Mabaskog nga ginakondena sang National Democratic Front-Negros (NDF-Negros) ang patraidor kag mapintas nga pagpatay sa mga tinawo sang NDF-Negros nga sanday Nonoy Ponteras (Ka Jojo) kag Marisa Pobresa (Ka Kim).

Sadtong Marso 7, alas 8 sang gab-i, pwersado nga gin-abdak sang mga operatiba sang Crime Investigation and Detection Group sang Philippine National Police (PNP) kag mga tinawo sang Armed Forces of the Philippines (AFP) sila Ka Jojo kag Ka Kim sa isa ka balay sa Bacolod City. Pwersa sila nga ginpasakay sa isa ka van kag gindala sa wala natumbok nga lugar, kon diin sila lubos nga ginsalbeyds.

Ang bangkay sang duha gindala sang mga berdugo ni Marcos sa Sityo Paraiso, Barangay Caduhaan, Cadiz City, Negros Occidental. Sunod nga adlaw, naghimo-himo sang kabutigan ang tagpamaba sang militar nga kuno napatay ang duha sa isa ka engkwentro pasado ala-una sang kaagahon sa tunga sang 79th IB kag New People’s Army (NPA).

Ang matuod, wala sang yunit sang NPA sa lugar kag sa mga oras nga ini. Ang ginsiling nga engkwentro pabula lamang sang militar agud hinabonan ang malala nga krimen kag paglapas sa makatawo nga laye nga pagpatay sa mga indi armado nga sibilyan nga yara sa ila mga kamot bilang bihag.

Si Ka Jojo kag Ka Kim gintalana nga sibilyan nga mga katapo sang NDF-Negros. Si Ka Jojo, 48 anyos, isa sa nagapanguna nga opisyal sang NDF-Negros. Si Ka Kim, nga nag-23 anyos sang kaadlawan niya sadtong Marso 7, isa sa nagadumala sa talatapan sang NDF-Negros. Halin sila sa hanay sang mga Pulang hangaway sang NPA.

Lakip sa responsibilidad nila ang makigkonsultasyon sa mga mamumugon, mangunguma, mamumugon sa uma, kag lain-lain nga mga imol kag pigos nga sektor sa isla agud buligan sila nga hatagan sang tingog ang ila mga reklamo kag isulong ang ila mga paghimakas.

Ang traidor nga pagpatay kay Ka Jojo kag Ka Kim kabahin sa nagapadayon nga madugoon kag mapintas nga kampanya sang pagsumpo sang rehimen US-Marcos sa isla sang Negros kag sa bug-os nga pungsod.

Tuman na ka laba sang listahan sang pagpang-abuso sang rehimen sa malapad nga pumuluyo kag mga katapo sang rebolusyonaryong kahublagan. Imbes atubangon ang NDFP sa hinun-anon pangkalinong agud solbaron ang ugat sang armadong konplikto sa pungsod, mas ginpili ni Marcos nga buhian ang iya mga pasista nga ido buang sa kabukiran kag kasyudaran agud halitan ang pumuluyo nga nagatib-ong kag nagahimakas para sa ila kinamatarung sa matuod nga reporma sa duta kag pungsodnon nga industriyalisasyon.

Ginapahanumdum sang NDF-Negros sa rehimen US-Marcos nga bisan amo pa man kapintas, mapaslawan ang pasismo sang estado nga wasakon ang rebolusyonaryong kahublagan. Tubtob indi masolbar ang problema sang kaimolon, kagutom, pagpamigos kag pagpanghimulos, magbangon kag magbangon ang pumuluyo kag usuyon ang banas sang armadong pakigbato.

Sa masobra na 50 anyos nga pagsulong sang rebolusyonaryong kahublagan, wala ini madugmok sang bisan sin-o man nga papet nga rehimen bisan ano pa ka sopistikado ang gindesenyo nga kontra-insurehensya nga kampanya sang iya amo nga imperyalismong US gamit ang mga mabaskog kag moderno nga armas.

Imbes nga madugmok ang rebolusyonaryong kahublagan, pila ka mga presidente sang reaksyunaryong estado nga grabe ang ginhimo nga kalapasan nga pagpangawat sa kaban sang banwa, pagpangkawkaw, kag pagpang-ipit sang demokratikong kinamataraung sang pumuluyo ang ginpalayas sa poder kag ginpapriso sang malapad nga pumuluyo nga ila biktima. Kasubong sang nahitabo subong sa anay Presidente Rodrigo Duterte nga gin-aresto sang International Criminal Court (ICC), kag anay presidente Marcos Sr, Joseph ‘Erap’ Estrada kag Gloria Macapagal Arroyo.

Tubtob indi masolbar ang krisis sosyo-ekonomiko nga amo ang nagatuga sang indi maagwanta nga pag-antus, gutom kag kapigaduhon sa malapad nga pumuluyo, padayon nga magaluntad kag magasulong ang armadong paghimakas sa pungsod. Ang binhi sang rebolusyon nga nasabwag sa matambok nga duta sa kabukiran kag kasyudaran padayon nga magadabong kag magalapta sa bug-os nga pungsod. Madamo pa nga Ka Jojo kag Ka Kim ang magatuhaw tubtob indi sinsero kag seryoso nga makig-estorya sa NDF ang GRP.