a gubyerno, internasyunal nga ahensya, kadagiti grupo iti panagkikinnabsat ken kadagiti rebolusyonaryo a tignay ken partido iti intero a lubong. Timmulong isuna iti panangpapigsa ti timek ti umili a Pilipino babaen ti panangiyebkas ti nainkalintegan a tarigagay ti rebolusyonaryo a tignay.

Idi 1989, nadutokan ni Ka Louie kas dadaulo a negosyador ti NDFP iti negosasyon iti kapya iti Guberyno ti Republika ti Pilipinas (GRP). Iti daytoy a rebbengen, inpamatmat na ti natibker a takder ti rebolusyonaryo a tignay a magun-od ti nainkalintegan ken mataginayon a kapya—maysa a kapya a mangsungbat kadagiti ramut ti armado a risiris: kinaawan ti daga, kinakurapay ken gangannaet a panagsakop. Kadagiti saan a mabilang a tukad ti negosasyon, natibker a timmakder ni Ka Louie kas adigi ti integridad ken rebolusyonaryo a determinasyon, a kanayon nga ipangpangruna ti umili a Pilipino iti proseso.

Idandanon mi ti naimpusoan a panagyaman ken Ka Louie Jalandoni iti panangidaton ti biag na iti umili a Pilipino, iti National Democratic Front ken iti Communist Party of the Philippines. Tungpal-biag mi nga ipateg ti naindaklan a naibingay na iti panangiyabante ti dangadang ti umili para iti wayawaya ti pagilyan ken kagimongan. Iti panagladingit mi iti ipupusay na, natibker nga ikarkari mi nga ituloy ti patawid na a sipupuso a panagserbi, awan-patengga a kinapakumbaba, rebolusyonaryo nga integridad ken takder iti panangisayangkat ti demokratiko a rebolusyon ti umili aginga a magun-od ti balligi.

Agbiag ti lagip ni Ka Louie Jalandoni!

Ituloy ti naindaklan a rebolusyonaryo a patawid na!