Bilang pagkilala sa iya bug-os kabuhi nga dedikasyon kag mga kontribusyon sa demokratikong rebolusyon sang banwa, ginahatag sang Komite Sentral ng Partido Komunista ng Pilipinas ang pinakamataas nga pagkilala kay Ka Louie Jalandoni. Indi bisan san-o man madula ang iya mga kontribusyon sa pagtukod kag pagpabaskog sang Partido kag National Democratic Front, kag sa pagsulong sang demokratikong rebolusyon sang banwa, nagapanguna paagi sa armadong paghimakas, subongman sa iban pa nga mga dagway sang paghimakas, lakip na ang negosasyon sa kalinong.
Nagtaliwan si Ka Louie subong nga adlaw. 90 anyos siya.

Indi kinaandan ang nangin kabuhi ni Ka Louie. Ginbun-ag siya sa isa ka pamilya sang mga dalagko nga agalon mayduta kag nagapanag-iya sang katubuhan sa Isla sang Negros sadtong Pebrero 26, 1935. Sa pihak sang kasulhayan kag pribilehiyo nga iya namuklatan, nakaangkon si Ka Louie sang madalum nga kamuklatan sa pulitika paagi sa iya pagpakighalubilo sa kabuhi kag paghimakas sang mga mamumugon sa tubo nga wala untat sa pagtrabaho sa mga katubuhan sa Negros.

Seryoso niya nga ginhakos ang prinsipyo sang “paghatag importansya sa kaayuhan sang mga imol” bilang giya sa iya kabuhi. Bilang isa ka anay pari nga Katoliko, nagpakigbahin siya sa programang “Simbahan sa mga Barrio,” nagpanguna sa mga inisyatiba sa mga napatumbayaan nga mga komunidad sa kaumhan kag personal nga naagihan ang grabe nga reyalidad sang kapigaduhon, paghimulos kag pagpamigos sang estado. Ginbag-o siya sang iya hilikuton sa masa kag mas pa nga nagpalig-on sang iya panindugan nga maghulag indi lang bilang pastor sang pagtuo, kundi bilang pag-alagad sa rebolusyon.

Sadtong Pebrero 17, 1972, nagtungod sang yabe nga katungdanan si Ka Louie sa pagtukod sa Christians for National Liberation (CNL) sa pag-organisa sa mga pareho niya nga relihoyoso nga may progresibo nga panghuna-huna, agud pamatukan ang pasistang kakugmat sang estado sang diktaduryang Marcos Sr. Sa asembliya sang pagtukod sini, napilian si Ka Louie kag iya asawa nga si Ka Coni sa National Executive Board. Sang masunod nga bulan, sadtong Marso 1972, nagpatapo si Ka Louie sa Partido Komunista ng Pilipinas. Sang ulihi ang CNL nagserbe nga isa sa mga alyado nga organisasyon nga nagtukod sang NDFP sadtong 1973.

Sang magdeklarar sang layi militar si Marcos, nangin kabahin si Ka Louie sang kahublagan likom agud pakig-awayan ang pasistang diktadurya. Siya kag si Ka Coni naaresto sadtong 1973 kag ginbilanggo sa Fort Bonifacio. Didto, halos isa ka tuig nga nabilanggo si Ka Louie sa isa ka madulom kag wala sang bintana nga selda kaupod ang anum ukon pito ka iban pa. Naduso sang serye nga mga protesta kag kampanya sang mga relihiyoso kag internasyunal nga grupo sa tawhanon nga kinamatarung ang rehimen Marcos nga hilwayon sila sadtong Hulyo 1974.

Gilayon nga nagbalik sa rebolusyonaryong hilikuton si Ka Louie sang siya mahilway. Sadtong 1975, nagbulig siya sa pag-organisa kag koordinasyon sa makasaysayan nga welga sang mga mamumugon sa La Tondeña sa Manila—una nga mayor nga welga sang mga mamumugon sa idalum sang paghari militar. Epektibo nga ginbuka sang welga ang klima sang kahadlok nga dulot sang layi militar kag ginmarkahan ang liwat nga pagbuylo sang serye sang mga paghimakas masa kag lapnagon nga mga demonstrasyon sa ulihi nga bahin sang dekada 1970 kag temprano nga bahin sang dekada 1980.

Sadtong 1976, nagkadto si Ka Louie sa luwas sang pungsod agud pamunuan ang hilikuton sa internasyunal nga pakig-relasyon para sa Partido kag ibuyagyag ang brutal nga mga krimen sang diktaduryang Marcos.Tungod sa mga pamahog kag pat-od nga paglagas kon sila magbalik sa Pilipinas, nagpangayo kag ginhatagan sang political asylum si Ka Louie kag Ka Coni sa Netherlands—kag sila ang nangin mga una nga Pilipino nga nakabaton sini. Halin sa pagkadistyero, matutom nga nagtrabaho si Ka Louie agud pabaskugon ang suporta para sa rebolusyon Pilipino.

Sadtong Hulyo 1977, pormal nga ginbutang si Ka Louie bilang Internasyunal nga Tiglawas sang NDFP. Nagtungod siya sang malahalon nga papel sa pagtukod sang Internasyunal nga Opisina sang NDFP sa Utrecht kag pag-organisa sang pangkalibutanon nga suporta para sa pakig-away sang pumuluyong Pilipino sa diktaduryang US-Marcos. Nagserbe siya nga yabe nga tig-organisa sang People’s Permanent Tribunal on the Philippines sadtong 1980 nga nagbuyagyag sa tuman nga paglapas sang rehimen sa tawhanon nga kinamatarung, kag nagkilala sa NDF bilang matuod nga tiglawas sang pumuluyong Pilipino.

Bilang pinuno nga internasyunal nga tiglawas sang NDFP, ginpatigayon ni Ka Louie ang proto-diplomatiko nga hilikuton kag nagtukod sang relasyon sa mga dumuluong nga gobyerno, internasyunal nga ahensya, mga grupo pang-solidaridad, kag mga rebolusyonaryong kahublagan kag partido sa bug-os nga kalibutan. Nagbulig siya sa pagpabaskog sang tingog sang pumuluyong Pilipino paagi sa pagpahayag sang makatarungan nga kawsa sang rebolusyonaryong kahublagan.

Sadtong 1989, ginbutang si Ka Louie bilang pinuno nga negosyador sang NDFP sa negosasyon pangkalinong sa Gobyerno sang Republika sang Pilipinas. Sa katungdanan nga ini, ginpakita niya ang malig-on nga panindugan sang rebolusyonaryong kahublagan nga maagum ang makatarungan kag pangmalawigon nga kalinong—isa ka kalinong nga magasabat sa mga ugat sang armadong konplikto: kawad-on sang duta, kapigaduhon, kag dumuluong nga pagpangsakop. Sa indi maisip nga mga halintang sang negosasyon, malig-on nga nagtindog si Ka Louie bilang haligi sang integridad kag rebolusyonaryong determinasyon, nga pirme ginauna ang pumuluyong Pilipino sa proseso.

Ginapaabot namon ang amon bug-os-taguipusoon nga pagpasalamat kay Ka Louie Jalandoni sa paghalad sang iya kabuhi sa pumuluyong Pilipino, sa National Democratic Front, kag sa Partido Komunista ng Pilipinas. Tubtob katubtuban namon nga pakamahalon ang iya tuman ka dako nga kontribusyon sa pagsulong sang paghimakas sang pumuluyo para sa pungsodnon kag sosyal nga kahilwayan. Sa amon pagtangis sa iya pagtaliwan, malig-on namon nga ginapangako nga ipadayon namon ang iya ginpapanubli nga wala sang pagpangduha-duha nga pag-alagad, wala sang dulunan nga pagkamapainubuson, rebolusyonaryong integridad, kag panindugan sa paglunsar sang demokratikong rebolusyon sang banwa tubtob sa himpit na maagum ang kadalag-an.

Mabuhay ang handurawan ni Ka Louie Jalandoni!

Ipadayon ang iya dungganon nga rebolusyonaryong panublion!